علمِ دین وہ نور ہے جس سے جہالت کے اندھیرے دور ہوتے ہیں اور بےعملی کی نحوست کا خاتمہ ہوتا ہے۔اسی اہمیت کے پیشِ نظر عاشقان ِ رسول کی مدنی تحریک دعوت ِ اسلامی نے تعلیمی ،تدریسی اورتحقیقی شعبے قائم کئے جن کی بدولت ہر عمر کے فرد کو علمِ دین حاصل کرنے کے مواقع میسر آرہے ہیں اورجہالت کے اندھیرےدم توڑرہے ہیں۔

ان شعبہ جات میں سے ایک ”اَلْمَدِیْنَۃُ العِلْمِیّۃ“ بھی ہے جو 1422ھ مطابق2001ء سے کتب و رسائل کے ذریعے نیکی کی دعوت، اِحیائے سنّت اور اشاعتِ علمِ شریعت کےلئےکوشاں ہے ۔اَلْمَدِیْنَۃُ العِلْمِیّۃ کی کتب دلچسپ اورذہن کو اپنی جانب کھینچ لینے والے موضوعات، عمدہ اورآسان اسلوب ِتحریر اوراعلیٰ معیار کی وجہ سے عوام و خواص میں مقبول ہیں۔ اَلْمَدِیْنَۃُ العِلْمِیّۃ کے تحت ابتداءً6 شعبے قائم کئےگئے تھے ، دعوتِ اسلامی کے اس شعبے نے بھی ترقی کی اور وقت گزرنے کے ساتھ ساتھ ذیلی شعبہ جات میں اضافہ ہوتاگیا ،کچھ دن پہلے تک اَلْمَدِیْنَۃُ العِلْمِیّۃ کےتحت16ذیلی شعبے قائم تھے۔ حال ہی مجلس اَلْمَدِیْنَۃُ العِلْمِیّۃ نےایک نئے شعبے کا اضافہ کرتے ہوئے 17 واں شعبہ بنام ”کتب فقہ شافعی“ کا آغاز کیا ہے جس میں فقہ شافعی پر کتابیں تحریر کی جارہی ہیں۔

اَلْمَدِیْنَۃُ العِلْمِیّۃ کے تمام شعبہ جات کے نام یہ ہیں:

(1)فیضان قراٰن (2)فیضان حدیث (3)شعبہ کتب اعلیٰ حضرت (4)شعبہ تراجم کتب (5)شعبہ درسی کتب (6)شعبہ اصلاحی کتب (7)شعبہ فیضان مدنی مذاکرہ (8)شعبہ تخریج (9)شعبہ فیضان صحابہ و اہل بیت (10)شعبہ فیضان صحابیات و صالحات (11)شعبہ فیضان اولیا و علما (12)شعبہ فیضان امیر اہل سنت (13)شعبہ بیانات دعوت اسلامی (14)شعبہ رسائل دعوت اسلامی (15)شعبہ مدنی کاموں کی تحریرات (16)شعبہ تفتیشِ کُتُب (17)شعبہ کتب فقہ شافعی

اَلْحَمْدُللہ عَزَّوَجَلَّ تبلیغِ قرآن وسُنّت کی عالمگیر غیر سیاسی تحریک’’دعوتِ اسلامی‘‘نیکی کی دعوت، اِحیائے سنّت اور اشاعتِ علمِ شریعت کو دنیا بھر میں عام کرنے کا عزمِ مُصمّم رکھتی ہے، یہ اس وقت دنیا کے 200 سے زائد ممالک میں،تقریباً100 شعبوں کے ذریعے دینِ اسلام کی خدمت کے لئے کوشاں ہے۔ اِنہی شعبوں میں سے ایک’’ مجلس المدینۃ العلمیۃ‘‘ بھی ہے , جو دعوتِ اسلامی کے عُلمائےکرام کَثَّرَ ھُمُ اللّٰہُ السَّلام پر مشتمل ہے، جس نے خالص علمی اوراشاعتی کام کا بیڑا اُٹھایا ہے۔

اس کے 17 شعبے ہیں۔شعبہ درسی کتب اِن میں سے ایک ہے جودرسِ نظامی (عالم کورس ) کی کتب پر کام کررہاہے۔ درسِ نظامی کےآٹھ سالہ نصاب میں اسّی 80 کے قریب کتب پڑھائی جاتی ہیں۔ المدینہ العلمیہ کے شعبہ درسی کتب نے ان میں سے 56 کتب پر کام مکمل کر کے شائع کردیا ہے۔ نیزرواں سال2020 میں ان شاء اللہ عزوجل 5 سے زائد کتب چھپنے کے لئے پریس پر جائیں گی۔ان کتب نے ملک وبیرونِ ملک سے خوب دادِ تحسین حاصل کی ہے۔ اور علماء کرام وطلبہ دین نے ان کے بارے میں اچھے تاثرات دیئے ہیں۔ ان میں سے اکثر کتب عربی میں اور کچھ ابتدائی کتب اردو اور فارسی میں بھی ہیں۔

ہم نے حتی المقدور کتب کو شرعی وفنی اعتبار سے جانچ کر شائع کیا ہے۔ شرعی اعتبار سے دارالافتاء اہلسنت نے تفتیش کی ہے اور فنی اعتبار سے اہلِ فن اساتذہ کرام نے جانچاہے۔نیز کتب کو جدید دور کے اعتبار سے دلکش وجاذبِ نظر بنانے کے لئے فور کلر (چاررنگی)یا ٹو کلر (دورنگی) بھی شائع کیا ہے اور کورل کی مدد سے خوبصورت ڈیزائننگ بھی کی گئی ہے۔ الغرض ہماری بھرپور کوشش رہی ہے کہ قارئین کو صحت مند وخوبصورت مواد فراہم کیا جائے۔ اللہ کریم سے دعا ہے کہ کتب کے اس ہار کو ہماری جیت کا ذریعہ بنائے۔ وما ذلک علی اللہ بعسیر۔

درسی کتب کم وبیش 19مختلف مراحل سے گزر کر شائع ہونے کے قابل ہوتی ہیں، یہ مراحل درج ذیل ہیں۔

(۱)۔جمع نسخہ جات (مطبوعات ومخطوطات)(2)۔جمعِ حواشی وشروحات(3)۔تقابلِ متن (4)۔تقابل حاشیہ(5)۔انتخابِ مواد برائے حاشیہ وشرح(6)۔مفتی بہ اقوال(7)۔اصح الاقوال(8)۔تخریج آیات (9)۔تخریجِ احادیث(10)۔وضعِ اعراب(11)۔مشکل الفاظ کے معانی(12)۔بین السطور (13)۔فرقِ نسخ(14)۔کورل(15)۔پہلی پروف ریڈنگ (16)۔دوسری پروف ریڈنگ (17)۔تیسری پروف ریڈنگ(18)۔شرعی تفتیش (19)۔پریس پر روانگی

(1)جمع نسخہ جات (مطبوعات ومخطوطات)

جس کتاب کو شائع کرناہوتا ہے سب سے پہلےاسکے مختلف نسخہ جات (جو کہ مطبوعات یا مخطوطات کی شکل میں ہوتے ہیں) حاصل کئے جاتے ہیں۔ پھر صحیح ترین نسخے، مطبوعے یا مخطوطے کو معیار بنا کر اس پر اعتماد کیا جاتا ہے تاہم دیگر کوبھی مدنظر رکھا جاتا ہے۔ نسخہ جات، المدینۃ العلمیہ کی لائبریری یا ملک وبیرون ملک کے مکتبوں اور انٹرنیٹ وغیرہ سے حاصل کئے جاتے ہیں۔

(2)جمعِ حواشی وشروحات

اگر اس کتاب پر حاشیہ یا شرح لکھنے کی ضرورت ہو تو اس کتاب کے مختلف حواشی وشروحات جمع کی جاتی ہیں۔ پھر ان میں سے چن چن کر حواشی لگائے جاتے ہیں یا شرح لکھی جاتی ہے۔غیر ضروری ابحاث وطوالت سے اجتناب کیا جاتا ہے۔

(3)تقابلِ متن

پھر صحیح ترین نسخے سے کتاب کا تقابل کیا جاتا ہے۔اسطرح کتاب کافی حد تک کتابت وغیرہ کی اغلاط سے پاک ہو جاتی ہے۔

(4)تقابل حاشیہ

متن کے تقابل کے بعد حاشیہ یا شرح کا بھی تقابل کیا جاتا ہے۔ اسطرح متن ، حاشیہ اور شرح تینوں سے اغلاط نسبتا رفع ہو جاتی ہیں۔

(5)انتخابِ مواد برائے حاشیہ وشرح

حاشیہ لگانے یا شرح لکھنے سے پہلے مواد کا انتخاب کیا جاتا ہے اور صحیح ترین، مختصر اور جامع عبارات کے ذریعے متن کی وضاحت کی جاتی ہے تاکہ پڑھنے والے کو تشنگی یا غیر ضروری طوالت سے اکتاہٹ محسوس نہ ہو۔

(6)مفتی بہ اقوال

اگر متن میں کوئی غیر مفتی بہ قول پایا جائے تو حاشیہ یا شرح میں اسکی نشاندہی کر کے مفتی بہ قول بھی ذکر کرنے کا التزام کیا جاتا ہے۔

(7)اصح الاقوال

اگر کسی چیز کے بارے میں مختلف اقوال ہوں تو صحیح ترین قول کی نشاندہی کرنے کی حتی الامکان کوشش کی جاتی ہے۔

(8)تخریج آیات

کتاب میں جہاں بھی آیاتِ قرآنیہ ہوں وہاں اس بات کا التزام کیا جاتا ہے کہ انکا پورا حوالہ دیا جائے یعنی پارہ، سورت اور آیت نمبر ذکر کر دیا جائے۔ نیز اردو کتب میں ترجمہ کنز الایمان بھی نقل کر دیا جاتا ہے۔

(9)تخریجِ احادیث

آیات کریمہ کے حوالوں کے ساتھ ساتھ احادیث مبارکہ کا بھی مکمل حوالہ درج کر دیا جاتا ہے تاکہ ضرورت کے وقت مراجعت کی جاسکے۔اور احادیث کی فنی حیثیت بھی معمول ہو جائے۔

(10)وضعِ اعراب

مشکل وغیرمانوس الفاظ پر اعراب کا التزام کیا جاتا ہے۔اس طرح صحیح تلفظ سے قارئین کو روشناس کرایا جاتا ہے۔

(11)مشکل الفاظ کے معانی

ضرورت کے وقت مشکل الفاظ کے معانی بھی آسان کر کے لکھ دیئے جاتے ہیں۔تاکہ کسی ایک لفظ کے سمجھ میں نہ آنے کی وجہ سے پوری عبارت کے فہم سے محرومی نہ ہو۔

(12)بین السطور

عبارت کو کم وقت میں حل کرنے کے لئے متعدد جگہوں پر بین السطور لگا کر آسانی پیدا کی جاتی ہے تاکہ حاشیہ وشرح میں حل تلاش نہ کرنا پڑے اور وقت کی بچت ہو۔ نیز لغت کی طرف مراجعت بھی نہ کرنی پڑے۔

(13)فرقِ نسخ

اگر کتاب کی عبارت مختلف نسخوں میں کچھ فرق کے ساتھ ہو تو عند الضرورۃ اسکی وضاحت کر دی جاتی ہے۔کیونکہ بعض عبارات بعض کی نسبت اقرب الی الفہم ہوتی ہیں۔

(14)کورل

مندرجہ بالا مراحل وغیرہ کے بعد کتاب کو ڈیزائننگ یعنی تزیین وآرائش کے لئے کورل پر بھیج دیا جاتا ہے اوراس میں مختلف قسم کے ڈیزائن ورنگ بھر دیئے جاتے ہیں۔

(15)پہلی پروف ریڈنگ

کتاب کو تیار کرتے ہی چھپنے کے لئے نہیں بھیج دیا جاتا بلکہ کم وبیش تین مرتبہ اسکی پروف ریڈنگ کی جاتی ہے۔ پہلی پروف ریڈنگ عموما کمپیوٹر پر ہی کر لی جاتی ہے۔

(16)دوسری پروف ریڈنگ

دوسری پروف ریڈنگ کورل پر بھیجنے سے پہلے پرنٹ پر کی جاتی ہے۔ اسطرح کورل پر کم سے کم کریکشن لگانے پڑتی ہیں۔

(17)تیسری پروف ریڈنگ

تیسری پروف ریڈنگ کورل کی ڈیزائننگ کے بعد ہوتی ہے یہ عموما سرسری طور پر ہوتی ہے اور اگر ضرورت ہو تو گہری نظر سے پوری کتاب کی پروف ریڈنگ کی جاتی ہے۔

(18)شرعی تفتیش

ان تمام مراحل کے بعد کتاب کو دار الافتاء اہلسنت کے علمائے کرام ومفتیانِ عظام کے بارگاہ میں شرعی تفتیش کے لئے پیش کیا جاتا ہے۔ یہ حضرات کتاب کو شرعی اعتبار سے دیکھ کر اس میں ضروری کمی، بیشی اور تبدیلی وغیرہ کے بعد اسکی اشاعت کی اجازت مرحمت فرماتے ہیں۔

(19)پریس پر روانگی

اب بالآخر ان تمام تر مراحل کے بعد کتاب زیورِ طبع سے آراستہ ہونے یعنی چھپنے کے لئے پریس پر چلی جاتی ہے اور مکتبہ المدینہ اسے عمدگی کے ساتھ شائع کرکے دنیا بھر کے طول وعرض میں بھیج دیتا ہے۔

کراچی: (ویب ڈیسک) گزشتہ روز المدینۃ العلمیہ (Islamic Research Center) کے شعبہ ذمہ داران کا مدنی مشورہ دعوتِ اسلامی کے عالمی مدنی مرکز فیضانِ مدینہ کراچی میں منعقد ہوا۔ مدنی مشورے میں دعوتِ اسلامی کی مرکزی مجلسِ شوریٰ کے رکن حاجی ابوماجد محمد شاہد عطاری مدنی نے ذمہ داران کی رہنمائی فرمائی جبکہ ذ مہ داران نے رکنِ شوریٰ کو اپنے شعبے کی سابقہ کارکردگی کے متعلق بریفنگ دی۔

اس موقع پر رکنِ شوریٰ کا کہنا تھا کہ بچوں بچیوں کی اسلامی تربیت کے لئے ایک نیا شعبہ ”شعبۂ اطفال“ بنایا گیا ہے جس کے تحت ایسا لیٹریچر تیار کیا جائےگا جس میں اسلامی عقائد، روزمرہ کے مسنون اعمال، ضروری آداب واحکام ، اچھے اخلاق کی تعلیم و ترغیب اور بُرے اخلاق سے حفاظت کے لیے ان کی نشاندہی ، اسلامی تاریخ سے منتخب اصلاحی واقعات ،دلچسپ کہانیاں اور وہ سب کچھ جو بچوں کی تعلیم و تربیت کے لیے ضروری ہے وہ سب کچھ اس لیٹریچر کا حصہ ہوگا۔

رکنِ شوریٰ نے مزید بتایا کہ المدینۃ العلمیہ کا ایک اور شعبہ بنام ”فقہِ شافعی“ قائم کیا گیا ہے جس میں مذہبِ شافعی کی کتب پر تحریر و تصنیف کا کام کیا جائے گا۔ یہ شعبہ فیصل آباد میں موجود المدینۃ العلمیہ کی شاخ میں قائم کیا گیا ہے۔

انہوں نے مزید کہا کہ اگلے سال دعوتِ اسلامی کا 40واں یومِ تاسیس منایا جائے گا، اس موقع پر علمیہ کا اداراہ”دعوتِ اسلامی نمبر“ شائع کرنے کا ارادہ رکھتا ہے جس کے لئے ابھی سے تیاریاں شروع کی جاچکی ہیں۔

رکنِ مجلس المدینۃ العلمیہ محمد عدنان چشتی مدنی نے بتایا کہ بخاری شریف کی شرح پر کام شروع ہوچکا ہے، کتاب الایمان تک شرح لکھی جاچکی ہے۔ اِنْ شَآءَ اللہ عَزَّ وَجَلَّ یہ علمی خزانہ 10 جلدوں پر مشتمل ہوگا۔

ذمہ دار شعبہ کتبِ اعلیٰ حضرت محمد کاشف سلیم مدنی کا کہنا تھا کہ حواشی ہدایۃ اور فتح القدیر کا کام مکمل ہوچکاہے، کتاب کی اشاعت جلد ہوجائے گی۔

شعبہ فیضانِ حدیث کے ذمہ دار محمد اعجاز نواز مدنی نے کہا ریاض الصالحین کی 6 جلدیں شائع ہوچکی ہیں، ساتویں طباعت کے مرحلے میں ہے جبکہ 8ویں اور 9ویں جلد پر ابھی تحریر ی کام جاری ہے۔

انہوں نے مزید بتایا کہ ریاض الصالحین کی مدد سے تین جلدوں پر ایک کتاب تیار کی جارہی ہے جس میں صرف صحاح ستہ کی احادیث مذکور ہوں گی۔ ہمارا ہدف ہے کہ جنوری 2021 تک یہ کتاب مکمل ہوجائے۔ 

16 ستمبر 2020ء کو عالمی مدنی مرکز فیضان مدینہ کراچی میں دعوت اسلامی کے شعبہ المدینۃ العلمیہ کا مدنی مشورہ ہوا جس میں رکن شوریٰ حاجی ابو ماجد محمد شاہد عطاری مدنی، ناظم المدینۃ العلمیہ محمد آصف خان عطاری مدنی، اراکین مجلس اور المدینۃ العلمیہ کے تمام اسٹاف نے شرکت کی۔  

مرکزی مجلس شوریٰ کے نگران مولانا محمد عمران عطاری مَدَّظِلُّہُ الْعَالِی نے المدینۃ العلمیہ میں ہونے والے تحریری کاموں کا جائزہ لیا اور کتابیں تحریر کرنے کے حوالے سے مدنی پھول دیئے۔ اس موقع پر نگران شوریٰ کا کہنا تھا کہ المدینۃ العلمیہ ایک اسلامک ریسرچ سینٹر ہے جہاں قرآن وتفسیر، احادیث، سیرتِ مصطفیٰ ﷺ اور بزرگان دین رحمۃ اللہ علیہم اَجْمعین،درس نظامی میں پڑھائی جانے والی اور مسلمانوں کی اصلاح کے لئے کتابیں تصنیف و تالیف کی جاتی ہیں۔ نگران شوریٰ نے مزید کہا کہ مکتبۃ المدینہ میں سیل ہونے والی اکثر کتب المدینہ العلمیہ کی شائع کردہ ہوتی ہیں۔

اس مدنی مشورے میں نگران شوریٰ نے اسلامی بھائیوں کی جانب سے ہونے والے سوالات کے جوابات بھی دیئے۔

دعوت اسلامی کی مجلس المدینۃ العلمیہ کے تحت 12اگست2020ء بروز بدھ فیصل آباد زون سوساں روڈ فیضان مدینہ میں مدنی مشورے کا سلسلہ ہوا جس میں المدینۃ العلمیہ فیصل آباد کے تمام اسلامی بھائی اور شعبہ ذمہ داران نے شرکت کی ۔

مرکزی مجلس شوریٰ کے رکن ابو ماجد محمد شاہد عطاری المدنی نے تجہیل علم کی آفات میں سے ہے کہ موضوع پر بیان فرماتے ہوئے تجہیل کرنے سے بچنے کے مدنی پھول دیتے ہوئے اس کی آفات سے بچنے کا ذہن دیا ۔(رپورٹ:محمد ذیشان المدنی المدینۃ العلمیہ) 

ماہنامہ فیضان مدینہ کےعلمائے کرام نے مختلف مضامین سے ”عقیدہ ختم نبوت“ پر چند موضوعات کو منتخب کر کے ایک رسالہ بنام ”عقیدہ ختم نبوت“تیار کیا ہے جس میں (”عمارتِ نبوت کی آخری اینٹ“،”اللہ کے آخری نبی محمد عربی صلَّی اللہ علیہ واٰلہٖ وسلَّم “،” مرزائی ، احمدی اور قادیانی“،” خاتم النبیین محمد مصطفیٰصلَّی اللہ علیہ واٰلہٖ وسلَّم“ ، ”گوا کی گواہی“) کے موضوعات شامل کئے گئے ہیں۔

رسالہ ”عقیدہ ختم نبوت “ پر کام مکمل ہونے کے بعد مجلس آئی ٹی کی جانب سے اسے عوت اسلامی کے ویب سائٹ پر اپلوڈ کردیا گیا۔

اس رسالے کو ڈاؤن لوڈ کرنے کے لئے نیچے دیئے گئے لنک پر کلک کیجئے:

https://www.dawateislami.net/bookslibrary/ur/aqeeda-khatam-e-nabuwat

ہمارے پیارے آقا صلَّی اللہ علیہ واٰلہٖ وسلَّم اللہ پاک کے آخری نبی ہیں اور آپ کے زمانے اور بعد میں بھی قیامت تک کوئی نیا نبی نہیں ہوسکتا ”یہ عقیدہ ٔ ختم نبوت “ کہلاتا ہےاور اگر کوئی شخص مَعَاذ َاللہ نبوت کا دعوٰ ی کرے یا نبی پاک صلَّی اللہ علیہ واٰلہٖ وسلَّم کے زمانے میں یا بعد میں کسی کو نبی مانے یا یہ نظریہ رکھےکہ کوئی اور بھی نبی ہوسکتا ہےتو ایسا شخص دائرۂ اسلام سے خارج ہے۔

مسلمانوں کے عقیدوں کے تحفظ اور فتنہ قادنیت کو کچلنے کے لئے صدر الشریعہ مفتی محمد امجد علی اعظمی رحمۃ اللہ علیہ نےاپنی کتاب ”بہار شریعت“ کے پہلے حصے میں اہلسنت کے عقیدے بیان کئے ہیں۔

دعوت اسلامی کی مجلس ”المدینۃ العلمیہ “ کے علمائے کرام نے بہار شریعت کے اس حصے میں ختم نبوت کے حوالے سے موجود عقیدہ اہلسنت کورسالے کی شکل دیکر رسالہ بنام ”عقیدہ ختم نبوت اورصدرالشریعہ“ تیار کیا ہے۔

المدینۃ العلمیہ کے علمائے کرام نے اس رسالے میں تخریجوں کے ساتھ ساتھ اصل کتابوں کی اسکیننگ بھی حاشیے میں شامل کی ہے تاکہ انکار کی گنجائش نہ رہے۔

المدینۃ العلمیہ سے رسالہ تیار ہونے کے بعد مجلس آئی ٹی کی جانب سے اس رسالے ”عقیدہ ختم نبوت اورصدرالشریعہ“ کو دعوت اسلامی کے ویب سائٹ پر اپلوڈ کردیا گیا ہے۔

اس رسالے کو ڈاؤن لوڈ کرنے کے لئے نیچے دیئے گئے لنک پر کلک کیجئے:

https://www.dawateislami.net/bookslibrary/ur/aqeeda-khatam-e-nabuwat-aur-sadr-ush-shariah

حضورخاتم النبیین  صلَّی اللہ علیہ واٰلہٖ وسلَّم کا آخری نبی ہوناضروریات دین سے ہے اس کا منکر یا اس میں شک و شبہہ کرنے والا کافرو مرتد ہے۔

اسی موضوع کی مناسبت سے اعلیٰ حضرت امام احمد رضا خان رحمۃ اللہ علیہ نےایک رسالہ بنام ”المبین ختم النبیین“ تحریر فرمایا جس میں سُوْرَۃُ الْاَحْزَابْ کی آیت مبارکہ ”وَلٰکِنْ رَّسُوْلَ اللہِ وَخَاتَم َالنَّبِیّٖنَ“کے متعلق کئے گئے سوالات کے جوابات دیئے گئے ہیں۔اس رسالے میں اعلیٰ حضرت رحمۃ اللہ علیہ نے آیات و احادیث اور کتبِ فقہ سے قطعی اور صریح دلائل کی روشنی میں یہ بات ثابت فرمائی کہ آیت مبارکہ حضور صلَّی اللہ علیہ واٰلہٖ وسلَّم کے خاتم النبیین ہونے اور آپ کے زمانے یا آپ کے بعد تاقیامت کسی کو نبوت نہ ملنےپر دلالت کرتی ہے۔

دعوت اسلامی کی مجلس شعبہ ”المدینۃالعلمیہ“میں اس رسالے ”المبین ختم النبیین“ پر درج ذیل کام کئے گئے ہیں:

٭رسالے کا پانچ مختلف مطبوعہ نسخوں سے تقابل کیا گیاہے۔

٭آیات و احادیث، فقہ و اصول فقہ اور ان کے علاوہ دیگر کتب کے حوالہ جات کی حتّٰی الْمَقْدُوْرتخریج کی گئی ہے۔

٭مشکل الفاظ کی تسہیل اور مشکل الفاظ پراعراب لگائےگئےہیں۔

٭اس رسالے میں آیت کا ترجمہ کنز الایمان سے لیا گیاہے جسے منقش{}ڈالا گیا ہے۔

اس رسالے پر کام مکمل ہونے کے بعد مجلس آئی ٹی کی جانب سے اس رسالے”المبین ختم النبیین“کو دعوت اسلامی کے ویب سائٹ پر اپلوڈ کردیا گیاہے۔

اس رسالے کو ڈاؤن لوڈ کرنے کے لئے نیچے دیئے گئے لنک پر کلک کیجئے:

https://www.dawateislami.net/bookslibrary/ur/al-mubeen-khatmannabiyeen

دعوت اسلامی کے تحقیقی و علمی ادارے “المدینۃ العلمیہ“ کا ایک شعبہ”بیانات دعوت اسلامی“ بھی ہے۔ اس شعبے میں ہفتہ وار اور دیگر اجتماعات کے لئے بیانات تیار کئے جاتے ہیں۔ دعوت اسلامی کے اجتماعات کے لئے اس شعبے میں اب تک 450 بیانات تیار کئے جاچکے ہیں۔

”شعبہ بیانات دعوت اسلامی “نے ہر اسلامی مہینے کے بیانات کو جمع کرکے ایک کتاب کی صورت میں دعوت اسلامی کے ویب سائٹ پر پیش کرنے کا سلسلہ جاری کیا ہوا ہے۔اس شعبےکی طرف سے اب تک جماد الاولیٰ کے 22 بیانات، جماد الاخریٰ کے 21 بیانات،رجب المرجب کے 26 بیانات، شعبان المعظم کے 21 بیانات اور رمضان المبارک کے 26 بیانات کے نام سے پانچ ضخیم کتابیں دعوت اسلامی کی ویب سائٹ پر اپلوڈ کردی گئیں ہیں۔ویب سائٹ سے ان کتابوں کو ڈاؤن لوڈکرنے والوں کی تعداد 14 ہزار سے زائد ہوچکی ہے۔

حال ہی میں ”شعبہ بیانات دعوت اسلامی “ نے ایک کتاب بنام ”شوال المکرم کے 21 بیانات“ کا مجموعہ تیار کیا ہے۔ اس کتاب میں اعلیٰ حضرت کا اعلیٰ کردار،فیضان امام بخاری،مدینے فضائل،شہدائے احد کی قربانیاں ،اسلام میں عورت کا مقام اور دیگر موضوعات پر بیانات موجود ہیں۔

اس کتاب کی چند خصوصیات:

٭اس مجموعے میں وہ بیانات بھی شامل ہیں جو کافی پہلے تیار ہوئے ٭اس دوران دعوت اسلامی کی اصطلاحات بھی تبدیل ہوئی ہیں اور بیانات کے انداز میں کافی تبدیلی آئی ہے۔وہ اصلاحات وغیرہ ان بیانات میں برقرارہیں۔استفادہ کرنے والے قارئین بالخصوص مبلغین ان تبدیلیوں کا خیال رکھیں ٭ہفتہ وار اجتماع میں ہونے والے بیان کے آخر میں چھ دورود پاک اور دو دعائیں بھی شامل ہوتی ہیں،تکرار سے بچنے کے لئے ان تمام بیانات سے درود پاک اور دعائیں ختم کردی گئی ٭بیان کا نام اورجس تاریخ کو بیان ہفتہ وار اجتماع ہوا تھاوہ ہر بیان کے ساتھ لکھ دیا گیا ٭کتاب کے شروع میں اجمالی فہرست بھی بڑھائی گئی ہےتاکہ استفادہ میں آسانی رہے ٭طوالت و تاخیر سے بچنے کے لئےکتاب کے دیگر لوازمات (تفصیلی فہرست، مآخذ، مراجع وغیرہ) شامل نہیں کئے گئے۔

کتاب”شوال المکرم کے 21 بیانات“ کو پڑھنے کے لئے دعوت اسلامی کی ویب سائٹ سے ڈاؤن لوڈ کیجئے:

Download Now

دعوتِ اسلامی کی مجلس المدینۃ العلمیۃ کے تحت 5مارچ2020ء بروز جمعرات فیصل آباد میں مدنی حلقہ ہوا۔ مدنی حلقے میں مجلس المدینۃ العلمیۃ فیصل آباد  کے تمام اسلامی بھائیوں نے شرکت کی۔ اس موقع پر رکن شوریٰ حاجی جنید عطاری مدنی نے اسلامی بھائیوں کی تربیت فرمائی۔ (رپورٹ:محمد ذیشان عطاری ، مجلس المدینۃ العلمیۃ فیصل آباد) 

2020ء میں مجلس المدینۃ العلمیۃ کا65 سےزائدکتب ورسائل کامیگا پروجیکٹ مکمل کرنے کاعزم

(تفصیلی رپورٹ)

عالمگیرتحریک دعوتِ اسلامی کاشعبۂ تصنیف وتالیف ”المدینۃ العلمیۃ“108شعبہ جات میں سے ایک ہے ۔دورِحاضر کےمطابق علمِ دین کے فروغ کے لئے 2001ء میں یہ شعبہ قائم ہوااور اپنے قیام سے لے کر اب تک عوام وخواص کو اہم ترین موضوعات پر567 کتب و رسائل فراہم کرچکا ہے،جن میں کئی نصابی کتابیں بھی شامل ہیں ۔عمدہ اورمعیاری کتابوں کی مسلسل فراہمی اِس شعبے کے منظم اور باصلاحیت ہونے کی روشن دلیل ہے ۔

المدینۃ العلمیۃ اپنی کتابوں کےذریعےشخصیت سازی کےرہنمااصول،اسلامی اقدار ،حقانیت ِاسلام اوراسلام کی روشن تعلیمات ہرطبقے تک پہنچانے کے لئےپُرعزم ہےلہٰذا ہرسال کی طرح 2020ء میں بھی معیاری، معلوماتی اورمفیدترین کتب ورسائل شائع کرنے کا ایک میگا پروجیکٹ بنایا گیاہےجس میں تقریباً 65 سے زائد کتب ورسائل شامل ہیں۔ المدینۃ العلمیۃ کی جانب سے دی گئی رپورٹ کے مطابق 2020ء میں شرح معانی الآثار، آثارُ السنن، قدوری مع خلاصۃ الدلائل، مسند امام اعظم ، توضیح تلویح، مؤطا امام مالک، مؤطا امام محمد،حلیۃ الاولیا مترجم بنام اللہ والوں کی باتیں جلد 9 اور 10، فیضان ریاضُ الصالحین جلد 9 سمیت 65 سے زائد کتابیں مکمل کی جائیں گی اوراس میگاپروجیکٹ کومکمل کرنے کے لئے المدینۃ العلمیۃ کے 106 علماء کرام 15 شعبوں میں تقسیم ہوکر بھرپور کوشش کریں گے۔

قارئین کومستندکتب کی دستیابی کے باعث اربابِ قلم، شائقینِ کتب اور زندگی کے ہر شعبےسے وابستہ قارئین نے المدینۃ العلمیۃ کی آنے والی کتابوں کو پذیرائی بخشی اور اس کی کئی کتابوں کےدرجن سےزائدایڈیشن لاکھوں کی تعداد میں شائع ہوئے۔بعض کتب ورسائل کے ایڈیشن اورنسخوں کی تعداد تو حیرت انگیر اورتعجب خیز ہے مثلا بچوں کے لیے لکھی کئی کتاب ’’اسلامی کی بنیادی باتیں (تین حصے)‘‘ 2012 ءسے اب تک34،ایڈیشن میں  12 لاکھ سے زیادہ کی تعداد میں چھپ چکی ہے ۔اسی طرح کتاب’’ سنتیں اورآداب ‘‘2007 سے اب تک17،ایڈیشن میں تقریبا 2 لاکھ 10 ہزارکی تعداد میں عوام وخاص کےہاتھوں میں پہنچ چکی ہے۔

واضح رہے کہ المدینۃ العلمیۃشروع سے اب تک علومِ قرآن وحدیث،فقہ،تصوف و روحانیت، اسلامی تاریخ اور دیگر موضوعات پر 570کتب ورسائل تصنیف وتالیف کرچکا ہے جبکہ اسلامک کلچر اور بچوں کی کہانیوں پر مشتمل کتابیں اور اسکول و کالجز کےلئےقرآنیات کانصاب بھی فراہم کیاجا چکا ہے۔ نگران المدینۃ العلمیۃ، رکنِ شوریٰ حاجی ابوماجد محمد شاہد عطاری مدنی ہیں جن کی زیرِ نگرانی بہت سی کتابوں کے نئے منصوبے شروع کئے گئے ہیں جبکہ بہت سے منصوبے پایہ تکمیل تک پہنچ چکے ہیں، مکمل ہونے والے منصوبوں میں سے 4 کا مختصرتعارف ملاحظہ کیجئے۔

(1) بہار شریعت:فقہ حنفی کی مشہور ومعروف کتاب”بہارِ شریعت“ہرفرد کی ضرورت ہے،اسی ضرورت کے پیشِ نظر2006ء میں اِس لاجواب فقہی انسائیکلوپیڈیا پردورِ حاضر کےمطابق کام کاآغاز ہوا،اِس کے لئے6علمائےکرام کاانتخاب ہوا اور آخر کار2011ء میں یہ شاہکار 3626صفحات پر مشتمل6 ضخیم جلدوں کی صورت میں عوام وخواص کے ہاتھوں پہنچااور اِس قدر مقبول ہوا کہ اب تک مختلف انداز میں37ایڈیشن شائع ہو چکے ہیں ۔بہارِ شریعت سے متعلق دو اہم شخصیات کے تاثرات ملاحظہ کیجئے :

(1)جگر گوشۂ صدرُ الشَّریعہ ،حضرت مولانا قاری محمد رضاء المصطفٰی اعظمی: دعوتِ اسلامی نے بہارشریعت کی تسہیل و تخریج کرکے اس کے حق کو ادا کردیا۔ دعوتِ اسلامی کے شعبہ المدینۃ العلمیۃ کی اس شاندار کاوش کو دیکھ کر یقیناً صدر الشریعہ بدرالطریقہ حکیم ابوالعلیٰ مفتی محمد امجد علی اعظمی علیہ رحمۃ اللہ علیہ کی روح پرنور اعلیٰ علیین میں خوش ہورہی ہوگی، کیونکہ صدرُ الشریعہ رحمۃ للہ علیہ نے فرمایا تھا کہ ” اگر اورنگزیب عالمگیر علیہ الرحمۃ میری اس کاوش (بہارِ شریعت) کو دیکھ لیتے تو یقیناً اسے (فقہ حنفی کے مسائل پر مشتمل خزانہ جان کر) سونے میں تولتے ۔“اور آج المدینۃ العلمیۃ کی اس مبارک کاوش نے صدرُ الشریعہ کی تمنّا کو پورا کردیا ، بلکہ یوں کہئے کہ سونے میں تولنے سے بھی زیادہ اہم کارنامہ انجام دے دیا۔

(2)خیرُالاذکیا حضرت مولانا محمداحمد اعظمی مصباحی(صدرمجلس شرعی ،ناظم تعلیمات، جامعہ اشرفیہ):بہارِ شریعت ہمارے یہاں عرصۂ دراز سے رائج ہے، لیکن المدینۃ العلمیۃ نے ایک تو اس کے حوالوں کی تخریج کی ہے، اس کے ساتھ ساتھ حواشی بھی لکھے ہیں، فقہی فوائد اور اصطلاحات شروع میں دی ہیں، اور بہت سی دوسری چیزیں شامل کی ہیں، جو اس کتاب کو بہت ہی عظیم ، بہت ہی وقیع اور عوام و خواص کے لیے بہت زیادہ مفید بنادیتی ہیں۔

(2)جدالممتارعلی ردالمحتار:”جد الممتار“امام احمد رضا خان قادری رحمۃ اللہ علیہ کےوہ وضاحتی نوٹس(Explanation Notes) ہیں جوآپ نے”ردالمحتار“پرتحریر فرمائے ۔چونکہ ”جدالممتار“تحقیق و تدوین کا منتظر تھااسی لئےعرصہ دراز سےیہ علمی خزانہ اہلِ علم کی پہنچ سے دوررہا۔” المدینۃ العلمیۃ“ نےیہ اہم اور مشکل ترین پروجیکٹ لیا ،اِس کےلئے7علمائے کرام منتخب ہوئےاوراِن کی کوششوں سے2013ء کو4000صفحات پرمشتمل7جلدیں منظرِ عام پرآئیں۔جدُالممتار سے متعلق ایک شخصیت کا تاثرملاحظہ کیجئے:

استاذُالعلماحضرت مولانا افتخار احمد قادری مصباحی(شیخ الحدیث دار العلوم قادریہ غریب نواز، ساؤتھ افریقہ):دعوتِ اسلامی کے اشاعتی ادارے المدینۃ العلمیۃ کے علمائے کرام نے جدُ الممتار کو جس طرح احسن انداز میں پیش کیا ہے یہ دیرپا رہنے والا کام ہے، میں ان تمام علماء کو اس عظیم کام انجام دینے پر بہت مبارک دیتاہوں۔

(3) صراطُ الجنان فی تفسیر القرآن:اللہ تعالیٰ نے مسلمانوں کو قرآنِ کریم کی صورت میں وہ نسخۂ کیمیا عطافرمایا ہےجس کےامتیازی اوصاف میں کوئی اور کتاب اس کےبرابر نہیں۔یہ لاریب کتاب تمام عالَم کے لئےعلم و دانش کاخزانہ اورہدایت و راہنمائی کاذریعہ ہے۔اس میں ایسے اصول عطا کیے گئے ہیں جو دائمی اورابد ی ہیں۔اسی اہمیت کے پیشِ نظر اَلْمَدِیْنَۃُ العِلْمِیّۃ نے ایک ذیلی شعبہ ”فیضان ِ قرآن “ قائم کیا جوقرآنی تعلیمات کوکتب و رسائل کےذریعے لوگوں تک پہنچانےمیں مصروفِ عمل ہے ۔اس شعبے کی ایک کاوش 10 جلدوں پرمشتمل دورِ حاضر کی آسان اردوتفسیر” صراطُ الجنان فی تفسیر القرآن“ہےجوکہ عام فہم اندازِ تحریرمیں سورتوں کے مضامین ،آیات کی جامع وضاحت اورایمانی ،معاشرتی ،معاشی اوراخلاقی بگاڑ کو روکنے کے لئےاصلاحی مواد پر مشتمل ہے۔اسی شعبے کی دوسری کاوش لفظی ترجمہ” معرفۃ القرآن فی ترجمۃ القرآن“ 6جلدوں میں شائع ہوچکا ہے ۔ تاحال قرآن سے متعلق کئی کتب زیرِترتیب ہیں جنہیں تکمیل کے بعدشائع کرکے منظر عام پر لایا جائے گا۔

(4)احیاءالعلوم: اما م محمد غزالی رَحْمَۃُ اللّٰہِ عَلَیْہِ کی تمام ہی کتابیں علم کے قیمتی موتی اپنے دامن میں سموئے ہوئے ہیں مگر سب سے زیادہ شہرت پانے والی کتاب اِحْیَاءُ الْعُلُوْم اپنی مثال آپ ہے۔یہ کتاب ہردورمیں مشائخ وعارفین، اقطاب واولیا اورعلما وصوفیا کی توجہ کامرکزرہی ہے ۔اسی اہمیت کے پیشِ نظر امیر اہلِ سنّت حضر ت علامہ مولانا محمد الیاس قادری نےاس کتاب کے ترجمے کی خواہش فرمائی جسے المدینۃ العلمیۃ نے میگا پروجیکٹ کے طور پر لیا اور5علمائے کرام کےسپرد کیا۔2014ء میں یہ پروجیکٹ 5522صفحات پرمشتمل پانچ جلدوں کی صورت میں یہ منصوبہ مکمل ہوا۔اب تک اِس کے 16ایڈیشن شائع ہوچکے ہیں ۔

اس سال(2020ء) مکمل ہونے والے چارمنصوبوں کامختصر تعارف و جائزہ

(1)فیضان ِ ریاض الصالحین:المدینۃ العلمیۃکے بڑے منصوبوں میں سے ایک منصوبہ ’’فیضان ریاض الصالحین ‘‘بھی ہے۔جس پر المدینۃ العلمیۃ کے شعبہ فیضان حدیث کے تحت کام جاری ہے۔2011ء میں اِس منصوبے کاآغاز ہوا اور اِس کے لئےابتداءً ایک اور پھر6 علمائے کرام کو منتخب کیا گیا جن کی کوششوں سے اب تک 4 جلدیں شائع ہوچکی ہیں اورجلدنمبر5تا7اشاعت کےمراحل میں ہےجب کہ جلد نمبر8اور 9 پر کام جاری ہے۔خیال رہے کہ فیضانِ ریاضُ الصالحین کی ہر جلد600 سے750صفحات پر مشتمل ہے یوں فیضان ریاضُ الصالحین کا 9جلدوں کا مکمل سیٹ کم وبیش ساڑھے چھ ہزار(6500)صفحات پرمشتمل ہوگا اور یہ پروجیکٹ اگست2020ء میں مکمل ہوجائے گا ۔

(2)حلیۃ الاولیامترجم بنام اللہ والوں کی باتیں:اللہ کےپسندیدہ بندوں کی سیرت دنیا و آخرت میں ہمارے لئے رہنما ہے،حلیۃُ الاولیا میں انہی پسندید ہ بندوں کےاحوال و آثار کامحفوظ کردیے گئےہیں،اردو دان طبقے کو ان پاکیزہ نفوس سے روشناس کرانے کے لئے اِس عالی شان کتاب کے ترجمے کی ضرورت محسوس ہوئی اور5منتخب علمائے کرام کواِس کے ترجمے کا کام سونپ دیا گیا۔اِس کی پہلی جلد2013ء منظرِ عام پر آئی جس کے اب تک 14 ایڈیشن شائع ہوچکے ہیں یادر ہے کہ”حلیۃ الاولیامترجم بنام اللہ والوں کی باتیں“ کی 8جلدیں کا ترجمہ ہوکرمنظرعام پر آگیاہےاور بقیہ دو جلدوں کا ترجمہ اس سال ہوجائے گا یوں یہ پروجیکٹ 10جلدوں میں مکمل ہوگا ۔

(3)قوتُ القلوب:قوتُ القلوب کا موضوع تو تصوف ہے مگر اُس میں قرآن و حدیث اور دیگر علوم کے مضامین بھی شامل ہیں ،یہ کتاب سابقہ ادوار کی طرح دورِ حاضر میں بھی اِتنی ہی مفید اورشائقین ِ علم کے ذوق کا سامان فراہم کرتی ہے لہٰذا المدینۃ العلمیۃ نے اِس کتاب کے اردو ترجمے کا فیصلہ کیا تاکہ عوام بھی اِس خزانے سے علم و عمل کے قیمتی موتی چُن سکے۔اِس ترجمے کےلئے4علمائے کرام کو منتخب کیا گیا۔اب تک 1510صفحات پرمشتمل اِس کتاب کی دوجلدیں منظر ِعام پرآچکی ہیں اور اِ ن کے 9 ایڈیشن شائع ہوچکے ہیں ۔مزید دوجلدیں2020ء میں شائع ہوجائیں گی۔

(4)آئیے!قرآن سمجھتے ہیں مع ہدایات برائے اساتذہ(14جلدیں):قرآنِ پاک ہدایت و رہنمائی کاسرچشمہ ہے۔مسلمانوں نےجب بھی اس کی ہدایات پر عمل کیا کامیاب ہوئے اور جب اس کی تعلیمات کو پسِ پُشت ڈالا تو ناکام و نامراد ہوئے ۔ہدایات و رہنمائی کے اِس سرچشمے سے نوجوان نسل کوسیراب کرنے کے لئے2017ء میں ایک پروجیکٹ”آیئے! قرآن سمجھتے ہیں“کے نام سے شروع کیا گیا۔یہ پروجیکٹ7جلدوں پرمشتمل ہےجو مختلف عمر کے طلبہ کی ذہنی صلاحیت مدِّ نظر رکھ کر ترتیب دیا گیا ہے ۔اب تک اِس کی 6جلدوں اشاعت کے لئے جاچکی ہیں جب کہ ایک جلد فائنل مراحل میں ہے نیز یہ ساتوں جلدیں تقریباً1800صفحات پر مشتمل ہیں۔اِس کورس کو پڑھانے کے لئے ایک گائیڈ بُک ہدایات برائے اساتذہ کے نام سے مرتب کی جارہی ہےجس کےدوحصے مکمل ہوچکے ہیں۔مزید پانچ حصے2020 میں مکمل کرلیے جائیں گے ۔ یوں2سال سے جاری 14جلدوں پر مشتمل یہ عہدساز اور تاریخی منصوبہ اِس سال پایۂ تکمیل کو پہنچ جائے گا۔

رکنِ شوریٰ حاجی ابوماجد محمد شاہد عطاری مدنی  نے المدینۃ العلمیہ کے پہلے تھنک ٹینک (Think tank) کی بنیاد رکھ دی۔ مجوزہ تھنک ٹینک میں عبدالناصر عطاری مدنی، محمداعجازعطاری مدنی ، محمد صفدر عطاری مدنی ،محمد سعیدعطاری مدنی ، عمران الٰہی عطاری مدنی ، کاشف سلیم عطاری مدنی،محمد عمر فیاض عطاری مدنی ،محمدشاہ زیب عطاری مدنی،حیدرعلی مدنی اور عبداللہ نعیم عطاری مدنی شامل ہیں جبکہ سربراہ محمدآصف خان عطاری مدنی ہیں۔ تھنک ٹینک کے قیام کا مقصد المدینۃ العلمیہ کے شعبوں میں ترقی اور اس کو فروغ دینے کےلئے تحقیق اور غور و خو ص کرنا ہے۔ تھنک ٹینک کے اراکین اپنے علم، تجربہ اور مہارت کی بنیاد پر ان معاملات پر غور کریں گے کہ کون سی کتاب پر ہمیں کام کرنا چاہیئے؟، مارکیٹس میں کن کتب کی زیادہ مانگ ہے اور ہمارا ادارہ کس طرح عوام کی علمی ضرورت کو پورا کرسکتا ہے؟۔

عالمگیریت ( Globalization) کے اس دور میں لوگ کتابوں سے تیزی کے ساتھ دور ہورہے ہیں۔ ہاتھوں میں کتابوں کی جگہ موبائل نے لے لی ہے،صرف One Touch پر لوگ کہاں سے کہاں پہنچ جاتے ہیں۔ ایسے دور میں عوام میں دلچسپی پیدا کرنے والی کتب کا اجرا نہایت ضروری ہوچکا ہے، اسی طرح کی کتابوں کے اجرا پر مشاورت کے لئے ”تھنک ٹینک المدینۃ العلمیہ“ کا قیام عمل میں لایا گیا ہے، اسے آئیڈیا مجلس کا نام بھی دیا گیا۔

22 جنوری کو اس آئیڈیا مجلس کا اجلاس ناظم آفس المدینۃ العلمیہ میں ہوا جس میں تمام اراکین نے شرکت کی۔ اجلاس کی سربراہی رکنِ شوریٰ حاجی ابوماجد محمد شاہد عطاری مدنی نے کی۔ اجلاس میں یہ بات طے کی گئی کہ مجلس کے چند اراکین مختلف مکاتب اور اشاعتی اداروں کا دورہ کریں گے اور ان کے Popular Items کے بارے میں معلومات حاصل کریں۔ ایک رکن کا کہنا تھا کہ المدینۃ العلمیہ بڑی تیزی کے ساتھ کتابوں کو مرتب اور تالیف کررہا ہے، اَلْحَمْدُ لِلّٰہِ عَزَّ وَجَلَّ ہم نے بہت سے بڑے بڑے تحریری منصوبے بھی مکمل کررکھے ہیں، ان کتب کی تشہیر کے معاملےمیں مؤثر اقدامات کئے جائیں۔