دعوتِ  اسلامی کے شعبہ جامعۃ المدینہ بوائز کے تحت طلبہ و اساتذہ کی صلاحیتوں میں مزید نکھار لانے کے سلسلے میں وقتاً فوقتاً تربیت سیشن کا سلسلہ جاری رہتا ہے ۔

اس حوالے سے 4 مارچ 2023ء بروز ہفتہ شعبہ جامعۃ المدینہ بوائز کی جانب سے آن لائن ٹریننگ سیشن منعقد ہوا جس میں لائیو لنک کے ذریعے پاکستان بھر کے مدرسین شریک ہوئے۔

استاذ العلماء مفتی محمد قاسم عطاری مد ظلہ العالی نے ٹیچرز میں سنتوں بھرا بیان فرمایا اور شرکا کی دینی و اخلاقی اعتبار سے تربیت فرماتے ہوئے انہیں درج ذیل نکات فراہم کئے نیز ان پر عمل کرنے کا ذہن بھی دیا ۔

ٹریننگ سیشن میں دیئے گئے نکات پیش خدمت ہیں!

تدریس کے تقاضے پورے کئے جائیں، تدریس میں آگے بڑھنے کی سوچ ہو اور پھر اس کے لئے کوشش بھی کی جائے۔

کسی بڑی شخصیت کو اپنا آئیڈیل بنائیں جیسے محدّثِ اعظم پاکستان مولانا محمد سردار احمد صاحب رحمة اللہ علیہ ، محدّثِ اعظم پاکستان صرف دورہ حدیث کے طلبہ کو پڑھاتے تھے اور ایک سال میں اپنے طلبہ کو ان خصوصیات سے آراستہ کر دیتے تھے :

1- عقیدے کی پختگی

2- عشقِ رسول صلی اللہ علیہ وسلم

3- اعلیٰ حضرت کا سچا شیدائی

4- عمل، تقوی اور اوراد و وظائف کا جذبہ

5- خدمتِ دین کا شوق

درس نظامی کے ٹیچر کے لئے سب سے پہلے یہ ہے کہ اس پر شرعی عالِم کی تعریف صادق آتی ہو ، عقائد بمع دلائل سے آگاہ ہو، عقائد کا علم ہو اور اس کو دل سے قبول کرنے والا بھی ہو۔

تدریس کو اجارے کے طور پر نہ کریں تدریس کو دینی منصب دینی ذمہ داری اور اعزاز سمجھ کر کریں ۔ یاد رکھیں! سوچ سے سب کچھ ہوتا ہے جب سوچ کے مطابق عمل کیا جائے اور سوچ سے کچھ بھی نہیں ہوتا جب آپ اس کے مطابق عمل نہ کریں ۔

علم کی غذا مطالعہ ہے اور روح کی غذا ذکر و عبادت ہے اور بدن کی غذا کھانا ہے، علم و روح کو ان کی غذا دیں ۔ سب سے پہلے ہدف بنا کر بہارِشریعت مکمل کر لیں اور پھر اس کو پوری زندگی اپنے مطالعے میں رکھیں، مجھے افتاء میں 22 سال ہو گئے ہیں میں اب بھی بہار شریعت پڑھتا ہوں ۔

یہی پریکٹس فتاویٰ رضویہ کے ساتھ بھی کریں۔ اسی طرح ایک بار مرآة المناجیح مکمل کر لیں بہت بڑا احادیث کریمہ کا ذخیرہ آپ پڑھ لیں گے ۔

باطن کا علم بہت ضروری ہے اس کے لئے کیمیائے سعادت مکمل پڑھ لیں ۔

فقہ ،عقائد، حدیث اور تصوف کے ساتھ کم از کم ایک تفسیر مکمل پڑھ لیں اس کے لئے صراط الجنان بہترین ہے یہ ایک بار پڑھ لیں میری ایک مختصر تفسیر آنے والی ہے دو جلدوں میں وہ بھی پڑھ لیں ۔

٭ عالِم کا وجود علمی وجود ہوتا ہے۔

علمی وجود کے لئے ماہانہ بنیادوں پر مطالعے کا ہدف رکھیں کہ مجھے مہینے میں 400 صفحات یا 500 صفحات پڑھنے ہیں روزانہ 15 صفحات پڑھیں گے تو مہینے میں 500 ہو جائیں گے یوں مجموعی طور پر ایک ذخیرہ پڑھ لیں گے آپ ۔

ماہانہ مطالعے میں سیرت و تاریخ بھی پڑھیں سیرت میں سرکارِ مدینہ، صحابہ کرام اور بزرگانِ دین کی سیرت پڑھیں ۔

کسی طرف انکارِ حدیث، کسی طرف انکارِ دین اور کسی طرف انکارِ بزرگانِ دین کا فتنہ ہے اس کے لئے عقائد میں پختگی لائیں ۔

اب دین کی خدمت آپ لوگوں نے کرنی ہے پاکستان کی کروڑوں کی آبادی ہے ان کو دین آپ لوگوں نے سِکھانا ہے۔ اسی طرح علمی ماہناموں کا مطالعہ کیا کریں، ماہنامہ فیضانِ مدینہ علمی اعتبار سے فائق ہے، دنیا بھر کے علمی ماہناموں کا مقابلہ کرنے کے لئے کافی ہے جتنے ماہنامہ فیضانِ مدینہ چھپ چکے ہیں سب کا مطالعہ کر لیں ۔

دارالافتاء اہلسنت سے مربوط رہیں آپ کے علاقے میں اگر دارالافتاء اہلسنت ہے تو اس میں آنا جانا رکھیں ہمارے متخصّصین علمی اعتبار سے مضبوط ہوتے ہیں دارالافتاء اہلسنت کے 100 سے زائد اسلامی بھائی پاکستان میں موجود ہیں ان سے مسائل میں ڈسکس کرتے رہیں ۔

استفادہ کرنے سے نہ شرمائیں یہ شرم تکبّر کی علامت ہے ،زندگی کا اصول بنا لیں پوچھنے میں شرم نہیں کرنی، بتانے میں بخل نہیں کرنا ۔

آپ کے سینئر اساتذہ جن کے علم و عمل سے فائدے کی امید ہے ان سے رابطہ مضبوط رکھیں ۔اگر ان باتوں کو مضبوطی سے تھام لیں گے تو آپ تدریس میں کمال حاصل کرتے جائیں گے اور کچھ عرصے بعد آپ نکھر کر اُبھریں گے ان شاء اللہ الکریم۔(رپورٹ :محمد امیر حمزہ عطاری (پروجیکٹ مینیجر ) آئی ٹی ڈیپارٹمنٹ آف جامعۃ المدینہ( بوائز) پاکستان،کانٹینٹ:رمضان رضا عطاری)

الحمد للہ !  سن 2023 ء میں جامعاتُ المدینہ سے تقریباً 1450 طلبہ ٔ کرام دورۃ الحدیث شریف کی تکمیل کر رہے ہیں اور ہر سال کی طرح اس سال بھی ان کے لئے تدریسی کورس کا اہتمام کیا گیا ہے ،پاکستان کے تقریبا 11 مقامات پر تدریسی کورس کروایا جائے گا جس میں تربیت کا سلسلہ ہو گا اور ٹیسٹ بھی لئے جائیں گے۔

78 کے قریب سینئر اساتذۂ کرام اپنی خدمات سر انجام دیں گے،اس نظام کو سال نو میں مزید بہتر بنانے کے لئے 2 مارچ 2023ء بروز جمعرات ایک مدنی مشورہ رکھا گیا جس میں اراکین زون تعلیمی ذمہ داران اور اساتذہ ٔکرام نے فزیکل اور آن لائن شرکت کی ۔

مدنی مشورے میں نگرانِ مجلس تعلیمی امور استاد محترم مفتی گل رضا عطاری اور رکن مجلس مولانا اعظم عطاری مدنی نے طلبۂ کرام کومختلف شارٹ کورسز کروانے کے حوالے سے مشاورت کی اور سال نو 2023ء کے اہداف فائنلائز کئے گئے ۔(رپورٹ: محمد امیر حمزہ عطاری (پروجیکٹ منیجر) آئی ٹی ڈیپارٹمنٹ آف جامعۃ المدینہ( بوائز) پاکستان ،کانٹینٹ : رمضان رضا عطاری)

جامعۃُ المدینہ بوائز دعوتِ اسلامی   کے تحت آن لائن مدنی مشورے کا انعقاد ہوا جس میں عصری علوم کے تعلیمی ذمہ داران نے شرکت کی ۔ نگرانِ مجلس تعلیمی امور استاد محترم گل رضا عطاری اور رکن مجلس عصری علوم مولانا عرفان عطاری مدنی نے سالانہ امتحانات کے انتظامات کی بہتر تیاری کرنے کے حوالے سے نکات بتائیں ۔

اس کے علاوہ مدنی مشورے میں سال نو 2023ء میں جامعۃ المدینہ کے تعلیمی نظام کو مزید اپڈیٹس کرنے کے حوالے سے باہمی مشاورت سے مدنی پھول طے کئے۔(رپورٹ: محمد امیر حمزہ عطاری (پروجیکٹ منیجر) آئی ٹی ڈیپارٹمنٹ آف جامعۃ المدینہ( بوائز) پاکستان ،کانٹینٹ : رمضان رضا عطاری)

دنیا بھر میں  دینِ اسلام کی تعلیمات عام کرنے والی عاشقانِ رسول کی دینی تحریک دعوتِ اسلامی کے شعبہ فیضان اسلام کی جانب سے 7دن کے رہائشی فیضان نماز کورس کا اہتما م کیا گیا جس میں نیو مسلم اسلامی بھائیوں نے شرکت کی۔

27فروری 2023ء بروز پیر شعبے کی جانب سے عالمی مدنی مرکز فیضانِ مدینہ کراچی میں نماز کورس کے اختتام پر سنتوں بھرے اجتماع کا انعقاد کیا گیا جس میں رکن شوریٰ حاجی محمد امین عطاری نے سنتوں بھرا بیان فرمایا ۔

دورانِ بیان رکنِ شوریٰ نے شرکا کو دینِ اسلام کی تعلیمات کے مطابق اپنی زندگی کے شب و روز گزارنے کا ذہن دیا نیز ہفتہ وار اجتماع ا ور مدنی مذاکرے میں باقاعدگی سے آنے کی ترغیب بھی دلائی جس پر انہوں نے اچھی اچھی نیتوں کا اظہار کیا۔آخر میں رکنِ شوریٰ نے ان اسلامی بھائیوں سے ملاقات فرمائی اور ان میں تحائف تقسیم کئے۔ (کانٹینٹ: رمضان رضا عطاری)

دعوتِ اسلامی کے شعبہ جامعۃُ المدینہ بوائزکے  تحت فیضانِ مدینہ جوہر ٹاؤن لاہور میں سنتوں بھرا اجتماع منعقد ہوا جس میں جامعۃُ المدینہ بوائز کے ناظمین و مدرسین شریک ہوئے۔

مرکزی مجلسِ شوریٰ کے رکن حاجی یعفور رضا عطاری نے ’’زوال کے اسباب‘‘ کے موضوع پر بیان کیا اور بیان کے آخر میں اسلامی بھائیوں کو دعوتِ اسلامی کے لئے ڈونیشن جمع کرنے نیز کراچی مدنی مرکز فیضانِ مدینہ اور لاہور کے فیضانِ مدینہ میں ہونے والے 1 ماہ کے اعتکاف کرنے کی ترغیب دلائی۔(کانٹینٹ:رمضان رضا عطاری)

13 فروری 2023ء کو جامعۃُ المدینہ فیضانِ عطار واٹر سپلائی روڈ سرگودھا میں جامعات المدینہ ڈویژن سرگودھا کے ناظمین کرام کا مدنی مشورہ ہوا ۔

مدنی مشورے میں صوبائی ذمہ دار سید ناظم لطیف عطاری نے اسلامی بھائیوں سے اہم امور پر تبادلۂ خیال کرتے ہوئے انہیں جامعات المدینہ کے لئے ڈونیشن جمع کرنے کا ذہن دیا جس پر اسلامی بھائیوں نے اچھی اچھی نیتیں کیں۔ (رپورٹ: فضیل رضا عطاری مدنی ، کانٹینٹ:رمضان رضا عطاری)

دعوتِ اسلامی  کے زیر اہتمام جامعۃ ُ المدینہ بوائز پتوکی میں یکم فروری 2023ء کو 3 دن پر مشتمل 12 دینی کام کورس مکمل ہواجس میں جامعۃُ المدینہ بوائز کے اسٹوڈنٹس نے شرکت کی۔

جامعۃ ُ المدینہ کے اساتذہ کرام نے طلبۂ کرام میں 12دینی کام کرنے کے اہداف پر بیان کرتے ہوئے دعوتِ اسلامی کے 12 دینی کام کرنے کا طریقہ سکھایا اوراس حوالے سے ان کی تربیت کی۔آخر میں امتحان کا بھی سلسلہ ہوا۔(رپورٹ: علی ریاض عطاری تحصیل ذمہ دار شعبہ سیکیورٹی ڈیپارٹمنٹ، کانٹینٹ: رمضان رضا عطاری)

28 جنوری 2023ء بروز ہفتہ فیضانِ مدینہ حاصل پور میں جامعۃ  المدينہ بوائز کے تحت سرپرست اجتماع کا انعقاد ہوا جس میں ائمہ ، خطبا، علما کے ساتھ ساتھ طلبا اور ان کے سرپرستوں نے شرکت کی۔

سرپرست اجتماع میں طلبہ ٔ کرام نے سنتوں بھرے بیانات کئے۔ بعدازاں پوزیشن ہولڈر طلبا کو تحصیل مشاورت نگران نے تحائف پیش کئے۔ نوٹ !اس موقع پر ایک شخصیت نے دعوتِ اسلامی کو دو کنال جگہ دینی کاموں کے لئے پیش کی۔ (کانٹینٹ: رمضان رضا عطاری)

گزشتہ روز  بدین سندھ کے علاقے بھنبھور میں قائم دعوتِ اسلامی کے جامعۃالمدینہ بوائز میں مدنی مشورہ ہوا جس میں طلبۂ کرام اور اساتذۂ کرام نے شرکت کی۔

اس مدنی مشورے میں مرکزی مجلسِ شوریٰ کے رکن و نگرانِ پاکستان مشاورت حاجی محمد شاہد عطاری نے شرکا کی تربیت و رہنمائی کرتے ہوئے انہیں مدنی پھولوں سے نوازا۔

علاوہ ازیں نگرانِ پاکستان مشاورت نے جامعۃالمدینہ بوائز کو خود کفیل کرنے، زیادہ سے زیادہ عطیات جمع کرنے، دعوتِ اسلامی کے 12 دینی کاموں بالخصوص ہفتہ وار سنتوں بھرے اجتماع میں بڑھ چڑھ کر حصہ لینے اور مدنی قافلے میں سفر کرنے کی ترغیب دلائی جس پر انہوں نے اچھی اچھی نیتیں کیں۔

آخر میں نگرانِ پاکستان مشاورت حاجی محمد شاہد عطاری نے اسلامی بھائیوں سے ملاقات کی اور انہیں تحائف دیئے۔(رپورٹ:عبدالخالق عطاری نیوز فالو اپ ذمہ دار، کانٹینٹ:غیاث الدین عطاری)

دعوتِ اسلامی کےزیرِ اہتمام  جامعۃ ُالمدینہ بوائز امینیہ رضویہ واربرٹن ڈسٹرکٹ ننکانہ میں 2 جنوری 2023ء کو یومِ قفلِ مدینہ کے موقع پر سنتوں بھرےاجتماع کا انعقاد کیا گیا ۔

اجتماعِ پاک میں جامعۃ ُالمدینہ کے طلبہ، اساتذہ سمیت مبلغِ دعوتِ اسلامی حاجی نصر اقبال عطاری ، امیر سنی علماکونسل مولانا اشفاق احمد رضوی، رانا محمد افتخار عطاری ، چوہدری ناظم حسین عطاری سمیت دیگر عاشقانِ رسول نے بھی شرکت کی ۔

اس موقع پر دعوتِ اسلامی کی مرکزی مجلسِ شوریٰ کے رکن حاجی محمد اظہر عطاری نے سنتوں بھرا بیان فرمایا ۔رکنِ شوریٰ نے بیان میں شرکا کو کم گوئی، اچھی گفتگو کرنے ، خود دار عالمِ دین بننے، تقویٰ و پرہیز گاری اپنانے، علما کے وقار میں اضافہ کرنے والی چیزوں کو اپنانے اور وسعتِ مطالعہ کا ذہن دیا جس پر طلبۂ کرام نے اچھی اچھی نیتوں کا اظہار کیا ۔(رپوٹ: محمد رمضان عطاری مدنی مدرس جامعۃ المدینہ امینیہ رضویہ واربرٹن ، کانٹینٹ:رمضان رضا عطاری)

15 دسمبر 2022ء بروز جمعرات دعوتِ اسلامی کے مدنی مرکز فیضانِ مدینہ جی الیون اسلام آباد میں قائم جامعۃالمدینہ بوائز میں ایک تربیتی سیشن ہوا جس میں طلبۂ کرام سمیت اساتذۂ کرام نے شرکت کی۔

اس سیشن میں مرکزی مجلسِ شوریٰ کے رکن حاجی محمد امین عطاری نے سنتوں بھرا بیان کرتے ہوئے طلبۂ کرام کی دینی و اخلاقی اعتبار سےت تربیت کی نیز انہیں دعوتِ اسلامی کے دینی کاموں میں عملی طور پر حصہ لینے کا ذہن دیا۔(رپورٹ:غیاث الدین عطاری)

پچھلے دعوتِ اسلامی   کے تحت خضدار میں جامعۃ ُالمدینہ بوائز کا افتتاح ہوا۔ اس موقع پر اجتماعِ ذکرونعت کا انعقاد کیا گیا۔ افتتاح صوبائی نگران حاجی محمد انور عطاری نے کیا ۔

اجتماع ِ پاک میں جامعۃُ المدینہ کے صوبائی ذمہ دار مولانا شہزاد رضا عطاری مدنی نے سنتوں بھرا بیان کرتے ہوئے کہاکہ ہمارے نزدیک کامیابی کے الگ الگ پیمانے ہیں ،کوئی علمی شخصیت ہے یا کوئی ٹیچر ہے ،کوئی مذہبی طور پر یا کسی نے کسی شعبہ میں کامیابی حاصل کی ہو تو ہم کہتے ہیں کہ اس نے ایک مقام حاصل کرلیا ہے،ہم ایسے کامیاب لوگوں کو دیکھ کرکوشش کرتے ہیں کہ ہم بھی ان کی طرح کامیاب ہوجائیں ۔

ایک شخص جو یہ چاہتا ہوکہ وہ سوتا رہے ، کام کاج نہ کرے ،تعلیم پر توجہ نہ دے ،موبائل میں وقت ضائع کرنا اس کی زندگی کا سہارا بن جائے، ایسا شخص کامیاب زندگی گزارنے کا خواہش مند ہو تو یاد رکھیں ایسے کامیاب زندگی نہیں ملا کرتی ، کامیابی فضول وقت برباد کرنے سے نہیں ملا کرتی ،وقت برباد کرنے اور محنت نہ کرنے والے لوگ کامیاب زندگی محض خوابوں اور خیالوں میں ہی تلاش کرتے رہتے ہیں ،حقیقت میں انہیں ایسی کامیاب زندگی نہیں ملا کرتی۔

دورانِ بیان انہوں نے مزید کہا کہ یہ بات یاد رکھیں کوئی بھی شخص کامیابی کی منزل پر محض سوچ کر نہیں پہنچتا بلکہ اگر کامیاب لوگوں کا ماضی دیکھیں تو معلوم ہوگا کہ ان کی زندگی قربانیوں سے بھری ہے،ان کی زندگی کی ایک اہم بات جو عام طور پر ملتی ہے وہ ان کا وقت ضائع نہ کرنا ہے،کامیابی حاصل کرنے کے لئے ایک عملی کارآمد اور وقت کی پابند زندگی گزارنی پڑتی ہے اور وقت کو سمجھنا پڑتا ہے۔

اس کے علاوہ انہوں نے کہا کہ حسنِ اسلام میں ہے کہ بندہ فضول اور بے مقصد کاموں کو چھوڑ دے،وقت کا درست استعمال بہت اہمیت کا حامل ہے،ہر کامیاب شخص اپنے وقت کو درست جگہ استعمال کرتا ہے اور وقت کو برباد نہیں کرتا ،لہٰذابامقصد کامیاب زندگی گزارنے کے لئے اپنے کاموں کو مرتب کریں ،شیڈول کے مطابق کام انجام دیں ،کس وقت کیا کرنا ہے یہ پہلے سے طے کریں۔رپورٹ: محمد وقار عطاری کوآرڈینیشن ڈیپارٹمنٹ شعبہ رابطہ برائے شخصیات ، کانٹینٹ: رمضان رضا)