23 مئی 2025ء کو دعوتِ اسلامی کے تحت مسجد فرید الاسلام ایمسٹرڈیم (Amsterdam) نیدرلینڈ میں حج ٹریننگ سیشن منعقد ہوا جس میں حج پر جانے والے اسلامی بھائیوں سمیت دیگر عاشقانِ رسول شریک ہوئے۔

مبلغ دعوتِ اسلامی حاجی سرفراز عطاری نے شرکا کو حج کے تمام مراحل کی تفصیلی اور مرحلہ وار رہنمائی فراہم کی۔ دورانِ سیشن حج کی فضیلتیں، حج کے ارکان، احرام باندھنے کا طریقہ، مناسک حج، طواف، قربانی، وقوف عرفہ، منیٰ، رمی اور دیگر فقہی مسائل پر گفتگو کی گئی۔

اس موقع پر دعوتِ اسلامی کی جانب سے ایک اہم اور مفید کتاب "نماز کے احکام" کا تعارف بھی کروایا گیا جو اب ڈچ زبان میں بھی دستیاب ہے۔

پنجاب کے شہر ملتان میں قائم مدنی مرکز فیضانِ مدینہ میں دعوت اسلامی کے تحت سنتوں بھرا اجتماع ہوا جس میں دعوتِ اسلامی کے مختلف شعبہ جات کے ذمہ داران، Volunteers اور عاشقانِ رسول نے بڑی تعداد میں شرکت کی۔

اجتماع میں دعوتِ اسلامی کی مرکزی مجلسِ شوریٰ کے رکن حاجی محمد سلیم عطاری نے سنتوں بھرا بیان کیا۔ بیان میں قربانی کے بابرکت موقع پر دعوتِ اسلامی کے تحت جاری دینی و فلاحی کاموں میں بھرپور حصہ لینے، قربانی کی کھالیں جمع کرنے اور دعوتِ اسلامی کے 12 دینی کاموں کو اپنی زندگی کا حصہ بنانے کی بھرپور ترغیب دلائی گئی۔

رکن شوریٰ نے اسلامی بھائیوں کو اپنی آئندہ نسلوں کی دینی تعلیم پر توجہ دینے کی نصیحت کرتے ہوئے جامعات المدینہ اور مدارس المدینہ میں بچوں کو داخل کروانے کی دعوت دی تاکہ وہ علمِ دین سے آراستہ ہو کر دین و دنیا کی بھلائیاں حاصل کر سکیں۔

عالمی مدنی مرکز فیضانِ مدینہ کراچی میں دعوتِ اسلامی کے شعبہ رابطہ برائے شوبز ڈیپارٹمنٹ کے تحت ”احکامِ قربانی کورس“ کا انعقاد کیا گیا اس کورس میں شوبز سے وابستہ افراد اور شعبے کے ذمہ دار اسلامی بھائیوں نے شرکت کی۔

کورس میں دارُالافتاء اہلِ سنت کے مفتی محمد جمیل عطاری نے شرکا کو قربانی کے شرعی احکام و مسائل سے تفصیلی طور پر آگاہ کیا۔

مفتی محمد جمیل عطاری نے شرکا کو بتایا کہ ٭قربانی کن افراد پر واجب ہے اور کن پر نہیں؟ ٭کن عیوب والے جانوروں کی قربانی نہیں ہوتی؟ ٭قربانی کے گوشت کی تقسیم اور کھال کے مصرف کے بارے میں کیا شرعی احکام ہیں؟، اس کے علاوہ دیگر کئی فقہی نکات اور مسائل کو سادہ اور مؤثر انداز میں بیان کیا۔

اس کے علاوہ شرکا کی جانب سے کئے گئے مختلف سوالات کے جوابات بھی مفتی صاحب نے مدلل انداز میں دیئے۔ کورس کے اختتام پر مفتی محمد جمیل عطاری نے خصوصی دعا بھی کروائی۔

سندھ کے شہر حیدرآباد میں آٹو بھان روڈ پر قائم ایک نجی بینک کے ریجنل ہیڈ آفس میں دعوتِ اسلامی کے شعبہ پروفیشنل فورم کے زیر اہتمام ایک سیشن کا انعقاد کیا گیا۔ اس سیشن میں بینک کی مختلف برانچز کے منیجرز اور ریجنل ہیڈ آفس کی مینجمنٹ نے شرکت کی۔

دعوتِ اسلامی کی مرکزی مجلسِ شوریٰ کے رکن حاجی محمد ایاز عطاری نے سنتوں بھرا بیان کیا جس میں انہوں نے شرکا کو دعوتِ اسلامی کے مختلف شعبہ جات کا تعارف پیش کیا اور عالمی سطح پر ہونے والے دینی و فلاحی کاموں سے متعلق تفصیل سے آگاہ کیا۔

بیان کے دوران رکنِ شوریٰ نے شرکا کو نماز کی پابندی، علمِ دین حاصل کرنے، دین کی خدمت کرنے اور دعوتِ اسلامی کے دینی ماحول سے وابستہ ہونے کی ترغیب دی۔ اجتماع کے اختتام پر خصوصی دعا بھی کروائی گئی۔

دعوتِ اسلامی کی مرکزی مجلسِ شوریٰ کے نگران، مولانا محمد عمران عطاری، جرمنی کے دورے کے بعد یورپی ملک پرتگال (Portugal) پہنچے جہاں دارالحکومت لسبن (Lisbon) میں سنتوں بھرے اجتماع کا انعقاد کیا گیا۔ اس اجتماع میں بزنس کمیونٹی اور چیمبر آف کامرس سے تعلق رکھنے والے عاشقانِ رسول نے شرکت کی۔ پروگرام کا آغاز تلاوتِ قرآنِ پاک اور نعتِ رسولِ مقبول صلَّی اللہ علیہ واٰلہٖ وسلَّم سے ہوا۔

نگرانِ شوریٰ مولانا حاجی محمد عمران عطاری مُدَّ ظِلُّہُ العالی نے سنتوں بھرا بیان فرمایا جس میں انہوں نے نماز، زکوٰۃ اور حج کی اہمیت پر مدلل انداز میں روشنی ڈالی اور شرکا کو ان کی ادائیگی کا ذہن دیا۔

22 مئی 2025 کو دعوتِ اسلامی کے فلاحی ادارے فیضان گلوبل ریلیف فاؤنڈیشن (FGRF) اور ٹاؤن میونسپل کارپوریشن کورنگی (TMC Korangi) کے اشتراک سے شجرکاری مہم کا آغاز کیا گیا۔ اس سلسلے میں شارعِ عطارکورنگی میں پودے لگانے کی ایک پروقار تقریب منعقد ہوئی جس میں دونوں اداروں کے ذمہ دار اسلامی بھائیوں نے بھرپور شرکت کی۔

تقریب کا باقاعدہ آغاز تلاوتِ کلامِ پاک سے ہوا۔ اس موقع پر نگران ڈویژن ایسٹ کراچی حاجی رضا عطاری مدنی، FGRF کے ڈائریکٹر پبلک ریلیشنز، ٹاؤن چیئرمین نعیم شیخ، میونسپل کمشنر غلام فرید، اسسٹنٹ کمشنر محمد حسین کھوسو، مختلف یونین کونسلز کے چیئرمینز، ڈائریکٹرز، دیگر افسران اور دعوتِ اسلامی کے ذمہ داران شریک ہوئے۔

نگران ڈویژن ایسٹ کراچی نے اپنے خیالات کا اظہار کرتے ہوئے کہا کہ ”درخت نہ صرف آلودگی سے پاک ماحول فراہم کرتے ہیں بلکہ صاف و شفاف آب و ہوا کے لئے بھی ناگزیر ہیں۔ شجرکاری نہ صرف دنیاوی فائدہ دیتی ہے بلکہ اچھی نیتوں کے ساتھ کی جائے تو آخرت میں بھی باعثِ اجر بن سکتی ہے“۔

تقریب سے خطاب کرتے ہوئے ٹاؤن چیئرمین نعیم شیخ اور اسسٹنٹ کمشنر محمد حسین کھوسو نے دعوتِ اسلامی اور FGRF کی دینی و فلاحی خدمات کو سراہا اور ہر ممکن تعاون کی یقین دہانی کروائی۔ اختتامِ تقریب پر نگران ڈویژن ایسٹ کراچی، ڈائریکٹر پبلک ریلیشنز (FGRF)، ٹاؤن چیئرمین، میونسپل کمشنر اور اسسٹنٹ کمشنر نے باہمی طور پر پودا لگا کر شجرکاری مہم کا باقاعدہ افتتاح کیا۔ بعد ازاں اجتماعی طور پر دعائے خیر بھی کی گئی۔

 اسلام آباد کے جڑواں شہر راولپنڈی میں مری روڈ پر دعوتِ اسلامی کے تحت نئے فیضان اسلامک سینٹر کا افتتاح کیا گیا۔ اس موقع پر افتتاحی تقریب کا اہتمام ہوا جس میں علمائے کرام، تاجران، مقامی عاشقانِ رسول، دعوتِ اسلامی کے مختلف شعبہ جات کے ذمہ داران اور طلبہ بڑی تعداد میں شریک ہوئے۔

تقریب میں دعوتِ اسلامی کی مرکزی مجلسِ شوریٰ کے رکن حاجی وقارالمدینہ عطاری نے سنتوں بھرا بیان کیا۔ اپنے بیان میں انہوں نے دعوتِ اسلامی کے مختلف شعبہ جات کا تعارف کرواتے ہوئے شرکا کو نیک اعمال کی رغبت دلائی اور دین و دنیا کی تعلیم کے فروغ کے لئے فیضان اسلامک سینٹر میں بچوں کو داخل کروانے کا ذہن دیا۔

اجتماع کے اختتام پر رکنِ شوریٰ نے خصوصی دعا کروائی۔ بعد ازاں دعوتِ اسلامی کے متعلقہ ذمہ داران نے حاجی وقارالمدینہ عطاری کو اسلامک سینٹر کی عمارت کا تفصیلی وزٹ بھی کروایا۔ وزٹ کے بعد رکن شوریٰ کا کہنا تھا کہ ”فیضان اسلامک سینٹر نہ صرف دینی تعلیم کا مرکز ہوگا بلکہ دنیاوی تعلیم کے حوالے سے بھی ایک مثالی ادارہ ثابت ہوگا۔ ہم چاہتے ہیں کہ ہر بچہ علمِ دین کے ساتھ ساتھ دنیاوی میدان میں بھی نمایاں ہو“۔

دعوتِ اسلامی کی جانب سے دینی تعلیم کے فروغ کے لئے ایک اور عملی قدم اٹھاتے ہوئے بنگلہ دیش کے شہر پٹیا (Patiya) کے علاقے میں واقع جامع مسجد عبد الستار سے متصل مدرسۃ المدینہ کی نئی برانچ کا افتتاح کر دیا گیا۔

اس پُر مسرت موقع پر سنتوں بھرے اجتماع کا انعقاد کیا گیا جس میں علاقے بھر سے عاشقانِ رسول، اسلامی بھائی، مقامی ذمہ داران اور مبلغین نے بڑی تعداد میں شرکت کی۔

اجتماع سے رکنِ شوریٰ مولانا عبدالمبین عطّاری نے سنتوں بھرا بیان کیا جس میں انہوں نے مدرسۃ المدینہ کی اہمیت، دینی تعلیم کی ضرورت اور سنتوں پر عمل پیرا ہونے کی ترغیب دی۔رکن شوریٰ نے شرکا کو دعوتِ اسلامی کے دینی کاموں میں بھرپور شرکت کی دعوت دی اور علاقائی سطح پر دینی درسگاہ کے قیام کو عظیم نعمت قرار دیا۔

دعوتِ اسلامی کی اس کاوش کو عوامی، تعلیمی اور سماجی حلقوں کی طرف سے زبردست پذیرائی حاصل ہوئی اور اسے دینی خدمات کے میدان میں خوش آئند قرار دیا۔

دعوتِ اسلامی کے شعبہ مدرسۃ المدینہ کے تحت بنگلہ دیش چٹاگانگ ڈویژن کے شہر بولکھلی (Boalkhali)کے علاقے پاکی پول میں قائم مدرسۃ المدینہ میں Graduation Ceremony کا انعقاد کیا گیا جس میں قرآنِ کریم حفظ کرنے کی سعادت حاصل کرنے والے طلبہ کو خراجِ تحسین پیش کیا گیا۔

تقریب میں رکنِ شوریٰ عبدالمبین عطاری نے سنتوں بھرا بیان کیا ۔ بیان میں قرآنِ کریم کی عظمت، حفاظ کی شان اور والدین کے صبر و قربانی کی اہمیت کو اُجاگر کیا گیا۔ تقریب کے اختتام پر حفاظِ کرام کی دستاربندی کی گئی اور انہیں اسنادِ تکمیلِ حفظ بھی پیش کی گئیں۔ اس موقع پر موجود والدین، اساتذہ اور عاشقانِ رسول نے خوشی اور فخر کا اظہار کیا۔

شرکانے دعوتِ اسلامی کی اس عظیم دینی خدمات کو سراہتے ہوئے دینی تعلیم کے فروغ کے لئے اپنی نیک خواہشات کا اظہار کیا۔

رینالہ خورد، اوکاڑہ، پنجاب کے   2/1L میں موجود جامع مسجد صمدیہ اسلامیہ میں 27 مئی 2025ء کو 7 دن کا فیضانِ نماز رہائشی کورس کا انعقاد کیا گیاجس کا مقصد شرکا کو نماز کے عملی طریقۂ کار اور شرعی مسائل سے آگاہی فراہم کرنا تھا۔

اس کورس کے معلم مولانا حبیب اللہ عطاری مدنی وضو و غسل کے مسائل اور نماز کے عملی طریقے سے متعلق مدرسۃالمدینہ بوائز کے طلبۂ کرام کو تفصیلی تربیت دی۔

اس دوران فجر کے وقت جگانے کے طریقے، دعوتِ اسلامی کے دینی کاموں کے حوالے سے تربیت اور نواجوانوں میں اخلاقی تربیت پر بھی گفتگو کی گئی جبکہ طلبۂ کرام نے دینی کام سیکھنے کے ساتھ ساتھ بااخلاق اور نیک اعمال کرنے کا عزم کیا۔ (رپورٹ: محمداحمدسیالوی عطاری ، کانٹینٹ:غیاث الدین عطاری) 

اوکاڑہ، پنجاب کے شہر رینالہ خورد میں واقع عاشقانِ رسول کی دینی درس گاہ ”مدرسہ برکات القراٰن“ نزد جامع مسجد حنفیہ میں شعبہ مدنی کورسز دعوتِ اسلامی کے تحت 7 دن کا رہائشی فیضانِ نماز کورس ہوا جس میں مذکورہ مدرسے کے طلبۂ کرام نے شرکت کی۔

کورس کے معلم مولانا حبیب اللہ عطاری مدنی نے طلبۂ کرام کو وضو و غسل کے مسائل بتاتے ہوئے نماز کے شرائط و فرائض اور واجبات بیان کئے نیز نماز کا عملی طریقہ بھی سکھایا۔

21 مئی 2025ء ڈسٹرکٹ ایسٹ کراچی کے علاقے چنیسر ٹاؤن، یوسی 3 میں قائم جامع مسجد فیضانِ الیاس میں شعبہ کفن دفن  دعوتِ اسلامی کے تحت کفن دفن شرعی احکام سکھانے کے لئے ایک پروگرام کا انعقاد کیا گیا۔

اس پروگرام کے ذمہ دار عزیز عطاری ( جوکہ ڈسٹرکٹ ایسٹ شعبہ کفن دفن کے ذمہ دار ہیں) نے حاضرین سے کفن و دفن کے شرعی احکام اور عملی طریقۂ کار پر کلام کیا اور مختلف امور پر اُن کی رہنمائی کی ۔

اس دوران اہلِ محلہ، نمازی حضرات، علاقے کے معززین اور دعوتِ اسلامی کے ذمہ دار اسلامی بھائیوں نے شرکت کی اور اپنے خیالات کا اظہار بھی کیا۔ حاضرین کا کہنا تھا کہ اس طرح کے کورسز اور ٹریننگ پروگرامز کا انعقاد بہت ضروری ہے تاکہ صحیح طریقے کے مطابق کفن دفن کی عملی تربیت حاصل کی جا سکے۔(رپورٹ:قاری محمد ناصر عطاری شعبہ مدنی مذاکرہ و ہفتہ وار اجتماع ذمہ دار چنیسر ٹاؤن ، کانٹینٹ:غیاث الدین عطاری)