پاکستان سے پہلی حج پرواز عازمینِ حج کو لیکر روانہ ہوگئی، لاہور ائیرپورٹ سے 216 عازمین لیکر نجی ائیرلائن کی پرواز صبح 4:45 پر  مدینہ منورہ زاد ہَااللہ شرفاً وَّ تعظیماً روانہ ہوئی۔ وزارتِ مذہبی امور کے حکام نے عازمینِ حج کو رخصت کرتے ہوئے کہا کہ عازمینِ حج پاکستان کی سلامتی کےلئے خصوصی دعائیں کریں۔

ملک پاکستان میں 1440سن ہجری کے ماہ ذوالقعدۃ الحرام کا  آغاز ہوچکا ہے ،حرمت والے مہینے چار ہیں جن میں سے ایک ماہ ذوالقعدۃ الحرام بھی ہے ۔ان مہینوں کا خصوصیت کے ساتھ احترام کرنے ، ان میں گناہوں سے بچنے اور نفل روزے کی فضیلتیں احادیثِ مبارکہ میں بیان کی گئی ہیں، یاد رکھیں کہ قراٰنِ کریم نے ہمیں ان حرمت والے مہینوں میں اپنی جانوں پر ظلم کرنے یعنی گناہ کرنےسے منع فرمایا ہے ، یہ وہ مہینہ ہے جس کاادب زمانہ ٔجاہلیت میں بھی کیا جاتا تھا اور اہلِ عرب اپنی لڑائیاں اور جنگیں اس مہینے کے آتے ہی چھوڑ دیا کرتے تھے اسی وجہ سے اس مہینے کو ”ذوالقعدۃ“ یعنی بیٹھنے والا مہینہ کہا جاتا ہے ، اللہ پاک ہم سب کو بھی اس حرمت والے مہینے کا ادب واحترام کرنے اور اس میں نفل روزے رکھنے کی توفیق عطا فرمائے ۔

دعوت اسلامی کی مجلس حج و عمرہ  کے تحت بابُ المدینہ کراچی کے علاقے ڈرگ کالونی کی جامع مسجد کلثوم میں حج تربیتی اجتماع کا انعقاد کیاگیا جس میں اس سال حج پر جانے والے عازمینِ حج ، اہل علاقہ اور دیگر عاشقانِ رسول نے شرکت کی۔ مجلسِ حج و عمرہ اوورسیز کے ذمّہ دار نے سنّتوں بھرا بیان کیا اور شرکا کی مدنی تربیت کرتے ہوئے ان کو حج و عمرہ کا طریقہ، مناسکِ حج اور مدینہ منورہ زاد ہَااللہ شرفاً وَّ تعظیماً کی حاضری کے آداب بیان کئے۔

وزارتِ مذہبی امورکا کہنا ہے کہ پہلی مرتبہ ایک لاکھ 75 ہزار سے بڑھ کر دو لاکھ حجاج  کرام فریضۂ حج ادا کریں گے، عازمینِ حج کے لئے پہلی بار ای ویزہ کی سہولت دی جائے گی جبکہ حجاج کرام کو 25 سے 58 ہزار روپے واپس ملیں گے۔ وزارت مذہبی امور کامزید کہنا تھا کہ 25 سے 30 ہزار افراد اسلام آباد روڈ ٹو مکہ کی سہولت سے فائدہ اٹھائیں گے جس کے لئے 61 رکنی عملہ پاکستان پہنچ چکا ہے۔ترجمانِ وزارتِ مذہبی امور کے مطابق رواں سال سرکاری حج اسکیم کے تحت ایک لاکھ 23 ہزار 316 عازمینِ حج حرم شریف جانے کی سعادت حاصل کرسکیں گے۔

اسی طرح حج سے ہی متعلق وزارتِ خارجہ کا کہنا ہے کہ روڈ ٹو مکہ پراجیکٹ کے تحت امسال دولاکھ حجاج کرام مستفید ہونگے۔ روڈ ٹو مکہ پراجیکٹ کے تحت پاکستانی حجاج کی کسٹم چیکنگ اور امیگریشن پاکستان میں ہوگی اور عرب شریف پہنچ کر ایئرپورٹس پر عازمینِ حج کو انتظار کی زحمت نہیں اٹھانا پڑے گی ،روڈ ٹو مکہ پراجیکٹ کے تحت اسلام آباد ایئر پورٹ پر خصوصی کاؤنٹرز کی تنصیب مکمل ہو چکی ہے ۔ واضح رہے کہ حج 2019 کےلئے فضائی آپریشن 4 جولائی 2019ءبروز جمعرات سے شروع ہو گا۔

دعوتِ اسلامی کی مجلسِ مدنی انعامات کے تحت پنجاب کے شہر گوجرانوالہ میں سنّتوں بھرے اجتماع کا انعقاد کیاگیا جس میں اہلِ علاقہ، مختلف شخصیات اور دیگر اسلامی بھائیوں نے شرکت کی۔ نگرانِ مجلس مدنی انعامات نے سنّتوں بھرا بیان کیا اور شرکا کو مدنی انعامات پر عمل کرنے، اس کی آسانیوں کے متعلق مدنی پھول دیئے۔

ڈائریکٹر جنرل پاکستان حج مشن کے مطابق  حج کوٹے میں اضافے کے بعد پاکستان سے اس سال 2لاکھ عازمینِ حج فریضۂ حج ادا کرسکیں گے،انہیں رہائش اور تینوں وقت کھانے پینے کی فراہمی کے علاوہ حرم شریف آمدورفت کےلئے 24گھنٹے بس شٹل سروس فراہم کی جائے گی، ڈائریکٹر جنرل حج کے مطابق 214 حجاج کا پہلا قافلہ 4 جولائی2019ء کی صبح لاہور سے مدینہ شریف پہنچے گاجبکہ دوسرا قافلہ 5 جولائی2019ء کو 393 عازمینِ حج کو لیکر جدہ آئے گا، جہاں امیگریشن، کسٹم کلیئرنس اور دیگر سہولتوں کی فراہمی کا انتظام کرلیا گیا ہے۔ان کا مزید کہنا تھا کہ اس مرتبہ 70 فیصد گزشتہ سال والی اور 30 فیصد نئی عمارتیں لی گئی ہیں، جن میں حجاج کےلئے کھا نے کےلئے میس اور حرم شریف آنے جانے کےلئے نئی ایئرکنڈیشنڈ بسوں کی سہولتیں دی جارہی ہیں جبکہ 180 ماہرین واسپشلسٹ ڈاکٹرز اور 360 پیرا میڈیکل اسٹاف پاکستان سے آرہے ہیں۔ انہوں نے کہا کہ منیٰ میں جمرات کے قریب ہمارے 32 مکاتب الاٹ ہوئے ہیں، جبکہ 54000 پاکستانی حجاج کو مشاعر ٹرین کی سہولتیں بھی فراہم کی جائینگی۔ ڈائریکٹر جنرل پاکستان حج مشن کا کہنا ہے کہ اس بار حج شدید گرم موسم میں ہے، لہذا حجاج اپنی صحت کا خاص خیال رکھیں، پانی اور مشروبات کا استعمال زیادہ رکھیں اور چھتری کا استعمال بھی کریں۔مدینہ شریف میں بھی اس مرتبہ مرکزی عمارتیں حاصل کی گئی ہیں جبکہ پاکستان ہاؤس کی عمارت میڈیکل اسٹاف، منیٰ اسپتال اور حج امور کےلئے وقف رہیں گی۔

دعوتِ اسلامی کی مجلسِ تقسیمِ رسائل کے تحت بابُ المدینہ کراچی کے علاقے صدر کی موبائل مارکیٹ میں تقسیمِ رسائل کا سلسلہ ہوا۔جس میں نگرانِ مجلس تقسیم رسائل نے زون ذمّہ دار اور دیگر اسلامی بھائیوں کے ہمراہ دکان دکان جاکر رسائل ریکس کا تعارف پیش کیا اور تقسیمِ رسائل کی ترغیب دلائی۔ واضح رہےکہ دعوتِ اسلامی کے شعبہ جات میں سے ایک شعبہ ”مجلسِ تقسیمِ رسائل“بھی ہے جس کے تحت مارکیٹوں ، بازاروں ، بزرگان ِدین کے اعراس اور دیگر سنّتوں بھرے اجتماعات کے موقع پر بالخصوص مدنی رسائل کی تقسیم اور دکانوں پر رسائل ریکس رکھنے کا سلسلہ ہوتا ہے۔

دعوتِ اسلامی کی مجلسِ رابطہ کے تحت مرکز الاولیاء لاہور کے پولیس ٹریننگ سینٹر کالج میں سنّتوں بھرے اجتماع کا انعقاد کیا گیا جس میں مرکزی مجلسِ شوریٰ کے رکن مولانا محمد عمران عطاری مَدَّظِلُّہُ الْعَالِی نے سنّتوں بھرا بیان کی ااور شرکا کو دعوتِ اسلامی کا تعارف پیش کرتے ہوئے مدنی پھولوں سے نوازا۔علاوہ ازیں نگرانِ شوریٰ نے ڈی آئی جی فرحان مرزابیگ (کمانڈر پولیس ٹریننگ کالج لاہور) سے ملاقات کی جبکہ ڈی آئی جی فرحان مرزابیگ کی جانب سے مولانامحمد عمران عطاری مَدَّظِلُّہُ الْعَالِی کو اعزازی شیلڈ بھی پیش کی گئی۔

دعوتِ اسلامی کے اراکینِ شوریٰ وقتاً فوقتاً ملک وبیرونِ ملک سنّتوں کی خدمت کے مقدّس جذبے کے تحت سفر کرتے رہتے ہیں، پچھلے دنوں مدنی کاموں کے جدول کے سلسلے میں مرکزی مجلسِ شوریٰ کے نگران مولانامحمد عمران عطاری مَدَّظِلُّہُ الْعَالِی نے پاکستان کے صوبہ پنجاب کا سفر کیا۔نگرانِ شوریٰ مولانا محمد عمران عطاری مَدَّظِلُّہُ الْعَالِی نے صوبائی اسمبلی کے ممبران، صحافیوں و دیگر شخصیات سے ملاقات کی اور انہیں دعوتِ اسلامی کا تعارف پیش کرنے کے ساتھ ساتھ ان کے درمیان سنّتوں بھرا بیان بھی فرمایا۔

باب الاسلام سندھ امجدی زون کی پاک امجدی کابینہ کے شہر زم زم نگر حیدرآبادکے علاقے آفندی ٹاؤن میں واقع دعوت اسلامی کے مدنی مرکزفیضان مدینہ میں مجلس مدرستہ المدینہ کے مدرسین ،ناظمین اور مدنی عملے کا عید ملن اجتماع ہوا۔ رکن شوریٰ حاجی محمد فاروق جیلانی عطاری نے سنتوں بھرا بیان فرماتے ہوئے ارشاد فرمایا کہ ہر مدرس اور ناظم اپنے مدرسے میں تعلیم حاصل کرنے والے مدنی منوں کے سرپرستوں کو دعوت اسلامی کے ہفتہ وار اجتماع میں شرکت کروائے اور اجتماع کے بعد دعائیں سیکھنےاور سکھانے کے مدنی حلقوں میں بھی شرکت کریں۔ رکن شوریٰ نے مدرستہ المدینہ کے تمام ذمہ داران کوترغیب دلائی کہ انہیں ماہ ذوالحجہ میں قربانی کی کھال جمع کرنے کی بھرپور کوشش کرنی ہے ۔آخر میں رکن شوریٰ نے ماہ رمضان میں مدنی عطیات جمع کرنے والے اسلامی بھائیوں میں تحائف پیش کئے اور ان سے ملاقات بھی کی۔

مرکزالاولیاء لاہور میں دعوتِ اسلامی کے مبلغ حافظ فیضان عطاری پچھلے دنوں کینسر کے مرض میں مبتلا ہوکر انتقال کرگئے تھے۔ مجلسِ شعبۂ تعلیم کے تحت مرحوم کے ایصالِ ثواب کے لئےسنّتوں بھرے اجتماع کا انعقاد کیاگیا جس میں مرحوم کے اہل و عیال، عزیز و اقارب، اہلِ علاقہ،شعبۂ تعلیم سے وابستہ شخصیات اور دیگر اسلامی بھائیوں نےشرکت کی۔ مبلغِ دعوتِ اسلامی نے سنّتوں بھرا بیان کیااور شرکا کو مدنی پھول دیتے ہوئے دعوتِ اسلامی کے مدنی کاموں کا تعارف پیش کیا اور انہیں مدنی ماحول سے وابستہ رہنے کا ذہن دیا۔

دعوتِ اسلامی کے تحت مرکزالاولیاء لاہور کے علاقے سوڈیوال میں عید مِلن اجتماع کا انعقاد کیاگیا جس میں اس رمضانُ المبارک میں اعتکاف کی سعادت پانے والے معتکفین، اہل علاقہ اور دیگر اسلامی بھائیوں نے کثیرتعداد میں شرکت کی۔ رکنِ شوریٰ حاجی یعفور رضاعطاری نے سنّتوں بھرا بیان فرماتے ہوئے شرکاکو ترغیب دلائی کہ آپ کا دوست وہ ہوناچاہئے جو خود بھی نماز پڑھے، نیکی کے کام کرے اور آپ کو بھی اس کی دعوت دے، ایسے دوست ہرگز نہ بنائیے جو آپ کو گناہوں کی دَلدَل میں پھنسا دے نیز رکنِ شوریٰ نے شرکا کو دعوتِ اسلامی کے تحت ہونے والے ہفتہ وارسنّتوں بھرے اجتماع میں شرکت کرنے کی ترغیب بھی دلائی۔