دعوتِ اسلامی کے  شعبہ مدنی کورسز کی جانب سے 23 جولائی 2023ء کو اقبال ٹاؤن لاہور ڈویژن میں سیکھنے سکھانے کے حلقے کا انعقاد کیا گیا جس میں مقامی عاشقانِ رسول نے شرکت کی۔

سب ٹاؤن کورسز ذ مہ دار ابرار حسین عطاری نے اسلامی بھائیوں کو سیکھنے سکھانے کے حلقے میں غسل کے مسائل سکھائے اور انہیں نیکی کی دعوت پیش کرتے ہوئے 12 دینی کاموں کو کرنے کی ترغیب دلائی نیز ہفتہ وار اجتماع میں شرکت کرنے ، ماہِ محرم الحرام کے مدنی قافلے میں سفر کرنے کا ذہن دیا جس پر انہوں نے نیک خواہشات کا اظہار کیا۔(کانٹینٹ:رمضان رضا عطاری)

دعوتِ  اسلامی جہاں پاکستان میں لوگوں کے دینی، اخلاقی اور معاشرتی معاملات کے حوالے سے کام کررہی ہے وہیں بیرونِ ملک میں بھی لوگوں کی اصلاح اور اُن کی امداد کے لئے ہر وقت کوشاں ہے۔

تفصیلات کے مطابق ویسٹ مڈلینڈز یوکے میں دینی، فلاحی اور معاشرتی کاموں میں اعلیٰ و نمایاں خدمات سرانجام دینے پر اس سال 2023ء میں مڈلینڈز پولیس اینڈ کرائم کمشنر (Police and crime commissioner)کی جانب سے برمنگھم دعوتِ اسلامی سے تعلق رکھنے والے، نگرانِ ویلز یوکے اور فیضان گلوبل ریلیف فاؤڈیشن برطانیہ کے ہیڈ پاکستانی نژاد سیّد فضیل رضا عطاری کو Outstanding citizen award اور تعریفی اسناد دے کر بہترین شہری ہونے کا اعزاز دیا گیا۔

یہ ایوارڈ ہر سال مڈلینڈز پولیس کی جانب سے ایسے شخص کو دیا جاتا ہے جو اس معاشرے کے لئے قابلِ فخر ہو، اس نے کئی خدمات سرانجام دی ہوں، اُس کا معاشرے میں ایک نمایاں کردار ہو، پھر سروے کر کے ایک کمیٹی لاکھوں افراد میں کسی ایسے شخص کا انتخاب کرتی ہے جو اس معاشرے کا سب سے شاندار شہری ہو۔

ویسٹ مڈلینڈز کے کم و بیش چھ ملین (یعنی 60 لاکھ )افراد میں سے دعوتِ اسلامی کے ذمہ دار اور نگرانِ ویلز یوکے سیّد فضیل رضا عطاری کو یہ ایوارڈ ملنا، نا صرف ہمارے لئے بلکہ ملکِ پاکستان کے لئے فخر کی بات ہے کہ وہاں کی کمیٹی نے ساٹھ لاکھ افراد میں سےاس ایوارڈ کے لئے ایک پاکستانی کا انتخاب کیا۔

اس موقع پر نگرانِ ویلز یوکے سیّد فضیل رضا عطاری نے یہ اعزاز دعوتِ اسلامی کی طرف منسوب کرتے ہوئے کہا کہ اگر دعوتِ اسلامی کا دینی ماحول نہ ہوتا تو یہ ایوارڈ بھی نہ ہوتا۔دعوتِ اسلامی صرف ایک مذہبی تحریک ہی نہیں ہے بلکہ معاشرے کی خرابیوں کو درست کرنے میں بھی اہم کردار ادا کررہی ہے۔

اُن کا مزید کہنا تھا کہ برطانیہ کی جیلوں میں اصلاحی کام، چاقو کے جرائم، صحت و صفائی، منشیات کے خلاف ورکشاپس کا انعقاد، کرونا وائرس کے دوران مثالی کام، شجرکاری جیسی مہم اور اسی طرح کے دیگر پروگرامز کرنا کسی فردِ واحد کا کام نہیں ہے، اس میں دعوتِ اسلامی سے تعلق رکھنے والا ایک ایک فرد شامل ہے۔یہ ایوارڈ اُن کے نام کرتاہوں اور ہماری کوشش ہوگی کہ دنیاوی ایوارڈز کی پرواہ کئے بغیر اسی طرح کے اصلاحی کام جاری رہیں۔(کانٹینٹ:غیاث الدین عطاری)

پچھلے دنوں شعبہ تحفظ اوراق مقدسہ کے زیرِ اہتمام  شعبے کے ذمہ دار اسلامی بھائیوں نے شیرانوالہ گیٹ میں واقع جامعۃُ المدینہ بوائز فیضانِ امیر معاویہ نزد عطاری پلازہ اور اقصی مسجد میں قائم جامعۃ ُالمدینہ بوائز و مدرسۃالمدینہ بوائز سمیت مغلیہ پارک کے قریب واقع مدرسۃ المدینہ بوائز بنام فیضانِ عطار کا دورہ کیا ۔

شعبہ تحفظ اوراق مقدسہ کے ذمہ د اران نے ناظمین (مولانا محمد کامران عطاری مدنی ، مولانا محمد عدیل عطاری مدنی ، مولانا محمد طیب عطاری مدنی، قاری محمد بلال عطاری اور قاری محمد علی عطاری )سے ان کے جامعات اور مدارس المدینہ میں ملاقاتیں کیں ۔

دورانِ ملاقات ذمہ داران نے شعبہ تحفظ اوراق مقدسہ کے تحت ہونےو الے دینی کاموں کے متعلق بتایا اور ناظمین و مدرسین کو بھی شعبے کے تحت ہونے والے دینی کاموں میں حصہ لینے کا ذہن دیا جس پر انہوں نے اچھی اچھی نیتیں کیں۔( کانٹینٹ:رمضان رضا عطاری) 

دعوتِ اسلامی کے شعبہ مدنی کورسز کے زیرِ اہتمام 21 جولائی 2023ء  کو اقبال ٹاؤن لاہور میں میٹ اپ ہوا جس میں ڈسٹرکٹ کے معلمین نے شرکت کی۔

معلومات کے مطابق ڈسٹرکٹ ذمہ دار محمد ابوبکر عطاری مدنی نے جزوقتی کورسز کروانے والے معلمین کو جز وقتی کورسز سے کل وقتی کورسز یعنی رہائشی کورسز کے لئے اسلامی بھائیوں کوتیار کرنے کا ہدف دیا اور شعبہ کے متعلقہ دیگر دینی کام کرنے سے متعلق آگاہی دی۔ ( کانٹینٹ:رمضان رضا عطاری)

21 جولائی 2023ء   بروز جمعۃ المبارک کراچی کے علاقے چنیسر ٹاؤن میں موجود فاطمہ مسجد میں شعبہ کفن دفن دعوتِ اسلامی کے تحت سیکھنے سکھانے کا حلقہ لگایا گیا جس میں ٹاؤن ذمہ دار محسن عطاری اور ٹاؤن کے اسلامی بھائیوں نے شرکت کی۔

مبلغِ دعوتِ اسلامی عزیر عطاری نے شرکا کو غسلِ میت دینے کی فضیلت بیان کرتے ہوئے اس کے مسائل بتائے اور غسلِ میت دینے کا طریقہ بتانے کے ساتھ ساتھ کفن کاٹنے اور پہنانے کا طریقہ بھی سکھایا۔(رپورٹ: شعبہ کفن دفن ، کانٹینٹ:رمضان رضا عطاری)

عاشقانِ رسول  کی دینی تحریک دعوتِ اسلامی کے زیرِ اہتمام 20جولائی2023ء کو ملیر نشتر اسکوائر کی نورانی مسجد میں بعد نماز مغرب ہفتہ وار سنتوں بھرے اجتماع کا انعقاد ہوا جس میں مقامی اسلامی بھائیوں کے علاوہ ذمہ داران نے شرکت کی ۔

مرکزی مجلسِ شوریٰ کے رکن مولاناحاجی محمدعقیل عطاری مدنی نے’’فاروق اعظم رضی اللہ عنہ کے اعلیٰ اوصاف‘‘ کے موضوع پر بیان کیااور شرکائے اجتماع کو مسلمانوں کے دوسرے خلیفہ حضرت عمر فاروق اعظم کی ذات میں موجود اعلیٰ صفات میں سے خوفِ خدا،نماز کی پابندی،قناعت اور عدل و شجاعت کو اپنانے کی ترغیب دلائی۔ بیان کے بعد ذکراللہ اور دعا ہوئی نیز صلوۃ وسلام پر پہلی نشست مکمل ہوئی۔

بعد نماز عشا سنتیں اور آداب سیکھنے سکھانے کے حلقے میں رکنِ شوریٰ نے شرکا کی تربیت فرمائی اور انہیں دعا بھی یاد کروائی۔( کانٹینٹ:رمضان رضا عطاری)

20جولائی2023ءکو دعوتِ اسلامی کی مرکزی مجلس شوریٰ کے رکن  مولاناحاجی محمدعقیل عطاری مدنی نےکراچی نشتر اسکوائر ملیر کے رہائشی وسیم عطاری کی بیماری پر گھر جاکر انکی عیادت کی اور دعائے صحت کروائی ۔

عیادت کے لئے رکنِ شوریٰ کے ساتھ شعبہ ائمہ مساجد کراچی سٹی کے ذمہ دار سید سرفراز شاہ عطاری ، نگران ٹاؤن محمدراحیل عطاری اور اراکین ٹاؤن بھی موجودتھے۔

رکنِ شوریٰ نے وسیم عطاری کو بیماری پر صبر کرکے اجر کمانے اورباقاعدہ علاج مکمل کروانے کے ساتھ ساتھ صدقہ دینے کی ترغیب دلائی اور صدقے کے فضائل بھی بتائے۔ وسیم عطاری نے عیادت کے لئے آنے اور دعائے صحت کرنے پر خوشی کا اظہار کرتے ہوئے رکنِ شوریٰ کا شکریہ ادا کیا۔( کانٹینٹ:رمضان رضا عطاری) 

نیکی کی دعوت دینے کے سلسلے  میں 21جولائی2023ءکو دعوتِ اسلامی کی مرکزی مجلسِ شوریٰ کے رکن مولاناحاجی محمدعقیل عطاری مدنی نے کراچی کے علاقے مشرف کالونی حب ریور روڈ کا دورہ کیا۔

جہاں رکنِ شوریٰ نے جامع مسجد فیضان اسماعیل میں نماز جمعہ کے موقع پر سنتوں بھرا بیان فرمایا جس میں مسلمانوں کے دوسرے خلیفہ حضرت عمر فاروق اعظم رضی اللہ عنہ کی نرالی عادات اور کرامات بتائیں اور شرکا کو سیرتِ فاروق اعظم رضی اللہ عنہ کے مطابق اپنی زندگی کے شب و روز گزارنے،عہدے کی ذمہ داریوں کو پورا کرنے نیز راہِ خدا میں خرچ کرنے اور مساجد کی آباد کاری میں اپنا حصہ شامل کرنے کی ترغیب دلائی۔

اس موقع پر کراچی سٹی ائمہ مساجد کے ذمہ دارسید سرفراز عطاری،ڈسٹرکٹ کیماڑی کےنگران عبدالرحیم عطاری،شعبہ ائمہ مساجد کے ڈسٹرکٹ ذمہ دار سید قسیم عطاری مدنی اور دیگر ذمہ داران بھی موجود تھے۔( کانٹینٹ:رمضان رضا عطاری) 

گزشتہ روز عاشقانِ رسول کی دینی تحریک دعوتِ اسلامی کے تحت شعبہ تعلیم کے ذمہ دار اسلامی بھائیوں نے سکردو، صوبہ گلگت بلتستان کے مقامی تعلیمی ادارے میں مختلف ٹیچرز سے ملاقات کی۔

دورانِ ملاقات نگرانِ شعبہ تعلیم عبد الوہاب عطاری نے ٹیچرز کو شعبہ تعلیم دعوتِ اسلامی کے دینی کاموں کے متعلق بتایااور اپنی کلاسز میں اسٹوڈنٹس کی اخلاقی تربیت کرنے کا ذہن دیا۔(رپورٹ: شعبہ تعلیم، کانٹینٹ:غیاث الدین عطاری)

پچھلے دنوں شعبہ تعلیم دعوتِ اسلامی کے ذمہ دار اسلامی بھائیوں کی سکردو ڈویژن میں قائم پیرا میڈیکل کالج کے پرنسپل سے ملاقات ہوئی۔

تفصیلات کے مطابق کالج کے اسٹوڈنٹس کے درمیان ایک میٹ اپ ہوا جس میں نگرانِ شعبہ تعلیم عبد الوہاب عطاری نے بیان کرتے ہوئے اسٹوڈنٹس کو اپنے مسلمان بھائیوں کی خیرخواہی کرنے اور اُن کےساتھ ہمدردی کرنے کا ذہن دیا۔

علاوہ ازیں نگرانِ شعبہ نے دعوتِ اسلامی کی ڈیجیٹل سروسز اور سوشل پلیٹ فارمز کا تعارف کروایا نیز اسٹوڈنٹس کو ان سے فائدہ حاصل کرنے کی ترغیب بھی دلائی۔(رپورٹ: شعبہ تعلیم، کانٹینٹ:غیاث الدین عطاری)

نیکی کی دعوت عام کرنے کے سلسلے میں شعبہ تعلیم دعوتِ اسلامی کے تحت ذمہ دار اسلامی بھائیوں نے صوبہ گلگت بلتستان میں سکردو ڈویژن کے کمشنر شجاع عالم سے اُن کے آفس میں ملاقات کی۔

اس موقع پر نگرانِ شعبہ تعلیم عبد الوہاب عطاری نے مختلف امور پر گفتگو کرتےہوئے کمشنر کو دعوتِ اسلامی کے دینی و فلاحی کاموں کی پریزنٹیشن دکھائی اور شعبہ جات کا تعارف بھی کروایا۔

بعدازاں کمشنر شجاع عالم نے دعوتِ اسلامی کی دینِ متین کے لئے ہونے والی خدمات کو سراہا اور اپنی نیک خواہشات کا اظہار کیا۔(رپورٹ: شعبہ تعلیم، کانٹینٹ:غیاث الدین عطاری)

عاشقانِ رسول کی دینی تحریک دعوتِ اسلامی کے تحت گزشتہ روز شعبہ تعلیم کے ذمہ دار اسلامی بھائی دینی کاموں کے سلسلے میں صوبہ گلگت بلتستان کے شہر سکردو کے شیڈول پر تھے۔

اس دوران ذمہ داران میں موجود نگرانِ شعبہ تعلیم عبد الوہاب عطاری نے بلتستان یونیورسٹی کے رجسٹرار اور ٹیچرز سے ملاقات کی نیز انہیں دعوتِ اسلامی کے دینی و فلاحی کاموں کے بارے میں بریفنگ دی۔