دین اسلام جس طرح ہمیں انسانوں کے ساتھ حسن سلوک کرنے کا حکم دیتا ہے اسی طرح جانوروں کے ساتھ اچھا سلوک کرنے اور ان کے حق ادا کرنے کا بھی حکم دیتا ہے ، آیئے جانوروں کے چند حقوق پڑھیئے :

(1) جانوروں کو مثلہ نہ کرو : حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا : اس پر اللہ کی لعنت جو کسی جاندار کو مثلہ کرے یعنی جو جانوروں کے اعضا کو کاٹے ۔ (جامع الاحادیث، جلد 4،حدیث نمبر 2384،صفحہ 201)

(2)جانوروں کے دانہ پانی کا خیال رکھو : حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا : ایک عورت جہنم میں گئی بلی کے سبب کے اسے باندھے رکھا تھا نہ خود کھانا دیا نہ چھوڑا کہ زمین کا گرا پڑا یا جو جانور اس کو ملتا کھاتی ۔ (جامع الاحادیث ، باب جلد 4 صفحہ نمبر 199 حدیث نمبر : 2380 اکبر بک پبلشر لاہور )

(3) سواری کے جانور کا خیال کرو: روایت میں ہے کہ رسول اللہ تعالی علیہ وسلم ایک اونٹ کے پاس سے گزرے جس کی کمر پیٹ سے ملی ہوئی تھی تو آپ صلی اللہ تعالی علیہ وسلم نے فرمایا: ان بے زبان چو پایوں کے معاملے میں اللہ پاک سے ڈرو ان پر اس وقت سوار ہوں جب یہ صحیح حالت میں ہوں اور انہیں اسی وقت کوڑا مارو جب یہ ٹھیک ہوں ۔ ( ابو داؤد ، کتاب الجہاد ، باب ما یؤمربہ من القیام علی الدواب و البھائم، جلد 4، صفحہ نمبر 32 حدیث نمبر 2548)

(4) جانوروں کو برا نہ کہنا :حضرت خالد بن زید فرماتے ہیں کہ رسول اللہ صلی اللہ علیہ وسلم نے مرغ کو برا کہنے سے منع فرمایا اور فرمایا کہ یہ نماز کی اطلاع دیتا ہے ۔(مراۃ المناجیح،شرح مشکواۃ المصابیح،باب کس جانور کو کھانا حرام اور کس کوحلال)

(5) جانوروں کے کھلانے پر اجر: حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا ہر گرم جگر والے کو کھلانا ثواب ہے ۔ (جامع الاحادیث، جلد چہارم ، ، صفحہ نمبر 199)

موجودہ دور میں جانوروں کے ساتھ کئی طرح سے ظلم کیے جاتے ہیں اور ان کی حق تلفی کی جاتی ہے ، ہمیں چاہیے کہ جانوروں کے ساتھ اچھا سلوک کریں اور ان کے حقوق کا خیال رکھیں۔