ہیڈلائنز:شیخ طریقت حضرت مولانا عبدالسلام قادری رحمۃ اللہ علیہ کا سالانہ عرس مبارک، دعوتِ اسلامی کی مجلس مزاراتِ اولیاء اورمجلس رابطہ بالعلماوالمشائخ کے تحت محفلِ نعت کا اہتمام،مبلغِ دعوتِ اسلامی نے خصوصی بیان کیا۔

تفصیلات:

سلسلۂ عالیہ قادریہ رضویہ عطاریہ کے چالیسویں بزرگ شیخِ طریقت حضرت مولانا عبدالسلام قادری رحمۃ اللہ علیہ کا سالانہ عرس مبارک 25محرم الحرام کو نہایت عقیدت واحترام سے منایا جاتا ہے۔ گزشتہ روز دعوتِ اسلامی کی مجلس مزاراتِ اولیاء اورمجلس رابطہ بالعلما والمشائخ کے تحت آپ کا عرس مبارک یوپی ہند کےضلع پرتاب گڑھ میں نہایت مذہبی عقیدت کے ساتھ منایا گیا۔ اس موقع پر ایک محفل نعت منعقد کی گئی جس میں بارگاہِ سرورِ کونین میں نعتوں کا گلدستہ پیش کیا گیا اور سنتوں بھرے بیان کا سلسلہ بھی ہوا جس میں مبلغِ دعوتِ اسلامی نے خصوصی بیان کیا۔ اسلامی بھائیوں نے آپ کے مزار مبارک پر حاضری کا شرف حاصل کیا اور فاتحہ خوانی و دعا بھی کی۔

شیخ طریقت مولانا محمدعبدالسلام قادری کا مختصر تعارف :

آپ رحمۃ اللہ علیہ کا پورا نام خلیفۂ قطبِ مدینہ حضرت مولانا محمد عبد السلا م قادری رضوی حشمتی برکاتی ہے۔ آپ کی ولادت 15شعبان المعظم 1343ھ بمطابق 11مارچ1925ء بروز بدھ کوموضع کڑے مانک پور تحصیل بند کی ضلع فتح پور ہسوہ(یوپی،ہند )میں ہوئی۔آپ رحمۃ اللہ علیہ کی کنیت”ابوالفقراء“لقب”قمر رضا“ہے۔

آپ رحمۃ اللہ علیہ میانہ روی، نظم وضبط ، عزم وحوصلہ،اخلاص، مشقت، قناعت، برد باری و تحمل مزاجی، ظاہری وباطنی ستھرا پن، پُر سکون مزاج، عاجزی وانکساری، خوش کلامی اور اطاعتِ مرشد جیسی کئی صفات کے جامع تھے۔ آپ رحمۃ اللہ علیہ کو سیدی قطبِ مدینہ مولانا ضیاء الدین احمد مدنی اور احسن العلماءحضرت مولاناسید شاہ مصطفےٰ حیدر حسن میاں قادری برکاتی رحمۃ اللہ علیہما سے سندِ خلافت حاصل تھی۔ آپ رحمۃ اللہ علیہ اطاعت مرشد میں اس قدر پختہ تھے کہ بارگاہِ مرشد سے ملنے والے حکم کو اپنے لئے حرزِ جاں بنالیتےچنانچہ کمبھی اہمہ (ضلع پر تاب گڑھ ،ہند) آنےسے قبل احسن العلماءرحمۃ اللہ علیہ نے دو نصیحتیں فرمائی تھی (1)کسی کو بد دعامت دیجئے گا(2)کمبھی اہمہ مت چھوڑئیے گا۔ مرشد کامل کے فرمان کے مطابق آپ رحمۃ اللہ علیہ نے عمر کا بقیہ حصہ بھی یہیں گزرااور اسی جگہ آپ رحمۃ اللہ علیہ کامزار پُرانوار ہے۔

انہوں نے امیر اہلِ سنّت علامہ محمدالیاس عطارقادری دَامَتْ بَرَکَاتُہُمُ الْعَالِیَہ کو 1979ء میں کولمبو سری لنکا میں سلسلہ عالیہ قادریہ رضویہ کی خلافت سے نوازا۔

امیراہلِ سنت شجرہ قادریہ رضویہ عطاریہ میں لکھتے ہیں:

اَحْیِنَا فِی الدِّیْنِ وَالدُّنْیَا سَلَامٌ بِالْسَّلَام

قادِری عبدُ السّلام ِخوش ادا کے واسِطے

دعوت اسلامی کے زیر اہتمام ناروے میں نیکی کی دعوت کا سلسلہ ہوا جس میں مقامی اسلامی بھائیوں نے شرکت کی۔ مبلغ دعوت اسلامی نے واقعہ کربلا کے بعد پیش آنے والے واقعات  بیان کئے اور شرکا کو نیکی کی دعوت دی۔

اسی طرح مسجد الکرم ایمسٹرڈیم ہالینڈ میں نیکی کی دعوت کا سلسلہ ہوا جس میں ترکی، مراکش، سرنامی اور مقامی ڈچ اسلامی نوجوان اسٹوڈنٹس سمیت دیگر اسلامی بھائیوں نے شرکت کی۔ نگران ہالینڈکابینہ نے ڈچ زبان میں اچھی اور بری صحبت کے موضوع پرسنتوں بھرا بیان کیا جبکہ اجتماع کے بعد اسلامی بھائیوں میں مدنی رسائل تقسیم کیے گئے۔شرکا اسلامی بھائیوں نےنماز کی پابندی کرنے، ہفتہ وار اجتماع میں خود بھی شرکت کرنے اور دیگر اسلامی بھائیوں کو بھی اس کی ترغیب دلانے کی نیت کی۔

دوسری جانب پرتگال کے شہر بریرو میں بھی نیکی کی دعوت کا سلسلہ ہوا جس میں مبلغ دعوت اسلامی نے صدقے کے فضائل پر سنتوں بھرا بیان کیا ۔ بیان کے اختتام پر دعوت اسلامی کی تعارفی Documentaryبھی دکھائی گئی۔

عالمی مدنی مرکزفیضان مدینہ کراچی سے بذریعہ ویڈیو کانفرنسنگ   پاک و ہند سے بیرون ملک سفر پر گئے ہوئے مبلغین دعوت اسلامی کا مدنی مشورہ ہوا۔مدنی مشورے میں رکن شوریٰ حاجی مولانا عبدالحبیب عطاری نے ان اسلامی بھائیوں کی رہنمائی فرمائی اور مدنی کاموں کو مزید بہتر کرنے کے حوالے سے ذہن دیا۔ اس موقع پر رکن شوریٰ حاجی محمدامین قافلہ، رکن شوریٰ حاجی محمد علی عطاری اور دیگر ذمہ داربھی موجود تھے۔

دنیا بھر میں مختلف مقامات پر اصلاح معاشرہ و ترویج دین کے لئے سنتوں بھرے اجتماعات منعقد کئے جاتے ہیں۔ اسی تسلسل کو قائم رکھتے ہوئےلاک ڈاؤن کے بعد فرانس، ہالینڈ اور ناروے میں سنتوں بھرے اجتماعات کا انعقاد کیا گیا۔ ان اجتماعات  میں مبلغین دعوت اسلامی نے سیدنا امام حسین رضی اللہ عنہ کی ذوقِ عبادت اور کربلا کا واقعہ کیا درس دیتا ہےکے موضوع پر سنتوں بھرے بیانات کئے۔ ان اجتماعات میں مقامی اور مختلف ممالک کے اسلامی بھائی موجود تھیں۔

عاشقان رسول کی مدنی تحریک دعوت اسلامی کا مدنی پیغام دنیا کے کئی ممالک میں  پہنچ چکا ہے اور الحمدللہ یہ سلسلہ روز بروز بڑھتاہی چلا جارہا ہے۔ نیکی کی دعوت کے ساتھ ساتھ دعوت اسلامی کئی شعبہ جات کے ذریعے دنیا بھر میں دین کی خدمت کرنے میں مصروف ہے۔ دعوت اسلامی کا ایک شعبہ خدام المساجد و المدارس بھی ہے جس کے تحت ہزارہا مساجد تعمیر کی جاچکی ہیں اور مزید یہ سلسلہ جاری و ساری ہے۔

اسی سلسلے کو قائم رکھتے ہوئے افریقی ملک موزمبیق کے سٹی مانگا میں بہار شریعت مسجد کی تعمیرات کا سلسلہ جاری ہے۔ نگران بئیرا زون ودیگر ذمہ داران نے زیر تعمیر مسجد کا وزٹ کیا اور تعمیراتی کا موں کا جائزہ لیتے ہوئےانکی حوصلہ افزائی کی اور مزید تعمیرات کےحوالے سے رہنمائی کی۔

واضح رہے کہ یہ وہ مسجد ہے جس کا سنگ بنیاد جانشین امیر اہلسنت مولاناحاجی عبید رضا عطاری مدنی نے سفر افریقہ کے دوران رکھا تھا۔

زیر تعمیر مسجد بہارشریعت کے اطراف میں ذمہ داران کی کاوشوں سے مختلف مواقع پر نیکی کی دعوت کی بدولت اب تک کم وبیش 132 غیر مسلم اسلام قبول کرچکے ہیں۔ نگران بئیرا زون نےان نو مسلم اسلامی بھائیوں کو مبارک باد دیتے ہوئے انہیں اسلامی معلومات حاصل کرنےاورنمازوں کی پابندی کرنے کی ترغیب دلائی۔

پچھلے دنوں مبلغین دعوت اسلامی  نے نیکی کی دعوت کو عام کرنے کے جذبے کے تحت افریقی ملک ملاوی کے شہر ملانجی پہنچے جہاں انہوں نے سنتِ رسول ﷺ اور امیر اہل سنت دَامَتْ بَرَکَاتُہُمُ الْعَالِیَہ کی تربیت پر عمل کرتے ہوئے حسن اخلاق کے ساتھ مقامی لوگوں سے ملاقات کی اور انہیں نیکی کی دعوت پیش کی۔ مبلغ ِدعوت اسلامی نے دامنِ اسلام سے وابستہ ہونے کے لئے ان پر انفرادی کوشش کی اور سامعین کی جانب سے ہونے والے سوالات کے جوابات ارشاد فرمائے۔ حسنِ اخلاق کےساتھ دیئے گئے جوابات سے متاثر ہوکر سامعین میں سے 30 افراد نے اسلام کی دعوت کو قبول کیا اور کلمہ طیبہ پڑھتے ہوئے دائرہ اسلام میں داخل ہوگئے۔

اس حوالے سے مبلغ دعوت اسلامی محمد عثمان عطاری مدنی کا کہنا تھا کہ ایک بہت ہی بلند چوٹی ملانجی ماونٹن کےنام سے ملاوی میں موجود ہے۔اس مقام پر اسلامی بھائیوں کا سفر ہوا اور مقامی لوگوں میں نیکی کی دعوت پیش کی جس سےمتاثر ہوکر 30 افراد نے اسلام قبول کرلیا۔ مبلغ دعوت اسلامی نے مزید کہا کہ اِنْ شَآءَ اللہ عَزَّ وَجَلَّ دعوت اسلامی کے زیر اہتمام اُس مقام پر نیو مسلم کورس کروایا جائیگا جبکہ اس شہر میں مسجد و مدرسہ کے قیام کے لئے بھر پور کوشش کی جائیگی۔

دعوت اسلامی کی مجلس بیرون ملک کا مدنی مشورہ ہوا جس میں یورپ، افریقہ اور امریکہ سمیت دنیابھر کے ریجن نگران اور اراکین مجلس نے شرکت کی۔ مرکزی مجلس شوریٰ کے رکن حاجی محمد بلال عطاری نے راولپنڈی سے بذریعہ ویڈیو لنک شرکا کی تربیت کی اور مدنی کاموں کے حوالے سے ان اسلامی بھائیوں کی رہنمائی کی۔مدنی مشورے میں انٹر نیشنل لینگویج ڈیپارٹمنٹ قائم کرنے، ائمہ کرام کی تربیتی نشست کروانے ، نئے مقامات پر مدنی کاموں کا آغاز کرنے کے ساتھ ساتھ جامعات، مدارس اور دارالمدینہ قائم کرنے کے متعلق کلام ہوا جبکہ  2026 تک کے اہداف طے کئے گئے۔

دعوت اسلامی کے تحت 22 اگست2020ء کو بذریعہ انٹرنیٹ مدنی مشورہ ہوا جس میں نگران کابینہ جاپان محمد ندیم عطاری اور اراکین کابینہ نے شرکت کی۔ رکن شوریٰ سید لقمان عطاری نے مدنی کاموں کی کارکردگی کا جائزہ لیااور مدنی کاموں کو بڑھانے کے حوالے سے مدنی پھول دیئے۔ رکن شوریٰ نے جاپان میں فیضان مدینہ کے لئے جگہ خریدنےاور مصلے بنانے پر کلام کیا۔ مدنی مشورےمیں  2020ء کے اختتام تک فیضان مدینہ کے لئے ایک جگہ خریدنے اور پانچ مصلے بنانے کے اہداف طے ہوئےجس پر جاپان کے ذمہ داران نے اہداف کو پورا کرنےکی نیتیں بھی کیں۔ اس موقع پر نگران فار ایسٹ ریجن محمد توصیف رضا عطاری بھی موجود تھے۔

دعوت اسلامی کی مجلس خدام المساجد والمدارس بیرون ملک نے یوکے کے شہر ٹیلفورڈ (Telford) میں ایک نئی مسجد ”فیضان رمضان“ کی تعمیر مکمل کرلی۔ 21 اگست 2020ء بمطابق یکم محرم الحرام 1442ھ کو اس مسجد کا افتتاح ہوا۔ مسجد کا افتتاح عاشقان رسول نے نماز جمعہ ادا کرکے کی۔ نماز جمعہ نگران ریجن برمنگھم سید فضیل رضا عطاری کی امامت میں ادا کی گئی۔ نماز جمعہ کے بعد نگران برمنگھم ریجن نے اس مسجد کی تعمیرات کرنے والے اور اس میں حصہ لینے والے مسلمانوں کے لئے دعائیں کیں۔

اس حوالے سے نگران برمنگھم ریجن سید فضیل رضا عطاری کا کہنا تھا کہ اَلْحَمْدُ لِلّٰہِ عَزَّ وَجَلَّ اسلامی سال کے پہلے جمعے کو اس مسجد کا افتتاح کیا گیا۔ نگران ریجن نے مزید کہا کہ یہ عمارت مسجد کے قیام سے پہلے غیر مسلموں کی عبادت گاہ تھی جسے دعوت اسلامی نے خرید کر مسجد میں تبدیل کردیا۔

واضح رہے کہ عالمی وبا کرونا کی صورت میں ہونے والے لاک ڈاؤن کے بعد یوکے میں مساجد کھل چکی ہیں اور Social Distanceکے ساتھ جمعہ کی نماز کی اجازت ہے، اسی حکومتی پالیسی کوFollowکرتے ہوئے یہ سب اہتمام کیا گیا۔

نیکی  کی دعوت ایک ایسا عمل ہے جوکہ گناہوں میں ڈوبے ہوئے لوگوں کوراہ راست پر لانے اورغیرمسلموں کونور ایمان سے منور کرنے کا بہترین انداز ہے۔ کچھ ایسا ہی ہوا افریقی ملک موزمبیق کے شہر ماپوتو میں جہاں مبلغ دعوت اسلامی نے ایک غیر مسلم پر انفرادی کوشش کرتے ہوئے اسے اسلام کی دعوت دیتے رہےاور چند دنوں کی انفرادی کوشش کی بدولت غیرمسلم نے اسلام قبول کرنے کی نیت کا اظہار کیا۔ مبلغ دعوت اسلامی نے انہیں ہاتھوں ہاتھ کلمہ پڑھایااور یوں یہ غیر مسلم دامن اسلام سے وابستہ ہوگئے ان کا اسلامی نام علی حسن رکھا گیا ۔

دعوت اسلامی کے تحت اسپین کے شہر پامپلونا میں قائم ایک اسلامک سینٹر میں مدنی حلقے کا سلسلہ ہوا جس میں پامپلونا کے مقامی ذمہ داران ، اہل علاقہ اور دیگر اسلامی بھائیوں نے شرکت کی۔مبلغین دعوت اسلامی نے ا س مدنی حلقے میں اسلامی بھائیوں کو سنتیں اور دیگر آداب سکھائے اور نیکی کی دعوت دی۔

ساؤتھ کوریا کے شہر تھیگو کے علاقے بُکبُو میں قائم فیضان جمال مصطفیٰ مسجد میں ایک اسلامی بھائی عامر شیخ عطاری کی بھابھی کے ایصال ثواب کیلئے محفل نعت کا انعقاد کیاگیا جس میں  مقامی تاجر، فیکٹری ورکرز اور دیگر شخصیات نے شرکت کی۔ مبلغ دعوت اسلامی نے ” مرنے سے قبل آخرت کی تیاری“ کے موضوع پر سنتوں بھرا بیان کیا جبکہ قرآن خوانی اور فاتحہ خوانی کا سلسلہ بھی ہوا۔

واضح رہے مرحومین کوایصال ثواب کرنا شعائراہلسنت سے ہے اوریہ مستحسن اور اجروثواب کا عمل ہے ۔