مَوزے کس رنگ کے پہنیں

سوال: موزے (Socks)کس رنگ کے پہنے جائیں؟

جواب: کسی بھی رنگ کے مَوزے پہن سکتے ہیں البتہ تِرمذی شریف میں ہے: نجاشی بادشاہ نے نبیِّ کریم صلَّی اللہ علیہ واٰلہٖ وسلَّم کی بارگاہ میں کالے موزوں کا تحفہ بھیجا اور سرکارِ مدینہ صلَّی اللہ علیہ واٰلہٖ وسلَّم نے انہیں پہنا۔(ترمذی،4/374، حدیث:2829ماخوذاً) نیز فتاویٰ ہندیہ میں ہے: فرعون لال موزے اور اس کا وزیر ہامان سفید موزے پہنتا تھا جبکہ علمائے کرام کالے موزے پہنتے ہیں۔(فتاویٰ ھندیہ،5/334ماخوذاً)

وَاللہُ اَعْلَمُ عَزَّوَجَلَّ وَ رَسُوْلُہٗ اَعْلَم صلَّی اللہ علیہ واٰلہٖ وسلَّم

صَلُّوْا عَلَی الْحَبِیْب! صلَّی اللہُ علٰی محمَّد

”کھیس“ پکا کر کھانا کیسا؟

سوال:گائے، بھینس کے بچہ پیدا ہونے کے دو یا تین دن تک جو گاڑھا دودھ آتا ہے اُسے کھیس کہتے ہیں، کیا اسے پکا کر کھانا جائز ہے؟

جواب:گائے، بھینس کے بچہ پیدا ہونے کے دو یا تین دن تک جو گاڑھا دودھ آتا ہے اسے پکا کر کھانا بالکل جائز ہے۔ اسے پکانے کا ایک طریقہ یہ بھی ہے کہ اس میں چینی یا شہد ڈال کر پکا لیا جائے اور جب یہ پَک جائے تو اسے کسی تھال وغیرہ میں ڈال دیں تاکہ یہ ٹھنڈی ہوکر جم جائے اور پھر چُھری سے اس کے نمک پارے کی طرح ٹکڑے کرکے تناول فرمائیں (یعنی کھائیں)، بڑے لذیذ ہوتے ہیں۔

وَاللہُ اَعْلَمُ عَزَّوَجَلَّ وَ رَسُوْلُہٗ اَعْلَم صلَّی اللہ علیہ واٰلہٖ وسلَّم

صَلُّوْا عَلَی الْحَبِیْب! صلَّی اللہُ علٰی محمَّد

اُمّت کے بہت بڑے عالِم کون؟

سوال:حِبْرُالْاُمَّۃ کس صحابی کا لقب تھا اور اس کا معنیٰ کیا ہے؟

جواب:حضرتِ سیّدنا عبدُاللہ بن عباس رضی اللہ عنہما کا لقب ”حِبْرُالْاُمَّۃ“ تھا اور اس کا معنیٰ ہے ”امّت کے بہت بڑے عالِم“۔

وَاللہُ اَعْلَمُ وَ رَسُوْلُہٗ اَعْلَم عَزَّوَجَلَّ وَ صلَّی اللّٰہ علیہ واٰلہٖ وسلَّم

صَلُّوْا عَلَی الْحَبِیْب! صلَّی اللہ علٰی محمَّد

سوال: کیا آیتِ سجدہ کا ترجمہ پڑھنے، سننے والے پر بھی سجدۂ تلاوت واجب ہے؟

جواب: جی ہاں! آیتِ سجدہ کا ترجمہ پڑھنے، سننے والے پر بھی سجدۂ تلاوت کرنا واجب ہے جیساکہ ’’بہارِ شریعت‘‘ میں ہے: فارسی یا کسی اور زبان میں آیت (سجدہ) کا ترجمہ پڑھا تو پڑھنے والے اور سننے والے پر سجدہ واجب ہوگیا، سننے والے نے یہ سمجھا ہو یا نہیں کہ آیتِ سجدہ کا ترجَمہ ہے، البتہ یہ ضَرور ہے کہ اسے نہ معلوم ہو تو بتا دیا گیا ہو کہ یہ آیتِ سجدہ کا ترجَمہ تھا۔ (بہارِ شریعت،1/730)

وَاللہُ اَعْلَمُ وَ رَسُوْلُہٗ اَعْلَم عَزَّوَجَلَّ وَ صلَّی اللّٰہ علیہ واٰلہٖ وسلَّم

سوال: نقلی دانت لگوانا کیسا ہے؟ نیز غسل میں ان کو نکال کرکُلّی کرنا ضَروری ہے یا نہیں؟

جواب: نقلی دانت لگوانا جائز ہے۔ اگر ان کا نکالنا ممکن ہو

تو انہیں نکال کر کُلّی کی جائے ورنہ ویسے ہی کُلّی کر لیں غسل ہو جائے گا۔

وَاللہُ اَعْلَمُ وَ رَسُوْلُہٗ اَعْلَم عَزَّوَجَلَّ وَ صلَّی اللّٰہ علیہ واٰلہٖ وسلَّم

سوال: مسجدِ خیف میں کتنے انبیائے کرامعلیہمُ الصَّلٰوۃ وَالسَّلام نے نماز ادا فرمائی تھی؟

جواب: مسجدِ خیف منیٰ شریف میں ہے اور حدیثِ پاک میں ہے:اس میں سَتَّر⁷⁰انبیائے کرام علیہمُ الصَّلٰوۃ وَالسَّلام نے نماز ادا فرمائی تھی۔ (معجمِ اوسط،4/117،حدیث:5407)

وَاللہُ اَعْلَمُ وَ رَسُوْلُہٗ اَعْلَم عَزَّوَجَلَّ وَ صلَّی اللّٰہ علیہ واٰلہٖ وسلَّم

دنیا میںاللہ پاک کا دیدار

سوال: کیا دنیا میں کسی انسان کو اللہ تعالیٰ کا دیدار ہوسکتا ہے؟

جواب: دنیا میں اللہ پاک کا دیدار ظاہری آنکھوں سے بیداری کی حالت میں صرف میرے آقا، مدینے والے مصطفےٰ صلَّی اللہ علیہ واٰلہٖ وسلَّم ہی کو حاصل ہوا ہے، ان کے علاوہ کسی اور نبی یا غیرِ نبی کو بیداری کی حالت میں ظاہری آنکھوں سے دیدارِ الٰہی کی نعمت نہیں ملی اور نہ ملے گی۔ البتہ خواب میں اللہ تبارک و تعالیٰ کا دیدار ہوسکتا ہے جیساکہ حضرت سیّدنا امامِ اعظم ابوحنیفہرحمۃ اللہ علیہ کو 100مرتبہ خواب میں اللہ پاک کا دیدار ہوا ہے۔ (بہارِ شریعت،1/20-21ماخوذاً)

وَاللہُ اَعْلَمُ وَ رَسُوْلُہٗ اَعْلَم عَزَّوَجَلَّ وَ صلَّی اللّٰہ علیہ واٰلہٖ وسلَّم

صَلُّوْا عَلَی الْحَبِیْب! صلَّی اللہ تعالٰی علٰی محمَّد

سوال: اگر کوئی غسل فرض ہونے کی حالت میں جانور ذَبح کرے تو کیا جانور حلال ہوجائے گا؟

جواب: جی ہاں! اگر کسی نے غسل فرض ہونے کی حالت میں جانور ذَبح کیا تو جانور حلال ہو جائے گا مگر بہتر یہ ہے کہ غسل کر کے جانور ذَبح کیا جائے۔ (فتاویٰ رضویہ،4/324ماخوذاً)

وَاللہُ اَعْلَمُ وَ رَسُوْلُہٗ اَعْلَم عَزَّوَجَلَّ وَ صلَّی اللّٰہ علیہ واٰلہٖ وسلَّم

آج کاسوال

قراٰنِ پاک کے معنیٰ نہ جاننے والے کو تلاوت کا ثواب ملے گا؟

سوال:اگر کوئی قراٰنِ پاک کی تلاوت کرتا ہو مگر اس کے معنیٰ وغیرہ نہ جانتا ہو تو کیا اُسے ثواب ملے گا؟

جواب:جی ہاں! قراٰنِ پاک کی تلاوت کرنے والے کو اس کا ثواب ملے گا اگرچہ معنیٰ وغیرہ نہ جانتا ہو۔

وَاللہُ اَعْلَمُ وَ رَسُوْلُہٗ اَعْلَم عَزَّوَجَلَّ وَ صلَّی اللّٰہ علیہ واٰلہٖ وسلَّم

صَلُّوْا عَلَی الْحَبِیْب! صلَّی اللہ تعالٰی علٰی محمَّد

سوال:میرا بھتیجا بارہ تیرہ سال کا ہوگیا ہے اور ہم نے ابھی تک اُس کا عقیقہ نہیں کیا تو کیا اب ہم اُس کا عقیقہ کرسکتے ہیں؟

جواب:عقیقہ کرنا مستحب ہے، اگر کسی نے نہیں کیا تو وہ گنہگار نہیں ہے۔ اگر کوئی بارہ تیرہ سال کا ہے یا اس سے بڑا ہے تب بھی اس کا عقیقہ کرسکتے ہیں، اس میں کوئی حرج نہیں ہے۔

(عقیقہ کے بارے میں تفصیل جاننے کے لئے مکتبۃ المدینہ کا مطبوعہ رسالہ ”عقیقہ کے بارے میں سوال جواب“ کا مطالعہ کیجئے۔)

وَاللہُ اَعْلَمُ وَ رَسُوْلُہٗ اَعْلَم عَزَّوَجَلَّ وَ صلَّی اللّٰہ علیہ واٰلہٖ وسلَّم

سوال:بعض اوقات گھر یا دکان وغیرہ میں پرندے گھونسلے بنالیتے ہیں، صفائی کے لئے ان کے گھونسلے ختم کرنا کیسا ہے؟

جواب:صفائی کیلئے پرندوں کے گھونسلے ہٹائے جاسکتے ہیں، البتہ اگر گھونسلے میں چھوٹے چھوٹے بچے ہوں تو اتنا انتظار کرلیں کہ بچے بڑے ہو کر اُڑ جائیں پھر اس کے بعد صفائی کی جائے۔

وَاللہُ اَعْلَمُ وَ رَسُوْلُہٗ اَعْلَم عَزَّوَجَلَّ وَ صلَّی اللّٰہ علیہ واٰلہٖ وسلَّم

پیارے آقا صلَّی اللہ علیہ واٰلہٖ وسلَّم نے کتنے جمعے ادا فرمائے؟

سوال:سرکارِ مدینہ صلَّی اللہ علیہ واٰلہٖ وسلَّم نے کتنے جُمعے ادا فرمائے ہیں؟

جواب:مُفسرِ شہیر ،حکیمُ الاُمَّت، حضرت مفتی احمد یار خان علیہ رحمۃ الحنَّان فرماتے ہیں:نبیِّ کریم صلَّی اللہ علیہ واٰلہٖ وسلَّم نے تقریباً پانچ سو⁵⁰⁰جُمُعے پڑھے ہیں، اس لئے کہ جمعہ بعدِ ہجرت شروع ہوا،جس کے بعد دس¹⁰سال آپ صلَّی اللہ علیہ واٰلہٖ وسلَّم کی (ظاہری) زندگی شریف رہی ،اس عرصہ میں جمعے اتنے ہی ہوتے ہیں۔(مراٰۃ المناجیح، 2/346)

وَاللہُ اَعْلَمُ وَ رَسُوْلُہُ اَعْلَم عَزَّوَجَلَّ وَ صلَّی اللّٰہ علیہ واٰلہٖ وسلَّم

صَلُّوْا عَلَی الْحَبِیْبْ! صَلَّی اللہُ تَعَالٰی عَلٰی مُحَمَّد