جب ہم لفظ تربیت سنتے ہیں تو ہمارے اندر ایک ایسی قوت جنم لیتی ہے جو ہمیں اس طرف راغب کرتی ہے کہ ہم اپنی زندگی کو تربیت کے مدنی گلدستوں میں سجائیں اس لیے کہ رسول اللہ کا فرمان ہے کہ سمجھاؤ کہ سمجھانا مسلمان کو فائدہ دیتا ہے اسی طرح اخری نبی صلی اللہ تعالی علیہ وسلم نے بھی تربیت کے متعلق وعظ فرمایا ہے۔آئیے چند احادیث ملاحظہ کرتے ہیں۔

(1) دو چیزوں کا حرام ہونا

حضرت علی رضی اللہ تعالی عنہ فرماتے ہیں کہ نبی کریم صلی اللہ تعالی علیہ وسلم نے اپنے دائیں ہاتھ میں ریشم کو پکڑا اور بائیں ہاتھ میں سونے کو پھر فرمایا یہ دونوں چیزیں میری امت کے مردوں پر حرام ہیں. (سنن ابن داؤد،کتاب اللباس،حدیث 4057)

(2) دو ادمیوں پر رشک کرنا جائز : حضرت سیدنا عبداللہ بن مسعود رضی اللہ تعالی عنہ سے روایت ہے کہ حضور نبی اکرم صلی اللہ علیہ وسلم نے ارشاد فرمایا دو ادمیوں کے علاوہ کسی پر حسد کرنا جائز نہیں وہ شخص جسے اللہ نے مال عطا فرمایا اور اسے صحیح راستے میں خرچ کرنے کی قدرت عطا فرمائی وہ مرد جس سے اللہ تعالی نے دین کا علم عطا فرمایا تو وہ اس کے مطابق فیصلہ کرے اور اس کی تعلیم دے۔ (ریاض الصالحین،جلد 5،حدیث 544، صفحہ 189)

(3) دو دعاؤں کا رد نہ ہونا: رسول اللہ صلی اللہ تعالی علیہ وسلم نے فرمایا دو دعائیں رد نہیں کی جاتی یا بہت کم رد کی جاتی ہیں اذان کے وقت کی دعا اور جہاد کے وقت کی دعا جب بعض بعض کو قتل کر رہے ہوں۔ (مرآۃ المناجیح، جلد 1،صفحہ 672)

(4) دو چیزوں کا جوان رہنا : نبی کریم صلی اللہ تعالی علیہ وسلم نے ارشاد فرمایا کہ انسان بوڑھا ہو جاتا ہے اور اس کی دو چیزیں جوان رہتی ہیں مال کی حرص اور عمر کی حرص۔ (مرآۃ المناجیح،جلد 7،حدیث 5270)

(5) لوگوں کا گھاٹے میں ہونا : حضرت ابن عباس رضی اللہ تعالی عنہ سے روایت ہے کہ نبی کریم صلی اللہ علیہ وسلم نے ارشاد فرمایا دو نعمتیں ہیں جن میں بہت لوگ گھاٹے میں ہیں تندرستی اور فراغت۔ (مراۃ المناجیح، جلد 7، صفحہ 21)

اللہ تعالی ہمیں ان احادیث پر عمل کرنے کی توفیق عطا فرمائے امین بجاہ خاتم النبیین صلی اللہ علیہ وسلم

اللہ کے اخری نبی صلی اللہ تعالی علیہ وسلم تاریخ انسانی کے سب سے جامع اور اکمل انسان ہیں۔ اعلی انسانیت کے تمام پہلو اپ کی زندگی میں اپنے تمام تر کمال کے ساتھ جمع ہیں اپ نبی اور رسول ہونے کے ساتھ ساتھ داعی، مصلح،مدبر، قائد، خطیب، امیر ریاست، مربی، مصنف،استاد، مرشد الغرض زندگی اور معاشرے کے ہر پہلو کے اعتبار سے رہنما ہیں۔نبی کریم صلی اللہ تعالی علیہ وسلم نے بہت سے معاملات میں صحابہ کرام کی رہنمائی فرمائی ہے۔ آئیے چند احادیث مبارکہ پڑھتے ہیں: "رسول اللہ صلی اللہ تعالی علیہ وسلم کا دو چیزوں سے تربیت فرمانا"

(1) نبی کریم صلی اللہ تعالی علیہ وسلم نے ارشاد فرمایا دو چیزیں لازم کرنے والی ہیں کسی نے عرض کیا یا رسول اللہ لازم کرنے والی کیا ہے فرمایا جو اللہ کا شریک مانتا ہوا مر گیا وہ اگ میں جائے گا اور جو اس طرح مرا کسی کو اللہ کا شریک نہیں مانتا وہ جنت میں جائے گا. (مراۃ المناجیح، کتاب الایمان، جلد 1، صفحہ 62، حدیث 33)

(2) حضرت ابن عباس رضی اللہ تعالی عنہما سے روایت ہے کہ رسول اللہ صلی اللہ تعالی علیہ وسلم دو قبروں کے پاس سے گزرے انہیں عذاب دیا جا رہا تھا تو اپ نے فرمایا ان دونوں کو عذاب دیا جا رہا ہے اور کسی بڑے گناہ کے سبب نہیں دی جا رہا ان دونوں میں سے ایک چغل خوری کرتا تھا اور دوسرا پیشاب کی چھینٹوں سے نہیں بچتا تھا. (اتحاف المسلم،کتاب الطہارت،صفحہ 29)

(3)نبی کریم صلی اللہ تعالی علیہ وسلم نے ارشاد فرمایا حسد نہیں مگر دو شخصوں میں وہ جسے اللہ عزوجل نے یہ کتاب عطا فرمائی تو وہ اس کے ساتھ کھڑا ہوتا ہے دن اور رات کے اوقات میں اور ایسا مرد جسے اللہ عزوجل مال عطا فرمایا تو اسے خرچ کرتا ہے دن اور رات کے اوقات میں. (اتحاف المسلم، کتاب قراۃ القران،صفحہ 134)

(4) حضرت سہل بن سعد رضی اللہ تعالی عنہ سے روایت ہے کہ رسول اللہ صلی اللہ تعالی علیہ وسلم نے ارشاد فرمایا جو شخص میرے لیے اس چیز کا ضامن ہو جائے جو اس کے دو جبڑوں کے درمیان ہے یعنی زبان کا اور اس کا جو اس کے دونوں پاؤں کے درمیان ہے یعنی شرمگاہ کا میں اس کے لیے جنت کا ضامن ہوں گا. (بہار شریعت، جلد 3، حصہ الف،صفحہ نمبر 519)

(5) حضرت ابوہریرہ رضی اللہ تعالی عنہ سے روایت ہے کہ رسول اللہ صلی اللہ تعالی علیہ وسلم نے ارشاد فرمایا جو چیز انسان کو سب سے زیادہ جنت میں داخل کرنے والی ہے وہ تقوی اور حسن اخلاق ہے اور جو چیز انسان کو سب سے زیادہ جہنم میں لے جانے والی ہے وہ دو جوف دار چیزیں ہیں منہ اور شرمگاہ۔ (سنن ابن ماجہ، حدیث 4246،صفحہ 489،جلد 4)

ہمارے پیارے نبی صلی اللہ علیہ وسلم   اللہ پاک کی طرف سے معلم اور رہنما بنا کر بھیجے گئے ہیں رسول اللہ صلی اللہ علیہ وسلم ہر وقت اپنی امت کی تربیت فرماتے تھے رسول صلی اللہ علیہ وسلم صحابہ کرام علیہم رضوان کی اخلاقی،روحانی اور معاشرتی زندگی کے حوالے سے تربیت فرمایا کرتے تھے کبھی دو، تین ،چار اور کبھی زیادہ چیزوں کے بیان میں تربیت فرمایا کرتے تھے۔

ان شاءاللہ اس ماہ سرکار صلی اللہ تعالی علیہ وسلم نے جن دو چیزوں کے بیان میں مسلمانوں کی تربیت فرمائی ہے ان کے متعلق پڑھتے ہیں اور اپنی زندگی سنوارتے ہیں۔

1: قرآن اور اہل بیت: اللہ پاک کے پیارے اخری نبی صلی اللہ علیہ وسلم نے ارشاد فرمایا : میں تم میں دو عظیم چیزیں چھوڑ رہا ہوں ان میں سے پہلی تو اللہ پاک کی کتاب ہے جس میں ہدایت اور نور ہے ،تم اللہ پاک کی کتاب پر عمل کرو اور اسے مضبوطی سے تھام لو دوسرے میرے اہل بیت ہیں، اور یہ تین بار ارشاد فرمایا :میں تمہیں اپنے اہل بیت کے متعلق اللہ پاک کی یاد دلاتا ہوں ۔ (مسلم ص1008،حدیث,144)

2: اللہ پاک کے غضب کو ٹھنڈا کرنے والی: ایک اعرابی نے نبی کریم صلی اللہ علیہ وسلم کی بارگاہ میں حاضر ہو کر عرض کی اللہ تعالی کے غضب کو کیا چیز ٹھنڈا کرتی ہے ارشاد فرمایا: چچکے چچکے صدقہ کرنا اور صلہ رحمی ۔ (جامع الحدیث ۔405/19،حدیث14922)

ہمیں نیکی کے کام ایسے کرنے چاہیے کہ دائیں ہاتھ سے کرے اور بائیں ہاتھ کو پتہ نہ چلے "شعیب الایمان" کی ایک حدیث پاک میں نبی کریم صلی اللہ علیہ وسلم نے فرمایا ظاہری عمل کے مقابلے میں پوشیدہ عمل افضل ہے۔ (شعیب الایمان ،376/5حدیث8012)

3: فضلیت سورہ فلق ناس: حضرت سیدنا عقبہ ابن عامر رضی اللہ تعالی عنہ فرماتے ہیں میں رسول اللہ صلی اللہ علیہ وسلم کے ساتھ جُحْفتح اور ابوا کے درمیان سفر کر رہا تھا کہ اچانک ہمیں آندھی اور سخت تاریکی نے گھیر لیا تؤ آپ صلی اللہ علیہ وسلم نے "سورہ فلق اور "سورہ ناس "کے ذریعےپناہ مانگی اور فرمانے لگے۔اے عقبہ ! ان دونوں صورتوں کے ساتھ پناہ مانگا کرو کہ کسی نے ان دونوں کے ساتھ پناہ نہیں مانگی. (ابو داؤد ،کتاب الوتر ،باب فی المعوذتین,104/ 2حدیث، 1463)

مفتی احمد یار خان علی رحمہ فرماتے ہیں :اس سے معلوم ہوا کہ یہ دونوں صورتیں صرف جادو کے لیے ہی نہیں بلکہ دوسری افتوں میں بھی کام اتی ہیں۔ (مراۃ المناجیح652/3)

4: عذاب کا سبب: خاتم المرسلین رحمت اللعالمین صلی اللہ علیہ وسلم نے ارشاد فرمایا : جھوٹ سے منہ کالا ہوتا ہے اور چغلی سے قبر کا عذاب ہوتا ہے۔ (شعیب الایمان، باپ فی حفظ اللسان،208/4،حدیث4813)

چغلی کی تعریف : علامہ بدر الدین عینی علیہ الرحمہ نے فرمایا" کسی کی بات کو دوسرے ادمی تک پہنچانا اور فساد پھیلانے کے لیے بیان کرنا چغلی ہے." (عمدۃ القاری، کتاب الوضو ،باب من الکبائر- الخ،593/2،تحت الحدیث ،216)

5: ایک اعرابی صحابی رضی اللہ عنہ نے نبی کریم صلی اللہ علیہ وسلم کی بارگاہ میں عرض کی کہ کون سی برائی اللہ عزوجل کے نزدیک سب سے بڑی ہے ؟ سرکار مدینہ منورہ سردار مکہ مکرمہ صلی اللہ علیہ وسلم نے فرمایا برے اخلاق اور بخل۔

(جامع الحدیث،405/19حدیث14922)

ایک حدیث پاک میں نبی کریم صلی اللہ علیہ وسلم نے فرمایا کہ بخیل جنت سے دور ہے ۔ (ترمذی ،کتاب البرو الصلوۃ ،باب ما جافی سخا،387/3،حدیث1968)

تربیت : کسی شے کی رفتہ رفتہ اس طرح پروش کرنا ہے کہ وہ حد کمال کو پہنچ جائے۔ ( اسفھائی المفردات في غريب القرآن ص(182)

تربیت کے اصول : نرم الفاظ ہوں۔ ڈانٹ ڈپٹ والا انداز نہ ہو۔ نرم لہجہ ہو ۔ سامنے والے کو احساس دلانا کہ میں آپ کا خیر خواہ ہوں ۔ شفقت اور نرمی ہو ۔ تنہائی میں سمجھانا خیر خواہ ہو۔

(1) تندرستی اور فراغت : روایت ہے حضرت ابن عباس فرماتے ہیں فرمایا رسول صلی اللہ تعالٰی علیہ وسلم نے دو نعمتیں ہیں جس میں بہت لوگ گھاٹے میں ہیں، تندرستی اور فراعت۔ (بخاری)

(2) بھوکے بھیڑیے۔ روایت ہے حضرت کعب ابن مالک سے وہ اپنے والد سے راویت فرماتے ہیں رسول صلی اللہ تعالٰی علیہ وسلم نے فرمایا دو بھوکے بھیڑیے جو بکریوں میں چھوڑ دیے جاویں وہ ان بکریوں کو اس سے زیادہ خراب نہیں کرتے جتنے انسان کے حرص کرنے سے مال و عزت پر اس دین کو :-( ترمذ ی دارمی)

(3) دو دعائیں :رسول اکرم صلی اللہ تعالٰی علیہ و علم کا فرمان عالیشان ہے دو دعائیں ایسی ہیں کہ ان کے اور الله عزوجل کے درمیان کوئی حجاب نہیں ہوتا 1۔ مظلوم کی دعا 2۔ کسی شخص کا اپنے بھائی کے لیے پیٹھ پیچھے دعا کرنا ۔(جامع ترمذی ابواب البر و الصلوٰۃ الحدیث (1905) :-

(4) جنت میں داخلہ :رسول اکرم شاہ بنی آدم صلی الله تعالی علیہ وسلم کا فرمان عالیشان ہے جس نے دونوں جبڑوں کے درمیان والی چیز اور شرمگاہ کی حفاظت کی وہ جنت میں داخل ہوگا.(المسند للام احمد حنبل حدیث ابی موسیٰ الاشعری) :-

(5) جنت اور جہنم میں لے جانے والی دو چیزیں : دو جہاں کے سردار علی اللہ تعالٰی علیہ و سلم کا فرمان عالیشان ہے تم پر سچ بولنا لازم ہے کیونکہ یہ نیکی کے ساتھ ہے اور یہ دونوں جنت میں لے جاتے ہیں اور جھوٹ سے بچو کیونکہ یہ گناہوں کے ساتھ ہے اور یہ دونوں جہنم میں لے جاتے ہیں۔ (الاحسان بترتیب صحیح ابن حبان باب الكذب 5803) 

تحریر: بنت ِمنصور عطاریہ مدنیہ

دفتر ذمہ دار پاک سطح” شعبہ حج و عمرہ “

دینی تعلیم نورِ ہدایت کا سر چشمہ، نعمتِ باری، رحمتِ الٰہی، باعثِ برکت، سببِ نجات، باعثِ نزولِ رحمت، باعمل زندگی گزارنے کا ضابطہ اور وجہِ سر بلندی ہے۔کیونکہ علمِ دین انسان کو گمراہی کے اندھیرے سے نکال کر ہدایت کے نور تک پہنچا دیتا ہے اور وہ رحمتِ الٰہی میں رہتا ہے۔علمِ دین کی اہمیت کا اندازہ اس بات سے لگایا جا سکتا ہے کہ اس کی فرضیت مرد و عورت دونوں میں سے ہر ایک پر ہے۔چنانچہ

رسولِ پاک صلی اللہُ علیہ واٰلہٖ وسلم نے فرمایا:علم حاصل کرناہر مسلمان پر فرض ہے۔(ابن ماجہ، 1/146، حدیث:224)

مسافت کے متعلق بیان ہوا کہ علم حاصل کرو اگرچہ تمہیں چین جانا پڑے۔(شعب الایمان، 2/253، حدیث:1663)

افضلیت کے متعلق بیان ہوا کہ جو علم کی طلب میں نکلا وہ لوٹنے تک اللہ پاک کی راہ میں ہے۔(ترمذی، 4/295، حدیث:2656)

طالبِ علم کے لئے پانی میں مچھلیاں مغفرت طلب کرتیں ہیں۔(دارمی، 1/110، حدیث:342)

مدت کے متعلق صوفیافرماتے ہیں:اطلبوا العلم من المہد الى اللحدیعنی گہوارہ سے قبر تک علم سیکھو۔(مراٰۃ المناجیح، 1، / 203)

یونہی عصری علوم دنیا کی ترقی کا اہم ذریعہ، معاشی بحران میں بہتری اور ملک کو مضبوط بنانے کا سبب ہیں۔مسلم معاشرے کی ترقی کے لیے ناصرف علمائے دین و مفتیان ِکرام کی حاجت ہے، بلکہ باضمیر اور عقلِ سلیم رکھنے والے ایسے ڈاکٹرز، انجینئرز، سائنٹسٹ، ٹیچرز، پروفیسرز اور ٹریڈرز کی حاجت ہے جو کہ دینی احکامات کی رسی کو مضبوطی سے تھام کر زندگی گزارنے والے ہوں اور ملک کا اثاثہ بنیں۔قیادت، سیاست، معاشرت، معیشت، تجارت الغرض زندگی کا ہر شعبہ علم کا تقاضا کرتا ہے۔ہمارے پیارے دین نے ہر ہر رخ پر ہمیں تعلیم سے آراستہ کر کے قواعد و ضوابط عطا کیے ہیں، جبکہ عصری علوم ہمیں جدید ذرائع سے آگاہی فراہم کرواتے ہیں یعنی دینی تعلیم ہمیں طریقہ کار بیان کرتی ہے جبکہ دنیاوی تعلیم ہمیں ذرائع فراہم کرتی ہے۔لہٰذا دونوں علوم کی اپنی جگہ اہمیت ہے مگر دینی تعلیم کے بغیر گزارا ممکن نہیں۔الحمد للہ عاشقانِ رسول کی دینی تحریک دعوتِ اسلامی نے ان دونوں کی ضرورت و اہمیت کے پیشِ نظر ہر ہر شعبے میں فیضانِ علمِ دین کو عام کیا، یہی وجہ ہے کہ آج دینی و عصری تعلیم کے شعبے میں دعوتِ اسلامی کا ایک نمایاں اور بڑا نام ہے۔

امیرِ اہلِ سنت اور دعوتِ اسلامی کی علمی شعبے میں دینی و عصری خدمات:

دین کا درد رکھنے والے سنت و سنیت سے محبت کرنے والے، اس کے فروغ کے لیے اخلاص کے ساتھ جد و جہد کرنے والے، اصلاحِ اُمّت کے جذبے سے سرشار اور ہر دم اسی کی فکر میں مشغول ایک معروف شخصیت اور انٹرنیشنل مذہبی اسکالر امیرِ اہلِ سنت حضرت علامہ مولانا محمد الیاس عطار قادری دامت برکاتہم العالیہ نے جب معاشرے میں کم علمی، بے عملی اور گناہوں کی نحوست کو پایا تو صرف چند اسلامی بھائیوں کے ساتھ اپنی تحریک دعوتِ اسلامی کے تحت اپنے مشن کا آغاز فرمایا۔آپ نے اپنی منزل پانے یعنی اصلاحِ اُمّت اور نورِ علم پھیلانے کے لیے وقتاً فوقتاً کئی شاندار اقدامات بھی فرمائے ہیں۔کیونکہ جب کسی منزل پر پہنچنے کا ارادہ ہو تو اس کے سفر کے آغاز میں پہلا قدم اٹھایا جاتا ہے، اس ایک قدم کے بعد دوسرا، دوسرے کے بعد تیسرا یوں مسلسل اقدامات اور کوششوں کے بعد سفر اپنی انتہا کو پہنچتا ہے۔

مدرسۃ المدینہ:

الحمد للہ امیرِ اہلِ سنت دامت برکاتہم العالیہ نہ صرف قرآنِ کریم اور دینی تعلیم سے بہت محبت فرماتے ہیں بلکہ درست مخارج کےساتھ قرآنِ کریم پڑھنے کی اہمیت سے بھی بخوبی واقف ہیں، لہٰذا آپ نے عظمتِ قرآن اور دینی تعلیم کی ترویج کی اہمیت کے پیشِ نظر سب سے پہلا قدم اٹھایا اور 8 دسمبر 1990کو کراچی کے علاقے شو مارکیٹ گارڈن میں بچوں کے لئے حفظ و ناظرہ کا ادارہ بنام” مدرسۃ المدینہ“بنا کر امت پر زبردست احسانِ عظیم فرمایا۔اس بارے میں مزید تفصیل ملاحظہ فرمائیے:

دعوتِ اسلامی کے تحت ملک و بیرونِ ملک میں بچوں بچیوں کے لئے حفظ و ناظرہ کے ہزاروں مدارس بنام”مدرسۃ المدینہ (بوائز/ گرلز، شارٹ ٹائم، رہائشی)“قائم ہیں جن میں بنیادی طور پر تجوید کے ساتھ مفت قرآن ِ کریم پڑھانے ہی کی سہولت نہیں، بلکہ ناظرہ قرآنِ کریم کے درجات کے ساتھ ساتھ حفظ کے درجات میں نماز، دعائیں، ایمانیات و عقائد، عبادات، اخلاقیات، سنتیں اور آداب بھی سکھائے جاتے ہیں۔جبکہ مدرسۃ المدینہ(رہائشی)میں بچوں کی رہائش کے انتظام کے ساتھ ساتھ 12 گھنٹے کا مکمل شیڈول ہوتا ہے جس میں بالخصوص حفظ کروانے کے علاوہ ان کی اخلاقی و دینی تربیت کا بھی اہتمام ہوتا ہے۔یوں ہی مدرسۃ المدینہ(شارٹ ٹائم)میں بالخصوص ناظرہ قرآنِ پاک پر توجہ دی جاتی ہے۔ان مدارس کے اوقات کار میں اس بات کا بھرپور خیال رکھا گیا ہے کہ اسکول پڑھنے والی طالبات اور گھر کی خواتین اپنے مناسب وقت پر نکل کر قرآنِ پاک سیکھ سکیں۔اسی طرح قرآنِ پاک کی قراءت کو بہتر بنانے کے لیے مُدَرِّس و مُدَرِّسہ کورسز بھی ڈیزائن کیے گئے ہیں تاکہ مُدَرِّس و مُدَرِّسہ اہلیت حاصل کرنے کے بعد درست پڑھا سکے۔

اسی مقصد کے تحت ملک و بیرونِ ملک میں شعبہ مدرسۃ المدینہ کی زیرِ نگرانی اسلامی بھائیوں اور اسلامی بہنوں کو مختلف کورسز کروائے جاتے ہیں جیسے اسلامی بھائیوں میں عمر کی قید کے ساتھ درج ذیل کورس کروائے جاتے ہیں:12ماہ کاتجوید و قراءت کورس(رہائشی)، 5 ماہ کا مُدرس کورس(رہائشی)، 7ماہ کا قاعدہ ناظرہ کورس(رہائشی)، 12 دن کا تربیتِ معلّم کورس (رہائشی)۔اسی طرح اسلامی بہنوں میں بھی 163 دن کا مُدَرِّسہ کورس(غیر رہائشی)، 10ماہ کا قاعدہ ناظرہ کورس (غیررہائشی)، 41 دن کا تربیتی معلّمہ کورس(رہائشی)کا اہتمام ہوتا ہے۔اس کے علاوہ بڑی عمر کے اسلامی بھائیوں اور اسلامی بہنوں کے لیے ملک و بیرونِ ملک پر کثیر مقامات پر مدرسۃ المدینہ بالغان و بالغات لگائے جاتے ہیں۔

گلی گلی مدرسۃ المدینہ:

یوں ہی اسلامی بھائیوں میں مدرسۃ المدینہ نائٹ شفٹ کے تحت رات میں بھی مدرسے لگائے جاتے ہیں۔جبکہ اسلامی بہنوں کے لیے”شعبہ گلی گلی مدرسۃ المدینہ“کے تحت قریب قریب کے مقامات پر گھر میں تجوید کے ساتھ ناظرہ پڑھانے کا انتظام کیا گیا ہےتاکہ کوئی محروم نہ ہو، کم عمر بچیوں کی عادت بنے اور بڑی عمر کی اسلامی بہنیں بھی اس سے فائدہ اٹھا سکیں۔

فیضان آن لائن اکیڈمی:

وہ مقامات یا وہ ممالک جہاں بذریعہ مدارس و جامعات فیضانِ قرآن پہنچانے کا کوئی انتظام ممکن نہیں تھا وہاں پر اسلامی بھائیوں اور بچوں کو قرآنِ کریم اور دینی تعلیم سے آراستہ کرنے کے لئے 12 فروری 2012 کو دعوتِ اسلامی کے عالمی مدنی مرکز فیضانِ مدینہ محلہ سودا گراں پرانی سبزی منڈی کراچی(پاکستان) میں”مدرسۃ المدینہ آن لائن“کے نام سے پہلا عالیشان ادارہ قائم کیا گیا، جس کی اب پاکستان سمیت دنیا بھر میں 49 برانچز قائم ہیں۔اب اس کا تنظیمی نام”فیضان آن لائن اکیڈمی“ہے۔خواتین اور بچیوں کے لئے”فیضان آن لائن اکیڈمی (گرلز)“کی پہلی شاخ کا افتتاح 11 مئی 2013 میں ہوا۔فیضان آن لائن اکیڈمی کے ذریعے طلبا و طالبات مناسب فیس میں اپنی سہولت کے مطابق دن یا رات میں کسی بھی وقت دینی تعلیم حاصل کر سکتے ہیں۔

اسی شعبے کے تحت درسِ نظامی کی سہولت کے ساتھ ساتھ مختلف شارٹ کورسز مثلاً فیضانِ شریعت کورس وغیرہ بھی کروائے جاتے ہیں۔کورسز کے اختتام پر دعوتِ اسلامی کے تعلیمی بورڈ کے تحت امتحانات ہوتے ہیں اور اسناد بھی جاری کی جاتیں ہیں۔فیضان آن لائن اکیڈمی کے ذریعےانگلش و چائنیز وغیرہ زبانیں بھی سکھانے کا اہتمام کیا جاتا ہے تاکہ بیرونِ ممالک کے طلبہ و طالبات تک بآسانی دینی تعلیمات پہنچائی جا سکیں۔

جامعۃ المدینہ:

الحمد للہ لوگوں نے آپ کے اس اقدام کو ایپریشیٹ کیا تو آپ نے لوگوں کی دلچسپی کو دیکھتے ہوئے، علم دوستی کا مظاہرہ کرتے ہوئے اور معاشرے سے بُرائیوں کے خاتمے کے لیے کوئی ایسا دینی ادارہ قائم کرنے کا ارادہ فرمایا کہ جہاں ایسے اہلِ حق علمائے کرام تیار کئے جائیں جو مسلمانوں کو فرض علوم کی اہمیت و ضرورت سے آگاہ کریں اور سکھائیں۔چنانچہ آپ کی کاوشوں سے 1994 میں شہرِ کراچی(پاکستان)کے علاقے نیو کراچی کی گودھرا کالونی میں اسلامی بھائیوں کے لئے”جامعۃ المدینہ“کے نام سے درسِ نظامی یعنی عالم کورس کے ایک شاندار ادارے کی بنیاد رکھی گئی جس کے بعد مزید شہروں میں اس کی Branches قائم ہوئیں۔اس بارے میں مزید تفصیل ملاحظہ فرمائیے:

جامعات المدینہ علمِ دین کے فروغ و حصول کے لیے قائم کیے گئے ہیں جو دعوتِ اسلامی کے علمی میدان میں کامیاب ترین ادارے اور دعوتِ اسلامی کی ترقی میں اضافے کا سبب ہیں۔جامعۃ المدینہ کے تحت سب سے اہم کورس اسلامی بھائیوں کے لئے 8 سالہ اور اسلامی بہنوں کے لئے 6 سالہ درس نظامی(عالم/عالمہ کورس)ہے۔الحمد للہ بعض جامعات المدینہ میں فقہِ شافعی کے مطابق بھی تعلیم دی جاری ہے۔جامعۃ المدینہ خصوصی طور پر عالم و عالمہ بنانے والا ادارہ ہے جو بالکل مفت تعلیم دیتا ہے۔اس کا بنیادی مقصد طلبہ و طالبات کو دینی احکامات سیکھانا، کرنے اور نا کرنے والے کاموں سے آگاہی فراہم کرنا ہے تاکہ وہ کرنے والے کام کریں اور نا کرنے والوں سے بچتے ہوئے دینی تعلیمات کے مطابق زندگی گزاریں، عبادات میں درستی اور عقائد میں پختگی حاصل کریں، ان میں قر آنِ پاک اور احادیث کے معانی و مطالب سمجھ کر سمجھانے والی صلاحیت پیدا ہو۔جامعۃ المدینہ مرشدِ کریم کو تمام شعبوں میں سب سے محبوب شعبہ ہے، کیونکہ اس کے ذریعے مسلمان باعمل زندگی گزار سکتے ہیں۔چنانچہ

فرمانِ امیرِ اہلِ سنت:جامعۃ المدینہ دعوتِ اسلامی کا مغز ہے۔اسی ادارے کے سبب دعوتِ اسلامی کا پیغام تیزی کے ساتھ عام ہوا ہے۔الحمد للہ 20 سال کے عرصے میں دنیا کے تقریباً 14 ممالک میں دعوتِ اسلامی کے جامعات المدینہ (بوائز/ گرلز)کی تقریباً 1500Branchesقائم ہو چکی ہیں۔

الحمد للہ شعبہ جامعۃ المدینہ کے تحت 25 ماہ کا فیضانِ شریعت کورس بھی کروایا جاتا ہے جو مکمل طور پر بنیادی فرض علوم پر مشتمل ہوتا ہے۔25 ماہ میں ٹوٹل 5 لیول ہوتے ہیں۔اسی طرح اس شعبے کے تحت مختلف مواقع پر مختلف کورسز وغیرہ بھی کروائے جاتے ہیں۔مثلاً رمضان المبارک سے پہلے زکوٰۃ کورس اور قربانی سے پہلے قربانی کورس وغیرہ۔کورس کے اختتام پر اسناد بھی دی جاتی ہیں۔

جامعۃ المدینہ( گرلز):

یاد رہے!یہ سلسلہ یہیں پر ختم نہیں ہوا بلکہ”ایک عورت دین پر تو سارا گھرانا دین پر“کو مدِّنظر رکھتے ہوئے 4 سال کے مختصر عرصے کے بعد 1999 میں بابری چوک کراچی(پاکستان)میں خواتین کی تعلیم و تربیت کے لئے ایک عظیم الشان ادارہ بنام”جامعۃ المدینہ“کا آغاز ہوا۔الحمد للہ اب کراچی بلکہ پاکستان سے باہر بھی اس کیBranchesخواتین میں فیضانِ علم تقسیم کرنے میں مصروفِ عمل ہیں۔

تخصص کورسز:

شروع شروع میں صرف اسلامی بھائیوں کو ہی جامعۃ المدینہ کے تحت تخصص کورسز کروائے جاتے تھے لیکن الحمد للہ عرصہ دو سال سےاسلامی بہنوں کے لیے شہرِ کراچی میں قائم جامعۃ المدینہ(گرلز)دار الحبیبیہ دھوراجی کالونی کراچی میں تخصص فی الفقہ(مفتیہ کورس) کا آغاز ہو چکا ہے، جبکہ رواں سال تین بڑے شہروں کراچی، لاہور اور فیصل آباد کے بڑے جامعات المدینہ(گرلز)میں تخصص فی الدعوۃ و الارشاد کروایا جا رہا ہے جس کا بنیادی مقصد نیکی کی دعوت عام کرنا ہے۔

دار المدینہ:

امیرِ اہلِ سنت دامت برکاتہم العالیہ فرماتے ہیں:طلبہ کسی ملک کا سب سے قیمتی اثاثہ اور قوم کے مستقبل کے رہنما ہوتے ہیں۔اگر ان کی تربیت شریعت و سنت کے مطابق کی جائے تو معاشرے میں ہر جگہ رسول اللہ صلی اللہُ علیہ واٰلہٖ وسلم کا خوف اور عقیدت غالب آجائے گی۔(دارالمدینہ پراسپیکٹیس، ص1)

دورِ جدید میں دینی مقاصد کے حصول کے لیے دعوتِ اسلامی نے اہم قدم اٹھایا اور دنیا میں عصری علوم کے رائج طریقوں کے ساتھ دینی احکامات کو مضبوطی سے تھامتے ہوئے بچوں اور بچیوں میں دین کی صحیح تربیت شریعت کے مطابق کر کے ان کو اچھا شہری و مسلمان بنانے کے جذبے کے تحت2011 میں دار المدینہ انٹرنیشنل اسلامک اسکولنگ سسٹم کا قیام عمل میں لایا گیا۔دار المدینہ انٹرنیشنل اسلامک اسکولنگ سسٹم کا مقصد روایتی تعلیمی علوم کو شریعت کے مطابق بہتر بنانا اور بچوں بچیوں کو اسلام کی حدود کے اندر اپنی بہترین صلاحیتوں کو سیکھنے اور پھلنے پھولنے میں مدد فراہم کرنا ہے۔اس کا ایک مقصد ایک ایسا ماحول تیار کرنا بھی ہے جہاں تمام انتظامی، نصابی اور تدریسی طریقوں میں اسلامی اقدار کا احترام کیا جائے۔چنانچہ دار المدینہ میں مؤثر تدریس، کردار سازی، تعمیری سوچ اور اسلامی تربیت فراہم کی جاتی ہے جو اسے دیگر اداروں سے نمایاں کرتی ہے۔

دار المدینہ انٹرنیشنل اسلامک اسکولنگ سسٹم کے تحت”دار المدینہ اسلامک اسکولز“اور”فیضان اسلامک اسکولز “ کے 142 سے زائد Campuses میں ہزاروں بچےبچیاں عصری ودینی تعلیم حاصل کررہے ہیں۔

Faizan Weekend Islamic School:

دار المدینہ انٹرنیشنل اسلامک اسکولنگ سسٹم کے تحت ایک اور ادارہ بنام Faizan Weekend Islamic School متعارف کروایا گیا ہے جس میں ان طلبہ کو فوکس کیا گیا ہے جو دوسرے اسکولز میں پڑھتے ہیں۔وہ اس ادارے سے دینی و اخلاقی تربیت حاصل کر سکتے ہیں۔یہ ہفتے میں ایک یا دو دن اوپن ہوتا ہے، کیونکہ اس کا انحصار بچوں کی ہفتہ وار چھٹی پر ہوتاہے۔اس کی ایک برانچ سپر ہائی وے پر قائم بحریہ ٹاؤن میں موجود ہے۔مزید کام جاری ہے۔اس شعبے کو پاکستان کے سات بورڈز سے لائسنس حاصل ہیں، جبکہ بیرونِ ملک میں UK کے OFSTED اور USA کے CDSS-CCLD سمیت دیگر ممالک کے اداروں سے بھی سرٹیفکیٹس اور لائسنس جاری ہوچکے ہیں۔

ان شاء اللہ دار المدینہ کے O-Level اسکولز، کیمبرج سسٹم اسکولز، Online ایجوکیشن سسٹم، Prisoners (یعنی قیدیوں کے لئے) اسکولز اور Special Children اسکولز کا قیام بھی عمل میں لایا جائے گا۔

الحمدللہ دار المدینہ اسلامک کالج(بوائز) کا آغاز ہوچکا ہے جس کی پہلی برانچ زینب مسجد، محمدیہ کالونی، سوساں روڈ، مدینہ ٹاؤن، فیصل آباد میں قائم ہے جس میں طلبہ کو جدید سہولیات سے آراستہ شریعت کے مطابق ماحول فراہم کیا جا رہا ہے جو ان کی صلاحیتوں کو پروان چڑھانے اور انہیں معاشرے کی خدمت کے لیے قابل و پیشہ ور افراد میں تبدیل کرنے میں مددگار ثابت ہوگا۔دعوتِ اسلامی کا یہ شعبہ عصری علوم میںAcademic Programs، کالج لیول پر سائنس (پری میڈیکل و انجینئرنگ)جرنل سائنس(کمپیوٹر سائنس)،کامرس اور Humanities Arts کی تیاری کروا رہا ہے۔دار المدینہ اسلامک کالج(DMC)میں جدید دور کی سہولیات جیسے لائبریری، سیکورٹی، سائنس و کمپیوٹر، لیبز، آن لائن پورٹلز وغیرہ موجود ہیں۔

دار المدینہ انٹرنیشنل یونیورسٹی:

دعوتِ اسلامی کا اپنی یونیورسٹی بنانے کی جانب بڑھتا ہوا ایک نمایاں قدم ہے۔دعوتِ اسلامی کے اسکولز اور کالجز تعلیمی میدان میں قابلِ ستائش خدمات دے رہے ہیں جس میں بغیر رکاوٹ کے دنیوی و عصری تعلیم دی جاری ہے۔مدنی چینل پر مدنی مذاکرے میں امیرِ اہلِ سنت دامت برکاتہم العالیہ نے اس تعلیمی نمایاں کامیابی کا اعلان فرمایا کہ حکومتِ پاکستان کے تحت گرانٹ دینے والے ادارے ہائر ایجوکیشن کمیشن(H.E.C)نے دعوتِ اسلامی کو G-11 مرکز، اسلام آباد میں”دار المدینہ انٹرنیشنل یونیورسٹی“ کا پہلا کیمپس کھولنے کی منظوری دے دی ہے۔یہ اہم فیصلہ دعوتِ اسلامی کی تعلیمی خدمات کی کامیابی کا منہ بولتا ثبوت ہونے کے ساتھ ساتھ اہل ِعلم و عاشقان رسول کے لیے بہت خوشی کا سبب ہےجس پر دعوتِ اسلامی کو بہت سراہا بھی گیا ہے۔اللہ پاک دعوتِ اسلامی کو مزید ترقی عطا فرمائے۔اٰمین

الحمد للہ دار المدینہ انٹرنیشنل یونیورسٹی کا پہلا کیمپس تعلیمی خدمات کا آغاز کر رہا ہے۔ابتدائی مرحلے میں اس کے کیمپسز میں 4 ڈیپارٹمنٹس قائم کیے جائیں گے:(1) ڈیپارٹمنٹ آف عربک(2) ڈیپارٹمنٹ آف اسلامک اسٹڈیز(3) ڈیپارٹمنٹ آف مینجمنٹ سائنسز(4) ڈیپارٹمنٹ آف ایجوکیشن۔

ورچوئل فیضان ِشریعت کورس:

یہ آن لائن کورس اسلام کے بنیادی ارکان اور فرض علوم کی معلومات پر مشتمل ہے جو ان اسلامی بہنوں کے لیے تیار کیا گیا ہے جن کے قریب جامعات المدینہ(گرلز)موجود نہیں یا وہ دور دراز علاقوں میں رہائش پذیر ہیں یا کسی وجہ سے جامعۃ المدینہ(گرلز)میں روزانہ حاضری نہیں دے سکتیں تاکہ ایسی اسلامی بہنیں گھر بیٹھے علمِ دین کے زیور سے آراستہ ہوسکیں۔اس کورس میں طالبات کو رجسٹریشن نمبرز جاری کیے جاتے ہیں اور طالبات کو ماہانہ نصاب کی تقسیم کاری کے مطابق تیاری کرنی ہوتی ہے، جبکہ طالبات کی راہ نمائی کے لیے ایک فی میل ٹیچر کا نمبر بھی دیا جاتا ہے۔

کلیۃ الشریعہ:

یہ4 سالہ کورس ان اسلامی بہنوں کے لیے تیار کیا گیا ہے جو گریجویشن کر چکی ہوں اور دینی تعلیم کم وقت میں حاصل کرنا چاہتی ہوں تاکہ وہ کم وقت میں علمِ دین حاصل کر کے سکیں اور اس طبقے میں بھی اخلاقیات اور عملی زندگی گزارنے کا رُجحان بڑھے۔

شعبہ شارٹ کورسز:

دعوتِ اسلامی کا شعبہ شارٹ کورسز وقتاً فوقتاً مختلف آن لائن اور رہائشی کورسز کرواتاہے۔بعض کورسز کا تعلق فرض علوم سے ہوتا ہے جیسے نماز کورس، طہارت کورس، فیضانِ زکوٰۃ کورس اور حج و عمرہ پر جانے والوں اور والیوں کے لیے حج و عمرہ کورس کروایا جاتا ہے۔اسی طرح شبِ براءت، شبِ معراج، یومِ عاشورہ سے پہلے ان دنوں کی خصوصیت بیان کرنے کے لیے مختلف کورسز کروائے جاتے ہیں۔اسی طرح قرآن ٹیچنگ ٹریننگ کورس، مدنی قاعدہ کورس، معلمہ کورس، عربی لینگویج کورس، کورس حُب العربیہ جیسے شارٹ ٹائم کورسز کروائے جاتے ہیں۔

کنزالمدارس بورڈ:

دورِ حاضر میں مدارس ِدینیہ کے نصابِ تعلیم، امتحانی نظام، اہم نصابی سرگرمیوں اور دیگر نظام کو منظم بنانے کے لیے ایک تعلیمی بورڈ کی اشد ضرورت تھی۔چنانچہ وفاقی وزارتِ تعلیم و فنی تربیت حکومتِ پاکستان نے مؤرخہ 27 اپریل 2021 نوٹیفکیشن نمبر 1-2014/NCC/RE-46کے تحت دعوتِ اسلامی کو وفاقی دینی تعلیمی بورڈ” کنز المدارس “ کی منظوری دی ہے۔جس کے تحت الشہادة العالمیۃ فی العلوم العربیۃ والاسلامیۃ کی ڈگری”ایم۔اے عربی و اسلامیات “کے برابر ہو گی جو طلبہ و طالبات کے لیےباعث خوشی ہے۔کنز المدارس بورڈ کا دائرۂ کار ملکی و غیر ملکی دینی تعلیمی اداروں کو محیط ہے۔کنز المدارس بورڈ جامعات المدینہ اور دیگر الحاق شدہ اداروں کو کم و بیش 12 اقسام کے دینی کورسز آفر کر رہا ہے جن میں تحفیظ القرآن (2 سال)، تجوید و قراءت (2 سال)، درسِ نظامی(8 سال)، کلیۃ الشریعۃ(4 سال)، تخصص فی الحدیث و علومہ(2 سال)، تخصص فی الفقہ الحنفی(2 سال) تخصص فی الفقہ الحنفی والاقتصاد الاسلامی(2 سال)، تخصص فی العلوم العربیۃ(1 سال)، تخصص فی الفنون(1 سال)، تخصص فی التوقیت(1 سال)، فیضانِ شریعت کورس(25 ماہ)اور امامت کورس(12 ماہ) شامل ہیں۔

FGRF:

دعوتِ اسلامی کا ایک شعبہ FGRF بھی ہے جو فلاحی کاموں میں مصروف ہے۔اس شعبے کے تحت بھی کچھ اہم Skills سکھائی جا رہی ہیں۔جیسے

Freelancing,Chainese language lurning,Basics of E-Commerce Business, Digital marketing اور English language وغیرہ۔ان کورسز میں دورِ حاضرکے مطابق بھرپور رہنمائی دی جاتی ہے۔یہ کورسز تو دیگر ادارے بھی کروا رہے ہیں مگر دعوتِ اسلامی دینی احکامات کو پہلے رکھتی ہے، اسی لیے ان میں دینی تعلیمات سے ٹکرانے والی کوئی چیز نہیں سکھائی جاتی، بلکہ خصوصی طور پر شرعی احکام کو ملحوظِ خاطر رکھا جاتا ہے۔ان کورسز کی رجسٹریشن اور مزید معلومات کے لیے FGRF کی آفیشل ویب سائٹ کا وزٹ کیا جا سکتا ہے۔یہ سارے کورسز بنیادی طور پر اب تک اسلامی بھائیوں کے لیے ہیں۔لیکن الحمدللہ اسلامی بہنوں کے لیے جنوری 2024 سے SEP کے تحت 5 لیولز کا انگلش لینگویج کورس متعارف کروایا گیا ہے جس کے ہر لیول کا دورانیہ 2 ماہ ہے۔اسلامی بھائیوں کے لئے باقاعدہ ایک مخصوص جگہ پر کلاسز ہوتی ہیں جبکہ اسلامی بہنوں کے لیے آن لائن کورس کی سہولت دی گئی ہے۔

مذکورہ معلومات سے یہ بات واضح ہو جاتی ہے کہ دعوتِ اسلامی نے رضائے الٰہی کے لئے معاشرے میں دینی علوم کے فروغ کے ساتھ ساتھ عصری تعلیمی میدان میں بھی اپنا بھرپور نمایاں کردار ادا کیا ہے۔اگر کوئی صاحب بصیرت مسلمان دعوتِ اسلامی کے فلاحی کاموں مثلاً فیضان گلوبل ریلیف فاؤنڈیشن(FGRF)، یتیموں کے لئے مدنی ہوم اور معذوروں کے لئے اسپیشل پرسنز ڈیپارٹمنٹ وغیرہ کے قیام پر غور کرے تو اس پر یہ حقیقت ظاہر ہو جائے گی کہ ان کا بنیادی مقصد اُمّت کی خیر خواہی ہی ہے مگر اس کے ضمن میں علمِ دین کو فروغ دیا جا رہا ہوتا ہے جو کہ دعوتِ اسلامی کا بنیادی مقصد ہے۔اللہ پاک دعوتِ اسلامی کو مزید ترقی، عروج اور اخلاص عطا فرمائے۔اٰمین

آج کل ہمارے معاشرے میں تربیت کی بہت اہم ضرورت ہے کہیں ماں باپ کی نافرمانی کی جا رہی ہے تو کہیں بڑوں کی نافرمانی کی جا رہی ہے ہمارے پیارے اقا صلی اللہ تعالی علیہ وسلم نے ہماری بہت ہی احسن طریقے اور مشفقانہ انداز سے ہماری تربیت فرمائی ہے ہم سب کو چاہیے کہ نبی پاک صلی اللہ تعالی علیہ وسلم کے بتائے ہوئے طریقوں پر چلیں اور اللہ پاک اللہ عزوجل سے دعا ہے کہ ہمیں نبی پاک صلی اللہ تعالی علیہ وسلم کے نقش قدم پر چلنے کی توفیق عطا فرمائے تربیت کے متعلق احادیث سے سماعت فرمائیں ۔

(1)پسندیدہ چیزیں : نبی پاک صاحب صلی اللہ تعالی علیہ وسلم کا فرمان محبت نشان ہے بے شک مجھے دو چیزیں پسند ہیں جس نے ان سے محبت کی اس نے مجھ سے محبت کی اور جس نے ان سے بغض رکھا اس نے مجھ سے بغض رکھا ایک فقیر اور دوسرا جہاد (احیاء العلوم )

(2)جہنم کی وعید : تاجدار رسالت شہنشاہ نبوت صلی اللہ تعالی علیہ وسلم نے ارشاد فرمایا اللہ عزوجل ارشاد فرماتا ہے بڑائی میری چادر ہے اور عظمت میرا اظہار ہے تو جس نے ان دونوں میں سے کسی ایک میں مجھ سے جھگڑا کیا تو میں اسے جہنم میں پھینک دوں گا (سنن ابن ماجہ )

(3) حسن اخلاق : حسن اخلاق کے پیکر محبوب رب اکبر صلی اللہ تعالی علیہ وسلم کا فرمان ہے خوشبودار ہے حضرت جبرائیل علیہ السلام فرماتے ہیں کہ اللہ عزوجل نے ارشاد فرمایا یہ وہ دین ہے جس کو میں نے اپنے لیے پسند کیا اور اس کی اصلاح جس کی اصلاح سخاوت اور حسن اخلاق پر منحصر ہے جس قدر ہو سکے ان دونوں چیزوں کے ذریعے اس کی عزت کرو (الکام الفیط رجال لابن عدی)

(4) سخاوت :حضور پرنور صلی اللہ تعالی علیہ وسلم نے ارشاد فرمایا سخاوت یقین میں سے ہے اور کوئی یقین والا دوزخ میں نہیں جائے گا اور بخود شک میں سے ہے اور شک کرنے والا جنت میں داخل نہ ہوگا (الکامل فی ضعفاء الرجال لابن عدی )

ایک مسلمان کی زندگی میں پیارے آقا صلَّی اللہ تعالٰی علیہ واٰلہٖ وسلَّم کی احادیث مبارکہ کی بے انتہا اہمیت ہے کلام اللہ( قرآن مجید) کے بعد کلام رسول (حدیث شریف) کا ہی درجہ ہے ، کوئی بھی کلام اس سے بڑھ نہیں سکتا۔

حدیث مبارک ہی سے انسان کو معرفتِ الہی حاصل ہوتی ہے اور معرفتِ الہی ہی توحید کی اصل ہے، حدیث مبارک ہی مسلمان کو عبادت کا طریقہ سکھاتی ہیں اور عبادات کا شرعی مفہوم بھی احادیث سے ہی ملتا ہے حدیث مبارکہ زندگی کے ہر ہر شعبے میں رہنمائی فرماتی ہیں، خواہ وہ سیاسی شعبہ ہو یا کاروباری خواہ وہ سائنس ہو یا نجی زندگی، دینی معاملات ہوں یا دنیوی۔

ایک مسلمان کی زندگی میں جہاں قرآن کریم دماغ کی حیثیت رکھتا ہے تو وہیں حدیث شریف دل کی حیثیت رکھتی ہیں کیونکہ ان دونوں کے بغیر ہی انسان نامکمل ہے۔ پیارے آقا صلَّی اللہ علیہ واٰلہٖ وسلَّم کی پیاری پیاری تعلیمات حکمت سے بھرپور کلمات کے ذریعے امت تک پہنچ رہی ہیں اور زندگی کے ہر ہر موڑ پر اس کی رہنمائی کررہی ہیں۔ پیارے آقا خاتم النبین صلَّی اللہ علیہ واٰلہٖ وسلَّم ہر وقت اپنی امت کی خیر خواہی و رہنمائی میں کوشاں رہتے پیارے آقا صلَّی اللہ علیہ واٰلہٖ وسلَّم کے (5) فرامین مبارکہ پڑھیے اور عمل کی نیت کیجئے :

(1)...حضرت ابوہریرہ رضی اللہ عنہ سے روایت ہے رسول الله صلی الله علیہ وسلم نے فرمایا : کیا تم جانتے ہو کہ کون سی چیز زیادہ لوگوں کو جنت میں داخل کرتی ہے الله سے ڈر اور اچھی عادت کیا جانتے ہو کہ لوگوں کو آگ میں کون چیز زیادہ لے جاتی ہے دو خالی چیزیں منہ اور شرمگاہ۔ (ترمذی، ابن ماجہ)

یعنی انسان منہ سے کفر بولتا ہے غیبتیں چغلیاں کرتا ہے،نوے فی صدی گناہ منہ سے ہی ہوتے ہیں،شرمگاہ سے گناہ کرتا ہے جو بدترین گناہ ہے عقل کو مغلوب کرنے والی دین برباد کرنے والی چیز شہوت ہے جس کی جگہ شرمگاہ ہے۔ (کتاب:مرآۃ المناجیح شرح مشکوٰۃ المصابیح جلد:6 , حدیث نمبر:4832)

(2)... حضرت سَیِّدُنَا عبداللہ بن عباس رَضِیَ اللّٰہُ تَعَالٰی عَنْہُمَا سے روایت ہے کہ حضور نبی کریم رؤف رحیم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم نے اِرشاد فرمایا: ’’ تندرستی اورفراغت دو نعمتیں ایسی ہیں کہ اکثر لوگ اُن کی وجہ سے خسارہ اٹھاتے ہیں یا ان سے دھوکا کھاتے ہیں ۔ ‘‘

یعنی صحت و فراغت یہ دو ایسے کام ہیں کہ اِنہیں اگر اُن کاموں میں استعمال نہ کیا جائے جہاں کرنا چاہیے تھا تو یہ دونوں نعمتیں پانے والا شخص نقصان اٹھائے گا یعنی وہ اِن دونوں کو نقصان کے ساتھ فروخت کرے گا۔کیونکہ جو شخص تندرستی وفراغت کی حالت میں عبادتِ الٰہی نہ بجا لائے تووہ بیماری و مشغولیت میں بدرجہ اَولیٰ عبادت نہ کرسکے گالہٰذا وہ بےعملی کے سبب نقصان و دھوکے میں رہ جائے گا۔اسی طرح بعض اوقات انسان صحت مند ہوتا ہے لیکن اَسبابِ معاش یعنی کاروبار وغیرہ میں مشغولیت کی وجہ سےعبادت کے لیے فارغ نہیں ہوتا اور کبھی اس کے بر عکس (یعنی فارغ تو ہوتا ہے لیکن مرض میں مبتلا ہونے کی وجہ سے عبادت نہیں کر پاتا ) تو جسے صحت وفراغت کی نعمت ملے اور وہ پھر بھی فضائل حاصل کرنے میں کوتاہی کرے تو ایسا شخص سرا سردھوکے وغفلت میں ہے۔(کتاب:فیضان ریاض الصالحین جلد:2 , حدیث نمبر:97)

(3)... حضرت جابر رضی اللہ عنہ سے روایت ہے نبی صلی اللہ علیہ وسلم نے فرمایا : دو چیزیں لازم کرنے والی ہیں کسی نے عرض کیا یا رسول الله لازم کرنے والی کیا ہیں فرمایا جو الله کا شریک مانتا ہوا مرگیا وہ آگ میں جائے گا اور جو اس طرح مرا کہ کسی کو الله کا شریک نہیں مانتا وہ جنت میں جائے ۔(کتاب:مرآۃ المناجیح شرح مشکوٰۃ المصابیح جلد:1 , حدیث نمبر:38)

(4)...حضرت انس سے روایت ہے نبی کریم صلی اللہ علیہ وسلم نے فرمایا کہ انسان بوڑھا ہوجاتا ہے اور اس کی دو چیزیں جوان رہتی ہیں مال کی حرص اور عمر کی حرص (مسلم،بخاری)

یہاں انسان سے مراد عام دنیا دار مراد ہے جو بڑھاپے میں بھی حریص رہتا ہے،بعض اللہ کے بندے جوانی میں بھی حریص نہیں ہوتے وہ اس حکم سے علیحدہ ہیں مگر ایسے خوش نصیب بندے ہیں بہت تھوڑے عمومًا وہ ہی حال ہے جو یہاں ارشاد ہوا۔ عمومًا بوڑھے آدمی مال جمع کرنے،مال بڑھانے میں بڑے مشغول رہتے ہیں،ہمیشہ زندگی کی دعائیں کراتے ہیں،اگر کوئی انہیں کوسے تو لڑتے ہیں یہ ہے محبت مال و عمر۔حریص کا دل یا قناعت سے بھرتا ہے یا قبر کی مٹی سے۔(کتاب:مرآۃ المناجیح شرح مشکوٰۃ المصابیح جلد:7 , حدیث نمبر:5270)

(5)...حضرتِ سَیِّدُنا انس بن مالک رَضِیَ اللہُ تَعَالٰی عَنْہُ سے مروی ہے، وہ فرماتے ہیں :میں نے رَسُوْلُ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم کو یہ فرماتے ہوئے سنا کہ رب تعالیٰ فرماتا ہے :جب میں اپنے کسی بندے کو اس کی دو محبوب چیزوں کے ذریعے آزمائش میں مبتلا کروں پھر وہ صبر کرے تو میں اس کے عوض اسے جنت دونگا ۔ دومحبوب چیزوں سے مراد اس کی دونوں آنکھیں ہیں۔(بخاری، کتاب المرضی، باب فضل من ذھب بصرہ، 6\4 حدیث: 5653)

حدیث میں فرمایا ’’حَبِیْبَتَیْہ‘‘ یعنی دو محبوب چیزیں دوسری حدیث میں اس کی وضاحت بھی فرمائی یعنی دونوں آنکھیں ، اس لئے کہ انسان کے بدن میں سب سے اہم اور محبوب عضو آنکھیں ہیں اور یہ بات کسی پر مَخْفِی (ڈھکی چھپی) نہیں۔ اس کے بعد فرمایا کہ جب اس کی آنکھیں چلی جائیں پھر وہ صبر کرے ۔

حِبْرُ الْاُمَّۃ، (اُمَّت کے عالِم) ترجمانِ قراٰن، حضرتِ سَیِّدُنا عَبْدُاللہ بن عباس رَضِیَ اللہُ تَعَالٰی عَنْہما جب نابینا ہو گئے تو یہ شعر پڑھا کرتے تھے :اِنْ یُّذْھِبِ ﷲُ مِنْ عَیْنِیْ نُوْرَ ھُمَا فَفِیْ لِسَانیْ وَقَلْبِی لِلْھُدٰی نُوْرٌ ترجمہ : اگراللہ عَزَّوَجَلَّ میری آنکھوں کا نور لے گیا تو کیا ہوا؟ میری زبان اور دل میں تو ہدایت کا نور ہے۔(مرقاۃ المفاتیح ، کتاب الجنائز، باب عیادۃ المریض،28\4، تحت الحدیث:1549)

تربیت کا لغوی معنی کسی کو نشوونما کر کے حدِ کمال تک پہنچانا ہے۔انسان کو پستی سے نکال کر بلندی پر گامزن کرنے اور انہیں ‏آگے بڑھانے میں جن صفات کی ضرورت ہو ان کی دیکھ بھال کر کے پروان چڑھانے کا نام تربیت ہے۔

ہمارے پیارے نبی صلَّی اللہ علیہ واٰلہٖ وسلَّم اس دنیا میں تشریف لائے اور انہوں نے اپنے مبارک فرامین کے ذریعے مختلف انداز میں ‏پوری دنیا کی اصلاح فرمائی۔ آپ صلَّی اللہ علیہ واٰلہٖ وسلَّم کا مبارک انداز یہ بھی تھا کہ دو چیزوں کو بیان کر کے اصلاح فرماتے تھے۔ یہاں وہ ‏‏5 فرامینِ مصطفےٰ صلَّی اللہ علیہ واٰلہٖ وسلَّم ذکر کئے جا رہے ہیں جن میں رسولِ کریم صلَّی اللہ علیہ واٰلہٖ وسلَّم نے دو چیزوں کو بیان کر کے تربیت ‏فرمائی ہے:‏

‏(1)حسد نہیں مگر دو میں: نبیِّ کریم صلَّی اللہ علیہ واٰلہٖ وسلَّم نے فرمایا: حَسَد نہیں مگر دو شخصوں پر ایک وہ جسے اللہ پاک نے قراٰن سکھایا ‏وہ رات اور دن کے اوقات میں اس کی تِلاوت کرتا ہے، اس کے پڑوسی نے سنا تو کہنے لگا: کاش! مجھے بھی ویسا ہی دیا جاتا جو فُلاں شخص ‏کو دیا گیا تو میں بھی اُس کی طرح عمل کرتا۔ دوسرا وہ شخص کہ جسے اللہ پاک نے مال دیا وہ حق میں مال کو خَرچ کرتا ہے، کسی نے کہا: ‏کاش! مجھے بھی ویسا ہی دیا جاتا جیسا فُلاں شخص کو دیا گیا تو میں بھی اُسی کی طرح عمل کرتا۔ (بخاری، 3/410، حدیث: 5026)‏

‏(2)دو ناپسندیدہ چیزیں: پیارے آقا صلَّی اللہ علیہ واٰلہٖ وسلَّم نے فرمایا: دو چیزیں ایسی ہیں جنہیں انسان ناپسند کرتا ہے۔ وہ موت کو نہ ‏پسند کرتا ہے حالانکہ موت مومن کے لئے فتنے سے بہتر ہے اور مال کی کمی کو ناپسند کرتا ہے حالانکہ مال کی کمی حساب کو کم کر دے ‏گی۔(مراٰۃ المناجیح، 7/72)‏

‏(3)دو نعمتیں: فرمانِ مصطفےٰ صلَّی اللہ علیہ واٰلہٖ وسلَّم: دو نعمتیں ایسی ہیں جن کے بارے میں بہت سے لوگ دھوکے میں ہیں، ایک ‏صحت اور دوسری فراغت۔ (بخاری، 4/222، حدیث: 6412)‏

‏(4)اللہ پاک کی پسندیدہ دو خصلتیں: حضوراکرم صلَّی اللہ علیہ واٰلہٖ وسلَّم نے قبیلہ عبدالقیس کے سردار سے فرمایا: تجھ میں دو خصلتیں ‏ایسی ہیں جنہیں اللہ پاک پسند فرماتا ہے۔ بُردباری اور وقار۔(ترمذی، 3/407، حدیث: 2018)‏

‏(5)دو کلمے زبان پر ہلکے میزان پر بھاری: آخری نبی حضرت محمد صلَّی اللہ علیہ واٰلہٖ وسلَّم نے فرمایا: دو کلمے رحمٰن کو بہت زیادہ محبوب ہیں ‏یہ زبان پر بہت ہی ہلکے اور میزانِ عمل میں بہت ہی بھاری ہیں۔(وہ دو کلمے یہ ہیں:)سُبْحَانَ اللّٰہِ وَبِحَمْدِہٖ سُبْحَانَ اللّٰہِ الْعَظِیْمِ۔

‏(بخاری،4/600، حدیث: 7563)‏

‏ اللہ پاک کی بارگاہ میں دعا ہے کہ ہمیں حضوراکرم صلَّی اللہ علیہ واٰلہٖ وسلَّم کے مبارک فرامین پر عمل کرنے کی توفیق عطا فرمائے اور ‏ہمیں رسولِ کریم صلَّی اللہ علیہ واٰلہٖ وسلَّم کی سنتوں کے مطابق زندگی گزارنے کی سعادت نصیب فرمائے۔اٰمِیْن بِجَاہِ النّبیِّ الْاَمِیْن صلَّی اللہ علیہ واٰلہٖ وسلَّم ‏

دعوت اسلامی کی جانب سے ان 3 ماہ (ربیع الاول، ربیع الآخر اور جمادی الاولی)  کا عربی سہ ماہی  میگزین بنام "نفحات المدینہ" پندرہواں شمارہ منظر عام پرعنقریب آنےوالا ہے،اورالحمدللہ دعوت اسلامی کے اس عربی سہ ماہی میگزین "نفحات المدینہ" کو شائع ہوتے ہوئے اب تک 3 سال سے زائد ہو چکے ہیں۔

اس نئے شمارے میں آپ پڑھ سکیں گے:

٭کسی کا مذاق نا اڑائیں

٭ برے خیالات سے بچنےکے متعلق تفسیری نِکات

٭ اچھے اخلاق اپنانا کامل مومن ہونے کی نشانی ہے ۔ مستند شروحات سے حدیث پاک کی شرح

٭ اولیاء اللہ رشد و ہدایت کا سرچشمہ

٭ دین اسلام زندگی کے ہر پہلو میں رہنما

٭ حضور غوث پاک رحمۃ اللہ علیہ کی دینی خدمات

٭ اس پر فتن دور میں مظلوم مسلمانوں کی مدد کیسے کی جائے؟

٭ سیرت امام حسن رضی اللہ عنہ مسلمانوں کے لیے عملی نمونہ

٭ کتابوں کے درمیان پیدا ہونے والا بچہ اپنے وقت کا مشہور عالم

٭ حقیقی غیرت کسے کہتے ہیں؟ غیرت مند مرد اور غیرت مند عورت میں فرق

٭صحابہ و بزرگان دین کے اقوال ٭ مدنی مذاکرےکے سوالات و جوابات ٭ دعوت اسلامی کی دینی خدمات کی معلومات، ان کے علاوہ علمی و اصلاحی مضامین کے ساتھ ساتھ اور بہت کچھ۔

خوشخبری

علم دین سے آراستہ کرنے، عربی زبان کی طرف رجحان بڑھانےاورعاشقان رسول کی آسانی و سہولت کے لئےعربک میگزین ”نفحاتُ المدینہ“ کی سالانہ بکنگ 2500کے بجائے اب 2000روپے میں کی جارہی ہے ۔

تمام عاشقان رسول سے درخواست ہے کہ اس سہولت سے خوب خوب فائدہ اٹھائیں۔

مزید معلومات اور بکنگ کے لئے ان نمبر پر رابطہ فرمائیں:

03131139278

03117301781

ان شاء اللہ بہت جلد یہ عربک میگزین دعوت اسلامی کی عربی ویبسائیٹ (مركز الدعوة الإسلامية)پر بھی اپلوڈ کر دیا جائے گا۔

شعبہ معاونت برائے اسلامی بہنیں دعوت اسلامی  کے تحت10اگست 2024ء کو لاہور میں مدنی مشورہ ہوا جس میں شعبہ معاونت برائے اسلامی بہنوں کے پنجاب ڈویژن ذمہ داران نے شرکت کی ۔

دعوت اسلامی کی مرکزی مجلس شوری کے رکن ابوماجد حاجی محمد شاہد عطاری مدنی اور نگران مجلس غلام الیاس نےیوسی وائز کورسز کروانے ، تحصیل وائز فیضان صحابیات بڑھانے ،گلی گلی مدرستہ المدینہ بڑھانے، مدرستہ المدینہ بالغات اور دینی کام کے متعلق گفتگو کی ۔ اس موقع پر میلاد مصطفی کی تیاریاں اور شعبہ کورسز کہ حوالے سے بریفنگ بھی دی گئی ۔ (رپورٹ:محمد علی رفیق صوبہ پنجاب آفس،کانٹینٹ:محمد شعیب احمد عطاری)

شعبہ معاونت برائے اسلامی بہنیں دعوت اسلامی  کے تحت8اگست 2024ء کو راولپنڈی میں مدنی مشورہ ہوا جس میں راولپنڈی سٹی ، ڈسٹرکٹ اور ڈویژن ذمہ دار نے شرکت کی ۔

دعوت اسلامی کی مرکزی مجلس شوری کے رکن ابوماجد حاجی محمد شاہد عطاری مدنی نےیوسی وائز کورسز کروانے ، تحصیل وائز فیضان صحابیات بڑھانے ،گلی گلی مدرستہ المدینہ بڑھانے، مدرستہ المدینہ بالغات اور دینی کام کے متعلق گفتگو کی ۔(رپورٹ:محمد علی رفیق صوبہ پنجاب آفس،کانٹینٹ:محمد شعیب احمد عطاری)

شعبہ معاونت برائے اسلامی بہنیں دعوت اسلامی  کے تحت9اگست 2024ء کو گجرانوالہ میں مدنی مشورہ ہوا جس میں گجرانوالہ سٹی ،ڈسٹرکٹ اور ڈویژن ذمہ دار نے شرکت کی ۔

دعوت اسلامی کی مرکزی مجلس شوری کے رکن ابوماجد حاجی محمد شاہد عطاری مدنی نےیوسی وائز کورسز کروانے ، تحصیل وائز فیضان صحابیات بڑھانے ،گلی گلی مدرستہ المدینہ بڑھانے، مدرستہ المدینہ بالغات اور دینی کام کے متعلق گفتگو کی ۔(رپورٹ:محمد علی رفیق صوبہ پنجاب آفس،کانٹینٹ:محمد شعیب احمد عطاری)