حضور نبیِّ رحمت صلَّی اللہ علیہ وسلَّم کی مبارک ذات پر دُرود شریف بھیجنا ایک مسلمان کے لئے بہت بڑی نعمت ، اعزاز اور خوش قسمتی کی بات ہے۔

اسی سلسلے میں شعبہ ٔ دینیات ،دارالمدینہ انٹرنیشنل اسلامک ایجوکیشن سسٹم کے تحت دارالمدینہ انٹرنیشنل اسلامک اسکول سسٹم اور فیضان اسلامک اسکول سسٹم میں ہفتہ دُرودمنایا گیاجس میں 41کروڑ دُرودِ پاک پڑھنے کی نیت کی گئی۔

اسکول کے تعلیمی دوروں کے فائدے زندگی بھر رہتے ہیں ۔یہ تعلیمی دورے ثقافتی تفہیم، نئی دل چسپیوں میں اضافے اورسفر کی تحریک کے ساتھ ساتھ اعتماد اور آزادی کی فضا  بھی پیدا کرتے ہیں۔بعض مقامات دیکھنے سے نصابی اسباق کی تفہیم اور علم میں اضافہ ہوتا ہے اور طلبہ انہیں بہتر طریقے سے یاد رکھنے اور سمجھنے میں کامیاب ہوسکتے ہیں ۔

قلعہ رانی کوٹ جسے سندھ کی دیوار کے نام سے بھی جانا جاتا ہے،یہ جامشورو کے علاقے کیرتھر میں واقع ہے ۔ یہ قلعہ تاریخ و ثقافت کا منفرد شاہکار ہے اور وادی سندھ کی تہذیب کا حصہ بھی ہے۔یہ جگہ سیر و سیاحت کے لئے بھی ایک پرسکون مقام ہے۔ یہاں قلعہ میں سے بہتی ہوئی ندی میں قدرتی چشموں کا پانی مستقل بہتا رہتا ہے۔ رانی کوٹ میں اس پانی سے وادیاں سرسبز اور سحر انگیز نظر آتی ہیں۔

دارالمدینہ بوائز ہائی اسکول،سٹی کیمپس ، حیدرآباد کے طلبہ نے رانی کوٹ کا تفصیلی دورہ کیا۔اس موقع پر طلبہ کو رانی کوٹ کی مختصر تاریخ سے بھی آگاہ کیا گیا۔اس تعلیمی دورے سے طلبہ نے مفید معلومات بھی حاصل کیں۔ (رپورٹ : غلام محی الدین ترک ،اردو کانٹینٹ رائیٹر(سوشل میڈیا ڈیپارٹمنٹ دارالمدینہ ،ہیڈ آفس کراچی) / ویب ڈیسک رائٹر: محمد مصطفیٰ انیس) 

دیوار پر لٹکائے ہوئے سرخ کین کے طور پر نظر آنے والے آگ بجھانے کے آلات (Fire extinguishers)درحقیقت ایک مفید مقصد کی تکمیل کرتے ہیں۔ Fire extinguishersایک ایسا آلہ ہے جسے آگ لگنے کی صورت میں استعمال کرنےسے جان اور مال کو بچایا جاسکتا ہے۔یہ آلات ہر ادارے کی ضرورت ہیں ۔ ہر شخص کو آگ بجھانے، ابتدائی طبی امداد اور ریسکیو ورک کی تربیت حاصل کرنی چاہیے تاکہ حادثات کو ابتداہی میں کنٹرول کیا جاسکے۔ہر ادارےکے ہر ملازم کو یہ بھی علم ہونا چاہیےکہ حادثے کی صورت میں اس نے کیا کرنا ہے، اپنی جان کیسے بچانی ہےاور دوسروں کی کس طرح مدد کرنی ہے۔

28 فروری 2023ء کو دارالمدینہ انٹرنیشنل اسلامک ایجوکیشن سسٹم کے ہیڈ آفس میں ملازمین کے تحفظ اور انہیں آگ سے بچاؤ کے طریقے سکھانے کے لئے فائرسیفٹی ٹریننگ کا سلسلہ ہوا۔دعوت اسلامی فائر سیفٹی ڈیپارٹمنٹ کے ذمہ دار اسلامی بھائی نے دارالمدینہ کے اسٹاف کو آگ سے بچاؤ کی ٹریننگ دی اور دیگر حفاظتی اقدامات کے بارے میں آگاہی فراہم کی ۔ انہوں نے کہا کہ آگ سے ڈرنا نہیں چاہیے بلکہ اسے بجھانے کی تدابیر اختیار کرنی چاہییں۔اس موقع پر آگ بجھانے کا عملی مظاہرہ بھی کیا گیا۔ (رپورٹ : غلام محی الدین ترک ،اردو کانٹینٹ رائیٹر(سوشل میڈیا ڈیپارٹمنٹ دارالمدینہ ،ہیڈ آفس کراچی) / ویب ڈیسک رائٹر: محمد مصطفیٰ انیس)

بچپن اور اسکول کی بامقصد زندگی کامیابی کی راہ ہموارکرتی ہے۔ بچوں کی تربیت اور ان کے بہتر مستقبل کے لئے ایک اچھے اور معیاری اسکول کا انتخاب  کرنا والدین کی اہم ذمے داری ہے۔ دارالمدینہ انٹرنیشنل اسلامک اسکول سسٹم دینی ماحول میں معیاری تعلیم کے ذریعے طلبہ کی ذہنی،جسمانی اورعلمی صلاحیتوں میں اضافہ کرتاہے ۔دارالمدینہ کے تعلیم یافتہ اساتذہ طلبہ کو معاشرے کا اچھا فرد بنانے کے لئے کوشاں رہتے ہیں۔

اور اب خوش خبری ! سندھ میں بسنے والے والدین کے لئے ...... دارالمدینہ انٹرنیشنل اسلامک اسکول سسٹم کے سندھ ریجن میں بھی 22فروری 2023ء سے داخلوں کا آغاز ہوچکا ہے۔ اس ضمن میں دارالمدینہ مجلس کی جانب سے کیمپسز کو داخلوں کے عمل کو مؤثر بنانے کے لئے ہدایات جاری کردی گئی ہیں۔مجلس دارالمدینہ نے کئی نئے کیمپسز بھی قائم کئے ہیں جہاں رواں تعلیمی سال میں داخلے دیئے جائیں گے ان میں پی ای سی ایچ ایس کیمپس،گلشن کیمپس ۲،فیڈرل بی ایریا کیمپس اور گزری کیمپس شامل ہیں۔ مزید معلومات کے لیےدارالمدینہ کی ویب سائٹ www.darulmadinah.net دیکھی جاسکتی ہے یا اس ای میل ایڈریس info@darulmadinah.net پر رابطہ کیا جاسکتا ہے۔

یاد رہے ! کہ ان دنوں دارالمدینہ پنجاب کیمپسز میں بھی داخلے جاری ہیں۔ (رپورٹ: غلام محی الدین ترک ،اردو کانٹینٹ رائیٹر(سوشل میڈیا ڈیپارٹمنٹ دارالمدینہ ،ہیڈ آفس کراچی) /کانٹینٹ : محمد مصطفیٰ انیس)

دارالمدینہ انٹرنیشنل اسلامک اسکول سسٹم  پنجاب ریجن کے رزلٹ ڈے کے موقع پر ہونے والی تقریب میں پروفیسر ڈاکٹر ہارون الرشید تبسم نے خصوصی طور پر شرکت کی اور اپنے تاثرات دیتے ہوئے کہا کہ آج کی تقریب خالصتاً اسلامی ، اسلامی رنگ میں ڈوبی ہوئی تھی، بچوں کی پُرفارمنس شاندار تھی، ماحولیاتی آلودگی کے خلاف بچوں نے جو پرفارمنس پیش کی ،وہ قابل ستائش ہے،والدین کے احترام پر مبنی خاکے نے میرا دل تسخیر کرلیا، بچوں کا حسن اخلاق مثالی تھا، اساتذہ کا ٹیم ورک دیگر اداروں کے لئے باعث تقلید ہے،ہمیں ٹیم ورک کرتے ہوئے بچوں کی کردار سازی کرنی چاہئے۔انہوں نے مزید کہاکہ اس تقریب میں موجود کچھ والدین سے بات چیت بھی ہوئی جنہوں نے اس عزم کا اعادہ کیا ہے کہ وہ بچوں میں اسلامی روح بیدار کرنے کے لئے دارالمدینہ اسکول کی تحریک کا حصہ بنیں گے،میری دعاہے کہ دارالمدینہ دن دوگنی رات چوگنی ترقی کرےاور اسلامی تعلیمات کی روح لوگوں تک پہنچانے کا فریضہ اسی طرح ادا کرتا رہے۔ (رپورٹ: غلام محی الدین ترک ،اردو کانٹینٹ رائیٹر(سوشل میڈیا ڈیپارٹمنٹ دارالمدینہ ،ہیڈ آفس کراچی) /کانٹینٹ : محمد مصطفیٰ انیس) 

انفارمیشن ٹیکنالوجی کی ترقی ، مصنوعی ذہانت اور انٹرنیٹ کی بدولت ایسی ایجادات سامنے آرہی ہیں جنہوں نے انسانوں کے لئے سیکھنا، سمجھنا اور آگے بڑھنا آسان کردیا ہے، دارالمدینہ انٹرنیشنل اسلامک ایجوکیشن سسٹم اپنے ملازمین کو جدید ٹیکنالوجی سے روشناس کروانے اور ان کی صلاحیتوں میں اضافے کے لئے وقتاً فوقتا ً ایسے ٹریننگ سیشنز کا اہتمام کرتا ہےتاکہ وہ عصری تقاضوں کو سمجھ کر آگے بڑھ سکیں۔

دار المدینہ ہیڈآفس میں ChatGPT کے مثبت اور بہتر استعمال کے سلسلے میں ایک ٹریننگ سیشن کا انعقاد ہوا، جس میں ہیڈ آف ٹریننگ ڈیپارٹمنٹ محمد مدنی خان نے اسٹاف کو تعلیمی اداروں میں چیٹ جی پی ٹی کے مفید استعمال سے آگاہی دی۔ انہوں نے سبقی منصوبہ بندی (Lesson Plan ) ،گرائمر اور دیگر تعلیمی امورسے متعلق ChatGPT کے استعمالات بھی بتائے۔آخر میں انہوں نے کہا کہ ChatGPT بہت سی باتوں کے غلط جواب بھی دیتا ہے۔ دوسرے لفظوں میں یہ خود سے سوچ نہیں سکتا۔ ضروری ہے کہ اسے اپنی تخلیقی صلاحیتوں کو نکھارنے کے لیے استعمال کریں نہ کہ اپنا سارا کام اس سے کروائیں۔ (رپورٹ: غلام محی الدین ترک ،اردو کانٹینٹ رائیٹر(سوشل میڈیا ڈیپارٹمنٹ دارالمدینہ ،ہیڈ آفس کراچی) /کانٹینٹ : محمد مصطفیٰ انیس) 

پیرنٹ مینجمنٹ میٹنگ طلبۂ کی تعلیمی کامیابیوں، صلاحیتوں اور قابلیت پر تبادلۂ خیال کرنے کے ساتھ ساتھ ان کی سیکھنے کی مشکلات اور مسائل کی تشخیص کے لئے ایک پلیٹ فارم مہیا کرتی ہے۔والدین اور اسکول مینجمنٹ توقعات، چیلنجوں (Challenges) اور اسکول کے تجربے کو بہتر بنانے کے طریقوں پر گفتگو کرتے ہیں۔ یہ میٹنگز والدین کو یہ سمجھانے میں مددگار ثابت ہوتی ہیں کہ وہ اسکول سے باہر اپنے بچوں کے تعلیمی اور جذباتی مسائل کو کس طرح حل کر سکتے ہیں۔

دارالمدینہ انٹرنیشنل اسلامک اسکول سسٹم، گزری کیمپس میں پیرنٹ مینجمنٹ میٹنگ کا انعقاد ہوا جس میں طلبہ نے قرأت، نعت، تقاریر، خاکے اور سائنسی پراجیکٹ پیش کئے۔

بعدازاں دارالمدینہ کے صوبائی ذمہ دار مدنی رضا عطاری نے کہا کہ 2011 میں دعوتِ اسلامی نے جو پودا لگایا، آج وہ ایک تناور درخت بن چکا ہے۔اس وقت دارالمدینہ (پاکستان) کے98 کیمپسز میں 34 ہزار بچے تعلیم حاصل کررہے ہیں۔

اس کے علاوہ بیرونِ ممالک میں دارالمدینہ کے 44کیمپسز میں 9 ہزار سے زائد طلبہ دینی ماحول میں معیاری تعلیم حاصل کررہے ہیں۔مزید اُن کا کہنا تھا کہ اس سال کراچی بورڈ میں دارالمدینہ کے 76 فیصد بچوں نے اے ون اور اے گریڈز میں کامیابی حاصل کی۔

ہیڈ آف ٹریننگ ڈیپارٹمنٹ محمد مدنی خان نے اس میٹنگ میں والدین کو بچوں کی تعلیم و تربیت کے حوالے سے کئی مفید مشورے دیئے۔انہوں نے دورانِ گفتگو والدین سے کہا کہ وہ اپنے بچوں میں اچھی خوبیاں پروان چڑھانے کے لئے خود کو مثالی نمونہ بن کر دکھائیں۔ بچے والدین کو سنتے نہیں بلکہ انہیں دیکھتے ہیں،ان کی ہر بات کی نقل کرتے ہیں،بچوں کی بہتر تربیت کے لئے انہیں ٹائم دیجیے۔والدین کی بھرپور توجہ بچوں کا مستقبل سنوار سکتی ہے۔

سرزمینِ ہِند کے لوگوں کو نورِ ہدایت سے روشناس کروانے اور ان کے عقائدواعمال کی اِصلاح کرنے والے بُزرگانِ دین میں حضرت خواجہ مُعینُ الدین سیّدحسن چشتی اجمیری رَحْمَۃُ اللہِ عَلَیْہِ کا نام بہت نُمایاں ہے۔آپ رَحْمَۃُ اللہِ عَلَیْہِ نے یہاں رہنے والے لوگوں کو اپنے علم، عمل اور مال سے فائدہ پہنچایا۔

آپ رَحْمَۃُ اللہِ عَلَیْہِ کی یاد میں عاشقان ِ رسول کی ایک کثیر تعداد رجب المرجب میں آپ رَحْمَۃُ اللہِ عَلَیْہِ کا عرس مناتی ہے جہاں آپ رَحْمَۃُ اللہِ عَلَیْہِ کا ذکر ِخیر کیا جاتا ہے اورآپ رَحْمَۃُ اللہِ عَلَیْہِ کی سیرت و کردار،علمیت، جد و جہد اورخدمت خلق پر روشنی ڈالی جاتی ہے۔

عرس حضرت خواجہ معین الدین چشتی رَحْمَۃُ اللہِ عَلَیْہِ کے موقع پر دارالمدینہ ہیڈ آفس میں ہونے والی خصوصی محفل میں دارالمدینہ ہیڈ آفس سے وابستہ اسلامی بھائیوں نے شرکت کی۔

اس پروقار محفل میں دعوتِ اسلامی کی مرکزی مجلس ِ شوریٰ کے رُکن حاجی فضیل رضا عطاری نے سنتوں بھرا بیان کرتے ہوئے فرمایاکہ اولیا ئے کرام علیہم الرضوان کو اللہ کا قرب خاص نصیب ہوتا ہے کیوں کہ وہ اللہ کے فرماں بردار ہوتے ہیں، گناہوں سے محفوظ ہوتے ہیں، ان کی زندگی کا کوئی لمحہ نیکی سے خالی نہیں ہوتا۔ان کا کھانا، سونا،چلنا، پھرنا،بیٹھنا، اٹھنا،ان کا ہر کام عبادت ہوتا ہے۔ اولیائے کرام علیہم الرضوان کے خوفِ خدا کا یہ عالم ہوتا ہے کہ وہ خود کو کچھ نہیں سمجھتےہیں، ہمہ وقت عاجزی و انکساری کا پیکر نظر آتے ہیں۔

رکنِ شوریٰ نے توجہ دلاتے ہوئے کہا کہ آج ہماری یہ حالت ہے کہ کوئی لمحہ گناہوں ،غفلت اورفضول گوئی سے خالی نہیں۔یاد رکھیے اللہ عزوجل کی ہمارے بارے میں خفیہ تدبیر کیا ہے یہ ہم نہیں جانتے،ہمیں نہیں معلوم کہ ہمارا ایمان سلامت رہے گا یا نہیں، ہماری موت کس طرح آئے گی، ہمیں کچھ بھی نہیں پتا۔اگر ہمارا رب ہم سے ناراض ہوگیا تو ہم کہیں کے نہ رہیں گے۔اس لئے ہمیں اپنے اخلاق و کردار کی درستی کرنی چاہیے۔آخر میں رکنِ شوریٰ نے محفل میں موجود اسلامی بھائیوں کو دعوتِ اسلامی کے دینی کام کرنے کی ترغیب بھی دلائی۔(رپورٹ: غلام محی الدین ترک، اردو کانٹینٹ رائٹر سوشل میڈیا ڈیپارٹمنٹ دارالمدینہ، ہیڈ آفس کراچی، ویب ڈیسک رائٹر:غیاث الدین عطاری)

صحابہ کرام عَلَیْهمُ الرِّضْوَان ستاروں کی مانند ہیں، اُن کی سیرت ہر انسان کے لئے مشعل راہ ہے۔صحابی رسول امیر المؤمنین حضرت سیّدنا ابوبکر صدیق رضی اللہ عنہ انبیائے کرام عَـلَـيْهِمُ السَّلَام کے بعد تمام مخلوق میں سب سے افضل ہیں۔آپ رضی اللہ عنہ ذہانت، علم و حکمت، قناعت و شجاعت ا ور صداقت میں بے مثال تھے۔

عشقِ رسول، خوفِ خدا ،تقویٰ و پرہیز گاری، جاں نثاری، ایثار وقربانی اور پارسائی میں اپنی مثال آپ تھے۔سادگی، عاجزی، ایمانداری، رحم دلی اور غریب پروری آپ رضی اللہ عنہ کے اَخلاقِ حسنہ کا ایک حصہ ہے۔

دارالمدینہ انٹرنیشنل اسلامک اسکول سسٹم کے کیمپسز میں طلبہ کو حضرت سیّدنا ابوبکر صدیق رضی اللہ عنہ کی سیرت سے آگاہ کرنے کے لئے یومِ صدیق اکبر رضی اللہ عنہ منایا گیا۔اس موقع پر کیمپسز میں خصوصی چارٹس چسپاں کئے گئے تھے جن میں آپ رضی اللہ عنہ کی سیرت کے نمایاں پہلو درج تھے۔

اچھے تعلیمی ادارے ہر معاشرے کی ضرورت ہیں۔ یہ ادارے ایک بہتر معاشرے کی تشکیل میں اہم کردار ادا کرتے ہیں۔ اولاد کی بہتر تعلیم کے لئے مناسب اور عمدہ تعلیمی اداروں کا انتخاب  والدین کی اہم ذمہ داری ہے۔

دعوتِ اسلامی کے دارالمدینہ انٹرنیشنل اسلامک اسکول سسٹم میں قابلِ اساتذہ، معیاری نصابِ تعلیم، تربیہ، نظم و ضبط اور مختلف نصابی و ہم نصابی سرگرمیوں کا خاص خیال رکھا جاتا ہے تاکہ اُمتِ محبوب صلی اللہ علیہ و سلم کے نونہالوں کے ایمان، عقائد و نظریات کا تحفظ ممکن بنانے کے ساتھ ساتھ ان کی دینی و اخلاقی تربیت کا سامان کیا جاسکے اور یہ معاشرے میں نمایاں مقام حاصل کرسکیں۔

یہی وجہ ہے کہ دُنیا بھر میں رہنے والے عاشقان رسول کی خواہش ہے کہ ان کے علاقوں میں بھی دارالمدینہ کے کیمپسز قائم کئے جائیں۔الحمد للہ!شعبہ دارالمدینہ کی خواہش ہے کہ دارالمدینہ کی توسیع کرتے ہوئے مزید کیمپسز قائم کئے جائیں۔

برطانیہ،امریکا، جنوبی افریقا، بنگلہ دیش اور نیپال کے بعد اب کینیا کے شہر ممباسامیں بھی  دارالمدینہ انٹرنیشنل اسلامک اسکول سسٹم کا آغاز ہورہا ہے۔

اس کیمپس میں CBCاور اسلامک نصاب کی خوبیوں کے ساتھ قرآنی تعلیم، کردار سازی، ذہنی اور جسمانی سرگرمیوں پر بھی خصوصی توجہ دی جائے گی۔

اس کیمپس میں نئے تعلیمی سال 2023ء میں طلبہ کی پلے گروپ پی پی ون، پی پی ٹو اور گریڈ1 میں رجسٹریشن کے لئے رابطہ کیجیے: Kizingo،نزد کوسٹ اکیڈمی، شہینا جیون روڈ، ممباسا، کینیا۔

سائنسی اداروں اور سائنس دانوں کا طلبہ کے ساتھ رابطہ قائم کرناکافی اہمیت کا حامل ہے۔ جب طلبہ سائنس دانوں کو ان کی تجربہ گاہوں میں دیکھتے ہیں تو وہ سائنسی سرگرمیوں میں حصہ لینے، انہیں بہتر طریقے سے کرنے اور سائنس کواپنا کیریئر بنانے پر غور کرتے ہیں۔ان دوروں کا بنیادی مقصدسائنس کو قابل رسائی اور دلچسپ بنانا ہے۔

گزشتہ روز لاہور ڈویژن کے سیکنڈری کیمپسز (دارالمدینہ انٹرنیشنل اسلامک اسکول سسٹم) کے طلبہ نے سینٹر فار انرجی ریسرچ اینڈ ڈویلپمنٹ (CEARD) کا دورہ کیا۔

سینٹر فار انرجی ریسرچ اینڈ ڈویلپمنٹ (CEARD) کے عملے نے طلبہ کو قابل تجدید توانائی کے ذرائع، اس کی پیداوار اور استعمال کے بارے میں آگاہ کیا۔

طلبہ اس دورے میں سائنسی ایجادات اور ان کے کام کرنے کے طریقے سے بھی واقف ہوئے نیز انہیں یہ بھی جاننے کا موقع ملا کہ ایئر کنڈیشن، سولر پلیٹس اور موسمی اسٹیشن کیسے کام کرتے ہیں اور ان کے معیار کی جانچ کیسے کی جاتی ہے۔بعدازاں طلبہ کو پاکستان میں توانائی کی بچت کے مختلف طریقوں اور توانائی کے منصوبوں سے بھی متعارف کروایا گیا۔(رپورٹ:غلام محی الدین ترک، اردو کانٹینٹ رائٹر سوشل میڈیا ڈیپارٹمنٹ دارالمدینہ، ہیڈ آفس کراچی، ویب ڈیسک رائٹر:غیاث الدین عطاری)