دارالمدینہ انٹرنیشنل اسلامک اسکول سسٹم کے ہر کیمپس، طلبہ، اساتذہ اور دیگر عملے کی کارکردگی کا وقتاً فوقتاًجائزہ لیا جاتا ہے۔اساتذہ کی انفرادی رپورٹس تیار کی جاتی ہیں۔انتظامی سہولیات کا جائزہ لیا جاتا ہے۔اس طرح نہ صرف اسکول اور اساتذہ کی بنیادی ضروریات کا علم ہوتا ہے بلکہ ان رپورٹس کے مطابق اساتذہ کو اپنے فرائض منصبی مزید بہتر انداز میں ادا کرنے کی تربیت دی جاتی ہے۔

گزشتہ دنوں نگران سندھ، دارالمدینہ مدنی رضا عطاری اور ریجنل ڈائریکٹر عبدالحمید شیخ عطاری نے سکھراور لاڑکانہ کا دورہ کیا۔ اس دورے میں جہاں اُنہوں نے تعلیمی اور انتظامی اُمور کے علاوہ اساتذہ کی کارکردگی کا جائزہ لیا وہیں مستقبل کی منصوبہ بندی کے تناظر میں اساتذہ کی تربیت بھی کی۔

اس دوران نگران سندھ نے لاڑکانہ میں نئے تعلیمی سال میں بوائز کو علیحدہ عمارت منتقل کرنے کے حوالے سے بنیادی سہولیات سے آراستہ بہترعمارتیں دیکھنے اور عملے کو بروقت کام مکمل کرنے کے لئے مفید مشورے بھی دیئے۔

مزیداُنہوں نے بذریعہ ویب لنک حیدرآباد، لاڑکانہ،سکھر، ٹنڈوآدم اور شہداد پورریجن کے اسلامی بھائیوں اور اسلامی بہنوں کا مشورہ بھی کیا اورانہیں اہل افراد کو نظر میں رکھنے کی ہدایت کی تاکہ خالی نشستوں پر ادارے کو ہمہ وقت باصلاحیت افراد میسر آسکیں۔

نگران سندھ نے اساتذہ اور پرنسپل روابط کو مزید مضبوط بنانے کی ضرورت پر زور دیا نیزمشورے میں رمضان عطیات جمع کرنے والے اسلامی بھائیوں اور بہنوں کی حوصلہ افزائی بھی کی ۔

اس دورے میں والدین سے ملاقات اور مشوروں کا سلسلہ بھی جاری رہا۔ دارالمدینہ کی مزید بہتری کے لئے والدین نے تجاویز بھی دیں جن پر عمل درآمد کرنے کی ہدایات دی گئیں۔اس موقع پر والدین نے اپنے تاثرات دیتے ہوئے کہا کہ وہ دارالمدینہ انٹرنیشنل اسلامک اسکول سسٹم کے نظام تعلیم کو پسند کرتے ہیں اوراپنی اولاد کی پاکیزہ دینی ماحول میں تربیت کے خواہش مند ہیں۔(رپورٹ:غلام محی الدین ترک اردو کانٹینٹ رائٹر سوشل میڈیا ڈیپارٹمنٹ دارالمدینہ ،ہیڈ آفس کراچی، ویب ڈیسک رائٹر:غیاث الدین عطاری)