طلبہ کو ان کی حوصلہ افزائی ہمیشہ یاد رہتی ہے۔رزلٹ ڈے کی تقریب بھی حوصلہ افزائی کا ایک ذریعہ ہے۔اس تقریب میں جہاں طلبہ اپنی کامیابی کا پھل پاتے ہیں ،وہیں تقاریر، خاکے اور دوسری ہم نصابی سرگرمیوں کے ذریعے ان کی خود اعتمادی میں بھی اضافہ ہوتا ہے۔

گزشتہ روز دارالمدینہ بوائز ہائی اسکول کے گلشن کیمپس،گزری کیمپس اور ملیر کیمپس کے رزلٹ ڈے کی تقریب این ای ڈی یونیورسٹی کے آڈیٹوریم میں منعقد ہوئی۔ اس پروقار تقریب کا آغاز تلاوت قراٰن پاک سے کیا گیا،اس کے بعد بارگاہ ِرسالت مآب صَلَّى اللهُ عَلَيْهِ وَسَلَّمَ میں نعت ِ رسول مقبول پڑھی گئی ۔

رزلٹ ڈے کی تقریب میں دعوتِ اسلامی کی مرکزی مجلس شوری ٰ کے رکن حاجی محمد علی عطاری نے ٹائم مینجمنٹ کے حوالے سے اپنے بیان میں کہا کہ ہر شخص کو چاہیئے کہ اپنے ہر کام کو کسی وقت کے اندر قید کرلے۔ میں تلاوت اس وقت کروں گا۔ درود پاک اس وقت پڑھوں گا۔ ماضی میں جن بزرگوں نے کامیابیاں حاصل کیں، ان کے لئے بھی 24گھنٹے کا دن تھا ۔وہ دنیا میں بھی کامیاب ہوئے اور آخرت میں بھی کامیاب ہوں گے (ان شاء اللہ عزوجل )۔رکنِ شوری نے زندگی کے مختلف امور میں نیکی کی دعوت اور دعوتِ اسلامی کے دینی کاموں کی اہمیت پر بھی روشنی ڈالی۔

دارالمدینہ انٹرنیشنل اسلامک ایجوکیشن سسٹم کے CEOڈاکٹر دانش اقبال گوڈیل عطاری کا کہنا تھاکہ مسلمانوں کی بھلائی کی نیت ہو تو ہم سائنسی علوم کے ذریعے ثواب کماسکتے ہیں ۔ انہوں نے والدین کو متوجہ کرتےہوئے کہا کہ آپ دارالمدینہ کے پارٹنرز ہیں۔ ہم مل کر دارالمدینہ کو ترقی کی راہ پر گامزن کرسکتے ہیں جبکہ دارالمدینہ اسٹرٹیجک کمیٹی کے رکن عرفان حسن نے کہا کہ طالب علموں کو اس بات پر شکر ادا کرنا چاہیئے کہ وہ دارالمدینہ میں تعلیم حاصل کررہے ہیں ۔

دارالمدینہ انٹرنیشنل اسلامک ایجوکیشن سسٹم کے COO اور نگران پنجاب مولانا زبیر عطاری مدنی نے کہا کہ دارالمدینہ آپ کے بچوں کے سینوں میں قرآنی الفاظ محفوظ کردیتا ہے۔ اس وقت تک 17ہزار سے زائد طلبہ مدنی قاعدہ اور پانچ ہزار سے زائد بچے ناظرہ قراٰن کی تکمیل کرچکے ہیں۔ ہمارا قرآنی مونٹیسوری کاایک نظام ہے ۔ پاکستان بھر کے منتخب کیمپسز میں حفظِ قراٰن اور پنجاب میں ترجمہ قراٰن کی تفہیم کا آغازبھی ہوچکا ہے۔ ہم ہر ماہ ایک تربیہ تھیم بناتے ہیں ۔ماہِ شعبان میں ایک ہفتے کی تھیم کی برکت سے ایک ارب سے زائد درود پاک بھیجے گئے۔

دارالمدینہ انٹرنیشنل اسلامک اسکول سسٹم کے COO اور نگرانِ سندھ مدنی رضا عطاری نےاظہار خیال کرتے ہوئے کہا کہ 2011 میں دارالمدینہ کے سفر کا آغاز ہوااور اب دنیا کے 7 ممالک کے195کیمپسزمیں تقریبا39ًہزارطلباوطالبات تعلیم حاصل کررہے ہیں۔رواں تعلیمی سال میں پاکستان کے میٹرک بورڈز میں ہونے والے امتحانات میں دارالمدینہ کے 73فی صد، کراچی کے 95فی صد اور کورنگی کیمپس ، کراچی کے 100فی صد طلباوطالبات نے اے ون اور اے گریڈحاصل کیا۔انہوں نے تعلیمی عمل میں والدین کے فیڈ بیک کی اہمیت اور پیرنٹ ٹیچرز میٹنگ میں ان کی شرکت پر زور دیا۔

تقریب میں دارالمدینہ کے طلبہ نے والدین کے آداب ، ری سائیکلنگ اور saving water پر تقاریر اور گفتگو کے آداب اور ماڈرن ٹیکنالوجیز پر مدنی خاکے بھی پیش کئے۔تقریب کے شرکاکو دارالمدینہ کی نئی ڈاکیومینٹری بھی دکھائی گئی ۔

اس تقریب میں دارالمدینہ انٹرنیشنل اسلامک اسکول سسٹم کے اراکین مجلس،ڈویژنل ہیڈز اورہیڈآف ڈیپارٹمنٹس کے علاوہ الکرم انٹرنیشنل انسٹیٹیوٹ کے وائس چانسلر محمد اسلم کمبوہ ، محکمہ تعلیم ،صوبہ سندھ کے افسران شمس الدین شیخ، ایڈیشنل سیکریٹری ایجوکیشن ڈیپارٹمنٹ،عبدالرشید بروہی، ڈپٹی سیکریٹری، کالج ایجوکیشن ڈیپارٹمنٹ اور عبدالستار عباسی، ٹاؤن ایجوکیشن آفیسرنے خصوصی طور پر شرکت کی۔

تقریب میں مدنی قاعدہ اور ناظرہ قراٰن کی تکمیل اور پوزیشن حاصل کرنے والے طلبہ میں انعامات تقسیم کیے گئے۔ دارالمدینہ ہیڈآفس میں بہتر کارکردگی پیش کرنے والے اسلامی بھائیوں میں بھی سرٹیفیکیٹ تقسیم کئے گئے۔ سلام اور دعا پر اس روح پرور نتائج کی تقریب کا اختتام ہوا۔ (رپورٹ: غلام محی الدین ترک ،اردو کانٹینٹ رائیٹرمارکیٹنگ اینڈ کمیونیکیشن ڈیپارٹمنٹ دارالمدینہ ،ہیڈ آفس کراچی، ویب ڈیسک رائٹر:غیاث الدین عطاری)

تعلیمی سرگرمیوں کے علاوہ زندگی کی مہارتوں کو نئے انداز اور نئے ماحول میں سیکھنا طلبہ کے لئے کافی فائدہ مند ہے۔سمر کیمپ ان باتوں کو نہ صرف بہتر انداز میں سرانجا م دیتا ہے بلکہ طلبہ کو کم وقت میں زیادہ سے زیادہ سیکھنے کا موقع بھی فراہم کرتا ہے۔

طلبہ کو موسم گرما کی چھٹیاں کسی ایسے سمر کیمپ میں گزارنی چاہییں جو اُن کی صلاحیتوں کو پروان چڑھاسکے۔ ایک اچھا سمر کیمپ نہ صرف ان کی ذہنی تھکاوٹ دور کرتا ہے بلکہ طلبہ پہلے سے زیادہ جوش و خروش سے تعلیمی عمل میں دلچسپی بھی لیتے ہیں۔

دارالمدینہ انٹرنیشنل اسلامک اسکول سسٹم کے سندھ ریجن میں 16جون سے22جون 2023ء تک سمر کیمپ شروع ہو رہا ہے۔

اس سمر کیمپ کے لئے دارالمدینہ کے ماہر ین نے منفرد سرگرمیاں تیار کی ہیں جو طلبہ کی تخلیقی صلاحیتوں کو اُجاگر کرنے ، نئی صلاحیتیں دریافت کرنے اور زندگی کی قیمتی مہارتیں حاصل کرنے میں مدد فراہم کریں گی ۔

طلبہ رنگوں کے ذریعے آگے بڑھنا چاہتے ہوں یا کہانیاں سناکر دوسروں کوحیران کرنا چاہتے ہوں یا پھر اپنے کردار سےمعاشرے میں مثبت اقدار کو فروغ دینا چاہتے ہوں،ان سب کے لئے دارالمدینہ سمر کیمپ میں بہترین سرگرمیاں موجود ہیں۔

اس سمر کیمپ میں تربیہ ایکٹیویٹیز، پینٹنگ، کہانیاں سنانا، آرٹ اینڈ کرافٹ ، اسپورٹس اور بہت سی دلچسپ سرگرمیوں میں طلبہ شرکت کرسکیں گے۔

اس سمر کیمپ میں دارالمدینہ کے علاوہ دوسرے اسکولوں کےطلبہ بھی شرکت کرسکیں گے۔ یہ کیمپ دارالمدینہ کے طلبہ کے لئے فری ہے جب کہ دوسرے اسکولوں کے طلبہ کے لئے سمر کیمپ میں شرکت کی فیس 1200روپے رکھی گئی ہے۔سمر کیمپ میں شرکت کے لئے

https://erp.darulmadinah.net/OnlinesummercampReg.aspx

طلبہ کی تعلیمی ،ذہنی ، جسمانی اور نفسیاتی نشوونما کے ساتھ ساتھ ان کی اخلاقی تربیت کرنا والدین اور اساتذہ کی اہم ذمہ داری ہے۔جس طرح درختوں کی نگہداشت سے ماحول کو سرسبزبنایا جاسکتا ہے اسی طرح طلبہ کی درست تعلیم وتربیت سے پورے معاشرے کو گلِ گلزار بنایا جاسکتا ہے۔تعلیم و تربیت کےاس سلسلے کو مؤثر بناتے ہوئے دارالمدینہ انٹرنیشنل اسلامک اسکول سسٹم گرمیوں کی چھٹیوں میں سمر ویکیشن ہوم ورک اور سمر تربیہ ہوم ورک جاری کررہاہے۔

سمرویکیشن ہوم ورک میں اُردو اور دیگر مضامین کے بنیادی کاموں کی دہرائی کے علاوہ ریاضی کی مہارت کو تقویت دینے کے لئے جیومیٹری، الجبرا،سیٹ اور دیگر تصورات پر مبنی مشقیں دی گئی ہیں ۔انگلش میں گرامراور الفاظ کی ورک بک کے ساتھ ساتھ زبان کی بنیادی مہارتوں کو بہتر بنانے کے لئے مشقیں اور سرگرمیاں دی گئی ہیں۔سائنس کی درسی کتابوں میں دیئے گئے تجربات، تصورات اور کارآمد باتوں سے متعلق ایسے عنوانات شامل کئے گئے ہیں جو طلبہ میں سائنسی سوچ کو فروغ دے سکیں۔

سمرتربیہ ہوم ورک میں مختلف کلاسز کے طلبہ کے لئے دینی ،اخلاقی اور تعلیمی سرگرمیاں ترتیب دی گئی ہیں۔ان میں تلاوتِ قراٰن،کلمے، دعائیں،حدیثِ پاک،بنیادی عقائدکی تفہیم،ایکٹیویٹی بیسڈ اسلامک نالج،وضو،غسل اور نماز کی معلومات کی فراہمی کے ساتھ ساتھ اخلاقی اوصاف پرمبنی سرگرمیاں بھی شامل ہیں۔ ساتھ ہی طلبہ کو گھر درس دینے اور مدنی مذاکرہ دیکھنے کی خصوصیت کے ساتھ دعوت بھی پیش کی گئی ہے۔ سمر تربیہ ہوم ورک میں اسلامیات کی درسی کتب کی سرگرمیاں بھی شامل کی گئی ہیں ۔

تمام ہی جماعتوں میں سمر تربیہ ہوم ورک اور سمر ویکیشن ہوم ورک تیار کرتے ہوئے طلبہ کی دلچسپیوں کو پیش نظر رکھا گیا ہے تاکہ طلبہ گرمیوں کی چھٹیوں کے دوران اپنے اندر پڑھنے اور سیکھنے کا شوق پیدا کرسکیں۔

سمر تربیہ ہوم ورک کو www.darulmadinah.net پر بھی رکھا گیا ہے تاکہ دارالمدینہ کے علاوہ دوسرے اسکولز میں پڑھنے والے بچّوں کے والدین بھی استفادہ کرسکیں اور اپنے بچوں کی بہترین تربیت کرسکیں۔ (رپورٹ: غلام محی الدین ترک، اردو کانٹینٹ رائٹر سوشل میڈیا ڈیپارٹمنٹ دارالمدینہ، ہیڈ آفس کراچی، ویب ڈیسک رائٹر:غیاث الدین عطاری)

دارُالمدینہ انٹرنیشنل اسلامک ایجوکیشن سسٹم کا ایک اہم ڈیپارٹمنٹ دارالمدینہ انٹرنیشنل یونیورسٹی پریس گزشتہ برسوں میں 150سے زائد درسی کتابیں شائع کرچکا ہے۔ یہ کتابیں دارالمدینہ انٹرنیشنل اسلامک اسکول سسٹم اور فیضان اسلامک اسکول سسٹم کے علاوہ دیگر نجی تعلیمی اداروں میں بھی پڑھائی جارہی ہیں۔

‫پاکستان میں یکساں قومی نصاب (Single National Curriculum)کے نفاذ کے بعد دارالمدینہ انٹرنیشنل یونیورسٹی پریس کی پری پرائمری اور پرائمری کی 70نصابی کتب پنجاب کریکولم اینڈ ٹیکسٹ بک بورڈ(PCTB) سے منظور ہوچکی ہیں۔ ان میں ’’روشن سفر اُردو، اُردو خوش خطی، واقفیت عامہ، یونیک میتھ میٹکس(Unique Mathematics)، ڈائنامکس انگلش(Dynamics English) اوراسمارٹ ICTکی کتابیں شامل ہیں ۔یہ درسی کتابیں دیدہ زیب ٹائٹل،معیاری کاغذاور عمدہ طباعت سے مزین ہیں۔

ان درسی کتابوں کی تیار ی میں بچوں کی نفسیات اور ان کی ذہنی سطح کو ملحوظ رکھا گیا ہے۔دارالمدینہ کا پری پرائمری نصاب ابتدائے بچپن کی تعلیم(Early Childhood Education)کے تقاضوں کو احسن انداز میں پوراکرتا ہے۔ طلبہ کی ذاتی اور سماجی نشوونما (Personal and Social Development)کے لئے اُن میں کام کرنے کی صلاحیت بڑھانے،تخلیقی صلاحیتوں کو پروان چڑھانے،اخلاقی قدروں کا خیال رکھنے،اُن کے تجربات اور مشاہدات کووسیع کرنے، اپنی صحت کا خیال رکھنے سے متعلق شعور و آگہی فراہم کرنادارُالمدینہ کے پری پرائمری نصاب کا حصہ ہیں ۔ اگلی درسی کتابوں میں توجہ مرکوز رکھنے، فیصلہ اور منصوبہ بندی کرنے اور اپنے کاموں کو بہتر انداز میں پیش کرنے جیسی کئی مہارتیں بھی شامل ہیں۔دارالمدینہ کی درسی کتابوں میں طلبہ کی ذہنی اور جسمانی نشوونما کی بہتری کے لئے دینی، اخلاقی، ذہنی ، تعلیمی، ادبی اور جسمانی سرگرمیاں خصوصیت کے ساتھ شامل کی گئی ہیں ۔

مذکورہ کتابوں کی ایک خاص بات یہ ہے کہ ماہرین کی زیر نگرانی تیار ہونے کے بعد علما بورڈ ان تمام کتب پر نظر ثانی کرتا ہے جس میں ان کتب کو عقائد، کفریہ عبارات، اخلاقیات اورفقہی مسائل وغیرہ کے حوالے سے حتی الامکان چیک کیا جاتا ہے اور اس بات کا بغور جائزہ لیا جاتا ہے کہ ان کتب کا متن ،تصاویراور کوئی بھی سرگرمی اسلامی تعلیمات اور روایات کے منافی نہ ہوں۔

دعوت اسلامی کے ذمہ داران اپنے علاقوں کے اسکولز میں ان کتب کو لگواکر اُمّت مسلمہ کے نونہالوں کی بہترین تربیت میں اپنا کردار اداکرسکتے ہیں۔کتابیں حاصل کرنے کے لیے2626037- 0313پر رابطہ کیا جاسکتا ہے۔(رپورٹ: غلام محی الدین ،اردو کانٹینٹ رائٹر(مارکیٹنگ اینڈ کمیونیکیشن ڈیپارٹمنٹ دارالمدینہ ،ہیڈ آفس کراچی)،کانٹینٹ:رمضان رضا عطاری)

رمضانُ المبارک والدین کے لئے بچّوں کی تعلیم و تربیت کے حوالے سے ایک بہترین موقع ہے ۔

اس ماہ ِمبارک کی مناسبت سے دارالمدینہ انٹرنیشنل اسلامک اسکول سسٹم نے بچّوں کی تربیت کے لئے رمضان تربیہ ہوم ورک ترتیب دیا ہے جس میں مختلف کلاسز کے طلبہ کے لئے دینی اور تعلیمی سرگرمیاں ترتیب دی گئی ہیں ۔

ان سرگرمیوں میں تلاوتِ قراٰن،ذکرواذکار،نمازوں کی پابندی، نیکیوں کا کلینڈر،احادیثِ مبارکہ چارٹ اوررمضان کریم چارٹ مکمل کرنے سمیت اخلاقی اوصاف پرمبنی کئی سرگرمیاں شامل ہیں۔

اس تربیہ ہوم ورک کے ذریعے طلبہ رسول کریم صَلَّى اللهُ عَلَيْهِ وَسَلَّمَ کے اسوۂ حسنہ سے آگاہ ہوسکیں گے، معاشرے میں اسلامی اقدار و تعلیمات کے احیا کا فریضہ سرانجام دے سکیں گے،عبادات کی اصل روح ، ان کی اہمیت کو سمجھ سکیں گےاور خشوع و خضوع سے ان کی ادائیگی کرسکیں گے۔ساتھ ہی معاشرتی زندگی میں آداب معاشرت،حسنِ اخلاق و معاملات اور حقوق و فرائض سے متعلق اسلامی تعلیمات کی اہمیت سے واقف ہوں گے نیز ان کے فوائد و برکات سے آگاہ ہوتے ہوئے اپنی زندگی ان کے مطابق ڈھال سکیں گے۔

حضور نبیِّ رحمت صلَّی اللہ علیہ وسلَّم کی مبارک ذات پر دُرود شریف بھیجنا ایک مسلمان کے لئے بہت بڑی نعمت ، اعزاز اور خوش قسمتی کی بات ہے۔

اسی سلسلے میں شعبہ ٔ دینیات ،دارالمدینہ انٹرنیشنل اسلامک ایجوکیشن سسٹم کے تحت دارالمدینہ انٹرنیشنل اسلامک اسکول سسٹم اور فیضان اسلامک اسکول سسٹم میں ہفتہ دُرودمنایا گیاجس میں 41کروڑ دُرودِ پاک پڑھنے کی نیت کی گئی۔

اسکول کے تعلیمی دوروں کے فائدے زندگی بھر رہتے ہیں ۔یہ تعلیمی دورے ثقافتی تفہیم، نئی دل چسپیوں میں اضافے اورسفر کی تحریک کے ساتھ ساتھ اعتماد اور آزادی کی فضا  بھی پیدا کرتے ہیں۔بعض مقامات دیکھنے سے نصابی اسباق کی تفہیم اور علم میں اضافہ ہوتا ہے اور طلبہ انہیں بہتر طریقے سے یاد رکھنے اور سمجھنے میں کامیاب ہوسکتے ہیں ۔

قلعہ رانی کوٹ جسے سندھ کی دیوار کے نام سے بھی جانا جاتا ہے،یہ جامشورو کے علاقے کیرتھر میں واقع ہے ۔ یہ قلعہ تاریخ و ثقافت کا منفرد شاہکار ہے اور وادی سندھ کی تہذیب کا حصہ بھی ہے۔یہ جگہ سیر و سیاحت کے لئے بھی ایک پرسکون مقام ہے۔ یہاں قلعہ میں سے بہتی ہوئی ندی میں قدرتی چشموں کا پانی مستقل بہتا رہتا ہے۔ رانی کوٹ میں اس پانی سے وادیاں سرسبز اور سحر انگیز نظر آتی ہیں۔

دارالمدینہ بوائز ہائی اسکول،سٹی کیمپس ، حیدرآباد کے طلبہ نے رانی کوٹ کا تفصیلی دورہ کیا۔اس موقع پر طلبہ کو رانی کوٹ کی مختصر تاریخ سے بھی آگاہ کیا گیا۔اس تعلیمی دورے سے طلبہ نے مفید معلومات بھی حاصل کیں۔ (رپورٹ : غلام محی الدین ترک ،اردو کانٹینٹ رائیٹر(سوشل میڈیا ڈیپارٹمنٹ دارالمدینہ ،ہیڈ آفس کراچی) / ویب ڈیسک رائٹر: محمد مصطفیٰ انیس) 

دیوار پر لٹکائے ہوئے سرخ کین کے طور پر نظر آنے والے آگ بجھانے کے آلات (Fire extinguishers)درحقیقت ایک مفید مقصد کی تکمیل کرتے ہیں۔ Fire extinguishersایک ایسا آلہ ہے جسے آگ لگنے کی صورت میں استعمال کرنےسے جان اور مال کو بچایا جاسکتا ہے۔یہ آلات ہر ادارے کی ضرورت ہیں ۔ ہر شخص کو آگ بجھانے، ابتدائی طبی امداد اور ریسکیو ورک کی تربیت حاصل کرنی چاہیے تاکہ حادثات کو ابتداہی میں کنٹرول کیا جاسکے۔ہر ادارےکے ہر ملازم کو یہ بھی علم ہونا چاہیےکہ حادثے کی صورت میں اس نے کیا کرنا ہے، اپنی جان کیسے بچانی ہےاور دوسروں کی کس طرح مدد کرنی ہے۔

28 فروری 2023ء کو دارالمدینہ انٹرنیشنل اسلامک ایجوکیشن سسٹم کے ہیڈ آفس میں ملازمین کے تحفظ اور انہیں آگ سے بچاؤ کے طریقے سکھانے کے لئے فائرسیفٹی ٹریننگ کا سلسلہ ہوا۔دعوت اسلامی فائر سیفٹی ڈیپارٹمنٹ کے ذمہ دار اسلامی بھائی نے دارالمدینہ کے اسٹاف کو آگ سے بچاؤ کی ٹریننگ دی اور دیگر حفاظتی اقدامات کے بارے میں آگاہی فراہم کی ۔ انہوں نے کہا کہ آگ سے ڈرنا نہیں چاہیے بلکہ اسے بجھانے کی تدابیر اختیار کرنی چاہییں۔اس موقع پر آگ بجھانے کا عملی مظاہرہ بھی کیا گیا۔ (رپورٹ : غلام محی الدین ترک ،اردو کانٹینٹ رائیٹر(سوشل میڈیا ڈیپارٹمنٹ دارالمدینہ ،ہیڈ آفس کراچی) / ویب ڈیسک رائٹر: محمد مصطفیٰ انیس)

بچپن اور اسکول کی بامقصد زندگی کامیابی کی راہ ہموارکرتی ہے۔ بچوں کی تربیت اور ان کے بہتر مستقبل کے لئے ایک اچھے اور معیاری اسکول کا انتخاب  کرنا والدین کی اہم ذمے داری ہے۔ دارالمدینہ انٹرنیشنل اسلامک اسکول سسٹم دینی ماحول میں معیاری تعلیم کے ذریعے طلبہ کی ذہنی،جسمانی اورعلمی صلاحیتوں میں اضافہ کرتاہے ۔دارالمدینہ کے تعلیم یافتہ اساتذہ طلبہ کو معاشرے کا اچھا فرد بنانے کے لئے کوشاں رہتے ہیں۔

اور اب خوش خبری ! سندھ میں بسنے والے والدین کے لئے ...... دارالمدینہ انٹرنیشنل اسلامک اسکول سسٹم کے سندھ ریجن میں بھی 22فروری 2023ء سے داخلوں کا آغاز ہوچکا ہے۔ اس ضمن میں دارالمدینہ مجلس کی جانب سے کیمپسز کو داخلوں کے عمل کو مؤثر بنانے کے لئے ہدایات جاری کردی گئی ہیں۔مجلس دارالمدینہ نے کئی نئے کیمپسز بھی قائم کئے ہیں جہاں رواں تعلیمی سال میں داخلے دیئے جائیں گے ان میں پی ای سی ایچ ایس کیمپس،گلشن کیمپس ۲،فیڈرل بی ایریا کیمپس اور گزری کیمپس شامل ہیں۔ مزید معلومات کے لیےدارالمدینہ کی ویب سائٹ www.darulmadinah.net دیکھی جاسکتی ہے یا اس ای میل ایڈریس info@darulmadinah.net پر رابطہ کیا جاسکتا ہے۔

یاد رہے ! کہ ان دنوں دارالمدینہ پنجاب کیمپسز میں بھی داخلے جاری ہیں۔ (رپورٹ: غلام محی الدین ترک ،اردو کانٹینٹ رائیٹر(سوشل میڈیا ڈیپارٹمنٹ دارالمدینہ ،ہیڈ آفس کراچی) /کانٹینٹ : محمد مصطفیٰ انیس)

دارالمدینہ انٹرنیشنل اسلامک اسکول سسٹم  پنجاب ریجن کے رزلٹ ڈے کے موقع پر ہونے والی تقریب میں پروفیسر ڈاکٹر ہارون الرشید تبسم نے خصوصی طور پر شرکت کی اور اپنے تاثرات دیتے ہوئے کہا کہ آج کی تقریب خالصتاً اسلامی ، اسلامی رنگ میں ڈوبی ہوئی تھی، بچوں کی پُرفارمنس شاندار تھی، ماحولیاتی آلودگی کے خلاف بچوں نے جو پرفارمنس پیش کی ،وہ قابل ستائش ہے،والدین کے احترام پر مبنی خاکے نے میرا دل تسخیر کرلیا، بچوں کا حسن اخلاق مثالی تھا، اساتذہ کا ٹیم ورک دیگر اداروں کے لئے باعث تقلید ہے،ہمیں ٹیم ورک کرتے ہوئے بچوں کی کردار سازی کرنی چاہئے۔انہوں نے مزید کہاکہ اس تقریب میں موجود کچھ والدین سے بات چیت بھی ہوئی جنہوں نے اس عزم کا اعادہ کیا ہے کہ وہ بچوں میں اسلامی روح بیدار کرنے کے لئے دارالمدینہ اسکول کی تحریک کا حصہ بنیں گے،میری دعاہے کہ دارالمدینہ دن دوگنی رات چوگنی ترقی کرےاور اسلامی تعلیمات کی روح لوگوں تک پہنچانے کا فریضہ اسی طرح ادا کرتا رہے۔ (رپورٹ: غلام محی الدین ترک ،اردو کانٹینٹ رائیٹر(سوشل میڈیا ڈیپارٹمنٹ دارالمدینہ ،ہیڈ آفس کراچی) /کانٹینٹ : محمد مصطفیٰ انیس) 

انفارمیشن ٹیکنالوجی کی ترقی ، مصنوعی ذہانت اور انٹرنیٹ کی بدولت ایسی ایجادات سامنے آرہی ہیں جنہوں نے انسانوں کے لئے سیکھنا، سمجھنا اور آگے بڑھنا آسان کردیا ہے، دارالمدینہ انٹرنیشنل اسلامک ایجوکیشن سسٹم اپنے ملازمین کو جدید ٹیکنالوجی سے روشناس کروانے اور ان کی صلاحیتوں میں اضافے کے لئے وقتاً فوقتا ً ایسے ٹریننگ سیشنز کا اہتمام کرتا ہےتاکہ وہ عصری تقاضوں کو سمجھ کر آگے بڑھ سکیں۔

دار المدینہ ہیڈآفس میں ChatGPT کے مثبت اور بہتر استعمال کے سلسلے میں ایک ٹریننگ سیشن کا انعقاد ہوا، جس میں ہیڈ آف ٹریننگ ڈیپارٹمنٹ محمد مدنی خان نے اسٹاف کو تعلیمی اداروں میں چیٹ جی پی ٹی کے مفید استعمال سے آگاہی دی۔ انہوں نے سبقی منصوبہ بندی (Lesson Plan ) ،گرائمر اور دیگر تعلیمی امورسے متعلق ChatGPT کے استعمالات بھی بتائے۔آخر میں انہوں نے کہا کہ ChatGPT بہت سی باتوں کے غلط جواب بھی دیتا ہے۔ دوسرے لفظوں میں یہ خود سے سوچ نہیں سکتا۔ ضروری ہے کہ اسے اپنی تخلیقی صلاحیتوں کو نکھارنے کے لیے استعمال کریں نہ کہ اپنا سارا کام اس سے کروائیں۔ (رپورٹ: غلام محی الدین ترک ،اردو کانٹینٹ رائیٹر(سوشل میڈیا ڈیپارٹمنٹ دارالمدینہ ،ہیڈ آفس کراچی) /کانٹینٹ : محمد مصطفیٰ انیس)