صحیح البخاری شریف،  جلد 3، ص410، حدیث5027 پر ہے:' نبی مکرم، نور مجسم صلی اللہ علیہ و سلم کا فرمان معظم ہے: خَیْرُکُمْ مَنْ تَعَلَّمَ الْقُرْآنَ وَ عَلَّمَہٗ۔ "یعنی تم میں بہترین شخص وہ ہے، جس نے قرآن سیکھا اور دوسروں کو سکھایا۔"

فیض القدیر، ج 3، ص618، تحت الحديث 3983ہے :حضرت سیّدنا ابو عبدالرحمن سُلَمی رضی اللہُ عنہ مسجد میں قرآنِ پڑھایا اور فرمایا کرتے:"اِسی حدیثِ مبارک نے مُجھے یہاں بٹھا رکھا ہے۔"

اللہ مجھے حافظِ قرآن بنا دے

قرآن کے احکام پہ بھی مجھ کو چلا دے

تاریخِ دمشق لا بن عساکر، جلد 41، ص13، المعجم الکبیر للطبرانی، ج 10، ص198، حدیث 10450 ہے:

حضرت سیدنا انس رضی اللہ عنہ سے روایت ہے کہ رسول اکرم صلی اللہ علیہ وسلم کا فرمانِ معظم ہے:"جس نے قرآن پاک سیکھا اور سکھایا اور جو کچھ قرآن پاک میں ہے، اُس پر عمل کیا، قرآن شریف اس کی شفاعت کرے گا اور جنت میں لے جائے گا۔"

الٰہی خوب دیدے شوق قرآن کی تلاوت کا

شرف دے گنبدِ خضریٰ کے سائے میں شہادت کا

حضرت سیدنا انس رضی اللہ عنہ سے روایت ہے:" جس شخص نے قرآن مجید کی ایک آیت یا دین کی کوئی سُنت سکھائی، قیامت کے دن اللہ تعالیٰ اس کے لیے ایسا ثواب تیار فرمائے گا کہ اِس سے بہتر ثواب کسی کے لیے بھی نہیں ہوگا۔ (جمع الجوامع للسیوطی، ج 7، ص281، حدیث22454)

تلاوت کروں ہر گھڑی یا الٰہی عزوجل

بکوں نہ کبھی بھی میں واہی تباہی

ذوالنورین، جامع القرآن، حضرت عثمان بن عفان رضی اللہُ عنہ سے روایت ہے کہ مکہ مکرمہ کے سلطان صلی اللہ علیہ وسلم کا فرمانِ عالیشان ہے:"جس نے قرآن مُبین کی ایک آیت سکھائی، اس کے لیے سیکھنے والے سے دُگنا ثواب ہے۔"

اور ایک اور روایت میں ہے حضرت انس رضی اللہُ عنہ سے روایت ہے کہ اللہ کے آخری نبی صلی اللہ علیہ وسلم نے فرمایا:" جس نے قرآنِ عظیم کی ایک آیت سکھائی، جب تک اس آیت کی تلاوت ہوتی رہے گی، اُس کے لیے ثواب جاری رہے گا۔"

تلاوت کا جذبہ عطا کر الٰہی عزوجل

معاف فرما میری ہر خطا یا الہی عزوجل