اسپیشل پرسنز ڈیپارٹمنٹ دعوتِ اسلامی کے تحت  2 مئی 2026ء کو پاکپتن سٹی میں اجتماعی طور پر مدنی مذاکرہ دیکھنے کا اہتمام کیا گیا جس میں اسپیشل پرسنز سمیت دیگر اسلامی بھائیوں نے شرکت کی۔

اس موقع پر ڈویژن ذمہ دار محمد زبیر عطاری نے اشاروں کی زبان میں مدنی مذاکرے کی ترجمانی کی تاکہ اسپیشل پرسنز بھی مدنی مذاکرے میں ہونے والے سوال و جواب سُن سکیں اور زیادہ سے زیادہ سے علمِ دین سیکھ سکیں۔

ڈویژن ذمہ دار نے اسپیشل پرسنز کو ہر ہفتے کی شب مدنی مذاکرہ دیکھنے اور سننے کی نیت کروائی جس پر انہوں نے اپنی نیتوں کا اظہار کیا کہ وہ آئندہ بھی باقاعدگی سے ہفتہ وار مدنی مذاکرے میں شرکت کریں گے۔

اس اجتماع میں ڈسٹرکٹ ذمہ دار محمد ندیم عطاری نے بھی شرکت کی نیز آخر میں دعا اور درود و سلام کا بھی سلسلہ ہوا۔(رپورٹ: محمد زبیر عطاری ، ساہیوال ڈویژن، سپیشل پرسنز ڈیپارٹمنٹ ، کانٹینٹ:غیاث الدین عطاری)

دل جوئی سے مراد کسی شکستہ دل کو سہارا دینا، غمزدہ کی ڈھارس بندھانا اور کسی کی پریشانی میں اس کے کام آنا ہے۔ اسلام میں اسے بلند ترین اخلاقیات اور بہترین عبادتوں میں شمار کیا گیا ہے۔ دل جوئی سے نفرتیں ختم ہوتی ہیں اور محبت پروان چڑھتی ہے۔ جب معاشرے کے افراد ایک دوسرے کے دُکھ سکھ بانٹنے لگتے ہیں تو ایک مضبوط اور ہمدرد معاشرہ جنم لیتا ہے۔

شیخ طریقت امیر اہلسنت حضرت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کو ایک دوسرے کے ساتھ دل جوئی کرنے کی ترغیب دلانے کے لئے اس ہفتے 21 صفحات کا رسالہ ”دل جوئی کے فضائل“ پڑھنے/سننے کی ترغیب دی ہے اور پڑھنے/سننے والوں کو اپنی دعاؤں سے نوازا ہے۔

دعائے عطار

یاربّ کریم! جوکوئی 21 صفحات کا رسالہ ”دل جوئی کے فضائل“ پڑھ یا سن لے اُسے مسلمانوں کے دلوں میں خوشیاں داخل کرنے والا بناکر ماں باپ اور خاندان سمیت جنت الفردوس میں بے حساب داخلہ نصیب فرما۔ اٰمین

یہ رسالہ آڈیو میں سننے اور اردو سمیت کئی زبانوں میں ڈاؤن لوڈ کرنے کے لئے نیچے دیئے گئے لنک پر کلک کیجئے:

Download

اسلام آباد: اللہ کے گھر کی حاضری کی تڑپ رکھنے والے خوش نصیبوں کے لیے شعبہ حج و عمرہ (دعوتِ اسلامی) کے زیرِ اہتمام فیضانِ مدینہ اسلام آباد میں ایک روزہ حج تربیتی سیشن منعقد کیا گیا۔ اس سیشن کا مقصد عازمین کو حج کے مناسک کی دُرست ادائیگی اور اس مبارک سفر کے آداب سے روشناس کروانا تھا۔

سیشن میں رکنِ شوریٰ حاجی وقارُ المدینہ عطاری نے عازمینِ حج سے رقت آمیز اور فکری گفتگو کی۔ انہوں نے اس بات پر زور دیا کہ حج محض ایک سفر نہیں بلکہ بندگی کا امتحان ہے۔ یہ سفرِ مبارک محض مشقت کا نام نہیں بلکہ یہ محبوب کی بارگاہ میں حاضری کا موقع ہے جہاں صبر کا ہر لمحہ اجر و ثواب کی ضمانت ہے۔

رکنِ شوریٰ کے بیان کے اہم نکات:

اخلاق کی اہمیت: دورانِ سفر ہجوم اور سختیوں کے باوجود اپنے اخلاق کو بہترین رکھنا ہی حج کی روح ہے۔

صبر کا دامن: انہوں نے عازمین کو ذہن دیا کہ حرمین شریفین میں پیش آنے والی چھوٹی موٹی تکلیفوں پر صبر کریں اور اسے اللہ کی رضا سمجھ کر قبول کریں۔

برداشت کا جذبہ: لاکھوں کے مجمع میں دوسروں کو راستہ دینا اور ایثار سے کام لینا حج کے ثواب کو دوچند کر دیتا ہے۔

سیشن کے اختتام پر عازمینِ حج نے شعبہ حج و عمرہ کی اس کاوش کو سراہتے ہوئے کہا کہ اس تربیتی نشست سے ان کے اندر موجود بہت سی اُلجھنیں دور ہوئیں اور انہیں ذہنی و قلبی طور پر اس مقدس سفر کے لیے تیار ہونے میں مدد ملی۔

آخر میں دعا ہوئی اور صلوۃ و سلام پڑھا گیا۔

اسلام آباد: دارالمدینہ انٹرنیشنل یونیورسٹی (DMIU) کے اسلام آباد کیمپس میں ”معرکہ حق“کی تاریخی کامیابی کو ایک سال مکمل ہونے پر ایک پُروقار تقریب کا انعقاد کیا گیا۔ اس تقریب کا مقصد حق و صداقت کی اس عظیم فتح کو خراجِ تحسین پیش کرنا اور نوجوان نسل میں قومی اتحاد، ہمت اور عزمِ نو کا جذبہ بیدار کرنا تھا۔

معزز مہمانانِ گرامی:

تقریب میں علمی و سماجی شخصیات نے بھر پور شرکت کی۔ پروگرام کے مہمان خصوصی ڈاکٹر محمد ادریس(Director National Assessment Coordination, PIE) تھے۔ان کے ہمراہ ۔ ان کے ہمراہ بریگیڈیئر (ریٹائرڈ) پروفیسر ڈاکٹر طاہر نواز (پرو وائس چانسلر، DMIU) اور پروفیسر جاوید اسلم باجوہ (رجسٹرار، DMIU) بھی خصوصی طور پر شریک ہوئے۔

تقریب کے اہم نکات:

عزم و ہمت کی داستان: مقررین نے ”معرکہ حق“کی اہمیت پر روشنی ڈالتے ہوئے اسے سچائی کی فتح اور باطل کے خلاف ایک مضبوط استعارہ قرار دیا۔

نوجوانوں کی تربیت: تقریب کا بنیادی مقصد طلبہ میں حب الوطنی کا جذبہ پیدا کرنا اور انہیں یہ باور کرانا تھا کہ حق کی راہ میں ثابت قدمی ہی اصل کامیابی ہے۔

خراجِ تحسین: اس موقع پر ان تمام کرداروں کو بھرپور خراجِ عقیدت پیش کیا گیا جنہوں نے اس معرکے کی کامیابی میں اپنا کلیدی کردار ادا کیا۔

مقررین کا خطاب:

مہمانِ خصوصی ڈاکٹر محمد ادریس نے اپنے خطاب میں کہا کہ ”ایسے واقعات ہماری تاریخ کا وہ روشن باب ہیں جو آنے والی نسلوں کے لئے مشعلِ راہ بنتے ہیں۔ ہمیں اپنی نوجوان نسل کو ان کامیابیوں کے پیچھے چھپے ہوئے مقصد اور قربانیوں سے روشناس کرواتے رہنا چاہیے۔“

اس موقع پر پرو وائس چانسلر ڈاکٹر طاہر نواز نے انتظامیہ اورپروگرام میں شریک افراد کا شکریہ ادا کرتے ہوئے اس بات پر زور دیا کہ قومیں اپنے اتحاد اور حوصلے سے ہی بڑے چیلنجز پر قابو پاتی ہیں۔

تقریب کے اختتام پر ملکی سلامتی، ترقی اور ”معرکہ حق“کے تسلسل کو برقرار رکھنے کے لئے خصوصی دعا کی گئی۔

2 مئی 2026ء،فیضان اسلامک سینٹر، اسلام آباد:

2 مئی 2026ء کو اسلام آباد میں واقع فیضان اسلامک سینٹر میں اسپیشل پرسنز ڈیپارٹمنٹ دعوتِ اسلامی کے تحت ایک خصوصی پروگرام ”ایک دن راہ خدا میں“ منعقد کیا گیا جس میں صوبائی ذمہ داران کامران عطاری اور بدر شفیق عطاری نے اسپیشل پرسنز کے ہمراہ شرکت کی۔

اس موقع پرصوبائی ذمہ دار نے شرکا کے درمیان بیان کرتے ہوئے اللہ پاک کی رضا اور زندگی میں دین اسلام کی اہمیت پر روشنی ڈالی۔ صوبائی ذمہ دار نے اسپیشل پرسنز کو نیکی کی دعوت پیش کی اور انہیں ہفتہ وار اجتماع میں شرکت کرنے نیز ہفتہ وار مدنی مذاکرے میں شامل ہونے کی ترغیب دلائی۔

28 اپریل 2026ء، مدنی مرکز فیضانِ مدینہ جی 11، اسلام آباد:

شعبہ رابطہ برائے تاجران اسلام آباد کے تحت 28 اپریل 2026ء کو دعوتِ اسلامی کے مدنی مرکز فیضانِ مدینہ جی 11 اسلام آباد میں ایک اہم کورس بنام ” اجتماعی قربانی کورس “ کا انعقاد کیا گیا جس کا مقصد شرعی احکامِ قربانی سے آگاہی فراہم کرنا تھا۔

اس کورس میں دار الافتاء اہلسنت کے مفتی نوید چشتی عطاری مدنی نے خصوصی رہنمائی کرتے ہوئے شرکا کو قربانی کے شرعی اصول، مناسک اور طریقۂ کار کے بارے میں تفصیل سے آگاہ کیا جس میں اجتماعی قربانی مجلس کے ذمہ داران اور دیگر کئی عاشقان رسول نے شرکت کی۔

آخر میں مفتی نوید چشتی عطاری مدنی نے شرکا کی جانب سے ہونے والے سوالات کے تفصیلی جوابات دیئے جن سے شرکا کو مزید دینی رہنمائی حاصل ہوئی۔

27 اپریل 2026ء، بلیو ایریا، اسلام آباد:

شعبہ رابطہ برائے تاجران دعوتِ اسلامی کے زیر ِاہتمام 27 اپریل 2026ء کو وفاقی دارالحکومت اسلام آباد کے بلیو ایریا میں ”احکامِ قربانی کے حوالے سے ایک کورس کا انعقاد کیا گیا جس کا مقصد تاجروں کو قربانی کے شرعی احکام، طریقہ کار اور مناسک کے بارے میں آگاہی فراہم کرنا تھا۔

اس پروگرام میں مفتی نوید چشتی عطاری مدنی نے شرکا کو قربانی کے شرعی اصولوں، سنت طریقوں اور عملی نکات سے روشناس کروایا نیز انہوں نے نہ صرف شرعی احکام کی وضاحت کی بلکہ حاضرین کے سوالات بھی سنے اور ان کے تسلی بخش جوابات بھی دیئے۔

اس کورس کا مقصد تاجروں میں دینی شعور بیدار کرنا اور انہیں قربانی کے حوالے سے شرعی رہنمائی فراہم کرنا تھا تاکہ وہ اپنی زندگی کے تمام معاملات میں دینی تقاضوں کو ملحوظ خاطر رکھ سکیں۔(رپورٹ: اطہر اشتیاق عطاری، شعبہ رابطہ برائے تاجران اسلام آباد ، کانٹینٹ:غیاث الدین عطاری)

30 اپریل 2026ء:

دعوتِ اسلامی کے اسپیشل پرسنز ڈیپارٹمنٹ کے تحت 30 اپریل 2026ء کو اسپیشل ایجوکیشن سینٹر شجاع آباد میں ذمہ دار اسلامی بھائیوں کی پرنسپل محمد ساجد سے ملاقات ہوئی جنہیں اسپیشل پرسنز ڈیپارٹمنٹ کا تفصیلی تعارف پیش کیا گیا اور دعوتِ اسلامی کی دینی و فلاحی خدمات سے آگاہ کیا گیا۔

ملاقات کے دوران پرنسپل کو دعوتِ اسلامی کی جانب سے تیار کردہ اسپیشل پرسنز ایپلیکیشن بھی انسٹال کروایا گیا،اس ایپلیکیشن میں اسپیشل پرسنز کے لئے اشاروں کی زبان میں بیانات موجود ہیں اور یہ ایپلیکیشن اسپیشل پرسنز کے ساتھ دینی کام کرنے والوں کے لئے بھی اشاروں کی زبان سیکھنے میں معاون ثابت ہوتی ہے۔ اس جدید کاوش کو دیکھ کر پرنسپل نے خوشی کا اظہار کیا اور دعوتِ اسلامی کی خدمات کو سراہا۔

اس کے علاوہ اسپیشل پرسنز اسٹوڈنٹس کے درمیان ”والدین اور اساتذہ کے آداب“ کے موضوع پر بیان کیا گیا جسے ملتان ڈویژن کے ذمہ دار مولانا محمد جمال عطاری مدنی نے اشاروں کی زبان میں نہایت آسان انداز میں کیا۔

28 اپریل 2026ء :

اسپیشل پرسنز ڈیپارٹمنٹ دعوتِ اسلامی کے تحت 28 اپریل 2026ء کو ذمہ دار اسلامی بھائیوں نے گورنمنٹ ہائی اسکول سمیجہ آباد، ملتان کا دورہ کیا جہاں انہوں نے پرنسپل سے ملاقات کی اور انہیں اسپیشل پرسنز ڈیپارٹمنٹ کا تفصیلی تعارف کرواتے ہوئے دعوتِ اسلامی کی دینی و فلاحی خدمات سے آگاہ کیا ۔

ملاقات کے دوران ذمہ داران نے پرنسپل کو نابینا افراد کے لئے بریل لینگویج میں مکتبۃ المدینہ کا رسالہ پیش کیا جس کا مقصد تھا کہ اسپیشل پرسنز بھی دینی تعلیمات سے آسانی کے ساتھ مستفید ہو سکیں۔ پرنسپل نے اس کاوش کو سراہا اور اسے ایک بہترین دینی خدمت قرار دیا۔

علاوہ ازیں اسکول کے اسٹوڈنٹس میں ایک سیشن ہوا جس میں نہایت مؤثر انداز میں نماز کی اہمیت پر گفتگو کی گئی نیز اسٹوڈنٹس کو بتایا گیا کہ نماز دین کا ستون اور کامیابی کی کنجی ہے ۔ساتھ ہی درودِ پاک کے فضائل بیان کئے گئے اور اسٹوڈنٹس کو کثرت سے درود شریف پڑھنے کی ترغیب دلائی گئی۔

پروگرام کے آخر میں اسپیشل پرسنز ڈیپارٹمنٹ کا مکمل تعارف کروایا گیا اور بتایا گیا کہ دعوتِ اسلامی اسپیشل پرسنز کے لئے کس طرح دینی خدمات سرانجام دے رہی ہے جبکہ اسٹوڈنٹس کو اشاروں کی زبان (Sign Language) بھی سکھائی گئی تاکہ وہ بنیادی دینی تعلیمات اور پیغامات اشاروں کی زبان میں سمجھ سکیں۔

چک بیلی خان،  راولپنڈی، پنجاب :

دعوتِ اسلامی کے زیرِ اہتمام 25 اپریل 2026ء کو تحصیل چک بیلی خان، پنجاب کی یونین کونسل چھٹہ میں نیکی کی دعوت کے سلسلے میں تین دن کے قافلے میں سیکھنے سکھانے کا حلقہ لگایا گیا جس میں خصوصی طور پر اسپیشل پرسنز (گونگے اور بہرے اسلامی بھائیوں) نے شرکت کی۔

اس موقع پر ڈسٹرکٹ ذمہ دار نعیم سلطان عطاری نے اشاروں کی زبان میں اسپیشل پرسنز کو نماز، سنتوں اور اخلاقیات پر مبنی نیکی کی دعوت پیش کی جس پر انہوں نے دعوتِ اسلامی کے دینی کاموں میں تعاون کرنے اور نمازوں کی پابندی کرنے کی نیتیں کیں۔(رپورٹ: محمد نعیم سلطان عطاری راولپنڈی سٹی ذمہ دار اسپیشل پرسنز ڈیپارٹمنٹ ، کانٹینٹ:غیاث الدین عطاری)

کلر سیداں، پنجاب  ، 21 اپریل 2026ء:

دعوتِ اسلامی جو کہ زندگی کے ہر شعبے میں دینِ متین کی خدمت کرنے میں مصروفِ عمل ہے وہیں معاشرے کے اسپیشل پرسنز کی دینی و اخلاقی تربیت کے لئے بھی کوشاں ہے۔

اس سلسلے میں 21 اپریل 2026ء کو اسپیشل پرسنز ڈیپارٹمنٹ دعوتِ اسلامی کے تحت نعیم سلطان عطاری نے دیگر ذمہ دار اسلامی بھائیوں کے ہمراہ تحصیل کلر سیداں، پنجاب میں قائم اسپیشل پرسنز کے تعلیمی ادارے نیاز فاؤنڈیشن (اسپیشل بچوں کا پرائیویٹ اسکول) اور اسپیشل ایجوکیشن سینٹر (اسکول) کا وزٹ کیا۔

اس وزٹ کے دوران ذمہ دار اسلامی بھائیوں نے اسپیشل بچوں (بہرے اور گونگے اسٹوڈنٹس) سے ملاقات کی اور ان کی حوصلہ افزائی کرتے ہوئے درج ذیل اہم سرگرمیاں سرانجام دیں:

اشاروں کی زبان سیشن:

ذمہ دارِ دعوتِ اسلامی نے اسپیشل پرسنز کو ان کے مخصوص اشاروں کی زبان (Sign Language) میں نیکی کی دعوت پیش کی اور اللہ و رسول صلَّی اللہ علیہ واٰلہٖ وسلَّم کی محبت کے حوالے سےقرآن و حدیث کی تعلیمات بیان کیں۔

نماز کا طریقہ (پریکٹیکل):

اسپیشل بچوں کو عبادات میں بہتری لانے کے لئے عملی طور پر نماز کا طریقہ سکھایا گیا، جس میں وضو اور نماز کے ارکان کی درستگی پر توجہ دی گئی۔

اخلاقی تربیت:

اسپیشل بچوں کو دعوتِ اسلامی کے دینی ماحول سے وابستہ رہنے اور والدین و اساتذہ کا ادب و احترام کرنے کی ترغیب دلائی گئی۔

17 اپریل 2026ء :

دعوتِ اسلامی کے زیرِ اہتمام ایک شاندار ”حج تربیتی اجتماع“ کا انعقاد کیا گیا جس میں عام اسلامی بھائیوں کی طرح خاص طور پر اسپیشل پرسنز نے خصوصی شرکت کی جس کا مقصد ہر طبقۂ زندگی تک دینِ اسلام کی تعلیمات پہنچانا اور اسپیشل پرسنز کو مناسکِ حج کی تربیت فراہم کرنا تھا۔

اجتماع میں مبلغِ دعوتِ اسلامی نے حج کے فرائض و واجبات اور سنتوں کے بارے میں آسان و مؤثر انداز میں حاضرین کی رہنمائی کی۔ خاص بات یہ رہی کہ اس اجتماع کو اشاروں کی زبان (Sign Language) میں ترجمان کیا گیا تاکہ اسپیشل پرسنز بھی بھرپور استفادہ کر سکیں۔

اسپیشل پرسنز ڈیپارٹمنٹ کے ذمہ داران کے تعاون سے شرکا کو احرام باندھنے، طواف اور دیگر مناسکِ حج کی عملی تربیت بھی دی گئی جس سے سیکھنے کا عمل مزید مؤثر ہو گیا۔ اس کے علاوہ مکہ مکرمہ اور مدینہ منورہ کے سفر کے آداب بھی بیان کئے گئے تاکہ شرکا کے دلوں میں عشقِ رسول صلَّی اللہ علیہ واٰلہٖ وسلَّم مزید بیدار ہو۔