اسپیشل پرسنز ڈیپارٹمنٹ دعوتِ اسلامی  کے تحت 6 فروری 2026ء کو ڈسٹرکٹ شیخوپورہ کی تحصیل مریدکے میں اسپیشل پرسنز کے لئے ”سنتوں بھرا اجتماع“ منعقد کیا گیا جس میں اُن کے سرپرست حضرات اور دیگر اسلامی بھائیوں نے شرکت کی۔

تلاوت و نعت کے بعد مبلغِ دعوتِ اسلامی محمد سہیل عطاری نے اشاروں کی زبان میں سیرتِ مصطفیٰ صلَّی اللہ علیہ واٰلہٖ وسلَّم کے حوالے سے بیان کیا اور وہاں موجود اسپیشل پرسنز کو حسنِ اخلاق اپنانے کی ترغیب دلائی۔

اس کے علاوہ مبلغِ دعوتِ اسلامی نے اسپیشل پرسنز کو دعوتِ اسلامی کے 12 دینی کاموں میں عملی طور پر شریک ہونے کا ذہن دیا جس پر انہوں نے اچھی اچھی نیتیں کیں۔(رپورٹ: محمد مبشر رضا عطاری ڈسٹرکٹ شیخوپورہ ذمہ دار اسپیشل پرسنز ڈیپارٹمنٹ ، کانٹینٹ:غیاث الدین عطاری)

5 فروری 2026ء کو ڈسٹرکٹ جامشورو کے مدنی مرکز فیضانِ مدینہ کوٹری میں شعبہ مدرسۃالمدینہ شارٹ ٹائم دعوتِ اسلامی کے تحت ”تقریبِ اسناد“ منعقد ہوئی جس میں بچوں سمیت اُن کے سرپرستوں، سیاسی و سماجی شخصیات اور مختلف سطح کے ذمہ داران شریک ہوئے۔

معلومات کے مطابق تقریب کے آغاز میں تلاوتِ قراٰن کی گئی اور نعت خواں اسلامی بھائی نے ہمارے آخری نبی صلَّی اللہ علیہ واٰلہٖ وسلَّم کی شان میں نعت شریف پڑھی جس کے بعد ڈویژن ذمہ دار محمد سعید عطاری نے ”عظمتِ قراٰن“ کے موضوع پر بیان کیا۔

تقریب کے آخری لمحات میں حفظ و ناظرہ قراٰنِ پاک مکمل کرنے والے بچوں کو کنزالمدارس بورڈ کی جانب سے اسناد دینے کے ساتھ ساتھ اُن کی حوصلہ افزائی بھی کی گئی۔(رپورٹ: شعبہ مدرسۃالمدینہ شارٹ ، کانٹینٹ:غیاث الدین عطاری)

عاشقانِ رسول کی دینی تحریک دعوتِ اسلامی کے شعبہ کفن دفن کے تحت اوکاڑہ شہر کے علاقے مدینہ کالونی میں قائم جامع مسجد دیدارِ مصطفیٰ میں ”حاضریِ قبرستان کورس“ منعقد ہوا جس میں اہلِ علاقہ نے شرکت کی۔

تلاوت و نعت کے بعد شعبے کے ڈسٹرکٹ اوکاڑہ ذمہ دار لیاقت علی عطاری نےقبرستان میں حاضری کے آداب بیان کئے اور اپنے مرحومین کو زیادہ سے زیادہ ایصالِ ثواب کرنے کا ذہن دیا جس پر انہوں نے اچھی اچھی نیتیں کیں۔(رپورٹ:احمد ندیم عطاری شعبہ تعلیم، کانٹینٹ:غیاث الدین عطاری)

دعوت اسلامی کی ڈیجیٹل لائبریری کا تعارف

مولانا زاہدفاروقی (آئی ٹی ڈیپارٹمنٹ )

عالمِ اسلام کی عظیم دینی ، علمی، روحانی، تبلیغی، اصلاحی، تعلیمی اور رفاہی تحریک ’’دعوتِ اسلامی ‘‘ کا تعارف اس کے ہمہ گیر دینی و اصلاحی مقصد’’ مجھے اپنی اور ساری دنیا کے لوگوں کی اصلاح کی کوشش کرنی ہے ‘‘ سے بخوبی عیاں اور مترشح ہے۔ اس نے تہذیبی کشمکش کی عالمگیریت کے تصور کو پیش نظر رکھ کر عصر حاضر سے ہم آہنگ دینی حکمتِ عملی سے تبلیغ قرآن و سنت کے بنیادی مقصد کی تکمیل کی طرف سفر شروع کیا۔ دعوتِ اسلامی نے جدید دور کےبدلتے تقاضوں کو مدِ نظر رکھتے ہوئے دینِ اسلام کی اشاعت، تعلیم وترتیب ، سماجی بہبود اور اخلاقی اصلاح کے لیے شرعی ضرورتوں کے مطابق منظم اور مربوط ادارہ جاتی نظام قائم کیا ہے جو دنیا کے اکثرو بیشتر ممالک میں مختلف دینی، تعلیمی اور سماجی شعبہ جات میں متنوع قسم کی خدمت سرانجام دے رہا ہے۔

دعوتِ اسلامی کے زیرِ اہتمام وانتظام قائم علوم اسلامیہ کے اشاعتی ادارے، سماجی ویلفیئر کے منظم شعبہ جات، عصری و دینی تعلیمی ادارے، دینی مراکز، مساجد اور تربیتی نظام دعوت اسلامی کے مقصد کےحصول کی نہ صرف نشاندہی کرتے ہیں بلکہ مذکورہ تمام ادار وں کے اغراض ومقاصد اس بات پر شاہد عادل ہیں کہ امت کی اصلاح کی یہ عظیم تحریک ’’دعوت اسلامی ‘‘محض قدیم روایتی دعوت وارشاد تک محدود نہیں بلکہ ایک جامع منظم پائیدار اصلاح امت کا وژن رکھتی ہے۔ اس عظیم مقصد اور وژن کےساتھ ، دورِ جدید کی فنی و تکنیکی صلاحیتوں سے بخوبی استفادہ کرتے ہوئے علم دین کی ڈیجیٹلائزیشن خدمت کے عظیم جذبہ کےتحت دعوت اسلامی کے پلیٹ فارم پر انفارمیشن ٹیکنالوجی شعبہ کو دعوت وارشاد و تعلیمی مقاصد کےحصول کا ایک مؤثر ذریعہ بنایا گیا ہے۔

اصلا ح امت کے والہانہ جذبہ سے سرشار دعوتِ اسلامی کے اسّی سے زائد علمی، روحانی، سماجی، تعلیمی، فکری، تربیتی، اقتصادی، مالیاتی اور خدمتِ دین سے متعلق شعبہ جات میں آئی ٹی ڈیپارٹمنٹ ایک ایسا معاون اور بنیادی شعبہ ہے جو دعوت وتبلیغ اور علمی سرگرمیوں کو ڈیجیٹل تقاضوں سے ہم آہنگ کرنے میں کلیدی کردار ادا کر رہا ہے۔ یہ شعبہ جدید ڈیجیٹل پلیٹ فارمز، آن لائن تعلیمی نظام، تعلیم اسلام سے لبریز میڈیا، ڈیٹا مینجمنٹ، سافٹ ویئر سلوشنز ،اسلامی موبائل ایپلی کیشنز اور ٹیکنالوجی پر مبنی خدمات کے ذریعے علمِ دین کی اشاعت کو عالمی سطح پر مؤثر اور منظم انداز میں پیش کرکے دعوت اسلامی کے عظیم مشن ’’ مجھے اپنی اور ساری دنیا کے لوگوں کی اصلاح کی کوشش کرنی ہے ‘‘ میں حتی المقدور اپنا حصہ ڈال رہا ہے۔

آئی ٹی ڈیپارٹمنٹ دعوت اسلامی نے اب تک علم دین کی اشاعت کےلئے ڈیجیٹلائزیشن کے دورحاضر میں 40 کےقریب موبائل ایپلی کیشن، ڈیسک ٹاپ ایپلی کیشن، سافٹ ویئر تیار کئے ہیں۔ لاکھوں لوگ دعوت اسلامی کےآئی ٹی ڈیپارٹمنٹ کی پروڈکٹس ، ایپلی کیشنز اور ڈیجیٹل لائبریر ی سے مستفیدہورہے ہیں۔

کراچی ،لاہور، فیصل آباد میں موجود دعوت اسلامی کےآئی ٹی ڈیپارٹمنٹ میں 40سے زائد سافٹ ویئر انجینئرز ، ڈیٹا مینجمنٹ ،پروڈکٹ ڈیویلپرز، پروڈکٹ مینجرز، کیو اے سسٹم ، کمپلائن سسٹم اور دیگر ضرور ی اسٹاف پر مشتمل 100 سے زائد افراد خدمت دین میں شب وروز مصروف عمل ہیں۔

درحقیقت دعوتِ اسلامی کا آئی ٹی ڈیپارٹمنٹ نہ صرف تبلیغ قرآن وسنت کے پیغام کو جغرافیائی سرحدوں سے ماورا کرنے کا سبب بن رہا ہے بلکہ انفارمیشن ٹیکنولوجی کے ڈیجیٹل معاشرے میں قرآن وحدیث کی تعلیمات، نگارشات ائمہ مجتہدین ، سلاسل تصوف کے اصلاحی نظریات،افکار اولیائے امت ،مروجہ دینی نصاب تعلیم، تربیت اور اصلاح کے ایک جدید اور مستحکم ماڈل کی بنیاد بھی فراہم کرتا ہے، جو مستقبل میں متلاشیان علم کے تحقیقی و علمی مطالعے کے لیے ایک اہم موضوع کی حیثیت رکھتا ہے۔

ڈیجیٹل لائبریری کا تعارف:

دعوتِ اسلامی کی ڈیجیٹل لائبریری دراصل علمِ دین کی اشاعت کا ایک منظم، مستند اور کثیرالجہتی ماڈل ہے، جس کا مقصد اسلامی علمی ورثہ کو جدید ڈیجیٹل ذرائع کے ذریعے عام فہم اور قابلِ رسائی بنانا ہے۔ اس ڈیجیٹل لائبریری کے نمایاں پلیٹ فارمز درج ذیل ہیں:

· المدینہ لائبریری آن لائن بک سروس

· المدینہ لائبریری ڈیسک ٹاپ ایپلی کیشن

· اسلامک ای بک سروس

· ریڈ اینڈ لسن اسلامک بک لائبریری

· صراط الجنان فی تفسیر القرآن موبائل ایپلی کیشن

· فیضان حدیث موبائل ایپلی کیشن

· فتاویٰ رضویہ موبائل ایپلی کیشن

یہ تمام پلیٹ فارمز علمی مواد کو مختلف صارفین کی ضروریات کے مطابق پیش کرتے ہیں، خواہ وہ محقق ہوں، طلبہ ہوں یا عام قارئین۔

المدینہ لائبریری آن لائن بک سروس:

آئی ٹی ڈیپارٹمنٹ دعو ت اسلامی کی ڈیجیٹل لائبریر ی خدمات میں سرفہرست المدینہ لائبریری آئن لائن بک سروس ہے ۔ بےشمار موضوعات پر علمی ورثہ پر مشتمل یہ لائبریری مسلمانوں کو علم دین سے روشناس کروانے ، مسلمانوں کے ذوق مطالعہ اور شوق کتب بینی میں روز افزوں اضافہ کا نہ صرف سبب بنتی ہے بلکہ المدینہ لائبریر ی آن لائن بک سروس کے پلیٹ فارم سےاسلامی موضوعات پر متنوع قسم کی کتابیں شائقین مطالعہ کو دعوت فکرو نظر سے ہمکنار کرکے تحقیقی ضروریات کو پورا کرنے والا ذریعہ بھی ہے۔ یہ پلیٹ فارم علمی پیاس بجھانے میں نمایاں کردار ادارکرنے کےساتھ علم دین کا اشاعت ونشریات میں بھی بھرپور خدمات سرانجام دیتا ہوا نظر آتا ہے۔

المدینہ لائبریری ڈیسک ٹاپ اپیلی کیشن :

آئی ٹی ڈیپارٹمنٹ دعوت اسلامی کا دوسرا بڑا ڈیجیٹل علمی پلیٹ فارم المدینہ لائبریری ڈیسک ٹاپ ایپلی کیشن ہے۔ اردو زبان میں یہ پہلا ڈیسک ٹاپ سافٹ ویئر ہے جس میں اسلامی علوم کے اردو تراجم کی کثرت پائی جاتی ہے۔ قرآن وحدیث، عقائد ونظریات ، اصول وفقہ، سیرت وتاریخ، اخلاقیات، درسیات، اسلامیات، اکابر اولیائے امت کے حالات زندگی، تصوف، دعوت اسلامی کا تنظیمی وتربیتی لٹریچرز،حمد ونعتیہ دیوان، اورادو وظائف کے علاوہ اصلاح امت کےلئے میر اہلسنت حضرت علامہ مولانا محمد الیاس عطارقادری کے علمی ورثہ پر مشتمل 100 سے زائد کتابیں ، رسائل، ملفوظات، ہزاروں علوم سے ماخوذ قسط وار مدنی مذاکرہ کی علمی نگارشات کا ذخیرہ ہر ایک کےلئے علمی استفادے کا مؤثر ذریعہ ہے۔

اسلامک ای بک سروس:

دعوت اسلامی کی ڈیجیٹل علمی خدمات میں ایک نام اسلامک ای بک سروس کا بھی ہے۔یہ پلیٹ فارم مکتبۃ المدینہ جو کہ دعوت اسلامی کا اشاعتی ادارہ ہے جہاں اشاعتی تاریخ کے کئی نئے نئے ریکارڈ بن چکے ہیں۔ صرف ’’فیضان سنت ‘‘ کی اشاعتی تاریخ اور تعداد کا شمار تاریخ کی بلند ترین سطح پر پہنچ چکا ہے ۔چونکہ دینی کاموں میں اخلاص شرط ہوتا ہے ورنہ اس کتاب کی اشاعت تاریخ کے کئی ریکارڈ توڑ چکی ہے۔ اسلامک ای بک سروس کے ڈیجٹل پلیٹ فارم پر مکتبۃ المدینہ کی شائع کردہ کتابیں پی ڈی ایف کی صورت میں قارئین کے قلب وروح کی علمی تسکین کا باعث بنتی ہیں ۔

ریڈ اینڈ لسن اسلامک بک لائبریری:

دورجدید کی تیزترقی میں انسان کے پاس وقت وہ قیمتی اثاثہ ہے جو گھریلوں زندگی سے لیکر پروفیشنل زندگی تک انسان کو مصروف رکھتا ہے ۔اس وقت کی گہماگہمی اور مصروف ترین لمحات میں انسان کےپاس مطالعہ کےلئے وقت نکالنا مشکل تر ہوتاجارہا ہے۔شعبہ تعلیم سے وابستہ حضرات ،علم دین سیکھنے سکھانے میں مصروف علما، تعلیم وتعلم سے وابستہ اسکالرز کے علاوہ ایک بہت بڑی تعداد خواہ ہوپروفیشنل حضرات ہو یا عام افراد ان کےلئےبلاستعیاب کتاب کا مطالعہ کرنا ناممکن بن گیا ہے۔ دعوت اسلامی نے اس ضرورت کو بھی مدنظر رکھتے ہوئے ایک ڈیجیٹل سلوشن پیش کیا ہے۔جس کا نام ریڈ اینڈ لسن اسلامک بک لائبریری ہے۔ اس لائبریری میں وقت کو پیش نظر رکھتے ہوئے ضخیم کتابوں کو مختصر صفات میں تبدیل کرکے رسائل کی صورت میں پیش کیا جاتاہے۔ نیز ان رسائل کی آڈیو بھی بنائی جاتی ہےکہ کوئی پڑھ نہیں سکتا تو سن کر ہی علم دیں حاصل کرسکے۔

دعوت اسلامی کی یہ ڈیجیٹل لائبریر ی ان افراد کےلئے خاصی اہمیت کی حامل ہےجو کم پڑھے لکھے ہوتے ہیں یا عوام الناس کا مخصوص طبقہ جو شہری سہولیات سےدور رہ کر مختصر اور آسان انداز میں علم حاصل کرنے کی تڑپ رکھتا ہے۔ دعوت اسلامی نے اس مسئلہ کی بھی عملی طورحل کرکے پیش کیا اور ریڈ اینڈ لسن اسلامک بک لائبریری کا قیام عمل میں لایا۔

صراط الجنان فی تفسیر القرآن موبائل ایپلی کیشن:

دعوت اسلامی آئی ٹی ڈیپاٹمنٹ نے تعلیم قرآن عام کرنے اور فہم قرآن کا ذوق دنیا میں بسنے والے مسلمانوں میں اجاگر کرنے کےلئے قرآن کی خدمت کو اولین ترجیح دی۔ پہلے تلاوت قرآن درست انداز کےساتھ پڑھنے کےلئے قرآن کی ڈیجیلائزیشن خدمت کو مدنی قاعدہ ایپلی کیشن کےذریعے متعارف کروایا۔پھر تعلیم قرآ ن کےلئے القرآن مجید ایپلی کیشن پیش کی ۔ اس کےبعد قرآن کے معانی ومفاہیم اور تعلیمات قرآن سے امت کو عالمی سطح پر رہنمائی فراہم کرنے کےلئے آسان انداز میں لکھی گئی10جلدوں پر مشتمل تفسیر صراط الجنان فی تفسیر قرآن کی موبائل ایپلی کیشن بنا کر قرآن کی ڈیجیٹل لائبریر ی سے لوگوں کا تعلق قرآن سے جوڑا۔

فیضان حدیث موبائل ایپلی کیشن :

خدمت قرآن کے بعد احادیث کی ڈیجیٹل لائبریری کے قیام کی طرف قدرت کی کرم فرمائی سے رہنمائی نصیب ہوئی ۔آئی ٹی ڈیپارٹمنٹ دعو ت اسلامی نے حدیث کی مشہور کتاب مشکاۃ المصابیح اور اس کی مشہور شرح مشکاۃ المصابیح کی موبائل ایپلی کیشن سے حدیث کی ڈیجیٹل لائبریری کا قیام ممکن بیانا۔ حدیث کی ڈیجیٹل لائبریری جو کہ موبائل ایپلی کیشن کی صورت میں فیضان حدیث موبائل ایپلی کیشن کے نام سے پلے اسٹور پر دستیاب ہے۔ اس میں مزید ریاض الصالحین اور دیگر علمائے اسلام کی کتابیں بھی اندراج کی گئیں ہیں۔ صحاح ستہ کا عنقریب مجموعہ بھی اس ڈیجیٹل لائبریری کا حصہ بننے جارہا ہے۔

فتاوی رضویہ موبائل ایپلی کیشن:

قرآن وحدیث کےبعد شریعت اسلامیہ کے چاروں بنیادی ماخذ پر مشتمل اسلامی فقہ کا اردو زبان میں سب سے بڑا انسائیکلوپیڈیا فتاوی رضویہ کو ڈیجیٹل لائبریری کی صورت میں پیش کیاگیا۔

فقہ حنفی کی نمائندگی کرتا ہوا سب سے مستند علمی ماخذ فتاویٰ رضویہ کی اہمیت ہر مکتبہ فکر میں مسلم ہے ۔ امام اہلسنت حضرت امام احمد رضا خان بریلوی کا علمی شاہکار فتاوی کو خوبصورت انداز کےساتھ آئی ٹی ڈیپارٹمنٹ نے پیش کیا۔اور فقہ وفتاوی کے ساتھ عقائد اہلسنت کی ترجمانی کرتا ہواہے یہ سافٹ ویئر ایک بہت بڑی علمی ڈیجیٹل لائبریر ی ہے جو آئی ٹی دعوت اسلامی نے پیش کی ہے۔

ڈیجیٹل لائبریری کے قیام کی تفصیل:

دعوت اسلامی کی دینی خدمت پر طائرنہ نظر ڈالیں تو بانی دعوت اسلا می حضرت علامہ مولانا محمد الیاس قادری کی تعلیمات کا بنیادی مقصد شریعت کی بالادستی اور احیائے سنت کا نظام قائم کرنا ہے۔امیر اہلسنت کی انفرادی دعوت سے لیکر اجتماعی نیکی کی دعوت تک کوئی بھی بات شریعت کے دائرہ کارسے نہیں نکلتی ہے۔آ پ نے دعوت اسلامی کے پلیٹ فارم سے احکام شریعت لوگوں تک پہنچانے کےلئے جو علمی کام سرانجام دیئے ان میں ایک المدینۃ العلمیہ اسلامک ریسرچ سینٹر کا قیام ہے۔یہ وہ عظیم ادارہ ہے جہاں علمااسکالر محققین کی خاصی تعداد علمی سرگرمیوں میں مصروف عمل رہتی ہیں۔ عوام الناس کےاستفادہ کےلئے سہل اور آسان انداز کےساتھ اسلامک علمی لٹریچرز پر تحقیقی کام ہوتا ہے۔مختلف عربی کتابوں کے ترجمہ کئے جاتے ہیں۔کتابیں لکھی جاتی ہیں۔ قرآن وسنت، عقائد، فقہ ،حدیث، سیرت، اصول، عربی گرام،درسی کتابیں ، حالات زندگی، تبلیغی نصاب، نیکی کی دعوت کےموضوع پر علمی مواد کی ترتیب۔حمدونعت ،اوراد ووظائف کےعلاوہ دعوت اسلامی کی تربیتی نصاب، نیکی دعوت پر لٹریچراور بہت سے موضوعات پر علمی نگارشات پیش کرنا اس شعبہ کا اہم کام ہے۔تقریبا 100سے زائد علما اور اسکالرز اس شعبہ کے تحت کتابیں رسائل، میگزئین، تراجم کا کام کررہے ہیں۔تادم تحریردوہزارسے زائد کتب ورسائل پر کام ہوچکا ہے ۔جب المدینہ العلمیہ کی تحقیقی شدہ کتاب زیور طبع سے آراستہ ہونے کےلئے مکتبۃ المدینہ اشاعتی ادارہ سے ہوکر منظر عام پر آتی ہے تو پھر اس کی ڈیجیٹل خدمت کا مرحلہ آئی ٹی ڈیپارٹمنٹ دعوت اسلامی طے کرتا ہے۔

آئی ٹی ڈیپارٹمنٹ عالمی سطح مسلمانوں کو علم دین سے روشناس کروانے ، اسلام کی تعلیمات سےہمکنار کرنے کےلئے المدینۃ العلمیہ کی تحقیق شدہ کتاب کو دعوت اسلامی کی ڈیجیٹل لائبریری کا حصہ بناتا ہے۔یوں ایک کتاب مختلف ڈیجیٹل چینلز کےذریعے دنیا بھر میں عام ہوجاتی ہے ۔ یوں اہل اسلام کو مستند علمی مواد کسی بھی قیمت کےاداکئے بغیر نصیب ہوجاتا ہے۔

ڈیجیٹل لائبریری کے قیام کا بنیادی مقصد :

امیر اہلسنت حضرت علامہ مولانا الیاس قادری رضوی کی شخصیت اور آپ کی آفاقی نظریات نے جس طرح دنیا بھر میں نیکی کی دعوت کےذریعے اپنے قدم جمائے اور معاشرتی طبقات میں سے ہر طبقہ کو سنت رسول پر عمل کا خوگربنایا۔شریعت اسلامیہ کی تعلیمات عام کرنے اور علم دین کےحصول کےلئے دینی ادارے کے قیام کا عمل ممکن بنایا۔یوں ہی آپ نے دعوت اسلامی کےپلیٹ فارم سے عوام الناس کے عام استفادہ کےلئے کتابیں تحریر کیں اور اسلو ب کتابت کو انتہائی سہل اور عام فہم بنایا۔اشاعتی ادارے سے کتابیں چھپواکر انتہائی سستے داموں فروخت کر نےکا ذہن دیا۔من وعن آپ نے جغرافیائی سرحدوں کو عبور کرنے کےلئے ڈیجیٹل دنیا کو اپنی نیکی کی دعوت کا بھی پلیٹ فارم بنایا۔دنیا بھر کے مسلمانوں میں علم دین حاصل کرنے کا شعور بیدا رکیا۔شعور کی بیداری کے بعد علم دین سیکھنے کےلئے مواقع فراہم کئے۔ان تمام نیکی کے کاموں کا مقصد یہ تھا کہ دعوت اسلامی اہل ایمان کے علمی ورثہ کو نہ صرف تقسیم کرسکے بلکہ ایسامعاشرہ تشکیل دینے میں کامیاب ہو جہاں ہر کوئی سنت رسول کے مطابق زندگی گزارنے کا عادی بن جائے۔اس مقصد کےحصول اور اپنی آفائی مقصدیت یعنی ساری دنیا کےلوگوں کی اصلاح کی کوشش کرنی ہے کے لئے ہر ممکن اصلاح کےپلیٹ فارم استعمال کرنا بانی دعوت اسلامی کا مطمح نظر تھا۔جو آج عملی شکل میں دعوت اسلامی کے شعبہ آئی ٹی نے ڈیجیٹل لائبریری کی صورت میں پیش کیا۔

کتب کی ڈیجیٹلائزیشن کا طریقہ کار: (Scanning, OCR, Indexing)

اسلامک ریسرچ سینٹر المدینۃ العلمیہ دعوت اسلامی کی طرف سے طبع شدہ کتاب آئی ٹی ڈیپارٹمنٹ کو موصول ہوتی ہے۔ یہ کتاب ورڈ اور پی ڈی ایف دونوںصورتوں میں ہوتی ہے۔ آئی ٹی ڈیپارٹمنٹ نے موصول شدہ کتاب کو ڈیجیٹل لائبریری کا حصہ بنانے کےلئے ایک انٹرنل ڈیپارٹمنٹ بک سروس کا بنایا ہے، جہاں ڈیٹاانٹری ، کتاب کی انڈیکسنگ ، یونی کوڈ اور اپ لوڈ کرنے کےلئے مخصوص افراد موجود ہوتے ہیں۔پہلے مرحلہ میں یونی کوڈ ، پھر ڈیجیٹل لائبریری کے معیار کے مطابق فاؤنٹس کا استعمال، انڈیکسنگ کےلئے H1,H2, H3 ، کتاب کے موضوع کا انتخاب ، صفحات کی ترتیب پھر ٹیکنیکل کام کرنےکےبعد آن لائن کے مرحلہ کا وقت آتا ہے۔یوں ایک کتاب اپنے تمام ترمراحل طے کرنے کے بعد ڈیجیٹل لائبریری کاحصہ بنتی ہے۔

کتب کے انتخاب اور تصدیق کا معیار :

دعوت اسلامی کاکوئی بھی کام بغیر تحقیق اور مشاورت کے منظر عام پیش نہیں کیاجاتاہے۔دعوت اسلامی کے 80سے زائد ڈیپارٹمنٹ کا منظم مضبوط نظام ہے ۔باقاعدہ ہر شعبہ کی ایک مشاورتی انتظامیہ ہوتی ہے جو ادارے کے کاموں کا بغور جائزہ بھی لیتی ہے اور عام استفادہ کے لئے کیا پیش کرنا ہے اس کابھی تنقیدی جائزہ لیتی ہے۔یوں ہی المدینۃا لمدینہ میں کسی بھی کتاب پر کام کرنے سے پہلے اس کی افادیت مقصدیت اور اہمیت پر سیر حاصل کلام کیاجاتاہے۔ پھر اس مرحلہ میں کئی اور امور بھی سرانجام دیئے جاتے ہیں ۔چند مخصوص اہل علم ، تجربہ کاراور کتب بینی کا وسیع تجربہ رکھنے والے افراد جب کسی کتاب پر علمی کام کرنےکا عندیہ دیتے ہیں تو پھر المدینۃ العلیہ کے اسکالرزاس کتاب کی نوعیت کےاعتبارسے کام شروع کرتے ہیں ۔یوں جب وہ کتاب زیور طبع سے آراستہ ہوکر آئی ٹی ڈیپارٹمنٹ تک پہنچتی ہے تو وہ کتاب انتخاب اور تصدیق کے معیار گزار کر استفادہ عام کےلئے ڈیجیٹل لائبریری کی زینت بنتی ہے۔

دعوت اسلامی کے شعبہ علمیہ میں کتاب کاانتخاب اور تصدیق کامعیار دنیا کےسامنے ایک مثال بن چکا ہے ۔دعوت اسلامی کے شعبہ المدینۃ العلمیہ کتاب کا انتخاب کرتا ہے اور ان کا انتخاب آئی ٹی ڈیپارٹمنٹ کی تصدیق ہوتا ہے ۔تب جاکر وہ کتاب آئی ٹی ڈیپارٹمنٹ کی ڈیجیٹل لائبریری میں مطالعہ کےشائقین کو دعوت مطالعہ دیتی ہے۔

کتب اپلوڈ کرنے کی ترتیب و تفصیل (روزانہ، ماہانہ، سالانہ) :

تقریبا ایک مہینےمیں ایک ہزار صفحات اپ لوڈ کئے جاتے ہیں۔ کتابوں کی صورت میں ہر ماہ 5 کتابیں اپ لوڈ ہوتی ہیں۔

ڈیجیٹل لائبریری تکنیکی پہلو

دعوت اسلامی کی ڈیجیٹل لائبری کے لیے استعمال ہونے والا سافٹ ویئر / پلیٹ فارم :

https://www.dawateislami.net/bookslibrary

https://www.dawateislami.net/downloads/desktop-application/al-madina-library

https://www.dawateislami.net/downloads/islamic-apps

سرچ سسٹم اور ڈیٹا مینجمنٹ کی سطح :

https://www.dawateislami.net/bookslibrary/ پر موجود المدینہ لائبریری آن لائن بک سروس کا سرچنگ سسٹم ،سرچ بار جدید تقاضوں سے ہم آہنگ تیز ترین سرچ رزلٹ سے یوزر کی علمی دلچسپی کا باعث بنتا ہے۔پانچ ہزار سے زائد تقریبا 30 لوکل اور انٹرنیشنل لینگوئجز میں موجود کتابیں اہل تحقیق کےلئے علمی کے موتی سیکنڈوں میں پیش کرتا ہے۔

بک لائبریری کے پیش منظر کو ملاحظہ کیا جائے تو سرچ سسٹم دوقسم کی رہنمائی فراہم کرتاہے۔ ایک سرچ بار ۔ دوسرا فلٹر سے سرچنگ

سرچ بار: لینگوئج کےانتخاب کے بعد مطلوبہ لفظ ،جملہ یا کوئی عبارت لکھیں پھر کلک کریں ۔آپ کے مطلوبہ نتائج کی کثرت تلاش علم کی پیاس بجھاتی ہوئی نظر آئے گی۔جہاں جہاں تلاش کردہ لفظ یا عبارت موجود ہوگی چند سیکنڈ میں آپ کی نظروں کی سامنے عیاں ہوجائے گی۔

فلٹر سے سرچنگ :موضوعات کی کیٹگریز ، کتاب کا انتخاب ، لینگویج کا تعین، مصنفین کا چناؤ،مخصوص صفحات میں تلاش علم،خاص کتاب کو فلٹر کرکے الفاظ تلاش کیجئے اور مخصوص مطلوبہ رزلٹ حاصل کیجئے۔

سرچنگ کا یہ ہی طریقہ کار المدینہ لائبریری ڈیکس ٹاپ ایپلی کیشن میں بھی آپ کی سرچنگ کےسلسلہ میں رہنمائی فراہم کرتاہے۔

المدینہ لائبریری کے ڈیٹا مینجمنٹ میں اسلام ، تعلیمات اسلام، عقائد ونظریات، فقہ وفتاوی، تاریخ وسیرت، بزرگان دین، تصوف ،اخلاق وعادات اور دیگر بے شمار موضوعات پر دنیا کی مختلف لینگوئجز میں سرچنگ کی تمام تر جدید سہولیات کے ساتھ دعوت اسلامی کی علم دوست سرگرمیاں جویانِ تحقیق وبحث کو دعوت مطالعہ پیش کرتی ہے۔ ذوق مطالعہ اور شوق کتب بینی رکھنے والوں کےلئے پی ڈی ایف کی صورت میں کتابیں ڈاؤن لوڈ کےلئے موجود ہیں۔اور آن لائن ریڈنگ کی بھی سہولیات قارئین کو مطالعہ کا خوش کن ماحول پیش کرتی ہے۔

تمام تر کتابیں یونی کوڈ سسٹم کے ساتھ پیش ہوتی ہیں یوزر چاہے تو کتابوں سے علمی مواد اپنی تحقیق کاحصہ بنانے کےلئے بھی باآسانی لے سکتاہے۔

ڈیٹا سیکیورٹی اور بیک اپ کا نظام :

آئی ٹی ڈیپارٹمنٹ دعوت اسلامی جدید فریم ورک سے آراستہ ایک منظم اور مربوط ڈیٹا سیکیورٹی سسٹم بھی رکھتاہے۔ڈیٹا سیکیورٹی کے حوالے سے مکمل پالیسیز اور سسٹم بھی فعال کردار ادار کرتاہے۔

آئی ٹی ڈیپارٹمنٹ دعو ت اسلامی ڈیٹا سیکیورٹی کو انتہائی سنجیدگی سے لیتا ہے۔ ہم انڈسٹری کے معیاری ٹولز اور ٹیکنالوجیز استعمال کرتے ہیں جو SECP اور آئی ٹی سیکیورٹی کے رہنما اصولوں کے مطابق ہیں۔ حساس معلومات کے تحفظ کے لیے باقاعدہ اپ ڈیٹس، اِنکرپشن اور رسائی کے کنٹرول کی پالیسیوں پر عمل کیا جاتا ہے۔ ہماری آئی ٹی ٹیم مسلسل نگرانی اور کمزوریوں (Vulnerability) کا جائزہ لیتی رہتی ہے تاکہ کسی بھی ممکنہ خطرے کو بروقت حل کیا جا سکے۔

ڈیجیٹل لائبریری کے اثرات اور استفادہ

صارفین کی نوعیت :

صلائے عام ہے یاران نکتہ دان کےلئے۔ دعوت اسلامی کا مقصد مجھے اپنی اور ساری دنیا کےلوگوں کی اصلاح کی کوشش کرنی ہے۔اصلاح کی عظیم تر مقصدیت کو سامنے رکھتے ہوئے اصلاح کا میدان عام ہے ۔ہرشخص اپنی فطرت اور ذوق کےمطابق استفادہ عام کرسکتا ہے۔

صارفین کی روزانہ، ماہانہ اور سالانہ تعداد اور فیڈبیک کی نوعیت :

دعو ت اسلامی کےاصلاحی پروگرامز خواں کسی بھی نوعیت کے ہوں بفضلہ تعالی عاشقان رسول کی خاصی تعداد مستفید ہوتی ہے۔صرف دعوت اسلامی کی ڈیجیٹل لائبریری کے سالانہ یوزر کی تعداد چھتیس لاکھ پانچ ہزار تین سو سڑسٹھ ہے یعنی ماہانہ دعوت اسلامی کی علمی خدمات سے مستفید ہونے والوں کی تعداد تین لاکھ تین سو سینتالیس ہے ۔ یوں ہی ڈیجیٹل موبائل ایپلی کیشنز میںفتویٰ رضویہ موبائل ایپلی کیشن کو ایک لاکھ گیارہ ہزار دو سو اکتالیس افراد کے ڈاؤن لوڈ کیا۔ ای بُک لائبریری کے یورز کی تعداد نو لاکھ پچاسی ہزار پانچ سو چوراسی ہے اور فیضانِ حدیث موبائل ایپلی کیشن یوزر کی تعداد تین لاکھ ساٹھ ہزار اسی ہے۔

سب سے زیادہ استفادہ کرنےوالے طبقات :

تقریبا تمام ہی طبقات جو علمی سرگرمیوں میں صبح وشام گزارتے ہیں وہ بخوبی علم کے سوتے تلاش کرلیتےہیں اور جن کو علم کے موتی چننے کی جستجوہوتی ہے وہ گاہے بَہ گاہے رونق بزم بنتے ہیں۔ دعوت اسلامی نے اپنا دینی کام کسی مخصوص طبقہ کےلئے نہیں کیا۔بلکہ یہ انسانیت کی اصلاح کی تحریک ہے جس کو تعلیمات قرآن اورسنت رسول کے مطابق پروان چڑھایا گیا ہے۔ امت مسلمہ کےہر فرد کواسلامی عقائدسے آگاہ کرنا اور شرعی احکام سے روشناس کروانااس کا ہدف ہے ۔ اس کےلئے دعوت اسلامی کےتمام پلیٹ فارم پر تخصیص طبقات کو فوقیت نہیں دی جاتی ہے۔بلکہ ہر شعبہ ہائے زندگی کےافراد دعو ت اسلامی کےعلمی ،روحانی ، تبلیغی، سماجی ، تعلیمی ،فلاحی کاموں سے نہ صرف مستفید ہورہے ہیں بلکہ 80سے زائد انسانی خدمت کے شعبہ جات میں دینی کام بھی کررہےہیں۔

جامعات اور مدارس کا تعاون :

دعو ت اسلامی احیائے سنت کی عالمگیر تحریک ہے جو دنیا کے اکثر ممالک میں بخوبی دینی کام سرانجام دے رہی ہے۔ اس وقت دینی ،تعلیمی ، فلاحی، سماجی ،روحانی کے علاوہ آئی ٹی شعبہ میں بھی خودکفیل ہے۔اور جہاں جہاں علمی مشاورت اور کتابوں کی ترتیب نو اور تزئیں آرائش کی ضرورت محسو س ہوتی ہے وہاں علما بوڑد ، مفتیان کرام سے مشاورتی عمل اور تعاون ملتا رہتا ہے۔

فری کتب ڈاؤنلوڈ کی سہولت اور آنلائن مطالعہ کےآپشز:

آن لائن یا ڈاؤن لوڈ تمام تر سہولیات کے ساتھ خدمت دین میں آئی ٹی ڈیپارٹمنٹ کی دینی کاوشیں منصہ شہود پر امیر اہلسنت حضرت مولانا محمد الیاس قادری دامت برکاتہم العالیہ کا فیض ہی تقسیم کررہی ہے۔

ڈیجیٹل لائبریری کے مسائل اور چیلنجز

ممکنہ حد تک آئی ٹی ڈیپارٹمنٹ کا دنیا بھر کے سافٹ ویئر انجینئرز اور ڈیولپرز سے رابطہ میں رہتا ہے ۔ آئی ٹی ڈیپارٹمنٹ کی ٹیکنولوجی کا مشاہدہ 40سے زائد موبائل ایپلی کیشن اور المدینہ لائبریری بک سروسسز سے اندازہ بخوبی لگایا جاسکتاہے۔ نئے نئے وسائل کی تلاش بھی ایک کام ہے جس کا انکار ممکن نہیں اور ہر نئے پروجیکٹ کےلئے سرمایہ کی بھی ضرورت ہوتی ہے۔ المدینہ لائبریر ی آن لائن بکس سروس ہو یا المدینہ لائبریری ڈیکس ٹاپ ایپلی کیشن یہاں سے کوئی بھی علمی مواد باآسانی حاصل کرسکتا ہے ۔ادارے کی طرف سے کوئی قدغن نہیں ۔سوائے یہ کہ مکتبۃ المدینہ کی شائع کردہ کتاب کو کوئی اور مطبع شائع کرے تو مکتبۃ المدینہ کو اشاعتی حقوق حاصل ہیں۔آن لائن پڑھنے وہاں سے علمی مواد تحقیق کی زینت بنانے میں کوئی پابندی نہیں۔

ڈیجیٹل لائبریری کے مستقبل کے منصوبے

مستقبل میں ڈیجیٹل لائبریری کی سمت :

دعو ت اسلامی کی بھر پور کوشش رہی ہے کہ دینی کاموں میں زیادہ سے زیادہ آسانیاں پیداکی جائیں تاکہ لوگ دینی کام دلجمعی اور اخلاص کےساتھ کرسکیں۔ مستقبل میں ڈیجیٹل لائبریری کے حوالے سے بھی آئی ٹی ڈیپارٹمنٹ بھی ایک منظم علمی پلیٹ فارم دینےکےلئے اپنی کاوشیں کررہاہے اور عنقریب ایک بہت بڑاڈیجیٹل مستند مضبوط علمی پلیٹ فارممنظر عام پر آئے گا جہاں ہر بات مدلل دلائل سے مزین ہو کر شائقین مطالعہ اور اہل علم کو ملے گی۔ان شاء اللہ شاملہ جیسے سافٹ ویئر کی شکل اردو زبان میں بھی ہوگی ۔ حقیقی اعتبار سے آئی ٹی ڈیپارٹمنٹ کی المدینہ ڈیجیٹل لائبریری دینی علوم کی ڈیجیٹلائزیشن کا ایک کامیاب ادارہ جاتی ماڈل پیش کرتی ہے، جو مستقبل میں اسلامی علوم، ڈیجیٹل ہیومینیٹیز اور مذہبی انفارمیشن سسٹمز پر تحقیق کے لیے ایک اہم حوالہ بن سکتی ہے۔

مصنوعی ذہانت (AI)، OCR اور جدید سرچ ٹولز کے استعمال کا منصوبہ :

انفارمیشن کی جدیدٹیکنالوجی میں اے آئی کی اہمیت مسلمہ ہے ۔مصنوعی ذہانت کی تیز تر مقبولیت نے جہاں علمی آسانیاں پیدا کیں وہیں تحقیق وبحث میدان میں کئی سولات بھی پیدا کئے۔ مصنوعی ذہانت کےجوابا ت کی اسناد کو مضبوط قرار دینا اور اس پر فیصلہ کرنا اہل علم کے لئے مشکل تر ہوگیا ہے۔دعوت اسلامی کے آئی ٹی ڈیپارٹمنٹ نے اس اے آئی اور جدید سرچ ٹولز کےاستعمال کو مفید تربنانے اور لوگوں کو مصنوعی ذہانت سے تخلیق شدہ جوابات سے بچانے کےلئے مستند مضبوط ٹھو س علمی دلائل سے آراستہ ومزین فتوی کیو اے https://www.fatwaqa.com/ur/ai-search بھی ترتیب دے دیاہے اور مزید اے آئی سرچ ٹولز بھی متعارف کروادیا ہے ۔ دعوت اسلامی نے اسلام کی حقانیت اور تعلیمات اسلام عام کرنے کےلئے عصر حاضر کی ہر ترقی اور ٹیکنولوجی کو استعمال کیا ہے تاکہ دین کا کام بحسن وخوبی سرانجام دیاجاسکے۔دعوت اسلامی کے آئی ٹی ڈیپارٹمنٹ کی اولین ترجیح ہے کہ مسلمانوں کو احکام شرع واقف شرع کے ذریعے پہنچے اس مقصد کےلئے آئی ٹی ڈیپارٹمنٹ دعو ت اسلامی نے انفارمیشن ٹیکنولوجی کی دنیا میں اسلام کے جید علما مفتیان کرام کےفتاوی کو جدید اے آئی سرچنگ میں پیش کردیا ہے ۔اب یوزر جو بھی بات تلاش کرے گا اسے ٹھوس علمی بات ملے گی۔

دعوتِ اسلامی کے عالمی مدنی مرکز فیضانِ مدینہ کراچی میں شیخ طریقت امیر اہلسنت علامہ محمد الیاس عطار قادری دامت بَرَکَاتُہمُ العالیہ اور خلیفۂ امیر اہلسنت مولانا حاجی عبید رضا عطاری مدنی مُدَّ ظِلُّہُ العالی سے ملاقاتوں کا سلسلہ جاری رہتا ہے۔ گزشتہ دنوں 11 فروری 2026ء بروز بدھ حسبِ معمول بعد نمازِ عصر، جانشینِ امیرِ اہلسنت مولانا حاجی عبید رضا عطاری مدنی مُدَّ ظِلُّہُ العالی نے عاشقانِ رسول سے ملاقات فرمائی۔

عاشقان رسول نے نہایت ادب و احترام کے ساتھ خلیفۂ امیر اہلسنت سے مصافحہ کرتے ہوئے ان سے دعاؤں کی درخواست کی۔

انڈونیشیا کے صوبے آچے (Aceh) اور بالخصوص بیرن (Beran) شہر میں حالیہ شدید سیلاب نے بڑے پیمانے پر تباہی مچائی ہےجس کے نتیجے میں متعدد مکانات منہدم، مال مویشی بہہ گئے اور کئی قیمتی جانوں کا ضیاع ہوا۔ اس مشکل گھڑی میں دعوتِ اسلامی کے فلاحی شعبے فیضان گلوبل ریلیف فاؤنڈیشن (FGRF) نے متاثرین کی بحالی کے لئے عملی اقدامات کا آغاز کر دیا ہے۔

خلیفہ امیرِ اہلسنت مولانا حاجی عبید رضا عطاری مدنی مُدَّ ظِلُّہُ العالی نے انڈونیشیا کے دورے کے دوران خصوصی طور پر سیلاب سے متاثرہ علاقوں کا معائنہ کیا۔ انہوں نے مقامی ذمہ داران کے ہمراہ متاثرہ خاندانوں سے ملاقات کی اور انہیں دلاسہ دیتے ہوئے ان کے ساتھ ہمدردی کی۔

دورانِ ملاقات خلیفہ امیرِ اہلسنت کے ہاتھوں FGRFکے تحت متاثرین میں درج ذیل اشیاء تقسیم کی گئیں:

٭راشن پیکیجز: خاندانوں کی غذائی ضروریات کے لئے بنیادی راشن ٭ضروری اشیاء: روزمرہ استعمال کی دیگر اشیاء ٭نقد مالی امداد: فوری ضرورت کے پیشِ نظر نقد رقوم کی فراہمی۔

متاثرین سے ملاقات کے بعد خلیفہ امیرِ اہلسنت مولانا حاجی عبید رضا عطاری مدنی مُدَّ ظِلُّہُ العالی نے بیرن کے مقامی دینی ادارے ”دارُالمنورہ المبارک“کے اساتذہ، بشمول مولانا مولیادی شافعی مُدَّ ظِلُّہُ العالی سے ملاقات کی۔ اس ملاقات میں عالمی سطح پر دعوتِ اسلامی کی دینی و فلاحی خدمات اور رمضان المبارک کے حوالے سے ”مدنی مرکز فیضانِ مدینہ بندہ آچے“میں ہونے والے اجتماعی اعتکاف کی تیاریوں پر تبادلۂ خیال کیا گیا۔

فار ایسٹ کے ممالک میں دینِ اسلام کی ترویج اور پیغامِ محبت عام کرنے کے سلسلے میں خلیفۂ امیرِ اہلسنت  مولانا حاجی عبید رضا عطاری مدنی مُدَّ ظِلُّہُ العالی انڈونیشیا کے دارالحکومت جکارتہ پہنچے جہاں ان کا پُرتپاک استقبال کیا گیا اور مختلف شعبہ ہائے زندگی سے تعلق رکھنے والی شخصیات کے لئے سنتوں بھرے اجتماع کا اہتمام ہوا۔ جکارتہ میں منعقدہ اس پُروقار اجتماع میں انڈونیشین عاشقانِ رسول، پاکستانی کمیونٹی اور خاص طور پر بزنس کمیونٹی کے افراد کی بڑی تعداد شریک ہوئی۔

خلیفۂ امیرِ اہلسنت نے سنتوں بھرا بیان کرتے ہوئے شرکا کو درج ذیل اہم نکات پر عمل پیرا ہونے کی تلقین کی:

٭پنج وقتہ نماز کی پابندی: انہوں نے نماز کو دین کا ستون قرار دیتے ہوئے اس کی باقاعدہ ادائیگی کا ذہن دیا ٭عمل کی اہمیت: نصیحت کی کہ کسی نیکی کو چھوٹا سمجھ کر ترک نہ کیا جائے اور کسی گناہ کو معمولی سمجھ کر اپنایا نہ جائے ٭صحبت کا اثر: مولانا نے واضح کیا کہ نیک لوگوں کی صحبت انسان کی کایا پلٹ دیتی ہے، لہٰذا اچھے ماحول سے وابستگی ناگزیر ہے۔

دورانِ بیان حاجی عبید رضا عطاری مدنی نے قرآن پاک کو تجوید اور درست مخارج کے ساتھ پڑھنے پر شرکا کی رہنمائی کی انہوں نے کہا کہ قرآنِ کریم کو عربی لب و لہجے میں پڑھنا ضروری ہے، سورۃ الفاتحہ اور دیگر سورتوں کا درست مخارج کے ساتھ پڑھنا واجب ہے تاکہ ہماری نمازیں کامل ہو سکیں۔ اس سلسلے میں انہوں نے شرکا کو دعوتِ اسلامی کے تحت چلنے والے مدرسۃ المدینہ (بالغان) میں داخلہ لینے اور اپنی اصلاح کرنے کی ترغیب دلائی۔

دنیا بھر میں نیکی کی دعوت عام کرنے والی عاشقانِ رسول کی دینی تحریک دعوتِ اسلامی کے زیرِ اہتمام 05 فروری 2026ء کو انڈونیشیا کے شہر آچے بسار (Aceh Besar) کے مقامی اسلامک سینٹر میں سنتوں بھرے اجتماع کا انعقاد کیا گیا۔ اس روحانی تقریب میں کثیر تعداد میں مقامی افراد، تاجر برادری اور طلبہ نے شرکت کی۔

خلیفہ امیرِ اہل سنت مولانا حاجی عبید رضا عطاری مدنی مُدَّ ظِلُّہُ العالی نے نماز کی اہمیت و فضیلت پر روشنی ڈالتے ہوئے فرمایا جو شخص اچھے طریقے سے وضو کرے اور خشوع و خضوع کے ساتھ دو رکعت نماز ادا کرے، اللہ پاک اس کے پچھلے گناہ معاف فرما دیتا ہے۔ انہوں نے شرکا کو نصیحت کی کہ وہ پنج وقتہ نمازوں کی پابندی کو اپنا شعار بنائیں، سنتوں پر عمل کریں اور اپنی زندگی کو آخرت کی تیاری کے لئے وقف کریں۔ انڈونیشین عاشقانِ رسول کی سہولت کے لئے نگرانِ انڈونیشیا مشاورت حاجی غلام یٰسین عطاری مدنی نے اس بیان کا مقامی زبان میں خلاصہ بھی پیش کیا۔

اس موقع پر رکنِ شوریٰ حاجی محمد ایاز عطاری، نگرانِ انڈونیشیا مشاورت اور دعوتِ اسلامی کے دیگر مبلغین سمیت مختلف مکتبہ فکر سے تعلق رکھنے والے افراد موجود تھے۔ تقریب کا اختتام درود و سلام اور عالمِ اسلام کی سربلندی کے لیے کی جانے والی خصوصی دعا پر ہوا۔

انڈونیشیا کے مختلف صوبوں میں حالیہ دنوں آنے والے شدید ترین سیلاب نے وسیع پیمانے پر تباہی مچا دی ہے جس کے نتیجے میں متعدد قیمتی جانوں کا زیاں ہوا اور سینکڑوں خاندان بے گھر ہو گئے ہیں۔ اس انسانی المیے کے پیشِ نظر عالمی سطح پر متحرک مذہبی و فلاحی تنظیم دعوتِ اسلامی کے شعبہ ”فیضان گلوبل ریلیف فاؤنڈیشن“ (FGRF) نے متاثرہ علاقوں میں ہنگامی بنیادوں پر امدادی کارروائیاں شروع کر دی ہیں۔ خلیفہ امیرِ اہل سنت مولانا حاجی عبید رضا عطاری مدنی مُدَّ ظِلُّہُ العالی نے انڈونیشیا کے اپنے تنظیمی دورے کے دوران سیلاب زدہ علاقوں کا خود دورہ کیا اور ریلیف آپریشن کی نگرانی کی۔

خلیفۂ امیر اہلسنت نے متاثرین سے ملاقات کے دوران انہیں دلاسہ دیا اور امدادی سامان کی تقسیم کے عمل میں خود بھی حصہ لیا۔ اس موقع پر انہوں نے بتایا کہ انڈونیشیا کے مختلف حصوں بالخصوص ”آچے تیمور“ اور ”آچے لوکُب“میں سیلاب کی صورتحال انتہائی تشویشناک ہے جہاں بہت سے لوگوں کے مکانات سیلابی ریلوں میں بہہ گئے ہیں۔ انہوں نے سیلاب میں انتقال ہونے والوں کے درجات کی بلندی کے لئے دعا کی اور متاثرین کے لئے صبرِ جمیل کی استدعا کرتے ہوئے کہا کہ دکھ کی اس گھڑی میں دعوتِ اسلامی متاثرین کے ساتھ کھڑی ہے۔

FGRF کے تحت انڈونیشیا کے سیلاب زدگان میں نقد رقوم کے ساتھ ساتھ خوراک، پینے کے صاف پانی اور دیگر اشیائے ضروریہ کی تقسیم کا سلسلہ جاری ہے۔ خلیفہ امیرِ اہل سنت کے ہمراہ رکنِ شوریٰ حاجی محمد ایاز عطاری اور انڈونیشیا مشاورت کے نگران حاجی غلام یٰسین عطاری مدنی اور دیگر ذمہ داران نے بھی متاثرہ علاقوں کا دورہ کیا اور مقامی لوگوں کی ضروریات کا جائزہ لیا۔ دورے کے دوران متاثرین نے امدادی سرگرمیوں پر دعوتِ اسلامی کا شکریہ ادا کیا اور اس عزم کا اظہار کیا کہ انڈونیشیا کے مسلمانوں کو تنہا نہیں چھوڑا جائے گا۔

گزشتہ دنوں خلیفۂ امیر اہلسنت مولانا حاجی عبید رضا عطاری مدنی مُدَّ ظِلُّہُ العالی کا فار ایسٹ کے ممالک تھائی لینڈاور انڈونیشیا سفر ہوا۔ اسی دوران انڈونیشیا کے صوبہ آچے شہر شمالی آچے میں موجود دینی ادارے دار الہدیٰ کے بانی حضرت مولانا ابو محمد داؤد الشافعی رحمۃُ اللہِ علیہ کے مزار شریف پر نگران انڈونیشیا مشاورت مولانا غلام یٰسین عطاری مدنی اور دیگر کے ہمراہ حاضری دی۔ حاضری کے موقع پر صاحب مزار اور امت مسلمہ کے ایصال ثواب کے لئے فاتحہ خوانی کے بعد دعا بھی کی گئی۔

حاضری کے بعد خلیفہ امیر اہلسنت نے رکن شوریٰ قاری ایاز عطاری اور نگران انڈونیشیا مشاورت مولانا غلام یٰسین عطاری مدنی کے ہمراہ دار الہدیٰ کےمہتمم مولانا ترمذی شافعی دامت بَرَکَاتُہمُ العالیہ سےملاقات کی۔ملاقات میں انہیں انڈونیشیا سمیت عالمی سطح پر دعوت اسلامی کے تحت ہونے والے دینی کاموں کے حوالے سے آگاہی دی گئی اور صوبہ آچے کے مختلف علاقوں میں سیلابی صورتحال کے باعث مشکلات و پریشانیوں میں مبتلا عاشقان رسول کی داد رسی کے لئے FGRF کے تحت ہونے والے فلاحی اور امدادی کاموں کے بارے میں بھی بریف کیا گیا۔ خلیفۂ امیر اہلسنت نے اس ادارے سے تعلق رکھنے والے اساتذۂ کرام اور طلبہ کو مدنی مرکز فیضان مدینہ بندہ آچے میں دعوت اسلامی کے تحت ہونے والے پورے ماہِ رمضان شریف کا اعتکاف کرنے اور کروانے کی دعوت دی اور اس حوالے سے گفتگو کا سلسلہ بھی ہوا۔

اس موقع پر سیلاب سے انتقال کرجانے والے مقامی عاشقانِ رسول کے ایصال ثواب کے لئے فاتحہ خوانی اور دعا کی گئی۔

گزشتہ شب 12 فروری 2026ء بروز جمعرات دنیا بھر میں عاشقانِ رسول کی عالمگیر تحریک دعوتِ اسلامی کے زیرِ اہتمام ہفتہ وار سنتوں بھرے اجتماعات کا انعقاد کیا گیا جس کا مرکزی موضوع ”استقبالِ ماہِ رمضان“ تھا۔ ان اجتماعات میں مختلف ممالک، شہروں اور علاقوں سے تعلق رکھنے والے اسلامی بھائیوں نے بڑی تعداد میں شرکت کر کے اپنی روح کو ایمانی جلا بخشی۔ اجتماع کا باقاعدہ آغاز تلاوتِ قرآنِ پاک اور نعتِ رسولِ مقبول ﷺ سے کیا گیا جس کے بعد مبلغینِ دعوتِ اسلامی نے شرکاء کی اخلاقی و مذہبی تربیت کے لیے سنتوں بھرے بیانات کیے۔

اس سلسلے میں مرکزی اور سب سے اہم اجتماع عالمی مدنی مرکز فیضانِ مدینہ کراچی میں منعقد ہوا، جہاں جانشینِ امیرِ اہلسنت، خلیفۂ عطار مولانا حاجی عبید رضا عطاری مدنی مُدَّ ظِلُّہُ العالی نے خصوصی طور پر شرکت کی اور سنتوں بھرا بیان فرمایا۔ آپ کا بیان مدنی چینل کے ذریعے پوری دنیا میں براہِ راست نشر کیا گیا جس میں آپ نے آنے والے مقدس مہینے رمضان المبارک کی اہمیت اور اس کے استقبال کے حوالے سے جامع گفتگو فرمائی۔ آپ نے شرکاء کو تاکید کی کہ وہ اس ماہِ مقدس کی برکات سمیٹنے کے لیے ابھی سے ذہنی اور عملی طور پر تیاری کریں۔

جانشینِ امیرِ اہلسنت نے اپنے بیان میں اسلامی بھائیوں کو اس بات پر ابھارا کہ وہ رمضان المبارک میں اعتکاف کی سعادت حاصل کریں، نمازوں کی پابندی کریں اور زیادہ سے زیادہ وقت اللہ کی عبادت میں گزاریں۔ بیان کے دوران اصلاحِ اعمال، والدین کی اطاعت، معاشرتی امن اور اخلاقِ حسنہ جیسے اہم موضوعات کو بھی زیرِ بحث لایا گیا۔ مزید برآں، شرکاء کو دعوتِ اسلامی کے مدنی کاموں میں بڑھ چڑھ کر حصہ لینے اور معاشرے کی اصلاح میں اپنا کردار ادا کرنے کی ترغیب دی گئی۔

واضح رہے کہ اسی روحانی ماحول کو برقرار رکھنے کے لیے شیخِ طریقت امیرِ اہلسنت حضرت علامہ مولانا محمد الیاس عطار قادری دامت بَرَکَاتُہمُ العالیہ نے عاشقانِ رسول کو اس ہفتے ایک خصوصی رسالے ”ماہِ رمضان ماہِ نیک اعمال“ کے مطالعے کی ترغیب دلائی ہے۔ امیرِ اہلسنت نے اس رسالے کو پڑھنے یا سننے والوں کے لیے خصوصی دعا فرماتے ہوئے کہا ہے کہ ”یا رب المصطفیٰ! جو کوئی 20 صفحات کا رسالہ ”ماہِ رمضان نیک اعمال“ پڑھ یا سن لے، اسے رمضان الکریم میں خوب نیک اعمال کرنے کی توفیق عطا فرما اور اسے ماں باپ اور خاندان سمیت بے حساب بخش دے۔ آمین“۔ یہ رسالہ دعوتِ اسلامی کی ویب سائٹ سے ڈاؤن لوڈ بھی کیا جا سکتا ہے اور آڈیو میں سنا بھی جاسکتا ہے۔

کراچی: (نیوز ڈیسک) اللہ تبارک و تعالیٰ کی رضا کے لیے اپنے وقت اور اعمال کو وقف کرنا مومن کی پہچان ہے۔ خاص طور پر ماہِ رمضان، جو نیکیوں کا موسمِ بہار ہے، اس میں اپنے نفس کا محاسبہ کرنا اور اسے نیکیوں کے سانچے میں ڈھالنا ہر مسلمان کی خواہش ہوتی ہے۔ جب انسان اپنے پسندیدہ مشاغل کو چھوڑ کر رب کی رضا کے لیے نیک اعمال میں مشغول ہوتا ہے، تو یہ ایمان کی بلندی اور روح کی پاکیزگی کا ذریعہ بنتا ہے۔

اسی جذبے کو بیدار کرنے اور رمضان المبارک کی ساعتوں کو قیمتی بنانے کے لیے، بانیِ دعوتِ اسلامی، شیخِ طریقت امیرِ اہلسنت حضرت علامہ مولانا محمد الیاس عطار قادری دامت بَرَکَاتُہمُ العالیہ نے اس ہفتے عاشقانِ رسول کو ایک اہم رسالے کے مطالعے کی ترغیب دلائی ہے۔

اس ہفتے کا رسالہ: ”ماہِ رمضان ماہِ نیک اعمال“

امیرِ اہلسنت نے اس بار 20 صفحات پر مشتمل رسالے ”ماہِ رمضان نیک اعمال“ کو پڑھنے یا سننے کی ترغیب دی ہے۔ اس رسالے کا مقصد روزے داروں کو رمضان کے دوران فرائض و واجبات کے ساتھ ساتھ نوافل اور دیگر نیک کاموں کے ذریعے اللہ کا قرب حاصل کرنے کا طریقہ بتانا ہے۔

امیرِ اہلسنت نے رسالہ پڑھنے والوں کو اپنی خصوصی دعاؤں سے بھی نوازا ہے۔

دعائے عطار:

”یا رب المصطفٰے! جو کوئی 20 صفحات کا رسالہ ”ماہِ رمضان ماہِ نیک اعمال“ پڑھ یا سن لے، اُسے رمضان الکریم میں خوب نیک اعمال کرنے کی توفیق عطا فرما اور اسے ماں باپ اور خاندان سمیت بے حساب بخش دے۔ اٰمین بجاہِ خاتم النبیین صلی اللہ علیہ وآلہ وسلم“

یہ رسالہ دعوتِ اسلامی کی ویب سائٹ پر اردو سمیت مختلف زبانوں میں ڈاؤن لوڈ کرنے کے لیے دستیاب ہے۔

Download