دعوتِ اسلامی کی مجلس حج و عمرہ کے زیر انتظام جامع مسجد انوار مدینہ فتح جنگ میں مستقل عمرہ تربیت گاہ قائم ہے جس میں ہر جمعہ کو نماز جمعہ کے بعد عمرہ تربیتی نششت ہوتی ہے اس جمعہ کی تربیتی نششت میں عازمین عمرہ کو احرام کا طریقہ،مسائل،عمرے کے احکام اور مکے مدینے کی حاضری کے آداب سکھائےگئے۔(رپورٹ: مجلس حج و عمرہ ، کانٹینٹ:رمضان رضا عطاری)

دعوت  اسلامی کے زیر اہتمام خیبر پختونخواہ میں وقار احمد عطاری مدنی نے ڈسٹرکٹ اپر دیر کے ڈی پی او طارق سہیل مروت سے ملاقات کی اور دعوت اسلامی کے مختلف شعبہ جات کا تعارف کروایا ۔ آخر میں انہیں مکتبہ المدینہ کی کتاب تحفے میں پیش کی۔(رپورٹ: وقار احمد مدنی عطاری ، کانٹینٹ:رمضان رضا عطاری)

24 اگست 2022ء  کو کورنگی ٹاؤن مشاورت کے ذمہ داران نے ڈی ایم سی کورنگی کا وزٹ کیا جہاں انہوں نے صولڈ ویسٹ ڈیپارٹمنٹ کے افسران سے ملاقات کی۔

دوران ملاقات ہفتہ وار اجتماع رضائے مصطفے مسجد کورنگی کے اطراف میں صفائی ستھرائی کے حوالے سے میٹنگ ہوئی نیز k.m.c بلڈنگ میں دعوت اسلامی کے تحت مسجد دیار رضا میں مدرسہ المدینہ بالغان لگانے کے حوالے سےگفتگو ہوئی جس پر افسران نے خود مدرسہ بالغان پڑھنے اور لگانے کی خواہش کا اظہار کیا۔

دوسری جانب نیکی کی دعوت کے سلسلے میں ڈائریکٹر صولڈ ویسٹ سلیم رضا ، ڈپٹی ڈائریکٹر صولڈ ویسٹ کورنگی یونس خان، ڈپٹی ڈائریکٹر صولڈ ویسٹ ظفر خان، ڈپٹی ڈائریکٹر وہیکل عرفان احمد، ڈپٹی ڈائریکٹر وہیکل راشد خان اور ان کے دیگر اسٹاف سے ملاقاتیں ہوئیں ۔ (رپورٹ: غلام محبوب عطاری ڈسٹرکٹ کورنگی ، کانٹینٹ:رمضان رضا عطاری)

دعوت  اسلامی کے زیر اہتمام گزشتہ روز شعبہ رابطہ برائے شخصیات کے ذمہ داران نے بنوں میں کمشنر مطیع اللہ ،MS ڈی ایچ کیو ہسپتال بسم اللہ جان اور سیکرٹری نوراللہ امین سے ملاقات کی۔

تفصیلات کے مطابق ذمہ داران نے شخصیات کو ملک و بیرون ملک میں ہونے والی دعوت اسلامی کی دینی خدمات پر بریفنگ دیتے ہوئے FGRF پلانٹیشن کے حوالے سے بتایا اور انہیں مدنی مرکز فیضان مدینہ وزٹ کی دعوت دی جس پر شخصیات نے اچھے جذبات کا اظہار کیا۔ آخر میں ذمہ داران نے انہیں مکتبۃ المدینہ کے مطبوعہ رسائل پیش کئے۔ (رپورٹ:شعبہ رابطہ برائے شخصیات، کانٹینٹ:رمضان رضا عطاری)

41 سالوں سے رنگ و نسل میں بلا تفریق احیائے سنت اور دین اسلام کی تبلیغ کو عام کرنے والی عاشقان رسول کی دینی تحریک دعوتِ اسلامی کے زیرِ اہتمام آج رات دنیا بھر میں  ہفتہ وار سنتوں بھرے اجتماعات کا انعقاد کیا جائیگا جن میں مبلغین دعوت اسلامی اور اراکین شوریٰ سنتوں بھرے بیانات فرمائیں گے۔ان اجتماعات میں نعت رسول مقبول، ذِکرُ اللہ اور رقت انگیز دعاؤں کا سلسلہ بھی ہوگا۔

تفصیلات کے مطابق مدنی مرکز فیضان مدینہ نارووال، ظفر وال روڈ میں مرکزی مجلس شوریٰ کے رکن حاجی محمد اظہر عطاری سنتوں بھرا بیان فرمائیں گے جسے مدنی چینل پر براہ راست نشر کیا جائیگا۔

اس کے علاوہ جامع مسجد فیضان جیلان بلاک8، کلفٹن کراچی میں رکن شوریٰ حاجی مولانا عبد الحبیب عطاری،نورانی مسجدماڈل ٹاؤن کراچی میں رکن شوریٰ حاجی ابو ماجد مولانا محمد شاہد عطاری مدنی، رضائے مصطفٰے مسجد کورنگی نمبر 4 میں رکن شوریٰ حاجی فضیل عطاری اور مدنی مرکز فیضان مدینہ مرضی پورہ، گلی نمبر 1 بورے والا میں نگران شعبہ پروفیشنلز و موٹیویشنل اسپیکر محمد ثوبان عطاری سنتوں بھرا بیان فرمائیں گے۔

تمام عاشقان رسول سے اپنے اپنے علاقے میں ہونے والے ہفتہ وار اجتماع میں شرکت کرنے کی درخواست ہے۔

دنیا بھرکے  مسلمانوں کو اسلامی تعلیمات اور بزرگانِ دین کی سیرتِ طیبہ سے آگاہ کرنےکے لئے عاشقانِ رسول کی دینی تحریک دعوتِ اسلامی کے زیرِا ہتمام مختلف پروگرامز کا انعقاد کیا جاتا ہے۔

اسی سلسلے میں پچھلے دنوں یورپی ملک سویڈن کے شہرمالمو میں محرم الحرام کی مناسبت سے خصوصی پروگرام بنام ” ہم کربلا سے کیا سیکھا“ کا اہتمام کیا گیا جس میں کاروباری، تعلیمی اور سرکاری و سیاسی شعبہ جات سے تعلق رکھنے والےکثیر لوگوں نے شرکت کی جن میں بالخصوص سویڈن کی سیاسی شخصیت زبیر حسین بھی شامل تھے۔

اس پروگرام میں یورپی یونین ریجن کے نگران مولانا اسید رضا عطاری نے سنتوں بھرا بیان کرتے ہوئے کربلا کے واقعے سےحاصل ہونے والے سبق اور اس کے فلسفۂ پر روشنی ڈالی۔

اس کے علاوہ مبلغِ دعوتِ اسلامی نے شرکا کو حضرت سیّدنا امام حسین رضی اللہ عنہ اور ان کے رفقاء کے نقش و قدم پر چلنے کا ذہن دیا نیز دعوتِ اسلامی کے دینی کاموں میں عملی طور پر حصہ لینے کی ترغیب دلائی۔ (رپورٹ:محمد رضوان حسین عطاری رکن یورپی یونین ریجن، کانٹینٹ:غیاث الدین عطاری)

اَلْحَمْدُ لِلہِ رَبِّ الْعٰلَمِیْنَ وَالصَّـلٰوةُ وَالسَّـلَامُ عَلٰی سَیِّدِالْمُرْسَـلِیْن ^ط

اَمَّا بَعْدُ فَاَعُوْذُ بِاللہِ مِنَ الشَّیْطٰنِ الرَّجِیْم ^ط بِسْمِ اللہِ الرَّحْمٰنِ الرَّحِیْم ^ط

دُرود شریف کی فضیلت

حضرت علامہ مَجدُالدّین فیروز آبادی رحمۃُ اللہِ علیہ سے منقول ہے :جب کسی مجلس میں (یعنی لوگوں میں)بیٹھواورکہو: بِسْمِ اللہِ الرَّحْمٰنِ الرَّحِيْمِ وَصَلَّی اللہُ عَلٰی مُحَمَّد تو اللہ پاک تم پر ایک فِرِشتہ مقرّر فرمادے گا جو تم کو غیبت سے بازرکھے گا۔اور جب مجلس سے اُٹھو تو کہو: بِسْمِ اللہِ الرَّحْمٰنِ الرَّحِيْمِ وَصَلَّی اللہُ عَلٰی مُحَمَّد تو فِرِشتہ لوگوں کو تمہاری غیبت کرنے سے بازرکھے گا ۔ ⁽[1]⁾

صَلُّوا عَلَی الْحَبِیب _ _صَلَّی اللهُ علٰی مُحَمَّد

امام المحدثین کی سند مؤطاامام مالک

امام المحدثین مفتی سید محمددیدارعلی شاہ رحمۃ اللہ علیہ جیدعالم دین،محدث وقت مُسنِد اور استاذالعلما تھے،آپ نے اکابرعلمائے اہل سنت سے خوب استفادہ کیا،عالی اسنادحاصل کیں اوراشاعت علوم وفنون میں مصروف ہوگئے،پھر وہ وقت بھی آیا کہ آپ کا شماربھی اکابرعلمائے اہل سنت میں ہونے لگا، راقم آپ کی اسانیداحادیث میں سب سے پہلے تعارف مؤطاامام مالک پھر امام المحدثین کی سند مؤطاامام مالک اوراس کے شیوخ کا تذکرہ کرے گا ۔

مؤطاامام مالک کاتعارف

مختلف ادوار میں احادیث کی مختلف کتابیں مرتب ومدون کی گئیں لیکن امام مذہب مالکیہ، عالم مدینہ حضرتِ سیِّدنا امام مالِک بن انس رحمۃ اللہ علیہ(ولادت: 93ھ،وفات: 179ھ )کا مجموعۂ احادیث بنام ’’مؤطا امام مالک ‘‘ کو سلسلہ تدوین ِحدیث میں اوّلین کتاب ہونے کا اعزاز حاصل ہے جمہور علما نے مؤطاامام مالک کو طبقات کتب حدیث میں طبقہ اولیٰ میں شمار کیاہے۔ امام شافعی رحمۃ اللہ علیہ فرماتے ہیں:’’ ما نعرف کتابا فی الاسلام بعد کتاب اللہ عزوجل اصح من موطأ مالک۔ یعنی میں اسلام میں کتاب اللہ کے بعد موطأامام مالک سے زیادہ کوئی صحیح کتاب کونہیں جانتا۔⁽[2]⁾ علما فرماتے ہیں کہ امام شافعی رحمۃ اللہ علیہ کا یہ قول صحیح بخاری اورصحیح مسلم کے وجودسے پہلے کا ہے،کیونکہ اس بات پر تمام امت کا اتفاق ہے کہ صحیح بخاری اورصحیح مسلم کتاب اللہ قرآن مجیدکے بعد صحیح ترین کتب ہیں،لیکن امام شافعی کےقول سے مؤطاامام امالک کی ثقاہت واہمیت کا اندازالگایا جاسکتاہے۔

امام المحدثین کی سند مؤطاامام مالک

امام المحدثین مفتی سیدمحمد دیدارعلی شاہ محدث الوری رحمۃ اللہ علیہ نے مؤطا امام مالک شیخ المشائخ علامہ فضل حق گنج مرادآبادی رحمۃ اللہ علیہ سے پڑھ کراجازت حاصل کی اورانھوں نےسراج الہند علامہ شاہ عبدالعزیزمحدث دہلوی رحمۃ اللہ علیہ سے⁽[3]⁾ اسی طرح امام المحدثین مفتی سیدمحمددیدارعلی شاہ صاحب نے ذوالحجہ 1337ھ کو اعلیٰ حضرت امام احمدرضا خان رحمۃ اللہ علیہ سے جملہ اجازات واسانیدحاصل کیں،( مقدمہ مِیزانُ الادیان بتفسیرالقرآن، ص،80) اور اعلیٰ حضرت نے اپنے مرشد حضرت شاہ آل رسول مارہروی سے اورانھوں نے سراج الہندعلامہ شاہ عبدالعزیز سے اورسراج الہندتحریرفرماتے ہیں:

کتاب مؤطاکو والد ماجد (شاہ ولی اللہ محدث دہلوی)نے شیخ محمد وفد اللہ مکی پر بالتمام پیش کیا اور انہوں نے اپنے باپ شیخ محمد بن محمد بن سلیمان([4] )پر اور سند شیخ ابن سلیمان کی کتاب صلۃ الخلف([5] ) میں مذکور ہے۔ نیز شیخ محمد وفد اللہ نے اس کتاب کو شیخ حسن عجیمی سے حاصل کیا اور شیخ عبداللہ بن سالم بصری سے بھی اور ان دونوں بزرگوں نے شیخ مغربی سے اور انہوں نے شیخ سلطان محمد بن احمد مزّاحی([6] )سے (اور مزّاحہ تشدید زا سے دیہات متعلقہ مصر کے ایک گاؤں کا نام ہے) اور شیخ سلطان نے شیخ احمد بن خلیل سبکی سے (سبکہ مصر میں ایک گاؤں ہے) اور انہوں نے شیخ محمد نجم الدین بن احمد غیطی سے (غیطہ بھی مصر میں ایک گاؤں ہے) اور انہوں نے شیخ شرف الدین عبد الحق بن محمد السنباطی سے اور انہوں نے شیخ ابو محمد حسن بن محمد بن ایوب الحسنی اعلم علم الانساب سے اور انہوں نے اپنے چچا شیخ حسن بن محمدبن حسن نسابہ ( [7])سے اور انہوں نے ابو عبداللہ محمد بن جابر الوادی آشی([8] )سے (وادی آش دیار مغرب میں ایک شہر کا نام ہے([9]) انہوں نے شیخ ابو محمد عبداللہ بن محمد بن ہارون قرطبی سے (قرطبہ قاف مضموم اور طائے مہملہ اور بائے موحدہ سے اندلس میں ایک شہر ہے) اور انہوں نے قاضی ابو القاسم شیخ احمد بن یزید قرطبی سے اور انہوں نے شیخ محمد بن عبدالحق بن احمد بن عبدالرحمن ([10]) الخزرجى([11]) القرطبی سے اور انہوں نے شیخ محمد بن فرج([12]) مولی ابن الطلاع([13]) سے اور انہوں نے قاضی ابوالولید یونس بن عبد اللہ بن مغیث الصغار سے اور انہوں نے ابو عیسیٰ ىحىیٰ بن عبداللہ بن یحییٰ بن یحییٰ سے اور انہوں نے اپنے باپ کے چچا عبید اللہ بن یحییٰ سے اور انہوں نے اپنے باپ یحییٰ بن یحییٰ مصمودی اندلسی سے، جو حضرت امام مالک کے جلیل القدر شاگردوں سے تھے اور دیار مغرب میں ان کے مذہب کے رواج پانے کا باعث وہی ہیں اور یحییٰ بن یحییٰ نے امام مالک سے اس کتاب کو حاصل کیا اور یہ نسخہ مؤطا کا انہی سے مروی ہے۔ (مصمودہ دیار مغرب میں قوم بربرکے ایک قبیلہ کا نام ہے) اور اس کتاب کی سند ہذا کے علاوہ اور بہتیری سند یں ہیں جو کتاب الارشاد الی مہمات الاسناد ([14])میں مذکور ہیں لیکن یہ سند سماع اور قرأت میں مسلسل ہے، بخلاف دو سری سندات کے کہ ان میں اکثر مقامات پر محض اجازت پر اکتفا کیا گیا ہے۔([15]) الحاصل امام المحدثین مفتی سیدمحمددیدارعلی شاہ محدث الوری رحمۃ اللہ علیہ کی سند امام مالک 26واسطوں سے نبی پاک صلی اللہ علیہ والہ وسلم سے مل جاتی ہے ۔

سندِمؤطاامام مالک کےراویان و شیوخ کا مختصرتعارف

(1) امامُ الْمُحدِّثین حضرت مولانا سیِّد محمد دِیدار علی شاہ مَشْہدی نقشبندی قادِری مُحدِّث اَلْوَری رحمۃ اللہ علیہ، جَیِّد عالِم، اُستاذُالعُلَما، مفتیِ اسلام تھے۔ آپ اکابرین اہل سنّت سے تھے۔ 1273ھ مطابق 1856ھ کو اَلْوَر (راجِسْتھان، ہِند )میں پیدا ہوئے اور لاہور 22رجب المرجب 1354ھ مطابق 20اکتوبر1935ء کو (بروزپیر)نمازعصرکے سجدے میں وصال فرمایا، جامع مسجدحنفیہ محمدی محلہ اندرون دہلی گیٹ لاہورسے متصل جگہ میں تدفین کی گئی ۔ دارُالعُلُوم حِزْبُ الْاَحْناف لاہور([16]) اور فتاویٰ دِیداریہ([17]) آپ کی یادگار ہیں۔( [18])

(2) عارفِ کامل حضرت مولانا فضلِ رحمٰن صدیقی گنج مرادآبادی نقشبندی قادری رحمۃ اللہ علیہ کی ولادت1208 ھ مطابق1794ء کو سندیلہ (ضلع ہردوئی، یوپی ہند) میں ہوئی اور وصال 22ربیعُ الاوّل 1313 ھ مطابق 12ستمبر 1895ءکو فرمایا۔ مزار مبارک گنج مراد آباد (ضلع انّاؤ،یوپی ہند) میں ہے۔ آپ عالمِ باعمل، استاذ و شیخ العلما والمشائخ اور اکابرینِ اہلِ سنّت سے تھے۔آپ کی اسانیدکا عربی مجموعہ اتحاف الاخوان باسانیدمولانا فضل الرحمن ہے ،)[19] (جَدِّ اعلیٰ حضرت مولانا رضا علی خان([20]) علیہ رحمۃ الرَّحمٰن آپ کے ہی مرید و خلیفہ تھے۔⁽[21]⁾

(3)اعلیٰ حضرت، مجددِدین وملّت، امام احمد رضا خان رحمۃ اللہ علیہ کی ولادت 10شوال 1272ھ مطابق6جون 1856ءکو بریلی شریف(یو۔پی) ہند میں ہوئی، یہیں 25 صفر 1340 ھ مطابق28اکتوبر1921ءکو وصال فرمایا۔ مزار جائے پیدائش میں مرجعِ خاص و عام ہے۔آپ حافظِ قرآن، پچاس سے زیادہ جدیدوقدیم علوم کے ماہر، فقیہ اسلام، مُحدّثِ وقت، مصلحِ امت، نعت گوشاعر، سلسلہ قادریہ کے عظیم شیخ طریقت، تقریباً ایک ہزار کتب کے مصنف، مرجع علمائے عرب وعجم، استاذالفقہاومحدثین، شیخ الاسلام والمسلمین، مجتہدفی المسائل اور چودہویں صدی کی مؤثر ترین شخصیت کے مالک تھے۔ کنزالایمان فی ترجمۃ القرآن([22])،فتاویٰ رضویہ([23]) ، جدّ الممتارعلی ردالمحتار( [24]) اور حدائقِ بخشش([25]) آپ کی مشہور تصانیف ہیں۔([26])

(4) خاتِمُ الاکابِر، قدوۃ العارفین حضرت علامہ شاہ آلِ رسول مار ہَروی رحمۃ اللہ علیہ عالمِ باعمل، صاحبِ وَرَع وتقوی اورسلسلہ قادریہ رضویہ کے سینتیسویں (37) شیخِ طریقت ہیں۔ آپ کی ولادت 1209ھ کو خانقاہ برکاتیہ مار ہرہ شریف (ضلع ایٹہ،یوپی) ہند میں ہوئی اور یہیں 18ذوالحجہ1296ھ کو وصال فرمایا،تدفین خانقاہ برکاتیہ مارہرہ شریف، اترپردیش ہند میں ہے ۔ آپ نے ابتدائی تعلیم مکمل کرنے کے بعد حضرت سید شاہ آل احمد اچھے میاں مارہروی رحمۃ اللہ علیہ کے ارشاد پر سراج الہند حضرت مولانا شاہ عبدالعزیز محدث دہلوی رحمۃاﷲ علیہ کے درسِ حدیث میں شریک ہوئے۔ صحاحِ ستہ کا دورہ کرنے کے بعد حضرت محدث دہلوی قدس سرہ سے علویہ منامیہ کی اجازت اور احادیث و مصافحات کی اجازتیں پائیں،فقہ میں آپ نے دوکتب مختصرتاریخ اورخطبہ جمعہ تحریرفرمائیں ۔([27])

(3)سِراجُ الہند حضرت شاہ عبد العزیز محدّثِ دہلوی رحمۃ اللہ علیہ علوم و فُنون کے جامع، استاذُ العلما و المحدثین، مُفَسِّرِ قراٰن، مصنّف اور مفتیِ اسلام تھے، تفسیرِ عزیزی، بُستانُ المُحدّثین ، تحفۂ اِثنا عشریہ اورعاجلہ نافعہ( [28])آپ کی مشہور کُتُب ہیں۔ 1159ہجری میں پیدا ہوئے اور 7 شوال 1239ہجری میں وِصال فرمایا، مزار مبارک درگاہ حضرت شاہ وَلِیُّ اللہ مہندیاں، میردرد روڈ، نئی دہلی میں ہے۔⁽[29]⁾

(4)محدث ہندحضرت شاہ ولی اللہ احمدمحدث دہلوی فاروقی رحمۃاللہ علیہ کی پیدائش 4شوال 1110ھ کو ہوئی اوریہیں29محرم 1176ھ مطابق 1762ء وصال فرمایا،تدفین مہندیاں، میردرد روڈ، نئی دہلی میں ہوئی،جو درگاہ شاہ ولی اللہ کے نام سے مشہورہے،آپ نے اپنے والدگرامی حضرت شاہ عبدالرحیم دہلوی رحمۃ اللہ علیہ سے تعلیم حاصل کی،حفظ قرآن کی بھی سعادت پائی، اپنے والد سے بیعت ہوئے اور خلافت بھی ملی،والد کی رحلت کے بعد ان کی جگہ درس وتدریس اور وعظ و ارشاد میں مشغول ہوگئے۔ 1143ھ میں حج بیت اللہ سے سرفراز ہوئے اور وہاں کے مشائخ سے اسناد حدیث حاصل کیں۔ 1145ھ کو دہلی واپس آئے،آپ بہترین مصنف تھے، مشہورکتب میں فتح الرحمن فی ترجمہ القرآن فارسی، الفوز الکبیرفی اصول التفسیر، مؤطاامام ملک کی دوشروحات المصفیٰ فارسی،المسوّی عربی، حجۃ اللہ البالغہ،ازالۃ الخفاء عن خلافۃ الخلفاء فارسی،الانتباہ فی سلاسل اولیاء اللہ فارسی، انسان العين فی مشايخ الحرمين اورالارشادالی مہمات الاسنادعربی)[30] (مشہورکتب ہیں۔⁽[31]⁾

(5)شیخ محمد وفد اللہ مکی مالکی رحمۃ اللہ علیہ محدث وقت حضرت شیخ محمد بن محمد بن سلیمان رودانی مالکی کے فرزندتھے،والدصاحب کے علاوہ شیخ حسن بن علی عجیمی اورشیخ عبداللہ بن سالم بصری سے استفادہ کیا،والدصاحب کی وفات کے بعدمکہ شریف میں ان کے وارث قرارپائے، شیخ عبدالقادرجیلانی سحاقی([32])1150ھ میں حج کرنے مکہ شریف آئے تو ان سے ملاقات کی۔حضرت شاہ ولی اللہ محدث دہلوی نے 1144ھ میں مکہ شریف گئے تو مؤطاامام مالک اول تا آخرپڑھی،اورحضرت شیخ محمد رودا نی کے طریق پر مرویات اور سلاسل صوفیہ میں اجازت حاصل کی۔⁽[33]⁾

۞ عالمِ کبیر، مسند العصرحضرت سیّدُنا شیخ ابو الاسرار حسن بن علی عُجَیْمی حنفی مکی رحمۃ اللہ علیہ کی ولادت10ربیع الاول 1049ھ مکۂ مکرمہ میں ہوئی۔ 3شوَّالُ المکرَّم 1113ھ کو وصال طائف (عرب شریف) میں فرمایا، تدفین احاطۂ مزار حضرت سیّدُنا عبداللہ بن عباس⁾[34] ⁽رضی اللہ عنہما میں ہوئی۔ آپ عالم اسلام کے سوسے زائدعلماوصوفیا کے شاگرد، حافظ قراٰن، محدثِ شہیر،فقیہ حنفی،صوفیِ کامل،مسندِ حجاز،استاذالاساتذہ، اور 60 سے زائد کتب کے مصنف تھے،آپ نے طویل عرصہ مسجدحرم،مسجدنبوی اورمسجدعبداللہ بن عباس (طائف) میں تدریس کی خدمات سرانجام دیں۔⁽[35]⁾

۞خاتم المحدثین حضرت امام عبداللہ بن سالم بصری شافعی رحمۃ اللہ علیہ کی ولادت 1049ھ کو مکہ میں ہوئی اوریہیں 4 رجب 1134ھ کو وصال فرمایا،جنۃ المعلی میں دفن کئے گئے،بصرہ میں نشوونما پائی، پھرمکہ شریف میں آکر مقیم ہوگئے،آپ مسجدحرام شریف میں طلبہ کو پڑھایا کرتے تھے،زندگی بھریہ معمول رہا،کثیر علمانے آپ سے استفادہ کیا،آپ جیدعالم دین،محدث وحافظ الحدیث اورمسند الحجازتھے، کئی کتب تصنیف فرمائیں جن میں سے ضیاء الساری فی مسالک ابواب البخاری⁾[36] ⁽ یادگار ہے۔⁽[37]⁾

(6) حضرت شیخ شمسُ الدّین ابوعبداللہ محمد بن محمد بن سلیمان رودانی مالکی رحمۃ اللہ علیہ مراکش کےعلاقے تارُودَنْت (صوبہ سوس ماسہ)میں 1037ھ کو پیداہوئے،ابتدائی تعلیم وہاں حاصل کرکے آپ الجزائر، مصر، شام، استنبول اور حجازمقدس آئے اوراولاً مدینہ شریف پھر مکہ مکرمہ میں مقیم ہوگئے، یہیں شادی کی، آپ کا شمار مکہ شریف کی مؤثرومقبول شخصیات میں ہوتاتھا،آپ حدیث، فقہ، حساب،فلکیات اورعربی ادب میں ماہرتھے۔آپ نے دینی خدمات میں امامت،فتاوی نویسی اورتدریس کو منتخب فرمایا،تحریروتصنیف میں بھی مصروف رہے،آپ کی سات تصانیف میں سے جمع الفوائد من جامع الاصول ومجمع الزوائد)[38] (آپ کی پہچان ہے،اس عظیم محدث کا وصال 10ذیقعدہ 1094 ھ کو دمشق میں ہوااورجبل قاسیون میں تدفین کی گئی۔⁽[39]⁾

(7)حضرت شیخ ابوالعزائم سلطان بن احمدسلامہ مزّاحی مصری ازہری شافعی رحمۃ اللہ علیہ کی ولادت 985ھ کو مصرمیں ہوئی اوریہیں 17جمادی الآخر1075ھ میں وصال فرمایا، تدفین مجاورین قبرستان قاہرہ میں ہوئی،آپ نے علمائے عصرسے حفظ قرآن وقرأت، حدیث وفقہ و تصوف اور دیگر علوم حاصل کرکے 1008ھ میں فارغ التحصیل ہوئے اور جامعۃ الازہر میں تدریس کرنے لگے، آپ امام الائمہ، بحرالعلوم، استاذالفقہاء والقراء، محدث وقت، علامہ زمانہ،نابغہ عصر،زہدوتقویٰ کے پیکر،مرجع خاص وعام، عابدوزاہد اور کئی کتب کے مصنف تھے۔⁽[40]⁾

(8)شیخ الاسلام،ناصرالملت والدین حضرت امام شہاب الدین احمد بن خلیل سبکی شافعی رحمۃ اللہ علیہ کی ولادت 939ھ اور وفات 1032ھ میں ہوئی، آپ نے مدرسہ باسطیہ مصر میں داخلہ لےکر علم دین حاصل کیا،جیدعلمائےمصرسے استفادہ کرکے محدث وفقیہ بننے کی سعادت پائی،حدیث وفقہ میں آپ کی کئی تصانیف ہیں،ان میں سے فتح الغفور بشرح منظومۃ القبور)[41]( مشہور ہے۔⁽[42]⁾

(9)شیخ الاسلام حضرت امام نجم الدین ابوالمواہب محمدبن احمدغیطی سکندری رحمۃ اللہ علیہ کی پیدائش 910ھ اوروفات 981ھ میں ہوئی، آپ کا تعلق مصرکےصوبہ سکندریہ کے مرکزی شہر سکندریہ سے ہے،آپ نے دیگر مشائخ بالخصوص شیخ الاسلام زین الدین زکریا انصاری رحمۃ اللہ علیہ سے علم حدیث،فقہ اورتصوف وغیرہ حاصل کرکے اسناداورتدریس وافتاء کی اجازات لیں،آپ امام الوقت، مسندالعصر، محدث زمانہ، مرشد گرامی، محبوب ِ خاص وعام،بغیرلومۃ لائم برائی سے منع کرنے والے اور کئی کتب کے مصنف تھے۔ بهجة السامعين والناظرين بمولد سيد الاولين والآخرين اورقصۃ المعراج الصغری( [43])وغیرہ آپ کی تصنیف کردہ کتب ہیں۔⁽[44]⁾

(10)شرف الملت والدین حضرت شیخ عبدالحق بن محمدبن عبدالحق سنباطی قاہری شافعی رحمۃ اللہ علیہ کی ولادت جمادی الاولیٰ یا جمادی الاخریٰ 842ھ کو ایک علمی گھرانے میں بمقام سنباط (صوبہ مغربی،مصر)میں ہوئی،آپ سنباط میں حفظ قرآن کرنے کےبعد قاہرہ میں آگئے یہیں بقیہ اسلامی تعلیم حاصل کی،بعدتعلیم آپ درس و تدریس،تصنیف وتالیف اورافتامیں مصروف ہوگئے،نہ صرف مصربلکہ حجازمقدس کے علمانے بھی آپ سے استفادہ کیا۔آپ کا وصال یکم رمضان 931ھ کوشبِ جمعہ مکہ مکرمہ میں ہوا۔بعدجمعہ حرم میں نمازجنازہ پڑھائی گئی،جم غفیرنے نمازجنازہ میں شرکت کی،آپ کوجنت المعلیٰ میں دفن کیاگیا،آپ کی تصانیف میں شرح ابن عبد الحق السنباطی على حرز الامانی([45] )بھی شامل ہیں۔⁽[46]⁾

(11)حسام الملت والدین حضرت امام ابومحمد حسن بن محمد بن ایوب نسابہ حسنی حسینی شافعی رحمۃ اللہ علیہ کی ولادت قاہرہ مصرمیں 767ھ کے آخرمیں ہوئی،حفظ قرآن کے بعدعلمائے مصر، علمائے حرمین اورعلمائے شام وبیت المقدس سے علوم اسلامیہ حاصل کئے،فراغت کے بعد اسکندریہ شہر میں تدریس وتصنیف میں مصروف ہوگئے،خلق کثیرنے آپ سے استفادہ کیا، نفائس الدُّرَر فِی فَضَائِل خير الْبشر اور نزہۃ القصاد فِی شرح منظومۃ الاقتصاد⁽[47]⁾ آپ کی تصانیف ہیں۔آپ فقیہ وفاضل، صابروشاکر، متواضع وسلیم الفطرت اور مرجع خاص وعام تھے۔ ابتدائے صفرالمظفر 866ھ کو وصال فرمایا،تدفین باب النصر (قاہرہ مصر) سے باہر ہوئی۔⁽[48]⁾

(12)بدرالملت والدین حضرت شیخ حسن بن محمدبن حسن نسابہ حسینی شافعی رحمۃ اللہ علیہ شیخ حسن بن محمدبن ایوب رحمۃ اللہ علیہ کے عم محترم، مصرکے جیدعالم دین، محدث، صوفی، خاندان سادات نسابہ کے ولی،خانقاہ رکنیہ بیبرس کے سجادہ نشین اورصاحب تصنیف بزرگ تھے،آپ کی کتاب آداب الحمام یادگارہے۔آپ کی ولادت 739ھ اوروفات 16شوال809 ھ کوہوئی۔⁽[49]⁾

(13)شمس الملت والدین حضرت شیخ ابوعبداللہ محمدبن جابرقیسی وادی آشی رحمۃ اللہ علیہ کی ولادت 673ھ اوروفات 749ھ کو تونس میں ہوئی،آپ کے آباء و اَجْدَادْکا تعلق اندلس کے علاقے وادی آش سے تھا،آپ نے والدصاحب سے علم دین حاصل کرنے کے بعد سفرشروع فرمایا: بغداد،موصل،دمشق اوراسكندریہ مصرکے علماءسے استفادہ کیا۔ ان کے شیوخ کی مرویات پر مشتمل کتاب برنامج ابن جابر الوادی آشی([50]) مطبوع ہے۔آپ جید عالم دین،محدث وقت،حسن اخلاق اور پروقار شخصیت کے مالک، علمائے عرب ومغرب کے استاذ،صاحب دیوان شاعراورمرجع وقت تھے۔⁽[51]⁾

(14)حضرت امام ابومحمدعبداللہ بن محمد طائی اندلسی قرطبی رحمۃ اللہ علیہ کی ولادت رمضان 603 ھ کو ہوئی اوروصال 11ذیقعدہ 702ھ کو ہوا، آپ محدث ومسند، عالم وادیب، صدوق وحسن الحديث اورعلم وعمل کے جامع اورفقیہ مالکی تھے۔⁽[52]⁾

(15)ابن بقی حضرت امام ابوقاسم احمد بن یزیدبقوی قرطبی رحمۃ اللہ علیہ یورپ میں خلافت اموی کے اہم عالم دین،رأس العلماء،فقیہ مالکی،محدث زمانہ،صاحب دیوان اسلامی شاعر، بہترین ادیب،قاضی وقت،حسن اخلاق کے پیکر،عادل وثقہ روایِ حدیث اورکتاب الآيات المتشابہات)[53]( کے مصنف تھے،آپ کی پیدائش ذیقعدة 537 ھ کو ہوئی اور وصال 15 رمضان 625 ھ کوبروزجمعہ قرطبہ اندلس میں ہوا۔⁽[54]⁾

(16)حضرت امام ابوعبداللہ محمد بن عبدالحق بن احمد بن عبدالرحمن خزرجی قرطبی مالکی کا تعلق قرطبہ سے ہے آپ محدث کبیر، صدوق وحسن الحدیث راوی، فقیہ مالکی اور زاہدین زمانہ سے تھے۔آپ کا وصال تقریباً560ھ کو ہوا۔⁽[55]⁾

(17)حضرت امام ابوعبداللہ محمد بن فرج مولی ابن طلاعی قرطبی مالکی رحمۃ اللہ علیہ کی ولادت 404ھ اوروفات رجب 497ھ میں ہوئی، آپ حافظ الحدیث،شیخ الفقہاء، مفتی اندلس،استاذالعلما و الفقہاء،مصنف کتب،صاحب فصاحت وبلاغت اورجذبۂ اعلاء کلمۃ الحق سے مالامال تھے۔آپ نے کتاب اقضیۃ رسول اللہ صلَّی اللہ علیہ واٰلہٖ وسلَّم( [56])لکھنے کی سعادت حاصل کی۔⁽[57]⁾

(19)ابن مغیث حضرت امام قاضی ابوولیدیونس بن عبداللہ الصغّار قرطبی رحمۃ اللہ علیہ کی ولادت 338ھ کو ہوئی اوررجب 429ھ کو وصال فرمایا،آپ فقیہ مالکی،محدث ومسند، قاضی القضا،شیخ اندلس اورمصنف کتب ہیں۔ آپ مدینۃ الزہرا([58])کے کافی عرصہ خطیب رہے پھر قاضی، وزیر اور قرطبہ کے خطیب مقررہوئے،آپ بہترین واعظ،اچھے مدرس، زہد وتقوی کے جامع،خشوع وخضوع کے پیکر، ثقہ وحجت کے درجے کے راوی حدیث اور یادگاراسلاف تھے،خلق کثیرنے آپ سے علمی وروحانی استفادہ کیا۔آپ کی تحریرکردہ آٹھ کتب میں سے ایک الموعب فی شرح الموطا ہے جو مؤطاامام مالک کی شرح ہے مگریہ مکمل نہیں ہے۔⁽[59]⁾

(20)حضرت امام ابوعیسی یحیی بن عبداللہ لیثی قرطبی مالکی رحمۃ اللہ علیہ ذیقعدہ 287ھ میں پیداہوہے اور8رجب 367ھ کو وصال فرمایا،آپ محدث ومسندالاندلس،جلیل القدرامام اوراندلس کے شیخ المالکیہ تھے،آپ اندلس کے کئی شہروں کے قاضی رہے،چاردانگ عالم سے کثیرطلبۂ علم دین مؤطا پڑھنے کے لیے آپ کے پاس آیا کرتے تھے۔⁽[60]⁾

(21)حضرت امام ابومروان عبیداللہ بن یحییٰ لیثی مالکی اندلسی رحمۃا للہ علیہ کی پیدائش اندلس کے ایک علمی گھرانے میں ہوئی، والدگرامی سے علوم اسلامی حاصل کئے، والدصاحب کی وفات کے بعد حرمین طیبین اورمصرکا سفرکیا اوروہاں کے علماسے استفادہ کیا، واپس آکر مسند تدریس پرفائز ہوئے،کثیر علما نے استفادہ کیا،آپ جیدعالم اندلسی، فقیہ مالکی، مسند قرطبہ، ذہین وفطین، جود و سخاوت کے مالک،کثیرالصدقات واحسانات، صاحب ثروت و وقار اورمرجع خاص وعام تھے، رمضان 298ھ کووصال فرمایا۔⁽[61]⁾

(22)حضرت امام ابومحمد یحیی بن یحیی بن کثیرلیثی مصمودی قرطبی رحمۃ اللہ علیہ کی ولادت 152ھ کو قرطبہ میں ہوئی،مقامی علماسے علم دین حاصل کرنے کے بعد مدینہ شریف آئے اور امام مالک رحمۃ اللہ علیہ کی شاگردگی اختیار کی، امام مالک ان کے طلب علم میں انہماک و توجہ اور عقل وشعورسے بے حد متأثرتھے،حصول علم کے بعد وطن واپس آئے تو خاص وعام کے مرجع بن گئے،درس و تدریس، افتا و قضا میں مصروف ہوئے،خلیفہ وقت آپ کی عظمت وفقاہت کا قائل تھااورآپ کے مشورے سےامورِ حکومت چلاتا تھا، آپ کی ذات سے یورپ میں فقہ مالکی کی خوب اشاعت ہوئی،آپ تبع تابعی،فقیہ مالکی،مسندعصر،عبادت گزار وپرہیزگار، عکس امام مالک اور بارعب و باوقار تھے۔آپ کا وصال 22 رجب234ھ کو قرطبہ میں ہی ہوا۔⁽[62]⁾

(23)عالم مدینہ،کروڑوں مالکیوں کے امام حضرتِ سیِّدنا امام مالِک بن انس اصبحی حمیری مدنی رحمۃ اللہ علیہ کی ولادت 93ھ میں مدینۂ منورہ میں ہوئی اور 14ربیعُ الاوّل 179ھ کو وصال فرمایا۔ قبر شریف جَنَّۃُ البَقِیْع میں ہے۔ آپ، صحابی رسول حضرت ابوعامراصبحی([63] ) رضی اللہ عنہ کےپڑ پوتے، تابعی بزرگ،کثیرالعبادات،محدث وفقیہ،ادب و حیا کے پیکر، عمدہ فہم ووسیع علم والے متبع سنت،مؤثر ترین شخصیت کے مالک، درازعمر اورعالی سند والے تھے،آپ کی کتاب ”مؤطا امام مالک“ احادیثِ مبارکہ کے مقبول و معروف مجموعوں میں قدیم ترین ہے۔زندگی بھرمدینہ شریف میں رہ کر حدیث وفقہ کی تدریس میں مصروف رہے۔⁽[64]⁾

۞مؤطاامام مالک میں ہرحدیث پاک سند کے ساتھ ہے پہلی سند کے روایان کامختصرتعارف ملاحظہ کیجئے:

(24)اعلم الحفاظ حضرت امام ابوبکرمحمدبن مسلم بن عبیداللہ بن عبداللہ بن شہاب زہری قریشی رحمۃ اللہ علیہ کی پیدائش 50ھ میں مدینہ شریف میں ہوئی،آپ قوی الحافظہ اورحریص علم تھے، علمائے مدینہ(صحابہ وتابعین)سے بھرپوراستفادہ کیا،تمام اسلامی علوم وفنون بالخصوص علم قرآن،علم حدیث،علم سنن،علم فقہ،علم مغازی وغیرہ علوم میں مہارت تامہ رکھتے تھے،آپ سے 2ہزار2سوحدیثیں مروی ہیں،دن رات درس وتدریس اورکتب بینی میں مصروف رہتے،دمشق کے قاضی بھی مقررہوئے، 17رمضان 124ھ کو بمقام شغب میں وصال فرمایا، یہ مقام حجازکے آخراورفلسطین کے شروع میں ہے۔⁽[65]⁾

(25)فقیہ مدینہ حضرت ابوعبداللہ عروہ بن ز بیراسدی قریشی رحمۃ اللہ علیہ حواری رسول حضرت زبیربن عوام رضی اللہ عنہ کے بیٹے،ام المؤمنین حضرت عائشہ رضی اللہ عنہا کے بھانجے،جلیل القدرتابعی،کثیر الاحادیث،ثقہ راوی حدیث،متقی وورع، صابر وشاکر، جوّاد و سخی، دولت دنیا سے بے نیاز، عابد و زاہد، کثرت سے روزے رکھنے والے اور مدینہ منورہ کے سات فقہاء([66] )سے ہیں،آپ درس وتدریس میں مصروف رہتے، عبادت وتلاوت کی کثرت کرتے اور مسلمانوں کے مرجع تھے،حدیث کے ساتھ مغازی کو بھی بیان کیا کرتے تھے،مزاج میں بڑی نفاست وصفائی تھی،آپ کی ولادت 23ھ کو مدینہ منورہ میں ہوئی اوروصال 94ھ  کو نواحِ مدینہ میں ہوا۔⁽[67]⁾

(26)صحابی ابن صحابی حضرت بشیربن ابومسعود خزرجی انصاری حارثی رضی اللہ عنہ نبی پاک صلی اللہ علیہ والہ وسلم کی حیات ظاہری میں پیداہوئے،زیارت نبوی کی سعادت پائی، جنگ صفین میں یہ حضرت علی المرتضیٰ رضی اللہ عنہ کے لشکرمیں شامل تھے۔⁽[68]⁾

(27)صحابی رسول حضرت ابومسعود عقبہ بن عمروبن ثعلبہ بدری خزرجی انصاری رضی اللہ عنہ بیعت عقبہ ثانی([69]) میں ایمان لائے،اس وقت آپ کی عمرشرکا میں سب سے کم تھی، تمام غزوات میں شریک ہوئے،آپ کا شمارعلماصحابہ میں ہوتاہے، مدینہ شریف سے کوفہ منتقل ہوگئے اور وہیں سکونت اختیارکرلی،آپ کسی ملامت کی پرواہ کئے بغیرنیکی کا حکم فرماتے، آپ کا وصال 40ھ یا دورِ حکومت ِ امیرمعاویہ)[70](میں ہوا،مقام وفات مدینہ شریف یا کوفہ تھا،آپ کے بیٹے حضرت بشیرسمیت کثیرتابعین نے آپ سے احادیث روایت کی ہیں۔آپ عالم،مجاہد،محدث اورپرجوش مبلغ اسلام تھے۔⁽[71]⁾

(28) ہمارے پیارے آقاحضرت محمد مصطفی صلی اللہ علیہ والہ وسلم کی ولادت 12ربیع الاول مطابق 20اپریل 571ء کو وادی بطحا مکہ شریف کے معززترین قبیلے قریش میں ہوئی اور12ربیع الاول 11ھ مطابق 12 جون 632ء کو مدینہ منورہ میں وصال ظاہری فرمایا۔ آپ وجہ ٔ تخلیق کائنات،محبوب خدا،امام المرسلین،خاتم النبیین اورکائنات کی مؤثرترین شخصیت کے مالک تھے،آپ نے 40 سال کی عمر میں اعلان نبوت فرمایا،13سال مکہ شریف اور10سال مدینہ شریف میں دین اسلام کی دعوت دی،اللہ پاک نے آپ پر عظیم کتاب قرآن کریم نازل فرمائی۔اللہ پاک کے آپ پر بے شمارمرتبہ دُرُوداورسلام ہوں۔⁽[72]⁾

حواشی

شعبہ کفن دفن دعوتِ اسلامی کے زیرِ اہتمام 23 اگست 2022ء بروز منگل ناظم آباد ٹاؤن کراچی کی جامع مسجد اقصیٰ میں سیکھنے سکھانے کا حلقہ لگایا گیا جس میں اہلِ علاقہ کے اسلامی بھائیوں نے شرکت کی۔

رکنِ شعبہ کفن دفن عزیر عطاری نے تدفین کے حوالے سے گفتگو کرتے ہوئے غسلِ میت کی فضیلت و اہمیت بیان کی اور اسلامی بھائیوں دعوتِ اسلامی کے تحت منعقد ہونے تدفین کورس میں شرکت کرنے کا ذہن دیا جس پر انہوں نے اچھی اچھی نیتوں کا اظہارکیا۔(رپورٹ:شعبہ کفن دفن، کانٹینٹ:غیاث الدین عطاری)

23 اگست 2022ء بروز منگل ناظم آباد ٹاؤن کراچی کے گول مارکیٹ میں دعوتِ اسلامی کے تحت ذمہ دار اسلامی بھائیوں نے مختلف دکانداروں سے ملاقات کی اور انہیں نیکی کی دعوت پیش کی۔

دورانِ ملاقات رکنِ شعبہ کفن دفن عزیر عطاری نے عاشقانِ رسول کو غسلِ میت کی اہمیت و فضیلت بتاتے ہوئے انہیں نمازِ جنازہ کورس اور تدفین کورس کرنے کا ذہن دیا نیز دعوتِ اسلامی کے 12 دینی کاموں میں بڑھ چڑھ کر حصہ لینے کی ترغیب دلائی جس پر انہوں نے اچھی اچھی نیتیں کیں۔(رپورٹ:شعبہ کفن دفن، کانٹینٹ:غیاث الدین عطاری)

دعوتِ اسلامی کے زیرِ اہتمام کیماڑی ڈسٹرکٹ بلدیہ ٹاؤن میں واقع سیّد قاسم علی شاہ بخاری کے مزار میں مدنی مشورے کا انعقاد کیا گیا جس میں مقامی ذمہ داران سمیت مزار انتظامیہ کے اسلامی بھائیوں نے شرکت کی۔

دورانِ مدنی مشورہ شعبہ مزاراتِ اولیاء کے سٹی ذمہ دار نے دعوتِ اسلامی کے 12 دینی کاموں کے حوالے سے اہم امور پر گفتگو کی نیز عیسوی اعتبار سے ہر مہینے کی پہلے اتوار کو بعد نمازِ عصر تا اذانِ مغرب اجتماعِ ذکر و نعت منعقد کرنے کے متعلق مشاورت کی جس پر وہاں موجود اسلامی بھائیوں نے اپنی اپنی رائے کا اظہا رکیا۔

بعدازاں شرکائے مدنی مشورہ نے مزار شریف پر حاضری دی اور دعا و فاتحہ خوانی کا اہتمام کیا۔(رپورٹ:شہزاد احمد عطاری شعبہ مزارات اولیاء کراچی سٹی، کانٹینٹ:غیاث الدین عطاری)

دعوتِ اسلامی کے زیرِ اہتمام پچھلے دنوں حضرت سیدنا نور علی شاہ المعروف نوری شاہ علیہ الرحمہ کے سالانہ عرس کے موقع پر مزار شریف میں سیکھنے سکھانے کے حلقےکا انعقاد کیا گیا جس میں مدرس کورس کے اسلامی بھائی سمیت شعبہ مزاراتِ اولیاء کے ذمہ داران نے شرکت کی۔

اس حلقے میں مبلغِ دعوتِ اسلامی نے سنتوں بھرا بیان کرتے ہوئے وہاں موجود عاشقانِ رسول کی دینی و اخلاقی اعتبار سے تربیت کی اور انہیں دعوتِ اسلامی کے دینی کاموں میں بڑھ چڑھ کر حصہ لینے کا ذہن دیا۔

بعدازاں ذمہ دار اسلامی بھائیوں نے مزار شریف میں قراٰن خوانی کا اہتمام کیا اور مزار انتظامیہ سے ملاقات بھی کی جبکہ مبلغِ دعوتِ اسلامی نے دعا کروائی۔(رپورٹ:شہزاد احمد عطاری شعبہ مزارات اولیاء کراچی سٹی، کانٹینٹ:غیاث الدین عطاری)

دعوتِ اسلامی کے زیرِ اہتمام 21 اگست 2022ء بروز اتوار حضرت علامہ مولانا سیّد شاہ تراب الحق قادری رضوی علیہ الرحمہ کے چھٹے سالانہ عرس کے موقع پر مزار شریف میں فاتحہ خوانی کا انعقاد کیا گیا۔

تفصیلات کے مطابق اس عرس مبارک میں مدرس کورس، شعبہ مدرسۃ المدینہ بوائز کے طلبۂ کرام اور شعبہ مزاراتِ اولیاء کے ذمہ دار اسلامی بھائیوں نے شرکت کی۔

طلبۂ کرام نےدعوتِ اسلامی کے مختلف دینی کاموں میں شرکت کی اور مزار شریف میں قراٰن خوانی کا اہتمام کیا نیز مزار شریف پر حاضری بھی دی جبکہ مبلغِ دعوتِ اسلامی نے آخر میں دعا کروائی۔(رپورٹ:شہزاد احمد عطاری شعبہ مزارات اولیاء کراچی سٹی ، کانٹینٹ:غیاث الدین عطاری)