کراچی ساؤتھ سینٹرل زون مدنی انعامات کے اراکین کابینہ کا مدنی مشورہ ہوا جس میں شعبہ کی کارکردگی اور مدنی انعامات کو عام کرنے کے حوالے سے بات کرتے ہوئے رکن شوریٰ حاجی محمد علی عطاری نے رہنمائی فرمائی۔مدنی مشورے میں حکومتی ایس او پیز کا خیال رکھتے ہوئے 12 مدنی کاموں کے حوالے سے تجاویز پر غور کیا گیابالخصوص محاسبہ تحریک، تلاوت قراٰن پاک، درود پاک پڑھنا، گھر درس،آن لائن مدنی حلقہ، مطالعہ کرنے اور نفل  روزوں کی تحریک کے حوالے سے ترغیب دلائی گئی۔رکن شوریٰ نے اسلامی بھائیوں کو انفرادی طور پر مدنی کاموں کو بڑھانے کے حوالے سے ذہن بھی دیا۔

پچھلے دنوں کراچی تیز آندھی اور بارش کا سلسلہ ہوا جس کے بارے میں پروگرام ”دلوں کی راحت“ میں  گفتگو کرتے ہوئے امیر اہل سنت علامہ محمد الیاس عطار قادری دَامَتْ بَرَکَاتُہُمُ الْعَالِیَہ نے تیز آندھی وقت مکی مدنی سرکار صلَّی اللہ علیہ واٰلہٖ وسلَّم کا کیا انداز ہوتا تھا یہ بتایا۔

اسی آندھی کے دوران سرجانی ٹاؤن بھینس کالونی کے کئی باڑوں میں آگ گئی جن میں درجنوں جانور جھلس کر ہلاک ہوگئے جبکہ ایک مسجد بھی شہید ہوگئی۔ اطلاع ملنے پر امیر اہل سنت دَامَتْ بَرَکَاتُہُمُ الْعَالِیَہ نے مالکان کو صبر کرنے کی تلقین کی اور بارگاہِ رب العزت میں انہیں نقصان کا نعم البدل عطا کرنے اور صبر کرنے پر اجر عظیم عطا کرنے کے بارے میں دعائیں کیں۔

مجھے اپنی اور ساری دنیا کے لوگوں کی اصلاح کی کوشش کرنی ہے کہ جذبے کے تحت  سنتوں کو عام کرنے والی مدنی تحریک دعوت اسلامی کے مبلغین ملک و بیرون ملک مدنی کاموں کی دھومیں مچارہے ہیں۔ ان مدنی کاموں کو مزید بہترسے بہتر انداز میں سرانجام دینے کےلئے وقتا فوقتا مدنی مشوروں کا سلسلہ بھی رہتا ہے۔ اسی حوالے سےگزشتہ روزبذریعہ انٹرنیٹ ہالینڈ، کوریا، موزمبیق، ساؤتھ افریقہ، ترکی، نیپال، ملائیشیا، ماپوتو، بلیجئیم، بنگلہ دیش، سری لنکا سمیت 53ممالک کے ذمہ داران کا مدنی مشورہ ہوا جس میں ریجن نگران ، مشاورتوں کے ذمہ داران سمیت 5ہزارسے زائداسلامی بھائی شریک ہوئے۔مرکزی مجلس شوریٰ کے نگران مولانا محمد عمران عطاری مَدَّظِلُّہُ الْعَالِی نے اوورسیز ذمہ داران سنتوں بھرا بیان کیا اور لاک ڈاؤن میں وقت گزارنے کے حوالے سے مدنی پھول دیئے۔

ضیاء الدین یونیورسٹی کے ایجوکیشن بورڈ کے ایگزیکٹو ڈائریکٹر اور عصری علوم کے ماہر پروفیسر انوار احمد زئی  31 مئی 2020ء کو رضائے الٰہی سے انتقال کرگئے تھے۔ دعوت اسلامی کی مجلس شعبہ تعلیم کے ذمہ داران نے مرحوم کے گھر جاکر ان کے صاحبزادے عزیز احمد زئی،چھوٹے بھائی مسرور احمدزئی اور دیگر اہل خانہ سے ملاقات کی اور تعزیت کرتے ہوئے مرحوم کے ایصال ثواب کےلئے دعا بھی کی۔ ذمہ دار اسلامی بھائی نے سوگواروں کو مرحوم کے ثواب جاریہ کے حوالے سے مدنی پھول دئیے اور انہیں دعوت اسلامی کے مدنی ماحول سے وابستہ ہونے کا ذہن بھی دیا۔

دعوت اسلامی کی مرکزی مجلس شوریٰ کے رکن حاجی محمد امین عطاری ٹھٹھہ پہنچے جہاں انہوں نے ٹھٹھہ کے نگران کابینہ عابدعطاری مرحوم کے گھر جاکر ان کے بھائیوں،بچوں اور دیگر اہل خانہ  سے تعزیت کی اور مرحوم کے ایصال ثواب کےلئے دعائے مغفرت کی۔ رکن شوریٰ نے اہل خانہ کو مرحوم کے ایصال ثواب کےلئے مدنی کاموں میں شرکت کرنے کا ذہن دیا جبکہ حاجی محمد امین عطاری نے مرحوم عابدعطاری کی قبرپر جاکر فاتحہ خوانی بھی کی۔

بعد ازاں رکنِ شوریٰ کراچی کے علاقے گلشن حدید پہنچے جہاں انہوں نے مقامی شخصیت صابربھائی کے گھر جاکر ان سے ملاقات کی اور ان کی والدہ کے انتقال پر تعزیت کرتے ہوئےمرحومہ کے لئے دعائے مغفرت کی۔

رکن شوریٰ نے گلشن حدید میں زیر تعمیر مسجد فیضان فاروق اعظم کا دورہ بھی کیا اور وہاں جاری تعمیراتی کاموں کا جائزہ لیتے ہوئے ذمہ داران کی تعمیرات کے حوالے سے رہنمائی بھی فرمائی۔

دعوت اسلامی کےزیر اہتمام تھیلیسیمیا اور دیگر مریضوں کے لئے پاکستان کے مختلف شہروں میں وقتاً فوقتاً بلڈ کیمپ کا انعقاد کیا جارہا ہےجس میں عاشقانِ رسول اپنے خون کے عطیات جمع کراتے ہیں۔ اسی سلسلے میں کراچی کے علاقے کورنگی نمبر ایک اور ڈھائی پر بھی بلڈ کیمپس لگائے گئے جہاں علاقہ مکینوں اور اطراف کے اسلامی بھائیوں نے تھیلیمیسیا اور دیگر امراض میں مبتلا مریضوں کے لئے خون کے عطیات جمع کرائے۔ خون کے عطیات جمع کرانے والے عاشقان رسول نے دعوت اسلامی کی اس  کاوش کو خوب سراہا اور مدنی چینل کو اپنے تاثرات دیئے۔

واضح رہے کہ 25مارچ 2020کو لاک ڈاؤن کے بعد امیر اہل سنت دَامَتْ بَرَکَاتُہُمُ الْعَالِیَہ اور مجلس شوریٰ کی جانب سے ملک بھر میں تھیلیمیسیا اور دیگر امراض میں مبتلا مریضوں کو خون کے عطیات دینے کا اعلان کیاگیا جس کے بعد بڑے پیمانے پر بلڈ کیمپس لگائے گئے اور خون کی کمی کو پورا کرنے کی کوشش کی گئی۔ تاہم وقتاً فوقتاً دعوت اسلامی کے تحت ملک کے مختلف شہروں میں یہ بلڈکیمپ لگائے جارہے ہیں اور تھیلیسیمیا اور دیگر امراض کے مریضوں میں خون کی کمی کو پورا کیاجارہاہے۔

4جون 2020ء برو زجمعرات 9:30 بجے مدنی چینل پر  ہفتہ وارسنتوں بھرے اجتماع کا انعقاد کیا جائیگا جس میں خصوصی بیان مرکزی مجلس شوریٰ کے رکن حاجی محمد اظہر عطاری” محبت رسول کے تقاضے “ کے موضوع پر سنتوں بھرا بیان فرمائیں گے۔

واضح رہے! پاکستان سمیت دنیا بھر میں ہر جمعرات کو دعوت اسلامی کے زیر اہتمام ہفتہ وار اجتماعات کا سلسلہ ہوتاہے جن میں شرکت کرنے والے عاشقان رسول تلاوت، نعت، بیانات اور رقت انگیز دعاؤں سے فیض یاب ہوتے ہیں لیکن موجودہ ملکی صورت حال کے باعث یہ اجتماعات گیدرنگ کی صورت میں منعقد نہیں ہورہے، فقط مدنی چینل پر سنتوں بھرا بیان نشر کیا جاتا ہے جسے عاشقانِ رسول گھر بیٹھے ملاحظہ کرتے ہیں۔

دعوتِ اسلامی کے زیر اہتمام لانڈھی کابینہ کورنگی نمبر 4 میں میں تھیلیسیمیا اور دیگرخون کی بیماریوں میں مبتلا مریضوں کیلئےخون کے عطیات جمع کرنے کے لئے بلڈکیمپ کا انعقاد کیا گیا جس میں عاشقان رسول نے آکر اپنے خون کے عطیات جمع کرائے۔

گردے ہمارے جسم کے فاضل مواد کوصاف کرنے کا کام کرتے ہیں اگر آپ کو بلند فشار خون، ذیابیطس، یا شریانوں میں کھنچاؤ کا مرض ہے توممکنہ طور پر آپ کو گردے کی بیماریاں ہونے کا خطرہ بھی لاحق ہو سکتاہے اسی لئے گردوں کی صحت کا خیال رکھنا ضروری ہے۔ گردے ہمارے جسم میں خون کو صاف کرنے ،زہریلے مادوں کے اخراج ،ضرورت سے زائد پانی سے چھٹکارے، بلڈ پریشر کو کنٹرول کرنے ،خون کے سرخ ذرات کی پیدا وار اور ہڈیوں کی مضبوطی میں اہم کردار ادا کرتے ہیں۔

ماہرین کا کہنا ہے کہ حالیہ تحقیق کے مطابق دنیا میں ہر دس میں سے ایک فرد کسی حد تک گردے کے امراض میں مبتلا ہے اور اگر اس خرابی کا بروقت تدارک نہ کیا جائے تو گردوں کے فیل ہونے کا امکان ہوتاہے ، گردے کے امراض میں اضافہ ہونے کے اسباب میں گردے کی پتھری ،پانی کا کم استعمال ،آلود ہ پانی کا استعمال ،ورزش کا فقدان،خون میں کیلشیم کی کمی ،کیمیائی ادویہ کا بلاوجہ استعمال اور خون میں یورک ایسڈ کی زیادتی شامل ہیں۔گردوں کے امراض سے بچنے کے لیے صاف پانی کا زیادہ استعمال اور غذا ئی احتیاط ضروری ہے ۔

ماہرین کا مزید کہنا ہے گردوں کی حفاظت کے لئے سبزیوں کا استعمال زیادہ کرناچاہیئے ، ماہرین کے مطابق ہرے پتوں والی سبزیاں وٹامِن سی سے بھرپور ہوتی ہیں ،یہ وٹامن ہمارے بَلڈ شوگر کو کنٹرول کرتے ہیں، جس سے گردوں پر دباؤکم ہو جاتاہے۔ ماہرین کا کہنا ہے کہ ہَرے پتوں والی سبزیاں کثرت سے استعمال کرنی چاہئے روزانہ پتوں والی سبزیاں پکا کر یا سلاد کے طور پر کھائیں جائیں تو گردوں کو بیماریوں سے محفوظ رکھا جا سکتا ہے۔

اللہ عَزَّوَجَلَّ نے 7 ہزار سے زائد ٹڈیوں کی اقسام دنیا میں پیدا کی ہیں جس میں سے تقریباً 20 اقسام سبزی خوروں کی بھی ہیں۔ ان20 سبزی خوروں میں سے انتہائی خطرناک ٹڈی دَل ہے جو ایک اندازے کے مطابق ایک مربع کلومیٹر میں پھیلا ٹڈی دَل کا لشکر تقریباً 35 ہزار انسانوں کی خوراک ایک دن میں چَٹ کر جاتا ہے، ٹڈی دَل ایک ماہ ایک دن میں تقریباً ایک ہزار انڈے دیتا ہے اور اگر ان کو نمی میسر آجائے تو ان میں سے سیکڑوں بچے نکل آتے ہیں۔ یہ ٹڈی دل اپنی ساخت، شکل اور رنگ تبدیل کرتے رہتے ہیں اور جیسے جیسے ان کو خوراک ملتی جاتی ہے، یہ مزید طاقتور، خطرناک اور بھیانک ہوتے جاتے ہیں اور جہاں جہاں سے گزرتے ہیں فصلوں اور سبز درختوں کا صفایا کرکے تباہ و برباد کرتے جاتے ہیں۔ یہ ٹڈی دَل دانے دار فصلوں گندم، مکئی، باجرہ، چاول، چنا، دالوں، پھل دار درختوں کی سخت ترین دشمن ہے جو کہ انسانی خوراک کیلئے انتہائی اہم ہیں۔

امیر اہل سنت دَامَتْ بَرَکَاتُہُمُ الْعَالِیَہ نے ٹڈی دَل کے نقصان سے بچنے کیلئے روحانی علاج بتاتے ہوئے کہا کہ ” یَا عَلِیْمُ“ کسی کاغَذ پر لکھ کر صاف پانی کے پتیلے میں ڈال دیں اور اس کی سیاہی جب پانی میں گھل جائے تو اسپرے بوتل میں پانی کو ملا کر فصلوں پر چھڑکا جائے اِنْ شَآءَ اللہ عَزَّ وَجَلَّ اس سے فائدہ ہوگا۔

لاہور کے علاقے گرین ٹاؤن فیز میں دعوت اسلامی کے ایک پرانے اسلامی بھائی   محمد انور عطاری فجر کی نماز کی ادائیگی کے دوران انتقال کرگئے جنہیں مقامی قبرستان میں سپرد خاک کردیاگیا۔ دعوت اسلامی کی مرکزی مجلس شوریٰ کے رکن و مجلس کفن دفن کے نگران حاجی منصور عطاری نے مرحوم کے گھرجاکر ان کے بیٹے نگران کابینہ محمد زبیر عطاری سے ملاقات کی اورمرحوم کے ایصال ثواب کیلئے دعا بھی کی۔ اس موقع پر زبیر عطاری کا کہنا تھا کہ مرحوم امیر اہل سنت دَامَتْ بَرَکَاتُہُمُ الْعَالِیَہ سے عقیدت رکھتے تھے اور ان کے مرید بھی تھے جبکہ باقاعدگی سے صدائے مدینہ بھی لگاتے تھے۔ان کا مزید کہنا تھا کہ دعوت اسلامی کے مدنی ماحول سے وابستہ رہنے کی برکت سے ان کے والد کو قابل رشک موت آئی۔

دنیا بھر میں قراٰن وسنت کی تعلیمات کو عام کرنے والی عاشقان رسول کی مدنی تحریک دعوت اسلامی کے زیر ِ اہتمام پنجاب کے شہر خان پور غزالی ٹاؤن میں مسجد فیضان جمال مصطفی کا سنگ بنیاد رکھنے کا سلسلہ ہوا جس میں نگران ریجن و رکن شوریٰ حاجی محمد اسلم عطاری، نگران زون،دیگر ذمہ داران اور شخصیات سمیت اہل علاقہ نے بھی شرکت کی۔

رکن شوریٰ حاجی محمد اسلم عطاری نے اینٹیں لگاکر مسجد کا سنگ بنیاد رکھا اور مسجد کی جلد تعمیر کیلئے دعا بھی کروائی۔ اس موقع پر رکن شوریٰ نے مخیر حضرات سے بھی مسجد کی تعمیرات میں بھرپور حصہ لینے کی ترغیب دلاتے ہوئے فرمایا کہ اِنْ شَآءَ اللہ عَزَّ وَجَلَّ مسجد کی تعمیرات کے بعد عاشقان رسول یہاں نماز پڑھیں گےاور بچے قراٰن پاک کی تعلیمات حاصل کریں گے۔