گزشتہ دنوں شعبہ رابطہ برائے وکلاء دعوتِ اسلامی کے تحت فیروز آباد ٹاؤن ڈسٹرکٹ ایسٹ کراچی کے علاقے پی ای سی ایچ سوسائٹی بلاک 6 میں قائم ایڈووکیٹ ہائی کورٹ محمد ہاشم پیر زادہ کے نئے آفس میں مدنی حلقہ لگایا گیا جس میں کراچی بار کے موجودہ اور سابقہ عہدیداران سمیت ہائی کورٹ اور سٹی کورٹ کے وکلاء نے شرکت کی سعادت حاصل کی۔

ڈسٹرکٹ کورنگی ذمہ دار نےاس حلقے کا آغاز تلاوتِ قراٰنِ پاک اور نعت شریف سے کیا جبکہ نعت خواں شکیل عطاری نےبھی خوبصورت انداز میں نذرانۂ عقیدت پیش کیا۔

کراچی سٹی ذمہ دار نے سنتوں بھرا بیان کرتے ہوئے وہاں موجود اسلامی بھائیوں کی تربیت کی اور دعا کروائی۔ بعدازاں امیر اہلِ سنّت دامت برکاتہم العالیہ کے حکم پر عمل کرتے ہوئےحضرت سیدنا امام جعفر صادق رحمۃ اللہ علیہ کے ایصالِ ثواب کے لئے فاتحہ خوانی کا اہتمام کیا گیا جس میں کھیر پوری سے شرکائے محفل کی تواضع کی گئی۔(رپورٹ: محمد صہیب عطاری شعبہ رابطہ برائے وکلاء کراچی ساؤتھ سنٹرل زون، کانٹینٹ:غیاث الدین عطاری)

پچھلے دنوں نیو کراچی کےایک کوچنگ سینٹر میں دعوتِ اسلامی کے زیرِ اہتمام کفن دفن کورس کا انعقاد کیا گیا جس میں کوچنگ کے اسٹوڈنٹس کی کافی تعداد میں شرکت رہی۔

مبلغِ دعوتِ اسلامی و ڈسٹرکٹ ذمہ دار شعبہ کفن دفن یاسر عطاری نے شرکائے کورس کو غسلِ میت دینے کی فضیلت و اہمیت بتاتے ہوئے انہیں میت کو غسل دینے، کفن کاٹنے اور پہنانے کا طریقہ سکھایا۔

اس کے علاوہ ذمہ دار نے اسٹوڈنٹس کو دعوتِ اسلامی کے 12 دینی کاموں میں بڑھ چڑھ کر حصہ لینے کی ترغیب دلائی جس پر انہوں نے اچھی اچھی نیتوں کا اظہار کیا۔(رپورٹ: عزیر عطاری رکن شعبہ کفن دفن ، کانٹینٹ:غیاث الدین عطاری)

دعوتِ اسلامی کے تحت 16 فروری 2022ء  بروز بدھ ملتان میں ہفتہ وار سنتوں بھرے اجتماع کا انعقاد ہوا جس میں مقامی اسلامی بہنوں نے

شرکت کی ۔

پاکستان مشاورت نگران اسلامی بہن نے وہاں ’’صدقے کے فضائل‘‘ کے موضوع پر سنتوں بھرا بیان کیااور اسلامی بہنوں کو صدقہ و خیرات کرنے کا ذہن دیتے ہوئے راہِ خدا عزوجل میں خرچ کرنے کے فضائل بیان کئے نیز دعوت اسلامی کے لئے ڈونیشن اکٹھے کرنے کی ترغیب بھی دلائی جس پر اسلامی بہنوں نے اچھی اچھی نیتوں کا اظہار کیا۔

دعوتِ  اسلامی کے تحت 16 فروری 2022ء بروز بدھ پاکستان کے شہر ملتان میں قائم دارالسنہ للبنات میں مدنی مشورے کا انعقاد ہوا جس میں وہاں کی ناظمہ مفتشہ اسلامی بہنوں نے شرکت کی ۔

پاکستان مشاورت نگران اسلامی بہن نے اسلامی بہنوں کو دارالسنہ کی بہتری کے لئے مدنی پھول بتائے مزید مختلف تجاویز پیش کیں۔ اس کے علاوہ کورسز کروانے کے حوالے سے اہداف بھی دیئے۔

دعوتِ اسلامی کے زیر اہتمام16 فرور ی 2022ء کو ہزارہ  ڈویژن میں ہفتہ وار سنتوں بھرے اجتماع کا انعقاد ہوا جس میں مقامی اسلامی بہنوں نے شرکت کی ۔

نگران عالمی مجلس مشاورت ذمہ دار اسلامی بہن نےسنتوں بھرابیان کیا اور اسلامی بہنوں کو ماہِ رجب المرجب میں نفل روزے رکھنے اور ہفتہ وار مدنی مذاکرہ دیکھنے کی ترغیب دلائی ۔ آخر میں اسلامی بہنوں سے ملاقات کرکے انہیں انفرادی کوشش سے دینی کام کرنے کا ذہن بھی دیا جس پر اسلامی بہنوں نےاچھی اچھی نیتوں کا اظہا کیا ۔

دعوتِ اسلامی کی جانب سے15 فروری 2022ء کو نگران عالمی مجلس مشاورت ذمہ داراسلامی بہن نے مظفر آباد ڈسٹرکٹ  اور کابینہ ذمہ داراسلامی بہنوں کا مدنی مشورہ لیا جس میں مختلف اہداف دیئے گئےمثلاً تقرری مکمل کرنا، دارالسنہ کے لئے مدنی عملہ مکمل کروانا اور ہفتہ وار اجتماع مضبوط کرنے کےطریقۂ کار بتائے نیز اتحاد و اتفاق سے متعلق مدنی پھول بھی دیئے۔

٭دوسری جانب مظفر آباد میں علاقائی دورے کا سلسلہ ہوا جس میں نگران عالمی مجلس مشاورت ذمہ دار اسلامی بہن نے دیگر ذمہ دار اسلامی بہنوں کے ہمراہ ملکر گھر گھر جا کر مقامی اسلامی بہنو ں کو ہفتہ وار سنتوں بھرے اجتماع میں شرکت کی ترغیب دلائی ۔ 

گزشتہ دنوں اسپیشل پرسنز ڈیپارٹمنٹ دعوت اسلامی کے تحت عالمی مدنی مرکز فیضان مدینہ کراچی میں اشاروں کی زبان کورس کا انعقاد کیا گیا جس میں کافی تعداد میں ذمہ داران کی شرکت جاری ہے۔

دورانِ کورس مرکزی مجلسِ شوری ٰکے رکن حاجی محمد اطہر عطاری کی آمد ہوئی ۔رکنِ شوریٰ نے شرکائےکورس کی تربیت کرتے ہوئے’’ مبلغ کو کیسا ہونا چاہیئے‘‘کے موضوع پر سنتوں بھرا بیان کیااور اسپیشل پرسنز میں دینی کام کرنے کے حوالے سے ذہن سازی کی جس پر شرکا نے اچھی اچھی نیتوں کا اظہار کیا۔ (رپورٹ: محمد سمیر ہاشمی عطاری اسپیشل پرسنز ڈیپارٹمنٹ ، کانٹینٹ:غیاث الدین عطاری)

دعوتِ اسلامی کے شعبہ روحانی علاج کے زیرِ اہتمام17، 18، 19 فروری 2022ء کوفیصل آباد میں  3 دن پر مشتمل استخارہ کورس کا انعقاد ہوا جس میں شعبہ روحانی علاج صوبہ ٔپنجاب کے مختلف بستہ ذمہ داران نے شرکت کی۔

معلم سیّد محمد یاسر عطاری نےاسلامی بھائیوں کا انتخاب کرتے ہوئے اُن کی استخارے کے حوالے سے تربیت کی۔اس دوران نگرانِ شعبہ مولانا محمد انور رضا عطاری نے بھی شرکائے کورس کو مدنی پھولوں سے نوازا۔(رپورٹ: سمیر علی آفس ذمہ دار ، کانٹینٹ:غیاث الدین عطاری)

حضرت سیدنا امام جعفر صادق رحمۃ اللہ علیہ ظاہری اور باطنی علوم کے جامع تھے۔آپ رحمۃ اللہ علیہ حضرت امام حسین رضی اللہ عنہ کی اولاد میں سے ہیں اور ان کے پڑپوتے تھے۔آپ رحمۃ اللہ علیہ بہت اہتمام سے اللہ پاک کی عبادت کرتے تھے لہٰذاہمیں بھی آپ کی سیرت پر عمل کرناچاہیے۔

دنیا بھر کے مسلمان رجب المرجب کی 15تاریخ کو خصوصیت کے ساتھ حضرت امام جعفر صادق رحمۃ اللہ علیہ کاعرس مناتے ہیں۔اسی سلسلے میں17 فروری 2022ء بروز جمعرات اُن کے ایصالِ ثواب کے لئے دارالمدینہ ہیڈ آفس کراچی میں رکن ِ مرکزی مجلسِ شوریٰ حاجی محمدامین عطاری نے سنتوں بھرا بیان کیا اور بیان کے اختتام پر خصوصی دعا کروائی نیز کھیر پوری کی نیاز کا بھی اہتمام کیا گیا۔بعدازاں رکن ِ شوری نے دارالمدینہ ہیڈآفس کا دورہ کرتے ہوئے اپنے تاثرات دیئے۔ (رپورٹ:محمد امین حفیظ میڈیا کوآرڈینیٹر سوشل میڈیا ڈیپارٹمنٹ دارالمدینہ ،ہیڈ آفس کراچی، ویب ڈیسک رائٹر:غیاث الدین عطاری)

خاندانِ رضویت کے  وہ چشم و چراغ جنہوں نے گمنامی کی زندگی گزاردی، ایک ایسے فرد جو ممتاز عالم دین ہونے کے ساتھ ساتھ مفتی اسلام ، ماہر علم الفرائض اور ادیب بھی تھے ،ہماری مراد اعلیٰ حضرت امام احمد رضا خان رحمۃُ اللہِ علیہ کے سب سے چھوٹے بھائی حضرت علامہ مفتی محمد رضا خاں بریلوی رحمۃُ اللہِ علیہ ہیں۔ آئیے ان کی حیات خدمات پر کچھ معلومات ملاحظہ فرمائیے۔

نام :

محمد رضا عرف ننھے میاں

والد :

رئیس المتکلمین حضرت مولانا نقی علی خان رحمۃ اللّٰہ علیہ ۔ آپ رئیس المتکلمین کے سب سے چھوٹے بیٹے ہیں ۔

تعلیم :

رسمِ بسم اللہ والد محترم نے ادا کی ، ابتدائی تعلیم گھر پر ہی حاصل کی، کم سنی کے عالَم میں والد محترم کی وفات ہوگئی ، حالت یتیمی میں پروان چڑھے ، جب شعور آیا تو برادر محترم ( امام اہلسنت امام احمد رضا خان رحمۃ اللّٰہ علیہ ) کی درس گاہ اور شخصیت ساز تربیت گاہ سے وابستہ ہوئے ، برادر ِمکرم کی شفقت اور بہترین تعلیم و تربیت کا نتیجہ یہ ہوا کہ آپ ممتاز عالم ربانی ، بالغ نظر مفتی ، دور اندیش مفکر بن کر عالم اسلام پر ابھرے۔ ( مولانا نقی علی خان حیات علمی و ادبی کارنامے،46 )

اساتذہ :

۱۔ رئیس المتکلمین حضرت مولانا مفتی نقی علی خان رحمۃ اللّٰہ علیہ ( حضرت مولانا ظفر الدین بہاری رحمۃ اللّٰہ علیہ نے رئیس المتکلمین کے تلامذہ میں محمد رضا خان کا نام اس وجہ سے لکھا کہ آپ نے ان کو رسم بسم اللّٰہ پڑھائی )

۲۔ امام اہلسنت امام احمد رضا خان رحمۃ اللّٰہ علیہ۔(مولانا نقی علی خان حیات علمی و ادبی کارنامے،67 )

فتویٰ نویسی :

علم معقول و منقول خصوصاً علم الفرائض میں آپ مہارت تامہ اور ید طولیٰ رکھتے تھے، دارالافتاء بریلی شریف کا جب شُہرہ ہوا اور کثرت سے استفتاء ( سوالات ) آنے شروع ہوگئے تو علم الفرائض و میراث کے متعلقہ مسائل کے فتوے حضرت مولانا محمد رضا رحمۃ اللّٰہ علیہ ہی لکھا کرتے تھے ۔( مولانا نقی علی خان حیات علمی و ادبی کارنامے،67 )

تقریب نکاح :

آپ کا عقد نکاح غلام علی خان کی صاحبزادی سکینہ بیگم کے ساتھ ہوا ۔ شادی خانہ آبادی کے موقع پر استاذ ِزمن مولانا حسن رضا خان رحمۃ اللّٰہ علیہ نے سہرا لکھا ، پورا سہرا ثمر فصاحت میں موجود ہےجس کے چند اشعار درج ذیل ہیں:

”واہ کیا خوب سجا نوشہ کے سر پر سہرا

ہے مجھے تارِ رگِ جاں کے برابر سہرا“

(کلیات حسن،ثمر فصاحت، 698 ،اکبر بک سیلرز)

اولاد :

عین جوانی میں وفات کے سبب آپ کے یہاں ایک ہی بیٹی ہوئی جو اعلیٰ حضرت رحمۃ اللّٰہ علیہ کے صاحبزادے مفتی اعظم ہند مفتی مصطفیٰ رضا خان رحمۃ اللّٰہ علیہ کے نکاح میں آئیں، مفتی اعظم ہند رحمۃ اللّٰہ علیہ سے سات بیٹیاں اور ایک بیٹا انور رضا خان پیدا ہوئے مگر انور رضا خان کا کمسنی میں ہی انتقال ہوگیا۔ انوار رضا خان کو اپنے پردادا حضرت مولانا نقی علی خان رحمۃ اللّٰہ علیہ کے پائنتی میں دفن کیا گیا ۔(حیاتِ اعلیحضرت ، 74 )

انتظامی و دینی مصروفیات :

آپ علم و فضل کے ساتھ ساتھ خاندان اور حسن انتظام میں اپنی مثال آپ تھے جب برادر مکرم کو علمی مشاغل اور فتاویٰ جات میں مستغرق دیکھا تو خانگی (خاندانی) اور جاگیری ( زمین کے معاملات ) ذمے داریوں کو اپنے کاندھوں پر لے لیا گویا کہ آپ اعلیٰ حضرت کے قوت بازو بن کر اپنی جاگیر کے علاوہ اعلیٰ حضرت کی جاگیر کا انتظام بھی کرنے لگے اعلیٰ حضرت کو بس خدمت دین اور فروغ علم دین کے لیے آزاد کردیا امام اہلسنت بھی آپ پر جملہ امور میں مکمل اعتماد کرتے۔ اس کے علاوہ آپ کی دینی دلچسپی بھی برقرار رہی، علمی معاملات میں مشغول رہے فتاوجات کے علاوہ امام اہلسنت کے مُسوَّدوں کو بھی دیکھتے رہے جس کا ثبوت ان کی لگائی ہوئی مہر سے ملتا ہے۔ (مولانا نقی علی خان حیات علمی و ادبی کارنامے،67 )

ایک اہم خاصیت :

آپ کو قریب سے دیکھنے والوں کا بیان ہے کہ مصروف ترین زندگی گزارنے کے باوجود آپ سے کوئی نماز ترک نہ ہوئی زندگی بھر تمام نمازیں باجماعت ادا فرمائیں جب دنیا سے رخصت ہوئے تو کوئی نماز و روزہ قضا نہ تھا۔(حضرت مولانا محمد رضا خان بریلوی ،مصنف : مولانا افروز قادری چِڑیاکوٹی، 12 )

وفات :

عین جوانی کے عالم میں 21 شعبان المعظم 1358ھ بمطابق 15 اکتوبر 1939ء کو رات بعد نماز عشاء دنیا سے رخصت ہوئے ۔ نماز جنازہ حضرت مولانا عبدالعزیز خان رحمۃ اللّٰہ علیہ نے پڑھائی۔ جنازہ میں حضرت صدر الافاضل مولانا نعیم الدین مرادآبادی، مفتی امجد علی اعظمی، مولانا سردار احمد خان ، مولانا احمد یار خاں نعیمی رحمہم اللہ جیسی ہستیوں نے شرکت کی۔ آپ کو اپنے آبائی قبرستان میں والدین کریمین کے پاس سپردِ خاک کیا گیا، مفتی اعظم ہند نے مزار تعمیر کروایا ۔( مولانا نقی علی خان حیات علمی و ادبی کارنامے، 67 )

از قلم : احمد رضا مغل

بروز منگل 23 جمادی الاولیٰ 1443، بمطابق28 دسمبر 2021ء

دعوتِ اسلامی کے شعبہ دار الافتاء اہلسنت کی جانب سے عاشقانِ رسول کو قرآن و حدیث کے احکامات سے آگاہی فراہم کرنے کے لئے 13فروری 2022ء سے جامع مسجد دار الحبیبیہ دھوراجی کالونی کراچی میں 2:30 بجے سے 4:00 بجے تک ہفتہ وار ”فیضان قرآن و حدیث کورس“ کا سلسلہ جاری ہےجس کی دوسری نشست 20 فروری 2022ءکو منعقد ہوئی ۔

نشست کا آغاز تلاوت کلام پاک و نعت رسول مقبول صلَّی اللہ علیہ واٰلہٖ وسلَّم سے ہوا جس کے بعد دار الافتاء اہلسنت کے مفتی محمد شفیق عطاری مُدَّ ظِلُّہُ العالی نے ”6احکام پر مشتمل ایک جامع آیت “ کے موضوع پر درس قرآن دیا جبکہ مفتی محمد سجاد عطاری مدنی مُدَّ ظِلُّہُ العالی نے ”تم میں سے سب سے بہتر وہ ہے“کے عنوان پر درس حدیث دیا۔

واضح رہے کہ یہ کورس 27 مارچ 2022ء تک ہر اتوار دوپہر 2:30 بجے سے 4:00 بجے جامع مسجد دار الحبیبیہ دھوراجی کالونی میں پابندی کے ساتھ منعقد ہوا کریگا جن سے ممکن ہو تشریف لاکر اس کورس میں شرکت فرمائیں اور علم دین کا ڈھیروں ڈھیر خزانہ حاصل فرمائیں۔

یہ کورس دار الافتاء اہلسنت کے فیس بُک پیج پر بھی براہِ راست نشر کیا جارہا ہے۔

PAGE LINK

https://www.facebook.com/DaruliftaAhlesunnat