اللہ رب العزت نے ہماری زندگی کی گاڑی میں ”شب و روز“ کے دو پہیے لگائے ہیں جو مسلسل ہمیں اپنی منزل اور انجام کی طرف لے جائے جارہے ہیں اور پھر اس کا کرم تو دیکھئے کہ ان شب و روز میں بعض راتیں اور بعض دن ایسے بابرکت بنائے ہیں جن کو اگر صحیح طور پر بسر کر لیا جائے تو دنیا و آخرت کی کامیابیاں نصیب ہوتی ہیں۔ انہی میں سے ایک ”شبِ جمعہ “ بھی ہے۔ یعنی جمعۃ المبارک والے دن سے پہلے والی رات۔یہ بہت بابرکت رات ہے، احادیث مبارکہ میں اس رات کے بہت سے فضائل و مناقب اور فوائدو ثمرات مذکور ہیں۔

انہی فضائل اور فوائد کو حاصل کرنے کے لئے دعوتِ اسلامی کی جانب سے ہر شبِ جمعہ دنیا بھر میں اجتماعات منعقد ہوتے ہیں جن میں تلاوت و نعت کے بعد سنتوں بھرے بیان کا سلسلہ ہوتا ہے، اس کے بعد اجتماعی ذکر و دعا اور صلاۃ و سلام پر اجتماع کی پہلی نشست کا اختتام ہوجاتا ہے۔

اسی مناسبت سے آج رات بعد نمازِ عشاء تقریباً سوا نو بجے مدنی چینل پر براہِ راست سنتوں بھرے اجتماع کا انعقاد کیا جائے گا جس میں جانشینِ امیر اہل سنت حضرت مولانا عبید رضا عطاری مدنی مَدَّظِلُّہُ الْعَالِی سنتوں بھر ابیان فرمائیں گے۔

عالمی مدنی مرکز فیضانِ مدینہ کراچی میں بعدِ مغرب ہونے والے اجتماع میں رکن شوریٰ حاجی اطہر عطاری ، جامع مسجد حسن مہتاب چرڈ ڈیفنس کابینہ لاہور میں بعدِ مغرب ہونے والے اجتماع میں حاجی منصور رضا عطاری سنتوں بھرا بیان فرمائیں گے۔

تمام عاشقانِ رسول سے اپنے اپنے علاقوں میں ہونے والے ہفتہ وار اجتماع میں شرکت کی گزارش ہے۔ (رپورٹ: محمد عمر فیاض مدنی، دعوتِ اسلامی کے شب وروز)

اجتماع ردا پوشی کا انعقاد یوم وفات  اُمّ ِعطار کے موقع پر کیا جائے گا

دعوت اسلامی کے تحت جہاں ملک و بیرون ملک میں بوائز کے جامعات المدینہ قائم ہیں ویسے گرلز کے لئے بھی میں جامعات المدینہ موجود ہے۔ان اداروں سے ہر سال ہزاروں کی تعداد میں اسلامی بہنیں درس نظامی (عالمہ کورس) مکمل کرنے کی سعادت حاصل کرتی ہے۔

رواں سال 2021ء میں ملک و بیرون ملک کے جامعات المدینہ گرلز سے 1573 طالبات نے عالمہ کورس اور 1010 طالبات کے فیضان شریعت کورس مکمل کیا ہے۔ کورس کے اختتام پر کورس مکمل کرنے والی اسلامی بہنوں میں اسناد تقسیم کی جاتی ہےجس کے لئے سنتوں بھرے اجتماع کا انعقاد کیا جاتا ہے۔

اسی سلسلے میں عرس اُمِّ عطار کے موقع پر 25 ستمبر 2021ءبروز ہفتہ صبح 11:00 بجے اجتماع ردا پوشی کا انعقاد کیا جائیگا جس میں دوپہر 2:30 بجے مرکزی مجلس شوریٰ کے نگران حاجی مولانا محمد عمران عطاری مَدَّظِلُّہُ الْعَالِی مدنی چینل پر براہ راست سنتوں بھرا بیان فرمائیں گے۔ (Content: Mohammad Hussain Attari)

دعوتِ اسلامی کے زیرِ نگرانی پچھلے دنوں عالمی مدنی مرکز فیضانِ مدینہ کراچی میں مدرسۃ المدینہ بوائز کے قاری صاحبان کی نشست کا سلسلہ ہوا جس میں مرکزی مجلسِ شوریٰ کے رکن حاجی محمد علی عطاری نے سنتوں بھرا بیان کرتے ہوئے قاری صاحبان کی تنظیمی اوراخلاقی اعتبار سے تربیت کی نیز نمایاں کارکردگی والے اسلامی بھائیوں میں تحائف بھی تقسیم کئے۔

واضح رہے کہ اس نشست میں سَر محمد فرید عطاری نے بھی خصوصی طور پر شرکت کی۔ ( رپوٹ:عبدالقادر عطاری معاون حاجی علی عطاری،کانٹینٹ:غیاث الدین عطاری)

دعوت اسلامی کی مرکزی مجلس شوریٰ کے رکن حاجی محمد امین عطاری دیگر ذمہ داران کے ہمراہ کراچی کے اسپتال میں زیر علاج معروف اداکار  عمر شریف کی عیادت کے لئے پہنچے۔

رکن شوریٰ نے عمر شریف کے بیٹے جواد شریف سے ملاقات کی اور عمر شریف کی صحتیابی کے لئے دعا بھی کی۔جواد شریف نے دعوت اسلامی سے اظہار تشکر کرتے ہوئے دیگر عاشقان رسول سے دعاؤں کی درخواست کی۔

اس موقع پر نگران شعبہ رابطہ برائے شوبز سید عارف الحسن عطاری بھی موجود تھے۔

دعوتِ اسلامی کے تحت 12 دینی کاموں کے فالو اپ کے حوالے سے پتوکی میں 12ستمبر2021ءبروز اتوار ذمہ داران ِ دعوتِ اسلامی کا مدنی مشورہ ہواجس میں 12 دینی کامو ں کے سلسلے میں خصوصی گفتگو کی اور اہداف طے کئے ۔

26 ستمبر2021ء کو فیضان ِزم زم مسجد میں ہونے والے مدنی قافلہ اجتماع کے لئے دعوت اور تیاریوں کے حوالے سے اہم نکات پر بات ہوئی۔ مزید 3 اکتوبر2021ء بروز اتوار کو دربار والی مسجد میں عرس رضا کے موقع پر ہونے والے محفل یومِ رضا کی بھرپور دعوت دینے کا ذہن دیا گیا اور اس حوالےسے بھرپور تیاریوں کے لئے ذہن سازی کی۔(رپوٹ: علی ریاض عطاری مجلس سیکیورٹی ڈیپارٹمنٹ،کانٹینٹ:غیاث الدین عطاری)

دعوتِ اسلامی کی مختلف ایکٹوٹیز کے حوالےسے دعوتِ اسلامی کے  شعبہ جات کی میٹنگ کا سلسلہ ہوتا رہتا ہے جس میں دعوتِ اسلامی کےاراکینِ شوریٰ اسلامی بھائیوں کی تربیت و رہنمائی کرتے ہیں۔

اسی سلسلے میں 10 ستمبر2021ءبروزجمعہ عالمی مدنی مرکز فیضانِ مدینہ کراچی میں دعوتِ اسلامی کی مرکزی مجلسِ شوریٰ کے رکن حاجی محمد علی عطاری نے Madani Channel کے نئے سلسلے کی تیار کی لئے Madani Channel کی ٹیم کے ساتھ مدنی مشورہ کیا جس میں اہم نکات پر گفتگو کی۔(رپوٹ: عبدالقادر عطاری معاون رکن شوری حاجی محمد علی عطاری،کانٹینٹ:غیاث الدین عطاری)

دعوتِ اسلامی کے شعبہ خدام المساجد والمدارس کے زیرِ انتظام سکھر کے علاقےنصرت کالونی نمبر 6 میں تعمیر ہونے والی مسجد فیضان العدل کا افتتاح کردیا گیا۔ خوشی کے اس موقع پر مسجد میں محفلِ نعت کا انعقاد کیا گیا جس میں دعوتِ اسلامی کی مرکزی مجلسِ شوریٰ کے رکن مولانا حاجی اسد عطاری مدنی نے سنتوں بھرا بیان کیا۔ رکن شوریٰ نے شرکا کو مسجدِ نبوی اور مسجد قبا کی تعمیرات کس طرح ہوئیں؟ اس بارے میں آگاہی فراہم کی۔

رکنِ شوریٰ نے اپنے بیان میں شرکا کو نمازوں کی پابندی کرنے، مسجدوں کا آباد کرنے اور دعوتِ اسلامی کے دینی کاموں میں حصہ ملانے کا ذہن دیا۔ اس موقع پر رکنِ شوریٰ قاری ایاز عطاری بھی موجود تھے۔ 

دعوتِ اسلامی کے تحت گزشتہ دنوں ڈہر کی میں اجتماعی طور پرمدنی مذاکرے کا انعقاد کیا گیاجس میں کافی تعداد میں عاشقانِ رسول نے شرکت کی  ۔یہ مدنی مذاکرہ عالمی مدنی مرکز فیضانِ مدینہ کراچی سے براہِ راست بڑی اسکرین کے ذریعے دکھایاا گیانیز اجتماع کے اختتام پر صلوۃ وسلام، دعا اور لنگر رضویہ کا بھی اہتمام ہوا۔(رپوٹ: قاری محمد خالد عطاری نگران نابینا افراد پاکستان ،کانٹینٹ:غیاث الدین عطاری)

عاشقان رسول کی دینی اصلاح اور ان کے دلوں کو علمِ دین کی طرف راغب کرنے کے ساتھ ساتھ ان کے اندر تبلیغ دین کا جذبہ بیدار کرنے لئے عالمگیر تحریک دعو ت اسلامی کے زیر اہتمام دنیا بھر میں ہر جمعرات بعد نماز مغرب ہفتہ وار سنتوں بھرے اجتماع کا انعقاد کیا جاتا ہے جن میں مبلغین دعوت اسلامی سنتوں بھرا بیان فرماتے ہیں۔ اجتماع کا اختتام پرنیکی کی دعوت کی دھومیں مچانے کے لئے اسلامی بھائی مدنی قافلے میں سفر بھی کرتے ہیں۔

اسی سلسلے میں 9 ستمبر 2021ء کو دنیا بھر میں ہفتہ وار سنتوں بھرے اجتماعات منعقد کئے جائینگے۔ جمعرات کی شب 9:15 بجے مدنی چینل پر براہ راست نشر ہونے والے ہفتہ وار اجتماع میں مرکزی مجلس شوریٰ کے رکن حاجی محمد اسد عطاری مدنی ”راہِ دین کی مشقتیں“ کے موضوع پر سنتوں بھرا بیان فرمائیں گے۔

تمام عاشقان رسول سے درخواست ہے کہ وہ بھی اپنے اپنے شہر میں ہونے والے ہفتہ وار اجتماع ضرور شرکت فرمائیں۔

(رپورٹ: محمد عمر فیاض مدنی، دعوتِ اسلامی کے شب وروز)

7 ستمبر 1974 کا دن مسلمانوں کے لئے ایک تاریخی حیثیت رکھتا ہے کیونکہ اس دن علامہ شاہ احمد نورانی،شیخ الحدیث علامہ مصطفیٰ الازہری، مولانا عبدالستار خان نیازی و دیگر عمائدینِ اہل سنت رحمہم اللہ المبین کی بھرپور کوششوں سے قادیانیوں کو قومی اسمبلی میں ان کے کفریہ عقائد کی بناء پر غیر مسلم اور پاکستان کی چھٹی اقلیت قراردے کر اسلام کے بنیادی عقیدۂ ختم نبوت کو آئینی وقانونی تحفظ فراہم کیا گیا۔

ملکی تاریخ کے اس عظیم روشن ترین تاریخ ساز دن ”7ستمبر“کو عاشقانِ رسول یومِ تحفظِ عقیدۂ ختم نبوت مناتے ہیں، محافلِ نعت منعقد کرتے ہیں، بیانات سننے سنانے کا سلسلہ ہوتا ہے اور ختمِ نبوت کے عقیدے کو قرآن و سنت کی روشنی میں بیان کیا جاتا ہے۔

دعوتِ اسلامی جو کہ عاشقانِ رسول کی ایک بہت بڑی تحریک ہے ،اس کی جانب سے بھی یومِ تحفظِ ختمِ نبوت نہایت ہی مذہبی جوش و خروش سے منایا گیا۔ اس سلسلے میں سب سے پہلے بانیِ دعوتِ اسلامی حضرت علامہ مولانا محمدالیاس عطار قادری دَامَتْ بَرَکَاتُہُمُ الْعَالِیَہ نے عشقِ رسول سے لبریز دلنشین نعرے لکھ کر عُشّاقانِ رسول کو محبتِ رسول کا جام پلایا اور پھر اپنے ایک ویڈیو پیغام میں تمام تاجروں اور دکانداروں سے اپیل کی کہ 7 ستمبر یومِ تحفظ ختم نبوت کی مناسبت سے اپنی دکانوں پر 7فیصد ڈسکاؤنٹ دیں۔ اس پیغام کے ملتے ہیں بہت سارے تاجروں نے لبیک کہا اور اپنی دکانوں کے آگے 7فیصد ڈسکاؤنٹ کے پینافلیکس آویزاں کردیئے۔

عقیدۂ ختمِ نبوت کی اہمیت کو اُجاگر کرنے کے لئے صبح 10 بجے دعوتِ اسلامی کے عالمی مدنی مرکز فیضانِ مدینہ کراچی میں قائم جامعۃ المدینہ میں ایک پُروقار تقریب کا انعقاد کیا گیا جس میں استاذ الحدیث مفتی محمد حسان عطاری مدنی مُدَّظِلُّہُ الْعَالِی نے ”عقیدۂ ختم ِ نبوت“ کے عنوان پر خصوصی بیان فرمایا جسے مدنی چینل پر براہِ راست نشر بھی کیا گیا۔ سینکڑوں طلبہ نے فیضانِ مدینہ میں جبکہ ہزاروں طلبہ نے اپنے اپنے جامعات المدینہ میں اجتماعی طور پر بذریعۂ مدنی چینل اس تقریب میں شرکت کی۔ مفتی حسان عطاری نے قرآن و سنت کی روشنی میں عقیدۂ ختمِ نبوت کو اُجاگر کیا اور طلبہ کونبی کریم ﷺ کے آخری نبی ہونے کے متعلق تفصیلاً آگاہی فراہم کی۔

اس کے علاوہ رات 9 بجے مدنی چینل پر خصوصی پروگرام بنام”آخری نبیﷺ “ کے عنوان سے نشر کیا گیا جس میں شیخ الحدیث و التفسیر مفتی قاسم قادری مَدَّظِلُّہُ الْعَالِی ، نگرانِ مرکزی مجلسِ شوریٰ مولانا حاجی عمران عطاری ، ترجمان دعوتِ اسلامی مولانا حاجی عبدالحبیب عطاری اور مولاناحافظ اشفاق عطاری مدنی نے شرکت کی۔

پروگرام میں بات کرتےہوئے مفتی قاسم صاحب کا کہنا تھا کہ ختمِ نبوت کا عقیدہ قرآن کی کئی آیات سے ثابت ہے اور اس کا منکر کافر ہے۔ خود جن احادیث میں حضور تاجدارِ ختمِ نبوت ﷺ نے اپنے آخری نبی ہونے کا واضح بیان فرمایا ان کی تعداد تین سو سے زائد ہے۔ انہوں نے مزید کہا کہ عقیدۂ ختمِ نبوت دین کی اساس و بنیاد ہے ، جس طرح آنحضرت ﷺ کو نبی ماننا لازمی ہےاسی طرح ان کو آخری نبی ماننا بھی لازمی ہے۔

حاجی عبدالحبیب عطاری نے مدنی چینل کے ناظرین سے بات کرتے ہوئے کہا کہ والدین کی یہ اہم ذمہ داری ہے کہ وہ اپنے بچوں کو جس طرح کلمہ ، نماز، سچ، اچھائی ، برائی وغیرہ کے بارے میں بتاتے ہیں اسی طرح ختمِ نبوت کے بارے میں بھی اپنے بچوں کو خوب اچھی طرح عقائد بتائیں تاکہ ان بچوں کا عقیدہ مضبوط اورمحفوظ ہوجائے۔

اس موقع پر مفتی ِ اہل سنت مفتی قاسم صاحب سے قادیانی فرقے، ان کے مکر و فریب اور باطل اَدِلّہ سے متعلق مختلف سوالات بھی کئے گئے جن کے انہوں نے نہایت تفصیل سے جوابات ارشاد فرمائے۔

نوٹ: مفتی قاسم عطاری مَدَّظِلُّہُ الْعَالِی کا یہ پروگرام دیکھنا ہر عاشقِ رسول کے لئے نہایت ہی مفید ہے جس کو دیکھنے سے عشقِ رسول میں اضافہ اور ایمان مضبوط ہوگا۔ ان شاء اللہ۔ پروگرام کا لنک نیچے دیا گیا ہے۔

Watch Mufti Qasim Attari Program

یومِ دعوتِ اسلامی کے موقع پر فتح جنگ کے مقامی ہال میں اجتماعی طور پر مدنی مذاکرہ دیکھنے کا سلسلہ ہوا جس میں علمائے کرام،صحافی حضرات اور تاجران سمیت کثیرعاشقانِ رسول نے شرکت کی نیز مدنی مذاکرے کے اختتام پر عاشقانِ رسول نےدعوتِ اسلامی کی خدمات کو خوب سراہتے ہوئے تاثرات بھی دیئے۔(رپوٹ: مبشر حسن عطاری مجلس حج و عمرہ واہ کینٹ اٹک زون،کانٹینٹ:غیاث الدین عطاری)

پچھلے دنوں دعوتِ اسلامی کے تحت ٹنڈو آدم میں تین دن کا اصلاحِ اعمال کورس ہوا جس میں جامعۃالمدینہ بوائز کے طلبۂ کرام،امامت کورس اور اساتذۂ کرام نے شرکت کی۔