5مارچ 2021ء کو مدنی مرکز فیضانِ مدینہ فیصل آباد میں ذمہ داران کا مدنی مشورہ ہوا جس میں نگران ریجن، نگران زون اور پاکستان سطح کے ذمہ داران نے شرکت کی۔

مرکزی مجلس شوریٰ کے نگران مولانا محمد عمران عطاری مَدَّظِلُّہُ الْعَالِی نے شرکا کی تربیت کی اور مدنی کا موں کی کارکردگی کاجائزہ لیا۔ نگران شوریٰ نے انہیں پاکستان بھر میں دینی کاموں کی دھومیں مچانے، ذمہ داران کو فعال کرنے، ذمہ داران کی تقرری کرنے، ہفتہ وار اجتماع و مدنی مذاکرے کی تعداد میں اضافہ کرنے، زیادہ سے زیادہ عاشقان رسول کو مدنی قافلوں میں سفر کروانے اور اپنے اپنے شعبے کی کارکردگی بہتر سے بہترین بنانے کا ہدف دیا اور مدنی پھول ارشاد فرمائے۔

اس موقع پر نگران پاکستان مشاورت حاجی محمدشاہد عطاری، مولانا حاجی عبد الحبیب عطاری، حاجی ابو ماجد محمد شاہد عطاری مدنی، حاجی اظہر عطاری، حاجی محمد علی عطاری، حاجی امین قافلہ عطاری، حاجی یعفور رضا عطاری، حاجی جنید عطاری مدنی، حاجی وقار المدینہ عطاری، حاجی فضیل عطاری اور حاجی محمد اسلم عطاری بھی موجود تھے۔ 

دعوت اسلامی کی مرکزی مجلس شوریٰ کے نگران مولانا محمد عمران عطاری مَدَّظِلُّہُ الْعَالِی نے رکن شوریٰ حاجی یعفور رضا عطاری کے ہمراہ لاہور میں پاکستان مسلم لیگ ق کے صدر اور سابق وزیر اعظم چوہدری شجاعت حسین اور اسپیکر پنجاب اسمبلی چوہدری پرویز الٰہی سے ان کی رہائش گاہ پر ملاقات کی اور چوہدری شجاعت حسین کی خیریت دریافت کی۔

نگران شوریٰ نے چوہدری شجاعت حسین کو دعوت اسلامی کے تحت ہونے والے دینی و فلاحی کاموں کے متعلق آگاہی فراہم کی جس پر سربراہ مسلم لیگ ق چوہدری شجاعت حسین اور اسپیکر پنجاب اسمبلی چوہدری پرویز الٰہی نے دینِ اسلام کے لئے دعوت اسلامی کے تحت کی جانے والی کاوشوں کو سراہا۔ اس موقع پر نگران شوریٰ نے چوہدری شجاعت حسین کی صحت یابی کے لئے دعا فرمائی اور چوہدری برادران کو عالمی مدنی فیضان مدینہ کراچی کے دورے کی دعوت بھی پیش کی۔

دعوت اسلامی کی مرکزی مجلس شوریٰ کے نگران مولانا محمد عمران عطاری مَدَّظِلُّہُ الْعَالِی نے 4 مارچ 2021ء کو اراکین شوریٰ مولانا عبد الحبیب عطاری اور حاجی وقار المدینہ عطاری کے ہمراہ چوہدری اظہر حیات ہنجرا (چیئرمین ہنجرا گروپ آف کمپنیز) سے ملاقات کی۔

نگران شوریٰ نے انہیں دعوت اسلامی کی مختلف ایکٹیویز کے بارے میں بریفنگ دی اورعالمی مدنی مرکز فیضان مدینہ کراچی کے وزٹ کی دعوت پیش کی۔ مولانا عمران عطاری انہیں دعوت اسلامی کے ساتھ تعاون کرنے کا بھی ذہن دیا۔

دعوت اسلامی کے زیر اہتمام 15 مارچ 2021ء سے پاکستان بھر میں اسلامی بہنوں کے لئے 30 دن پر مشتمل ”فہم القرآن کورس“ شروع ہونے جارہا ہے۔کورس کا دورانیہ روزانہ 72 منٹ ہوگاجسے اسلامی بہنیں صبح 9 سے اذان عصر تک اپنی سہولت کے حساب سے کسی بھی وقت رکھ سکتی ہیں۔یہ کورس علاقہ سطح پر کروایا جائیگا۔

کورس میں شرکت کرنے والی اسلامی بہنوں کو (1)قرآن پاک کی منتخب کردہ سورتوں میں سے آیات قرآنی اور تفسیر پڑھائی جائیگی (2)مدنی قاعدہ اور اذکار نمازسکھائے جائیں گے (3)سیرت حضرت عائشہ صدیقہ رضی اللہ عنہا پر درس ہوگا۔

کورس کی شرائط: (1)ناظرہ قرآن پاک پڑھی ہوئی ہو (2)اردو پڑھنا ، لکھناجانتی ہو (3)عمر 14 سال سے زیادہ ہو

واضح رہے کہ کورس میں داخلے کی آخری تاریخ 14 مارچ 2021ء ہے جس کے لئے صبح 10 سے دوپہر 2:30 بجے تک رابطہ کیا جاسکتا ہے۔

کورس میں داخلہ لینے کے لئے صرف اسلامی بہنیں اس نمبر پر رابطہ کرسکتی ہیں:03110104462

دعوت اسلامی کے زیر اہتمام 3 مارچ 2021ء کو اسلام آباد میں مدنی حلقہ ہوا جس میں سرکاری سطح کے اعلیٰ افسران نے شرکت کی۔

مرکزی مجلس شوریٰ کے نگران مولانا محمد عمران عطاری مَدَّظِلُّہُ الْعَالِینے سنتوں بھرا بیان کیا اور انہیں دعوت اسلامی کے مختلف ڈیپارٹمنٹ کا تعارف پیش کرتے ہوئے انہیں دینی ماحول سے وابستہ ہونے اور اپنی اولاد کو نیکی کے کاموں کی طرف راغب کرنے کی ترغیب دلائی۔

اس موقع پر اراکین شوریٰ حاجی مولانا عبد الحبیب عطاری اور حاجی وقار المدینہ عطاری بھی موجود تھے۔ 

شعبہ تعلیم دعوت اسلامی کے زیر اہتمام 3 مارچ 2021ء کو انٹرنیشنل سطح پر اسٹوڈنٹس اجتماع کا انعقاد کیا گیا جس میں ملک و  بیرون ملک میں 525 مقامات پر اسٹوڈنٹس اور ایجوکیشن سے وابستہ افراد نے کثیر تعداد میں شرکت کی۔

مدنی مرکز فیضان مدینہ اسلام آباد سے مرکزی مجلس شوریٰ کے نگران مولانامحمد عمران عطاری مَدَّظِلُّہُ الْعَالِینے مدنی چینل کے ذریعے سنتوں بھرا بیان کیا۔ نگران شوریٰ کا جوانی میں عبادت کرنے کے حوالے سے مدنی پھول بیان کرتے ہوئےکہنا تھا کہ حضرت علامہ زین الدین عبد الرحمن ابن رجب حنبلی رحمۃ اللہ علیہ جوانی میں عبادت کے تعلق سے ارشاد فرماتے ہیں: جس شخص نے اللہ کو اس وقت یاد رکھا جب وہ جوان وتندرست تھاتو اللہ عَزَّوَجَلَّ اُس کا اُس وقت خیال فرمائے گا جب وہ بوڑھا اور کمزور ہوجائیگااور اُسے بُڑھاپے میں اچھی قوت، اچھی سماعت، اچھی بصارت ، طاقت ، ذہانت عطا فرمائیگا۔ نگران شوریٰ نے مزید کہا کہ حضرت سیدنا ابو طیب طبری رحمۃ اللہ علیہ نے 100 سال سے زیادہ عمر پائی ہے، آپ ذہنی اور جسمانی لحاظ سے تندرست اور توانا تھے،آپ سے کسی نے صحت کا راز پوچھا تو فرمایا کہ میں جوانی میں اپنی جسمانی صلاحیتوں کو گناہوں سے محفوظ رکھا اورآج میں بوڑھا ہوگیا ہوں تو اللہ عَزَّوَجَلَّ نے انہی میرے لئے باقی رکھا۔مولانا عمران عطاری نے شرکا کو ترغیباً ارشار فرمایا کہ ہمیں جوانی میں عبادت کے ذریعے اللہ عَزَّ وَجَلَّ کو راضی کرنا چاہیئے کیونکہ جوانی رب کو راضی کرنے کے لئے ہے۔ آپ نے جوانی پر حدیث پاک بیان کرتے ہوئے فرمایا کہ ہمارے آقا مکی مدنی مصطفےٰ صلَّی اللہ علیہ واٰلہٖ وسلَّم نے فرمایا کہ” اپنی جوانی میں عبادت کرنے والے نوجوان کو بُڑھاپے میں عبادت کرنے والے بوڑھے پر ایسی فضیلت حاصل ہے جیسے مرسلین کو تمام نبیوں پر“۔مولاناعمران عطاری نے اسٹوڈنٹس کو ہر معاملات میں اللہ عَزَّوَجَلَّ پر تَوَکُّل کرنے اور دنیاوی تعلیم کے ساتھ ساتھ دینی تعلیم حاصل کرنے کی بھی ترغیب دلائی۔

3مارچ 2021ء کو چیمبر آف کامرس اسلام آباد میں ایک میٹنگ ہوئی جس میں دعوت اسلامی کی مرکزی مجلس شوریٰ کے نگران مولانا محمد عمران عطاری مَدَّظِلُّہُ الْعَالِی ،اراکین شوریٰ کے مولانا عبد الحبیب عطاری اور حاجی وقار المدینہ عطاری سمیت ادارے کی مختلف شخصیات نے شرکت کی۔

میٹنگ میں شرکا کو دعوت اسلامی کا تعارف پیش کیا گیااور مختلف اہم امور زیر غور آئے۔میٹنگ کے بعد چیمبر آف کامرس کی جانب سے دعوت اسلامی کو شیلڈز بھی پیش کی گئی۔

2 مارچ 2021ء کو دعوت اسلامی کے زیر اہتمام لاہور کے علاقے ڈیفنس میں شخصیات اجتماع کا انعقاد کیا گیا جس میں مختلف شعبے سے وابستہ شخصیات، بزنس مین،سیاسی و سماجی شخصیات  اوردیگر عاشقان رسول نے شرکت کی۔

مرکزی مجلس شوریٰ کے نگران مولانا محمد عمران مَدَّظِلُّہُ الْعَالِی نے ”گھر کو امن کا گہوارہ بنانے اور چلانے“ کے موضوع پر سنتوں بھرا بیان فرمایا اور انہیں اپنے گھروں میں دینی ماحول بنانے کی ترغیب دلائی۔

اس موقع پر رکن شوریٰ حاجی یعفور رضا عطاری اور دیگر ذمہ داران دعوت اسلامی بھی موجود تھے

2مارچ 2021ء کو مدنی مرکز فیضان مدینہ جوہر ٹاؤن لاہورمیں شعبہ پروفیشنلز ڈیپارٹمنٹ کے زیر اہتمام اجتماع کا انعقاد کیا گیا جس میں مختلف شعبے سے وابستہ  پروفیشنلز حضرات نے شرکت کی۔

مرکزی مجلس شوریٰ کے نگران مولانا محمد عمران عطاری مَدَّظِلُّہُ الْعَالِی نے ”کردار سازی“ کے موضوع پر سنتوں بھرا بیان کیااور شرکا کو دعوت اسلامی کے دینی ماحول سے وابستہ ہونے کی دعوت دی۔ نگران شوریٰ نے ان کے درمیان گناہوں سے بچنے کے حوالے سے مدنی پھول ارشاد فرمائے۔

اس موقع پر رکن شوریٰ حاجی یعفور رضا عطاری اور نگران پاکستان شعبہ پروفیشنلز ڈیپارٹمنٹ محمد ثوبان عطاری موجود تھے۔

شعبہ مدرسۃ المدینہ بالغان دعوت اسلامی کے زیر اہتمام رواں ماہ میں وقتاً فوقتاً لاہور ریجن میں 103 مقامات پر ”ختم قرآن اجتماعات“ منعقد ہونگےجس میں مبلغین دعوت اسلامی سنتوں بھرے اجتماعات بیانات فرمائیں گے۔ ان اجتماع میں 580 ناظرہ قرآن پاک اور 1496 اسلامی بھائیوں کو  مدنی قاعدہ مکمل کرنے پر اسناد پیش کی جائیں گی۔

(04 مارچ ،کراچی) تفصیلات کے مطابق دعوتِ اسلامی کے عالمی مدنی مرکز فیضانِ مدینہ کراچی میں  درسِ شمائلِ ترمذی کے اختتام پرایک پُر وقار تقریب کا اہتمام کیا گیا جس میں جامعۃ المدینہ فیضانِ مدینہ عالمی مدنی مرکز کے استاذہ و طلبہ نے شرکت کی سعادت حاصل کی۔

تقریب میں استاذ العلماء شیخِ الحدیث و التفسیر مفتی قاسم قادری دَامَتْ بَرَکَاتُہُمُ الْعَالِیَہ نے خصوصی بیان فرمایا۔

تقریب میں بیان کرتے ہوئے مفتی قاسم صاحب نے کہا کہ شفاشریف کادرس، شمائل کا درس ، قصیدۂ بردہ کا درس یا قصیدۂ ہمزیہ کا بیان یہ وہ چیزیں ہیں جو بزرگانِ دین ، اسلافِ امت اور علمائے عظام سے چلتی آرہی ہیں۔ سرکارِ دو عالم ﷺ کی عاداتِ مبارکہ، آپ کے احوال، آپ کے شب وروز، آپ کے اہلِ خانہ سے معمولات ، آپ کے ظاہری و باطنی جمال کے مجموعے کا نام شمائلِ محمدی ہے ۔

انہوں نے مزید بتایا کہ شمائل ِ محمدیہ پر اب تک اردو، عربی، فارسی اور دیگر زبانوں میں کئی کتابیں لکھی جاچکی ہیں مگر سب سے زیادہ مشہور و معروف کتاب شمائلِ ترمذی ہے جبکہ اردومیں حضرت علامہ مولانا شفیع اوکاڑوی صاحب رحمۃ اللہ علیہ کی لکھی ہوئی کتاب ”ذکرِ جمیل“ اس موضوع پر ایک شاندار تصنیف ہے۔ اشعار کی صورت میں بھی کئی شعراء نے شمائلِ رسول خدا بیان کئے ہیں جن میں قصیدۂ بردہ شریف کو ایک خاص مقام حاصل ہے۔

شیخ الحدیث مفتی قاسم قادری دَامَتْ بَرَکَاتُہُمُ الْعَالِیَہ نے مزید کہا کہ محدثین کا یہ طریقہ کار رہا ہے کہ جو کتاب وہ لکھتے اس کا درس بھی دیا کرتے تھے جیساکہ امام بخاری رحمۃ اللہ علیہ جب بخاری شریف کا درس دیتے تھے تو 90 ہزار طلبہ ان کے سامنے بیٹھے ہوتے تھے،لہذا سیرت اور شمائل کا جتنا بیان ہے وہ نقل دَر نقل چلتا آیا اور اسے جمع کیا گیا اور صحابۂ کرام کا معمول یہ تھا کہ جب آپس میں بیٹھتے تو نبی پاک علیہ السَّلام کی باتیں کیا کرتے، حتی کہ ظاہری حیاتِ طیبہ میں بھی صحابہ کا یہ معمول تھا کہ اگر کوئی صحابی اپنے کام کاج کی وجہ سے بارگاہِ رسالت سے دور ہوتے تو واپس آکر حاضرِ خدمت صحابہ سے پوچھا کرتے کہ حضور ﷺ نے کیا کیا ارشادات بیان فرمائے ہیں؟۔حضرت سیدنا عمر فاروقِ اعظم رضی اللہ عنہ نے ایک انصاری صحابی کے ساتھ باقاعدہ طے کیا ہوا تھا کہ ہم دونوں میں سے کوئی ایک ہر وقت نبی پاک ﷺ کے پاس بہرحال رہےگا جب میں کام پر جاؤں تو تم ساتھ رہنا، جب تم جاؤگے تو میں ساتھ رہوں گا تاکہ میں جو سنوں تمہیں بتاؤں گا جو تم سنو وہ مجھے بتادینا۔

مفتی صاحب نے صحابہ کرام علیہم الرضوان کا نبی پاک علیہ السَّلام کے ادب کے متعلق بیان کرتے ہوئے کہا کہ شیخین کریمین کے علاوہ کوئی صحابی آنکھ اٹھا کر حضور ﷺ کی زیارت نہ کرتا ۔ حضرت سعد بن ابی وقاص رضی اللہ عنہ فرماتے ہیں اگر تم مجھ سے حضور ﷺ کے مبارک چہرے اور حلیے کے متعلق سوال کرو گے تو تمہیں بیان نہیں کرسکتا ، کیونکہ میں نے زندگی بھر ادب اور تعظیم کی وجہ سے حضور ﷺ کو آنکھیں بھر کر دیکھا ہی نہیں ہے۔ حالانکہ آپ شروع میں ہی اسلام لے آئے تھے۔

تقریب کے اختتام پر بانیِ دعوتِ اسلامی حضرت علامہ مولانا محمد الیاس عطار قادری ضیائی دَامَتْ بَرَکَاتُہُمُ الْعَالِیَہ کا آڈیو پیغام بھی نشر کیا گیا جس میں آپ دَامَتْ بَرَکَاتُہُمُ الْعَالِیَہ نے مدرسِ شمائلِ ترمذی شریف مفتی حسان عطاری مدنی کو مبارکباد پیش کی اورخصوصی دعاؤں سے نوازا۔

واضح رہے کہ پچھلے کئی مہینوں سے استاذالبخاری مفتی حسان عطاری مدنی مُدَّظِلُّہُ الْعَالِی شمائلِ ترمذی شریف کا درس دیتے ہوئے طلبہ کرام اور مدنی چینل کے ناظرین کے دِلوں میں عشقِ رسول کی شمع فروزاں کررہے تھے۔یکم نومبر 2019ء سے شروع ہونے والا 48 نشستوں پر مشتمل یہ درس آج مفتی اہلِ سنت اور عظیم محقق مفتی قاسم قادری مُدَّظِلُّہُ الْعَالِی کی موجودگی میں اپنے اختتام کو پہنچا۔یہ تمام Episodes انٹرنیٹ کے ذریعے دیکھے سنےجاسکتے ہیں۔ 

دعوت اسلامی کے زیر اہتمام یکم مارچ 2021ء کو لبابہ مارکی، نزد دربار کرمانوالہ شریف، جی ٹی روڈ اوکاڑہ میں سنتوں بھرے اجتماع کا انعقاد کیا گیا جس میں کثیر تعداد میں عاشقانِ رسول نے شرکت کی۔

مرکزی مجلس شوریٰ کے رکن حاجی مولاناعبد الحبیب عطاری نے سنتوں بھرا بیان کیا اور شرکاکو سنت رسول کے مطابق زندگی گزارنے کی ترغیب دلائی۔ رکن شوریٰ نے انہیں دینی کاموں میں شرکت کرنے اور نیکی کے کاموں میں بڑھ چڑھ کر حصہ لینے کا ذہن دیا۔

‫