دعوتِ اسلامی کے عالمی مدنی مرکز فیضانِ مدینہ کراچی میں ہونے والے تربیتی اجتماع میں  بیرونِ ملک سے آئے ہوئے عاشقانِ رسول کی تربیت کا سلسلہ جاری ہے ۔ دورانِ تربیت رکنِ شوریٰ حاجی ابو ماجد محمد شاہد عطاری مدنی نے شرکا کے درمیان سنّتوں بھرا بیان کیا اور شرکا کی تربیت کرتے ہوئے بیرونِ ملک میں اسلامی بہنوں کے مدنی کاموں میں معاونت کرنے اور مدرسۃ المدینہ بالغات کی تعداد بڑھانے کی ترغیب دلائی۔ (رپورٹ،ابو ابراہیم محمد جہانزیب عطاری مدنی ،معاون رکنِ شوریٰ ،کراچی)

فیصل آباد ریجن مدنی مرکز فیضانِ مدینہ  فیصل آباد میں دعوتِ اسلامی کے تحت تین دن 12 مدنی کام کورس کا انعقاد ہوا جس میں جامعۃ المدینہ کے اساتذہ ٔکرام اور ناظمین نے شرکت کی۔ نگران ِپاکستان انتظامی کابینہ نے دعوتِ اسلامی کا تعارف پیش کرتے ہوئےفرمایا کہ دعوت ِاسلامی کے 12 مدنی کام، 108شعبہ جات اور جتنے بھی اجلاس، جتنی بھی انفرادی کوششیں اور جتنی بھی کتب ہے سب ہی دعوتِ اسلامی کے کام ہیں۔امیر اہل سنّتدَامَتْ بَرَکَاتُہُمُ الْعَالِیَہ نے اسلامی بھائیوں اور اسلامی بہنوں کو مدنی مقصد عطا فرمایا ہے کہ” مجھے اپنی اور ساری دنیاکے لوگوں کی اصلاح کی کوشش کرنی ہے“۔نگران پاکستان نے اساتذۂ کرام کو12 مدنی کام پر عمل کرنے اور اپنی اور دوسرے لوگوں کی بہت اچھے طریقے سے اصلاح کرنے کا ذہن دیا۔

”امام حسین سے دوستی حضور اکرم سے دوستی ہے، امام حسین سے دشمنی حضور اکرم سے دشمنی ہے، امام حسین سے محبت کرنا حضور اکرم سے محبت کرنا ہے، اور میرے آقا محمد سے محبت کرنا اللہ سے محبت کرنا ہے۔“یہ کہنا تھا نگران پاکستان انتظامی کابینہ حاجی محمد شاہد عطاری کا جو فیضان مدینہ مدینہ ٹاؤن فیصل آباد میں ”جانِ عالم ہو فدا خاندان اہل بیت“ کے عنوان سے ہونےوالے سنتوں بھرے اجتماع میں بیان فرمارہے تھے۔ اس موقع پر ذمہ داران اور عاشقان رسول کی بڑی تعداد نے شرکت کی۔ 

پاکستان کے شہر پنجاب گجرات کٹریانوالہ میں دعوتِ اسلامی کے مدنی مرکز فیضانِ مدینہ کے افتتاح کے موقع پر سنّتوں بھرے اجتماع کا انعقاد کیا گیا جس میں عاشقان رسو ل کی کثیر تعداد نے شرکت کی۔ رکنِ شوریٰ حاجی محمد اظہر عطاری نے سنّتوں بھرا بیان کیا اور شرکا دعوتِ اسلامی کے تحت  دنیابھر میں ہونے والے مدنی کاموں سے متعلق آگاہی فراہم کرتے ہوئے دعوتِ اسلامی کے مدنی ماحول سے وابستہ رہنے اور ہفتہ وار اجتماع میں شرکت کرنے کی ترغیب دلائی۔

دنیا بھر میں قراٰن و سنّت کی تعلیمات کو عام کرنے والی  عاشقانِ رسول کی مدنی تحریک دعوتِ اسلامی کےتحت عالمی مدنی مرکز فیضان مدینہ میں سات دن کے تربیتی اجتماع کا آغازآج 18 ستمبر2019ء بروز بدھ سے ہو چکا ہے جس میں 32 ممالک سے ذمہ دار اسلامی بھائی شرکت فرما رہے ہیں۔اس سلسلے میں تربیتی اجتماع سے قبل امیر قافلہ کورس کا انعقاد کیا گیا جس میں مبلغِ دعوتِ اسلامی نے ”ایک امیر قافلہ کو کیسا ہونا چاہئے“کے متعلق ذمّہ داران کی تربیت کیاور نکات دئیے ۔

(کراچی رپورٹ)22 محرم الحرام 1441ھ / 22 ستمبر 2019ء بروز اتوار کو عالمی مدنی مرکز فیضانِ مدینہ، کراچی میں کراچی ریجن کے ذمہ داران کا اجلاس منعقد کیا جائے گا جس میں شہر کے تمام  نگرانِ علاقائی مشاورت، نگرانِ ڈویژن مشاورت ا ور نگرانِ کابینہ شرکت کررہے ہیں۔اجلاس کا وقت صبح 9 تا مغرب رکھا گیا ہے۔ اجلاس کی صدارت نگران پاکستان انتظامی کابینہ حاجی شاہد عطاری فرمائیں گے۔

عالمی مدنی مرکز فیضانِ مدینہ کراچی میں 15 ستمبر 2019ء  بروز اتوار اور پیر کی درمیانی شب اس سال حج کی سعادت پانے والے عاشقانِ رسول کے اعزاز میں عظیم الشان محفلِ نعت بنام ”استقبال حجاج کرام“ کا انعقاد کیا گیا جس میں حج کی سعادت پانے والے عاشقانِ رسول اور دیگر اسلامی بھائیوں نے شرکت کی۔ شیخ طریقت امیر اہل سنت دَامَتْ بَرَکَاتُہُمُ الْعَالِیَہ نے شرکائے محفل سے یادِ مدینہ کے موضوع پر گفتگو فرمائی جبکہ نگرانِ شوری مولانا محمد عمران عطاری مَدَّظِلُّہُ الْعَالِی نے بھی سنتوں بھرا بیان فرمایا۔

محفل کا آغاز تلاوت قرآن پاک سے ہوا جس کے بعد آقائے دو جہاں صلَّی اللہ تعالٰی علیہ واٰلہٖ وسلَّم کی بارگاہ میں ہدیہ نعت پیش کی گئی،محفل نعت میں دعوت اسلامی کی مرکزی مجلس شوریٰ کے نگران و اراکین شوریٰ اور مبلغین دعوت اسلامی و مختلف نعت خوانوں سمیت  1500 سے زائد اسلامی بھائیوں نے شرکت کی۔

محفلِ مدینہ میں شیخ طریقت امیر اہلِ سنت دَامَتْ بَرَکَاتُہُمُ الْعَالِیَہ کا کہناتھا کہ ”پیارے پیارے حاجیو! آپ کو بہت بہت مبارک ہو کہ حج کی سعادت سے مشرف ہوئے، واقعی یہ بہت بڑا شرف ہےجس کو ملا اس کو ملا، اللہ کرے کہ ہم اس کے قدر دان بنیں، آپ کو حج کی قبولیت کے تعلق سے بزرگوں کے کچھ اقوال پیش کرتا ہوں، اس پر غور کرتے چلے جائیں کہ کیا واقعی ہم نے ویسا ہی حج کیا جیسا کہ فرمایا گیا ہے، علمائے کرام رحمہم اللہ السلام فرماتے ہیں کہ حج مبرور وہ ہے جس کے بعد گناہ نہ ہو، میرے آقا اعلیٰ حضرت رحمۃ اللہ تعالٰی علیہ فرماتے ہیں ، حج مبرور کی نشانی ہی یہ ہے کہ پہلے سے اچھا ہو کر پلٹے ،دونوں اقوال پر ہم غور کریں کہ کیا حج کے بعد ہماری کیفیت کیا ہے۔ کسی کو حج سے واپسی دس دن ہوگئے ہوں گے کسی کو پندرہ دن ہوگئے ہوں گے کسی کو زیادہ ، کسی کو کم پھر یہ کہ اعلیٰ حضرت کا فرمان کہ اس کی نشانی ہی یہ ہے کہ پہلے سے اچھا ہو کر پلٹے تو واقعی ہم پہلے سے اچھے ہوئے؟ ، نمازوں کی پھرتی بڑھی؟ ہماری سستی اڑی؟ ، اخلاق پہلے سے بہتر ہوئے؟، گناہوں کا زور ختم ہوا؟، اللہ کریم نے ہم کو اتنی بڑی سعادت دی کہ ہم کو اپنے در پر بلایا، ہم نے اس کی کیا قدر کی؟، ایک قول ہے حجِ مبرور وہ ہے جو حاجی کا دل نرم کردے کہ اس کے دل میں سوز ، آنکھوں میں تری رہے۔

مفتی احمد یار خان رحمۃ اللہ علیہ فرماتے ہیں حج کرنا آسان ہے، حج سنبھالنا مشکل ہے۔منقول ہے کہ قبولیت ِ حج کی ایک علامت ایک نشانی یہ ہے کہ وہ جن نافرمانیوں میں مبتلا تھا انہیں چھوڑ دے اور اپنے بُرے دوستوں کو چھوڑ کر نیکوں کی صحبت اختیار کرے۔اصلاح کے لیے بہت ضروری ہے کہ اچھی صحبت اختیار کرے بُری صحبت میں بندہ اپنی اصلاح کر نہیں سکتا، کوئی کہے کہ میں کیچڑ میں لت پت ہوتا رہوں اور میررے کپڑے صاف ستھرے رہیں یہ ناممکن بات ہے اسی طرح بری صحبت میں رہ کر کوئی بولے کہ میں خدا کو پالوں گا اور خوفِ خدا بھی میرے اندر ہوگا اور سب کچھ ہوگا تو یہ ناممکن والی صورت ہے۔

محفل نعت کے اختتام پر صلاة والسلام پڑھا گیا جب کہ امیر اہل سنت نے خصوصی دعا فرمائی اور تقریباً ساڑھے تین سو اسلامی بھائیوں سے ملاقات فرمائی۔

نگرانِ شوری مولانا محمد عمران عطاری مَدَّظِلُّہُ الْعَالِی کی زیرِ صدارت دعوتِ اسلامی کی مرکزی مجلس شوریٰ کا تین دن کا اجلاس عالمی مدنی مرکز فیضانِ مدینہ کراچی میں جاری ہے۔ اجلاس کا آغاز 16 ستمبر 2019ء بروز پیر سے ہوا جس میں مرکزی مجلس شوریٰ کے تمام اراکینِ شرکت کررہے ہیں۔ اجلاس میں مختلف نکات پر غور کیا جارہا ہے جبکہ دعوتِ اسلامی کے موجود کاموں کی صورتِ حال کا جائزہ بھی لیا جارہا ہے۔ذمہ داران کو آئندہ کے اہداف بھی دیئے جائیں گے۔ مرکزی مجلس شوریٰ کا یہ اجلاس 18 ستمبر تک جاری رہے گا۔

اس سے قبل 7 تا 9 جولائی 2019ء کو شوریٰ کا اجلاس ہوا تھا جس میں بہت سی تنظیمی اصلاحات کی تبدیلی کی منظوری دی گئی تھی اور تحریری صورت میں اپڈیٹ جاری بھی کی گئی تھی۔

دعوتِ اسلامی کی مجلس جامعۃ المدینہ کے تحت عالمی مدنی مرکز فیضانِ مدینہ کراچی کے درجہ دورۂ حدیث شریف میں تربیتی اجتماع ہوا جس میں کراچی میں قائم 64 جامعات المدینہ کے اساتذہ ٔکرام اور ناظمین نے شرکت کی۔ کراچی ریجن کے ذمّہ داراسلامی بھائی نے شرکا کی تربیت اور اہم معاملات پر تبادلہ خیال کیا۔ اس موقع پر تعلیمی امور کےریجن ذمّہ دار نے بھی ان عاشقانِ رسول کی تربیت کی اور پوچھے گئے سوالات کے جوابات بھی دئیے۔

واضح رہے کہ جامعات المدینہ کے تمام اساتذہ ٔکرام اور ناظمین کی تربیت کا یہ سلسلہ سالانہ بنیادوں پر ہوتا رہتا ہے جس میں پچھلی کارکردگی کا جائزہ لیاجاتاہےجسکا مقصد اس شعبہ کی ترقی، شعبہ کی مزید بہتری کےلئے اقدامات کو بڑھانا اور آئندہ کے اہداف مقرر کرنا ہوتاہے۔ 

دعوتِ اسلامی کے عالمی مدنی مرکز فیضانِ مدینہ کراچی میں مجلس رابطہ برائے شوبز کے تحت سنّتوں بھرا اجتماع ہو اجس میں اندرونِ ملک سے آئے ہوئے شوبز سے وابستہ افراد نے شر کت کی۔رکنِ شوریٰ حاجی محمد امین عطاری اور دیگر مبلغینِ دعوتِ اسلامی نے شادی بیاہ،تجارت ،صفائی اور دیگر معاشی مسائل پر سنّتوں بھرا بیان کیا۔اجتماع کے اختتام پر شرکا نے نماز کورس کرنے اور شوبز کے دیگر افراد کو نیکی کی دعوت دینے کی نیت کی۔

مدینے کا ذکر عاشقِ مدینہ بلکہ کئی دلوں میں عشقِ مدینہ کی شمع فروزاں کرنے والے  امیرِ اہلِ سنت حضرت علامہ مولانا محمد الیاس عطار قادری دَامَتْ بَرَکَاتُہُمُ الْعَالِیَہ کی ہمراہی میں کیا جائے تو ذکرِ مدینہ کا لطف ہی دوبالا ہوجاتا ہے۔تمام عاشقانِ مدینہ کے لئے زبردست خوشخبری! کہ15 ستمبر 2019ء بروز اتوار دعوتِ اسلامی کے عالمی مدنی مرکز فیضانِ مدینہ پرانی سبزی منڈی کراچی میں اسقبالِ حجاج کرام کے سلسلے میں عظیم الشان محفلِ نعت کا اہتمام کیا جارہا ہے۔محفلِ پاک میں بانیِ دعوتِ اسلامی حضرت علامہ مولانا محمد الیاس عطار قادری دَامَتْ بَرَکَاتُہُمُ الْعَالِیَہ خصوصی طور پر شرکت فرمائیں گے جبکہ اس سال حج پر جانے والے حجاجِ کرام کو بھی محفل میں شرکت کی خاص دعوت دی گئی ہے۔بانیِ دعوتِ اسلامی سے ملاقات کے خواہشمند اسلامی بھائی اسی سال حج سے مشرف ہونے کا ثبوت دیکر عشاء کی نماز سے لیکررات 10:30 تک ٹوکن حاصل کرسکیں گے۔یاد رہے! عالمی مدنی مرکز فیضانِ مدینہ کراچی میں عشاء کی نماز 8:30 پر ادا کی جائے گی۔تمام عاشقانِ رسول سے اس محفلِ پاک میں شرکت کی درخواست کی جاتی ہے۔

دعوتِ اسلامی  کے زیرِ انتظام عالمی مدنی مرکز فیضانِ مدینہ کراچی میں مجلس تحفظِ اوراقِ مقدسہ کے ذمہ داران کا 9، 10، 11 ستمبر 2019ء کوتین دن کا تربیتی اجتماع منعقد ہوا۔ اجتماعِ پاک میں ملک بھر سے مجلس تحفظِ اوراقِ مقدسہ کے کم و بیش 4650 ذمہ داران نے شرکت کی سعادت حاصل کی۔ امیرِ اہلِ سنت علامہ مولانا محمد الیاس عطار قادری دَامَتْ بَرَکَاتُہُمُ الْعَالِیَہ نے مدنی مذاکروں، جانشینِ امیرِ اہلِ سنت مولانا عبید رضا عطاری مدنی مَدَّظِلُّہُ الْعَالِی اور اراکینِ شوریٰ و دیگر مبلغینِ دعوتِ اسلامی نے سنتوں بھرے بیانات کے ذریعے شرکا کی تربیت کی۔ اجتماع کے آخری روز رکنِ شوریٰ حاجی ابو ماجد محمد شاہد عطاری مدنی نے شرکا کے درمیان سنتوں بھرا بیان فرمایا اور انہیں اپنی مجلس کا کام مزید بہتر انداز میں کرنے کے متعلق قیمتی نکات پیش کئے۔