8 فروری 2023ء کو نگران شوریٰ مولانا حاجی محمد عمران عطاری مُدَّ ظِلُّہُ العالی نے دورۂ انڈونیشیا (Indonesia) کے دوران بندہ آچے (Banda Aceh) میں قائم دار العلوم استقامۃ الدین دار المعارف کا وزٹ کیا جہاں حضرت مولانا شیخ ابو محمد بن زمزی رحمۃُ اللہِ علیہ کے عرس شریف میں شرکت کی اور مزار شریف پر حاضری دی۔ نگران شوریٰ نے صاحبِ مزارکے لئے فاتحہ خوانی اور دعائیں کیں۔

نگران شوریٰ نے دار العلوم میں صاحب مزار کے صاحبزادے مولانا ابو محمداً صاحب سے ملاقات کی اور مختلف امور پر تبادلۂ خیال ہوا۔ اس کے علاوہ نگران شوریٰ نے دار العلوم میں علمائے کرام، طلبہ اور دیگر عاشقان رسول سے ملاقات بھی کی۔

اس موقع پر نگران انڈونیشیا ریجن مولانا غلام یٰسین عطاری مدنی اور نگران ویلز یوکے حاجی سید فضیل رضا عطاری بھی موجود تھے۔

12 فروری 2023ء کو اسپیشل پرسنز ڈیپارٹمنٹ اوورسیز (دعوت اسلامی )کے تحت دینی کاموں کے سلسلے میں اسپیشل پرسنز کے ذمہ دار محمد حنیف عطاری(پاکستان)  نے بیرون ملک کینیا اور یوگینڈا کا سفر کیا ۔

اس سفر کے دوران محمد حنیف عطاری نے کینیا کے ذمہ داران اور وہاں کے باشندوں سے ملاقات کی اور وہاں نیکی کی دعوت پیش کرتے ہوئے دعوت اسلامی کے ماحول سے وابستہ رہنے اور اجتماعات و مدنی مذاکروں میں شرکت کرتے رہنے کا ذہن دیا ۔

جبکہ اس موقع پر ایک غیر مسلم کو کلمہ پڑھا کر مسلمان کیا اور اسے دین اسلام کی بنیادی معلومات فراہم کیں۔ (رپورٹ: محمد رضوان عطاری مدنی (اسپیشل پرسنز ڈیپارٹمنٹ پاکستان آفس )/ کانٹینٹ : محمد مصطفیٰ انیس)

انڈونیشیا (Indonesia) کے سٹی بندہ آچے (Banda Aceh) میں 7 فروری 2023ء کو دعوت اسلامی کے پہلے مدنی مرکز فیضان مدینہ کے قیام کے لئے سنگ ِبنیاد رکھ دیا گیا۔ فیضان مدینہ کا سنگِ بنیاد پاکستان سے تشریف لائے ہوئے مرکزی مجلس شوریٰ کے نگران مولانا حاجی محمد عمران عطاری مُدَّ ظِلُّہُ العالی اور مقامی ذمہ داران اور انڈونیشیا کے اسلامی بھائیوں نے درود وسلام کی صداؤں میں اینٹیں رکھ کر کیا۔

اس موقع پر ایک تقریب کا انعقاد کیا گیا جس میں انڈونیشیا کے علمائے کرام اور مختلف شعبہ ہائے زندگی سے وابستہ افراد و عاشقان رسول سمیت ذمہ داران دعوت اسلامی نے شرکت کی۔ تقریب کا آغاز تلاوت قرآن پاک سے کیا گیا اور عربی میں نعت شریف بھی پڑھی گئی۔ نگران شوریٰ مولانا حاجی محمد عمران عطاری مُدَّ ظِلُّہُ العالی نے سنتوں بھرا بیان کرتے ہوئے کہا کہ دنیا کا بدترین حصہ وہ ہے جہاں بازار ہوتے ہیں اور بہترین جگہ وہ ہے جہاں مسجد ہوتی ہے، بحیثیت مسلمان ہماری خواہش ہونی چاہیئے کہ ہمارا بچہ بچہ نمازی بن جائے۔

نگران انڈونیشیا ریجن مولانا غلام یٰسین عطاری مدنی نے مقامی زبان میں نگران شوریٰ کے بیان کا خلاصہ بتایا۔ اس کے علاوہ اس موقع پر نگران ویلز یوکے حاجی سید فضیل رضا عطاری بھی موجود تھے۔

اسی طرح نگران شوریٰ نے ذمہ داران دعوت اسلامی اور مقامی عاشقان رسول کے ہمراہ بندہ آچے (Banda Aceh) کی تاریخی اور سب سے بڑی مسجد بیت الرحمن میں بھی حاضری دی ۔

دعوتِ اسلامی کی مرکزی مجلس شوریٰ کے رکن حاجی محمد عقیل عطاری مدنی نے10فروری 2023ء  کو فیضانِ مدینہ جیکب آباد سندھ میں احکامِ مسجد کورس کروایا۔

مسجد انتظامیہ کے افراد،مقامی ذمہ داران و ائمہ مساجد نے شرکت کی۔

رکنِ شوریٰ نے دورانِ کورس چندہ،وقف،مسجد کے آداب و احکام کے موضوعات پر اسلامی بھائیوں کی تربیت فرمائی جس میں چندہ جمع کرنے اور خرچ کرنے کی احتیاطیں بیان کیں نیز وقف کی اشیا کے احکام اور اسکے تحفظ کا طریقہ کار سمجھایا۔(رپورٹ : محمد عابد عطاری مدنی، معاون رکن شوری، کانٹینٹ: رمضان رضا عطاری)

10 فروری 2023ء بروز جمعۃ المبارک جامعۃُ المدینہ بوائز فیضانِ عطار سخی حسن میں شعبہ کفن دفن دعوتِ اسلامی کی جانب سے تدفین کورس کا اہتمام کیا گیا جس میں اساتذہ وطلبہ ٔکرام نے شرکت کی۔

ایسٹ ڈسٹرکٹ ذمہ دار محمد عزیر عطاری نے’’ غسلِ میت دینے کی فضیلت‘‘ کے موضوع پرسنتوں بھرابیان کیا اور طلبہ کو غسلِ میت دینے کا طریقہ سمجھاتے ہوئے کفن کاٹنے/ پہنانے کا طریقہ سکھایا۔ اس کے علاوہ نمازِ جنازہ پڑھنے کا طریقہ اور تدفین کرنے سے متعلق شرعی مسائل بتائے۔( کانٹینٹ: رمضان رضا عطاری)

خیر خواہی اُمّت کا جذبہ  رکھنے والی عاشقانِ رسول کی دینی تحریک دعوتِ اسلامی کے شعبہ کفن دفن کی جانب سے 10 فروری 2023ء کو جی الیون اسلام آباد میں کفن دفن پریکٹیکل کورس کا انعقاد ہوا جس میں امامت کورس کے طلبہ نے شرکت کی ۔

شعبہ کفن دفن کے صوبائی ذمہ دار اسلامی بھائی نے شرکا کو غسلِ میت دینے کی فضیلت و اہمیت بیان کرتے ہوئے انہیں نمازِ جنازہ پڑھنے کا طریقہ سکھایا۔

اس کے علاوہ کورس میں شریک اسلامی بھائیوں کو غسلِ میت دینے، کفن کاٹنے اور پہنانے کا عملی طریقہ بھی سمجھایا نیز اس سے متعلق چند ضروری شرعی مسائل بتائے۔ (رپورٹ: زون ذمہ دار مزّمل عطاری ، کانٹینٹ: رمضان رضا عطاری)

عاشقان ِرسول کی دینی تحریک دعوتِ اسلامی کے شعبہ  خدام المساجد والمدارس کے زیرِ اہتمام پشاور میں مدنی مشورہ ہوا جس میں صوبہ خیبرپختونخوا کے ڈویژن ذمہ داران نے شرکت کی۔

معاون نگرانِ مجلس خدام المساجد والمدارس عبدُالسمیع عطاری مدنی نے اسلامی بھائیوں کی تربیت کرتے ہوئے انہیں رمضان ڈونیشن جمع کرنے کاذہن دیا اور اس سلسلے میں اہداف بھی دیئے جس پر حاضرین نے بھر پور کوشش کرنے کی اچھی نیت کا اظہار کیا۔ اس موقع پر صوبائی نگران سمیت پشاور ڈویژن و ڈسٹرکٹ کے ذمہ داران بھی موجود تھے۔(رپورٹ: شعبہ خدام المساجد والمدارس کے پی کے، کانٹینٹ: رمضان رضا عطاری)

دعوتِ اسلامی کے شعبہ تحفظ اوراق مقدسہ کی جانب سے 8 فروری  2023ء کو صوبائی ذمہ دار اور ڈویژن ذمہ دار نے چشتیاں شریف میں قائم اوراقِ مقدسہ کے اسٹور و کارخانے کا دورہ کیا ۔

جہاں صوبائی ذمہ دار حاجی رضا عطاری کو بہاولنگر ڈسٹرکٹ کے ذمہ داران نے اوراق مقدسہ کے اسٹور اور کارخانےکا وزٹ کروایا اور یہاں ہونے والے دینی کاموں کے بارے میں آگاہ کیاجس پر حاجی رضا عطاری نے اسلامی بھائیوں کی حوصلہ افزائی کرتے ہوئے انہیں مقدس اوراق کو باادب طریقے سے جمع کرنے نیز تحفظ اوراق مقدسہ کے لئے نئے باکسز بنانے اور لگانے کے حوالے سے تربیت کی جس پر اسلامی بھائیوں نے اچھی اچھی نیتیں کیں۔ (رپورٹ : بلال مدنی ڈویژن شعبہ تحفظ اوراق مقدسہ بہاولپور ڈویژن دار ، کانٹینٹ: رمضان رضا عطاری)

9 فروری 2023ء بروز جمعرات سیال شریف میں حضرت غازی مخدوم محمد عبدُ العزیز چشتی نظامی سیالوی علیہ الرحمہ کے سالانہ عرس کے موقع پر قرآن خوانی کا اہتمام کیا گیا۔

اس موقع پر مزار شریف پر مدرسۃُ المدینہ کے بچوں نے قرآن خوانی کی۔ بعدازاں زائرین کے درمیان سیکھنے سکھانے کا حلقہ منعقد کیا گیا جس میں مبلغِ دعوتِ اسلامی نے شرکا کو مزار شریف پر حاضری دینے کے آداب بیان کئےاور انہیں ہفتہ وار اجتماع میں شرکت کرنے کی دعوت دی ۔ (کانٹینٹ: رمضان رضا عطاری)

اسپیشل پرسنز  ڈیپارٹمنٹ دعوتِ اسلامی کے تحت 10 فروری 2023ء کوپشاور کے علاقے چمکنی میں سیکھنے سکھانے کا حلقہ لگایا گیا جس میں گونگے بہرے اسلامی بھائیوں نے شرکت کی۔

ڈویژن ذمہ دار ہدایتُ اللہ خان عطاری نے گونگے بہرے(ڈیف) اسلامی بھائیوں میں ’’ والدین کے حقوق ‘‘کے موضوع پر سنتوں بھرا بیان کیا اور دورانِ بیان والدین کی خدمت کرنے پر حاضرین کی ذہن سازی کی۔

آخر میں شرکا کومدنی قافلے میں سفر کرنے ، ہفتہ وار اجتماع میں شرکت کرنے اور مدنی مذاکرہ دیکھتے رہنے کی ترغیب دلائی جس پر انہوں نے اچھی اچھی نیتوں کا اظہار کیا۔ (رپورٹ : محمد رضوان عطاری مدنی اسپیشل پرسنز ڈیپارٹمنٹ پاکستان آفس، کانٹینٹ: رمضان رضا عطاری)

دنیا بھر میں تبلیغِ دین کا جذبہ رکھنے والی عاشقانِ رسول کی دینی تحریک دعوتِ اسلامی کے تحت پچھلے دنوں شعبہ رابطہ برائے شخصیات کے ذمہ داران نے DSP صدر سرکل ریڈر آفس کا دورہ کیا۔

اس موقع پر ذمہ دار اسلامی بھائیوں نے وہاں موجود افسران سے ملاقات کی اور انہیں دعوتِ اسلامی کے شعبہ جات کا تعارف نیز ان شعبہ جات کے ذریعے دنیا بھر میں ہونے والے دینی کاموں کے بارے میں بتایا۔

بعدازاں ذمہ دار اسلامی بھائیوں نے افسران کو دعوتِ اسلامی کے کُتُب و رسائل تحفے میں پیش کئے جس پر انہوں نے خوشی کا اظہار کیا۔(رپورٹ: شعبہ رابطہ برائے شخصیات ، کانٹینٹ:غیاث الدین عطاری) 

دعوتِ اسلامی کے تحت پچھلے دنوں ذمہ دار اسلامی بھائیوں نے  صوبہ خیبرپختونخوا کے پشاور ڈویژن میں جیل خانہ جات پریزن ہوم ڈیپارٹمنٹ کے آڈیشنل آئی جی محمد ماجد، ہوم ڈیپارٹمنٹ پریزن سیکرٹری تنویر چترالی، ایڈیشنل آئی جی حامد خان اور پرسنل اسسٹنٹ پریزن سیکرٹری فہد خان سے ملاقات کی۔

دورانِ ملاقات ذمہ دار اسلامی بھائیوں نے آفیسرز کو نیکی کی دعوت دیتے ہوئے انہیں دعوتِ اسلامی کے مختلف شعبہ جات کا تعارف کروایا اور دینی ماحول سے منسلک ہونے کا ذہن دیا۔(رپورٹ: شعبہ رابطہ برائے شخصیات ، کانٹینٹ:غیاث الدین عطاری)