ان  دنوں دعوتِ اسلامی کی مرکزی مجلسِ شوریٰ کے رکن حاجی محمد امین قافلہ عطاری دینی کاموں کے سلسلے میں افریقہ کے ملک کینیا کے دورے پر ہیں۔

رکنِ شوریٰ کی آمد پر کینیا کے شہر ممباسا میں ذمہ داران نے مدنی مشورہ منعقد کیا جس میں ممباسا کاؤنٹی کے نگران و ذمہ داراسلامی بھائیوں سمیت کینیا کے ملک نگران عمران نعیم عطاری مدنی بھی موجود تھے ۔

رکنِ شوریٰ حاجی محمد امین قافلہ عطاری نے تمام ذمہ داران کی دینی کام کرنے اور مساجد میں ہونے والے دینی کاموں کو مضبوط کرنے،درسِ فیضان سنت دینے،مدرسۃُ المدینہ بالغان پڑھانے اور مدنی قافلوں میں سفر کرنے کے حوالے سے تربیت فرمائی۔

علاوہ ازیں مدنی مشورے میں کینیا میں دینی کام بڑھانے کے حوالے سے اہم پریزنٹیشن بھی دکھائی گئی۔مزید رکنِ شوریٰ نے ذمہ داران کو اطراف کے شہروں اور ہمسایہ ممالک میں بھی دینی کام شروع کرنے کا ذہن دیا جس پر ذمہ داران نے ایک نئے عزم کے ساتھ دینی کام کرنے کی نیت کا اظہار کیا۔(رپورٹ: شاہد منظورعطاری مدنی، کانٹینٹ:رمضان رضا عطاری)

دنیا بھر میں تعلیمِ قراٰن عام کرنے والی عاشقانِ رسول کی دینی تحریک دعوتِ اسلامی کے تحت مدرسۃ المدینہ بوائز کیمپس سپارک ہل، برمنگھم یوکے (Sparkhill, Birmingham UK) میں ایک تقریب کا انعقاد کیا گیا۔

معلومات کے مطابق اس تقریب میں مدرسۃالمدینہ بوائز کے اسٹوڈنٹس اور اُن کے سرپرستوں سمیت دعوتِ اسلامی کے اہم ذمہ دار اسلامی بھائیوں نے شرکت کی۔

تقریب کا آغاز تلاوتِ قراٰن اور نعت شریف سے کیا گیا جبکہ نگرانِ ویلز UK حاجی سیّد فضیل رضا عطاری نے حاضرین کے درمیان سنتوں بھرا بیان کیا اور اُن کی دینی، اخلاقی اور تنظیمی اعتبار سے تربیت کی۔

افریقی ملک   ایتھوپیا کے سٹی جگجیگا میں دعوت اسلامی کے تحت مدنی مرکز فیضان مدینہ کے سنگ بنیاد کی تقریب کا انعقاد کیا گیا جس میں مرکزی مجلسِ شوریٰ کے نگران مولانا حاجی محمد عمران عطاری نے علمائے کرام اور سادات کرام کے ہمراہ فیضانِ مدینہ کا سنگ بنیاد رکھا اور دعائے خیر کروائی ۔

٭دوسری جانب نگران شوریٰ نے جگجیگا میں ہی مفتی شیخ عبد الفتاح عبد اللہ علی شافعی صاحب سمیت دیگر علمائے کرام سے ملاقات کی۔ دورانِ ملاقات مختلف امور پر گفتگو کا سلسلہ رہا ۔

٭اس کے علاوہ جگجیگا کے مقامی کمیونٹی ہال میں ایک پروگرام کا انعقاد ہوا جس میں مذہبی اُ مور کے مختلف عہدیداران ،شریعہ کورٹ کے جج، مختلف مدارس کے اساتذہ و طلبہ کرام سمیت مقامی صحافی اور عاشقان رسول نے شرکت کی۔

جہاں نگران شوریٰ مولانا محمد عمران عطاری نے سامعین کو دنیا بھر میں ہونے والے دعوت اسلامی کے دینی کاموں کے بارے میں بتایا اور بزرگان دین کی پیروی میں نیکی کی دعوت دینے کے بارے میں آگاہی دی۔ (کانٹینٹ:رمضان رضا عطاری) 

دعوتِ اسلامی کے شعبہ فیضانِ اسلام کے تحت افریقی  ملک ملاوی کے شہر سانجے کے اطراف گاؤں پوٹلا میں ’’ویلکم ٹواسلام‘‘ پروگرام کا انعقاد کیا گیا جس میں ذمہ دارانِ دعوت اسلامی سمیت مقامی کمیونٹی کے افراد نے شرکت کی ۔

سانجے ملاوی میں ہونے والے اجتماع میں نگرانِ ملاوی مشاورت مولانا عثمان عطاری مدنی سمیت دیگر مبلغین دعوتِ اسلامی نےبیانات کئے جن میں اسلام کی اہمیت و افادیت پر گفتگو کرتے ہوئے شرکا کو نیکی کی دعوت دیتے ہوئے قبول اسلام کا ذہن دیا، اجتماع میں موجود 64 لوگوں نے دین اسلام کی تعلیمات سے متاثر ہوکر اسلام قبول کرنے کی نیت کا اظہار کیا جس پر مبلغ دعوت اسلامی نے غیر مسلموں کو کلمہ پڑھاکر دامن اسلام سے وابستہ کیا۔(کانٹینٹ:رمضان رضا عطاری) 

دعوتِ اسلامی کے دینی کاموں کی ترقی اور ملک و بیرونِ ملک میں ہونے والے دینی و فلاحی کاموں کا فالو اپ لینے  کے لئے مرکزی مجلسِ شوریٰ کے رکن حاجی محمد امین عطاری آج مؤرخہ 31 جولائی 2023ء کو سری لنکا کےشہر کولمبو روانہ ہوچکے ہیں۔

معلومات کے مطابق رکنِ مرکزی مجلسِ شوریٰ حاجی محمد امین عطاری کولمبو میں دینی کاموں میں شمولیت کے بعد 02اگست 2023ء بروز بدھ کولمبو سے ساؤتھ کوریا کی جانب روانہ ہوں گے۔

تعلیمِ قراٰن عام کرنے اور عاشقانِ رسول کے بچوں کو حفظِ قراٰن کروانے والی عاشقانِ رسول کی دینی تحریک دعوتِ اسلامی کے تحت مدرسۃ المدینہ کیمپس اسٹچفورڈ، برمنگھم UK میں ایک تقریب کا انعقاد کیا گیا جس میں قراٰنِ پاک حفظ مکمل کرنے والے بچوں اور اُن کے سرپرستوں نے شرکت کی۔

تقریب کا آغاز تلاوتِ قراٰن سے کیا گیا اور نعت خواں اسلامی بھائی نے پیارے آقا مکی مدنی مصطفیٰ صلی اللہ علیہ و سلم کی بارگاہِ اقدس میں نذرانۂ عقیدت پیش کر کے لوگوں کے دلوں کو منور کیا۔

تلاوت و نعت کے بعد نگرانِ ویلز UK سیّد فضیل رضا عطاری نے سنتوں بھرا بیان کیا اور وہاں موجود تمام اسلامی بھائیوں کی دینی و اخلاقی تربیت کی اور انہیں دعوتِ اسلامی کی دینی و فلاحی خدمات سے آگاہ کیا۔

تقریب کے اختتام پر قراٰنِ پاک حفظ کرنے والے اور نمایاں کارکردگی کے حامل بچوں کے درمیان تحائف تقسیم کئے گئے۔اس موقع پر ویسٹ مڈلینڈز UK کے نگران سیّد عمار عطاری بھی موجود تھے۔(کانٹینٹ:غیاث الدین عطاری)

دعوتِ  اسلامی جہاں پاکستان میں لوگوں کے دینی، اخلاقی اور معاشرتی معاملات کے حوالے سے کام کررہی ہے وہیں بیرونِ ملک میں بھی لوگوں کی اصلاح اور اُن کی امداد کے لئے ہر وقت کوشاں ہے۔

تفصیلات کے مطابق ویسٹ مڈلینڈز یوکے میں دینی، فلاحی اور معاشرتی کاموں میں اعلیٰ و نمایاں خدمات سرانجام دینے پر اس سال 2023ء میں مڈلینڈز پولیس اینڈ کرائم کمشنر (Police and crime commissioner)کی جانب سے برمنگھم دعوتِ اسلامی سے تعلق رکھنے والے، نگرانِ ویلز یوکے اور فیضان گلوبل ریلیف فاؤڈیشن برطانیہ کے ہیڈ پاکستانی نژاد سیّد فضیل رضا عطاری کو Outstanding citizen award اور تعریفی اسناد دے کر بہترین شہری ہونے کا اعزاز دیا گیا۔

یہ ایوارڈ ہر سال مڈلینڈز پولیس کی جانب سے ایسے شخص کو دیا جاتا ہے جو اس معاشرے کے لئے قابلِ فخر ہو، اس نے کئی خدمات سرانجام دی ہوں، اُس کا معاشرے میں ایک نمایاں کردار ہو، پھر سروے کر کے ایک کمیٹی لاکھوں افراد میں کسی ایسے شخص کا انتخاب کرتی ہے جو اس معاشرے کا سب سے شاندار شہری ہو۔

ویسٹ مڈلینڈز کے کم و بیش چھ ملین (یعنی 60 لاکھ )افراد میں سے دعوتِ اسلامی کے ذمہ دار اور نگرانِ ویلز یوکے سیّد فضیل رضا عطاری کو یہ ایوارڈ ملنا، نا صرف ہمارے لئے بلکہ ملکِ پاکستان کے لئے فخر کی بات ہے کہ وہاں کی کمیٹی نے ساٹھ لاکھ افراد میں سےاس ایوارڈ کے لئے ایک پاکستانی کا انتخاب کیا۔

اس موقع پر نگرانِ ویلز یوکے سیّد فضیل رضا عطاری نے یہ اعزاز دعوتِ اسلامی کی طرف منسوب کرتے ہوئے کہا کہ اگر دعوتِ اسلامی کا دینی ماحول نہ ہوتا تو یہ ایوارڈ بھی نہ ہوتا۔دعوتِ اسلامی صرف ایک مذہبی تحریک ہی نہیں ہے بلکہ معاشرے کی خرابیوں کو درست کرنے میں بھی اہم کردار ادا کررہی ہے۔

اُن کا مزید کہنا تھا کہ برطانیہ کی جیلوں میں اصلاحی کام، چاقو کے جرائم، صحت و صفائی، منشیات کے خلاف ورکشاپس کا انعقاد، کرونا وائرس کے دوران مثالی کام، شجرکاری جیسی مہم اور اسی طرح کے دیگر پروگرامز کرنا کسی فردِ واحد کا کام نہیں ہے، اس میں دعوتِ اسلامی سے تعلق رکھنے والا ایک ایک فرد شامل ہے۔یہ ایوارڈ اُن کے نام کرتاہوں اور ہماری کوشش ہوگی کہ دنیاوی ایوارڈز کی پرواہ کئے بغیر اسی طرح کے اصلاحی کام جاری رہیں۔(کانٹینٹ:غیاث الدین عطاری)

دعوتِ اسلامی کی مرکزی مجلس شوریٰ کے نگران مولانا حاجی محمد عمران عطاری مُدَّ ظِلُّہُ العالی نیکی کی دعوت کو عام کرنے اور تنظیمی کاموں کا جائزہ لینے کے لئے ان دنوں ساؤتھ افریقہ کے دورے پر ہیں۔

ساؤتھ افریقہ کے مختلف ممالک کا سفر کرتے ہوئے 14 جولائی 2023ء کو نگرانِ شوریٰ مولانا حاجی محمد عمران عطاری، رکنِ شوریٰ مولانا حاجی عبد الحبیب عطاری اور دیگر عاشقان رسول کے ہمراہ ملاوی پہنچے۔

ملاوی (Malawi) پہنچنے پر بلنٹائر (Blantyre) میں 16 جولائی 2023ء کو دعوتِ اسلامی کے زیر اہتمام عظیم الشان سنتوں بھرے اجتماع کا انعقاد کیا گیا جس میں کثیر تعداد میں مسلم اور غیر مسلموں نے شرکت کی۔ نگران شوریٰ مولانا حاجی محمد عمران عطاری مُدَّ ظِلُّہُ العالی نے سنتوں بھرا بیان کیا اور اسلامی تعلیمات کے متعلق معلومات فراہم کرتے ہوئے غیر مسلموں کو اسلام قبول کرنے کی دعوت پیش کی۔

اجتماع کے بعد نیکی کی دعوت اور اسلامی تعلیمات سے متاثر ہوکر 1138 غیر مسلموں نے اسلام قبول کرلیا۔ نگران شوریٰ نے غیر مسلموں کو کلمہ طیبہ پڑھاکر دائرہ اسلام میں داخل کرلیا۔ مبلغین دعوت اسلامی نے نیو مسلمز کے اسلامی نام بھی رکھے جبکہ دعوتِ اسلامی کی جانب سے ان کے لئے عقیدہ توحید و رسالت، نماز، وضو، غسل اور دیگر بنیادی تعلیمات سکھانے کا اہتمام کیا جائیگا۔

خوشی کے اس موقع مفتی عبد النبی حمیدی مُدَّ ظِلُّہُ العالی ، رکنِ شوریٰ مولانا حاجی عبد الحبیب عطاری، نگران ملاوی مولانا محمد عثمان عطاری مدنی اور دعوت اسلامی کے دیگر ذمہ داران بھی موجود تھے۔

مبلغین دعوتِ اسلامی کی انفرادی کوشش و نیکی کی دعوت کی بدولت عاشقانِ رسول کی دینی تحریک دعوت اسلامی کے تحت ملک و بیرون ملک لوگ گناہوں بھرے ماحول سے دوری اختیار کرکے عاشقانِ رسول کی صحبت پاتے ہیں۔ اسی وجہ سے شعبہ فیضانِ اسلام کے تحت آئے دن مدنی بہار دیکھنے میں آتی ہے۔

ایسا ہی ایک خوشی کا واقعہ اُس وقت پیش آیا جب نگرانِ شوریٰ مولانا حاجی محمد عمران عطاری مُدَّ ظِلُّہُ العالی ، مفتی عبد النبی حمیدی عطاری مُدَّ ظِلُّہُ العالی اور رکنِ شوریٰ مولانا حاجی عبد الحبیب عطاری گیبرون بوٹسوانا (Gaborone Botswana)میں منعقدہ سنتوں بھرے اجتماع میں شرکت کرکے ساؤتھ افریقہ (South Africa) واپس تشریف لارہے تھے۔رستے میں نگرانِ شوریٰ اور مفتی عبد النبی صاحب نے دوغیر مسلموں پر انفرادی کوشش کرتے ہوئے انہیں اسلام کی دعوت پیش کی۔ نیکی کی دعوت کی برکت سے دونوں غیر مسلم اسلام کی دعوت کو قبول کرتے ہوئے دائرہ اسلام میں داخل ہوگئے۔ نگران شوریٰ اور مفتی عبد النبی حمیدی صاحب نے انہیں کلمہ طیبہ پڑھایا اور سابقہ مذہب سے توبہ کروائی۔ دونوں نیو مسلم میں سے ایک کا نام محمد عمران اور دوسرے کا عبد الحبیب رکھا گیا۔

پچھلے دنوں دعوتِ اسلامی کے زیر اہتمام ایمسٹرڈیم (Amsterdam) کی مسجد فرید الاسلام میں ماہانہ تعلیمی سیشن کا انعقاد کیا گیا جس میں مقامی عاشقان رسول نے شرکت کی۔

مبلغ دعوتِ اسلامی نے سنتوں بھرا بیان کیا اور شرکا کو وضو، غسل اور نماز کے مسائل بتاتے ہوئے انہیں دینی ماحول سے وابستہ ہونے کی ترغیب دلائی ۔

دعوت اسلامی کے زیر اہتمام 11 جولائی 2023ء کو مدنی مرکز فیضان مدینہ روٹر ڈیم (Rotterdam) میں تربیتی سیشن اور میٹنگ کا سلسلہ ہوا جس میں مقامی ذمہ داران نے شرکت کی۔

نگرانِ یورپ اُسید رضا عطاری نے 12 دینی کاموں کو فروغ دینے کے حوالے سے شرکا کی تربیت کی اور دینی کاموں میں بڑھ چڑھ حصہ لینے کا ذہن دیا۔

عاشقانِ رسول کی دینی تحریک دعوت ِاسلامی کے تحت افریقی ملک بوٹسوانا کے سٹی گیبرون میں سنتوں بھرے اجتماع کا انعقاد کیا گیا جس میں بوٹسوانا  اور اس کے اطراف مختلف شعبہ ہائے زندگی سے تعلق رکھنے افراد بالخصوص بزنس کمیونٹی سے وابستہ عاشقانِ رسول نے شرکت کی۔

سنتوں بھرے اجتماع میں رکنِ شوری مولانا حاجی عبدالحبیب عطاری نے درودِ پاک کی فضلیت بیان کرتے ہوئے بارگاہ رسالت میں ہدیہ نعت پیش کی جبکہ سنتوں بھرے اجتماع میں دعوتِ اسلامی کی مرکزی مجلسِ شوریٰ کے نگران مولانا مولانا حاجی محمد عمران عطاری نے سنتوں بھرا بیان کیا اور اپنی اولاد کی دینی ماحول کے مطابق تربیت کرنے اور ایمان کی حفاظت کرنے کی ترغیب دی،دورانِ بیان نگران شوریٰ نے مسلمانوں کو تکالیف پہنچانے اور اسکی غیبت کرنے سے بچنے کا بھی ذہن دیا۔

نگران شوریٰ کا کہنا تھا کہ جنت میں صرف وہی جائے گا جو دنیا سے ایمان سلامت لے کر گیا، جو اپنا ایمان ضائع کر بیٹھا اس کے لئے جنت نہیں بلکہ وہ ہمیشہ ہمیشہ کے لئے جہنم میں رہے گا۔ شیطان تو پوری کوشش کرتا ہے کہ کسی طرح مسلمان کا ایمان برباد کرے جبکہ ہماری توجہ یہ ہونی چاہئے کہ ہم اپنا ایمان سلامت لیکر دنیا سے جائیں۔