قرآنِ کریم میں موسیٰ علیہ السلام کی صفات:حضرت موسیٰ علیہ السلام اللہ پاک کے انتہائی برگزیدہ پیغمبر اور اولواالعزم رسولوں میں سے ایک رسول ہیں۔اللہ پاک سے بلاواسطہ ہم کلام ہونے کی سعادت پانے کے سبب کلیمُ اللہ کے لقب سے یاد کیے جاتے ہیں۔قرآنِ پاک میں موسیٰ علیہ السلام کے واقعات کا اجمالی بیان متعدد سورتوں میں ہے جبکہ تفصیلی بیان بیس سورتوں میں ہے۔

حضرت موسیٰ علیہ السلام کے چند اوصاف ملاحظہ کیجیے:

(1،2) حضرت موسیٰ علیہ السلام اللہ پا ک کے چُنے ہوئے،برگزیدہ بندے اورنبی رسول تھے:ارشادِ باری ہے: وَ اذْكُرْ فِی الْكِتٰبِ مُوْسٰۤى٘-اِنَّهٗ كَانَ مُخْلَصًا وَّ كَانَ رَسُوْلًا نَّبِیًّا(۵۱) (پ16، مریم:51) ترجمہ:اور کتاب میں موسیٰ کو یاد کرو، بے شک وہ چُنا ہوا بندہ تھا،اور نبی رسول تھا۔

(3)حضرت موسیٰ علیہ السلام اللہ پاک کی بارگاہ میں بڑی وجاہت یعنی بڑے مقام والے اور مستجابُ الدعوات تھے۔چنانچہ اللہ پاک سورۃُ الاحزاب کی آیت نمبر 69 میں ارشاد فرماتا ہے:وَ كَانَ عِنْدَ اللّٰهِ وَجِیْهًاؕ (پ22، الاحزاب:69)ترجمہ:اور موسیٰ اللہ کے ہاں بڑی وجاہت والا ہے۔