”اَلْعِلْمُ حَیَاةُالْاِسْلَامِ وَعِمَادُ الْا یْمَانِ“علم اسلام کی زندگی اور دین کا ستون ہے۔ (جمع الجوامع، ۵/۲۰۰،حدیث:۱۴۵۱۸)

شیخ الاسلام، امام برہان الاسلام، ابراہیم زَرنُوجی عَلَیْہِ رَحمَۃُ اللّٰہ ِالْقَوِی تحریر فرماتے ہیں:”علم کو اس وجہ سے شرافت و عظمت حاصل ہے کہ علم تقویٰ تک پہنچنے کا وسیلہ ہے جس کے سبب بندہ اللہ عَزَّ وَجَلَّ کے حضور بزرگی اور ابدی سعادت کا مستحق ہوجاتا ہے“۔ (تعلیم المتعلم طریق التعلم،ص۶)

اعلیٰ حضرت مولانا شاہ امام احمد رضا خان عَلَیْہِ رَحمَۃُ الرَّحْمٰن فرماتے ہیں: ”بے علم مجاہدہ والوں کو شیطان انگلیوں پر نچاتا ہے ،منہ میں لگام ،ناک میں نکیل ڈال کر جدھر چاہے کھینچے پھرتا ہے“۔ (فتاویٰ رضویہ،۲۱/۵۲۸)

عاشقان رسول کو علم کے سمندر میں ڈبونے اور علمی خزانے سے مالا مال کرنے کے لئے ہر ہفتے عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا جاتاہے جس میں امیر اہل سنت دَامَتْ بَرَکَاتُہُمُ الْعَالِیَہ علم و حکمت سے بھر پور مدنی پھول ارشاد فرماتے ہیں۔

اسی سلسلے میں 30 اکتوبر 2021ء کو بعد نماز عشاء دعوت اسلامی کے زیر اہتمام عالمی مدنی مرکز فیضان مدینہ کراچی سے براہ راست مدنی چینل پر ہفتہ وار مدنی مذاکرے کا انعقاد کیا جائیگا جس میں بانی دعوت اسلامی علامہ محمد الیاس عطار قادری دَامَتْ بَرَکَاتُہُمُ الْعَالِیَہاسلامی بھائیوں کی جانب سے ہونے والے سوالات کے علم و حکمت سے بھر پور جوابات ارشاد فرمائیں گے۔ اس کے علاوہ امیر اہل سنت دَامَتْ بَرَکَاتُہُمُ الْعَالِیَہ مدنی مذاکرے میں طبی اور روحانی علاج بھی بیان کرتے ہیں۔

23اکتوبر 2021ء کو عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا گیا جس میں کثیر تعداد میں عاشقانِ رسول نے  فیضانِ مدینہ آکر جبکہ سینکڑوں مقامات پر ہزاروں عاشقان رسول نے بذریعہ مدنی چینل شرکت کی۔

مدنی مذاکرے میں امیر اہلسنت علامہ محمد الیاس عطار قادری دَامَتْ بَرَکَاتُہُمُ الْعَالِیَہ نے عاشقان رسول کی جانب سے ہونے والے سوالات کے حکمت بھرے جوابات ارشاد فرمائے۔

مدنی مذاکرے کے چند مدنی پھول ملاحظہ کیجئے

سوال : جنت کی چابی کیا ہے اوراس کے دندانے کیا ہیں ؟

جواب : لَاۤاِلٰہَ اِلَّااللہ جنت کی چابی ہے ،اس کے دندانے فرائض و واجبات کااداکرنا اورگناہوں سے بچناہے ۔

سوال : کسی کو یہ کہنا کیسا ہے کہ "تم ڈِھیٹ مٹی کے بنائے گئے ہو" ؟

جواب: ایسی باتیں نہیں کرنی چاہئیں،البتہ جس مٹی سے انسان کو بنایا گیا ہے وہ کئی طرح کی تھی اوراس میں کئی صفات ہیں مثلاًنرمی ،سختی وغیرہ۔

سوال: اگر ماں اور باپ دونوں فوت ہوچکے ہوں تو پہلے کس کی قبرپرجائے؟

جواب:قبرستان جاتے ہوئے جس کی قبرپہلےآجائے ،پہلے وہاں حاضرہوکر فاتحہ خوانی کرلے۔

سوال : حضرت بہاؤالدین انصاری رحمۃ اللہ علیہ کے بارے میں کچھ مدنی پھول عنایت فر ما دیں؟

جواب: حضرت بہاؤالدین انصاری رحمۃ اللہ علیہ قادریہ رضویہ سلسلے کے بزرگ تھے ،صاحبِ تصنیف تھے،حضرت شیخ احمد جیلانی رحمۃاللہ علیہ

نے بیت اللہ شریف میں انہیں سلسلہ قادریہ کی خلافت عطافرمائی تھی۔

سوال : کیاہم کسی کو رِیا کارکہہ سکتے ہیں ؟بزرگانِ دین چھپ کر کیوں عبادت کرتے تھے ؟

جواب : رِیایعنی دِکھاواباطنی امراض میں سے ہے، اس کا تعلق نیت یعنی دل سے ہے اس لیے کسی کو رِیاکارنہیں کہنا چاہئے ۔البتہ نیکی کو ظاہرکرنے سے رِیا کاری سےبچنا مشکل ہوجاتاہے، اس لیے بزرگانِ دین چھپ کرعبادت کرتے تھے ۔

سوال : رِیا کاری سے کیا مرادہے؟

جواب: اپنی نیکی کے بارے میں کسی کو بتانا تاکہ میرامقام اوراحترام سامنے والےکےدل میں پیداہوجائے مثلاً سامنے والا اسے نیک سمجھےیا دوسرے سے مال بٹورنا چاہتاہے،اس لیے اپنی نیکی کا اظہارکررہا ہے تویہ ریا کاری ہے ۔

سوال: علم کے فضائل کے بارے میں جو احادیث ہیں، ان سے مرادکون ساعلم ہے؟

جواب : علم کے فضائل کے بارے میں جتنی احادیث ہیں ان سے مراد دِینی علم ہے،دنیاوی علم مرادنہیں ۔

سوال : حُبِّ جاہ کا کیامعنی ہے؟

جواب :واہ واہ کی خواہش ،حب ِّجاہ یعنی مقام ومرتبے کی محبت کہلاتاہے یہ بڑی خطرناک باطنی بیماری ہے،بچوں میں بھی یہ خواہش ہوتی ہے اوربڑوں میں بھی۔اس سے بچنے کی کوشش کرنی چاہئے ۔

سوال : کیا جنّ کو اصلی شکل میں دیکھنا ممکن ہے ؟

جواب:نہیں

سوال: اِس ہفتے کارِسالہ"فیضانِ امام احمد بن حنبل"پڑھنے یاسُننے والوں کو امیرِاہلِ ِسُنّت دامت برکاتہم العالیہنے کیا دُعا دی ؟

جواب: یا ربَّ المصطفٰے! جو کوئی17 صفحات کا رسالہ "فیضانِ امام احمد بن حنبل" کے17 صفحات پڑھ یا سُن لے اُسے بُرے خاتمے سے بچانا ،مدینےمیں محبوب ِکریم صلَّی اللہ علیہ واٰلہٖ وسلَّم کے جلووں میں شہادت کی موت نصیب فرمانا ۔ اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔

یکم ربیع الاول 1443ھ سے عالمی مدنی مرکز فیضان مدینہ کراچی میں جشن عید میلاد النبی صلَّی اللہ تعالٰی علیہ واٰلہٖ وسلَّمکے سلسلے میں 12 دن مسلسل مدنی مذاکرے کا سلسلہ جاری تھاجس میں بانی دعوت اسلامی امیر اہلِ سنّت علامہ محمد الیاس عطار قادری دَامَتْ بَرَکَاتُہُمُ الْعَالِیَہ عاشقان رسول کو شرعی و مذہبی طریقے سے میلاد منانے اور سیرت رسول کو اپنانے کی ترغیب دلارہے تھے۔

12 ربیع الاول کےبعد آج 23 اکتوبر 2021ء کی شب عالمی مدنی مرکز فیضان مدینہ کراچی میں براہ راست مدنی چینل پر مدنی مذاکرے کا انعقاد کیا جائیگا جس میں امیر اہل سنت علامہ محمد الیاس عطار قادری دَامَتْ بَرَکَاتُہُمُ الْعَالِیَہ عاشقان رسول کی جانب سے ہونے والے سوالات کے حکمت بھرے جوابات ارشاد فرمائیں گے۔

تمام اسلامی بھائیوں سے اس مدنی مذاکرے میں شرکت کرنے کی درخواست ہے۔

ولادتِ مصطفٰے صلَّی اللہ علیہ واٰلہٖ وسلَّم کا مہینہ، ماہِ ربیع الاول کا آغاز ہونے والا ہے جس میں عاشقانِ رسول کے جذبات اُبھر جاتے ہیں اور دنیا بھر میں اس مہینے کو نہایت عقیدت واحترام سے منایا جاتا ہے۔

دعوت اسلامی بھی ان پُر نور لمحات کو شرعی دائرے میں رہتے ہوئے نہایت جوش و جذبے سے گزارتی ہےجس کے لئے عالمی مدنی مرکز فیضان کراچی میں مدنی مذاکروں کا انعقاد کیا جاتا ہے۔ ان مدنی مذاکروں میں امیر اہلسنت علامہ محمد الیاس عطار قادری دَامَتْ بَرَکَاتُہُمُ الْعَالِیَہ سیرت رسول صلَّی اللہ علیہ واٰلہٖ وسلَّم اورمحبت رسول صلَّی اللہ علیہ واٰلہٖ وسلَّم پر مدنی پھول ارشاد فرماتے ہیں اور مسلمانوں کے دلوں میں عشقِ رسول کو اُجاگر کرنے کے ساتھ ساتھ انہیں حضور صلَّی علیہ واٰلہٖ وسلَّم کی تعلیمات پر عمل کرنے کی ترغیب دلاتے ہیں۔

اسی سلسلےمیں 7 اکتوبر 2021ء بروز جمعرات بعد نمازعشاء رات 9:00 بجے سے روزانہ مدنی مذاکروں کا سلسلہ شروع ہوجائیگاجو 13 ویں ربیع الاول تک جاری رہے گا۔ عاشقان رسول ان مدنی مذاکرے میں شرکت کرتے ہوئے ”صبح بہاراں“ کا استقبال کریں گے جبکہ امیر اہلسنت دَامَتْ بَرَکَاتُہُمُ الْعَالِیَہ روزانہ عاشقان رسول کی جانب سے ہونے والے سوالات کے جوابات ارشاد فرمائیں گے۔

تمام عاشقان رسول ان مدنی مذاکروں میں شرکت فرماکر اپنے دلوں کو عشق رسول سے منور فرمائیں۔

واضح رہے کہ ان مدنی مذاکروں کو مدنی چینل پر بھی براہ راست نشر کیا جائیگا۔

2اکتوبر 2021ء کو عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا گیا جس میں کثیر تعداد میں عاشقانِ رسول نے  فیضانِ مدینہ آکر جبکہ سینکڑوں مقامات پر ہزاروں عاشقان رسول نے بذریعہ مدنی چینل شرکت کی۔

مدنی مذاکرے میں امیر اہلسنت علامہ محمد الیاس عطار قادری دَامَتْ بَرَکَاتُہُمُ الْعَالِیَہ نے عاشقان رسول کی جانب سے ہونے والے سوالات کے حکمت بھرے جوابات ارشاد فرمائے۔

مدنی مذاکرے کے چند مدنی پھول ملاحظہ کیجئے

سوال: سَرمیں تیل لگانے کے کیافوائدہیں ؟

جواب: نُور والے آقا،مکی مدنی مصطفیٰ صلی اللہ علیہ والہ وسلم کثرت سے تیل لگایاکرتے تھے ،تیل لگانے سے سکون ملتاہے ،نیندآتی ہے ،دماغ کو تازگی ملتی ہے ،سبھی کے لیےسَرمیں تیل لگانامفیدہے بالخصوص جو علمِ دین پڑھتے پڑھاتے ہیں ان کے لیے توزیادہ مفیدہے ۔

سوال : ورزش کرتے ہوئے ذِکرُاللہ کرنا کیسا؟

جواب: اگرسِتْر(یعنی ناف سے لے کر گھٹنوں کے نیچے تک کا حصہ)چھپاہوا ہو اورٹانگیں سمٹی ہوئی ہوں تو ذِکرُاللہ کرنے میں حرج نہیں بلکہ اچھا ہے ۔

سوال:جوانی میں توبہ کے کیا فضائل ہیں ؟

جواب: اللہ پاک جوانی میں توبہ کرنے والے کو پسندفرماتاہے ،فرامینِ مصطفی (صلی اللہ علیہ والہ وسلم) :(1) اللہ پاک کو توبہ کرنے والے نوجوان سے زیادہ پسندیدہ کوئی نہیں۔ (کنز العمال، حدیث : 43101) (2)اِنَّ اللہَ تَعَالٰی یُحِبُّ الشَّابَّ التَّائِبَیعنی جوانی میں توبہ کرنے والا شخص اللہ پاک کا محبوب ہے۔(کنز العُمّال،حدیث : 10181)

سوال : کوئی شخص 500مرتبہ دُرُودشریف پڑھے تو کیا جو3یا50 یا 100مرتبہ دُرودشریف پڑھنے کے فضائل حاصل ہوجائیں گے ؟

جواب: ایسانہیں ہے ،جواورادکی تعداد احادیث وغیرہ میں بیان ہوتی ہے اس پر عمل کرنا چاہئے،تبھی وہ فضیلتیں حاصل ہوں گی ۔

سوال : دستارِ فضیلت کے اجتماع میں کیا ہوتاہے ؟

جواب: جودرسِ نظامی کا8سالہ کورس(عالم کورس) مکمل کرلیتے ہیں تو ان کے استاذیا کوئی بزرگ انہیں دستاریعنی عمامہ باندھتے ہیں ،جواسلامی بہنیں یہ کورس مکمل کرلیتی ہیں تو ان کی رِداپوشی ہوتی ہے یعنی ان کی اُستانی یا کوئی نیک خاتون انہیں چادراُڑھادیتی ہیں ۔

سوال : کیا مونگ پھلی رات کو کھانے سے تنگدستی آتی ہے ؟

جواب: ایسانہیں ہے ،اس طرح کی بے پرکی نہیں اُڑانی چاہئے،مونگ پھلی غریبوں کا خشک میوہ ہے ،یعنی بادام پستہ ہے کیونکہ یہ بادام پستہ سے سستی ہوتی ہے ۔

سوال : ہمیں کیسامسلمان بنناہے؟

جواب : ہمیں اچھا مسلمان بنناہے کسی پر ظلم نہیں کرنا ،نہ الزام تراشی کرنی ہے ،نہ چورکہنا ہے،گھرمیں ایساہوتو گھریلوفسادہوتاہے ،کسی کوفائنل کردینا کہ تُو جھوٹاہے ،اورشرعی دلیل نہ ہوتویہ گناہ ہے۔سُنی سنائی باتوں پر اعتمادکرنے کے بجائے خاموش رہیں ۔

سوال : کینسرکا کوئی رُوحانی علاج بتادیجئے ؟

جواب:اوّل وآخر11،11 باردُرُودشریف اوردرمیان میں سورۂ مریم 1بارپڑھ کرپانی پردم کرکے مریض کو پلاتے رہیں ،انْ شآءَ اللہُ الکریم کینسرسے شفاحاصل ہوگی ۔

سوال: آپ نے مدنی مذاکرہ کب شروع فرمایا ؟

جواب: مدنی مذاکرہ دعوتِ اسلامی سے بھی پہلے تھا،یہ سوال جواب کا سلسلہ بہت پراناہے ،عام طورپرآسان سوال ہوتے تھے ،بہارِشریعت کا مطالعہ اچھا تھا ، جوجواب نہیں آتےتھے ، وہ مفتی وقارالدین قادری صاحب رحمۃ اللہ علیہ کے پاس جاکرپوچھتاتھا ،ان کے پاس جانا ہوتا ،ان کی صحبت ملتی تھی۔

سوال: اِس ہفتے کےرِسالے ” اعلیٰ حضرت اور امیر اہلسنت “ پڑھنے یاسُننے والوں کو جانشین ِامیرِاہلِ ِسُنّت دامت برکاتہم العالیہنے کیا دُعا دی ؟

جواب: یااللہ پاک! جو کائی 17 صفحات کا رسالہ ”اعلیٰ حضرت اور امیر اہلسنت“ پڑھ یا سُن لے اُسے اپنے ولی کامل اعلیٰ حضرت امام اہلسنت رحمۃ اللہ علیہ کی تعلیمات پر عمل کرتے ہوئے فیضانِ رضا سے مالا مال فرماکر بے حساب مغفرت سے نواز دے ۔ اٰمِیْن بِجَاہِ خَاتَم ِالنَّبیّن صلَّی اللہ علیہ واٰلہٖ وسلَّم۔

جشن ولادت ماہ ربیع الاول کی آمد کی آمد ہے ۔ عاشقان رسول اپنے کو دلوں تھامے ماہ میلادکے استقبال کے لئے بے قرار ہیں۔

ماہ ربیع الاول کی آمدسے قبل ہی ہزاروں عاشقان رسول اپنے گھروں ، علاقوں، دکانوں اور سواریوں پر چراغاں کرکے تیاریاں شروع کردیتے ہیں اور اپنے عشق کا اظہار کرتے ہیں۔ عالمی مدنی مرکز فیضانِ مدینہ کو بھی برقی قمقموں سے سجادیا گیا ہے۔

جشن ولادت کے چراغاں کے متعلق اہم مدنی مذاکرہ یکم اکتوبر 2021ء بروز جمعہ بعد نماز عشاء رات 9:30 بجے عالمی مدنی مرکز فیضان مدینہ کراچی میں منعقد ہوگا۔ اس مدنی مذاکرے میں بانی دعوت اسلامی علامہ محمد الیاس عطار قادری دَامَتْ بَرَکَاتُہُمُ الْعَالِیَہ چراغاں کے متعلق شرعی رہنمائی کریں گے اور عاشقان رسو ل کی جانب سے ہونے والے سوالات کے جوابات ارشاد فرمائینگے۔

تمام انجمن اور میلاد کمیٹیوں کے ممبران و عہدیداران سے اس مدنی مذاکرے میں شرکت کی خصوصی التجا ہے۔ 

25 ستمبر 2021ء بمطابق 18 صفر المظفر 1443ھ کو عالمی مدنی  مرکز فیضان مدینہ کراچی سے براہ راست مدنی چینل پر ہفتہ وار مدنی مذاکرے کا سلسلہ ہوا جس میں کثیر عاشقان رسول نے فیضان مدینہ آکر جبکہ دیگر مقامات پر لاکھوں اسلامی بھائیوں نے شرکت کی۔

امیر اہلسنت علامہ محمد الیاس عطار قادری دَامَتْ بَرَکَاتُہُمُ الْعَالِیَہ نے عاشقان رسول کی جانب سے ہونے والے سوالات کے جوابات ارشاد فرماتے ہوئے فرمایا کہ دنیا کے جو کام مباح ہیں یا جوکام ضروری ہیں مثلاً رزقِ حلال کمانا ،جوکہ فرض کے بعدفرض ہے ،ان میں اچھی اچھی نیتیں کریں تو آخرت کی تیاری میں آجائے گا، سونے میں یہ نیت کرلیں کہ میں عبادت پر قوت حاصل کرنے کے لیے سوتاہوں تو یہ ساراثواب کاکام اورعبادت ہوجائےگا ،اس طرح مباح وجائز کاموں میں اچھی اچھی نیتیں کرکے پورادن آخرت کی تیاری کا جدول بنایا جاسکتاہے ،علمِ دین حاصل کرنے کے لیے وقت نکالئے،گناہوں بھرے کام ترک کرنا تو فرض ہے ،فضول کام بھی ترک کردیجئے،آدمی کرنا چاہے تو بہت کچھ کرسکتاہے ،اگرخود ہی سست ہے تو اس کا کیا علاج ہے ۔

مدنی مذاکرے کے مدنی پھول ملاحظہ کیجئے

سوال : کیاسینی ٹائزر(Hand Sanitizer) بچوں کی پہنچ سے دُور رکھاجائے؟اس سے نقصان کا اندیشہ ہوتو کیا کیا جائے؟

جواب : سینی ٹائزر(Hand Sanitizer) بچوں کی پہنچ سے دوررکھیں ،بچے اِسے پی بھی سکتے ہیں ،اگرچہرے پر لگالیں گے تو ان کی آنکھوں کو نقصان پہنچ سکتاہے ،اگرایساہوجائے تو ان کی آنکھوں پر پانی ڈالیں ،اگرآنکھیں سُرخ ہوجائیں تو فوراً ڈاکٹرکوچیک کروائیں ۔

سوال : اگرمشکلات اورپریشانیاں آئیں تو بندہ کیا کرے ؟

جواب: نبی پاک صلی اللہ علیہ والہ وسلم پر ہونے والے مظالم کویا دکیا جائے ،کربلاوالوں کی تکالیف کوسامنے رکھا جائے تو صبرکرنا آسان ہوگا ،پریشانیاں تو آتی ہیں ،ان پرصبرکرکے ثواب کمانا چاہئے ،بے صبری کرنے سے ثواب کاخزانہ ضائع ہوجائے گا،اس نقصان کا مرنے کے بعد ہی اندازاہوسکے گا۔

سوال: کیا کبھی آپ کی مدینۂ منورہ میں مختصروقت میں حاضری بھی ہوئی ہے ؟

جواب:جی ہاں !ایک بارایسی حاضری ہوئی کہ جانے اورآنے کا سامان گاڑی میں ہی رہا اورحاضری کے بعد ہماری واپسی ہوئی ۔

سوال : بولنے سے پہلے سوچنے کی عادت ہو تواس کا کیا فائدہ ہے ؟

جواب : بولنے سے پہلے سوچنے کی عادت ہو تو کئی پریشانیوں سے نجات مل جائے ،مثال ہے کہ فائر(Fire)کرنے سے پہلے سوچنافائدے مند ہوگا ،فائر کرنےکے بعد توجو ہونا ہوتاہے ہوجاتاہے بعد میں سوچنافائدہ نہیں دیتا، البتہ بھول کوقبول کرلینا بھی اچھاہے ،اس سے عزت میں اضافہ ہوتاہے ۔

سوال : کیا اعلیٰ حضرت امام احمدرضا خان رحمۃ اللہ علیہ کی محبت ہمارامعیارہے ؟

جواب:جی ہاں !اعلیٰ حضرت ہماری کسوٹی اورمعیارہیں ،جو اعلیٰ حضرت کا ہے وہ ہماراہے ،جواعلیٰ حضرت کا نہیں ،ہمارانہیں، اللہ پاک ہمیں اعلیٰحضرت رحمۃ اللہ علیہ کے قدموں میں رکھے۔

سوال: اِس ہفتے کےرِسالے ” باباجی اورگھرکےجھگڑے “ پڑھنے یاسُننے والوں کو امیرِاہلِ ِسُنّت دامت برکاتہم العالیہنے کیا دُعا دی ؟

جواب: یاربَّ المصطفیٰ ! جو کوئی 17 صفحات کا رسالہ ” باباجی اورگھرکےجھگڑے “ پڑھ یا سُن لے اُسےایمان وعافیت کے ساتھ سبزسبزگنبدکےزیرِ سایہ جلوۂ محبوب میں شہادت عطافرما۔ اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔

دعوت اسلامی کے زیر اہتمام 11 صفر المظفر 1443ھ بمطابق 18 ستمبر 2021ء کو عالمی مدنی مرکز فیضان مدینہ کراچی سے براہ راست مدنی چینل پر ہفتہ وار مدنی مذاکرے کا انعقاد کیا گیا جس میں کثیر تعداد میں عاشقان رسول نے شرکت کی۔

بانی دعوت اسلامی حضرت علامہ محمد الیاس عطار قادری دَامَتْ بَرَکَاتُہُمُ الْعَالِیَہ نےعاشقان رسول کی جانب سے ہونے والے سے سوالات کے جوابات ارشاد فرمائیں۔

مدنی مذاکرے کےمزید مدنی پھول ملاحظہ کیجئے

سوال : علم کی چابی کیا ہے ؟

جواب : علم کی چابی سوال ہے مگر فضول سوال نہیں کرنا چاہئے ۔

سوال : بچے کا نام کب رکھنا چاہئے ؟

جواب:افضل یہ ہے کہ ساتویں دن بچے کا عقیقہ کیا جائے اور نام رکھا جائے ، عقیقہ کرنے سے پہلے بھی نام رکھنا جائز ہے ۔ (نزھۃ القاری، 5  430/)۔ (عقیقہ کے بارے میں مزید معلومات جاننے کے لیے مکتبۃ المدینہ کے رِسالے"عقیقے کے بارے میں سوال جواب"کا مطالعہ کیجئے)

سوال: کیا بچوں کو میٹھا پان اورمیٹھا چھالیہ کھاناچاہیئے؟

جواب: میٹھا پان اورمیٹھا چھالیہ بچوں اوربڑوں سب کو نہیں کھانا چاہئے ،اس سےمعدہ خراب ہوتاہے،اپنی صحت کا خیال رکھیں ،بچوں کو تو یہ دکھائیں بھی نہیں کیونکہ ان کا گلااورمنہ نازک ہوتےہیں۔

سوال:گیارہویں شریف(محفل،لنگر،ایصالِ ثواب اجتماع وغیرہ) کرنے کے کیافوائدہیں ؟

جواب:گیارہویں شریف کرنے سے غوث ِپاک کی محبت بڑھے گی ،بزرگوں کی برکتیں ملیں گی ،اسلامی تاریخیں بھی یا درہیں گی ،میرامشورہ ہے ہرماہ گیارہویں شریف کیا کریں ۔

سوال : سانپ(Snake) سے بچنے کا طریقہ بتادیجئے ؟

جواب: ایک پاؤنوشادرکو پانچ سیر(5Kg)پانی میں گھول کرگھرکے تمام بِلّوں سوراخوں اورکونوں میں چھڑک دیں،اگرگھرمیں سانپ ہوگاتو بھاگ جائے گااورکبھی کبھی یہ پانی چھڑکتے رہیں تو اس مکان میں سانپ نہیں آئے گا،ان شآء اللہ الکریم ،دوسری ترکیب یہ ہے کہ گھرکے بِلّوں اوردوسرے سب سوراخوں میں رائی ڈال دیں ان شآءاللہ الکریم سانپ فوراًمرجائے گااوراگراپنے آس پاس رائی ڈال کرسوئیں تو ان شآء اللہُ الکریم سانپ قریب نہیں آئے گا۔(مدنی پنج سورہ ،صفحہ نمبر373)

سوال: اِس ہفتے کےرِسالے ”امیر اہلسنت سے بچوں کے بارے میں سوالات “پڑھنے یاسُننے والوں کوجانشینِ امیرِاہلِ ِسُنّت دامت برکاتہم العالیہنے کیا دُعا دی ؟

جواب: یااللہ کریم جو کوئی 17 صفحات کا رسالہ ”امیر اہلسنت سے بچوں کے بارے میں سوالات“ پڑھ یا سن لے اسے دین و دنیا کی برکات سے مالا مال فرماکر دینی مسائل پر عمل کرنے کی توفیق عطا فرما اور اسے بے حساب بخش دے۔اٰمِیْن بِجَاہِ النَّبِیِّ الْاَمِیْن صلَّی اللہ علیہ واٰلہٖ وسلَّم ۔

ضرورت کی قدرعلم دین حاصل کرنا یقینا ہر مسلمان مرد و عورت پر فرض ہے جیسا کہ حدیث پاک میں فرمایا گیا : طَلَبُ الْعِلْمِ فَرِیْضَۃٌ عَلٰی کُلِّ مُسلِمٍ ” یعنی علم طلب کرنا ہر مسلمان پر فرض ہے“۔ (سُنَنِ اِبن ماجہ ج۱ ص۱۴۶ حدیث ۲۲۴)

عاشقان رسول کو علم دین سے سیراب کرنے کے لئے ہر ہفتے کی طرح آج 18 ستمبر 2021ء کو عالمی مدنی مرکز فیضان مدینہ کراچی میں مدنی مذاکرے کا سلسلہ ہوگا جس میں شیخ طریقت رہبر شریعت امیر اہلسنت حضرت علامہ محمد الیاس عطار قادری دَامَتْ بَرَکَاتُہُمُ الْعَالِیَہ عاشقان رسول کی جانب سے ہونے والے سوالات کے علم و حکمت سے بھر پورجوابات ارشاد فرمائیں گے۔ یہ مدنی مذاکرہ مدنی چینل پر بھی براہ راست نشر کیا جائیگا۔

تمام عاشقانِ رسول سے گزارش کی جاتی ہے کہ اس مدنی مذاکرے میں شرکت کرکے علمِ دین کے نور سے اپنے سینوں کو منور فرمائیں۔

4ستمبر  2021ء کو بمطابق 27 محرم الحرام 1443ھ کی شب عالمی مدنی مرکز فیضانِ مدینہ میں ہفتہ وار مدنی مذاکرے کا سلسلہ ہوا جس میں بانیِ دعوتِ اسلامی حضرت علامہ مولانا محمدالیاس عطار قادری دَامَتْ بَرَکَاتُہُمُ الْعَالِیَہ نے عاشقانِ رسول کو علم و حکمت سے بھرپور مدنی پھول عطا فرمائے۔ عالمی مدنی مرکز فیضانِ مدینہ کراچی میں سینکڑوں جبکہ بیشتر مقامات پر ہزاروں عاشقانِ رسول نے جمع ہوکر اس مدنی مذاکرے میں شرکت کی سعادت حاصل کی۔ یوم دعوت اسلامی کے حوالے سے اس مدنی مذاکرے کے لئے خاص انتظامات کئے گئے جسے دنیا بھر میں لاکھوں عاشقان رسول نے اجتماعی طور دیکھنے کی سعادت حاصل کی۔

مدنی مذاکرے کےمزید مدنی پھول ملاحظہ کیجئے

سوال : جامعۃ المدینہ کے بارے میں آپ کی کیا رائے ہے، آپ جامعۃ المدینہ کے طلبۂ کرام اوردیگراسلامی بھائیوں کو کیا فرمائیں گے ؟

جواب :جامعۃ المدینہ کے طلبۂ کرام ہمارااثاثہ اورسرمایہ ہیں ،یہ عشقِ رسول رکھنے والے،دین سے محبت کرنے والےاوردیوانے ہوتے ہیں، دین سے محبت ہے تو انہوں نے جامعۃ المدینہ میں داخلہ لیا ہے ،طلبۂ کرام اگرسنتوں بھرالباس پہنیں ،عمامہ شریف سجائیں،ان کا اندازسنجیدہ ہوگا تو دعوت ِاسلامی کی بھی نیک نامی ہوگی ،حُسنِ اخلاق مومن کا زیورہے ،جارحانہ اندازاختیارنہ کیا جائے ،ہمارے کردارسے بھی دعوتِ اسلامی جھلکنی چاہئے ،ہمیں کردارسے بھی نیکی کی دعوت دینی چاہئے ،ہمیں دیکھنے والوں کو کاش !آقاصلی اللہ علیہ والہ وسلم یاد آجائیں ،شیطان یادنہ آئے ،ہمارے اخلاق گھر ،باہر،محلے اورجامعۃ المدینہ میں اچھے ہونے چاہئیں،ہمیں دوسروں کو راحت پہنچانی ہے ،تکلیف نہیں دینی ،کاش جس چیز کی اپنے کو ضرورت ہو،ہم دوسروں کی ضرورت پوری کرنے کے لیے دے دیں ۔

سوال : بنگلہ بھاشی اوربنگلہ دیشی میں کیا فرق ہے ،بنگلادیش والے دین سے کس طرح محبت کرتے ہیں ؟

جواب: بنگلہ بھاشی وہ ہیں جوہیں تو بنگلہ دیش کے لیکن ابھی دُوسرے ملکوں میں رہائش پذیر ہیں اورجو بنگلہ دیش میں موجودہیں ان کو ہم بنگلہ دیشی کہتے ہیں ،بنگلہ دیش کے لوگ دِین سے بہت محبت کرتے ہیں ،بنگلہ دیش دنیا کا واحدملک ہے جہاں حضورغوثِ اعظم رحمۃ اللہ علیہ کے عرس(بڑی گیارہویں شریف) کے موقع پر11 ربیع الاخرکوسرکاری(Officially) چھٹی ہوتی ہے ،میں انہیں فقرائے مدینہ کہتاہوں ۔

سوال: گناہوں سے بچنابہت مشکل ہے، اس کے لیےکیا کریں ؟

جواب: گناہوں کی ہلاکت خیزیاں یعنی نقصانات کا مطالعہ کریں ،گناہوں سے بچنے کے فضائل پڑھیں ،گناہوں سےبچنے کے فوائد پر نظررکھیں، عاشقانِ رسول کی صحبت اختیارکریں ،اُٹھتے بیٹھتے ’’یَاخَبِیْرُ‘‘کا ذکرکرتے رہیں ،اِنْ شَاۤءَ اللہُ الْکَرِیم گناہوں سے نفرت اورنیکیوں سے محبت ہوگی ۔

سوال: بدشگونی لینا کیسا؟

جواب:بدشگونی اسلام میں نہیں ہے ،یہ ناجائز وحرام ہے ،بدشگونی آجائے تو وہ جائز کام کرگزرے ، بدگمانی دینی علم نہ ہونے کی وجہ سے پیداہوتی ہے ، اس کے بارے میں معلومات کے لیے مکتبۃ المدینہ کی کتاب’’بدشگونی ‘‘کا مطالعہ کریں ،یہ بہترین کتاب ہے، ایسی کتاب نہ کبھی دیکھی نہ سُنی ۔

سوال : مفتی شریف الحق امجدی اورمفتی عبدالحلیم رضوی رحمۃ اللہ علیہما کے بارے میں آپ کیافرماتے ہیں ؟

جواب: شارح ِبخاری مفتی محمدشریف الحق امجدی استاذالعلمااورالجامعۃ الاشرفیہ مبارکپورہندکےاستاذ اوردعوتِ اسلامی سے بہت محبت کرتے تھے ،فرمایا کرتے تھے میری یہ ذمہ داریاں نہ ہوتیں تو میں دعوتِ اسلامی کا مبلغ ہوتااورمفتی عبدالحلیم رضوی ہندکے مشہورعالم تھے، انھوں نے دعو تِ اسلامی کابہت کام کیا ہے ،ایک دورمیں تو ہمارابہت ساتھ دیا ،سرپرستی کی اورآخری وقت تک دعوتِ اسلامی سے وابستہ رہے، میں نے ان کی بہت صحبت پائی ہے ،یہ رودیا کرتے تھے کہ کا ش !دعوتِ اسلامی مجھےجوانی میں مل جاتی مگراب مَیں بوڑھا ہوگیا ہوں ، اگرچہ آپ دعوت ِاسلامی کے لیے کافی کام کرتے تھے ،اس کے باجوداس طرح کہاکرتے تھے ، ان کی یادیں ہمارے دل کی دھڑکنوں میں ہیں۔

سوال : آپ نے پہلابیان کب فرمایا؟

جواب:مَیں نے انجمن خادمانِ اسلام کراچی کے تحت مبارک مسجدمیں ہونے والے اجتماع میں پہلا مذہبی بیان فضول خرچی کی مذمت پر کیا تھا ۔

سوال: اِس ہفتے کارِسالے”دعوتِ اسلامی کے بارے میں دلچسپ معلومات“ پڑھنے یاسُننے والوں کو امیرِاہلِ ِسُنّت دامت برکاتہم العالیہنے کیا دُعا دی؟

جواب: یااللہ پاک ! جو کوئی 51 صفحات کا رسالہ ”دعوتِ اسلامی کے بارے میں دلچسپ معلومات“ پڑھ یا سُن لے، اُسےدینِ اسلام کی خدمت کا سچّادرددےاوراُس کی بے حساب مغفرت فرما۔اٰمِیْن بِجَاہِ النَّبِیِّ الْاَمِیْن صلَّی اللہ علیہ واٰلہٖ وسلَّم ۔

آج 28 اگست 2021ء  کی شب تقریباً 9:15 بجے مدنی چینل پر براہ راست ہفتہ وار مدنی مذاکرے کا سلسلہ ہوگا جس میں امیرِ اہلِ سنت حضرت علامہ محمد الیاس عطار قادری دَامَتْ بَرَکَاتُہُمُ الْعَالِیَہ عاشقان رسول کی جانب سے ہونے والے سوالات کے حکمت بھرے جوابات بھی ارشاد فرمائیں گے۔مدنی مذاکرے میں شریعت اور طریقت کی رہنمائی، طبی اور روحانی علاج کے ساتھ ساتھ بہت سی مفید باتیں بیان کی جاتی ہیں۔ 

21 اگست 2021ء کو بمطابق 13 محرم الحرام 1443ھ کی شب عالمی مدنی مرکز فیضانِ مدینہ میں ہفتہ وار مدنی مذاکرے کا سلسلہ ہوا جس میں بانیِ دعوتِ اسلامی حضرت علامہ مولانا محمدالیاس عطار قادری دَامَتْ بَرَکَاتُہُمُ الْعَالِیَہ نے عاشقانِ رسول کو علم و حکمت سے بھرپور مدنی پھول عطا فرمائے۔ عالمی مدنی مرکز فیضانِ مدینہ کراچی میں سینکڑوں جبکہ بیشتر مقامات پر ہزاروں عاشقانِ رسول نے جمع ہوکر اس مدنی مذاکرے میں شرکت کی سعادت حاصل کی۔

مدنی مذاکرے کےمزید مدنی پھول ملاحظہ کیجئے

سوال : ماضی کی تلخ یادوں کو کیسے بُھلایا جائے ؟

جواب : اس طرح کی یادیں بعض اوقات نہیں بھُولتی مثلاً کسی نے سخت دل آزاری کردی ،ظلم کیا ،مارا،سخت جملہ کہہ دیا تووہ یادرہ جاتاہے، اس کا حل یہ ہے کہ بندہ اپنے آپ کونیک کاموں میں مصروف کرلے ،اچھی یادوں کو اپنے ذہن میں جگہ دے ،مدینے کی یادوں میں کھوجائے ،جنت اورآخرت کے بارے میں سوچے ،یہ بھی ہوسکتاہے کہ جس نے ظلم وغیرہ کیا ہواسے معاف کردے ،اس طرح بھی ان یادوں کا بھُلایا جاسکتاہے ۔

سوال : نظرِبدکتنی دیررہتی ہے ؟

جواب: نظرِبد کے وقت کی کوئی مدّت(Time Period) نہیں ،کبھی تو فوراً ختم ہو جاتی ہے مثلاً دم کردیا ،روحانی علاج کرلیااورکبھی تو لگتی بھی نہیں،کبھی سخت لگتی ہے تو بسترپرڈال دیتی ہے۔بہرحال اس کے وقت کی مدت(Time Period) کا کہیں پڑھا نہیں ۔

(یہ دونوں سورتیں" قُلْ اَعُوْذُبِرَبِّ الْفَلَقْ اورقُلْ اَعُوْذُ بِرَبِّ النَّاس جنّ و شیاطین اور نظر ِبد و آسیب اور تمام امراض خصوصاً جادو ٹُونے کا مجرب علاج ہیں۔ ان کو لکھ کر تعویذ بنائیں اور گلے میں پہنائیں۔ ان کو بار بار پڑھ کر مریض پردم کریں اور کھانے پانی اور دواؤں پر پڑھ کر پھونک ماریں اور مریض کو کھلائیں پلائیں۔ ان شاء اللہ الکریم ہر مرض خصوصاً جادو ٹُونا دفع ہو جائے گا اور مریض شفایاب ہوجائے گا۔)۔ بخاری و مسلم کی حدیث میں ہے کہ حضور ِاکرم صلی اللہ علیہ وسلم رات کو جب بستر مبارک پر تشریف لاتے تو اپنے دونوں ہاتھوں پر دم فرمایا کرتے اور اپنے سر سے پاؤں تک پورے جسم مبارک پر اپنے دونوں ہاتھوں کو پھرایا کرتے تھے جہاں تک دست ِمبارک پہنچ سکتے، یہ عمل 3 مرتبہ فرماتے۔ بحوالہ:عجائب القرآن مع غرائب القرآن)

سوال: خوش نصیب کون ہے ؟

جواب: خوش نصیب وہ ہے جو ایمان سلامت لے کر قبرمیں جائے ،قبرمیں بھی مؤمن ہو۔

سوال: کیا چڑچڑاپن اورغُصّہ ایک ہی چیز ہے یا جداجدا؟

جواب: چڑچڑاپن اورغُصّہ ایک جیسے ہی لگتےہیں ۔

سوال : نیک اعمال پر عمل کرنے والوں کے بارے میں آپ کے کیاجذبات ہیں ؟

جواب: میں جب نیک اعمال پرعمل کرنے والوں کودیکھتاہوں تو خوشی ہوتی ہے ،اللہ کرے کہ ہمارابچہ بچہ نیک اعمال کا عامل بن جائے ۔

سوال : 2ستمبریومِ دعوتِ اسلامی کیسے منایا جائے ؟

جواب : بچے کی سالگرہ پر خوشی منائی جاتی ہے ،عاشقانِ رسول کی دینی تحریک دعوتِ اسلامی کے 40 سال مکمل ہورہے ہیں تو ہمیں بھی خوشی منانی چاہئے ،ایک باریک نقطہ بھی ہے کہ بچے کی قسمت میں جوعمرلکھی گئی ہے ایک سال مکمل ہونے پراس کی زندگی کا ایک سال کم ہوجاتاہے جبکہ دعوتِ اسلامی کا تو ایک سال بڑھ جاتاہے ،میں نے نئے کپڑے پہننے کی نیت کی ہے ،آپ بھی پہن سکتے ہیں ،2ستمبرکو شکرانے کے دونوافل اداکیجئے،ائمہ کرام2ستمبر کو عشاء کی نماز کے بعد شکرانے کے 2نوافل با جماعت اداکرنے کا اہتمام فرمائیں،2ستمبر(2021ء) کے ہفتہ واراجتماع میں شرکت کیجئے ، میری خواہش ہے کہ ہفتے (4ستمبر2021) کو ہونے والے مدنی مذاکرہ اجتماعات میں اسلامی بھائی سفیدلباس اورسفیدعمامے میں شرکت کریں ،جامعۃ المدینہ کے طلبۂ کرام بھی سفیدلباس اورسفیدعمامے میں بھرپورشرکت کریں ۔اس موقع پر اپنی گاڑیوں پر مکتبۃ المدینہ سے جاری ہونے والے اسٹیکرزلگائیے۔

سوال: اِس ہفتے کےرِسالے ” امام حسین کے واقعات ‘‘پڑھنے یاسُننے والوں کو امیرِاہلِ ِسُنّت دامت برکاتہم العالیہنے کیا دُعا دی ؟

جواب: یاربَّ المصطفٰے! جو کوئی 17 صفحات کا رسالہ ”امام حسین کے واقعات“ پڑھ یا سُن لے، اُسے حضرت امام حسین رضی اللہ عنہ کی مبارک سیرت پر چلنے کی توفیق عطا کر اور جنت الفردوس میں بے حساب داخلہ نصیب فرما۔اٰمِیْن بِجَاہِ النَّبِیِّ الْاَمِیْن صلَّی اللہ علیہ واٰلہٖ وسلَّم ۔