نبیِ کریم صلی اللہ علیہ و الہ وسلم کے اوپر دین کا کا مل اور تمام ہونا، اس بات کو مستلزم ہے کہ آپ صلی اللہ علیہ واٰلہٖ وسلم آخری نبی ہیں، کیونکہ آپ کے بعد کسی اور نبی کا آنا اس وقت ممکن ہوتا، جب آپ کے دین اور آپ کی شریعت میں کوئی کمی ہوتی، جس کمی کو بعد میں آنے والا نبی پورا کرتا اور جب آپ کا دین کامل اور تمام ہے اور اس کا نامکمل ہونا ممکن نہیں ہے تو آپ کے بعد کسی اور نبی کا آنا بھی ممکن ہی نہیں، قرآنِ پاک میں ارشادِ باری ہے:اَلْیَوْمَ اَكْمَلْتُ لَكُمْ دِیْنَكُمْ وَ اَتْمَمْتُ عَلَیْكُمْ نِعْمَتِیْ وَ رَضِیْتُ لَكُمُ الْاِسْلَامَ دِیْنًاؕ- ترجمہ کنز الایمان: آج میں نے تمہارے لیے تمہارا دین کامل کردیا اور تم پر اپنی نعمت پوری کردی اور تمہارے لیے اسلام کو دین پسند کیا۔( پ6، المائدہ:3)ایک اور مقام پر اللہ پاک فرماتا ہے:مَا كَانَ مُحَمَّدٌ اَبَاۤ اَحَدٍ مِّنْ رِّجَالِكُمْ وَ لٰكِنْ رَّسُوْلَ اللّٰهِ وَ خَاتَمَ النَّبِیّٖنَؕ-ترجمۂ کنز الایمان:محمد تمہارے مردوں میں کسی کے باپ نہیں، ہاں اللہ کے رسول ہیں اور سب نبیوں کے پچھلے۔(پ 22، الاحزاب:40)احادیثِ مبارکہ کی روشنی میں:1۔ حضرت ابوہریرہ رضی اللہ عنہ بیان کرتے ہیں: رسول اللہ صلی اللہ علیہ واٰلہٖ وسلم نے فرمایا:میری مثال اور مجھ سے پہلے انبیائے کرام علیہم السلام کی مثال اس شخص کی طرح ہے، جس نے بہت حسین و جمیل گھر بنایا، مگر اس کے کونے میں ایک اینٹ کی جگہ چھوڑ دی، لوگ اس گھر کے گرد گھومنے لگے اور تعجب سے کہنے لگے:اس نے یہ اینٹ کیوں نہ رکھی؟ آپ نے فرمایا:میں (قصرِ نبوت کی) وہ اینٹ ہوں اور میں خاتم النبیین ہوں۔( بخاری،حدیث:3535)2۔حضرت سعد بن ابی وقاص رضی اللہ عنہ بیان کرتے ہیں، رسول اللہ صلی اللہ علیہ واٰلہٖ وسلم نے حضرت علی رضی اللہ عنہ سے فرمایا:تم میرے لئے ایسے ہو جیسے حضرت موسیٰعلیہ السلام کے لئے حضرت ہارون علیہ السلام تھے، مگر میرے بعد کوئی نبی نہیں ہوگا۔(بخاری، حدیث:4416)3۔حضرت انس بن مالک رضی اللہ عنہ بیان کرتے ہیں:رسول اللہ صلی اللہ علیہ واٰلہٖ وسلم نے فرمایا:بے شک رسالت اور نبوت منقطع ہو چکی ہے، پس میرے بعد کوئی نبی ہوگا، نہ رسول ہوگا۔(ترمذی، حدیث:2282)4۔حضرت قتادہ رضی اللہ عنہ بیان کرتے ہیں : نبی کریم صلی اللہ علیہ واٰلہٖ وسلم نے فرمایا:میں پیدائش میں سب سے پہلا ہوں اور بعثت میں سب سے آخر۔(کنزالعمال، حدیث31916)5۔حضرت ابوذر رضی اللہ عنہ فرماتے ہیں کہ رسول اللہ صلی اللہ علیہ واٰلہٖ وسلم نے فرمایا:اے ابو ذر! پہلے رسول آدم ہیں اور آخری رسول محمد صلی اللہ علیہ واٰلہٖ وسلم ہیں۔6۔حضرت عباس بن ساریہ رضی اللہ عنہ بیان کرتے ہیں:رسول اللہ صلی اللہ علیہ واٰلہٖ وسلم نے فرمایا:بے شک میں اللہ پاک کے نزدیک خاتم النبیین تھا اور بے شک (اس وقت) آدم اپنی مٹی میں گندھے ہوئے تھے۔(مسنداحمد، جلد 4، صفحہ 127)7۔حضرت ابوہریرہ رضی اللہ عنہ بیان کرتے ہیں:رسول اللہ صلی اللہ علیہ واٰلہٖ وسلم نے فرمایا:جب حضرت آدم علیہ السلام کو ہند میں اُتارا گیا تو وہ گھبرا گئے، پس جبرائیل علیہ السلام نے نازل ہوکر اذان دی: اللہُ اکبر اللہ ُاکبر، اشہد ان لا الہ الا اللہ دو دفعہ، اشہد ان محمد الرسول اللہ دو دفعہ، حضرت آدم علیہ السلام نے پوچھا :محمد صلی اللہ علیہ واٰلہٖ وسلم کون ہیں؟ حضرت جبرائیل علیہ السلام نے کہا:وہ آپ کی اولاد میں سے آخر الانبیاء ہیں۔(دمشق الکبیر، جلد 7، صفحہ 319، حدیث:1979)8۔حضرت ابوطفیل رضی اللہ عنہ بیان کرتے ہیں:رسول اللہ صلی اللہ علیہ واٰلہٖ وسلم نے فرمایا:میرے ربّ کے پاس 10 نام ہیں، حضرت ابو طفیل رضی اللہ عنہ نے کہا: مجھے ان میں سے آٹھ یاد ہیں: محمد، احمد، ابو القاسم، الفاتح(نبوت کا افتتاح کرنے والا)، الخاتم(نبوت کو ختم کرنے والا)، العاقب(جس کے بعد کوئی نبی نہ آئے)، الحاشر، الماحی(شرک کو مٹانے والا)۔(دلائل النبوت لا بی نعیم، ج1، 61، حدیث:2)9۔حضرت ابنِ زمل رضی اللہ عنہ نے ایک خواب دیکھا، نبی کریم صلی اللہ علیہ واٰلہٖ وسلم نے اس خواب کی تعبیر بیان کرتے ہوئے فرمایا:رہی وہ اونٹنی جس کو تم نے خواب میں دیکھا اور یہ دیکھا کہ میں اس اونٹنی کو چلا رہا ہوں، تو اس سے مراد قیامت ہے، نہ میرے بعد کوئی نبی ہوگا اور نہ میری اُمّت کے بعد کوئی اُمّت ہوگی۔(دلائل النبوۃ، جلد 7، صفحہ 38)10۔حضرت ابوہریرہ رضی اللہ عنہ معراج کی ایک طویل حدیث روایت کرتے ہیں، اس میں مذکور ہے کہ مسجدِ اقصیٰ میں نبیوں نے حضرت جبرائیل علیہ السلام کے متعلق پوچھا تو انہوں نے کہا: ہذا محمد رسول اللہ خاتم النبیین۔یہ محمد رسول اللہ خاتم النبیین ہیں۔11۔حضرت نعمان بن بشیر رضی اللہ عنہ بیان کرتے ہیں:حضرت زید بن خارجہ انصاری رضی اللہ عنہ جب فوت ہوگئے تو ان پر جو کپڑا تھا، اس کے نیچے سے آواز آرہی تھی، لوگوں نے ان کے سینے اور چہرے سے کپڑا ہٹایا تو ان کے منہ سے آواز آرہی تھی:محمد رسول اللہ النبی الامی خاتم النبیین ہیں، ان کے بعد کوئی نبی نہیں ہے۔(رسائل ابنِ ابی الدنیا، جلد 3، ص388)

علمائے حق کا اس بات پر اِتفاق ہے کہ مسئلۂ ختمِ نبوت کی احادیث متواتر ہیں۔  حدیثِ متواتر اس حدیث کو کہا جاتا ہے جسے آقا و مولی صلی اللہ علیہ واٰلہٖ وسلم سے روایت کرنے والے آپ کے زمانے مبارک سے لے کر آج تک اس قدر کثیر ہوں کہ کسی خلافِ واقعہ بات پر ان کا باہم اِتفاق کرکے جھوٹ بولنا محال ہو ، اُمّت کا اجماع ہے کہ متواتر حدیث پر ایمان لانا، قرآنِ مجید پر ایمان لانے کی طرف فرض اور اس کا انکار کفر ہے۔ کئی علما نے حدیثِ نبوی لا نبی بعدی کو بھی متواتر قرار دیا ہے۔ علامہ ابنِ کثیر رحمۃ اللہ علیہ رقمطراز ہیں:رسولِ معظم صلی اللہ علیہ واٰلہٖ وسلم کے آخری نبی ہونے کے متعلق احادیثِ متواتر وارد ہوئی ہیں، جنہیں صحابہ کرام رضی اللہ عنہم کی ایک جماعت نے بیان کیا۔(تفسیر ابنِ کثیر، کتابچہ ختمِ نبوت، باب دوم، احادیث اور ختم نبوت، ص 50)حضرت جبیر بن مطعم رضی اللہ عنہ سے روایت ہے، رسولِ اکرم صلی اللہ علیہ واٰلہٖ وسلم نے اِرشاد فرمایا: میں محمد ہوں، میں احمد ہوں، میں ماحی ہوں کہ اللہ پاک میرے ذریعے کُفر کو مٹائے گا، میں حاشر ہوں، میرے قدموں میں لوگوں کا حشر ہوگا، میں عاقب ہوں اور عاقب وہ ہوتا ہے جس کے بعد کوئی نبی نہ ہو۔( مسلم، کتاب الفضائل، بخاری، کتاب المناقب)حضرت عرباض بن ساریہ رضی اللہ عنہ سے روایت ہے: غیب بتانے والے آقا کریم صلی اللہ علیہ واٰلہٖ وسلم نے فرمایا:میں اللہ پاک کے پاس آخری نبی لکھا ہوا تھا، جب کہ اس وقت حضرت آدم علیہ السلام کا خمیر تیار نہ ہوا تھا۔( مشکوۃ، باب فضائل سید المرسلین، کتابچہ ختم نبوت صفحہ 60)یہ حدیث بھی نبیِّ کریم صلی اللہ علیہ واٰلہٖ وسلم کے آخری نبی ہونے پر واضح دلیل ہے۔حضرت جابر رضی اللہ عنہ سے روایت ہے:حضرت آدم علیہ السلام کے دونوں شانوں کے درمیان قلمِ قدرت سے لکھا ہوا تھا: محمد رسول اللہ خاتم النبیین صلی اللہ علیہ واٰلہٖ وسلم۔(خصائص کبری،1/14)حضرت ابوہریرہ رضی اللہ عنہ سے روایت ہے: آقاو مولی صلی اللہ علیہ واٰلہٖ وسلم نے فرمایا:مجھے انبیائے کرام علیہم السلام پر چھ چیزوں سےفضیلت دی گئی ہے: 1۔مجھے جامع کلمات عطا کئے گئے ہیں،2۔میرا رعب طاری کر کے میری مدد کی گئی، 3۔میرے لئے مالِ غنیمت کو حلال کر دیا گیا۔ 4۔میرے لئے ساری تمام زمین پاک اور نماز کی جگہ بنا دی گئی، 5۔مجھے تمام مخلوق کی طرف مبعوث کیا گیا،اور 6۔ مجھ پر ختمِ نبوت کردی گئی ہے۔(مسلم، کتاب المساجد باب جعلت لی الارض مسجداً)اس فرمانِ عالیشان میں آقا صلی اللہ علیہ واٰلہٖ وسلم نے اپنے چھ اوصاف ارشاد فرمائے ہیں اور آخری دو اوصاف میں ختمِ نبوت کا عقیدہ بیان فرمایا ہے۔ حضرت ثوبان رضی اللہ عنہ سے روایت ہے:غیب بتانے والے نبی صلی اللہ علیہ واٰلہٖ وسلم نے فرمایا:میری اُمّت میں 30 نہایت جھوٹے لوگ (کذّاب) پیدا ہوں گے کہ ان میں سے ہر ایک یہ دعویٰ کرے گا کہ وہ نبی ہے، حالانکہ میں آخری نبی ہوں، میرے بعد کسی قسم کا کوئی نبی نہیں۔(ابو داؤد، کتاب الفتن، جامع ترمذی، کتاب الفتن، مسند احمد)اس حدیثِ پاک میں چند باتیں غور طلب ہیں:1۔اول تو یہ کہ اس اُمّت میں تیس کذّاب ہوں گے اور وہ میری اُمّتی ہونے کے بھی دعوے دار ہوں گے، جیسا کہ قادیانی بھی یہی کہتے ہیں کہ ہم حضور صلی اللہ علیہ واٰلہٖ وسلم کو نبی مانتے ہیں، لہٰذا ہم بھی ان کے امتی ہیں، یہ بڑا دھوکا ہے۔2۔دوم یہ کہ بالفرض آقا صلی اللہ علیہ واٰلہٖ وسلم کے بعد کسی سچے نبی کو آنا ہوتا تو آپ فرما دیتے: میرے بعد کچھ سچے نبی آئیں گے اور کچھ جھوٹے بھی جن کی پہچان یہ ہوگی وغیرہ، مگر آقا صلی اللہ علیہ واٰلہٖ وسلم نے فرمایا:جو بھی نبوت کا دعویٰ کرے گا وہ جھوٹا ہوگا۔3۔سوم یہ کہ جو شخص بھی یہ دعویٰ کرے کہ وہ نبی ہے، یہی بات اس کےکذّاب ہونے کے لئے کافی ہے کیونکہ حضور اکرم صلی اللہ علیہ واٰلہٖ وسلم آخری نبی ہیں، آپ کے بعد کوئی نبی نہیں، نہ حقیقی، نہ ظلی، نہ تشریعی، نہ غیر تشریعی، نہ مستقل، نہ غیر مستقل۔(کتابچہ ختم نبوت، ص 56)اللہ پاک کا فرمان ہے:مَا كَانَ مُحَمَّدٌ اَبَاۤ اَحَدٍ مِّنْ رِّجَالِكُمْ وَ لٰكِنْ رَّسُوْلَ اللّٰهِ وَ خَاتَمَ النَّبِیّٖنَؕ ترجمۂ کنز الایمان:محمد تمہارے مردوں میں کسی کے باپ نہیں ، ہاں اللہ کے رسول ہیں اور سب نبیوں کے پچھلے۔(پ 22، الاحزاب:40)اس آیتِ مبارکہ میں اللہ پاک نے رسولِ معظم صلی اللہ علیہ واٰلہٖ وسلم کا مبارک نام لے کر ارشاد فرمایا:آپ سب نبیوں میں آخری نبی ہیں، جو کوئی نبی کریم صلی اللہ علیہ واٰلہٖ وسلم کے بعد قیامت تک کسی نئے نبی کا پیدا ہونا ممکن مانے، وہ اس آیت کامنکر اور کافرہے۔(کتابچہ ختم نبوت، ص 32)خلاصۂ کلام یہ ہے کہ حضور اقدس صلی اللہ علیہ واٰلہٖ وسلم کے بعد کسی نبی کا آنا محال ہے، جو اس کا قائل ہووہ ختمِ نبوت کے عقیدے کا منکر اور دائرۂ اسلام سے خارج ہے۔اللہ پاک نے حضور صلی اللہ علیہ واٰلہٖ وسلم کی ذاتِ اقدس پر نبوت کا سلسلہ ختم کر دیا، پس آپ کے بعد کوئی نبی نہیں۔

فتحِ باب نبوت پہ بے حد دُرود ختمِ دورِ رسالت پہ لاکھوں سلام

عقیدۂ ختمِ نبوت دینِ اِسلام کا بنیادی اور حُساس ترین اور اتنا عظیم عقیدہ ہے کہ قرآنِ پاک کی صریح آیات اور نبیِ کریم صلی اللہ علیہ واٰلہٖ وسلم کی احادیثِ مبارکہ، تمام صحابہ کرام رضی اللہ عنہم ، تابعینِ عُظام و تبع تابعین رحمۃ اللہ علیہم اور تمام اُمّتِ محمدیہ کے اتفاق سے جسے اِجماعِ اُمّت کہا جاتا ہے،سے یہ عقیدہ ثابت ہے۔عقیدۂ ختمِ نبوت کی تعریف:عقیدۂ ختمِ نبوت دینِ اسلام کے بنیادی عقائد میں سے ہے اور وہ یہ ہے کہ اللہ پاک نے نبوت و رسالت کا سلسلہ خاتم النبیین، محمد مصطفے صلی اللہ علیہ واٰلہٖ وسلم پر ختم فرما دیا ہے، آپ صلی اللہ علیہ واٰلہٖ وسلم کے بعد کسی طرح کا کوئی نبی، کوئی رسول نہ آیا ہے،نہ آسکتا ہے اور نہ آئے گا۔حضرت عیسیٰ علیہ السلام کی آمد:حضرت عیسیٰ علیہ السلام قیامت کے نزدیک جب تشریف لائیں گے تو سابق وصفِ نبوت و رسالت سے مُتصف ہونے کے باوجود ہمارے رسولِ کریم صلی اللہ علیہ واٰلہٖ وسلم کے نائب و اُمّتی کی حیثیت سے تشریف لائیں گے اور اپنی شریعت کے بجائے دینِ محمدی کی تبلیغ کریں گے۔(خصائصِ کبریٰ)انکار کا حکم:یہ عقیدہ ضروریاتِ دین میں سے ہے، لہذا اس عقیدے سے انکار کرنے والا یا اس میں ذرّہ برابر بھی شک کرنے والا دائرۂ اسلام سے خارج ، مرتد اور ملعون ہے۔ تاجدارِ مدینہ صلی اللہ علیہ واٰلہٖ وسلم نے خود اپنی مبارک زبان سے اپنے آخری نبی ہونے کو بیان کیا ہے، ملاحظہ ہو: احادیثِ کریمہ:1۔نبی ِپاک صلی اللہ علیہ واٰلہٖ وسلم نے ارشاد فرمایا:اَنَا آخِرُ الْاَنْبِیَاءِ وَاَنْتُمْ آخِرُ الْاُمَمْ۔ میں سب سے آخری نبی ہوں اور تم سب سے آخری اُمّت ہو۔(ابنِ ماجہ، حدیث:4077)2۔اللہ پاک کے آخری نبی صلی اللہ علیہ واٰلہٖ وسلم نے فرمایا:بےشک میں اللہ پاک کے حضور لوحِ محفوظ میں خاتم النبیین(لکھا ہوا) تھا، جب حضرت آدم علیہ السلام ابھی اپنی مٹی میں گُندھے ہوئے تھے۔ (کنزالعمال، حدیث: 31957)3۔تاجدارِ مدینہ صلی اللہ علیہ واٰلہٖ وسلم نے ارشاد فرمایا: میرے متعدد نام ہیں، میں محمد ہوں، میں احمد ہوں، میں ماحی ہوں کہ اللہ پاک میرے سبب سے کفر مٹاتا ہے، حا شر ہوں، میرے قدموں پر لوگوں کا حشر ہو گا، میں عاقب ہوں اور عاقب وہ جس کے بعد کوئی نبی نہیں۔(ترمذی، حدیث: 2849)4۔حضور پُرنور صلی اللہ علیہ واٰلہٖ وسلم کا فرمانِ عالیشان ہے:بے شک رسالت اور نبوت ختم ہوگئی، اب میرے بعد نہ کوئی رسول ہے، نہ کوئی نبی۔(ترمذی، حدیث:2279)5۔خاتم النبیین صلی اللہ علیہ واٰلہٖ وسلم نے فرمایا:میرے بعد نبوت میں سے کچھ باقی نہ رہے گا، مگر بشارتیں(یعنی) اچھا خواب کہ بندہ خود دیکھے یا اس کے لئے دوسرے کو دکھایا جائے۔(مسند احمد، حدیث:25031)خلیفۂ اعلیٰ حضرت مولانا محمد جمیل الرحمن رضوی رحمۃ اللہ علیہ اپنے نعتیہ دیوان ”قبالۂ بخشش“ میں لکھتے ہیں:

نہیں ہے اور نہ ہوگا بعد آقا کے نبی کوئی وہ ہیں شاہِ رُسل، ختمِ نبوت اس کو کہتے ہیں

لگا کر پشت پر مہرِ نبوت حق تعالی نے انہیں آخر میں بھیجا، خاتمیت اس کو کہتے ہیں

فقال اللّٰہ تعالیٰ فی القرآن المجید:مَا كَانَ مُحَمَّدٌ اَبَاۤ اَحَدٍ مِّنْ رِّجَالِكُمْ وَ لٰكِنْ رَّسُوْلَ اللّٰهِ وَ خَاتَمَ النَّبِیّٖنَؕ-ترجمۂ کنز الایمان:محمد تمہارے مردوں میں کسی کے باپ نہیں ، ہاں اللہ کے رسول ہیں اور سب نبیوں کے پچھلے۔(پ 22، الاحزاب:40)حضور نبی اکرم صلی اللہ علیہ واٰلہٖ وسلم کی شانِ ختمِ نبوت:وجودِ مصطفے میں جملہ مُحاسن و کمالاتِ نبوت لیتا اس نقطہ ٔ کمال تک پہنچے کہ اب قصرِ نبوت کا اور کوئی گوشہ تشنۂ تکمیل نہ رہا اور نبوت کی رفیع الشان عمارت ہر لحاظ سے مکمل ہوگئی تو سلسلۂ نبوت و رسالت کو ختم کر کے آپ صلی اللہ علیہ واٰلہٖ وسلم کے سرِ انور پر ختمِ نبوت کا تاج سجا دیا گیا، جیسا کہ اوپر آیت مذکور ہوئی۔حضور رحمتِ عالم صلی اللہ علیہ واٰلہٖ وسلم نے اپنے خاتم النبیین ہونے کی خصو صیت کا خود اعلان فرمایا،چنانچہ حضرت انس بن مالک رضی اللہ عنہ سے روایت ہے :حضور نبیِ اکرم صلی اللہ علیہ واٰلہٖ وسلم نے فرمایا:”سلسلۂ نبوت و رسالت منقطع ہو چکا ہے، میرے بعد نہ کوئی رسول ہوگا، نہ کوئی نبی۔“یہ امر واضح ہے کہ حضور نبیِ اکرم صلی اللہ علیہ واٰلہٖ وسلم کا آخری نبی ہونا جس طرح قرآنی آیات میں صراحت کے ساتھ بیان ہوا ہے، اسی طرح احادیثِ نبوی میں تواتر کے ساتھ بیان ہوا ہے، حضور نبی اکرم صلی اللہ علیہ واٰلہٖ وسلم نے بار بار تاکید کے ساتھ اپنے خاتم النبیین ہونے کا اعلان فرمایا ہے۔چنانچہ حضرت ابوہریرہ رضی اللہ عنہ سے روایت ہے:رسول اللہ صلی اللہ علیہ واٰلہٖ وسلم نے فرمایا:مجھے دیگر انبیائے کرام علیہم السلام پر چھ چیزوں کے باعث فضیلت دی گئی ہے:میں جوامع الکلم سے نوازا گیا ہوں، رعب کے ساتھ میری مدد کی گئی ہے، میرے لئے اموالِ غنیمت حلال کئے گئے ہیں،میرے لئے ساری زمین پاک کردی گئی اور سجدہ گاہ بنا دی گئی ،میں تمام مخلوق کی طرف بھیجا گیا ہوں اور میری آمد سے انبیائے کرام علیہم السلام کا سلسلہ ختم کر دیا گیا ہے۔ حضرت علی المکی سے ایک طویل حدیث میں مروی ہے کہ مرضِ وصال میں حضور نبی اکرم صلی اللہ علیہ واٰلہٖ وسلم نے اپنی لختِ جگر سیّدہ فاطمۃ الزہرا رضی اللہ عنہا سے فرمایا:ہم اہل ِبیت کو اللہ پاک نے سات ایسے امتیازات عطا فرمائے ہیں، جو ہم میں سے پہلے کسی کو عطا نہیں فرمائے گئےا ورنہ ہمارے بعد کسی کو عطا کئے جائیں گے۔ میں انبیائے کرام علیہم السلام کا سلسلہ ختم فرمانے والا ہوں،انبیائے کرام علیہم السلام میں سے سب سے زیادہ معزز ہوں اور تمام مخلوقات میں سے اللہ پاک کو سب سے زیادہ محبوب ہوں۔اسمائے مصطفے سے آخری نبی کے معنی پر دلالت:حضرت جبیر بن مطعم رضی اللہ عنہ اپنے والد گرامی سے روایت کرتے ہیں:حضور نبی اکرم صلی اللہ علیہ واٰلہٖ وسلم نے فرمایا :میں محمد ہوں، میں احمد ہوں ، میں ماحی ہوں میرے ذریعے کفر کو مٹا دیا جائے گا، میں حاشر ہوں میرے بعد ہی قیامت آ جائے گی اور حشر برپا ہوگا(نیز کوئی نبی میرے اور قیامت کے درمیان نہ آئے گا) ،میں عاقب ہوں اور عاقب اس شخص کو کہا جاتا ہے، جس کے بعد اور کوئی نبی نہ ہو۔تخلیقِ آدم سے قبل خاتم النبیین کا خطاب:حضرت عرباض بن ساریہ رضی اللہ عنہ سے روایت ہے، حضور اکرم صلی اللہ علیہ واٰلہٖ وسلم نے فرمایا:میں اللہ پاک کا بندہ اس وقت خاتم النبیین لکھا جا چکا تھا جب کہ حضرت آدم علیہ السلام ابھی خمیر سے پہلے اپنی مٹی میں تھے۔یہ احادیثِ مبارکہ اس بات کا ثبوت ہیں کہ حضور نبی اکرم صلی اللہ علیہ واٰلہٖ وسلم کی ختمِ نبوت کا عقیدہ کوئی نیا نہیں، بلکہ یہ اس وقت سے ہے، جب کہ ابھی تاریخِ انسانی کا آغاز بھی نہیں ہوا تھا اور اللہ پاک نے اپنے محبوب صلی اللہ علیہ واٰلہٖ وسلم کا آخری نبی ہونا لکھ دیا تھا، لہٰذا اگر کوئی اس کے بعد بھی حضور صلی اللہ علیہ واٰلہٖ وسلم کو آخری نبی نہ مانے اور خاتم کے معنی میں تحریف کے ذریعے نئے نبی کی آمد کو جائز قرار دےتو وہ دائرۂ اسلام سے خارج اور گروہِ کفار میں شامل ہے ۔جھوٹے مدعیانِ نبوت کے بارے میں حضور نبی اکرم صلی اللہ علیہ واٰلہٖ وسلم کی پیشین گوئی:حضرت ثوبان رضی اللہ عنہ سے مروی ہے: رسول اللہ صلی اللہ علیہ واٰلہٖ وسلم نے فرمایا:میری امت میں تیس جھوٹے پیدا ہوں گے، ہر ایک کادعویٰ ہوگا کہ وہ نبی ہے، سن لو! میں آخری نبی ہوں، میرے بعد کوئی نبی نہیں۔حضرت عمرو بن ابی قرۃ رضی اللہ عنہ سے روایت ہے : آپ صلی اللہ علیہ واٰلہٖ وسلم نے ارشاد فرمایا:اللہ پاک نے مجھے تمام جہانوں کے لئے سَراسَر رحمت بنا کر بھیجا ہے، لہٰذا حدیثِ نبوی سے پتہ لگتا ہے کہ جہاں جہاں تک آپ کی رحمت ہے، وہاں وہاں تک آپ سے آپ کی نبوت و رسالت ہے، چونکہ آپ صلی اللہ علیہ واٰلہٖ وسلم قیامت تک آنے والی مخلوقِ خدا کے لئے رحمت ہیں، اس لئے آپ صلی اللہ علیہ واٰلہٖ وسلم کی نبوت و رسالت بھی قیامت تک جاری ہے۔مذکورہ بالا تمام احادیث حضور نبیِ اکرم صلی اللہ علیہ واٰلہٖ وسلم کی ختمِ نبوت پر صراحت کے ساتھ دلالت کر رہی ہیں، آپ صلی اللہ علیہ واٰلہٖ وسلم جامع کمالاتِ انبیا ہیں، آپ صلی اللہ علیہ واٰلہٖ وسلم کا افضل الانبیاء و الرسل ہونا اس بات کا بیّن ثبوت ہے کہ نبوت کا ذریں سلسلہ جس کا آغاز حضرت آدم علیہ السلام سے شروع ہوا تھا، بعثتِ محمدی کے ساتھ اپنے منتہائے کمال کو پہنچ کر ختم ہوچکا، اب قیامت تک آپ صلی اللہ علیہ واٰلہٖ وسلم ہی کی نبوت و رسالت جاری و ساری رہے گی۔ ختمِ نبوت کا کام کرتے کرتے مرنا ہے۔ انشاءاللہ

فتحِ باب نبوت پہ بے حد دُرود ختمِ دورِ رسالت پہ لاکھوں سلام

یہ ایک ناقابلِ انکار صداقت ہے کہ انسانیت کی ہدایت و راہ نمائی کے لیے حضرت آدم علیہ السلام سے جو سلسلۂ رُشد و ہدایت شروع ہوا تھا۔ وہ

نبی آخر زماں صلی اللہ علیہ واٰلہٖ وسلم پر آکر مکمل ہوا۔اَلْیَوْمَ اَکْمَلْتُ لَکُمْ دِیۡنَکُمْ وَاَتْمَمْتُ عَلَیۡکُمْ نِعْمَتِیۡ وَرَضِیۡتُ لَکُمُ الۡاِسْلٰمَ دِیۡنًا ؕ (پ6،البقرۃ:3)ترجمۂ کنزالایمان:آج میں نے تمہارے لئے تمہارا دین کامل کردیااور تم پر اپنی نعمت پوری کردی اور تمہارے لئے اسلام کو دین پسند کیا۔ نبی کریم صلی اللہ علیہ واٰلہٖ وسلم پر دین کا کامل مکمل ہونا اس بات کو ملتزم ہے کہ آپ صلی اللہ علیہ واٰلہٖ وسلم آخری نبی ہیں کیونکہ آپ صلی اللہ علیہ واٰلہٖ وسلم کے بعد کسی اور نبی کا آنا اسی وقت ممکن ہوتا جب آپ صلی اللہ علیہ واٰلہٖ وسلم کے دین اور شریعت میں کوئی کمی ہوتی جس کمی کو بعد میں آنے والا نبی پورا کرتا۔ آپ صلی اللہ علیہ واٰلہٖ وسلم کی عطا کردہ شریعت رُشدُ و ہدایت کا ابدی سر چشمہ ہے۔ جب آپ صلی اللہ علیہ واٰلہٖ وسلم کا دین کامل اور تمام ہے اور اس کا نا مکمل ہونا ممکن نہی ہے تو آپصلی اللہ علیہ واٰلہٖ وسلم کے بعد کسی نبی کا آنا بھی ممکن نہی ہے یعنی آپصلی اللہ علیہ واٰلہٖ وسلمکےبعد کوئی نبی مبعوث نہی ہوگا۔رُشد و ہدایت کا یہ سلسلہ اور ایمان سے وابستگی درحقیقت عقیدۂ ختمِ نبوت پر ایمان سے وابستہ ہے۔اس پر ایمان وبندگی کا لازمی اور ناگزیر تقاضہ ہے جس کے بغیر دین اور ایمان کا تصور بھی محال ہے۔آپصلی اللہ علیہ واٰلہٖ وسلم نبوت اور رسالت کی آخری اینٹ اور آخری کڑی بن کر جلوہ آرا ہوئے کہ آپ کے بعد نبوت و رسالت کا دروازہ ہمیشہ کے لیے بند ہو گیا۔ اس بات پر پوری امت کا اجماع ہے کہ ہمارے نبی صلی اللہ علیہ واٰلہٖ وسلم آخری نبی ہیں اوریہ عقیدہ چمکتے سورج کی طرح روشن ہے۔یہی وجہ ہے کہ عہدِ رسالت صلی اللہ علیہ واٰلہٖ وسلم سے لے کر پوری امت کا اس پر اتفاق ہے کہ آپ خاتم الانبیاء ہیں۔حضرت ابو سعید خدری رضی اللہ عنہ بیان کرتے ہیں: آقا صلی اللہ علیہ واٰلہٖ وسلم نے فرمایا:میری اور مجھ سے پہلے نبیوں کی مثل اس شخص کی طرح ہےجس نے گھر بنا کر مکمل کیا اور اس میں ایک اینٹ کی جگہ چھوڑ دی ،پس میں آیا اور میں نے اس اینٹ کو رکھ کر اس گھر کومکمل کر دیا۔(مسند احمد، 3 / 9) حضرت انس بن مالک رضی اللہ عنہ سے روایت ہے: آپ صلی اللہ علیہ واٰلہٖ وسلم نے فرمایا:بے شک رسالت اور نبوت منقطع ہوچکی، پس میرے بعد کوئی نبی ہوگا نہ رسول۔(مستدرک، 4 /391)ختمِ نبوت کا معنیٰ مہر ہے اور خاتم النبین کا مطلب یہ ہے کہ پہلے انبیائے کرام علیہم الصلوۃ والسلام کی آمد کا سلسلہ جاری تھا،آپ صلی اللہ علیہ واٰلہٖ وسلم کی تشریف آوری سے یہ سلسلہ بند ہوگیا۔اب اس پر مُہر لگا دی گئی تا کہ کوئی کذاب دعویِ نبوت نہ کر سکے۔ حضرت ابو ذر رضی اللہ عنہ بیا ن کرتے ہیں :نبی محترم صلی اللہ علیہ واٰلہٖ وسلم نے مجھ سے فرما یا: اے ابوذر! پہلے رسول آدم علیہ السلام ہیں اور آخری رسول محمد (صلی اللہ علیہ واٰلہٖ وسلم) ہیں۔(کنز العمال،حدیث: 32269) حضرت علی رضی اللہ عنہ آپ کے شمائل بیان کرتے ہوئے فرماتے ہیں:آپصلی اللہ علیہ واٰلہٖ وسلم کے دونوں کندھوں کے درمیان مُہر ِنبوت تھی اور آپ خاتم النبیّن تھے۔( ترمذی،حدیث: ٣٦٣٧) عقیدۂ ختمِ نبوت پر ایمان رکھنا ضروریاتِ دین سے ہے اگر کوئی بندہ تمام ضروریاتِ دین کو مانتا ہو مگر آپ صلی اللہ علیہ واٰلہٖ وسلم کو خاتمُ الانبیا نہ مانتا ہوتو وہ مسلمان نہ ہوگا بلکہ کافر ہی رہے گا۔ بروایتِ حضرت قتادہ رضی اللہ عنہ : نبی مکرم صلی اللہ علیہ واٰلہٖ وسلم نے فرمایا:میں پیدائش میں سب سے پہلے ہوں اور بعثت میں سب سے آخر۔(کنز العمال ، حدیث:31916)خاتم النبی سے مراد مطلق آخری نبی ہیں ،اس معنیٰ میں تاویل اور تخصیص کی گنجائش نہی۔ معلوم ہوا!ختمیت ازل سے آپصلی اللہ علیہ واٰلہٖ وسلم کو دی گئی ہے۔

اللہ پاک ارشاد فرماتا ہے: مَا كَانَ مُحَمَّدٌ اَبَاۤ اَحَدٍ مِّنْ رِّجَالِكُمْ وَ لٰكِنْ رَّسُوْلَ اللّٰهِ وَ خَاتَمَ النَّبِیّٖنَؕ وَکَانَ اللّٰہُ بِکُلِّ شَیۡءٍ عَلِیۡمًا(۴۰)ع (پ22، الاحزاب: 40)ترجمۂ کنزالایمان:”محمد تمہارے مردوں میں سے کسی کے باپ نہیں ہیں، لیکن وہ اللہ کے رسول ہیں اور سب انبیاء کے آخر میں ہیں۔“ختم ِنبوت کا مطلب یہ ہے کہ اللہ پاک نے حضور جانِ جاناں صلی اللہ علیہ واٰلہٖ وسلم پر نبوت کو ختم فرما دیا، حضور علیہ السلام آخری نبی ہیں، آپ صلی اللہ علیہ واٰلہٖ وسلم کے بعد جو نبوت کا دعویٰ کرے وہ سب سے بڑا جھوٹا ہے، کافر و لعنتی و جہنمی ہے، یہ حضور جانِ جاناں صلی اللہ علیہ واٰلہٖ وسلم کے خصائص میں سے ہے کہ آپ علیہ السلام آخری نبی ہیں،یہاں چند احادیث ِمبارکہ کا ذکر کیا جائے گا، جو حضور جانِ جاناں صلی اللہ علیہ واٰلہٖ وسلم کی ختمِ نبوت کا اعلان کر رہی ہیں۔1۔میں عاقب ہوں: امام بخاری و مسلم رحمۃ اللہ علیہما حضرت جبیر بن مطعم رضی اللہ عنہ سے راوی،رسول اللہ صلی اللہ علیہ واٰلہٖ وسلم نے فرمایا:بے شک میرے متعدد(کئی)نام ہیں، میں محمد ہوں، میں احمد ہوں، میں ماحی ہوں، کہ اللہ پاک میرے سبب سے کفر مٹاتا ہے، میں حاشر ہوں، میرے قدموں پر لوگوں کا حشر ہو گا، میں عاقب ہوں اور عاقب وہ جس کے بعد کوئی نبی نہیں۔(مسلم کتاب الفضائل باب فی اسمائہ2/261، فتاویٰ رضویہ، جلد 15، صفحہ647)2۔ہم سب سے پچھلے ہیں:صحیحین میں ابوہریرہ رضی اللہ عنہ سے ہے، رسول اللہ صلی اللہ علیہ واٰلہٖ وسلم فرماتے ہیں:ہم زمانے میں قیامت میں سب سے پچھلے اور قیامت میں سب سے آگے ہیں۔(بخاری، کتاب الجمعہ، باب فرض الجمعہ1/120، مسلم، کتاب الجمعہ، باب فضیلۃ یوم الجمعہ1/282، فتاوی رضویہ، جلد 15، صفحہ 660)3۔لا نبی بعدی:بخاری شریف میں مروی، رسول اللہ صلی اللہ علیہ واٰلہٖ وسلم فرماتے ہیں:انبیا بنی اسرائیل کی سیاست فرماتے، جب ایک نبی تشریف لے جاتا، دوسرا اس کے بعد آتا، میرے بعد کوئی نبی نہیں۔( بخاری، کتاب الانبیاء باب ما ذکر عن بنی اسرائیل1/491، فتاوی رضویہ، جلد 15، صفحہ 669) 4۔رسالت و نبوت ختم ہوگئی:حضرت انس رضی اللہ عنہ سے راوی، رسول اللہ صلی اللہ علیہ واٰلہٖ وسلم فرماتے ہیں:بے شک رسالت و نبوت ختم ہوگئی، اب میرے بعد نہ کوئی رسول، نہ نبی۔( ترمذی، ابواب الرویا ذھبت النبوۃ2/51، فتاوی رضویہ، جلد 15، صفحہ 669، 670)5۔خاتم النبیین: بطریق ا بی الزبیر حضرت جابر بن عبداللہ رضی اللہ عنہما سے راوی، فرمایا:حضرت آدم علیہ السلام کے دونوں شانوں کے وسط (درمیان) میں قلمِ قدرت سے لکھا ہوا ہے، محمد رسول اللہ خاتم النبیین۔(مختصرتاریخِ دمشق لابن عساکر، باب ذکر ماخصّ بہ وشرف بہ، الخ2/137، فتاوی رضویہ، جلد 15، صفحہ 634)حضور صلی اللہ علیہ واٰلہٖ وسلم خاتم النبیین ہیں، یعنی اللہ پاک نے سلسلۂ نبوت حضور صلی اللہ علیہ واٰلہٖ وسلم پر ختم کر دیا کہ حضور صلی اللہ علیہ واٰلہٖ وسلم کے زمانہ میں یا بعد کوئی نیا نبی نہیں ہو سکتا(وانا خاتم النبیین لا نبی بعدی)جو حضور صلی اللہ علیہ واٰلہٖ وسلم کے زمانہ میں یا حضور صلی اللہ علیہ واٰلہٖ وسلم کے بعد کسی کو نبوت ملنا مانے یا جائز جانے، کافر ہے۔(بہار شریعت، جلد 1 ،صفحہ 63، عقیدہ 36)

فرمانِ مصطفے صلی اللہ علیہ واٰلہٖ وسلم:جو بندہ مجھ پر ایک مرتبہ درودِ پاک پڑھتا ہے، اللہ پاک اس پر دس مرتبہ رحمت نازل فرماتا ہے، اب بندے کی مرضی ہے وہ کم پڑھے یا زیادہ۔عقیدۂ ختم نبوت کیا ہے:عقیدہ ٔختم نبوت کا مطلب یہ ہے کہ نبیوں کی تعداد حضور صلی اللہ علیہ واٰلہٖ وسلم کے تشریف لانے سے مکمل ہوچکی ہے،حضور صلی اللہ علیہ واٰلہٖ وسلم کے بعد نبوت اور رسالت ختم ہو چکی ہے، اب قیامت تک کسی بھی انسان کو نبوت یا رسالت نہیں ملے گی یعنی تاقیامت نبیوں کی تعداد میں کسی ایک نبی کا بھی اضافہ نہیں ہوگا۔اللہ پاک کا بے انتہا شکر ہے جس کی توفیق سے آقا صلی اللہ علیہ واٰلہٖ وسلم کی ختمِ نبوت کے عقیدے کے تحفظ میں ادنیٰ سی کوشش کی توفیق ملی۔اسلام میں عقیدے کو اوّلیت حاصل ہے، پہلے خدا اور اس کے بعد بھیجے ہوئے رسولوں اور کتابوں پر درست عقیدہ رکھنا ضروری ہوتا ہے، پھر اس کے بعد ہی اعمال کی ابتدا ہوتی ہے، درست عقیدے کے بغیر عبادت کرنا ایسا ہی ہے، جیسے بغیر بنیاد کی عمارت کھڑی کر دی جائے۔جس طرح مسلمان کے لئے ذاتِ الٰہی کا جاننا فرض ہے، عین اسی طرح ختمِ نبوت پر ایمان لانا بھی فرض ہے، جو اس کا انکار کرے وہ کافر و مرتد ہے، بلاشبہ نبوت بہت بلند، بڑا عظیم اور بڑا درجہ ہے، اس لئے اس میں ذرا سی بھی گمراہی قابلِ قبول نہیں۔قرآن عظیم میں ختمِ نبوت پر دلیل:قرآنِ عظیم میں بیشتر ایسی آیات موجود ہیں جن میں ختمِ نبوت کا عقیدہ واضح طور پر سمجھ آتا ہے، لیکن طوالت کے خوف سے یہاں پر صرف ایک آیت پیش کی جاتی ہے، اللہ پاک کا ارشادِ مبارک ہے:ترجمۂ کنزالعرفان:محمد تمہارے مردوں میں کسی کے باپ نہیں ہیں، لیکن اللہ کے رسول ہیں اور سب نبیوں کے آخر میں تشریف لانے والے ہیں اور اللہ سب کچھ جاننے والا ہے۔(پ22،الاحزاب:40)

ان کے مولیٰ کے ان پر کروڑوں درود ان کے اصحاب و عترت پہ لاکھوں سلام

بار ہائے صحف غنچائے قدس اہلِ بیتِ نبوت پہ لاکھوں سلام

اہلِ اسلام کی مادرانِ شفیق بانوانِ طہارت پہ لاکھوں سلام

ختمِ نبوت کے متعلق چار فرامینِ مصطفے صلی اللہ علیہ واٰلہٖ وسلم:

1۔حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ واٰلہٖ وسلم نے ارشاد فرمایا:میری مثال اور مجھ سے پہلے انبیائے کرام علیہم السلام کی مثال اس شخص کی طرح ہے جس نے بہت حسین و جمیل ایک گھر بنایا، مگر اس کے ایک کونے میں ایک ا ینٹ کی جگہ چھوڑ دی، لوگ اس کے گرد گھومنے لگے اور تعجب سے یہ کہنے لگے:اس نے یہ اینٹ کیوں نہ رکھی؟ پھر آپ صلی اللہ علیہ واٰلہٖ وسلم نے ارشاد فرمایا:میں (قصرِنبوت کی) وہ اینٹ ہوں اور میں خاتم النبیین ہوں۔(مسلم، کتاب الفضائل، باب ذکر کو نہ صلی اللہ علیہ واٰلہٖ وسلم خاتم النبیین، صفحہ 1255، حدیث 22(2286) 2۔حضرت ثو بان رضی اللہ عنہ سے روایت ہے:رسولِ کریم صلی اللہ علیہ واٰلہٖ وسلم نے ارشاد فرمایا:بے شک اللہ پاک نے میرے لئے تمام روئے زمین کو لپیٹ دیا اور میں نے اس کے مشرقوں اور مغربوں کو دیکھ لیا(اس حدیث کے آخر میں ارشاد فرمایا:)عنقریب میری اُمّت میں تیس کذّاب ہوں گے، ان میں سے ہر ایک گمان کرے گا کہ وہ نبی ہے، حالانکہ میں خاتم النبیین ہوں اور میرے بعد کوئی نبی نہیں ہے۔(ابو داؤد،کتاب الفتن ولملامم، باب ذکر الفتن ودولائلہا، 4/132، حدیث 4252)3۔حضرت ابوہریرہ رضی اللہ عنہ سے روایت ہے، حضور صلی اللہ علیہ واٰلہٖ وسلم نے ارشاد فرمایا:مجھے6 وجوہ سے انبیائے کرام علیہم السلام پر فضیلت دی گئی ہے: 1۔مجھے جامع کلمات عطا کئے گئے ہیں،2۔رعب سے میری مدد کی گئی ہے، 3۔میرے لئے غنیمتوں کو حلال کر دیا گیا ہے۔ 4۔تمام روئے زمین کو میرے لئے طہارت اور نماز کی جگہ بنا دیا گیا ہے، 5۔مجھے تمام مخلوق کی طرف (نبی بنا کر) بھیجا گیا ہے، 6۔اور مجھ پر نبیوں(کے سلسلے کو ختم کیا گیا ہے)۔(مسلم، کتاب المساجد وموا ضع الصلاۃ، صفحہ 266، حدیث5(523) 5۔حضرت جابر بن عبداللہ رضی اللہ عنہ سے روایت ہے، حضور اقدس صلی اللہ علیہ واٰلہٖ وسلم نے ارشاد فرمایا:میں تمام رسولوں کا قائد ہوں اور یہ بات بطورِ فخر نہیں کہتا اور میں تمام پیغمبروں کا خاتم ہوں اور یہ بات بطورِ فخر نہیں کہتا اور میں سب سے پہلی شفاعت کرنے والا اور سب سے پہلے شفاعت قبول کیا گیا ہوں اور یہ بات فخر کے طور پر ارشاد نہیں فرماتا۔(معجم اوسط، باب الالف، من اسمہ:احمد1/63، حدیث: 170)ایک بہن نے بڑا اچھا جملہ کہا :ہر نبی کا عمل خوبصورت ہوتا ہے، یہ خوبصورتی ترقی کرتی رہی، حتّٰی کہ آخر میں اللہ پاک کے پیارے حبیب صلی اللہ علیہ واٰلہٖ وسلم دنیا میں جلوہ افروز ہوئے تو ہر عمل کی خوبصورتی اپنی انتہا کو پہنچ گئی، جب ہر عمل کی خوبصورتی اپنی انتہا کو پہنچ گئی تو اس پر ختمِ نبوت کی مہر لگا دی گئی کہ اس جیسا پیارا عمل نہ پہلے آیا اور نہ قیامت کی صبح تک آئے گا۔

پاک اللہ ذاتِ مصطفی کا حسنِ لاثانی کہ یکجا جمع ہیں جس میں تمام اوصافِ امکانی

دعائے یونسی، خلقِ خلیلی، صبرِ ایّوبی جلالِ موسوی، زیدِ مسیحی، حسنِ کنعانی

پیاری پیاری اسلامی بہنوں!اسلام کے خلاف سازشوں میں باطل فرقوں نے اُمّت کو نقصان پہنچانے کی ہر دور میں جو کوشش کی وہ کسی سے چھپی ہوئی بات نہیں اور اللہ پاک نے ایسے اسلام دشمن کی سرکُوبی کے لئے علمائے حق کا انتخاب فرمایا، جس کی ابتدا صحابہ کرام رضی اللہ عنہم سے ہوئی اور خاص طور سے منکرِ ختمِ نبوت کا سر توڑ اور مُنہ توڑ جواب دیا۔حضرت ابوبکر صدیق رضی اللہ عنہ نے اور ان کے بعد ہر دور میں جھوٹے دعویدار نبوت کے ہوتے رہے اور خاص طور سے بارہویں اور تیرہویں صدی ہجری میں کئی دجّالوں نے جھوٹے دعوے کی طرف پیش قدمی کی، ،انہوں نے شانِ رسول میں انتہائی گستاخانہ عبارتیں لکھیں جنہیں دیکھ کر مؤمن کے رونگٹے کھڑے ہوجائیں، جو کہ سراسر کفر ہے۔

اس پر اعلیٰ حضرت رحمۃ اللہ علیہ نے انہیں ایسے منہ توڑ جوابات دیئے جن کے جوابات وہ آج تک نہ دے سکے نہ قیامت تک دے سکیں گے۔ان شاءاللہ ۔ مضمون کے اختتام کی طرف جاتے ہوئے مرزائی قادیانیوں کو یہ کہنا چاہوں گی کہ تم کیوں کر اپنی آخرت برباد کر رہے ہو، جب کہ حقیقت بالکل واضح ہے، ایسی پیاری اُمّت کو چھوڑ کر تم جہنم کا ایندھن بن رہے ہو! ارے ظالمو!اس اُمّت میں ہونے کی دعا تو انبیائے کرام علیہم السلام بھی کرتے تھے، اب بھی وقت ہے، توبہ کا دروازہ کھلا ہے، اس پیارے حبیب صلی اللہ علیہ واٰلہٖ وسلم کی ختمِ نبوت پر ایمان لے آؤ، جو آخری نبی ہیں، جن کی کتاب آخری کتاب ہے، جن کی اُمّت آخری امت ہے، جن کا دین آخری ہے، دولت کے نشے میں مست ہونے والوں مرزائیو! تیسرے پارے کی آخری آیت پڑھ لو کہ ساری دنیا کے برابر سونے بھی لے آؤ تو جہنم سے چھٹکارا حاصل نہیں کر سکتے اور اگر میرے آقا صلی اللہ علیہ واٰلہٖ وسلم کی ختمِ نبوت پر سچے دل سے توبہ کرکے ایمان لے آؤ تو تم تو کیا، تمہارا سایہ بھی جہنم میں نہ جائے گا۔ان شاءاللہ ۔پھر سوچ لو! غور کرلو! مرنے کے بعد تو تم بھی مان لوگے، مگر اُس وقت کا مان لینا کام نہیں آئے گا، آج لے اُن کی پناہ، آج مدد مانگ ان سے پھر نہ مانیں گے قیامت میں اگر مان گیا۔خدا کرے دل میں اُتر جائے میری بات!

اللہ پاک اور بندوں کے تعلق کو مضبوط بنانے کے لیے انبیائے کرام علیہم السلام تشریف لائے۔ اللہ پاک نے انبیائے کرام علیہم السلام کو ایک خاص قوم اور ایک خاص شریعت کے ساتھ مبعوث فرمایا۔ ان تمام کی تعلیمات جزوی تھیں لہٰذا اللہ پاک کے اس نظامِ شریعت اور سلسلۂ نبوت جو ارتقائی مراحل پر گامزن تھی کو ایک جامع اور کامل نبی کی ضرورت تھی، ایسے نبی کی جس کی شریعت جزوی نہ ہو بلکہ مکمل ہو جس میں زندگی کے ہر پہلو کے راہ نما اصول موجود ہوں اور جو کسی خاص قوم یا کسی خاص خطے کے ساتھ مخصوص نہ ہو بلکہ عالمین کے لیے ہدایت ہو۔

چنا نچہ اللہ پاک نے سلسلۂ نبوت و رسالت کی تکمیل کے لیے حضور نبی اکرم صلی اللہ علیہ والہ وسلم کو مبعوث فرمایا۔ختم النبوة فی ضوء القراٰن والسنۃ:نبی اکرم صلی اللہ علیہ والہ وسلم پر نبوت کا سلسلہ ختم ہوا ۔چنانچہ ارشاد باری ہے :مَا كَانَ مُحَمَّدٌ اَبَاۤ اَحَدٍ مِّنْ رِّجَالِكُمْ وَ لٰكِنْ رَّسُوْلَ اللّٰهِ وَ خَاتَمَ النَّبِیّٖنَؕ-ترجمۂ کنز الایمان:محمد تمہارے مردوں میں کسی کے باپ نہیں ، ہاں اللہ کے رسول ہیں اور سب نبیوں کے پچھلے۔(پ 22، الاحزاب:40)خاتم النبیین کے معنی یہ ہیں کہ سلسلۂ نبوت آپ پر ختم ہوگیا اور آپ کے بعد کوئی نبی مبعوث نہیں ہوسکتا۔خاتم النبیین ہونا نبی اکرم صلی اللہ علیہ والہ وسلم کا اعزاز و اختصاص ہے اور تمام مسلمانوں کے ایمان کی اساس ہے۔چنانچہ بخاری شریف میں کتاب المناقب باب خاتم النبیین صلی اللہ علیہ والہ وسلم میں درج ہے : وانا خاتم النبیین۔ (2)میں آخری نبی ہوں۔ترمذی کتاب الفتن ، باب ما جاء لا تقوم الساعۃ .. الخ ، میں یہ حدیث شریف مذکور ہے: وانا خاتم النبیین لا نبی بعدی (3)میں آخری رسول ہوں اور میرے بعد کوئی نبی نہیں۔قُلْ یٰۤاَیُّهَا النَّاسُ اِنِّیْ رَسُوْلُ اللّٰهِ اِلَیْكُمْ جَمِیْعَاﰳ (4)ترجمۂ کنز الایمان:تم فرماؤ اے لوگو میں تم سب کی طرف اللہ کا رسول ہوں۔وَ مَاۤ اَرْسَلْنٰكَ اِلَّا كَآفَّةً لِّلنَّاسِ(5)ترجمۂ کنز الایمان:”اور اے محبوب ہم نے تم کو نہ بھیجا مگر ایسی رسالت سے جو تمام آدمیوں کو گھیرنے والی ہے ۔“ یعنی پیغامِ ہدایت تمام انسانوں کے لیے ہے اور جس کے بعد کسی ہادی و راہ نما کی ضرورت باقی نہیں رہتی۔پہلی آیت میں انسانوں کو مخاطب کیا گیا ہے اس لیے یٰۤاَیُّهَا النَّاسُ فرمایا گیا ورنہ آپ صلی اللہ علیہ واٰلہٖ وسلم کی ہدایت تمام عالمین کے جن و انس کے لیے ہے ،اس لیے آپ صلی اللہ علیہ والہ وسلم رسول الثقلین ہیں۔(6)اسی حوالے سے حدیث شریف میں ارشاد ہوا ہے : وارسلت الی الخلق کافة میں تمام مخلوقات کی طرف بھیجا گیا ہوں۔ (7) صاحب ِمرقاة رحمۃ اللہ علیہ اس حدیث کے تحت لکھتے ہیں:آپ صلی اللہ علیہ والہ وسلم کی بعثت تمام اجزائے عالم اور جمیع اقسامِ موجودات کے لیے ہے خواہ وہ جمادات و نباتات ہوں یا حیوانات۔ (8) وَ مَاۤ اَرْسَلْنٰكَ اِلَّا رَحْمَةً لِّلْعٰلَمِیْنَ(۱۰۷) (9)ترجمۂ کنز الایمان:”اور ہم نے تمہیں نہ بھیجا مگر رحمت سارے جہان کے لیے ۔“اس آیت ِمبارکہ سے آپ صلی اللہ علیہ والہ وسلم کی افاقیت و عالمگیریت ثابت ہوتی ہے کہ آپ تمام عالمین کے لیے رحمت ہیں ۔ آپ کے سایۂ رحمت میں ہر ایک کو پناہ ملتی ہے۔اَلْیَوْمَ اَكْمَلْتُ لَكُمْ دِیْنَكُمْ وَ اَتْمَمْتُ عَلَیْكُمْ نِعْمَتِیْ (10)ترجمۂ کنز الایمان:”آج میں نے تمہارے لیے تمہارا دین کامل کردیا اور تم پر اپنی نعمت پوری کردی“جب دین کی کاملیت کا اعلان واضح طور پر اس آیت ِکریمہ میں کر دیا گیا تو اب کسی نئے نبی اور کسی نئی شریعت کی ضرورت باقی نہیں رہی۔لہٰذا اب کوئی بھی فرقہ یا شخص آپ کے بعد کسی کی نبوت کو جائز سمجھتا ہو یا وہ نبوت کا دعوی کرے تو وہ آیاتِ قرانی کا منکر قرار پائے گا اور قرآنِ کریم کا منکر صریح کافر ہے ۔1۔[پ22،الاحزاب:40]2-(2/485،حدیث:3535)3-(4/93،حدیث:2226)4-[پ9،الاعراف:158]5-[پ22،سبا:28]6-(تکمیل الایمان، ص 127 تا 128)7-(مسلم ، کتاب المساجد .. الخ ، ص 266،حديث :533)8-(مرقاة، کتاب الفضائل ، باب فضائل سید المرسلین ، الفصل الاول ، 10 / 14،تحت الحدیث : 5748)۔ 9-[پ17، الانبياء:107] 10-[پ6، المائدة:3]

عقیدۂ ختمِ نبوت دینِ اسلام کا ایک بنیادی عقیدہ ہے اور ایک اہم ترین عقیدہ ہے، ختمِ نبوت کے بارے میں عقیدہ گویا ایمان کا بھی ایک پہلو ہے،  آئیے! ملاحظہ فرمائیے کہ عقیدۂ ختم نبوت سے کیا مراد ہے:عقیدۂ ختم نبوت: نبی کریم، رؤف الرحیم صلی اللہ علیہ واٰلہٖ وسلم کو اللہ پاک کا آخری رسول و نبی ماننا اور اس بات پر ایمان لانا کہ حضور صلی اللہ علیہ واٰلہٖ وسلم کے بعد کوئی نیا نبی یا رسول نہیں آ سکتا، اسے عقیدۂ ختم نبوت کہتے ہیں۔یہاں ایک بات ذہن نشین رکھئے کہ حضرت عیسیٰ علیہ السلام کا قُربِ قیامت میں جو آنا ہوگا، وہ حضور صلی اللہ علیہ واٰلہٖ وسلم کے نائب کے طور پر ہوگا اور وہ اپنے دین(شریعت) کے بجائے دینِ محمدی کی تبلیغ فرمائیں گے۔

فتحِ بابِ نبوت پہ بےحد دُرود ختمِ دورِ رسالت پہ لاکھوں سلام

عقیدۂ ختمِ نبوت کی اہمیت:جو حضور صلی اللہ علیہ واٰلہٖ وسلم کے بعد کسی کو نبوت کا مستحق سمجھے یا اسے جائز کہے، تو وہ کافر ہے۔ (بہارِشریعت)ختمِ نبوت کے متعلق چند احادیثِ مبارکہ:٭حضور صلی اللہ علیہ واٰلہٖ وسلم نے غیب کی خبر دیتے ہوئے فرمایا تھا: عنقریب میری اُمّت میں تیس کذّاب (جھوٹے) ہوں گے، ان میں سے ہر ایک گمان کرے گا کہ وہ نبی ہے، حالانکہ نبوت ختم ہو چکی، میں خاتم النبیین ہوں اور میرے بعد کوئی نبی نہیں ہے۔(ابو داؤد، 4/132، حدیث 4252)٭ارشاد فرمایا:بے شک رسالت اور نبوت مجھ پر ختم ہوگئی، اب میرے بعد کوئی رسول ہے،نہ کوئی نبی۔(ترمذی، 4/121،حدیث:2279)٭اِرشاد فرمایا:بے شک میرے بعد کوئی نبی نہیں اور تمہارے بعد کوئی اُمّت نہیں۔ (صدرالافاضل اور عقیدۂ ختم نبوت)مندرجہ بالا احادیثِ مبارکہ سے عقیدۂ ختمِ نبوت کی اہمیت واضح ہے۔

نہیں ہے اور نہ ہوگا بعد آقا کے نبی کوئی وہ ہیں شاہِ رُسل، ختمِ نبوت اس کو کہتے ہیں

لگا کر پُشت پر مہر ِنبوت حق تعالی نے انہیں آخر میں بھیجا خاتمیت اس کو کہتے ہیں(قبالہ بخشش)

مَا كَانَ مُحَمَّدٌ اَبَاۤ اَحَدٍ مِّنْ رِّجَالِكُمْ وَ لٰكِنْ رَّسُوْلَ اللّٰهِ وَ خَاتَمَ النَّبِیّٖنَؕ-ترجمۂ کنز الایمان:محمد تمہارے مردوں میں کسی کے باپ نہیں ، ہاں اللہ کے رسول ہیں اور سب نبیوں کے پچھلے۔(پ 22، الاحزاب:40)ختمِ نبوت کا مفہوم:ختم کے لغوی معنیٰ ہے:مہر لگانا، بند کرنا، کسی کام کو پورا کر کے فارغ ہونا وغیرہ۔ختمِ نبوت کا مفہوم یہ ہے کہ اللہ پاک کی طرف سے اپنے خاص بندوں کو منصبِ نبوت و رسالت پر سرفراز کرنے کا جو سلسلہ حضرت آدم علیہ السلام سے لے کر حضرت عیسٰی علیہ السلام تک جاری و ساری تھا، وہ حضرت محمد رسول اللہ صلی اللہ علیہ واٰلہٖ وسلم کی ذاتِ اقدس پر آ کر ختم ہو گیا۔ پہلے ایک نبی کے بعد دوسرا نبی آتا تھا، مگر اب آپ کے بعد کسی اور نبی کی بعثت نہیں ہوگی، آپ اللہ پاک کے سب سے آخری نبی اور رسول ہیں، آپ خاتم الانبیاء ہیں اور آپ پر نازل ہونے والی کتاب قرآنِ کریم خاتم الکتب ہے۔یہ اسلام اور اس امت کا متفقہ اور مسلمہ عقیدہ ہے کہ جو شخص حضرت محمد رسول اللہ صلی اللہ علیہ واٰلہٖ وسلمکو آخری نبی نہ مانے یا آپ کے بعد سلسلۂ نبوت کے جاری رہنے کا عقیدہ رکھتا ہو یا آپ کے بعد کسی اور شخص کونیا نبی یا رسول مانتا ہووہ کافر اور دائرۂ اسلام سے خارج ہے۔ عقیدۂ ختمِ نبوت کتاب و سنت اور اجماعِ امت تینوں سے ثابت ہے۔ ختمِ نبوت کا عقیدہ اسلام کے بنیادی عقائد میں سے ہے، جس کا مطلب یہ ہے کہ حضرت محمد رسول اللہ صلی اللہ علیہ واٰلہٖ وسلم خاتم النبیین ہیں۔ اس بارے میں چند احادیث مندرجہ ذیل ہیں: رسول اللہ صلی اللہ علیہ واٰلہٖ وسلم نے فرمایا:اِنِّی عَبْدُاللہِ وَخَاتَمُ النَّبِیِّینَ وَاِنَّ آدَمَ لَمُنْجِدِل فِیْ طِیْنَتِہٖ ترجمہ :میں اللہ پاک کا بندہ اور نبیوں (کے سلسلۂ نبوت) کو ختم کرنے والا ہوں اور یہ فیصلہ اس وقت سے صادر شدہ ہے، جب آدم علیہ السلام اپنی مٹی میں تھے۔(مسند امام احمد)رسول اللہ صلی اللہ علیہ والہ وسلم نے فرمایا: اِنَّ الرَّسَالَۃَ وَالنَّبُوَّۃَ قَدْ اِنْقَطَعَتْ فَلَا رَسُوْلَ بَعْدِیْ وَلَا نَبِیَّ ترجمہ:سلسلۂ رسالت و نبوت منقطع ہو چکا ، میرے بعد کوئی رسول ہے نہ نبی۔(مسند احمد، ترمذی)رسول اللہ صلی اللہ علیہ واٰلہٖ وسلم نے ارشاد فرمایا:مَثَلِیْ وَمَثَلُ الْاَنْبِیَاءِ کَرَجُلٍ بَنٰی فَاکْمَلَھَا وَاَحْسَنَھَا اِلَّا مَوْضِعُ لَبِنَۃٍ فَجَعَلَ النَّاسُ یَدْ خُلُوْنَھَاوَیَتَعَجَّلُوْنَ وَیَقُوْلُوْنَ لَوْ لَا مَوْضِعَ الَّلبِنَۃِ ترجمہ:میری اور دوسرے انبیائے کرام علیہم السلام کی مثال ایسی ہے جیسے کسی آدمی نے مکان بنایا،اسے بالکل مکمل کر دیا اور بڑا خوبصورت بنایا، مگر ایک اینٹ کی جگہ خالی چھوڑ دی، لوگ اس میں داخل ہوتے اور تعجب سے کہتے: کاش!اس جگہ بھی ایک اینٹ لگا دی جاتی۔(بخاری، ص352)خاتم النبیین کا حقیقی مفہوم یہی ہےجو محمد رسول اللہ صلی اللہ علیہ واٰلہٖ وسلم نے اس حدیث میں بیان فرمایا کہ آپ قصرِنبوت کی آخری اینٹ ہیں، یہ ختمِ نبوت کی بہترین مثال ہے، جو آپ نے سمجھانے کے لئے خود بیان فرما دی اور ذہن نشین کروا دیا کہ آپ حضرات انبیائے کرام علیہم السلام کی لڑی میں سب سے آخری نبی ہیں۔رسول اللہ صلی اللہ علیہ واٰلہٖ وسلم نے فرمایا: اِنَّ اللَّهَ لَمْ يَبْعَثْ نَبِيًّا اِلَّا حَذَّرَ أُمَّتَهُ الدَّجَّالَ وَأَنَا آخِرُ الْاَنْبِيَاءِوَاَنْتُمْ آخِرُ الْاُمَمِ وَهُوَ خَارِجٌ فِيكُمْ لَا مَحَالَةَ ترجمہ:بے شک اللہ پاک نے کوئی نبی ایسا نہیں بھیجا جس نے اپنی اُمّت کو دجال سے نہ ڈرایا ہو۔ بے شک میں آخری نبی ہوں اور تم آخری اُمّت ہو،وہ یقیناً تم میں ہی آئے گا۔ (ابن ماجہ)ر سول اللہ صلی اللہ علیہ واٰلہٖ وسلم نے فرمایا: وَاِنَّهُ سَيَكُونُ فِي أُمَّتِي كَذَّابُونَ ثَلَاثُونَ كُلُّهُمْ يَزْعُمُ أَنَّهُ نَبِيٌّ وَاَنَا خَاتَمُ النَّبِيِّينَ لَا نَبِيَّ بَعْدِي ترجمہ:میری امت میں تیس کذاب ہوں گےجن میں سے ہر ایک یہ دعویٰ کرے گا کہ وہ نبی ہے، حالانکہ میں خاتم النبیین ہوں، میرے بعد کوئی نبی۔(ابوداؤد، کتاب الفتن)جب حضور صلی اللہ علیہ واٰلہٖ وسلم کی نبوت جملہ اقوامِ عالم کے لئے اور قیامت تک کے لئے ہے، جب آپ پر نازل شدہ کتاب بغیر کسی معمولی تحریف کے جُوں تُوں ہمارے پاس موجود ہے، جب شریعتِ اسلامیہ روزِ اوّل کی طرح آج بھی انسانی زندگی کے تمام شعبوں میں ہماری راہ نمائی کر رہی ہے، جب قرآنِ کریم کی یہ آیت آج بھی اعلان کر رہی ہے(ترجمۂ کنزالایمان: آج میں نے تمہارے لئے تمہارا دین مکمل کردیا اور میں نے تم پر اپنی نعمت پوری کردی اور تمہارے لئے اسلام بطورِ دین پسند کیا۔)(پ6، المائدہ:3 ) تو پھر کسی اور نبی کی بعثت کا کیا فائدہ؟ نبی کی آمد کوئی معمولی واقعہ نہیں ہوتا کہ نبی آیا، جس نے چاہا مان لیا اور جس نے چاہا انکار کر دیا، کوئی کتنا ہی نیک، پاکباز، پارسا اور عالمِ باعمل ہو، اگر وہ کسی سچے نبی کی نبوت کو تسلیم نہ کرے تو اس کا نام مسلمانوں کی فہرست سے خارج کر دیا جائے گا اور کفار و منکرین کے زمرے میں اس کا نام درج کر دیا جائے گا۔

عقیدۂ ختمِ نبوت کا مطلب یہ ہے کہ نبیوں کی تعداد حضور صلی اللہ علیہ واٰلہٖ وسلم کے آنے سے پوری ہوچکی ہے۔ حضور صلی اللہ علیہ واٰلہٖ وسلم کے بعد نبوت اور رسالت ختم ہوچکی ہے۔ اب تاقیامت کوئی نیا نبی یا رسول نہیں آئے گا۔ ویسے تو عقیدۂ ختم نبوت تقریبا 210 سے زائد احادیثِ مبارکہ سے ثابت ہے۔لیکن اس مضمون میں عقیدۂ ختم نبوت پر 10 احادیثِ مبارکہ پیش کرنے کی سعادت حاصل کروں گی۔ حدیث نمبر1:عَنْ أَبِی ہُرَیرَۃَ ؓ،أَنَّ رَسُولَ اللہ صلی اللہ علیہ واٰلہٖ وسلم قَالَ:مَثَلِی وَمَثَلُ الْأَنْبِیاءِ مِنْ قَبْلِی کمَثَلِ رَجُلٍ بَنىٰ بُنْیانًا فَأَحْسَنَہ وَأَجْمَلَہ، إِلَّا مَوْضِعَ لَبِنَۃ مِنْ زَاوِیۃ مِنْ زَوَایاہ، فَجَعَلَ النَّاسُ یطُوفُونَ بِہ وَیعْجَبُونَ لَہ وَیقُولُونَ:ہلَّا وُضِعَتْ ہذِہ اللَّبِنَۃ قَالَ فَأَنَا اللَّبِنَۃ، وَأَنَا خَاتَمُ النَّبِیینَ حضرت ابوہریرۃ رضی اللہ عنہ سے روایت ہے :رسول اللہصلی اللہ علیہ واٰلہٖ وسلم نے فرمایا: میری اور مجھ سے پہلے انبیا ئےکرام علیہم الصلوۃ و السلام کی مثال ایسی ہے کہ ایک شخص نے بہت ہی حسین و جمیل محل بنایا مگر اس کے کونے میں ایک اینٹ کی جگہ چھوڑ دی۔لوگ اس کے گرد گھومنے اور تعجب کرنے لگےاور یہ کہنے لگے: یہ ایک اینٹ بھی کیوں نہ لگادی گئی؟آپصلی اللہ علیہ واٰلہٖ وسلم نے فرمایا:میں وہی اینٹ ہوں اور نبیوں(کے سلسلے)کو ختم کرنے والا ہوں۔(مسلم، باب ذکر کونہ صلی اللہ علیہ واٰلہٖ وسلم خاتم النبیین،حدیث : 5961) حدیث نمبر 2:عَنْ أَبِی ہُرَیرَۃَ ؓ،أَنَّ رَسُولَ اللہ صلی اللہ علیہ واٰلہٖ وسلم قَالَ:فُضِّلْتُ عَلَى الْأَنْبِیاءِ بِسِتٍّ:أُعْطِیتُ جَوَامِعَ الْکلِمِ، وَنُصِرْتُ بِالرُّعْبِ، وَأُحِلَّتْ لِی الْغَنَائِمُ، وَجُعِلَتْ لِی الْأَرْضُ طَہورًا وَمَسْجِدًا، وَأُرْسِلْتُ إِلَى الْخَلْقِ کافَّۃ، وَخُتِمَ بِی النَّبِیونَ حضرت ابوہریرۃ رضی اللہ عنہ سے روایت ہے: رسول اللہصلی اللہ علیہ واٰلہٖ وسلم نے فرمایا:مجھے 6 چیزوں میں انبیا ئےکرام علیہم الصلوۃ و السلام پر فضیلت دی گئی۔ 1)مجھے جامع کلمات عطا کئے گئے۔ 2)رعب کے ساتھ میری مدد کی گئی۔ 3)مال غنیمت میرے لئےحلال کردیا گیا۔ 4)روئے زمین کو میرے لئے مسجد اور پاک کرنے والی چیز بنادیاگیا۔ 5)مجھے تمام مخلوق کی طرف مبعوث کیا گیا۔ 6)مجھ پر تمام نبیوں کا سلسلہ ختم کر دیا گیا۔(مسلم،کتاب المساجد و مواضع الصلوۃ ،حدیث: 1167) حدیث نمبر 3:عَنْ سَعْدِ بْنِ أَبِی وَقَّاصٍ ؓ قَالَ قَالَ رَسُولُ اللہصلی اللہ علیہ واٰلہٖ وسلم لِعَلِی: أَنْتَ مِنِّی بِمَنْزِلَۃِ ہارُونَ مِنْ مُوسٰى، إِلَّا أَنَّہ لَا نَبِی بَعْدِی حضرت سعد بن ابی وقاص رضی اللہ عنہ سے روایت ہے: رسول اللہصلی اللہ علیہ واٰلہٖ وسلم نے حضرت علی رضی اللہ عنہ سے فرمایا:تم مجھ سے وہی نسبت رکھتے ہو جو ہارون علیہ السلام کو موسیٰ علیہ السلام سے تھی مگر میرے بعد کوئی نبی نہیں۔(مسلم، باب من فضائل علی بن ابی طالب،حدیث: 6217) حدیث نمبر 4:عَنْ أَبِی ہُرَیرَۃَعَنِ النَّبِیصلی اللہ علیہ واٰلہٖ وسلم،قَالَ:‏‏‏‏کانَتْ بَنُو إِسْرَائِیلَ تَسُوسُہمُ الْأَنْبِیاءُ کلَّمَا ہلَک نَبِی خَلَفَہ نَبِی، ‏‏‏‏‏‏وَإِنَّہ لَا نَبِی بَعْدِی وَسَیکونُ خُلَفَاءُ فَیکثُرُونَحضرت ابوہریرۃ رضی اللہ عنہ سے روایت ہے:رسول اللہصلی اللہ علیہ واٰلہٖ وسلم نے فرمایا: بنی اسرائیل کی قیادت خود ان کے انبیا ئےکرام علیہم الصلوۃ و السلام کرتے تھے۔ جب کسی نبی کی وفات ہوجاتی تھا تو دوسرا نبی اس کی جگہ آجاتا تھا۔لیکن میرے بعد کوئی نبی نہیں۔ البتہ خلفاء ہوں گے اور بہت ہونگے۔(بخاری، باب ذکر عن بنی اسرائیل،حدیث: 3455) حدیث نمبر 5:عَنْ ثَوْبَانَ ؓ،‏‏‏‏‏‏قَالَ:‏‏‏‏ قَالَ رَسُولُ اللَّہصلی اللہ علیہ واٰلہٖ وسلم:‏‏‏‏وَإِنَّہ سَیکونُ فِی أُمَّتِی ثَلَاثُونَ کذَّابُونَ کلُّہمْ یزْعُمُ أَنَّہ نَبِی، ‏‏‏‏‏‏وَأَنَا خَاتَمُ النَّبِیینَ لَا نَبِی بَعْدِیحضرت ثوبان رضی اللہ عنہ سے روایت ہے :رسول اللہصلی اللہ علیہ واٰلہٖ وسلم نے فرمایا: میری امت میں 30 جھوٹے پیدا ہوں گے ،ان میں سے ہر ایک کہے گا :میں نبی ہوں۔حالانکہ میں خاتم النبیین ہوں۔میرے بعد کوئی نبی نہیں۔(ترمذی، باب ما جاء لا تقوم الساعۃ حتی یخرج کذابون، حدیث: 2219) حدیث نمبر 6:عَنْ أَنَس بْن مَالِک ؓ، قَالَ:قَالَ رَسُولُ اللَّہصلی اللہ علیہ واٰلہٖ وسلم:‏‏‏‏إِنَّ الرِّسَالَۃ وَالنُّبُوَّۃ قَدِ انْقَطَعَتْ، ‏‏‏‏‏‏فَلَا رَسُولَ بَعْدِی وَلَا نَبِی حضرت ثوبان رضی اللہ عنہ سے روایت ہے :رسول اللہصلی اللہ علیہ واٰلہٖ وسلم نے فرمایا:ر سالت و نبوت ختم ہوچکی ہے پس میرے بعد نہ کوئی رسول ہے نہ نبی۔(ترمذی،باب ذہبت النبوۃ وبقیت المبشرات،حدیث: 2272) حدیث نمبر 7:عَنْ أَبِی ہرَیرَۃ،قَالَ رَسُولُ اللَّہصلی اللہ علیہ واٰلہٖ وسلم صَلَّى اللَّہ عَلَیہ وَسَلَّمَ:‏‏‏‏نَحْنُ الْآخِرُونَ السَّابِقُونَ یوْمَ الْقِیامَۃ أُوتُوا الْکتَابَ مِنْ قَبْلِنَا وَأُوتِینَاہ مِنْ بَعْدِہمْحضرت ابوہریرۃ رضی اللہ عنہ سے روایت ہے :رسول اللہصلی اللہ علیہ واٰلہٖ وسلم نے فرمایا: ہم سب کے بعد آئے اور قیامت کے دن سب سے آگے ہونگے۔صرف اتنا ہوا کہ ان کو کتاب ہم سے پہلے دی گئی۔(بخاری،باب ھل علی من لا یشھد الجمعۃ غسل من النساء والصبیان،حدیث: 896) حدیث نمبر 8:عَنْ عُقْبَۃ بْنِ عَامِرٍ، قَال: قَالَ رَسُولُ اللَّہصلی اللہ علیہ واٰلہٖ وسلم:‏‏‏‏ لَوْ کانَ بَعْدِی نَبِی لَکانَ عُمَرَ بْنَ الْخَطَّابِ حضرت عقبہ بن عامر رضی اللہ عنہ سے روایت ہے :رسول اللہصلی اللہ علیہ واٰلہٖ وسلم نے فرمایا: اگر میرے بعد کوئی نبی ہوتا تو عمر بن خطاب رضی اللہ عنہ ہوتے۔(ترمذی، مناقب ابی حفص عمر ؓ بن الخطاب ، حدیث: 3686) حدیث نمبر 9:عن جبیر بن مطعم قال سمعت النبی صلی اللہ علیہ واٰلہٖ وسلم یقول ان لی اسماء،وانا محمد،وانا احمد،وانا الماحی الذی یمحواللہ بی الکفر، وانا الحاشر الذی یحشرالناس علی قدمی، وانا العاقب الذی لیس بعدہ نبی حضرت جبیر بن مطعم رضی اللہ عنہ سے روایت ہے: رسول اللہصلی اللہ علیہ واٰلہٖ وسلم نے فرمایا:میرے چند نام ہیں۔میں محمد ہوں۔میں احمد ہوں۔میں ماحی یعنی مٹانے والا ہوں کہ میرے ذریعے اللہ پاک کفر کو مٹائے گا۔ میں حاشر یعنی جمع کرنے والا ہوں کہ لوگ میرے قدموں پر اٹھائے جائیں گے۔ میں عاقب ہوں یعنی سب کے بعد آنے والا ہوں کہ میرے بعد کوئی نبی نہیں۔ (مشکوٰۃ،باب اسماء النبی صلی اللہ علیہ واٰلہٖ وسلم وصفاتہ،حدیث: 5776) حدیث نمبر 10: عَنْ سَہلٍ، ‏‏‏‏‏‏قَالَ: قَالَ رَسُولُ اللَّہصلی اللہ علیہ واٰلہٖ وسلم:‏‏‏‏ بُعِثْتُ أَنَا وَالسَّاعَۃ ہکذَاحضرت سھل رضی اللہ عنہ سے روایت ہے:رسول اللہصلی اللہ علیہ واٰلہٖ وسلم نے اپنی انگشت شہادت اور درمیانی انگلی کی طرف اشارہ کر کے فرمایا: مجھے اور قیامت کو ان دو انگلیوں کی طرح بھیجا گیا ہے۔ (یعنی جس طرح شہادت کی انگلی اور درمیانی انگلی کے درمیان کوئی اور انگلی نہیں اسی طرح میرے اور قیامت کے درمیان کوئی اور ایسا انسان نہیں آئے گا جس کو نبوت دی جائے گی)(بخاری،باب قول النبی صلی اللہ علیہ واٰلہٖ وسلم بعثت انا والساعۃ کھاتین،حدیث:6503)ان دس احادیثِ مبارکہ سے بھی یہ بات اظہر من الشمس ہوگئی کہ نبیوں کی تعداد حضورصلی اللہ علیہ واٰلہٖ وسلم کے تشریف لانے سے پوری ہوگئی ہے اور حضورصلی اللہ علیہ واٰلہٖ وسلم کے بعد نبیوں کی تعداد میں کسی ایک نبی کا اضافہ بھی نہیں ہوگا۔

خاتم المرسلین، رحمۃ اللعالمین، شفیع المذنبین، انیس الغریبین، سراج السالکین، محبوبِ رب العالمین، جنابِ صادق و امین صلی اللہ علیہ واٰلہٖ وسلم کا فرمانِ مغفرت نشان ہے:جب جمعرات کا دن آتا ہے تو اللہ تعالی فرشتوں کو بھیجتا ہے، جن کے پاس چاندی کے کاغذ اور سونے کے قلم ہوتے ہیں، وہ لکھتے ہیں کون یومِ جمعرات اور شبِ جمعہ مجھ پر کثرت سے درود پاک پڑھتا ہے۔(کنز العمال، جلد 1، صفحہ 280)

عقیدۂ ختمِ نبوت دینِ اسلام کا بنیادی عقیدہ ہے۔ یہ ایک حساس ترین عقیدہ ہے۔ ختمِ نبوت کا انکار قرآن کا انکار ہے۔ ختمِ نبوت کا انکار صحابہ کرام علیہم الرضوان کے اجماع کا انکار ہے۔ ختمِ نبوت کو نہ ماننا رسولِ کریم صلی اللہ علیہ واٰلہٖ وسلم کے مبارک زمانے سے لے کر آج تک کے ہر مسلمان کے عقیدے کو جھوٹا کہنے کے مترادف ہے۔ اللہ پاک قرآنِ پاک میں ارشاد فرماتا ہے: مَا كَانَ مُحَمَّدٌ اَبَاۤ اَحَدٍ مِّنْ رِّجَالِكُمْ وَ لٰكِنْ رَّسُوْلَ اللّٰهِ وَ خَاتَمَ النَّبِیّٖنَؕ وَکَانَ اللّٰہُ بِکُلِّ شَیۡءٍ عَلِیۡمًا(۴۰)ع (پ22، الاحزاب: 40)ترجمۂ کنزالایمان: محمد تمہارے مردوں میں سے کسی کے باپ نہیں ہیں، لیکن وہ اللہ کے رسول ہیں اور سب انبیاء کے آخر میں ہیں اور اللہ ہر چیز کا خوب علم رکھنے والاہے۔ (پارہ 22، الاحزاب:40)خاتم النبیین کا معنی تفاسیر کی روشنی میں:ختمِ نبوت کے منکر اس آیتِ مبارکہ کے الفاظ خاتم النبیین کے معنی میں طرح طرح کی بے بنیاد جھوٹی اور دھوکا پر مبنی تاویلاتِ فاسدہ کرتے ہیں جو قرآن، احادیث، اجماعِ صحابہ اور مفسرین، محدثین، محققین، متکلمین اور ساری اُمّتِ محمدیہ کے خلاف ہیں، تفاسیر اور اقوالِ مفسرین کی روشنی میں خاتم النبیین کا معنیٰ آخری نبی ہی ہے۔صاحب زادُ المیسر ابو الفرج عبد الرحمٰن بن علی جوزی(وفات 597ھ) لکھتے ہیں: خاتم النبیین کے معنی آخرالنبیین ہیں۔ حضرت عبداللہ ابنِ عباس رضی اللہ عنہما نے فرمایا:اس سے مراد یہ ہے کہ اگر اللہ کریم محمد مصطفے صلی اللہ علیہ واٰلہٖ وسلم کے ذریعے سلسلۂ نبوت ختم نہ فرماتا تو آپ صلی اللہ علیہ واٰلہٖ وسلم کا بیٹا حیات رہتا، جو ان کے بعد نبی ہوتا۔(زاد المیسر، تحت الآیۃ: 40 ،6/393)احادیثِ مبارکہ:1۔آپ صلی اللہ علیہ واٰلہٖ وسلم نے فرمایا:فَاِ نِّی آخِرُ الْاَنْبِیَاءِ وِاِنَّ مَسْجِدِی آخِرُ الْمَسَاجِدبے شک میں سب نبیوں میں آخری نبی ہوں اور میری مسجد آخری مسجد ہے(جیسے کسی نبی نے خود تعمیر کیا ہے۔)(مسلم، ص 553، حدیث 3376)2۔ اِنَّ الرَّسَالَۃَ وَالنَّبُوَّۃَ قَدْ اِنْقَطَعَتْ فَلَا رَسُوْلَ بَعْدِیْ وَلَا نَبِیَّ آپ صلی اللہ علیہ واٰلہٖ وسلم نے فرمایا:بے شک رسالت اور نبوت منقطع ہو چکی ہے، پس میرے بعد نہ کوئی رسول ہوگا، نہ کوئی نبی۔(تر مذی، 4/1216، حدیث:2279)3۔اَنَا آخِرُ الْاَنْبِیَاءِ وَ اَنْتُمْ آخِرُ الْاُمَمْ میں سب سے آخری نبی ہوں اور تم سب سے آخری امت ہو۔(ابن ماجہ، 6/616، حدیث:4077)4۔اَنَا خَاتَمُ النَّبِیّینَ وَلَا فَخْرَ یعنی میں خاتم النبیین ہوں اور یہ بطورِ فخر نہیں کہتا۔(معجم اوسط، 1/63، حدیث 170-تاریخ کبیر للبخاری،4/236،حدیث: 5731) قرآن وسنت کے قطعی نصوص سے یہ ثابت ہوگیا ہے کہ نبوت و رسالت کا سلسلہ حضرت محمد رسول اللہ صلی اللہ علیہ واٰلہٖ وسلم پر ختم کردیا گیا، آپ صلی اللہ علیہ واٰلہٖ وسلم سلسلۂ نبوت کی آخری کڑی ہیں، آپ کے بعد کسی شخص کو منصبِ نبوت پر فائز نہیں کیا جائے گا۔