قراٰنِ مجید تمام بنی نوع انسان کے لئے ہدایت کا سرچشمہ ہے۔ یہ ایک مکمل ضابطۂ حیات ہے اس کا ہر حکم حق اور علم و ‏حکمت کا انمول ‏موتی ہے۔ قراٰنِ کریم ایسی جامع کتاب ہے جو زندگی کے ہر شعبے میں راہنمائی کرتی ہے۔ہر وہ شخص جس کے ‏دل میں ہدایت کی طلب ‏ہو اپنے فہم کے مطابق اس سے فائدہ اٹھا سکتا ہے۔ قراٰنِ مجید نبیِّ کریم صلَّی اللہ علیہ واٰلہٖ وسلَّم پر23سال کی ‏مدت میں حالات و واقعات اور ضروریات کے پیش نظر نازل ہوا۔ ہجرتِ مدینہ کے بعد آپ علیہ السّلام کا سامنا منافقین سے ہوا جو ‏اسلام کا لبادہ اوڑھ کر مسلمانوں میں انتشار پیدا کرتے تھے، اللہ پاک نے مختلف مقامات پر منافقین کی سازشوں کو بے نقاب ‏کیا۔ آیئے! قراٰنِ کریم سے ملاحظہ ‏کرتے ہیں کہ اللہ پاک نے منافقین کی منافقت، ان کے اعمال اور ان کے کردار کو کس ‏طرح بیان فرمایا ہے:‏

‏(1)منافقین کی مثال آگ روشن کرنے والے کی مثل ہے: اللہ پاک نے ارشاد فرمایا:﴿مَثَلُهُمْ كَمَثَلِ الَّذِی اسْتَوْقَدَ نَارًاۚ-فَلَمَّاۤ اَضَآءَتْ مَاحَوْلَهٗ ذَهَبَ اللّٰهُ بِنُوْرِهِمْ وَتَرَكَهُمْ فِیْ ظُلُمٰتٍ ‏لَّایُبْصِرُوْنَ(۱۷) صُمٌّۢ بُكْمٌ عُمْیٌ فَهُمْ لَایَرْجِعُوْنَۙ(۱۸)﴾ ترجَمۂ کنز العرفان: ان کی مثال اس شخص کی طرح ہے جس نے ‏آگ روشن کی پھر جب اس آگ نے اس کے آس پاس کو روشن کر دیا تو اللہ ان کا نور لے ‏گیا اور انہیں تاریکیوں میں چھوڑ دیا، ‏انہیں کچھ دکھائی نہیں دے رہا۔ بہرے، گونگے، اندھے ہیں پس یہ لوٹ کر نہیں آئیں گے۔(پ1، البقرۃ: 17، 18) ‏

یہ مثال ان منافقین کی ہے جنہوں نے ایمان کا اظہار کیا اور دل میں کفر رکھ کر اقرار کی روشنی کو ضائع کر دیا اور وہ بھی جو ‏مومن ہونے ‏کے بعد مرتد ہو گئے اور وہ بھی کہ جنہیں فطرتِ سلیمہ عطا ہوئی اور دلائل کی روشنی نے حق واضح کر دیا مگر ‏انہوں نے فائدہ نہ اٹھایا اور ‏گمراہی اختیار کی اور جب وہ حق سننے، ماننے، کہنے اور راہِ حق دیکھنے سے محروم ہوئے تو کان آنکھ ‏زبان سب بیکار ہیں۔(دیکھئے: خزائن العرفان، ص7)‏

‏(2)منافق آسمانی بجلی کی چمک میں حیران مسافر کی مثل ہیں: ‏﴿اَوْ كَصَیِّبٍ مِّنَ السَّمَآءِ فِیْهِ ظُلُمٰتٌ وَّ رَعْدٌ وَّ بَرْقٌۚ-یَجْعَلُوْنَ اَصَابِعَهُمْ فِیْۤ اٰذَانِهِمْ مِّنَ الصَّوَاعِقِ حَذَرَ ‏الْمَوْتِؕ-وَاللّٰهُ مُحِیْطٌۢ بِالْكٰفِرِیْنَ(۱۹) یَكَادُ الْبَرْقُ یَخْطَفُ اَبْصَارَهُمْؕ-كُلَّمَاۤ اَضَآءَ لَهُمْ مَّشَوْا فِیْهِۗۙ-وَاِذَاۤ اَظْلَمَ عَلَیْهِمْ ‏قَامُوْاؕ-وَلَوْ شَآءَ اللّٰهُ لَذَهَبَ بِسَمْعِهِمْ وَاَبْصَارِهِمْؕ- اِنَّ اللّٰهَ عَلٰى كُلِّ شَیْءٍ قَدِیْرٌ۠(۲۰)﴾ ترجمہ ٔ کنزالعرفان: یا (ان کی ‏مثال) آسمان سے اترنے والی بارش کی طرح ہے جس میں تاریکیاں اور گرج اور چمک ہے۔ یہ زور دار کڑک کی وجہ سے ‏موت ‏کے ڈر سے اپنے کانوں میں انگلیاں ٹھونس رہے ہیں حالانکہ اللہ کافروں کو گھیرے ہوئے ہے۔ بجلی یوں معلوم ہوتی ہے کہ ‏ان ‏کی نگاہیں اچک کرلے جائے گی۔ (حالت یہ کہ) جب کچھ روشنی ہوئی تو اس میں چلنے لگے اور جب ان پر اندھیرا چھا گیا تو ‏کھڑے رہ ‏گئے اور اگراللہ چاہتا تو ان کے کان اور آنکھیں سلَب کر لیتا۔ بیشک اللہ ہر شے پر قادر ہے۔(پ1،البقرۃ: 19، 20)‏

یہ دوسری مثال بیان کی گئی ہے اور یہ ان منافقین کا حال ہے جو دل سے اسلام قبول کرنے اور نہ کرنے میں متردد رہتے ‏تھے ان کے بارے میں فرمایا کہ جس طرح اندھیری رات اور بادل و بارش کی تاریکیوں میں مسافر متحیر ہوتا ہے، جب بجلی ‏چمکتی ہے توکچھ چل لیتا ہے جب اندھیرا ہوتا ہے تو کھڑا رہ جاتا ہے اسی طرح اسلام کے غلبہ اور معجزات کی روشنی اور آرام کے ‏وقت منافق اسلام کی طرف راغب ہوتے ہیں اور جب کوئی مشقت پیش آتی ہے تو کفر کی تاریکی میں کھڑے رہ جاتے ہیں اور ‏اسلام سے ہٹنے لگتے ہیں اور یہی مقام اپنے اور بیگانے،مخلص اور منافق کے پہچان کا ہوتا ہے۔ منافقوں کی اسی طرح کی حالت ‏سورۂ نور آیت نمبر48 اور 49میں بھی بیان کی گئی ہے۔(صراط الجنان،1/83، 84)‏

‏(3)منافقین خشک اور بےکار لکڑی کی مثل ہیں: اللہ تبارک و تعالیٰ نے ارشاد فرمایا:﴿وَاِذَا رَاَیْتَهُمْ تُعْجِبُكَ اَجْسَامُهُمْؕ-وَاِنْ یَّقُوْلُوْا تَسْمَعْ لِقَوْلِهِمْؕ-كَاَنَّهُمْ ‏خُشُبٌ مُّسَنَّدَةٌؕ-یَحْسَبُوْنَ كُلَّ صَیْحَةٍ عَلَیْهِمْؕ-هُمُ الْعَدُوُّ فَاحْذَرْهُمْؕ-قٰتَلَهُمُ اللّٰهُ٘-اَنّٰى یُؤْفَكُوْنَ(۴)﴾ ترجَمۂ کنز ‏العرفان: اور جب تم انہیں دیکھتے ہو تو ان کے جسم تجھے اچھے لگتے ہیں اور اگر وہ بات کریں توتم ان کی بات غور سے سنو ‏گے(حقیقتاً وہ ایسے ہیں) جیسے وہ دیوار کے سہارے کھڑی کی ہوئی لکڑیاں ہیں، وہ ہر بلند ہونے والی آواز کو اپنے خلاف ہی سمجھ ‏لیتے ہیں، وہی دشمن ہیں تو ان سے محتاط رہو، اللہ انہیں مارے، یہ کہاں اوندھے جاتے ہیں؟(پ28،المنٰفقون:4) ‏

قراٰنِ کریم نے منافقین کو”خُشُبٌ مُّسَنَّدَةٌ“ سے تشبیہ دے کر ان کی لغویت کو عیاں کر دیا خشب کا معنی لکڑی ہے جبکہ ‏مسندہ کا معنی جسے دیوار ‏کے ساتھ کھڑا کر دیا گیا ہو جب تک لکڑی کار آمد ہوتی ہے اس سے شہتیر کڑی یا کواڑ وغیرہ بنائے ‏جاتے ہیں صرف بےکار لکڑی کو ‏دیوار کے ساتھ کھڑا کردیا جاتا ہے زیادہ سے زیادہ آگ جلانے کے کام آسکتی ہیں۔‏

مذکورہ بالا آیات میں اللہ پاک نے منافقین کی حقیقت کو عیاں فرمایا ہے مختلف مثالوں سے اور ان کے اعمال بھی کفار کے ‏اعمال کی ‏طرح بے وقعت ہیں کیونکہ جب کوئی منافق مرتا ہے تو اس کے ساتھ کافر والا معاملہ ہی پیش آتا ہے۔