بے حیائی اللہ کے نزدیک بہت برا فعل ہے۔ اس سے بچنے میں ہی عافیت ہے۔بے حیائی کے بارے میں آیت مبارکہ: اِنَّ الَّذِیْنَ یُحِبُّوْنَ اَنْ تَشِیْعَ الْفَاحِشَةُ فِی الَّذِیْنَ اٰمَنُوْا لَهُمْ عَذَابٌ اَلِیْمٌۙ-فِی الدُّنْیَا وَ الْاٰخِرَةِؕ-وَ اللّٰهُ یَعْلَمُ وَ اَنْتُمْ لَا تَعْلَمُوْنَ(۱۹) (پ 18، النور: 19) ترجمہ کنز الایمان: وہ لوگ جو چاہتے ہیں کہ مسلمانوں میں بُرا چرچا پھیلے ان کے لیے دردناک عذاب ہے دنیا اور آخرت میں اور اللہ جانتا ہے اور تم نہیں جانتے۔

وَ لَا تَقْرَبُوا الْفَوَاحِشَ مَا ظَهَرَ مِنْهَا وَ مَا بَطَنَۚ- (پ 8، الانعام: 151) ترجمہ: اور بے حیائی کے قریب بھی نہ جاؤ، چاہے وہ کھلی ہو یا چھپی ہوئی۔

بے حیائی کے بارے میں احادیث مبارکہ:

اس شخص پر جنت حرام ہے جو بے حیائی کی بات سے کام لیتا ہے۔ (جامع صغیر للسیوطی، ص 221، حدیث: 3648)

جب تم حیا نہ کرو تو جو چاہو کرو۔ (بخاری، 4/131، حدیث: 6125)

ایمان کی ساٹھ سے کچھ اوپر شاخیں ہیں اور حیا بھی ایمان کی ایک شاخ ہے۔ (مسلم، ص 39، حدیث: 35)

بے حیائی جس چیز میں بھی ہو اسے عیب دار بنا دے گی اور حیا جس چیز میں ہو اسے خوبصورت بنا دے گی۔ (ابن ماجہ، 4 / 461، حدیث: 4185)

حیا اور ایمان دونوں ایک دوسرے سے ملے ہوئے ہیں ان میں سے کوئی ایک بھی اٹھ جائے تو دوسرا خودبخود اٹھ جاتا ہے۔ (مستدرک للحاکم، 1/176، حدیث:22)

حیا ایمان کا حصہ ہے ایمان جنت میں پہنچاتا ہے جبکہ بے حیائی بدکلامی سنگدلی اور سنگدلی جہنم میں پہنچاتی ہے۔ (ترمذی، 3/406، حدیث: 2016)

نبی کریم ﷺ پردہ میں رہنے والی کنوری لڑکی سے بھی زیادہ حیا والے تھے۔ (ابن ماجہ، 4/460، حدیث:4180)

حیا ایمان کا ایک جزء ہے اور ایمان والے جنت میں جائیں گے اور بے حیائی کا تعلق ظلم سے ہے اور ظالم جہنم میں جائیں گے۔ (ترمذی، 3/406، حدیث: 2016)

اللہ پاک ہمیں بے حیائی سے دور رہنے کی توفیق عطا فرمائےہم پر سدا نظر رحمت فرمائےاور ہمیں ایمان پہ موت عطا فرمائے۔