لالچ کی تعریف: کسی چیز میں حد درجہ و دلچسپی کی وجہ سے نفس کا اس کی جانب راغب ہونا طمع یعنی لالچ کہلاتا ہے۔

ہمارے معاشرے میں ہر طرح کے لوگ پائیں جاتے ہے اور ایسوں کی تعداد بھی ہے جو لالچ میں مبتلا نظر آتے ہیں عموماً دوسروں کے مالوں اور گھروں اور کاروبار کو دیکھ کر لالچ کا شکار ہو جاتے ہیں اور رب کی رضا سے سبکدوش ہو کر دنیا کو اپنا مستقل ٹھکانہ سمجھتے ہیں جبکہ یہ دنیا عارضی و فانی ہے لالچ کے بہت سے نقصانات ہیں۔

دوسروں کے مال کو دیکھ کر یہ خواہش کرنا میرے پاس بھی یہ مال ہوتا اور صاحبِ مال سے اس لیے میل ملاپ زیادہ رکھنا کے وہ اسے مالی مدد کریں جبکہ مسلمان مسلمان کو رب کی رضا کے لیے محبت کرنا چاہیے، اور یہاں مال کی وجہ سے دوستی اور محبت ہے جو کے خسارے کا باعث ہے بہت سے لوگوں کے پاس کچھ نہیں ہوتا جب رب العالمین نوازتا ہے تو اور مزید کی چاہ میں آکر لالچ کرنے لگتے ہے۔

اللہ پاک قرآن میں فرماتا ہے: وَ مَنْ یُّوْقَ شُحَّ نَفْسِهٖ فَاُولٰٓىٕكَ هُمُ الْمُفْلِحُوْنَۚ(۹) (پ 28، الحشر: 9) ترجمہ: اور جو اپنے نفس کے لالچ سے بچایا گیا تو وہی کامیاب ہے۔ مکمل

حدیث مبارکہ میں طمع سے یعنی لالچ سے بچتے رہنے کا حکم ہے، چنانچہ حدیث شریف میں ہے: حضرت عبد اللہ بن عمرو رضی اللہ عنہ سے روایت ہے کہ سرکار مدینہ ﷺ نے ارشاد فرمایا: لالچ سے بچتے رہو کیونکہ تم سے پہلی قومیں لالچ کی وجہ سے ہلاک ہوئیں، لالچ نے انہیں بخل پر آمادہ کیا تو وہ بخل کرنے لگے اور جب قطع رحمی کا خیال دلایا تو انہوں نے قطع رحمی کی اور جب گناہ کا حکم دیا تو وہ گناہ میں پڑ گئے۔ (ابو داود، 2/185، حدیث: 1698)

مال و دولت کی ایسی لالچ جس کا کوئی دینی فائدہ نہ ہو، یا ایسی اچھی نیت نہ ہو جو لالچ ختم کردے، نہایت ہی قبیح گناہوں کی طرف رغبت دلانے والی اور ہلاکت میں ڈالنے والی بیماری ہے، مال و دولت میں پھنسنے والا شخص ناکام و نامراد اور جو ان کے مکر و جال سے بچ گیا وہی کامیاب و کامران ہے۔

ہم اپنا جائزہ لیں کہ کہیں ہم بھی مال کی لالچ تو نہیں کرتی ہے اگر لالچ دل میں آجائے تو اسے جھٹک دیجئے اور دل کو نیکیوں کا حریص بنائیں لالچ ہر صورت میں برا نہیں ہے بلکہ نیکیوں میں لالچ کرنا بلندی درجات کا ذریعہ ہے۔

حضرت قطب مدینہ رحمۃ الله علیہ ایک کریم النفس اور شریف الفطرت بزرگ تھے ان کی قربت میں انس و محبت کے دریا بہتے تھے اور سلف و صالحین کی یاد تازہ ہوجاتی، آپ سخی اور بہت عطا فرمانے والے تھے، آپ رحمۃاللہ علیہ فرمایا کرتے تھے: طمع نہیں، منع نہیں اور جمع نہیں یعنی لالچ مت کرو کہ کوئی دے اور اگر کوئی بغیر مانگے دے تو منع مت کرو اور جب لے لو تو جمع مت کرو۔

صحابی رسول عمر فاروق کی طمع: ایک غزوہ کے لئے جب پیارے آقا ﷺ نے صحابہ کرام علیہم الرضوان سے جنگ کے لئے مال طلب فرمایا تو صحابی رسول عمر فاروق رضی اللہ عنہ نے سوچا آج میں ابو بکر سے نیکیوں میں آگے بڑھ جاؤں گا اور اپنا کل مال کا آدھا حصہ لیکر بارگاہ رسالت ﷺ میں حاضر ہوئے تو پیارے آقاﷺ نے پوچھا کیا لائے ہو؟ تو عمر فاروق رضی اللہ عنہ نے کہا: کل مال کا آدھا حصہ لایا ہوں، پھر ابو بکر صدیق رضی اللہ عنہ حاضر بارگاہ ہوئے پیارے آقا صلی ﷺ نے پوچھا: ابو بکر کیا لائے ہو؟ تو ابو بکر نے عرض کیا: میں نے سارا گھر کا مال آپکی خدمت میں حاضر کر دیا ہے۔ پیارے آقا ﷺ نے پوچھا: گھر کے لئے کچھ چھوڑا! ابو بکر نے فرمایا: گھر کے لئے اللہ اور اس کا رسول کافی ہے۔

سبحٰن اللہ کیسا جذبہ ہے! صد کروڑ مرحبا صحابہ کرام علیہم الرضوان میں مقابلہ بازی ہوتی بھی تھی تو نیکیوں میں، یہ نفوس قدسیہ نیکیوں کی طمع کیا کرتے تھے وہ لوگ جانتے تھے مال و دولت دنیا کی زیب و زینت فنا ہونے والا ہے ایک دن فنا ہو جائیگا اس لئے وہ آخرت میں کامیابی اور جنت میں داخلے کے لئے نیکیوں پر سبقت لے جانے کی کوشش میں رہتے تھے۔

اللہ پاک ہمیں نیکیوں کا طمع عطا کرے۔ آمین

مال و دولت کی لالچ میں آکر آخرت کو فراموش کرنا یقیناً خسارے کا باعث ہے۔دنیاوی معاملات میں لالچی انسان سے ہر کوئی دور بھاگتا ہے۔ عزت و جاہ کی لالچ بھی قبیح فعل ہے نیکیوں میں ایک دوسرے سے سبقت لے جانے کا لالچ اچھا عمل ہے علم دین سیکھنے کا لالچ باعث اجر و ثواب ہے۔

امیر اہل سنت کی طمع: امیر اہل سنت دامت و برکاتہم العالیہ موجودہ دور کے علمی و روحانی شخصیت ہیں ان کی گفتگو سے ہمیں یہی دیکھنے کو ملتا ہے وہ نیکیوں کے حریص ہیں ان کی اعلیٰ خوبیوں میں سے ایک خوبی نیکی کرانے کی لالچ صاف ظاہر ہوتی ہے وہ یہی چاہتے ہیں کہ مسلمان سیدھی راہ پر آجائے نمازوں کا پابند ہو جائے نیک اعمال پر عمل کرنے والا ہو گناہوں سے بچنے بچانے والا ہو آقا کریم ﷺ کی محبت کا دم بھرنے والا ہو شریعت مطہرہ پر پابندی سے عمل کرنے کرانے والا ہو۔

امت کا درد دل میں رکھتے ہیں اور نیکیوں کی طمع کے خواہاں ہے اللہ پاک سے دعا ہے اللہ رب العالمین سیدی و مرشدی کی طمع کے صدقے ہمیں بھی نیکیوں کا حریص بنائے۔

قارون نے بھی مال کی لالچ کی اور زکوٰۃ دینے سے انکار کیا اور موسیٰ علیہ السلام پر جھوٹا الزام لگایا وہ بھی زمین میں دھنسا دیا گیا لالچ بری بلا ہے لالچی شخص کی خواہش کبھی پوری نہیں ہوتی ہمیشہ زیادہ کی لالچ میں خوار ہوتا ہے۔

اللہ پاک ہمیں بری طمع سے محفوظ فرمائے، نیکیوں کا حریص بنائے۔ آمین بجاہ النبی الامین ﷺ

حرص اور لالچ آپس میں مترادف ہیں یعنی دو ایسے الفاظ ہیں جن کا معنی ایک ہی ہے لالچ اردو زبان کا جبکہ حرص عربی زبان کا لفظ ہے حرص و لالچ کسی چیز کی مزید خواہش کرنے کا نام ہے اور یہ کسی بھی چیز کی ہوسکتی ہے۔

حرص و لالچ کی تعریف: حکیم الامت حضرت مفتی احمد یار خان نعیمی رحمۃ اللہ علیہ نے ارشاد فرمایا: کسی چیز سے جی نہ بھرنے اور ہمیشہ زیادتی کی خواہش رکھنے کو حرص کہتے ہیں جبکہ رکھنے والے کو حریص کہتے ہیں۔ (مراۃ المناجیح، 7/86) لہذا مزید مال کی خواہش رکھنے والے کو مال کا حریص، نیکیوں میں اضافے کے تمنائی کو نیکیوں کا حریص، جبکہ گناہوں کا بوجھ بڑھانے والے کو گناہوں کا حریص کہیں گے۔

شیخ الحدیث حضرت علامہ عبدالمصطفیٰ اعظمی رحمۃ اللہ علیہ لکھتے ہیں: لالچ اور حرص کا جذبہ خوراک، لباس، مکان، سامان، دولت، عزت، شہرت، الغرض ہر نعمت میں ہوا کرتا ہے۔

لالچی انسان نہایت قابلِ رحم ہوتا ہے اس لیے کہ ہوشیار لوگ طرح طرح سے لالچ دے کر اسے بے وقوف بنا کر اپنے کام نکلواتے ہیں، مثلاً کبھی کوئی نوکری کا جھانسہ دے کر اس سے پیسے بٹورتا ہے کبھی انعام کا لالچ اسے زندگی بھر کی جمع پونجی سے محروم کروا دیتا ہے۔ کبھی راتوں رات امیر و کبیر بننے کا لالچ اسے لے ڈوبتا ہے، مگر جب آنکھ کھلتی ہے تو اسے اپنے کیے پر بہت پچھتاوا ہوتا ہے۔

دعوت اسلامی کے اشاعتی ادارے مکتبہ المدینہ کی کتاب حرص کے صفحہ نمبر 218 پر ہے: ایک غریب آدمی کے 3 بیٹے تھے جو کچھ اسے دال روٹی میسر آتی خود بھی کھاتا اور انہیں بھی کھلاتا۔ ان میں سے ایک بیٹا باپ کی غربت اور دال روٹی سے ناخوش تھا چنانچہ اس نے ایک دولت مند نوجوان سے دوستی کر لی اور اچھا کھانا ملنے کے لالچ میں اس کے گھر آنے جانے لگا۔ ایک دن ان کے درمیان کسی بات پر ان بن ہوگئی دولت مند نے اپنی امیری کے غرور میں اسے خوب مارا پیٹا اور اس کے دانت توڑ ڈالے۔ تب وہ غریب دل ہی دل میں توبہ کرتے ہوئے کہنے لگا کہ میرے باپ کی پیار سے دی ہوئی دال روٹی اس مار دھاڑ اور ذلت کے تر نوالے سے بہتر تھی۔ اگر میں اچھے کھانے پینے کی حرص نہ کرتا تو آج اتنی مار نہ کھاتا اور میرے دانت نہ ٹوٹتے۔

مال کی حرص مت کرو اس میں دو جہاں کا وبال رکھا ہے

اس حکایت میں بالخصوص ان کے لیے عبرت کے مدنی پھول ہیں جو مال و دولت یا جاہ و منصب وغیرہ کی ہوس میں اپنی آخرت کو داؤ پر لگا دیتے ہیں، در در کی ٹھوکریں کھاتے اور پھر بعد میں پچھتاتے ہیں۔

یاد رکھیے! اللہ پاک نے جس کا جتنا رزق مقدر فرما دیا ہے اسے وہ مل کر رہے گا لہذا عافیت اسی میں ہے کہ جتنا اللہ تعالیٰ نے ہمیں نوازا ہے ہم اسی پر قناعت کرنا سیکھیں۔بقدر ضرورت ہی روزی کمائیں اور زیادہ کا خیال بھی اپنے دل ودماغ سے نکال دیں، کیونکہ انسانی فطرت میں یہ بات شامل ہے کہ اگر اس کے پاس مال و دولت کا ڈھیر سارا خزانہ بھی ہاتھ لگ جائے تب بھی اس کی حرص پوری نہیں ہو سکتی اور مزید مال و دولت کی تمنا اس کے دل میں باقی رہے گی۔ چنانچہ رحمت عالم ﷺ نے ارشاد فرمایا: بوڑھے کا دل دو چیزوں کی محبت میں جوان ہی رہتا ہے: زندگی اور مال کی محبت۔ (مسلم، ص 403، حدیث: 2410)

ایک اور مقام پر ارشاد فرمایا: اگر ابن آدم کے پاس سونے کی ایک اور وادی ہو تو چاہے گا کہ اس کے پاس دو وادیاں ہوں اور اس کے منہ کو مٹی کے سوا کوئی چیز نہیں بھر سکتی اور جو اللہ تعالیٰ سے توبہ کرے تو اللہ کریم اس کی توبہ قبول فرماتا ہے۔ (مسلم، ص 404، حدیث: 2419)

سرکار مدینہ ﷺ نے کس قدر بہترین انداز میں حرص کے بارے میں ہماری رہنمائی فرمائی۔

ہمارے بزرگان دین مال کی حقیقت سے اچھی طرح آگاہ تھے، چنانچہ حجۃ الاسلام حضرت امام محمد غزالی رحمۃ اللہ علیہ تحریر فرماتے ہیں: حضرت حسن بصری رحمۃ اللہ علیہ نے ارشاد فرمایا: اللہ پاک کی قسم! جو درہم کی عزت کرتا ہے اللہ تعالیٰ اسے ذلت دیتا ہے۔ منقول ہے، سب سے پہلے درہم و دینار بنے تو شیطان نے اٹھا کر اپنی پیشانی پر رکھا پھر ان کو چوما اور بولا: جس نے ان سے محبت کی وہ میرا غلام ہے۔

نیکیوں کی حرص میں دنیا و آخرت کی کامیابی ہے، جبکہ مال کی لالچ میں مبتلا ہو کر بسا اوقات جھوٹ جیسی بری بیماری میں مبتلا ہو جاتا ہے دنیوی لالچ کا نشہ انسان کو اچھی صحبت سے محروم کروادیتا ہے اور بالآخر اسے تباہی کے کنارے لا کھڑا کرتا ہے۔

اللہ کریم ہمیں لالچ جیسی آفت سے محفوظ فرما کر نیکیوں کے حرص کی لازوال نعمت سے سرفراز فرمائے۔ آمین یارب العالمین

لالچ ایک چھوٹا سا لفظ، لیکن عملی طور پر یہ انتہائی برا ہے۔ یہ ایک بند دروازے کی طرح ہوتا ہے جس کے پیچھے انسان سوچتا ہے کہ ایک خوبصورت جہاں بسا ہوا ہے، اس کی ساری زندگی خوبصورت ہو گی اس کے پیچھے، مگر حقیقت کیا ہے؟ وہ دروازہ کھولتا ہے تو اسے بنجر زمین نظر آتی ہے۔ لالچ ایک دھوکہ ہے جو انسان خود کو دیتا ہے اور یہ واحد دھوکہ ہے جو انسان خود اپنی مرضی سے خود کو دیتا ہے۔ بچپن سے ہمیں پڑھایا جاتا ہے لالچ بری بلا ہے لیکن کاش ہمارے تعلیمی اداروں میں اس کہانی کا راٹہ لگانے کی بجاے اگر بچوں کو عملی زندگی میں اس کے نقصانات کے بارے میں بتا دیا جاتا تو آج بچہ صرف یہ نہ کہتا کہ کتے نے لالچ کی اور اس نے نقصان اٹھایا۔ بلکہ اس کے نتیجہ پر زیادہ غور کرتے تو سمجھتے کے لالچ ہر ایک کے لئے نقصان دہ ہے۔

بھائی بھائی آپس میں جائیداد کے لالچ میں ایک دوسرے کے دشمن ہیں۔ بہن سے تعلق ختم کر کے اس کی حق تلفی کی جاتی ہے۔ اسے جائیداد میں حصہ نہیں دیا جاتا کرسی کی لالچ میں لوگ اپنا وقار گرا دیتے ہیں۔لالچ کی وجہ سے دودھ میں پانی ملایا جاتا ہے۔ مسالوں میں ملاوٹ کی جاتی ہے۔

لالچ سے ہم دوسروں کو نقصان نہیں پہنچاتے بلکہ اپنے ساتھ بھی زیادتی کرتے ہیں لالچ ہمیں انسانیت کے مرتبے سے گرا دیتی ہے۔ ہم اشرف المخلوقات کی بجائے ایک جانور بن جاتے ہیں جسے تمیز اور لحاظ کے بنا ہر چیز کو چھیننا آتا ہے۔ وہ ایک ایسا جانور بن جاتا ہے جسے صرف اپنے مفاد سے غرض ہے۔ ادب، لحاظ، مروت،ہمدردی ان سب جذبات سے خالی ہو جاتا ہے۔پس منظر صرف اپنا مفاد۔

لالچ مختصر خسارا ہے عزیز رشتوں کا، انسانی وقار کا، عزت نفس کا۔ لالچ سے انسان دماغی طور پر بیمار ہو جاتا ہے۔ ہمیشہ زیادہ کی چاہ ایک چیز مل گئی اب دوسری چاہیے دوسری مل گی تو تیسری چاہیے۔ صرف زیادہ کی چاہ جس کی وجہ سے انسان ناشکرا بھی ہو جاتا ہے۔وہ پہلے موجود چیزوں کا شکر ادا نہیں کرتا بلکہ ناشکرا ہو جاتا ہے۔ وہ یہ نہیں دیکھتا کہ میرے پاس جو چیز موجود ہے وہ شائد دوسرو کے پاس نہ ہو اور الله نے مجھے۔اس محرومی سے بچایا مجھے اتنا نوازا لیکن عقل پر پڑے ہووے پردوں کو کون ہٹا سکتا ہے۔ سوائے الله کے۔

اگر ہم کہیں کہ کیا ہم لالچ سے بچ سکتے ہیں، تو اس کے لئے کچھ نتائج سامنے ہیں۔ نفس امارہ ہمیں ہر وقت برائیوں کی طرف مائل کرتا رہتا ہے اور شیطان ہمیں اکساتا رہتا ہے اس کی مثال ہمارا آج کل کا ماحول ہے گانے باجے، بےحیائی ہر طرف پھیلی ہوئی ہے تو کیا اس کا مطلب ہے کہ ہم بھی ان سب چیزوں میں گھس جائیں گی کہ یہ عام ہیں؟ نہیں ہم اس سے بچنے کی کوشش کریں گے کیونکہ چاہے ہم جنگل میں بھی رہیں ہمیں اپنے آپ کو بچانا ہے، کیونکہ یہ حکم خدا ہے اور لالچ سے بھی ہمیں خود کو بچانا ہے چاہے شیطان ہمیں جتنا مرضی اکسائے۔

لالچ ایک خطرناک بیماری ہے جو انسان کے دل و دماغ کو اس طرح متاثر کرتی ہے کہ انسان اپنے مقصد کو حاصل کرنے کے لیے اخلاقی حدود کو پامال کر دیتا ہے۔ لالچ انسان کو اللہ کی رضا اور انسانیت کے اصولوں سے منحرف کرتا ہے، اور ایک شخص کی زندگی میں اضطراب اور پریشانی کی فضا پیدا کرتا ہے۔ اس مضمون میں ہم قرآن، حدیث اور بزرگان دین کے اقوال کی روشنی میں لالچ کی حقیقت اور اس کے نقصانات پر گفتگو کریں گے۔

قرآن مجید میں اللہ تعالیٰ نے لالچ اور اس کے نتیجے میں پیدا ہونے والی برائیوں سے متعلق کئی آیات میں واضح رہنمائی دی ہے۔

اللہ تعالیٰ نے فرمایا: اِنَّمَاۤ اَمْوَالُكُمْ وَ اَوْلَادُكُمْ فِتْنَةٌؕ- (پ 28، التغابن: 15) تمہاری دولت اور تمہاری اولاد تمہارے لیے فتنہ ہیں۔ اس آیت سے یہ واضح ہوتا ہے کہ انسان کا مال و دولت اور دنیاوی نعمتوں کی محبت اسے آزمائش میں مبتلا کرتی ہے۔ اگر انسان ان چیزوں کی محبت میں مبتلا ہو جائے اور لالچ کا شکار ہو، تو وہ اللہ کے راستے سے بھٹک سکتا ہے۔

حضور ﷺ نے فرمایا: اگر آدمی کے پاس دو وادیاں مال سے بھری ہوئی ہوں تو وہ تیسری کی خواہش کرے گا۔ابن آدم کے پیٹ کو مٹی کے سوا کوئی چیز نہیں بھر سکتی۔ (مسلم، ص 404، حدیث: 2419)

لالچ ایک ایسی بری بلا ہے جس کی حوصلہ شکنی ہر اہل بصیرت نے کی ہے۔چنانچہ بزرگان دین فرماتے ہیں: لالچ انسان کے دل کو داغ دار کر دیتا ہے اور اس کی اخلاقی حالت کو تباہ کر دیتا ہے۔ جو شخص مال و دولت کی لالچ میں مبتلا ہو جاتا ہے وہ دنیا میں کبھی سکون نہیں پاتا۔ لالچ اس شخص کے دل میں ہوتا ہے جس کا دل اللہ کی محبت سے خالی ہو۔

لالچ ایک ایسا مرض ہے کہ اس کی وجہ سے روحانیت ختم ہو جاتی ہے۔ لالچ اخلاقی زوال کا سبب ہے۔ لالچی انسان ہر پل دکھ و اضطراب میں مستغرق رہتا ہے۔ لالچ اللہ سے دوری کا سبب ہے۔

اس کی انہیں خامیوں کی وجہ اول دور سے اخیر تک اس کو پزیرائی نہیں ملی۔ لالچ ایسی بلا ہے جس نے تخت نشینوں کو خاک میں ملا دیا۔معزز کو ذلیل کروا دیا۔

اللہ پاک ہمیں اس بری بلا سے محفوظ فرمائے اور قناعت پسند بنائے۔ آمین

کسی چیز میں حد درجہ دلچسپی کی وجہ سے نفس کا اس کی جانب راغب ہونا طمع یعنی لالچ کہلاتا ہے۔ (مفردات الفاظ القرآن، ص 524)

لالچ دولت، طاقت یا مادی املاک کی ضرورت سے زیادہ خواہش ہے۔ یہ ایک عالمگیر انسانی جذبہ ہے جس کے تباہ کن نتائج ہونے کے ساتھ ساتھ افراد کو دوسروں کی بھلائی پر اپنے مفادات کو ترجیح دینے کا باعث بن سکتی ہے۔جس سے تعلقات،برادریوں اور مجموعی طور پر معاشرے تک کو نقصان پہنچ سکتا ہے۔لہذا اس موذی باطنی بیماری کے نقصانات سے بچنے کیلئے تین اہم باتوں کو مد نظر رکھا جائے:

قناعت: قناعت میں عزت اور لالچ میں ذلت ہے۔ دنیا سے بے رغبتی اختیار کیجئے مال و دولت کے آخرت میں حساب دینے کے معاملے میں غور و فکر کیجئے۔ (گناہوں کی معلومات، ص 169)

وَ مَنْ یُّوْقَ شُحَّ نَفْسِهٖ فَاُولٰٓىٕكَ هُمُ الْمُفْلِحُوْنَۚ(۹) (پ 28، الحشر: 9) ترجمہ: اور جو اپنے نفس کے لالچ سے بچایا گیا تو وہی کامیاب ہے۔ مکمل

نفس کے لالچ سے پاک کئے جانے والے پاک ہیں: اس آیت مبارکہ سے معلوم ہوا کہ جن حضرات کے نفس کو لالچ سے پاک کردیا گیا ہے وہ حقیقی طور پر کامیاب ہیں اور یہ بھی معلوم ہوا کہ نفس کے لالچ جیسی بری عادت سے بچنا بہت مشکل ہے اور جس پر اللہ پاک کی خاص رحمت ہو تو وہی اس سے بچ سکتا ہے۔

لالچ کا نقصان: رسول اللہ ﷺ نے ارشاد فرمایا: شح (یعنی نفس کے لالچ)سے بچو کیونکہ شح نے تم سے پہلی امتوں کو ہلاک کردیا کہ اسی نے ان کو ناحق قتل کرنے اور حرام کام کرنے پر ابھارا۔ (مسلم، ص 1069، حدیث: 6576)

مروی ہے حضرت عبد الرحمٰن بن عوف رضی اللہ عنہ بیت اللہ شریف کا طواف کررہے اور یہ دعا مانگ رہے تھے: اے اللہ! مجھے میرے نفس کی حرص سے بچا۔ اس سے زائد وہ کچھ نہیں فرماتے تھے۔جب ان سے اس کے بارے میں استفسار کیا گیا تو انہوں نے فرمایا: جب مجھے میرے نفس سے محفوظ رکھا گیا تو نہ میں چوری کروں گا، نہ زنا کروں گا اور نہ ہی میں نے اس قسم کا کوئی کام کیا ہے۔ (تفسیر طبری، 12/42)

اللہ پاک ہم پر رحم فرمائے اور ہمیں نفس کے حرص اور لالچ سے محفوظ فرمائے۔ آمین

مشہور مقولہ ہے کہ لالچ بری بلا ہے۔لالچ نہ صرف بری بلا ہے بلکہ یہ ایک نہایت ہی بدخصلت ہے یہ خصلت جسکو لگ جاۓ تو اسکاچھو ٹنا محال ہے۔کیو نکہ لالچ انسان کو حریص بنا دیتی ہے اور لا لچ کی کوئی حد نہیں ہوتی یہ انسان کو اندھا بنا دیتی ہے اور انسان مزید سے مزید تر کی خواہش کی وجہ سے اس میں پھنستا چلا جاتا ہے یہاں تک کہ انسان اپنا ایمان تک بیچ ڈالتا ہے، بظاہر اس کو لگتا ہے کہ دنیاوی دولت کے باعث وہ کامیاب شخص ہے در حقیقت وہ ناکام اور دنیا و آخرت میں ناکام ہے، چنانچہ اللہ تعالیٰ قرآن پاک میں ارشاد فرماتا ہے: وَ مَنْ یُّوْقَ شُحَّ نَفْسِهٖ فَاُولٰٓىٕكَ هُمُ الْمُفْلِحُوْنَۚ(۹) (پ 28، الحشر: 9) ترجمہ: اور جو اپنے نفس کے لالچ سے بچایا گیا تو وہی کامیاب ہے۔ مکمل

حدیث پاک میں بھی لالچ کو نا پسند قرار دیا ہے اور اسکو ہلاکت و بربادی میں ڈالنے والی شے بتایا گیا ہے نبی اکرم ﷺ نے ارشاد فرمایا: تین چیزیں ہلاکت میں ڈالنے والی ہیں: لالچ جسکی اطاعت کی جائے، خواہش جسکی پیروی کی جائے اور بندے کا اپنے عمل کو پسند کرنا یعنی خود پسندی۔ (معجم اوسط، 4/212، حدیث: 5754)

ایک اور جگہ ارشاد فرمایا: لالچ سے بچتے رہو کیونکہ تم سے پہلی قومیں لالچ کی وجہ سے ہلا ک ہوئیں،لالچ نے انہیں بخل پر آمادہ کیا تو وہ بخل کرنے لگے اور جب قطع رحمی کا خیال دلا یا تو انہوں نے قطع رحمی کی اور جب گناہ کا حکم دیا تو وہ گناہ میں پڑھ گئے۔ (ابو داود، 2/185، حدیث: 1698)

ان احادیث سے واضح ہے کہ لالچ ہلاک کرنے اور برباد کرنے والی شے ہے گناہوں کی طرف رغبت دلانے والی ہے، انسان کے کردارکو مسخ کر دیتی ہے، مال و زر کی لالچ خونی رشتوں میں دڑاریں ڈال دیتی ہے نسل در نسل دشمنی کی بنیاد ڈال دیتی ہے، ایمان کو اور اللہ پر توکل کو کمزور کر دیتی ہے انسان خود کو کچھ سمجھنے لگ جاتا ہے اور اس میں غرور و تکبر آجاتا ہے دیکھا جاۓ تو اس ایک لالچ کی وجہ سے دیگر باطنی امراض بھی جنم لیتے ہیں۔

لالچی انسان ایک اضطراب کا شکار ہتا ہے اسکا ذہن اسی توڑ جوڑ میں رہتا ہے کہ کس طرح میں اپنی دولت کو مزید بڑھاؤں؟ ایسا کیا کروں کہ راتوں رات امیر ہوجاؤں، جسکی وجہ سے وہ شارٹ کٹ استعمال کرتا ہے اورنقصان کر بیٹھتا ہے لالچ و حرص کی وجہ سے ذہنی حالت ابتر ہوجاتی ہے ذہنی تناؤ اور ڈپریشن کا شکار ہوجاتا ہے اور ایسے شخص میں قوت فیصلہ ختم ہوجاتی ہے۔ لالچ کی وجہ سے انسان دنیا کی محبت اور مادی چیزوں کی محبت میں گرفتار ہو جاتا ہے دین سے دور ہوجاتا ہے اور ایسا وقت بھی آتا ہے کہ وہ اپنا ایمان اپنا ضمیر بھی بیچ ڈالتا ہے،لالچ انسان کو سماجی تنہائی کا شکار بنادیتی ہے کیونکہ ایسے افراد رشتوں پر دولت اور مادیت کو ترجیح دیتے ہیں وہ رشتے داروں دوست احباب سے ملنا چھوڑ دیتے ہیں کہ کہیں وہ ادھار نہ مانگ لیں یا کسی مالی مدد کا تقاضہ نہ کر دیں اس وجہ سے لالچ اخلاقیات اور اقدار کو کمزور کر دیتی ہے اس سے حقوق العباد تلف ہوتے ہیں الغرض لالچ انسان کو مادہ پرست بنا دیتی ہے۔

جہاں لالچ کے نقصان ہیں وہاں ہم لالچ کو اپنے فائدے کیلیے بھی استعمال کر سکتے ہیں وہ اسطرح کہ ہم زیادہ سے زیادہ نیک اعمال کرنے کے لالچی بن جائیں زیادہ سے زیادہ نیکیاں کرنے اور درود پاک پڑھنے کے لالچی بن جائیں لیکن خیال رہے کسی کے حقوق یا اپنی ذمہ داریاں نہ تلف ہوں۔

یاد رہے پچھلی قومیں لالچ کی وجہ سے ہلاک ہوئیں اور نام و نشان مٹ گئے لیکن انبیائے کرام نے کسی لالچ کے بغیر دین کی تبلیغ کا فریضہ سر انجام دیا اور باقاعدہ اس کا اظہار بھی فرمایا کہ تبلیغ سے ان کا مقصد مال یا کوئی منصب حاصل کرنا نہیں بلکہ وہ صرف اپنے رب کی رضا اور اسکی طرف سے ملنے والے اجر کے طلبگار ہیں،اسی لیے ہم مسلمانوں کو بھی چاہیے کہ بغیر لالچ و غرض کے حقوق اللہ، حقوق العباد اور تبلیغِ دین کا فریضہ انجام دیں، کیونکہ لالچ ہلاک اور ناکام کرنے والی شے ہے۔

اللہ پاک ہمیں اس موذی خصلت سے نجات دے۔ آمین بجاہ النبی الامین ﷺ

کسی چیز میں حد درجہ دلچسپی کی وجہ سے نفس کا اس جانب راغب ہونا طمع یعنی لالچ کہلاتا ہے۔ (مفردات الفاظ قرآن، ص 524)

وَ مَنْ یُّوْقَ شُحَّ نَفْسِهٖ فَاُولٰٓىٕكَ هُمُ الْمُفْلِحُوْنَۚ(۹) (پ 28، الحشر: 9) ترجمہ: اور جو اپنے نفس کے لالچ سے بچایا گیا تو وہی کامیاب ہے۔ مکمل

اس آیت مبارکہ سے معلوم ہوا کہ جن حضرات کہ نفس کو لالچ سے پاک کر دیا گیا ہو وہ حقیقی طور پر کامیاب ہیں اور یہ بھی معلوم ہوا کہ نفس کہ بری عادت سے بچنا بہت مشکل ہے اور جس پر اللہ تعالیٰ کی خاص رحمت ہو وہ اس عادت سے بچ سکتا ہے۔یہ عادت کس قدر نقصان دہ ہے اس کا اندازہ اس حدیث مبارکہ سے لگایا جا سکتا ہے۔چنانچہ

حضرت جابر بن عبداللہ رضی اللہ عنہ سے روایت ہے کہ رسول اللہ ﷺ نے فرمایا:ظلم کرنے سے ڈرو کیونکہ ظلم قیامت کا اندھیرا ہے اور شحی یعنی (نفس کے لالچ) سے بچو کیونکہ شح نے تم سے پہلی امتوں کو ہلاک کر دیا کہ اسی نے ان کو ناحق قتل کرنے اور حرام کام کرنے پر ابھارا۔ (مسلم، ص 1069، حدیث: 6576)

رسول اللہ ﷺ نے ارشاد فرمایا: لالچ سے بچتے رہو کیونکہ تم سے پہلی قومیں لالچ کی وجہ سے ہلاک ہوئیں لالچ نے انہیں بخل پر آمادہ کیا تو وہ بخل کرنے لگی اور جب قطع رحمی کا خیال دلایا تو انہوں نے قطع رحمی کی اور جب گناہ کا حکم دیا تو وہ گناہ میں پڑ گئے۔ (ابو داود، 2/185، حدیث: 1698)

طمع (لالچ) کے بارے میں تنبیہ مال و دولت کی ایسی طمع (لالچ) جس کا کوئی دینی فائدہ نہ ہویا ایسی اچھی نیت نہ ہو جو لالچ کر دے نہایت ہی قبیح گناہوں کی طرف رغبت دلانے والی اور ہلاکت میں ڈالنے والی بیماری ہے مال و دولت کے لالچ میں پھنسنے والا شخص ناکام ونامراد ہے اور جو ان کے مکرو جال سے بچ گیا وہی کامران وکامیاب ہے۔ (باطنی بیماریوں کی معلومات، ص 191)

لالچ کے اسباب: لالچ انسان کے دل سے ہمدردی کا جذبہ نکال دیتی ہے۔ لالچ دنیا و آخرت میں ذلت و رسوائی کا سبب بنتی ہے۔ لالچ انسان کو بے سکونی میں مبتلا کر دیتی ہے۔ لالچ انسان کو اکیلا کر دیتی ہے۔ لالچ انسان کو کہیں کا نہیں چھوڑتی ہے اور لالچ کا انجام انتہائی بھیانک ہوتا ہے۔الغرض لالچ کی تباہ کاریاں اس قدر زیادہ ہیں کہ الامان والحفیظ۔ لہذا عقلمندی اسی میں ہے کہ ہم لالچ اور دوسروں کے مال پر نظر رکھنے سے بچتے ہوئے قناعت اور سادگی کو اپنائیں یوں ہماری زندگی (life) بھی پرسکون گزرے گی اور دنیا و آخرت میں بھی اس کی خوب خوب برکتیں نصیب ہوں گی۔

لالچ سے بچنے کے لیے: قناعت اختیار کیجئے قناعت میں عزت اور لالچ میں ذلت ہے دنیا سے بے رغبتی اختیار کیجئے مال و دولت کے آخرت میں حساب دینے کے معاملے میں غور و فکر کیجئے۔

اللہ تعالیٰ ہم پر اپنا رحم فرمائے اور ہمیں نفس کے حرص اور لالچ سے محفوظ فرمائے۔

کسی چیز میں حد درجہ دلچسپی کی وجہ سے نفس کا اس کی جانب راغب ہونا طمع یعنی لالچ کہلاتا ہے۔(باطنی بیماریوں کی معلومات، ص: 190)

عام طور پر یہی سمجھا جاتا ہے کہ لالچ کا تعلق صرف مال و دولت کے ساتھ ہوتا ہے حالانکہ ایسا نہیں ہے کیونکہ کسی بھی چیز میں حددرجہ دلچسپی لینا لالچ ہے۔

تلمیذ صدر الشریعہ حضرت علامہ عبد المصطفی اعظمی رحمۃ الله علیہ لکھتے ہیں: لالچ اور حرص کا جذبہ خوراک، لباس، مکان، سامان، دولت، عزت، شہرت الغرض ہر نعمت میں ہوا کرتا ہے۔ (باطنی بیماریوں کی معلومات، ص 116)

قرآن کریم میں ارشاد باری تعالیٰ ہے: وَ مَنْ یُّوْقَ شُحَّ نَفْسِهٖ فَاُولٰٓىٕكَ هُمُ الْمُفْلِحُوْنَۚ(۹) (پ 28، الحشر: 9) ترجمہ: اور جو اپنے نفس کے لالچ سے بچایا گیا تو وہی کامیاب ہے۔ مکمل اس آیت سے معلوم ہوا کہ جن حضرات کے نفس کو لالچ سے پاک کر دیا گیا وہ حقیقی طور پھر کامیاب ہیں اور یہ بھی معلوم ہوا کہ نفس کے لالچ جیسی بری عادت سے بچنا بہت مشکل ہے اور جس پر اللہ کی خاص رحمت ہو تو وہیں اس عادت سے بچ سکتا ہے یہ عادت کس قدر بری اور نقصان دہ ہے اس کا اندازہ درج ذیل حدیث مبارک سے لگایا جاسکتا ہے۔

چنانچہ حضرت عبد الله بن عمرو رضی اللہ عنہ سے روایت ہے کہ سرکار مدینہ ﷺ نے ارشاد فرمایا: لالچ سے بچتے رہو کیونکہ تم سے پہلی قومیں لالچ کی وجہ سے ہلاک ہوئیں، لالچ نے انہیں بخل پر آمادہ کیا تو وہ بخل کرنے لگے اور جب قطعی رحمی کا خیال دلایا تو انہوں نے قطع رحمی کی اور جب گناہ کا حکم دیا تو وہ گناہ میں پڑ گئے۔ (ابو داود، 2/185، حدیث: 1698)

قرآن کریم میں ارشاد باری تعالیٰ ہے: قَالُوْا لَا ضَیْرَ٘-اِنَّاۤ اِلٰى رَبِّنَا مُنْقَلِبُوْنَۚ(۵۰) اِنَّا نَطْمَعُ اَنْ یَّغْفِرَ لَنَا رَبُّنَا خَطٰیٰنَاۤ اَنْ كُنَّاۤ اَوَّلَ الْمُؤْمِنِیْنَؕ۠(۵۱) (پ 19، الشعراء: 50، 51) ترجمہ كنز العرفان: جادوگروں نے کہا: کچھ نقصان نہیں،بیشک ہم اپنے رب کی طرف پلٹنے والے ہیں۔ ہم اس بات کی لالچ کرتے ہیں کہ ہمارا رب ہماری خطائیں بخش دے اس بنا پر کہ ہم سب سے پہلے ایمان لانے والے ہیں۔ اس آیت مبارکہ کا خلاصہ یہ ہے کہ فرعون کی دھمکی سن کر ان جادو گروں نے کہا اللہ کی خاطر جان دینے میں کچھ نقصان نہیں چاہے دنیا میں کچھ بھی ہو کیونکہ ہم اپنے رب کی طرف ایمان کے ساتھ پلٹتے ہیں اور ہمیں اللہ کی رحمت سے امید ہے اور لالچ ہے کہ اللہ پاک ہماری خطائیں معاف فرمادے گا۔

اس آیت مبارکہ میں جو لالچ کا ذکر ہے تو یہاں اچھی لالچ مراد ہے کہ وہ اس بات کی لالچ رکھتے ہیں کہ ان کی خطائیں معاف کر دی جائیں اور یہ لالچ اچھی ہے اور اس پر اللہ کی رحمت سے ثواب بھی ہے۔

لالچ کے متعلق حدیث مبارکہ:

لالچ ایسی پھسلانے والی چٹان ہے جس پر علماء بھی ثابت قدم نہیں رہتے۔ (کنز العمال، 2/198، جز: 3، حدیث: 7576)

اگر ابن آدم کے پاس سونے کی دو وادیاں بھی ہوں تب بھی یہ تیسری کی خواہش کرے گا اور ابن آدم کا پیٹ قبر کی مٹی ہی بھر سکتی ہے۔ (مسلم، ص 404، حدیث: 2419)

لالچ کا حکم: مال و دولت کی ایسی لالچ جس کا کوئی دینی فائدہ نہ ہو یا ایسی اچھی نیت نہ ہو جو لالچ ختم کر دے، نہایت ہی قبیح گناہوں کی طرف رغبت دلانے والی اور ہلاکت میں ڈالنے والی بیماری ہے۔ (باطنی بیماریوں کی معلومات ص 191)

کچھ لوگ نیک و پرہیزگار ہوتے ہیں لیکن لالچ جب ان کے دل میں گھر کر جاتا ہے تو ان کا عبرت ناک انجام ہوتا ہے جیسے بلعم بن باعورء کی ایک مشہور مثال ہے کہ وہ اپنے دور کا بہت بڑا عالم اور عابد و زاہد تھا ایسے اسم اعظم کا بھی علم تھا اور بہت ہی مستجاب الدعوات تھا کہ اس کی دعائیں بہت زیادہ قبول ہوتی تھی ایک مرتبہ اس کی قوم نے حضرت سیدنا موسی علیہ السلام کے لئے بددعا کرنے کا کہا تو پہلے تو اس نے انکار کردیا لیکن جب اس کی قوم نے اس کو راضی کرنے کی بہت کوشش کی اور یہ کسی طرح راضی نہ ہوا تو اس کی قوم نے اسے مال و دولت کا لالچ دیا یہ لالچی شخص مال و دولت کا بھوکا ان کے جال میں آگیا اور حضرت موسیٰ علیہ السلام کو بد دعا دینے کے لئے راضی ہو گیا، لیکن جب یہ بددعا دینے کی کوشش کرتا تو اس کے منہ سے اپنے قوم کے لئے بد دعا نکلتی، بلعم بن باعوراء نے مال و دولت کی لالچ میں آکر اپنی دنیا و آخرت برباد کر ڈالی۔

اس میں ہمارے لئے لمحہ فکریہ ہے کہ ہم نیک کاموں کی لالچ رکھ کر اپنی قبر کو سنوارتے ہیں اور اس کے مکروہ جال سے بچ کر کامیاب و کامران ہوتے ہیں یا برے کاموں کی لالچ رکھ کر اپنی دنیا و آخرت برباد کرتے ہیں اور مال و دولت کی لالچ میں پھنس کرنا کام و نامراد ہوتے ہیں۔

یقیناً نیکیوں اور اچھے کاموں کی حرص و لالچ اچھی ہے اور اس پر ثواب بھی ہے لیکن اگر ہم برے کاموں کی لالچ و حرص رکھیں تو زندگی کا کیا بھروسہ کہ یہ چند روزہ زندگی فانی ہے سب مال یہی چھوڑ کر ایک دن اندھیری قبر میں جانا ہے اور اپنے اعمال کا حساب دینا ہے۔

اللہ سے دعا ہے کہ ہمیں نیک کاموں کی حرص و لالچ اور ہر ایک کام کو بغیر کسی غرض کے کرنے کی توفیق عطا فرمائے۔ آمین

وَ مَنْ یُّوْقَ شُحَّ نَفْسِهٖ فَاُولٰٓىٕكَ هُمُ الْمُفْلِحُوْنَۚ(۹) (پ 28، الحشر: 9) ترجمہ: اور جو اپنے نفس کے لالچ سے بچایا گیا تو وہی کامیاب ہے۔ مکمل

فرمانِ مصطفیٰ ﷺ: مومنوں میں سے بہترین شخص قناعت پسند اور بدترین شخص لالچی ہوتا ہے۔ (فردوس الاخبار للدیلمی، 1/365، حدیث: 2707)

لالچ باطنی امراض میں سے ایک بدترین مرض ہے اس انتہائی بری عادت سے نفس کو پاک رکھنا نہایت ہی دشوار ہوتا ہے لالچ ایک ایسی خبیث عادت ہے جس کے نتیجے میں انسان بہت سے گناہوں میں مبتلا ہو جاتا ہے کہ جب کسی چیز کی لالچ انسان کے دل پر غالب آجائے تو شیطان اس کو خوب آراستہ کرتا ہے یہاں تک کہ وہ اس لالچی شخص کے لیے معبود بن جاتی ہے اور پھر بندہ اس کی محبت کی رسی میں بندھا غور فکر کرتا رہتا ہے کہ کسی طرح اسے راضی کرسکے، حاصل کرسکے اگرچہ اللہ پاک کو ناراض کر بیٹھے،جیسے حرام کا اقرار کرنے کے باوجود اس کے لیے فریب کاری سے کام لینا،فرائض کو انجام دینے میں بخل کرنا مثلا: مال کی لالچ کے سبب زکوۃ اور صدقات واجبہ ادا نہ کرنا،یوں ہی زیادہ سے زیادہ مال کمانے کی لالچ میں فرض نمازوں کی اوقات کے پرواہ کیے بغیر مال کمانے میں مصروف رہنا اور اسی طرح جائز و ناجائز کی پرواہ کیے بغیر کمائی کے حصول میں مگن رہنا کیونکہ لالچی شخص صرف اپنے نفس کے لالچ کو پورا کرنے کی جستجو میں لگے رہتا ہے اسے جہاں چارہ نظر آتا ہے وہیں راغب ہو جاتا ہے اس بات کو جانے بنا کہ وہ چارہ استعمال کرنا اس کے لیے درست ہے بھی یا نہیں؟

لالچ وہ بلا ہے جو انسان کی دنیا و آخرت کو برباد کر دیتی ہے لالچ انسان کے اندر بھڑکتی وہ آگ جو زندگی کی کھیتی تباہ کر دیتی ہے اور رشتوں کو جھلسا دینے والی ہے کہ لالچی انسان کسی رشتے کے ساتھ مخلص نہیں ہوتا لالچ کے سبب دوست دشمن بن جاتے ہیں، بھائی بھائی کے سامنے آکھڑا ہوتا ہے، اولاد ماں باپ کی نہیں رہتی کہ بے شمار گھروں میں جائیداد کی لالچ میں بھائی بھائی کا جانی دشمن ہو جاتا ہے لڑائی جھگڑے ہوتے ہیں فتنہ و فساد جنم لیتا ہے اور بعض اوقات قتل و غارت گری تک نوبت آجاتی ہے اور کہیں تو بد نصیبی اور بدبختی کا یہ عالم ہوتا ہے کہ لالچی اولاد اپنی لالچ کے سبب اپنے ہی ماں باپ کے دنیا سے جانے کے انتظار میں بیٹھے ہوتے ہیں۔ (الامان والحفیظ)

فرمان مصطفی ﷺ ہے: لالچ سے بچتے رہو کیونکہ تم سے پہلی قومیں لالچ کی وجہ سے ہلاک ہوئیں،لالچ نے انہیں بخل پر آمادہ کیا تو وہ بخل کرنے لگی اور جب قطع رحمی کا خیال دلایا تو انہوں نے قطع رحمی کی اور جب گناہ کا حکم دیا تو گناہ میں پڑ گئے۔ (ابو داود،2/185، حدیث: 1698)

لالچ دنیا و آخرت میں ذلت اور رسوائی کا سبب ہے یہ ایسا مرض ہے جو بڑے سے بڑے نیکوں کو بھی ذلت کے گڑھے میں ڈالنے کا سبب بن سکتا ہے، تاریخ میں اسکی بے شمار مثالیں موجود ہیں جیسا کہ بلعم بن باعوراء،پرہیزگار عالم اور مستجاب الدعوات شخص ہونے کے باوجود بھی لالچ کا شکار ہوالالچ ہی وہ بلا تھی جو اس کی دنیا و آخرت کو لے ڈوبی۔لالچ کبھی ختم نہ ہونے والی بلا ہے کہ لالچی شخص تاعمر بھی اپنی لالچ کو پورا کرنے میں مصروف و مشغول رہے جب بھی اس کا جی نہیں بڑھتا ایک کے بعد ایک خواہش دل میں جنم لیتی جاتی ہے یوں لالچ بڑھتی ہی چلی جاتی ہے۔

فرمان مصطفی ﷺ ہے:اگر ابن آدم کے پاس سونے کی دو وآدیاں بھی ہوں تب بھی وہ تیسری خواہش رکھتا ہے اور ابن آدم کا پیٹ قبر کی مٹی ہی بھر سکتی ہے۔ (مسلم، ص 404، حدیث: 2419)

لالچ اور حرص وہ شے ہے کہ مرد ہو یا عورت،بوڑھا ہو یا جوان، غریب ہو یا امیر، عالم ہو یا جاہل الغرض کوئی شخص اس سے بچ نہیں سکتا، قرآن مجید میں ارشاد باری تعالیٰ ہے: وَ اُحْضِرَتِ الْاَنْفُسُ الشُّحَّؕ- (پ 5، النساء: 125) ترجمہ: اور دل لالچ کے پھندے میں ہیں۔ مکمل

تفسیر خازن میں اس آیت کے تحت ہے: لالچ دل کا لازمی حصہ ہے کیونکہ یہ اسی طرح بنایا گیا ہے۔ یعنی لالچ دل سے جڑی ہوئی ہے، یہ ایک الگ بات ہے کہ کسی کو ثواب آخرت اور نیکیوں کی لالچ ہوتی ہے،تو کسی کو مال و دولت،جاہ و حشمت، اور عزت و شہرت کی، یاد رکھیے! لالچ اچھی اور بری دونوں طرح کی ہوتی ہے اور صرف مال و دولت ہی میں نہیں بلکہ ہر شے میں پائی جاتی ہے۔

کسی چیز میں حد درجہ دلچسپی کی وجہ سے نفس کا اس کی جانب راغب ہونا طمع یعنی لالچ کہلاتا ہے۔ حضرت علامہ عبدالمصطفی اعظمی علیہ الرحمۃ لکھتے ہیں: لالچ اور حرص کا جذبہ خوراک، لباس،مکان، سامان،دولت،عزت،شہرت الغرض ہر نعمت میں ہوا کرتا ہے۔ (جنتی زیور، ص 111 ملخصا)

نیز لالچ کا دل میں لازمی طور پر موجود ہونے کی بنا پر اس کا ازالہ یعنی نہ ہونا تو بہت ہی مشکل بقریب ناممکن ہے لیکن اس کا ازالہ ہونا چاہیے یعنی اس کا رخ دوسری طرف پھر جانا چاہیے کہ آخرت کے معاملے میں حریص اور لالچی بن جائیے اور دنیاوی نعمتوں میں قناعت اختیار کیجیے ایک مومن کی شان یہی ہے کہ اس کے دل میں لالچ ہو تو نیکیوں کی ہو،جاہ و عزت، شہرت، مرتبت کی لالچ ہو تو اللہ اور اس کے رسول ﷺ کے نزدیک جاہ و محبت کی ہو۔

فرمان مصطفی ﷺ ہے: جس نے قناعت کی اس نے عزت پائی اور جس نے لالچ کیا ذلیل ہوا۔ (روح البیان، 1/161)

اپنے دل پر غور کیجئے! دنیاوی نعمتوں میں قناعت اختیار کیجئے، خواہشات کی کثرت پر روک تھام کیجیے، مال و دولت کی محبت اور لمبی لمبی امیدوں سے چھٹکارا پائیے، خوف خدا اور فکر آخرت پیدا کیجیے کہ دنیا اور اس کی چند روزہ زندگی فانی ہے اور آخرت اور اس کی نعمتیں دائمی ہے، قبرستان اور اس میں بوسیدہ ہونے والوں پر نظر کیجئےاور سوچیے کہ ایک دن ہم نے بھی اسی طرح قبر کی مٹی کے نیچے خاک کا سرمہ بننا ہے۔

ان شاء اللہ بری لالچ سے نجات اور نیکیوں اور ثواب آخرت کی حرص و لالچ نصیب ہوگی۔

مال و دولت کی ایسی طمع (لالچ) جس کا کوئی دینی فائدہ نہ ہو،یا ایسی اچھی نیت نہ ہو جو لالچ ختم کردے، نہایت ہی بری گناہوں کی طرف رغبت دلانے والی اور ہلاکت میں ڈالنے والی بیماری ہے، مال و دولت کے لالچ میں پھنسنے والا شخص ناکام اور نامراد ہے اور جو ان کے مکر و جال سے بچ گیا وہی کامیاب و کامران ہے۔ (گناہوں کی معلومات، ص 168)

اللہ پاک سے دعا ہے کہ ہمیں بری لالچ سے بچاۓ اور نیکیوں کا لالچی و حریص بنائے اور اپنی فرمانبرداری والی زندگی گزر بسر کرنا نصیب فرمائے۔

لالچ باطنی بیماریوں میں سے ایک خطرناک بیماری ہے جس سے بچنا انتہائی ضروری ہے اور جو لالچ جیسی بیماری سے بچ گیا وہ کامیاب ہوگیا، جیسا کہ قرآن پاک میں رب تعالیٰ نے ارشاد فرمایا: وَ مَنْ یُّوْقَ شُحَّ نَفْسِهٖ فَاُولٰٓىٕكَ هُمُ الْمُفْلِحُوْنَۚ(۹) (پ 28، الحشر: 9) ترجمہ: اور جو اپنے نفس کے لالچ سے بچایا گیا تو وہی کامیاب ہے۔ مکمل

لالچ ہوتی کیا ہے اس کا مطلب کیا ہے پہلے یہ جان لیتے ہیں لالچ کی تعریف کسی چیز میں حد درجہ دلچسپی کی وجہ سے نفس کا اس کی جانب راغب ہو نا طمع یعنی لالچ کہلاتا ہے۔(باطنی بیماریوں کی معلومات، ص 190)

جس طرح آیت مبارکہ میں لالچ سے بچنے کا حکم ارشاد فرمایا گیا اسی طرح حدیث مبارکہ میں بھی لالچ سے بچنے کا حکم دیا گیا ہے۔

جیساکہ حدیث مبارکہ ہے: لالچ سے بچتے رہو کیونکہ تم سے پہلی قوميں لالچ کی وجہ سے ہلاک ہوئيں، لالچ نے انہيں بخل پر آمادہ کيا تو وہ بخل کرنے لگے اور جب قطع رحمی کا خيال دلايا تو انہوں نے قطع رحمی کی اور جب گناہ کا حکم ديا تو وہ گناہ ميں پڑ گئے۔ (ابو داود، 2/185، حدیث: 1698)

لالچ کے نقصانات: لالچ کے نقصانات بیشمار ہیں جیسے: لالچ انسان کو اندھا کردیتا ہے، لالچ عقل پر پردہ ڈال دیتا ہے، لالچ کی نحوست کے سبب دل سے خوف خدا نکل جاتا ہے،لالچ کی وجہ سے انسان اپنوں کا دشمن بن جاتا ہے،لالچ کے سبب بندہ لوگوں کے احسانات کو بھلا دیتا ہے،لالچ فتنوں کو جگاتا ہے،لالچ اچّھے برے کی تمیز بھلادیتا ہے،لالچ انسان کو ظلم پر ابھارتا ہے،لالچ دنیا وآخرت میں ذلت و رسوائی کا سبب بنتا ہے،لالچ انسان کو کہیں کا نہیں چھوڑتا اور لالچ کا انجام انتہائی بھیانک ہوتا ہے۔ الغرض لالچ کی تباہ کاریاں اس قدر زیادہ ہیں کہ الامان والحفیظ۔

لالچ سے متعلق حکایت: ایک غریب آدمی کے3 بیٹے تھے،جو کچھ اسے دال روٹی نصیب ہوتی خود بھی کھاتا اور انہیں بھی کھلاتا۔ ان میں سے ایک بیٹا باپ کی غربت اور دال روٹی سے خوش نہیں تھا چنانچہ اس نے ایک مالدار نوجوان سے دوستی کرلی اور اچھا کھانا ملنے کے لالچ میں اس کے گھر آنے جانے لگا۔ایک دن ان کے درمیان کسی بات پر ناراضی ہوگئی۔مالدار دوست نے اپنی امیری کے غرور میں اسے خوب مارا پیٹا اور اس کے دانت توڑ ڈالے۔تب وہ غریب دل ہی دل میں توبہ کرتے ہوئے کہنے لگا:میرے باپ کی پیار سے دی ہوئی دال روٹی اس مار دھاڑ اور ذلت کے نوالے سے بہتر ہے،اگر میں اچّھے کھانے پینے کی لالچ نہ کرتا تو آج اتنی مار نہ کھاتا اور میرے دانت نہیں ٹوٹتے۔ (حرص، ص 218)

اس حکایت میں ہمارے لیے بھی عبرت ہے لہٰذا عافیت اسی میں ہے کہ جتنا اللہ پاک نے ہمیں نوازا ہے ہم اسی پر قناعت کرنا سیکھیں اللہ پاک نے جس کا جتنا رزق لکھ دیا ہے اسے وہ مل کر رہے گا لالچ اور حرص کا جذبہ خوراک، لباس، مکان، سامان، دولت، عزت، شہرت الغرض ہر نعمت میں ہوا کرتا ہے۔ (جنتی زیور، ص 111)

پیارے آقا ﷺ نے ارشاد فرمایا: اگر ابن آدم کے پاس سونے کی ایک وادی ہوتوچاہے گا کہ اس کے پاس دو وادیاں ہوں اور اس کے منہ کو مٹی کے علاوہ کوئی چیز نہیں بھر سکتی اور جو اللہ پاک کی بارگاہ میں توبہ کرے تو اللہ کریم اس کی توبہ قبول فرماتا ہے۔ (مسلم، ص 404، حدیث: 2418)

اللہ پاک سے دعا ہے کہ وہ ہمیں حرص و لالچ جیسی بری آفت سے محفوظ فرمائے۔

دل میں حرص و ہوس و خواہش دنیا نہ رہے آپ کا عشق رہے غیر کا خطرہ نہ رہے

آپ کی یاد ہو سر میں کوئی سودا نہ رہے دل مدینہ رہے اور دیر و کلیسا نہ رہے

نور ایماں سے مرا سینہ منور کردو دل میں عشق رخ پرنور کا جذبہ بھردو

لالچ ایک منفی انسانی صفت ہے جو حد سے زیادہ خواہش، خود غرضی اور دوسروں کے حقوق کو نظرانداز کرنے کی علامت ہوتی ہے۔ یہ صرف دولت تک محدود نہیں بلکہ طاقت، شہرت، مقام، اور مادی چیزوں کی انتہا درجے کی طلب کو بھی ظاہر کرتا ہے۔

لالچ کے نتائج اکثر نقصان دہ ہوتے ہیں۔ یہ انسان کو بے صبرا، بے رحم اور خود غرض بنا دیتا ہے، جس سے تعلقات خراب ہو سکتے ہیں اور اخلاقی زوال آ سکتا ہے۔ مذہبی، روحانی اور اخلاقی تعلیمات میں لالچ کو سختی سے ناپسند کیا گیا ہے کیونکہ یہ معاشرتی ناہمواری اور بدعنوانی کو جنم دیتا ہے۔

لالچ سے بچنے کے لیے قناعت، صبر اور دوسروں کے حقوق کا خیال رکھنا ضروری ہے۔ اگر ہم اپنے حصے پر قناعت کر لیں اور دوسروں کے ساتھ بانٹنے کا جذبہ پیدا کریں، تو لالچ کا زہر ختم ہو سکتا ہے اور معاشرہ زیادہ متوازن اور خوشحال بن سکتا ہے۔

اسلامی تعلیمات میں لالچ (طمع) کی مذمت اور اس سے بچنے کی تاکید کی گئی ہے۔ قرآن مجید اور احادیث مبارکہ میں لالچ کے نقصانات اور قناعت کی فضیلت پر روشنی ڈالی گئی ہے۔ چنانچہ اللہ تعالیٰ فرماتا ہے: وَ مَنْ یُّوْقَ شُحَّ نَفْسِهٖ فَاُولٰٓىٕكَ هُمُ الْمُفْلِحُوْنَۚ(۹) (پ 28، الحشر: 9) ترجمہ: اور جو اپنے نفس کے لالچ سے بچایا گیا تو وہی کامیاب ہے۔ مکمل

نبی کریم ﷺ نے فرمایا: لالچ سے بچو، کیونکہ تم سے پہلے لوگ لالچ کی وجہ سے ہلاک ہوئے۔ لالچ نے انہیں بخل پر اکسایا تو وہ بخیل بن گئے، قطع رحمی کا حکم دیا تو انہوں نے رشتہ توڑ دیئے اور گناہوں کا حکم دیا تو وہ گناہوں میں مبتلا ہو گئے۔ (ابو داود، 2/185، حدیث: 1698)

حضرت حکیم بن حزام رضی اللہ عنہ سے روایت ہے: انہوں نے رسول اللہ ﷺ سے کچھ مال طلب کیا، تو آپ نے عطا فرمایا۔ پھر دوبارہ مانگا، آپ نے پھر دیا۔ تیسری مرتبہ مانگنے پر آپ نے فرمایا: اے حکیم! یہ مال سرسبز اور میٹھا ہے۔ جو اسے دل کی بے رغبتی کے ساتھ لے، اس کے لیے اس میں برکت ہوتی ہے۔ اور جو اسے حرص اور لالچ کے ساتھ لے، اس کے لیے اس میں برکت نہیں ہوتی۔ وہ اس شخص کی مانند ہے جو کھاتا ہے مگر سیر نہیں ہوتا۔ اوپر والا ہاتھ (دینے والا) نیچے والے ہاتھ (لینے والے) سے بہتر ہے۔ (بخاری، 4/230، حدیث: 6441)

حضرت ابو ہریرہ رضی اللہ عنہ سے روایت ہے: نبی کریم ﷺ نے فرمایا: مال کی محبت اور ایمان کبھی بھی کسی بندے کے دل میں جمع نہیں ہو سکتے۔ (نسائی، حدیث: 2532)

ان احادیث سے واضح ہوتا ہے کہ لالچ انسان کو بخل، قطع رحمی اور گناہوں کی طرف مائل کرتا ہے، جبکہ قناعت برکت اور فلاح کا باعث بنتی ہے۔

اللہ پاک ہمیں لالچ سے بچنے کی توفیق عطا فرمائے۔

لالچ کی تعریف:کسی چیز میں حد درجہ دلچسپی کی وجہ سے نفس کا اس کی جانب راغب ہونا طمع یعنی لالچ کہلاتا ہے۔ (مفردات الفاظ القرآن، ص 524)

لالچ بہت ہی بری خصلت اور نہایت خراب عادت ہے اللہ تعالیٰ کی طرف سے بندے کو جو رزق و نعمت اور مال و دولت یا جاہ و مرتبہ ملا ہے اس پر راضی ہو کر قناعت کر لینا چاہئے۔ دوسروں کی دولتوں اور نعمتوں کو دیکھ دیکھ کر خود بھی اس کو حاصل کرنے کے پھیر میں پریشان حال رہنا اور غلط و صحیح ہر قسم کی تدبیروں میں دن رات لگے رہنا یہی جذ بہ حرص و لالچ کہلاتا ہے اور حرص و طمع در حقیقت انسان کی ایک پیدائشی خصلت ہے۔

یاد رکھئے! حرص اور لالچ دو ایسے الفاظ ہیں جن کا معنی ایک ہی ہے، لالچ اردو زبان کا جبکہ حرص عربی زبان کا لفظ ہے۔ حرص و لالچ کسی چیز کی مزید خواہش کرنے کا نام ہے اور یہ کسی بھی چیز کی ہو سکتی ہے، جیسا کہ حضرت مفتی احمد یار خان نعیمی رحمۃ الله علیہ ارشاد فرماتے ہیں: کسی چیز سے جی نہ بھرنے اور ہمیشہ زیادتی کی خواہش رکھنے کو حرص اور حرص رکھنے والے کو حریص (Greedy) کہتے ہیں۔ لہٰذا مزید مال کی خواہش رکھنے والے کو مال کا حریص کہیں گے، مزید کھانے کی خواہش رکھنے والے کو کھانے کا حریص کہا جائے گا، نیکیوں میں اضافے کے تمنائی (خواہش کرنے والے) کو نیکیوں کا حریص جبکہ گناہوں کا بوجھ بڑھانے والے کو گناہوں کا حريص کہیں گے۔

شیخ الحدیث حضرت علامہ عبد المصطفى اعظمی رحمۃ الله علیہ لکھتے ہیں: لالچ اور حرص کا جذبہ خوراک، لباس، مکان، سامان، دولت، عزت، شهرت الغرض ہر نعمت میں ہوا کرتا ہے۔ (جنتی زیور، ص 111)

مال کے حریص کے بارے ایک مقام پر حضور ﷺ نے ارشاد فرمایا: حضرت انس بن مالک رضی الله عنہ سے روایت ہے کہ حضور پاک ﷺ کا فرمان حقیقت نشان ہے: اگر ابن آدم کے پاس سونے کی دو وادیاں بھی ہوں تب بھی یہ تیسری کی خواہش کرے گا اور ابن آدم کا پیٹ قبر کی مٹی ہی بھر سکتی ہے۔ (مسلم، ص 404، حدیث: 2419)

لہذا حریصِ مال برا مگر حریصِ عمل اچھا، رب تعالیٰ نے اپنے محبوب ﷺ کی تعریف میں فرمایا: حريصٌ عليكم (پ11، التوبۃ:125) ترجمہ کنز الایمان: تمہاری بھلائی کے نہایت چاہنے والے۔ لیکن یہاں وہ لالچ کہ جس سے بچنے کا قرآن پاک میں فرمایا گیا اس کے بارے میں سنیں گی، چنانچہ الله تعالیٰ قرآن پاک میں ارشاد فرماتا ہے: وَ مَنْ یُّوْقَ شُحَّ نَفْسِهٖ فَاُولٰٓىٕكَ هُمُ الْمُفْلِحُوْنَۚ(۹) (پ 28، الحشر: 9) ترجمہ: اور جو اپنے نفس کے لالچ سے بچایا گیا تو وہی کامیاب ہے۔ مکمل

اس آیت مبارکہ میں لالچ سے بچنے والے کو کامیاب فرمایا گیا اور حدیث مبارکہ میں بھی طمع یعنی لالچ سے بچنے کا حکم فرمایا گیا:

نبی کریم ﷺ نے ارشاد فرمایا: لالچ سے بچتے رہو کیونکہ تم سے پہلی قو میں لالچ کی وجہ سے ہلاک ہوئیں، لالچ نے انہیں بخل پر آمادہ کیا تو وہ بخل کرنے لگے اور جب قطع رحمی کا خیال دلایا تو انہوں نے قطع رحمی کی اور جب گناہ کا حکم دیا تو وہ گناہ میں پڑ گئے۔ (ابو داود، 2/185، حدیث: 1698)

حضرت واثلہ رضی اللہ عنہ سے مروی ہے کہ لالچی ایسی کمائی طلب کرتا ہے جو حلال نہ ہو۔ (کنز العمال، جز: 3، 2/185، حديث: 7430)

حضرت انس رضی اللہ عنہ سے مروی ہے کہ طمع علماء کے دلوں سے علم شریعت کو دور کر دیتی ہے۔ (کنز العمال، جز:3، 2/198، حديث:7573) لہذا مال و دولت کی ایسی طمع (لالچ) جس کا کوئی دینی فائدہ نہ ہو، یا ایسی اچھی نیت نہ ہو جو لالچ ختم کر دے، نہایت ہی قبیح، گناہوں کی طرف رغبت دلانے والی اور ہلاکت میں ڈالنے والی بیماری ہے، مال و دولت کے لالچ میں پھسنے والا شخص ناکام و نامراد ہے، لالچ دنیا وآخرت میں ذلت و رسوائی کا سبب بنتا ہے، لالچ بے سکونی میں مبتلا کر دیتا ہے، لالچ اکیلا کر دیتا ہے، لالچ انسان کو کہیں کا نہیں چھوڑتا اور لالچ کا انجام انتہائی بھیانک ہوتا ہے۔ الغرض لالچ کی تباہ کاریاں اس قدر زیادہ ہیں کہ الامان و الحفيظ

لہٰذا عقلمندی اسی میں ہے کہ ہم لالچ اور دوسروں کے مال پر نظر رکھنے سے بچتے ہوئے قناعت اور سادگی کو اپنائیں، یوں ہماری زندگی (Life) بھی پرسکون گزرے گی اور دنیا و آخرت میں بھی ہمیں اس کی خوب خوب برکتیں نصیب ہوں گی۔

اللہ تعالیٰ ہمیں لالچ اور اس جیسی باطنی بیماریوں سے محفوظ فرمائے اور قناعت کی دولت سے نوازے۔ آمین بجاہ النبی الکریم ﷺ