اللہ پاک نے قرآن پاک میں بے شمار مقامات پر حضور نبی کریم صلی اللہ علیہ وسلم کی شان اور صفات بیان فرمائیں۔ جس طرح حضور کی صفات بے شمار ہیں اسی طرح شاہ بنی آدم حضور رحمت اللعالمین کے اسماء مبارکہ بھی قرآن پاک میں بے شمار ہیں۔ چنانچہ حضور نبی کریم صلی اللہ علیہ وسلم نے ارشاد فرمایا :

(1) میرے بہت نام ہیں: عن جبیر بن مطعم قال سمعت النبی صلَّی اللہ علیہ واٰلہٖ وسلَّم یقول ان لی اسماء انا محمد و انا احمد وانا الماحی الذی یمحوا اﷲ بی الکفر وانا الحاشر الذی یحشر الناس علٰی قدمی وانا العاقب الذی لیس بعدہ نبی ترجمہ: حضرت جبیر بن مطعم سے روایت ہے وہ فرماتے ہیں میں نے نبی کریم صلی اللہ علیہ واٰلہ وسلم کو فرماتے ہوئے سنا کہ میرے بہت نام ہیں میں محمد ہوں ،میں احمد ہوں،محو کرنے والا ہوں کہ اللہ میرے ذریعے کفر محو فرمائے گا اور میں جامع ہوں کہ لوگ میرے قدموں پر جمع کیے جائیں گے اور میں عاقب ہوں عاقب وہ جس کے بعد کوئی نبی نہیں۔ (مشکوٰة المصابیح ، 8 / 52 ،حدیث : 5522)

حضور صلَّی اللہ علیہ واٰلہٖ وسلَّم نے اپنے نام بیان فرمائے: عن ابی موسی الاشعری قال کان رسول اللہ صلی اللہ علیہ وسلم یُسمی لنا نفسہ اسماءً فقال انا محمد و احمد المقفّی والحاشر ونبیّ التوبۃ ونبیّ الرحمۃ رواہ مسلم ترجمہ حضرت ابو موسیٰ اشعری سے روایت ہے اور فرماتے ہیں کہ نبی کریم صلی اللہ علیہ وسلم ہم کو اپنے نام بیان فرمایا کرتے تھے کہ میں محمد ہوں، میں احمد ہوں، میں حاشر ہوں، میں توبہ کا نبی ہوں ، میں رحمت کا نبی ہوں۔( مشکوٰة المصابیح ، 8 / 52 ،حدیث : 5523)

اللہ پاک نے جو قرآن پاک میں حضور نبی کریم صلی اللہ علیہ وسلم کے نام بیان فرمائے ان میں سے بعض یہ ہیں:

(1) خَاتَمَ النَّبِیّٖنَؕ سب نبیوں سے پچھلے ۔(پ 22،الاحزاب:40)

(2) رَحْمَةً لِّلْعٰلَمِیْنَ(۱۰۷) : سارے جہان کیلئے رحمت ۔(پ 17،الانبیاء:107)

(3) شَاهِدًا:حاضر و ناظر۔(پ 26،الفتح:8)

(4) مُبَشِّرًا : خوشخبری دینے والا۔(پ 26،الفتح:8)

(5) نَذِیْرًاۙ(۸) :ڈر سنانے والا۔(پ 26،الفتح:8)

(6) الْمُزَّمِّلُۙ(۱) ترجَمۂ کنزُالایمان: جھرمٹ مارنے والے ۔(پ 29،مزمل:1)

(7) الْمُدَّثِّرُۙ(۱)ترجَمۂ کنزُالایمان: بالا پوش اوڑھنے والے ۔(پ 29،مدثر:1)

(8) اَحْمَدُؕ :وہ حمد والا ہوا۔(پ 28،الصف:6)

(9) رَّسُوْلَ اللّٰهِ :اللہ کے رسول ۔(پ 22،الاحزاب:40)

(10) نُوْرٌ:نورانیت والے آقا صلَّی اللہ علیہ واٰلہٖ وسلَّم۔(پ 6،المائدہ:15)

اعلی حضرت شاہ امام احمد رضا رحمۃُ اللہِ علیہ کیا خوب فرمائے ہیں :

شکل بشر میں نورِ الٰہی اگر نہ ہو!

کیا قدر اُس خمیرئہ مَا و مَدَر کی ہے

(حدائق بخشش ،ص206)

پَرتَوِ اسمِ ذاتِ اَحد پر درود

نسخۂ جامِعِیَّت پہ لاکھوں سلام

(حدائق بخشش ،ص297)