اولاد اللہ تبارک کی ایک عظیم نعمت ہے اولاد ہی کے ذریعے نام و نسل کی بقاء ہے۔ ہر والدین کی خواہش ہوتی ہے کہ اللہ پاک اس کو نیک و صالح اولاد عطا فرمائے جو دنیا میں بھی اس کی آنکھوں کی ٹھنڈک اور دل کا سکون بنے اور آخرت میں بھی نجات کا ذریعہ یونہیں دوسری جانب دیکھا جاتا ہے کہ بگڑی ہوئی اولاد والدین کیلئے دنیا و آخرت میں سخت آزمائش بن جاتی ہے۔ موجودہ دور کے حالات کسی سے ڈھکے چھپے نہیں افسوس ! آج کل کے دور میں اکثر والدین اس بات کا اظہار کرتے نظر آتے ہیں کہ ان کی اولاد بگڑ گئی ہے بات نہیں مانتی، بدتمیز ہے، بری عادات کا شکار ہو گئی ہے، وغیرہ وغیرہ مگر یہ نہیں سوچتے کہ اس کے اسباب کیا ہیں؟ کسی بھی چیز کی روک تھام کیلئے اس کے اسباب پر غور و فکر کرنا بے حد ضروری ہے یہاں اولاد بگڑنے کے چند ضروری اسباب پیش نظر ہیں:

1۔ تربیت والدین: اولاد کو نیک یا بد بنانے میں والدین کی تربیت کا بڑا عمل دخل ہوتا ہے عموماً دیکھا گیا ہے کہ بگڑی ہوئی اولاد کے والدین اس کی ذمہ داری ایک دوسرے پر عائد کر کے خود کو بری الذمہ سمجھتے ہیں مگر یاد رہے کہ تربیت صرف ماں یا محض باپ کی نہیں بلکہ دونوں کی ذمہ داری ہے۔ قرآن پاک میں ارشاد باری تعالیٰ ہے: یٰۤاَیُّهَا الَّذِیْنَ اٰمَنُوْا قُوْۤا اَنْفُسَكُمْ وَ اَهْلِیْكُمْ نَارًا وَّ قُوْدُهَا النَّاسُ وَ الْحِجَارَةُ (پ 28، التحریم: 6) ترجمہ کنز الایمان: اے ایمان والو اپنی جانوں اور اپنے گھر والوں کو اس آ گ سے بچاؤ جس کے ایندھن آدمی اور پتھر ہیں ۔

اولاد کی تربیت کیسے کی جائے؟ اس کے بہترین راہنما اصول قرآن پاک نے بیان کئے ہیں اور ماڈرن سائیکالوجی سے بھی ان اصولوں کی تائید ہوتی ہے۔ مثلاً: ایمان والوں کو نیک اعمال کی ترغیب دینے کیلئے اللہ پاک نے جنت کے عالی شان نعمتوں کا وعدہ کیا ہے اور برے اعمال پر جہنم کی سخت سزاؤں کی وعید سنائی ہے اس اسلوب کو ترغیب و ترہیب کا نام دیا جاتا ہے اگر اس اسلوب کو صحیح معنوں میں اپناتے ہوئے والدین اپنی اولاد کی ہر اچھی عادت و کام پر اس کی حوصلہ افزائی کرے تو کچھ ہی عرصے میں اس کی یہ اچھائی والی عادت پختہ ہو جائے گی اور ناپسندیدہ اور برے کام پر اگر سرزنش کی جائے تو تھوڑے ہی عرصے میں اس کی بری عادت ختم ہو جائے گی یوں ان شاء اللہ ان کی اولاد ہر لحاظ سے بہتر ہو سکتی ہے۔ یاد رکھیئے! بے جا سختی اور ڈانٹ ڈپٹ ہو یا پیار اور محبت ہو دونوں ہی اولاد کو بگاڑ دیتے ہیں۔

2۔ از خود والدین کا کردار: اولاد کے بہترین کردار کی تعمیر و تشکیل کیلئے خود والدین کا بہترین کردار ہونا بھی بے حد ضروری ہے۔ والدین کے قول و فعل میں پایا جانے والا تضاد بھی بچے کے ننھے ذہن کیلئے باعث تشویش ہوگا کہ ایک کام یہ خود تو کرتے ہیں مثلاً جھوٹ بولتے ہیں، آپس میں جھگڑتے ہیں مگر مجھے منع کرتے ہیں جس کا نتیجہ یہ ہوگا کہ بڑوں کی کوئی نصیحت اسکے دل میں گھر نہ کر سکے گی اور یہ کبھی اچھائی کی طرف گامزن نہیں ہو سکے گا۔

3۔ اسلامی اقدار اور علم دین سے دوری: بگڑتی ہوئی اولاد کا ایک اہم سبب اسلامی تعلیمات پر عمل نہ کرنا اور علم دین سے دوری ہے۔آپ کی اولاد، آپ کے جگر کا ٹکڑا ہی سہی لیکن اس سے پہلے اللہ کا بندہ، نبی کریم ﷺ کا امتی اور اسلامی معاشرے کا اہم فرد ہے۔ اگر والدین اپنی، اولاد کو اللہ کی بندگی، سرکار مدینہ ﷺ کی غلامی، اسلامی معاشرے میں اس کی ذمہ داری نہ سکھا سکیں تو اسے اپنا فرماں بردار بنانے کا خواب دیکھنا بھی چھوڑ دیجیئے کیونکہ یہ دین اسلام کی تعلیمات ہی ہیں کہ جس پر عمل پیرا ہو کر بندہ اپنے والدین کا مطیع و فرمانبردار ہو سکتا ہے۔ والدین کو غور کر لینا چاہیے کہ انہوں نے اپنی اولاد کو کس قدر اسلامی تعلیمات اور علم دین سےآراستہ کیا؟ کیونکہ آج کل کے والدین ہی ہیں جنہوں اپنے بچے کو ABC بولنا تو سکھایا مگر قرآن پڑھنا نہ سکھایا، مغربی تہذیب کے طور طریقے تو خوب سمجھائے مگر پیارے آقا ﷺ کی سنتیں نہ سکھائیں، جنرل نالج کی اہمیت پر اس کے سامنے گھنٹوں کلام کیا مگر فرض دینی علوم کی رغبت نہ دلائی، اس کے دل میں مال و دولت کی محبت تو ڈالی مگر عشق رسول ﷺ کی شمع فروزاں نہ کی، اس کو دنیاوی ناکامیوں کا خوف تو دلایا مگر امتحان قبر و حشر میں ناکامی کی وحشت نہ دلائی، اسے ہیلو ہائے کہنا تو سکھایا مگر سلام کرنے کا طریقہ نہ بتایا۔ یہ سب کچھ بچے کی طبیعت میں شیطانیت و نفسانیت کو اتنا قدآور کر دیتے ہیں کہ اس سے پاکیزہ کردار کی توقع بھی نہیں کی جا سکتی۔ پھر آخر کار یہی والدین اولاد بگڑنے کا رونا روتے نظر آتے ہیں۔

4۔ گھریلو ماحول اور بری صحبت: ان تمام اسباب کے ساتھ ساتھ گھریلو ماحول اور صحبت (یعنی دوست احباب) کا بھی بچوں کی زندگی میں گہرا اثر پڑتا ہے گھریلو ماحول میں خرابی اور بری صحبت بھی بچے کے بگڑنے کا ایک اہم سبب بنتی ہے اگر گھر والے نیک سیرت، شریف، خوش اخلاق ہوں اور گھر کا ماحول پاکیزہ ہو تو بچہ بھی حسن اخلاق و پاکیزہ کردار کا مالک بنے گا مگر اس کے ساتھ اس کی اچھی صحبت کا ہونا بھی ضروری ہے انسان کی فطرت ہے کہ وہ جس کے ساتھ اٹھتا بیٹھتا ہے ان کی عادات کو اپناتا ہے اور یہ حقیقت ہے کہ صحبت اپنا اثر رکھتی ہے لہذا والدین کو چاہئے کہ اپنی اولاد کو بگڑنے سے بچائے اور نیک بنانے کیلئے اپنے گھر کے ماحول کو پاکیزہ بنائیں اور اس بات کا احتساب کرتے رہیں کہ ان کا بچہ کس کے ساتھ اٹھنا بیٹھنا کر رہا ہے۔

5۔ سوشل میڈیا اور موبائل فون: آج کے دور میں سب سے اہم سبب جو آنے والی نسلوں کی بربادی کو فروغ دینے میں مصروف ہے وہ موبائل فون اور سوشل میڈیا کا استعمال ہے مشاہدہ ہے کہ آج کے دور میں بچہ ہو یا بڑا، بوڑھا ہو یا جوان، مذہبی و غیر مذہبی الغرض ہر فرد ہی اس وبا کی لپیٹ میں ہے جہاں بچوں کے ہاتھوں میں کھلونے دیئے جاتے تھے وہاں اب موبائل فون اور ٹیبلیٹ جیسی اشیاء پکڑائی جاتی ہیں۔ یہ بچوں کی ذہنی سطح کو برباد کر دیتا ہے، ان کو تعلیم سے غافل کرتا ہے اور غیر اخلاقی حرکات میں ملوث کرنے کا ذریعہ بنتا ہے والدین اپنی اولاد کو اس سے دور رکھنے میں کامیاب ہوجائے تو ان کی اولاد بہت سی خرابیوں سے بچ سکتی ہے۔

تمام والدین کو چاہیے کہ ان اسباب پر غور و فکر کرتے ہوئے اپنی اولاد کی پرورش کریں۔

اولاد کی تربیت کرنا والدین کی ذمہ داری ہوتی ہے کہ وہ اپنی اولاد کے روز کے معمولات پر نظر رکھیں تاکہ ان کی بہترتربیت کرسکیں۔ اولاد کی تربیت میں زیادہ حصہ ماں کا ہوتا ہے اس لیے کہا جاتا ہے کہ ماں کی گود بچے کی پہلی درسگاہ ہے۔

آج کل بچوں کے بگڑنے کے اسباب میں سرفہرست موبائل کا استعمال ہے جو کہ بچوں کے اخلاق پروان کے روز کے معمولات پر اثر انداز ہوتا ہے۔

بچے موبائل گیمز اور موبائل کی دوسری چیزوں میں گم ہو کراپنی ذمہ داریاں بھول جاتے ہیں، اپنے روزمرہ کے کام سے غفلت برتتے ہیں اور ان کو پس پشت ڈال کر موبائل پر زیادہ وقت صرف کرتے ہیں۔

ماحول کا اثر: بچوں کے مزاج پر زیادہ اثر ان کے ماحول کا ہوتا ہے اگر ان کاماحول بہت اچھا اور دینی ہوگا ان کے دوست اچھے ہوں گے تو ان کے بگڑنے کے امکانات کم ہوں گے کیونکہ بچہ جس ماحول میں زیادہ وقت گزارتا ہے اسی کا اثر قبول کرتا ہے کیونکہ بچے وہ نہیں کرتے جو انہیں کہا جاتا ہے بلکہ وہ کرتے ہیں،جو وہ دیکھتے ہیں۔ ان کے ساتھ کھیلنے والے ان کے دوست ہیں جن کے ساتھ بچہ دن میں وقت گزارتا ہے یا انکے اسا تذہ ہیں اگر وہ اچھے ہوں گے تو بچوں پر بھی اچھے اثرات مرتب ہوں گے۔

قرآن کے مضامین سے ناآشنائی: بچوں میں بگڑنے کی بڑی وجہ قرآن کے مضامین سے دوری ہے اگر ہم قران کے مضامین سے دور رہیں گے اور اپنے بچوں کو دور رکھیں گے۔ صحابہ کرام، اکابرین دین کی دین سے محبت، قربانیوں،قناعت پسندی کے واقعات سے لاعلمی ہوگی تو وہ زمانے میں غلط عادات کا شکار ہو جائیں گے۔ جب انہیں اپنے حقوق کے بارےمیں،والدین کے حقوق کے بارے، میں استاد کے حقوق کے بارے میں، پڑوسی کے حقوق کے بارے میں،کسی کی مدد کرنے کے بارے میں اور دوسرے دینی احکامات کے بارے میں علم ہی نہیں ہوگا تو وہ گمراہ ہو سکتے ہیں۔

تربیت سے زیادہ تعلیم پر توجہ: ہم تعلیم پر بہت زیادہ توجہ دیتے ہیں لیکن تربیت پر توجہ نہیں دیتے یہ بچوں کے بگڑنے کی بڑی خاص وجہ ہے، بچوں میں تربیت نہ کرنے کی وجہ سے حسد، جھوٹ، چغلی، غیبت جیسی عادتیں پیدا ہو جاتی ہیں اگر بچوں کو جھوٹ بولنے اور غیبت کرنے اور ان تمام بری عادتوں سے نہیں روکا جائے گا تو وہ ایک اچھے انسان نہیں بن سکیں گے بلکہ گھریلو معاملات میں اور معاشرے میں ان عادتوں کی وجہ سے مزید برائیوں میں مبتلا ہو جائیں گے اگر بچوں کو جھوٹ بولنے کی عادت ہے تو اس بارے میں ان کی تربیت کرنی چاہیے کہ جھوٹ بولنا نہ صرف گناہ ہے بلکہ اس کے معاشرے پر بہت برے اثرات پڑتے ہیں کیونکہ بچے جھوٹ کے سہارے پر بڑی سے بڑی غلطی کر لیتے ہیں اور پھر جھوٹ بول کر الزام دوسروں پر ڈال دیتے ہیں۔اسی طرح بچوں کے دیگر معاملات پر نظر رکھنی چاہیے جس کی وجہ سے ہم بچوں کو بگڑنے سے بچا سکتے ہیں بچوں کو اگر روک ٹوک نہیں کی جائے گی اور ان کی تربیت نہیں کی جائے گی تو وہ ان کے بگڑنے کا سب سے بڑا سبب بنے گی۔

والدین کی بری عادات: بچے وہ کرتے ہیں جو وہ اپنے والدین کو کرتے ہوئے دیکھتے ہیں تو بچوں کے بگڑنے کا سبب یہ بھی ہے کہ جب والدین کا رویہ نامناسب ہوگا،والدین بدمزاج ہوں گے، مادہ پرست ہوں گے، بڑوں کی بے عزتی کرنے والے، چھوٹوں کے ساتھ بدتمیزی سے پیش آنے والے، جھڑک کر پیش آنے والےہوں گے یا لوگوں سے نفرت کرنا، اپنی مرضی کے خلاف کوئی کام ہونے پر واویلا مچانا،ہر بات میں، ہر معاملے میں اپنی پسند کو،اپنی رائے کو ترجیح دینا اور دوسروں کی پسند اور رائے کواہمیت نہ دینا دوسروں کو کمتر سمجھنا، حسد کرنا،کمزوروں پر ظلم کرنا اور طاقتور سے ڈر جانا اور دوسروں سے بغض رکھنا اگر والدین ان عادتوں کے مالک ہوں گے تو وہی اثرات بچوں پر بھی مرتب ہوتے ہیں اور بچےبھی انہیں عادتوں کا شکار ہو جاتے ہیں جو کہ ان کی شخصیت بگاڑ کر رکھ دیتی ہیں۔

غلط بات پر بچوں کو سزا نہ دینا: غلط بات پر بچوں کو سزا نہ دینا اور اس کو نافذ نہ کرنا یہ بھی بچوں کے بگڑنے کا ایک سبب ہے کیونکہ بچے اس بات کے عادی ہو جاتے ہیں کہ ہم کچھ بھی کر لیں یہ صرف دھمکیاں ہیں ہمیں کوئی سزا بھگتنی نہیں پڑے گی یہ چیز بچوں کو غلطیوں کا عادی بنا دیتی ہے اور پھر وہ معاشرے میں ایک غیر ذمہ دار شخص بن کر سامنے آتے ہیں اگر ان کو بروقت سزا دے دی جائے تو ان کو اپنی غلطی کا اندازہ بھی ہو جائے گا اور وہ دوبارہ اس کو کرنے سے بھی ڈریں گے لیکن ان پر سزا نافذ نہ کرنا یہ والدین کی سب سے بڑی غلطی ہوتی ہے جو بچوں کو غلطیوں کااور گناہوں کا عادی بنا دیتی ہے اس لیے اسلام میں سات سال کے بچے کو مار کر نماز پڑھانے کا حکم دیا گیا ہے۔ بچہ جب سات سال کا ہو جاتا ہے اور وہ نماز پڑھنے میں غفلت کرتا ہے، نماز پڑھنے سے گھبراتا ہے تو اس کو مارنے کا حکم دیا گیا ہے اس کے لیے سزا بتائی گئی ہے۔یہ سزا اسی لیے بتائی گئی ہے تاکہ بچے ڈر کر اور اپنی غلطی کے نتائج پہ نظر رکھتے ہوئے اس کام کو سرانجام دیں۔

والدین کا بچوں سے بےجا لاڈ پیار: یہ بھی اولاد بگڑنے کا ایک سبب ہے والدین ہر حال میں اپنے اولاد کی خواہش پورا کرنا چاہتے ہیں لیکن اس بات کا انہیں خیال رکھنا چاہیے کہ بچوں کی اگر تمام خواہشات کو پورا کر دیا جائے گا تو ان کے اندر برداشت ختم ہو جائے گی اور برداشت ختم ہونے کی وجہ سے وہ دنیا میں مشکلات کا سامنا نہیں کر پائیں گے انہیں ان کی خواہشات کو پورا کرنے سے پہلے ان کو سمجھانا بھی چاہیے اور ہر خواہش پوری بھی نہیں کرنی چاہیے تاکہ بچوں کو برداشت اور مشکل حالات کا سامنا کرنے کی عادت ہو جائے ایسا نہ کرنے پروہ اپنی ہر جائز اور ناجائز خواہش پورا کروانے کے عادی ہو جاتے ہیں اور بڑے ہو کر بھی وہ اپنے تمام ضروریات کو جائزو ناجائز طریقے سے پورا کرنے کے عادی بن جاتے ہیں جو کہ معاشرے میں بگاڑ کا سبب بنتا ہے۔

بچوں کی غلطیوں پر والدین کی حمایت: اولاد بگڑنے کا ایک بڑا سبب بچوں کی غلطیوں پہ والدین کی حمایت کرنا ہے۔ بچے چاہے کتنی بھی چھوٹی غلطی کریں والدین کو ان کی حمایت کسی صورت نہیں کرنی چاہیے کیونکہ اس طرح ان کی غلطیاں پختہ ہوتی چلی جاتی ہیں اور انہیں ظلم کرنے اور اپنے دوستوں،ساتھیوں یا کسی بھی جاندار کو یا کسی بھی انسان کو ستانے کی عادت ہو جاتی ہے اور ان میں اچھے اور برے کی تمیز ختم ہو جاتی ہے اور انہیں کسی کا ڈر نہیں رہتا کہ ہمارے والدین ہماری غلطیوں پر ہماری حمایت کر لیں گے ہم کسی کے ساتھ کچھ بھی کریں۔

بچوں کی دلچسپی کے مشاغل: بچوں کی دلچسپی کے مشاغل اگر خلاف دین کا موں اور فضولیات پر مشتمل ہوں گے اوربچے فضول مشاغل میں مصروف ہوں گے تو یہ بھی ان کے بگڑنے کا سبب ہے کیونکہ اس طرح ان کے اندر کسی نیک مقصد کے لیے پریشانیاں، تکلیفیں اٹھانے اور قربانیاں دینے اور برداشت کرنے کا جذبہ پیدا نہیں ہوگا بچوں کی زندگی میں مقصدیت کا بھی رجحان نہیں ہوگا اور اس کی ذمہ داری والدین پر عائد ہوتی ہے کہ وہ بچوں کی زندگی میں کسی نہ کسی نیک مقصد کو پورا کرنے کا رجحان بچوں کو دیں کیونکہ یہ رجحان بچوں میں مثبت تبدیلی لا سکتا ہے۔

1) اولاد بگڑنے کے بہت سے اسباب ہیں ان میں سے ایک اہم سبب تربیت کا نہ ہونا ہے۔ اللہ پاک قرآن کریم میں ارشاد فرماتا ہے: یٰۤاَیُّهَا الَّذِیْنَ اٰمَنُوْا قُوْۤا اَنْفُسَكُمْ وَ اَهْلِیْكُمْ نَارًا وَّ قُوْدُهَا النَّاسُ وَ الْحِجَارَةُ (پ 28، التحریم: 6) ترجمہ کنز الایمان: اے ایمان والو اپنی جانوں اور اپنے گھر والوں کو اس آ گ سے بچاؤ جس کے ایندھن آدمی اور پتھر ہیں ۔اس آیت سے معلوم ہواکہ جہاں مسلمان پر اپنی اصلاح کرنا ضروری ہے وہیں اہل خانہ کی اسلامی تعلیم و تربیت کرنابھی اس پر لازم ہے،لہٰذا ہر مسلمان کو چاہئے کہ وہ اپنے بیوی بچوں اور گھر میں جو افراد اس کے ماتحت ہیں ان سب کو اسلامی احکامات کی تعلیم دے یادلوائے یونہیں اسلامی تعلیمات کے سائے میں ان کی تربیت کرے تاکہ یہ بھی جہنم کی آگ سے محفوظ رہیں۔

آج کل کچھ والدین اپنی زندگی میں اس قدر مصروف ہو چکے ہیں کہ اپنے اولاد کی تربیت کے لیے ٹائم نہیں نکالتے اپنی اولاد کو ٹائم نہیں دیتے جس کی وجہ سے اولاد بگڑ جاتی ہے۔

اس کا حل: لہذا والدین کو چاہیے کہ اپنے اولاد کی صحیح اسلامی تربیت کے لیے وقت نکالیں بچوں کو توجہ دیں۔

2) اسی طرح دوسرا اور اہم سبب موبائل ہے موبائل کے ذریعے بچوں میں بگڑنے کا جو ریشو ہے وہ بہت زیادہ ہے والدین اس بات کا رونا تو روتے ہیں کہ ہمارے بچے بگڑ گئے یہ کیا ہو گیا؟ ہمارے ہاتھ سے نکل گئے! اگر یہ والدین ذرا سوچیں! کہ بچے کو موبائل لا کر کس نے دیا تھا؟وہ واقعات یاد کریں کہ بچپن میں جب بچہ روتا تھا تو چپ کروانے کی خاطر بچے کو موبائل ہاتھ میں کس نے پکڑایا تھا؟ بچہ جب تنگ کرتا تو بجائے اس کی پریشانی سمجھنے کے چھٹکارے کے لیے اسے موبائل کس نے دیا تھا؟ بچے کو کھانا کھلانے کے لیے موبائل اس کے ہاتھوں کس نے لا کر دیا تھا؟ پھر بچہ جب اس موبائل کا عادی ہو جائے اور وقت کے ساتھ ساتھ اس کی عادت مزید پختہ ہوجائے اولاد اس کا استعمال کر کر کے بگڑ جائے پھر پچھتاوے کے سوا ماں باپ کے ہاتھ کچھ نہیں رہتا اب والدین سوائے پچھتاوے کے اور کچھ نہیں کر سکتے کہ اب پچھتائے کیا ہوت جب چڑیا چگ گئی کھیت!

اس کا حل: لہذا والدین کو چاہیے کہ وہ ہوش کے ناخن لیں آج تھوڑی سی اپنی آسانی کے لیے کہیں ایسا نہ ہو کہ آگے کی پوری زندگی آپ بچے کی برباد کرنے میں حصہ دار بن جائیں۔

3)اولاد بگڑنے کا تیسرا سبب ٹی وی ہے۔یہاں میری مراد ٹی وی پر آنے والے وہ کارٹون ہیں جن میں کبھی تو اسلام کے خلاف چیزیں دکھائی جا رہی ہوتی ہیں،کبھی لڑائی کے نام پر بچوں کی ذہنیت کو برباد کیا جا رہا ہوتا ہے، کبھی بے حیائی اور بے شرمی کو فروغ دیا جا رہا ہوتا ہے، جس میں بجائے آداب کے بدتمیزی کا رول پلے کیا جا رہا ہوتا ہے۔ والدین ذرا سوچیں کہ بچے ایسے کارٹون دیکھ کر بگڑیں گے نہیں تو پھر اور کیا ہوگا؟

اس کا حل: والدین کو چاہیے کہ وہ اپنے بچوں کو کڈز مدنی چینل دکھائیں غلام رسول کنیز فاطمہ جیسے اسلامک کارٹون دکھائیں جس کے ذریعے ان کے بچوں کی اسلامی تربیت ہو سکے اور آگے ان کی زندگی تباہ ہونے سے بچ جائے۔

4) اولاد بگڑنے کا ایک سبب ان کی ہر ضد کو پورا کرنا ہے۔ بعض ماں باپ اپنی اولاد کی محبت میں ان کی ہر ضدوں کو پورا کر رہے ہوتے ہیں لیکن وہ یہ نہیں سوچتے کہ یہ ان کی اولاد کے لیے کتنا نقصان دہ ہے۔ آج سے اگر ان کی ضدوں کو کنٹرول نہیں کیا تو بڑے ہو کر یہ ضدیں بے لگام ہو جائیں گی اور پھر اس وقت ماں باپ اپنی اولاد کی ضدوں کو نہ مانیں تو اولاد پھر بڑے بڑے قدم اٹھا لیتی ہیں پھر اس کے بعد یہی خبریں سننے کو ملتی ہیں کہ پسند کی شادی نہ ہو سکنے پر نوجوان نے خود کشی کرلی وغیرہ۔

اس کا حل: لہذا والدین کو چاہیے کہ اپنے اولاد کی بہتری کے لیے بجائے ان کی ہر ضد کو پورا کرنے کے حکمت عملی سے کام لیتے ہوئے ہر قدم اٹھاتے ہوئے پہلے یہ سوچ لیں کہ آیا یہ آگے جا کر بچے کو فائدہ دے گا یا نقصان؟

5)اولاد بگڑنے کا ایک سبب سوشل میڈیا کا استعمال۔ والدین اگر بچپن میں اولاد کو سوشل میڈیا کے استعمال کی کھلی اجازت دے دیں اس پر گرفت نہ کریں تو بڑے ہو کر وہ بچہ پھر سوشل میڈیا کا ہر طرح کا استعمال کرتا ہے خواہ وہ برا استعمال ہو یا اچھا پھر ماں باپ سر پکڑ کر رو رہے ہوتے ہیں کہ یہ کیا ہو گیا؟ پھر اسی سوشل میڈیا کے ذریعے آپس میں لڑکوں لڑکیوں کے ناجائز تعلقات ہوتے ہیں پھر آگے جا کر حالات بگڑ جاتے ہیں ہر انجام یہ ہوتا ہے کہ لڑکیاں اپنے گھروں سے بھاگ جاتی ہیں اور والدین کے پاس پچھتاوے کی کچھ باقی نہیں رہتا۔

اس کا حل: والدین کو چاہیے کہ وہ حتی الامکان بچوں کو سوشل میڈیا سے دور رکھیں اس معاملے میں کڑی نظر رکھیں۔

6) اولاد بگڑنےکی ایک اہم وجہ تعلیم کے لیے غلط اداروں کا انتخاب۔ اگر آپ نے اپنے بچے کی تعلیم کے لیے ایسے ادارے کا انتخاب کیا ہو جہاں اسلامی تعلیمات کا دور دور تک پتا نہ ہو، وہ تعلیم گاہ مخلوط ہو جہاں لڑکے اور لڑکیاں ساتھ تعلیم حاصل کرتے ہوں، ٹیچریں جینز پہنتی ہوں، جہاں آئے دن میوزیکل فنکشن ہوتے ہیں۔تو بچہ بگڑے گا نہیں تو اور کیا ہوگا؟ ماں باپ سوچیں کہ وہ چاہتے ہیں کہ ان کا بچہ ان کا ادب کرے، نیک بنے، اس کے باوجود والدین ایسی جگہ انہیں تعلیم کے لیے چھوڑ دیں جہاں بچہ سنورنے کی بجائے بگڑ جائے؟

اس کا حل: والدین کو چاہیے اپنے بچوں کی تعلیم کے لیے اچھے اداروں کا انتخاب کریں الحمدللہ دعوت اسلامی کے تحت انٹر نیشنل اسلامک اسکولنگ سسٹم دارالمدینہ بھی ہے جہاں پر بچوں کو دنیوی تعلیم دی اسلام و شریعت کے مطابق دی جاتی ہے،ساتھ ساتھ ان کی اخلاق و آداب، دینی تربیت پر بھی خصوصی توجہ دی جاتی ہے۔

اسکے علاوہ اولاد بگڑنے کے اور بھی اسباب ہیں۔ لیکن اہم بات کی طرف توجہ دلاتی چلوں کہ ان بیان کردہ اسباب کے ساتھ ان کا حل تو بیان کردیا گیا لیکن یہ بات یاد رکھیں کہ عمل کے لیے سراپا ترغیب بننا پڑتا ہے۔ اگر والدین خود گھنٹوں موبائل میں لگے رہیں سوشل میڈیا کا استعمال کرتے رہیں اور بچے کو منع کریں کہ بیٹا موبائل استعمال نہیں کرتے اس سے نقصان ہوگا تو بچہ کیسے بات مانے گا؟

لہذا والدین بھی اپنا کردار ایسا رکھیں۔بچے جیسا اپنے ماں باپ کو دیکھتے ہیں ویسا ہی کرتے ہیں۔ اگر بچہ اپنی ماں کو نماز پڑھتے دیکھے گا تو بچہ بھی نقل کرتے ہوئے نماز پڑھے گا لیکن یہی بچہ اگر اپنی ماں کو ناچتے گاتے ہوئے دیکھے گا تو بچے کو بھی ناچنے اور گانے کی عادت ہی پڑے گی۔

بچوں کی تربیت ہر معاشرے کا بنیادی عنصر ہے، کیونکہ والدین کی ذمہ داری ہے کہ وہ بچوں کو ایک مہذب اور اچھا انسان بنائیں۔ تاہم، بعض وجوہات کی بنا پر اولاد میں بگاڑ پیدا ہوتا ہے۔ جس سے نہ صرف بچے خود متاثر ہوتے ہیں بلکہ خاندان اور معاشرے پر بھی منفی اثرات مرتب ہوتے ہیں۔ یہاں ہم کچھ بنیادی وجوہات پر بات کریں گے جن کے باعث بچے بگڑ جاتے ہیں۔

1۔ والدین کی عدم توجہ: والدین کی مصروفیات اور ان کی جانب سے وقت کی کمی بچوں میں بگاڑ کا ایک اہم سبب ہے۔ بچے والدین کی توجہ چاہتے ہیں اور وہ یہ توجہ حاصل نہیں کرتے تو وہ دوسروں میں سکون و توجہ ڈھونڈنے لگتے ہیں۔ بعض اوقات یہ انہیں برے لوگوں کی صحبت کی طرف لے جاتی ہے۔ جس کا اثر ان کی زندگی اور شخصیت پر منفی انداز میں پڑتا ہے۔

2۔ دوستانہ اور مثبت ماحول کا فقدان: گھر کا ماحول بچوں کی ذہنی اور اخلاقی تربیت میں اہم کردار ادا کرتا ہے۔ اگر والدین کا رویہ سخت اور بے لچک ہو تو بچے خود کو محدود محسوس کرتے ہیں اور اپنی باتیں اور مسائل والدین کے ساتھ بانٹنے سے گھبراتے ہیں۔ اس کے برعکس،ایک دوستانہ ماحول میں بچہ اپنے مسائل کو والدین کے ساتھ شیئر کرتا ہے جس سے والدین انہیں صحیح رہنمائی فراہم کر سکتے ہیں۔

3۔ مذہبی اور اخلاقی تربیت کی کمی: اسلامی تعلیمات اور اخلاقی اصول بچوں کو نیک اور دیندار انسان بننے میں مدد دیتے ہیں۔ اگر والدین اپنے بچوں کو دینی تعلیمات سے دور رکھیں اور انہیں اچھے برے کی تمیز نہ سکھائیں تو وہ معاشرتی برائیوں کا شکار ہو سکتے ہیں۔ بچوں کو چھوٹی عمر سے ہی دینی اور اخلاقی تربیت فراہم کرنی چاہیے تاکہ وہ اپنے راستے سے نہ بھٹکیں۔

4۔ حد سے زیادہ سختی یا آزادی: بچوں کی تربیت میں سختی اور آزادی دونوں ضروری ہیں،مگر دونوں میں توازن کا ہونا بھی ضروری ہے۔اگر والدین زیادہ سختی کریں تو بچے ضدی اور باغی ہو سکتے ہیں، جبکہ زیادہ آزادی دینے سے بچے اپنی مرضی کے مطابق غلط سرگرمیوں میں مشغول ہو جاتے ہیں۔ والدین کو چاہیے کہ وہ اعتدال کے ساتھ بچوں کو اپنی محبت اور رہنمائی فراہم کریں۔

5۔ سوشل میڈیا اور انٹرنیٹ کا غیر مناسب استعمال: آج کل سوشل میڈیا اور انٹرنیٹ بچوں کی زندگی کا حصہ بن چکے ہیں،مگر ان کا غیر مناسب اور بے جا استعمال بچوں میں بگاڑ کا سبب بن سکتا ہے۔ بہت سے بچے انٹرنیٹ پر ناپسندیدہ مواد دیکھتے ہیں یا غلط سرگرمیوں میں ملوث ہو جاتے ہیں۔ جو ان کی شخصیت اور ذہنی نشوونما پر منفی اثر ڈالتے ہیں۔

دور حاضر میں دیکھا جائے تو اولاد بگڑنے کاسب سے بڑا سبب جو سامنے آیا وہ ہے موبائل فون جیسا فتنہ، دیکھا جائے تو بچے بچے کے ہاتھ میں موبائل فون نظر آتا ہے اور انٹرنیٹ جیسی بیماری ہر گھر کی ضرورت بنی ہوئی ہے جب بچوں کے پاس موبائل فون ہوتا ہے تو وہ سب کچھ بھول جاتے ہیں یہاں تک کے موبائل فون کے آگے ہماری اولادیں کھانا بھی بھول جاتی ہیں بچے راتوں تک بےحیائی فلمیں ڈرامے دیکھنے میں مشغول ہوتے ہیں اور پھر اس بےحیائی کو فیشن سمجھ کر اپنا لیتے ہیں، اس کی سب سے بڑی وجہ یہی ہے کہ بچوں کو دینی ماحول فراہم نہیں کیا جاتا اگر دیکھا جائے تو آج کل والدین کے پاس بھی اولاد کے لیے وقت نہیں ہے جبکہ اولاد اللہ کی نعمتوں میں سے ایک نعمت ہے انکی پرورش کی ذمہ داری ماں اور باپ دونوں کی ہوتی ہے۔

فرمان مصطفیٰ ﷺ: تم سب نگران ہو اور تم سب میں سے ہر ایک سے اس کے ماتحت افراد کے بارے میں پوچھا جائے گا بادشاہ نگران ہے اس سے اسکی رعایا کے بارے میں پوچھا جائے گا آدمی اپنے اہل و عیال کا نگران ہے اس سے اس کے اہل و عیال کے بارے میں پوچھا جائے گا عورت اپنے خاوند کے گھر اور اولاد کی نگران ہے اس سے ان کے بارے میں پوچھا جائے گا۔

ایک بڑی وجہ یہ بھی سامنے آئی ہے کہ والدین کا ایک دوسرے پر چلانا جھگڑا کرنا بھی بچوں کی تربیت پر برا اثر ڈالتا ہے جب والدین ایک دوسرے کی عزت نہیں کریں گے تو اولادیں کیسے ادب کریں گی والدین کو چاہیے اپنے گھر میں دینی ماحول بنائیں بچوں کو اولیائے کرام کی باتیں بتائیں نبیوں کے واقعات سنائیں ان شاللہ اگر اللہ نے چاہا تو ہمارے گھروں کا ماحول بھی دینی بن جائے گا اور ہماری بگڑی اولادیں بھی سنور جائے گی۔

ایک سبب یہ بھی ہے کہ کچھ والدین تعلیم کی کمی کے باعث اپنی اولادوں کو دوسرے لوگوں کے سامنے انکو ڈانٹ دیتے ہیں ہر بات پر روک ٹوک کرتے ہیں جس کی وجہ سے بچے اپنے والدین سے بد ظن ہو جاتے ہیں اور اپنے والدین کو اپنا دشمن سمجھنے لگتے ہیں کیوں کہ والدین گھر میں اپنی اولادوں کی تربیت پر توجہ نہیں دیتے۔

ایک سبب یہ بھی ہے کے کچھ والدین اپنے بچوں کی ہر بات اور کام پر کہتے ہیں: تم نے ٹھیک نہیں کیا اپنے بچوں کی حوصلہ افزائی نہیں کرتے انکو دوسرے بچوں کی مثالیں دیتے ہیں اگر بچے نے کبھی کوئی اچھا کام کیا پھر بھی ہم اسکی حوصلہ افزائی نہیں کرتے نہ اس میں کوئی نہ کوئی عیب نکال دیتے ہیں اس وجہ سے بھی اولادیں بگڑ جاتی ہیں۔

اولادوں میں فرق کرنے کی وجہ سے بھی ایک کی تعریف کرنا دوسرے کی خامیاں نکالنا اس وجہ سے ان بہن بھایوں میں دشمنی پیدا ہو جاتی ہیں وہ بہن بھائی ایک دوسرے کی جان کے دشمن بن جاتے ہیں والدین کی کم عقلی کی وجہ سے اولاد کی تربیت کی ذمہ داری ماں اور باپ دونوں کی ہوتی ہے والدین کو اولاد کے معاملات میں ایک ہو کر کام لینا چاہیے جب والدین کی رائے الگ الگ ہوگی ماں کچھ کہے باپ کچھ کہے اس سبب سے بھی اولاد کا نقصان ہوتا ہے اور وہ بگڑ جاتی ہے انہیں خود بھی علم نہیں رہتا وہ کس کی رائے کو ترجیح دے اس سے بھی اولاد بگڑ جاتی ہے جب والدین ایک ہو جائیں گے ہماری اولادیں بھی سنور جائیں گی۔

اولاد اللہ پاک کی طرف سے ہمارے لیے ایک عظیم نعمت ہے اس کے ذریعے ہمارے نام و نسل کی بقا ہے ہر مسلمان کی خواہش ہوتی ہے کہ اللہ تعالی اس کو نیک اولاد اور صالح اولاد عطا فرمائے جو کہ دنیا میں بھی اس کی انکھوں کی ٹھنڈک بنے اور اخرت میں بھی اس کی نجات کا ذریعہ۔ اولاد کے نیک بننے میں والدین کی تربیت کا بہت بڑا عمل دخل ہے جو والدین اپنے بچوں کی اچھی تربیت کرتے ہیں تو اللہ پاک ان کو اس کا صلہ ضرور عطا کرتا ہے اولاد کی تربیت دین کی تعلیمات کے مطابق کرنا والدین کی ذمہ داری میں شامل ہے لیکن آج کل کے دور میں اس کا فقدان ہے اکثر والدین اس بات کا اظہار کرتے ہیں کہ ان کی اولاد بگڑ گئی ہے بات نہیں مانتی بدتمیز ہے صفائی ستھرائی کا خیال نہیں رکھتی وغیرہ وغیرہ۔

اولاد کی تربیت کیسے کی جائے؟ اس کے بہترین رہنما اصول قران پاک میں بیان کیے ہیں، اپنی اولاد کو بری عادات کے ذریعے بگاڑنے کے بجائے اپنی اولاد کو صدقہ جاریہ بنائیں انہیں برے کاموں سے روک کر اچھے کاموں کی عادت ڈالیں کہ یہ آپ کے لیے دنیا میں تو فخر بنے بلکہ آخرت میں بھی نجات کا ذریعہ بنے اس کے بارے میں ایک واقعہ ہے ایک شخص نے خواب میں دیکھا کہ مردے قبروں سے نکل کر زمین میں کوئی چیز سمیٹ رہے ہیں لیکن یہ ایک شخص نہایت اطمینان سے بیٹھا ہوا ہے اس سے پوچھا کہ لوگ کیا چن رہے ہیں اس نے جواب دیا کہ زندہ لوگوں کے صدقے دعا یا درود وغیرہ کی برکات سمیٹ رہیں اس سے پوچھا تم کیوں نہیں چنتے جواب دیا میرا ایک بیٹا حافظ قران ہے جو روزانہ قران ایک قران پڑھ کر مجھے بخشتا یعنی ایصال ثواب کرتا ہے۔ (روض الریاحین، ص 177 ملخصاً)

حضور ﷺ نے فرمایا: جب انسان مر جاتا ہے تو تین اعمال کے علاوہ اس کے عمل منقطع ہو جاتے ہیں: صدقہ جاریہ، وہ علم جس سے نفع اٹھایا جاتا ہو اور نیک اولاد۔ (مسلم، ص 684، حدیث: 4223)

فرمانِ امیر اہل سنت: نیک اولاد صدقہ جاریہ ہوتی ہے اور ان کی دعاؤں کے طفیل فوت شدہ والدین کے لیے آسانیاں ہوتی ہیں اولاد کو نیک بنانے کے لیے دعوت اسلامی کا دینی ماحول ایک بہترین ذریعہ ہے۔ (فیضان سنت، 1/357)

ہماری اولاد ہمارا سرمایہ ہے مگر ہم اس کی تربیت کے حوالے سے کمزور ہیں ہماری اولاد کو برائیوں کی دیمک لگتی جا رہی ہے اگر ہم نے انہیں اللہ کی نافرمانی اور جہنم سے بچانا ہے تو سب سے پہلے انہیں قرآن کریم کی تعلیم دیں اور دین کی ضروری باتیں سکھائیں۔

اولاد بگڑنے کے اسباب: اولاد بگڑنے میں والدین کا بھی ہاتھ ہوتا ہے کیونکہ جب اولاد برے ناجائز کام کرتی ہے تو والدین منع نہیں کرتے یہ کہہ کر درگزر کر دیتے ہیں کہ ابھی بچہ ہے بڑا ہوگا تو سیکھ جائے گا کیسے سیکھ جائے گا بغیر سکھائے ہی سیکھ جائے گا تب منع نہیں کرتے تو جب بگڑ جاتے ہیں تو پھر کہتے ہیں کہ اولاد بات نہیں مانتی چھوٹی عمر میں ہی بچے سیکھتے ہیں تو تب منع ہی نہیں کرتے اور نہ ہی کچھ سکھاتے ہیں والدین اولاد کو بگاڑنے کے اسباب خود ہی پیدا کرتے ہیں سب سے بڑا سبب انہیں روکتے نہیں یہ کام نہیں کرتا دوسرا سبب موبائل انٹرنیٹ ہے جس کے ذریعے اولاد بگڑ جاتی ہے اگر انٹرنیٹ کے فوائد ہیں تو اتنے ہی نقصان بھی ہیں جیسا دیکھتے ہیں تو ویسا ہی کرتے ہیں اس لیے اپنی اولاد کو ان سب چیزوں سے بچائیں تیسرا سبب کہ اولاد کیسی صحبت میں اٹھتی بیٹھتی ہے بری صحبت کے ذریعے بھی اولاد بگڑ جاتی ہے۔

شادی کرنا، بچے پیدا کرنا، اور انہیں پالنا کوئی بڑا کام نہیں ہے یہ تو غیر مسلم بھی کر رہے ہیں جانور اور پرندے بھی کر رہے ہیں۔ مسلمان ماں باپ کی حقیقی ذمہ داری اپنی اولاد کو دین کی تربیت دینا، اسلام والا ماحول فراہم کرنا ہے۔ تاکہ اپنے بعد ایمان والی نسلیں چھوڑ جائیں۔ بروز قیامت ایک بڑا سوال آپکی اولاد کے متعلق بھی پوچھا جائے گا!

یاد رکھئے! اگر سستی سے کام لیتے ہوئے اولاد کی اچھی تربیت نہ کی توبروز قیامت اللہ کی بارگاہ میں اس کا جواب دینا ہوگا، حضور اکرم ﷺ کا فرمان عظمت نشان ہے: تم سب نگران ہو اور تم میں سے ہر ایک سے اس کے ماتحت افراد کے بارے میں پوچھا جائے گا۔ بادشاہ نگران ہے، اس سے اس کی رعایا کے بارے میں پوچھا جائے گا۔ آدمی اپنے اہل وعیال کا نگران ہے اس سے اس کے اہل وعیال کے بارے میں پوچھا جائے گا۔ عورت اپنے خاوند کے گھر اور اولادکی نگران ہے،اس سے ان کے بارے میں پوچھا جائے گا۔ (بخاری، 2/159، حدیث: 2554)

آئیے! اولادکی تربیت کے حوالے سے چند مدنی پھول سنتے ہیں، جن کی روشنی میں ہم اپنے بچوں کی صحیح مدنی تربیت کرسکتے ہیں۔

بےجا لاڈ پیار: بچوں کے بگڑنے کی ایک بڑی وجہ یہ ہوتی ہے کہ بچپن ہی سےباپ ان کی ہرخواہش کو پوری کرتا چلاجاتا ہے،نتیجتاً بچے ضدی اور اپنی بات منوانے کے عادی بن جاتے ہیں، اس کا نقصان یہ ہوتاہے کہ بعض اوقات کسی مجبوری کے سبب،باپ ان کی کوئی خواہش پوری نہ کرسکے تو بچے رونا دھونا شروع کردیتے ہیں اورپھر باپ کوچاہتے،نہ چاہتے ہوئے،ان کی بات ماننی ہی پڑتی ہے، جب بچے کا یہ ذہن بن جاتاہے کہ،جو روتاہےاس کا کام ہوتاہے،تو پھرآئے دن رو پیٹ کر نت نئی فرمائشیں پوری کروانا ان کا معمول بن جاتاہےاوراس طرح یہ سلسلہ تھمنے کے بجائے مزید بڑھتاہی چلاجاتا ہے۔لہٰذا اس کاحل یہی ہے کہ بچوں کی بے جاضدکے آگے خودکوبے بس سمجھ کران کی ہربات اور مطالبات کو پورا کرنے سے گریز کیجئے، ورنہ یہ لاڈ پیار ان کے بگاڑکاسبب بن سکتاہے۔

سب کے سامنے مت جھڑکیے: بچوں کی تربیت کرنے میں ایک احتیاط یہ بھی کیجئے کہ ان کی غلطی پرسمجھاتے وقت سب کے سامنے بلندآواز سےسمجھانے، ڈانٹنےیاجھڑکنے سے بچیے کیونکہ اس انداز سے قوی امکان ہےکہ ان کی دل آزاری بھی ہو اوربات بھی بے اثر ہوجائے اور اس طرح سمجھانے سے بچہ بھی ڈھیٹ بن سکتاہے،لہٰذا موقع پاکرتنہائی میں سمجھائیے،جیسا کہ حضرت ابو درداء رضی اللہ عنہ فرماتے ہیں: جس نے اپنے بھائی کو سب کے سامنے نصیحت کی، اس نے اس کو ذلیل کر دیا اور جس نے تنہائی میں نصیحت کی اس نے اس کو مزیّن (آراستہ) کر دیا۔ (شعب الايمان،6/112، حديث:7441)

اولاد پر کڑی نظر رکھئے! اسی طرح باپ کی ایک ذمّہ داری یہ بھی ہے کہ اپنی اولادپرکڑی نظر رکھے کہ اس کا اٹھنابیٹھناکن لوگوں کے ساتھ ہے،لیکن فی زمانہ لوگ اس پر توجہ نہیں دیتے اور بعض کو یہ بھی کہتے سنا ہے کہ ہمارے گھر کا ماحول سلجھا ہواہے،ہم نے اپنے بچے کی اچھی تربیت کی ہے،ہمیں یقین ہے وہ کسی غلط راستے پر نہیں جاسکتا۔ ہو سکتا ہے کہ آپ کےگھر کا ماحول اچھا ہومگرآپ کا بچہ جس اسکول یا کالج میں جاتاہے،یا گلی محلے کے دوستوں کے ساتھ اٹھتا بیٹھتاہے،ان میں ہر طرح کے اچھے برے لوگ ہوتے ہیں، اس بات کی کیا گارنٹی ہے کہ اسے وہاں بھی گھرجیسا ہی ماحول میسرہوگا۔لیکن باپ اسی خوش فہمی میں مبتلا رہتاہے کہ میرابچہ بہت شریف ہے اوربچہ برے دوستوں کی صحبت میں پھنس کرجرائم کی دنیا میں غرق ہوجاتاہے اور باپ کواس وقت ہوش آتاہے جب اس کا ہونہار بیٹا منشیات یا فحاشی کے اڈّوں سے گرفتار ہوکر جیل کی سلاخوں کے پیچھے چلاجاتاہے۔لہٰذا باپ کی ذمہ داری صرف یہی نہیں کہ پیسہ بنانے کی مشین بن کرخوب دولت اکٹھی کرے اور اپنی اولاد کو اچھے سےاچھا کھلائے پلائے اور دنیا کی ہر آسائش وسہولت انہیں مہیا کرنے کی کوشش کرے بلکہ ان کی اچھی پرورش کے ساتھ ساتھ انہیں دینی تعلیم سکھانا،قرآن پڑھانا،فرض علوم سکھانا،نبی ﷺ کی محبت سکھانا،اخلاق اچھے کرنے کی کوشش کرنا، نیکیوں کی طرف راغب کرنا اور بری صحبت سے بچانابھی باپ پر لازم ہے،بروز قیامت اس کے بارے میں بھی اس سے پوچھاجائے گا۔

اللہ مجھے دیکھ رہا ہے: حضرت سہل بن عبداللہ تستری رحمۃ اللہ علیہ فرماتے ہیں: میری عمر 3 سال تھی اور میں رات کو اٹھ کر اپنے ماموں حضرت محمد بن محمدبن سوّاررحمۃ اللہ علیہ کو تنہائی میں نمازپڑھتے دیکھتا تھا۔ ایک دن میرے ماموں نے مجھ سے پوچھا: کیا تو اس اللہ کویاد نہیں کرتا جس نے تجھے پیدا کیا؟ میں نے پوچھا:میں اسے کس طرح یاد کروں؟ انہوں نے فرمایا:جب تم بستر پر لیٹنے لگو تو 3 بار زبان کو حرکت دئیے بغیر محض دل میں یہ کلمات کہو: اللہ معی،اللہ ناظرٌ الیّ،اللہ شاھدی یعنی اللہ میرے ساتھ ہے، اللہ مجھے دیکھ رہا ہے اللہ میرا گواہ ہے۔

آپ فرماتے ہیں: میں نے چند راتیں یہ کلمات پڑھے پھر انہیں بتایا تو انہوں نے فرمایا: ہر رات 7 مرتبہ پڑھو۔ میں نے انہیں پڑھا،پھر بتایا تو فرمایا: ہر رات 11 مرتبہ یہ کلمات پڑھو۔ میں نے اسی طرح پڑھا، تومیں نے اس کی لذّت اپنے دل میں محسوس کی۔ جب ایک سال گزرگیا تو میرے ماموں نے مجھ سے فرمایا:میں نے جو کچھ تمہیں سکھایا ہے اسے یاد رکھو اورقبر میں جانے تک ہمیشہ پڑھتے رہنا، تمہیں دنیا وآخرت میں نفع دے گا۔ میں نے کئی سال تک ایسا کیا تو اپنے اندر اس کی لذّت کومحسوس کیا۔ پھر ایک دن میرے ماموں نے فرمایا: اے سہل ! اللہ جس شخص کے ساتھ ہو، اسے دیکھتا ہواوراس کاگواہ ہو، وہ اس کی نافرمانی کیسے کرسکتا ہے؟ لہٰذااپنے آپ کو گناہ سےبچاؤ۔ (رسالۃ قشیریۃ، ص 39)

دیکھا آپ نے حضرت محمد بن محمدبن سوّاررحمۃ اللہ علیہ نے اپنے بھانجے کی کس پیارے انداز سے مدنی تربیت فرمائی کہ بغیرڈانٹے،جھڑکے مدنی پھول عطا فرمایا کہ کیا تو اس اللہ کویاد نہیں کرتا جس نے تجھے پیدا کیا؟ پھر بھانجے بھی کیسے باعمل تھے کہ اپنے ماموں جان سے ملنے والے مدنی پھول کو دل وجان سے قبول کرتے ہوئے، اس پرعمل کرنا شروع کردیااوراس کی برکت سے کیسے کیسے انوارو تجلّیات سے نوازے گئے۔جی ہاں!یہ خوش نصیب بچہ آگے چل کرمقام ولایت پر فائز ہوا،جس کو دنیا اب حضرت سہل بن عبد اللہ تستری رحمۃ اللہ علیہ کے نام سے یاد کرتی ہے اورجن کا فیضان اب بھی جاری و ساری ہے۔

اَلْعِلْمُ في صِغَرِهِ كالنَّقْشِ عَلَى الحَجَریعنی بچپن میں سیکھنا پتھر پہ لکیر کی طرح ہے۔ عربی کی یہ کہاوت جتنی مشہور ہے اتنی ہی سچّی بھی ہے، بچہ جو باتیں اور اخلاقیات سیکھتا ہے زندگی بھر انہیں پر عمل کرتا ہے، چاہے وہ اچھائی کا سیدھا راستہ ہویا برائی کی تاریک وادی ہو۔ اگر آج ہم اپنے بچّوں کی مدنی تربیت کریں گے تو ہی آگے چل کر وہ ملک وقوم کے خدمت گار اور معاشرے کے بہتریں افراد بنیں گے۔

نیک اولاد اللہ تبارک وتعالیٰ کا عظیم انعام ہے اولاد صالح کے لیے اللہ کے پیارے نبی حضرت زکریا علیہ السلام نے بھی دعا مانگی چنانچہ قرآن پاک میں ہے: رَبِّ هَبْ لِیْ مِنْ لَّدُنْكَ ذُرِّیَّةً طَیِّبَةًۚ-اِنَّكَ سَمِیْعُ الدُّعَآءِ(۳۸) (پ3، اٰل عمران: 38) ترجمہ کنز الایمان: اے رب میرے مجھے اپنے پاس سے ستھری اولاد بے شک تو ہی دعا سننے والا۔

نبی کریم ﷺ پوری انسانیت کے لیے رحمت بن کر آئے، آپ نے لوگوں کو جینے کا ڈھنگ سکھایا، عرب کا وہ معاشرہ جہاں بچیوں کو زندہ دفن کر دیا جاتا تھا، وہاں آپ نے بچیوں کو ان کے حقوق فراہم کیے اور خود بھی بچیوں کے ساتھ شفقت سے پیش آنے کا عملی نمونہ پیش فرمایا۔

ایک مسلمان ہونے کی حیثیت سے والدین کی اوّلین ذمّہ داری ہے کہ اپنی اولاد کو حضور سرور کائنات ﷺ کی محبّت سکھائیں چنانچہ امیر المومنین حضرت علی المرتضیٰ کرّم اللہ تعالی وجہہ الکریم سے روایت ہے کہ نور والے آقا، مدینے والے مصطفیٰ ﷺ نے فرمایا: اپنی اولاد کی تین خصلتوں پر تربیت کرو: (1) اپنے نبی ﷺ کی محبّت۔ (2) اہل بیت پاک کی محبّت۔ (3) تلاوت قرآن۔بے شک قرآن کی تلاوت کرنے والا انبیاواصفیا کے ساتھ اس روز عرش الہی کے سائے میں ہو گا جس دن عرش الہی کے علاوہ کوئی سایہ نہ ہو گا۔(جمع الجوامع،1/ 126، حدیث: 782)

محمد کی محبّت دین حق کی شرط اول ہے

اسی میں ہو اگر خامی تو سب کچھ نا مکمل ہے

آج ہمارے معاشرے کی یہ ایک بد نما حقیقت ہے کہ والدین کا اخلاق تو منفی ہوتا ہے لیکن بچے کے اخلاق کو مثبت دیکھنے کی خواہش ہوتی ہے، والدین خود چاہے کتنے ہی غصیلے مزاج کے ہوں لیکن بچہ خوش مزاج ہونا چاہیے، والدین خود بے پرواہ ہوں لیکن بچہ احساس ذمہ داری والا ہونا چاہیے، والدین خود گالی گلوچ کے عادی ہوں لیکن بچے کی زبان پر گالی نہیں آنی چاہیے، غرض یہ کہ بچے کی تربیت کے اس دوہرے معیار کی وجہ سے ہماری موجودہ نسل عملی طور پر کمزور اور مضطرب نظر آتی ہے، ان میں نہ اخلاق کی مضبوطی ہوتی ہے، نہ عمل کی رغبت، ایسا ہونے سے پھر بچے بگڑتے ہے اس کی چند مثالیں ملاحظہ کیجئے۔

(1)۔والدین بچوں سے اکثر یہ کہتے ہیں کہ کوئی مشکل میں ہوتو اس کی مدد کرنی چاہیے اس سے اللہ پاک خوش ہوتا ہے اور ثواب بھی ملتا ہے، لیکن وہی بچہ جب والد یا والدہ سے اپنی پڑھائی کے سلسلے میں مدد چاہتا ہے تو والدین مصروفیت کی بنا پر اسے ٹال دیتے ہیں، اس تاثر سے بچے کے ننھے ذہن میں بیٹھ جاتا ہے کہ مشکل میں کسی دوسرے کی مدد کرنا بہت مشکل ہے کیونکہ زندگی بہت مصروف ہے۔

(2)۔ بچے کو یہ نصیحت کی جاتی ہے کہ زندگی میں ہمیشہ سچ بولنا چاہیے، لیکن اس نے اس بات سے مشاہدہ کیا کہ جب ابو کا کوئی دودست ملنے آیا ہے تو ابو نے اسی بچے کو یہ پیغام دے کر بیجھا کہ جا کر کہہ دو کہ ابو گھر پر نہیں ہے اس عملی مشاہدے سے بچے نے یہ سیکھا کہ جب کسی کام سے بچنا ہو تو جھوٹ کا سہارا لے لینا چاہیے۔

(3)۔ بچے نے یہ بھی سن رکھا تھا کہ غصہ کرنا، لڑائی جھگڑا کرنا، گالی گلوچ یہ سب باتیں گندی ہے اچھے لوگ ایسے کام نیں کرتے، لیکن بچے نے بار ہا یہ بھی دیکھا ہے کہ ممّی پاپا کی اکثر لڑائی ہوتی ہے اور جب بھی پاپا کو غصہ آتا ہے پاپا مما کو گالیاں بھی دیتے ہے اور مارتے پیٹتے بھی ہیں، اب بچے کے ذہن میں پھر یہ بات بیٹھ گئی کہ غصہ کرنا، لڑائی جھگڑا کرنا،گالی گلوچ یہ سب باتیں بری تو ہے لیکن جس پر غصہ آجائے تو اس کا حل یہی ہے کہ غصہ اتار دیا جائے اور برا بھلا کہہ کر دل ٹھنڈا کر لیا جائے۔

محترم والدین کرام ! یہ چند مثالیں اور ان کے نتیجے ہمارے سامنے ہیں کہ بچے ہمارے افعال سے کیا سیکھ رہے ہیں؟ اس سے پتہ یہی چلا کہ والدین کے ایسا کرنے سے بچے کتنا بگڑ جاتے ہیں اگر والدین کی یہ خواہش ہے کہ بچوں کی تربیت اعلی اخلاق پر ہو تو پہلے والدین کو خود اپنی اخلاقی حالت درست کرنی ہوگی، اپنے رویّے اور زندگی گزارنے کے انداز میں تبدیلی لانی ہوگی۔

میری آنے والی نسلیں تیرے عشق ہی میں مچلیں

فی زمانہ یہ ایک پریشان کن مسئلہ بن گیا ہے کہ آج کل کے بچے سدھار کی طرف کم بلکہ بگاڑ کی طرف زیادہ مائل ہے۔یہ بچپن یا لڑکپن کے زمانے کا بگاڑ سن بلوغ تک پہنچنے کے بعد چنگاری سے شعلہ بن جاتا ہے اس سلسلے میں بچوں کےبگاڑ کے اسباب بہت زیادہ پیدا ہورہے ہیں۔

سب سے بڑا بگاڑ: والدین کا اپنے بچوں میں ایک کوترجیح دینا اور دوسرے کے ساتھ بےتوجہی برتنا بھی بچوں کے بگڑنے کا ایک بڑا سسب ہے۔ اس سے ایک بچے کے اندر گھٹن،جلن،حسد،نفرت،مایوسی اور رقابت وبغاوت کے جذبات پروان چڑھتے ہیں اور دوسرے میں غرور وتکبر برتری وغیرہ کےاسباب پیدا ہو جاتے ہیں۔

یہ بات نہایت قابل غور اور یاد رکھنے کے لائق ہے۔ جو احادیث سے بھی اور سائنسی تحقیقات سے بھی ثابت ہے کہ بچہ تقریباً پانچ سال کی عمر تک اپنے اطراف و جوانب جو کچھ دیکھتا اور سنتا ہے وہ ہمیشہ کے لیے اس کے ذہن و قلب پر نقش ہو جاتا ہے۔ اور ہم دیکھتے ہیں کہ بچہ چند ماہ کا بھی نہیں ہوپاتا کہ ٹی وی پر ناچ گانے اور فحش حرکات بڑے مزے سے دیکھتا ہے اور پانچ سال تک تو نہ جانے اپنے گھر اور ماحول کی کتنی برائیاں اپنے اندر جذب کر چکا ہوتا ہے۔

سوچے وہ بچہ کیا بن کر نکلے گا؟ بچوں کو اگر بچپن ہی میں غلط ماحول ملے جہاں حرام و حلال کی کوئی تمیز نہ ہو اور نہ ہی وہ کسی کے حقوق جانتے ہونگے۔اور نہ ہی فرائص سے آگاہ ہونگے۔ گھر والوں کے آپس کے اختلاف، جھگڑے، ہر ایک کو اپنے مفاد کی فکر، دوسروں کو ذلیل کرنا، جھوٹ بولنا، فحش فلمیں خود بھی دیکھنا اور بچوں کو دکھانا۔فیشن و بےپردگی جن کو محبوب و مرغوب ہو، باترجمہ و تشریح قرآن و حدیث کا مطالعہ اور دینی احکام جاننے اور ان پر عمل کی کوششوں اور دینی و تعمیری کاموں میں حصہ لینے کی بجائے رومانی و فحش ناولوں کا جن کے گھروں میں چرچا ہو، دنیاوی رنگینیوں میں مست ہوں کہ ذرہ برابر بھی خوف خدا ان کے دلوں میں نہ ہو اور نہ عذاب آخرت سے بچنے کے لیے کوئی فکر ہو اور جن کی زندگیوں کا کوئی مقصد ہی نہ ہو۔ ایسے ماحول سے کیوں کر آس لگائی جائے کہ وہاں کے بچے نیک صالح اور با اخلاق وبا کردار بن کر پروان چڑھیں گے۔ اور پھر آس لگائی جارہی ہے کہ بچے نہ بگڑیں۔

محبت وشفقت سے محرومی بھی بچوں کو بگاڑ دیتی ہے والدین خصوصاً والد کو اس بات کا بھی بہت خیال رکھنا چاہیے کہ بچوں کی پرورش حرام کمائی سے نہ کرے۔ رسول اکرم ﷺ نے فرمایا: جو گوشت(جسم)حرام سے پرورش یافتہ ہے اس کا ٹھکانا جہنم ہے۔ (معجم اوسط، 5/34، حدیث: 6495)

ظاہر ہے جہنم میں جانے والا جسم کیسے نیک اور صالح بن سکتا ہے۔ سوچنے کی بات ہے کہ جب والدین ہی اپنے بچوں کو ایک نظر سے نہ دیکھیں گے اور ان کے ساتھ اچھا سلوک نہ کریں گے تو ان کے دلوں میں نفرت ہی پیدا ہوگی اور جب بچوں کے دلوں میں نفرت پیدا ہوگی تو کیسے نہیں بچے بگڑیں گے۔

بچوں کے سامنے طنز آمیز باتیں کرنا کہ یہ تو ناکارہ ونالائق ہے۔ اسکو تو کچھ کرنا ہی نہیں آتا وغیرہ وغیرہ۔ بچوں کو زیادہ مارنا جس کی وجہ سے بچے ڈھیٹ ہو جاتے ہیں۔ ان پر کوئی بات اثر نہیں کرتی۔ اور پھر موبائل فون کا استعمال جس کی وجہ سے بچے زیادہ بگڑ رہے ہیں۔

وہ لاپرواہ والدین جو اپنی اولاد کی تربیت پر آج کل اپنے وقت کو صرف نہیں کر رہے ان کی اولاد بھی کل ان کو کوئی اہمیت نہیں دے گی اور ان کے بڑھاپے کے وقت ان کی اولاد ان کو وقت نہ دے گی۔

بے تربیت اولاد کے نقصان کی طرف سورہ زمر کی آیت نمبر 15 میں کہا گیا: قُلْ اِنَّ الْخٰسِرِیْنَ الَّذِیْنَ خَسِرُوْۤا اَنْفُسَهُمْ وَ اَهْلِیْهِمْ یَوْمَ الْقِیٰمَةِؕ-اَلَا ذٰلِكَ هُوَ الْخُسْرَانُ الْمُبِیْنُ(۱۵) ترجمہ کنز الایمان: تم فرماؤ پوری ہار انہیں جو اپنی جان اور اپنے گھر والے قیامت کے دن ہار بیٹھے ہاں ہاں یہی کُھلی ہار ہے۔

روایات میں ہے کہ خدا ایسے ماں باپ پر لعنت کرے جو بچے کے عاق ہونے کا سبب بنیں۔

اولاد اللہ تعالیٰ کی بڑی رحمت ہے اگر اس کی تربیت پر توجہ نہ دی جائے تو یہ رحمت زحمت بن جاتی ہے اولاد کا بگڑنا نہ صرف سارے گھر بلکہ سارے معاشر ے کے ماحول کو بھی تباہ وبرباد کر دیتا ہے اولاد بگڑنے کے بہت سے اسباب ہیں جن میں سے چند ملاحظہ ہوں:

1: والدین کا اولاد کی تربیت پر توجہ نہ دینا۔ بعض والدین چھوٹے بچوں کی تربیت پر توجہ نہیں دیتے ان کی ہر اچھی بری حرکت کو ہنسی مذاق میں لے کر ٹال دیتے ہیں جب بچوں کو بری حرکت پہ روکا ٹوکا نہ جائے تو بچوں میں موجود بری حرکتیں بچوں کی عادت بن جاتی ہیں۔ والدین کو ایسی باتوں پہ توجہ دینی چاہیے

2: دینی تعلیم نہ دلوانا۔ والدین کا بچوں کو دینی تعلیم دلوانے کی بجائے ان کو انگریزی سکولوں میں داخل کروا دینا اولاد کی تربیت کے حوالے سے بہت تباہ کن امر ہے ایسے سکولوں میں غیر مسلم ٹیچرز ہوتے ہیں جو بچوں کے دل ودماغ میں برے عقائد ونظریات راسخ کر دیتے ہیں والدین کو چاہیے کہ وہ اپنی اولاد کو دین کی تعلیم دیں اور خود بھی عقیدہ و اخلاقیات کی تعلیم دیتے رہیں، کیونکہ حدیث نبوی کا مفہوم ہے: کسی باپ کی طرف سے اس کی اولاد کے لیے سب سے بہتر تحفہ یہ ہے کہ وہ اس کی اچھی تربیت کرے۔ (ترمذی، 3/383، حدیث: 1959)

3: گھر کا ماحول اچھا نہ ہونا۔ اگر گھر کا ماحول اچھا نہ ہو والدہ یا والد نماز ادا نہ کر تے ہو ڈرامے دیکھتے ہوں تو بچوں کا ذہن کس طرح نماز کی طرح راغب ہو گا والدین کا گھر میں اسلامی ماحول بچوں کی اصلاح کا ذریعہ ہوگا۔

4: بچوں کا بری صحبت اختیار کرنا بھی بچوں کو بگڑ دیتا ہے کیونکہ انسان فطری طور پر صحبت کا اثر قبول کرتا ہے۔

5: اولاد بگڑنے کا سب سے بڑا اور اہم سبب غیر ضروری انٹرنیٹ اور موبائل فون کا استعمال اور غلط استعمال اور بھی زیادہ خطرناک ہے کیونکہ جو بچے دیکھیں گے وہی کریں گے معاذ اللہ موبائل پر جو بے حیائی ہوتی ہے اس سے تو بس اللہ تعالیٰ کی پناہ ہے۔

یہ سب اسباب اولاد کے نہ صرف اخلاقی بلکہ دینی لحاظ سے بھی خطرناک ہیں، والدین کو چاہیے کہ وہ اپنی اولاد کو دینی مدارس میں دین کی تعلیم دلائیں، والدین اولاد کی صحبت اور دوستوں پہ نظر رکھیں کہ ان کا کیسے لوگوں کے ساتھ اٹھنا بیٹھنا ہے۔

اولاد بگڑنے کا سب سے بڑا سبب آج کل والدین کی لا پرواہی ہے کیونکہ ماں باپ اپنی مصروفیات میں اس طرح مگن ہیں کہ وہ اپنی اولاد کی وہ تربیت نہیں کرتے جو کہ ان کو کرنی چاہیے جبکہ ماں باپ کی سب سے اولین ترجیح اس کی اولاد کی اچھی پرورش ہونی چاہیے آجکل والدین اپنے بچوں کو بڑے بڑے اور مہنگے اسکولوں کالجوں اور یو نیور سٹیوں تو بھیج دیتے ہیں تاکہ وہ اچھی تعلیم حاصل کر سکیں لیکن وہ تربیت نہیں دیتے جو ان کی ذمہ داری ہے بچے اسکولوں اور کالجوں میں جا کر دنیاوی تعلیم تو پڑھتے ہیں لیکن وہ اخلاقی تعلیم جو صرف ان کے والدین دے سکتے ہیں اور وہ ان اخلاقی تربیت سے محروم رہ جاتے ہیں ہاں یہ سچ ہے کہ استاد روحانی والدین ہوتے ہیں پر جو اولاد کی تربیت اس کے اپنے والدین کرتے ہیں وہ کوئی اور نہیں کر سکتا ہم جانتے ہے کہ والدین پر جب ذمہ داریاں ہو تو وہ اکثر مصروف رہتے ہیں پر اولاد کی اچھی تربیت بھی والدین کی ایک خاص ذمہ داری ہے۔

یہ جو آجکل اولادیں اتنی زیادہ بگڑی ہیں اس کی وجہ والدین کا اپنی اولاد سے بے رغبت ہونا ہے بچہ اگر رو رہا ہو تو ماں اسے موبائل پر کوئی ایسی ویڈیو لگا کر دے دیتی ہے کہ بچہ خاموش ہو جاتا ہے آجکل جس طرف بھی دیکھو والدین کو اپنی اولادوں سے ایک ہی شکایت ہے کہ وہ انکی بات نہیں مانتے نا فرمان ہے اگر والدین تھوڑا سا اونچا بول دیں تو بچے آگے سے ایسے ماں باپ کو دیکھتے ہیں جیسے کہ وہ ان کے والدین نہیں بلکہ ان کے دشمن ہیں اس کی اصل وجہ والدین کا اولاد سے حد سے زیادہ لاڈ پیار ہے، لاڈ پیار کرنا غلط بات نہیں پر حد سے زیادہ لاڈ پیار اولاد کو بگاڑ دیتا ہے جہاں ماں باپ اولاد کو موبائل پکڑاتے ہیں۔ وہیں اگر قرآن یا سیرت مصطفی آپ ﷺ کے بچپن کے فضائل پر لکھی ہوئی کتابیں دیں تاکہ بچے ان کو پڑھے اور ان کو معلوم ہوں آپ کا بچپن کیسا تھا آپ اپنا بچپن کیسے گزارتے تھے میرے پیارے آقا کے والدین بچین میں اس دنیا سے چلے گئے لیکن انکا اخلاق و کردار سب سے اعلیٰ تھا۔

جہاں والدین اپنے بچوں کو سیر و تفریح کیلئے لیکر جاتے ہیں اچھی اچھی جگہیں دکھاتے ہیں وہیں اگر اپنے بچوں کو مسجدوں وغیرہ میں بھیجیں تاکہ وہ وباں جاکر نماز ادا کرے اگر ہم اپنے بچوں کو قرآن اور دینی تعلیم دیں تاکہ انکی دنیا کے ساتھ آخرت بھی سنورے اگر اولاد کو دینی تعلیم دی جائے گی تو انکی اچھی تربیت ہوگی تو اولاد نیک ہوگی اور کسی نے کیا خوب بات کہی ہے کہ نیک اولاد ہی ماں باپ کے بڑھاپے کا سہارا ہوتی ہے اس لیے والدین کو اپنی اچھی تربیت پر زیادہ توجہ دینی چاہیے کیونکہ اگر ہم آج اپنی اولاد کی اچھی تربیت کرینگے تو کل یہ اولاد ہمارے لیے صالح ثابت ہوگی اور ہماری بخشش کا ذریعہ بنے گی۔ یاد رکھیں اولاد بگڑنے کا سب سے بڑا سبب سوشل میڈیا اور جدید انٹرنیٹ کا دور ہے والدین کو چاہیے کہ وہ اپنے بچوں کو ان سب بیکار چیزوں سے دور رکھیں اور انکی دینی تربیت پر توجہ دیں تاکہ ان کی اولاد نیک اخلاق اور اچھے و خوش مزاج ہو۔

حضور نے فرمایا: کوئی شخص اپنی اولاد کو ادب سکھائے تو اس کے لیے ایک صاع صدقہ کرنے سے بہتر ہے۔ (ترمذی، 3/382، حدیث: 1958)

اولاد بگڑنے کے اسباب اور ان کی اصلاح کے حوالے سے قرآن و حدیث میں کئی اہم ہدایات موجود ہیں یہاں قرآن و حدیث کی روشنی میں اولاد کی تربیت بگڑنے کے اسباب پر روشنی ڈالی جاتی ہے۔

عورت اور مرد کا کردار: اولاد بگڑنے میں والدین کی ذاتی زندگی اور ان کے برے رویے بھی اہم ہیں اسلام میں والدین کو ایک اچھا نمونہ بننے کا حکم دیا گیا ہے۔

حضرت عبداللہ بن عمر سے روایت ہے کہ رسول اللہ ﷺ نے فرمایا کہ تم میں سے ہر ایک نگران ہے اور ہر ایک سے اس کے ذمہ دار افراد کے بارے میں سوال کیا جائے گا۔

(بخاری،2/159، حدیث: 2554)یہ حدیث والدین کو اپنی ذمہ داری اولاد کی تربیت اور اصلاح کے حوالے سے ذمہ داری کا احساس دلاتی ہے

اولاد بگڑنے میں معاشرتی دباؤ، دوستوں کی بری صحبت اور میڈیا کا اثر بھی عوامل ہے قران اور حدیث میں ایسی صحبت سے بچنے کی تاکید کی گئی ہے۔جو انسان کو برے کاموں کی طرف لے جائے: یٰۤاَیُّهَا الَّذِیْنَ اٰمَنُوْا لَا تَتَّبِعُوْا خُطُوٰتِ الشَّیْطٰنِؕ-وَ مَنْ یَّتَّبِـعْ خُطُوٰتِ الشَّیْطٰنِ فَاِنَّهٗ یَاْمُرُ بِالْفَحْشَآءِ وَ الْمُنْكَرِؕ- (پ 18، النور: 21) ترجمہ: اے ایمان والو: شیطان کے قدموں کی پیروی نہ کرو جو شخص شیطان کے قدموں کی پیروی کرے گا وہ بے حیائی اور برے کاموں کا حکم دے گا۔ اس آیت سے یہ واضح ہوتا ہے کہ اگر بچے ایسی صحبت اختیار کریں جو انہیں برے کاموں کی طرف مائل کرے تو وہ بگڑنے کا سبب بن سکتی ہے۔

ناتواں اخلاق تربیت: اسلام میں اخلاقی تربیت کو بہت زیادہ اہمیت دی گئی ہے اولاد بگڑنے کا ایک سبب یہ بھی ہے کہ اگر بچوں کو بچپن میں اخلاقی تعلیم نہیں دی جاتی تو وہ بڑے ہو کر غلط راستوں پر چل پڑتے ہیں۔ حضرت علی سے روایت ہے کہ نبی کریم ﷺ نے فرمایا کہ جس شخص نے اپنے آپ کو یعنی اپنی بچے کو اچھے اخلاق کی تعلیم دی اس نے اپنے آپ کو بہترین تحفہ دیا۔ یہ حدیث اخلاقی تربیت کی اہمیت کو اجاگر کرتی ہے اور بتاتی ہے کہ والدین کا فرض ہے کہ وہ بچوں کو اچھے اخلاق سکھائیں۔

غصہ اور تشدد کا سامنا کرنا: بچوں کے ساتھ مسلسل تشدد یا غصے کے اظہار سے ان کی ذہنی حالت متاثر ہو سکتی ہے اور یہ ان کے بگڑنے کا ثواب بن سکتی ہے

حضرت محمد ﷺ نے فرمایا: تم میں بہتر وہ ہے جو اپنے اہل و عیال کے ساتھ اچھا سلوک کرتا ہے۔ (ترمذی، 5/475، حدیث: 3921)

غلط رویے کی تشہیر: اگر بچوں کو اپنے غلط رویے پر کوئی روک ٹوک نہ ہو اور ان کی برائیوں کو نظر انداز کیا جائے تو وہ بگڑ سکتے ہیں بچوں کو سکھانا چاہیے کہ وہ غلط کاموں سے بچیں اور اچھا کام کریں۔

اولاد بگڑنے کے اسباب مختلف ہو سکتے ہیں جن میں والدین کا کردار اخلاق کی تربیت معاشرتی اثرات والدین کی غفلت کو نفسیاتی مسائل شامل ہیں اسلام میں والدین کو اولاد کی صحیح تربیت محبت توجہ اور دعاؤں کی اہمیت پر زور دیا گیا ہے تاکہ وہ بگڑنے سے بچ سکیں اور اپنی زندگی میں کامیاب ہوں۔