تفصیلات کے مطابق پچھلے 9 سالوں سے ماہِ صفر المظفر میں ہونے والا کوئز پروگرام ”ذوقِ نعت“   منسوخ کردیا گیا ہے۔ پروگرام کے میزبان مولانا اشفاق عطاری مدنی کا کہنا ہے کہ اس وقت ملک پاکستان میں بارشوں اور سیلابی صورتِ حال کے باعث عاشقانِ رسول بڑی آزمائش کا شکار ہیں اور ملک بھر کے ذمہ دارانِ دعوتِ اسلامی اپنے ہم وطنوں کی خدمت میں مصروف ہیں، اسی وجہ سے ذوقِ نعت کو منسوخ کیا گیا ہے۔ انہوں نے مزید بتایا کہ منسوخی کی ایک وجہ یہ بھی ہے کہ ملک بھر سے ہمارے پروگرام میں شامل ہونے والی ٹیموں کے اسلامی بھائیوں کو کراچی پہنچنے میں بھی آزمائشوں کا سامنا ہے، کیونکہ سیلابی صورتِ حال کے باعث کراچی کا کئی شہروں سے زمینی راستہ منقطع ہوچکا ہے۔

سوشل میڈیا صارفین سے بات کرتے ہوئے انہوں نےمزید بتایا کہ 25 صفر المظفر کو عرس اعلیٰ حضرت ضرور منایا جائے گا اور فیضانِ رضا پروگرام بھی نشر کیا جائے گا۔

واضح رہے کہ 02 ستمبر کو ہونے والا ”ذہنی آزمائش اسپیشل پروگرام“ بھی انہیں وجوہات کی بناپر کینسل ہوچکا ہے۔ جس کا اعلان دو روز قبل مدنی مذاکرے میں کردیا گیا تھا۔