والد کے ساتھ حسن سلوک اور اس کی اطاعت کرنے کا حکم دیا گیاہے، اسی مناسبت سے ترغیب کے لیے والد کے ساتھ حسن سلوک اور اطاعت کرنے کے متعلق چند احادیث پیش خدمت ہیں:

(1)حضرت عبداللہ بن عمر رضی اللہ عنہما سے روریت ہے، حضور اقدس صلَّی اللہ علیہ واٰلہٖ وسلَّم نے ارشاد فرمایا: زیادہ احسان کرنے والا وہ ہے جو اپنے باپ کے دوستوں کے ساتھ باپ کے نہ ہونے کی صورت میں احسان کرے۔(مسلم)

(2)حضرت عبد الله بن عمر رضی اللہ عنہ سے روایت ہے، رسول کریم صلَّی اللہ علیہ واٰلہٖ وسلَّم نے ارشاد فرمایا: پروردگار کی خوشنودی باپ کی خوشنودی میں ہے اور پروردگار کی ناراضی باپ کی ناراضی میں ہے۔(ترمذی، کتاب البر و الصلة، باب ماجاء من الفعل في هذا الوالدين)

(3)حضرت ابو ہریرہ رضی اللہ عنہ سے روایت ہے، رسول اللہ صلَّی اللہ علیہ واٰلہٖ وسلَّم نے ارشاد فرمایا: اللہ تعالیٰ کی اطاعت والد کی اطاعت کرنے میں ہے اور اللہ تعالیٰ کی نافرمانی والد کی نافرمانی میں ہے۔ (معجم اوسط)

(4)حضرت عبداللہ بن عمر رضی اللہ عنہماسے روایت ہے، رسول اللہ صلَّی اللہ علیہ واٰلہٖ وسلَّم نے ارشاد فرمایا: تین شخص جنت میں نہ جائیں گئے: ماں باپ کا نا فرمان، مَردوں کی وضع بنانے والی عورت اور دیوث۔ (معجم اوسط)

(5)حضرت ابوبکر رضی اللہ عنہ سے روایت ہے، حضور اکرم صلَّی اللہ علیہ واٰلہٖ وسلَّم نے ارشاد فرمایا:ماں باپ کی نافرمانی کے علاوہ اللہ تعالیٰ ہر گناہ میں سے جسے چاہے معاف فرما دے گا جبکہ ماں باپ کی نافرمانی کی سزا انسان کو موت سے پہلے زندگی میں مل جائے گی۔ (شعب الایمان، الخامس والخمسون من شعب الایمان فعل في عقوق الوالدین)

اللہ تعالیٰ ہمیں اپنے والدین کے ساتھ حسن سلوک کرنے اور ان کی اطاعت کرنے کی توفیق عطافرمائے۔ اٰمِیْن بِجَاہِ خاتَمِ النّبیّٖن صلَّی اللہ علیہ واٰلہٖ وسلَّم