27 اگست 2025ء کو میرپور خاص کے علاقے ہاشم نگر میں قائم پبلک اسکول میں ایجوکیشن ڈیپارٹمنٹ دعوتِ اسلامی کے تحت  اجتماعی طور پر ”مدنی مذاکرہ بسلسلہ جشنِ ولادتِ مصطفیٰ صلَّی اللہ علیہ واٰلہٖ وسلَّم“ دیکھنے کا اہتمام کیا گیا۔

اس موقع پر رکنِ مرکزی مجلسِ شوریٰ عبدالوہاب عطاری، نگرانِ ڈویژن حافظ زین عطاری، اسکول پرنسپل سر عمران لاڑک اور اسکول کے میل اسٹاف سمیت اسٹوڈنٹس موجود تھے۔

حضور خاتم النبیین صلَّی اللہ علیہ واٰلہٖ وسلَّم سے محبت کرنا اور اُن کی اتباع کرنا ایمان کا حصہ ہے جس کو قراٰنِ کریم میں مختلف مقامات پر ذکر کیا گیا نیز جب حضرت عمر رضی اللہ عنہ نے عرض کی یارسول اللہ صلَّی اللہ علیہ واٰلہٖ وسلَّم آپ مجھے میری جان کے علاوہ ہر چیز سے زیادہ محبوب ہیں تو آپ صلَّی اللہ علیہ واٰلہٖ وسلَّم نے ارشاد فرمایا:نہیں !اُس ذات کی قسم جس کے قبضۂ قدرت میں میری جان ہے !(تمہاری محبت اس وقت تک کامل نہیں ہوگی) جب تک میں تمہاری نزدیک تمہاری جان سے بھی زیادہ محبوب نہ ہو جاؤں ، آپ رضی اللہ عنہ نے عرض کی آپ مجھے میری جان سے بھی زیادہ محبوب ہیں، یہ سن کر آپ صلَّی اللہ علیہ واٰلہٖ وسلَّم نے ارشاد فرمایا:اے عمر ! اب (تمہاری محبت کامل ہو گئی)۔(بخاری، 4 / 283، حدیث:6632 ملتقطاً)

عاشقانِ رسول کے دلوں میں حضور صلَّی اللہ علیہ واٰلہٖ وسلَّم کی محبت بڑھانے اور انہیں عشقِ مصطفیٰ صلَّی اللہ علیہ واٰلہٖ وسلَّم کا جذبہ دلانے کے لئے اس ہفتے شیخِ طریقت، امیرِ اَہلِ سنّت، بانیِ دعوتِ اسلامی حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہ نے17 صفحات کا رسالہ ”محبتِ رسول صلَّی اللہ علیہ واٰلہٖ وسلَّم“ پڑھنے / سننے کی ترغیب دلائی ہے اور پڑھنے / سننے والوں کو اپنی دعاؤں سے نوازا ہے۔

دعائے عطار

یاربِّ کریم! جو کوئی 17 صفحات کا رسالہ ”محبتِ رسول صلَّی اللہ علیہ واٰلہٖ وسلَّم“ پڑھ یا سن لے اُسے حقیقی مُحبَّتِ رسول نصیب فرما اور اُسے ماں باپ اور خاندان سمیت بے حساب بخش دے۔آمین

یہ رسالہ آڈیو میں سننے اور اردو سمیت کئی زبانوں میں ڈاؤن لوڈ کرنے کے لئے نیچے دیئے گئے لنک پر کلک کیجئے:

گجرانوالہ ، پنجاب :

شعبہ رابطہ برائے شخصیات دعوتِ اسلامی کے دینی کاموں کے سلسلے میں مرکزی مجلسِ شوریٰ کے رکن حاجی محمد اظہر عطاری کی گجرانوالہ، پنجاب میں ایڈیشنل ڈپٹی کمشنر فیصل سلطان، اسسٹنٹ کمشنر محمد فیصل، اسسٹنٹ کمشنر ہیڈ کوارٹر اور دیگر افسران سے ملاقات ہوئی جس کا مقصد 1500 ویں جشن میلاد کی تیاریوں کا جائزہ لینا اور اس کے متعلق درپیش مسائل پر تبادلہ خیال کرنا تھا۔

تفصیلات کے مطابق ملاقات میں افسران کی جانب سے کہا گیا کہ گزشتہ سالوں میں جو سہولیات جشنِ ولادت کے موقع پر فراہم کی گئیں تھیں وہ اس سال بھی یقینی بنائی جائیں گی تاکہ تقریب کو مزید پُرامن اور عزم و احترام کے ساتھ منایا جا سکے۔

رکنِ شوریٰ نے اپنی گفتگو کے دوران تمام افسران کو مدنی مرکز فیضان مدینہ گجرانوالہ، مدنی مرکز فیضان مدینہ جوہر ٹاؤن اور عالمی مدنی مرکز فیضان مدینہ کراچی کا وزٹ کرنے کا طے کیا گیا ۔

پتوکی شہر، ڈسٹرکٹ قصور، صوبہ پنجاب:

دعوتِ اسلامی کے دینی کاموں کے سلسلے میں پتوکی شہر کے مختلف ملز کے GM سے اُن کے دفاتر میں رابطہ برائے ایگریکلچر اینڈ لائیو اسٹاک ڈیپارٹمنٹ کے ذمہ داران کی ملاقات ہوئی جن میں GM شوگر مل پتوکی اور GM فنانس شوگر مل پتوکی شامل تھے۔

اس کے علاوہ نگرانِ رابطہ برائے ایگریکلچر اینڈ لائیو اسٹاک ڈیپارٹمنٹ ڈاکٹر ناصر عطاری نے ڈائریکٹر بفلور ریسرچ انسٹیٹیوٹ پتوکی ڈاکٹر عمران عطاری سے بھی ملاقات کی جس میں مختلف امور پر تبادلۂ خیال کیا گیا۔

نماز، وضو اور دیگر دینی مسائل سکھانے والے دعوتِ اسلامی کے شعبے مدنی کورسز کے تحت مدرسۃالمدینہ بوائز نزد جامع مسجد زینب فیصل آباد میں 3 دن کا فیضانِ نماز کورس  منعقد ہوا۔

کورس کے دوران شعبے کے معلم مولانا محمد عامر عطاری مدنی نے مدرسۃالمدینہ بوائز کے بچوں کو نماز کے فرائض، واجبات اور دیگر مسائل بتائے نیز بچوں نے نمازِ تہجد کے ساتھ ساتھ دیگر سنتیں و و نوافل بھی ادا کئے۔(رپورٹ: شعبہ مدنی کورسز ، کانٹینٹ:غیاث الدین عطاری)

دعوتِ اسلامی کے تعلیمی معاملات کے سلسلے میں 21 اگست 2025ء کو فیصل آباد، پنجاب میں ایک میٹنگ ہوئی جس میں کنزالمدارس بورڈ سے الحاق شدہ  عاشقانِ رسول کے مدارس و جامعات (لاہور اور فیصل آباد ڈویژن) کے ناظمین نے شرکت کی۔

معلومات کے مطابق اس میٹنگ میں خصوصی شرکت مرکزی مجلسِ شوریٰ کے رکن و نگرانِ پاکستان مشاورت حاجی محمد شاہد عطاری اور رکنِ شوریٰ و صدر کنزالمدارس بورڈ مولانا حاجی محمد جنید عطاری مدنی کی ہوئی۔نگرانِ پاکستان مشاورت نے میٹنگ کے دوران اسلامی بھائیوں سے گفتگو کرتے ہوئے چند اہم نکات پر مشاورت کی اور انہیں مدنی پھولوں سے نوازا۔

دعوتِ اسلامی کے تحت فیصل آباد، پنجاب میں قائم مدنی مرکز فیضانِ مدینہ میں  نعت خواں اسلامی بھائیوں کا مدنی مشورہ ہوا جس میں فیصل آباد ڈسٹرکٹ نگران، سٹی نگران اور دیگر اسلامی بھائیوں نے شرکت کی۔

مدنی مشورے میں رکنِ مرکزی مجلسِ شوریٰ و نگرانِ پاکستان مشاورت حاجی محمد شاہد عطاری نے نعت خواں اسلامی بھائیوں کی تربیت و رہنمائی کرتے ہوئے انہیں اللہ پاک کی رضا کے لئے نعت پڑھنے اور اس نعت پر اللہ کا شکر ادا کرنے کا ذہن دیا۔

1500 سواں جشن ولادتِ مصطفٰے صلَّی اللہ علیہ واٰلہٖ وسلَّم جوش و جذبے کے ساتھ منانے کے لئے عاشقانِ رسول کی عالمگیر تحریک دعوتِ اسلامی کے زیر اہتمام عالمی مدنی مرکز فیضانِ مدینہ کراچی میں 23 اگست تا 06 ستمبر 2025ء مدنی مذاکرے کا سلسلہ جاری ہے جس میں دعوتِ اسلامی کے مختلف شعبہ جات کے اسلامی بھائی اور پاکستان کے دیگر شہروں کے عاشقانِ رسول کراچی آکر شریک ہورہے ہیں۔

عالمی مدنی مرکز فیضانِ مدینہ کی انتظامیہ کی جانب سے آنے والے مہمانوں کی تواضع کے لئے انتظامات مکمل کرلئے گئے ہیں۔ مدنی مذاکروں میں شرکت کے لئے آنے والے مہمانوں کو ناشتہ، چائے اور دونوں وقت کا کھانا بالکل مفت فراہم کیا جارہا ہے جبکہ ہنگامی طبی امداد کے لئے مفت چیک اَپ ،ڈاکٹرز اور ادویات کی سہولت بھی موجود ہے ۔ یہ طبی سہولت بغیر کسی فیس کے مریض کو دی جاتی ہے۔

ان مدنی مذاکروں میں شیخ طریقت امیر اہلسنت حضرت علامہ مولانا محمد الیاس عطار قادری دامت بَرَکَاتُہمُ العالیہ آقا کریم صلَّی اللہ علیہ واٰلہٖ وسلَّم کی سیرت اور آپ کی تعلیمات سے شرکا کو آگاہ کرنے کے ساتھ ساتھ عاشقانِ رسول کی جانب سے ہونے والے سوالات کےجوابات دے رہے ہیں۔

روزانہ مدنی مذاکرے کا آغاز رات تقریباً 09:15 بجے تلاوت و نعتِ رسولِ مقبول صلَّی اللہ علیہ واٰلہٖ وسلَّم سے ہوتا ہے جس کے بعد عاشقانِ رسول امیراہل سنت کی گفتگو سے مستفید ہوتے ہیں ۔ مدنی مذاکروں کا یہ سلسلہ 12 ربیع الاوّل 1447ھ کی صبح بہاراں کی پُر رونق محفل کے ساتھ اختتام پذیر ہوگا۔

واضح رہے کہ یہ تمام مدنی مذاکرے مدنی چینل پر براہِ راست ٹیلی کاسٹ بھی کئے جارہے ہیں۔ تمام عاشقان رسول پُرجوش انداز میں جشنِ ولادت منانے کے لئے ان مدنی مذاکروں میں ضرور شرکت کریں۔

دینِ اسلام کی تعلیمات کو منظم انداز میں عام کرنے والی عاشقانِ رسول کی دینی تحریک دعوتِ اسلامی کے زیر اہتمام آج مؤرخہ  28 اگست 2025ء بروز جمعرات دنیا بھر میں ہفتہ وار سنتوں بھرے اجتماعات کا انعقاد کیا جائے گا جن میں اراکین شوریٰ و مبلغین دعوتِ اسلامی سنتوں بھرے بیانات فرمائیں گے۔

تفصیلات کے مطابق گوجرہ سٹی ڈسٹرکٹ منڈی بہاؤالدین سے لائیو مدنی چینل پر ہونے والے ہفتہ وار سنتوں بھرے اجتماع میں رکن شوریٰ حاجی محمد اظہر عطاری سنتوں بھرا بیان فرمائیں گے۔

اس کے علاوہ مدنی مرکز فیضان مدینہ سانگھڑ روڈ نواب شاہ میں رکن شوریٰ عبد الوہاب عطاری، جامع مسجد حنفیہ محمدی سوڈیوال لاہور میں رکن شوریٰ حاجی یعفور رضا عطاری اور جامع مسجد فیضانِ ابراہیم شہداد پور میں رکن شوریٰ حاجی محمد علی عطاری سنتوں بھرا بیان فرمائیں گے۔

تمام عاشقانِ رسول سے شرکت کی درخواست ہے۔

اللہ تعالیٰ نے انسان کو پاکیزہ اور حلال چیزوں کو اختیار کرنے کا حکم ارشاد فرمایا ہے،تو اس اعتبار سےدینِ اسلام میں حلال و حرام اور پاکی و ناپاکی کا علم بھی ایک عظیم نعمت کا درجہ رکھتا ہے جس کے ذریعے انسان اپنی زندگی کو شریعت کے مطابق گزار کر دنیا و آخرت کی کامیابیاں حاصل کر سکتا ہے۔

الحمدللہ! اسی مقصد کو سامنے رکھتے ہوئے دارالافتاء اہل سنت کے تحت شعبہ حلال ریسرچ اینڈ ایڈوائزری کونسل (Halal Research & Advisory Council)نے 22 اگست بروز جمعہ ایک اہم ویبینار(آن لائن) بعنوان ”حلال کاسمیٹکس“ (Halal Cosmetics) کا انعقاد کیا۔ اس ویبینار میں تقریباً 400 کے لگ بھگ افراد نے شرکت کی۔جس میں جامعات و مدارس کے اساتذہ و طلبہ، اسکول، کالجز اور یونیورسٹیز کے اسٹوڈنٹس، کاسمیٹکس انڈسٹری سے وابستہ افراد، اسلامی بہنوں اور بیرونِ ممالک کے افراد کی ایک کثیر تعداد نے شرکت کی۔

شرکائے کورس میں پاکستان، بھارت، متحدہ عرب امارات، برطانیہ، امریکہ، انگلینڈ، اسکاٹ لینڈ، اسپین، سری لنکا، جنوبی کوریا، اٹلی، ماریشس، بنگلہ دیش، نیپال، عمان، جنوبی افریقہ، بوطسوانا، سویڈن، نیوزی لینڈ، جرمنی، آسٹریلیا، کینیڈا، افغانستان، ہانگ کانگ، نیدرلینڈز، موزمبیق جیسے ممالک کے افراد شامل تھے۔ اس کے ساتھ ساتھ تخصص فی الفقہ الحنفی و فقہ الحلال کے طلبائے کرام نے بھی اس ویبینار میں حصہ لیا۔

اس سیشن کا آغاز اللہ تعالیٰ کی لاریب کتاب قرآن مجید کی تلاوت سے ہوا جس کے بعد نعت شریف پڑھی گئی۔ بعد ازاں حلال ریسرچ اینڈ ایڈوائزری کونسل کا تعارف پیش کرتے ہوئے ، اس شعبہ کے ہیڈ اور مجلس تحقیقات شرعیہ کے رکن مولانا مفتی محمد ساجد عطاری مُدَّ ظِلُّہُ العالی نے کاسمیٹکس کی شرعی حیثیت اور اس سے متعلق امور پر تفصیلا گفتگو فرمائی جس میں سےچند عنوانات یہ ہیں:

٭ زینت کے متعلق حکم شرع ٭حلال کاسمیٹکس کا تعارف ٭حلال کاسمیٹک سے متعلق شریعت اور سٹینڈرڈز کے قوانین کا جائزہ ٭حلال ، حرام اور مشبوہ اجزاء کی امثلہ ٭ الکوحل کا استعمال اور شرعی نقطۂ نظر ٭حلال سرٹیفکیشن کا عمل اور اس کے فوائد

آخر میں مفتی صاحب نے شرکا کے سوالات کے جوابات بھی دیئے ۔کورس کے متعلق تقریباً سو (100) شرکانے تاثرات وتجاویز بھی دی ہیں جن میں سے چند تاثرات ملاحظہ کیجئے۔

٭"ماشاءاللہ الکریم، آج کا ویبینار بہت مفید رہا، مفتی صاحب کی جانب سے ان چیزوں پر رہنمائی کی گئی جن کی طرف عموماً توجہ نہیں ہوتی۔اور اسلامی بہنوں کا اس شعبہ سے زیادہ تعلق ہوتا ہے، تو ان کے اشکالات دور کرنے اور کئی نئی چیزیں آج کے ویبینار میں سیکھیں۔اللہ پاک مفتی صاحب اور اس دار الافتاء اہلسنت کے اس شعبے میں کام کرنے والے تمام افراد کو صحت عافیت اور سلامتی کے ساتھ رکھے، دین متین کی خدمتیں کرنے پر اپنی رحمت کے شایان شان اجر عطا فرمائے، امیر اہلسنت دامت برکاتہم العالیہ کو صحت وسلامتی اور عافیت والی طویل زندگی عطا فرمائے، حاسدوں کے حسد سے بچائے، دعوت اسلامی کو دن رات ترقیاں وعروج عطا فرمائے۔ آمین آمین آمین یا رب "

٭الحمدللہ! بہت ہی پیارا سیشن تھا اور خاص کر کے breathable nail polish کے بارے میں معلومات اور اس کو لگانے کے باوجود کون کون سی صورتیں ہو سکتی ہیں کہ جن سے وضو نہیں ہو گا، وہ بہت زبردست معلومات تھیں۔

٭ہم نے پہلے بھی کئی webinars میں شرکت کی ،مفتی صاحب کی تحقیق ہمارے لیے بہت اہم اور فائدہ بخش رہی اور جس طرح حلال کاسمیٹکس اور اس کے مقاصد پر شرعی رہنمائی فرمائی الحمدللہ قابل تحسین عمل ہے۔

٭بہت اچھی اور بہت زیادہ معلومات کم وقت میں مفتی صاحب نے دی۔ اللہ انکو اور حلال ریسرچ اینڈ ایڈوائزری کونسل کی پوری ٹیم کو سلامت رکھے اور خوب برکت دے۔

یہ ویبینار بحمداللہ ایک شاندار اور کامیاب سیشن ثابت ہوا، جس سے شرکاء کو علمی و عملی فائدہ حاصل ہوا ۔اللہ پاک سے دعا ہے کہ وہ ہماری اس کوشش کو قبول فرمائے۔ اٰمین بجاہ النبی الامین صلی اللہ علیہ وسلم (رپورٹ: قیصر عباس ، مرکز الاقتصاد الاسلامی، جوہرٹاؤن لاہور)

شعبہ حلال ریسرچ اینڈ ایڈوائزری کونسل(HRAC)

دار الافتاء اہل سنت دعوت اسلامی

25-08-2025

دارالمدینہ کالج کا پہلا کیمپس 2022ء میں فیصل آباد میں قائم کیا گیا تھا اور اب دعوتِ اسلامی کے تحت عائشہ منزل فیڈرل بی ایریا، کراچی میں بھی طالبات کے لئے پہلے کیمپس کا کامیابی کے ساتھ افتتاح کر دیا گیا ہے۔

افتتاحی تقریب میں دعوتِ اسلامی کی مرکزی مجلسِ شوریٰ کے رکن حاجی فضیل رضا عطاری نے خصوصی شرکت کی اور والدین کو دارالمدینہ کالج میں داخلے کی ترغیب دلائی۔ ان کا کہنا تھا کہ دارالمدینہ گرلز کالج دنیاوی تعلیم کے ساتھ ساتھ اخلاقی تربیت کرنے والا ادارہ بھی ہے ۔حاجی فضیل رضا عطاری نے دارالمدینہ گرلز کالج کی اہمیت کو بیان کیا۔

تقریب میں CEO دارالمدینہ ڈاکٹر محمد دانش اقبال عطاری، CEO فیضان اسلامک اسکول مولانا محمد زبیر عطاری مدنی، CEO دارالمدینہ کیمبرج اسکول مولانا فرازاحمد عطاری مدنی ،ڈائریکٹر بورڈ کے ممبران اور دیگر معزز مہمانانِ گرامی نے بھی شرکت کی۔

تقریب کا آغاز تلاوتِ قرآنِ پاک اور نعتِ رسولِ مقبول صلَّی اللہ علیہ واٰلہٖ وسلَّم سے ہوا جس کے بعد تمام مہمانوں کو دارالمدینہ گرلز کالج کا وزٹ بھی کروایا گیا، جہاں جدید طرز پر تعمیر شدہ کلاس رومز، لیبارٹریز اور کمپیوٹر لیب بھی موجود ہے۔

CEO دارالمدینہ انٹرنیشنل اسلامک اسکول سسٹم نے اس موقع پر کہا: ہمارا مقصد کوالیفائیڈ ٹیچرز کی زیرِ نگرانی، جدید دور کے تقاضوں کے مطابق معیاری تعلیم فراہم کی جا رہی ہے۔ تقریب کے اختتام پر درود و سلام پڑھا گیا اور اجتماعی دعا کا سلسلہ بھی ہوا۔

واضح رہے! دارالمدینہ کالج میں طالبات کے لئے مختلف شعبہ جات میں اعلیٰ تعلیم فراہم کی جاتی ہے، جن میں میڈیکل، انجینئرنگ، کمپیوٹر سائنس، کامرس اور ہیومینیٹیز شامل ہیں۔

دارالمدینہ کا یہ منفرد تعلیمی نظام نہ صرف طلبہ و طالبات کو دنیاوی کامیابی کے لئے تیار کرتا ہے بلکہ انہیں نیک اور باعمل مسلمان بنانے پر بھی خصوصی توجہ دیتا ہے۔(رپورٹ: مولانا رضا عطاری مدنی، اردو کانٹینٹ رائیٹرمارکیٹنگ اینڈ کمیونی کیشن ڈیپارٹمنٹ دارالمدینہ ،ہیڈ آفس کراچی ، ویب ڈسک رائٹر:غیاث الدین عطاری)

کراچی کے علاقے فیڈرل بی ایریا بلاک 6 میں پہلا دارالمدینہ کیمبرج او لیول کیمپس کا  کامیابی کے ساتھ افتتاح کر دیا گیا۔ اس افتتاحی تقریب میں دارالمدینہ کے CEO ، اساتذہ، والدین اور اسکول اسٹاف نے شرکت کی۔

تقریب کا آغاز تلاوتِ قرآن پاک اور نعتِ رسولِ مقبول صلَّی اللہ علیہ واٰلہٖ وسلَّم سے کرنے کے بعد دعوتِ اسلامی کی مرکزی مجلسِ شوریٰ کے رکن حاجی فضیل رضا عطاری نے دارالمدینہ کیمبرج اسکول کا افتتاح کیا اور والدین کو ذہن دیا کہ وہ اپنے بچوں کو دارالمدینہ کیمبرج اسکول میں داخلہ دلوائیں۔ ان کا کہنا تھا کہ ’’دارالمدینہ صرف دنیاوی تعلیم دینے والا ادارہ نہیں بلکہ بچوں کی اخلاقی اور دینی تربیت کا مرکز بھی ہے‘‘۔

پہلا کیمبرج او لیول کیمپس اپنے خوبصورت و جدید ڈیزائن، دلکش ماربل فلورنگ اور ایئر کنڈیشنڈ کلاس رومز کے ساتھ طلبا و طالبات کو ایک ایسا ماحول فراہم کررہا ہے جو ان کے ذہنوں کو روشن اور کردار کو نکھارے گا۔یہاں صرف جدید دور کانصاب نہیں پڑھایا جائے گا بلکہ کردار سازی، اخلاقیات اور جدید تقاضوں کے مطابق تربیت بھی دی جائے گی۔

CEO دارالمدینہ انٹرنیشنل اسلامک اسکول سسٹم نے اس موقع پر کہا کہ: کوالیفائیڈ اساتذہ کی زیرِ نگرانی طلبا و طالبات کو دینی و دنیاوی تعلیم کے ساتھ شریعت کے مطابق ماحول فراہم کیا جائے گا۔

اس موقع پر دارالمدینہ کیمبرج اسکول کے CEO مولانا فرازاحمد عطاری مدنی کا کہنا تھا کہ : ہم چاہتے ہیں کہ ہمارےبچے نہ صرف علم میں ممتاز ہوں بلکہ دورِ حاضر کے تقاضوں سے بھی بخوبی واقف ہوں۔ اسی مقصد کے تحت انٹر نیشنل کریکولم ، روبوٹکس، ڈیجیٹل اسکلز اور دیگر تخلیقی و ہم نصابی سرگرمیوں کا سلسلہ شامل کیا گیا ہے۔افتتاحی تقریب کے اختتام پر درود و سلام اور اجتماعی دعا ہوئی۔

دارالمدینہ انٹرنیشنل اسلامک اسکول سسٹم کا خواب ہے کہ ہر بچہ نہ صرف علم حاصل کرے بلکہ ایک دیندار،باوقار، بااخلاق اور خوداعتماد شہری بنے۔والدین سے گزارش ہے کہ وہ اپنے بچوں کے روشن اور کامیاب مستقبل کے لئے دارالمدینہ کا انتخاب ضرور کریں۔ (رپورٹ: مولانا رضا عطاری مدنی، اردو کانٹینٹ رائیٹرمارکیٹنگ اینڈ کمیونی کیشن ڈیپارٹمنٹ دارالمدینہ ،ہیڈ آفس کراچی ، ویب ڈسک رائٹر:غیاث الدین عطاری)