شعبہ اوقات الصلاۃ  دعوت اسلامی کے تحت یکم اگست 2023ء سے ایک ماہ کے فری آن لائن کورس کا آغاز کیا جارہا ہے جس میں شرکا کوچاند/سورج کے حساب سے نماز کا وقت نکالنے اور قبلہ ڈائریکشن معلوم کرنے کا طریقہ سکھایا جائے گا ۔

تمام عاشقانِ رسول، علمائے کرام و طلبہ ٔکرام نیز اسکول اور کالجز کے اسٹوڈنٹس و شائقینِ علم توقیت ، توقیت و فلکیات کورس میں درج ذیل داخلہ لنک کے ذریعے فارم سبمنٹ کروائیں ۔ https://forms.gle/zCizLYYJYfbSgJAv9

اہم ہدایات

1. تمام کالم پُر کرنا لازمی ہیں۔

2. جن احباب کا داخلہ ہوگیا انہیں فوری واٹس ایپ گروپ میں شامل کر دیا جائے گا۔

3. جو گروپ میں شامل نہ ہوئے انہیں 31 جولائی کی شام میسج کرکے وجہ بتا دی جائے گی ۔

4. اگر آپ گروپ میں شامل نہ کئے گئے اور نہ کوئی میسج یا میل موصول ہوئی تو 31 جولائی کی شام 3 بجے کے بعد پوسٹ پر دیئے گئے نمبر پر واٹس ایپ کے ذریعے رابطہ فرمائیں۔

نوٹ!

مکمل کورس کتاب ’’نصاب توقیت‘‘ سے پڑھایا جائے گا۔ لہٰذا مکتبۃ المدینہ سے کتاب حاصل کیجئے یا گھر بیٹھے منگوانے کے لئے پوسٹ میں دیئے گئے نمبر پر رابطہ کیجئے۔( کانٹینٹ:رمضان رضا عطاری)

ماہِ ذوی الحجۃالحرام کا چاند دیکھنا واجبِ کفایہ ہے، اس پر عمل کرتے ہوئے 19 جون 2023ء بروز پیر عالمی مدنی مرکز فیضانِ مدینہ کراچی میں شعبہ اوقات الصلوٰۃ دعوتِ اسلامی کے تحت اسلامی بھائیوں نے ذوی الحجۃالحرام 1444ھ کے چاند دیکھنے کا اہتمام کیا۔

اس موقع پر ماہرِ توقیت و فلکیات وسیم احمد عطاری ، شعبہ اوقات الصلوٰۃ دعوتِ اسلامی کے اراکین اور تخصص فی التوقیت کے طلبۂ کرام سمیت دیگر اسلامی بھائیوں بھی موجود تھے۔

اَلْحَمْدُ لِلّٰہ! شعبہ اوقات الصلاۃ (دعوتِ اسلامی) کی طرف سے شعبہ اوقات الصلوٰۃکےتیار کردہ اوقات 2020 سے مسجد کی ڈیجیٹل گھڑیوں میں انسٹال کرنے پر کام شروع کردیا گیا ہے۔ جہاں پر مساجد میں نمازیوں کو عبادات کرنے کی آسانی کے لئے دیگر سہولتیں فراہم کی جا رہی ہیں اور مساجد کی زینت و آرائش کے لئے جدید آلات سے مزین کیا جا رہا ہے وہاں پر نمازیوں کو جماعت کی ٹائمنگ سے آگاہ کرنے، اوقات ِنمازِ پنجگانہ کے شروع اور ختم ہونے کا وقت بتانے کے لئے آ ج کے دور میں تقریباً ہر مسجد میں ڈیجیٹل گھڑیاں (Salat Panal) موجود ہیں۔ عام طور پر اہل محلہ یا اہل ثروت اپنے مرحومین کے ایصال ثواب کے لئے ڈیجیٹل گھڑیاں مساجد کو ہدیہ کرتے ہیں۔ مگر عموماً دیکھا گیا ہے کہ ان گھڑیوں کے اوقات کارعلم توقیت کے اصول و ضوابط کے مطابق ٹھیک نہ ہو نے کی وجہ سے نماز روزہ جیسی عبادات بعض اوقات ضائع ہوجا تی ہیں کیونکہ ان گھڑیوں میں اوقات کی انسٹالیشن کے لئے جن سافٹ ویئرز کا استعمال ہوتا ہے عام طور پر ان میں اوقاتِ طلوع غروب کے لئے کیکولیشن میں بلندی کا بلکل بھی خیال نہیں کیا جاتا، اسی طرح یہ سافٹ ویئر گاؤں دیہات اور چھوٹے قصبوں کے لئے بھی کار آمد نہیں ہوتے جس کی بنیا دپر گاؤں دیہات والے گھڑیاں تو مسجد میں آویزاں کر لیتے ہیں لیکن ان گھڑیوں میں مطلوبہ مقام کا کوڈ نہ ہونے کی وجہ سے اس میں ٹائم غلط شو ہوتا ہے ۔ پھر اگرکچھ معلومات رکھنے والے افراد اس میں عرض بلد یا طول بلد ایڈ کر کے ٹائم ایڈجسٹ کر بھی لیں تو طلوع و غروب کے اوقات پھر بھی درست نہیں ہو پاتے۔ اب چونکہ نمازوں کا انحصار اسی پر ہوتا ہے لہٰذا نتیجۃً ان اوقات کے مطابق افطار کرنے پر خاص طور پر روزہ کے ضائع ہونے کا اندیشہ بڑھ جاتا ہے ۔

اس لئے شعبہ اوقات الصلوٰۃ اور مرکزی مجلس ِشوریٰ کے اراکین کے درمیان مشاورت سے یہ طے پایا کہ آئندہ سے باقاعدہ طور پر ان گھڑیوں میں دعوتِ اسلامی کے تیارکردہ اوقات کار انسٹال کئے جائیں۔ اور ان گھڑیوں کو ناکارہ ہونےاور مسلمانوں کے نماز روزے کو ضائع ہونے سے بچایا جائے ۔

ابھی تک دعوت اسلامی کے سینکڑوں مدنی مراکز اور مساجد میں اوقات کی انسٹالیشن ہو چکی ہے اور مزید کام جاری ہے۔

ڈیجیٹل گھڑیوں میں اوقات کی انسٹالیشن

شعبہ اوقات الصلوٰۃ ڈیجیٹل گھڑیوں میں اوقات اپنے 26 سالہ کلینڈرز کے مطابق تیار کر کے انسٹال کرتا ہے۔اسی وجہ سے اگر آپ نےاپنی گھڑی کے اوقات چیک کرنے ہوں تو کلینڈر کے اوقات کے ساتھ موازنہ کر کے چیک کریں۔ (نوٹ: ایپلی کیشن اور 26 سالہ کیلنڈر کے اوقات میں کچھ فرق ہوتا ہے اس کے بارے میں جاننے کے لئے مجلس سے رابطہ فرمائیں )

شعبہ اوقات الصلوٰۃ کے انسٹال کئے جانے والے اوقات کی خصوصیات پیش خدمت ہیں:

1-ڈیجیٹل گھڑیوں کے اوقات اعلیٰ حضرت رحمۃ الله علیه کی تحقیقات کے مطابق تیار کئے گئے ہیں۔

2-پہاڑی علاقوں کے اوقات میں بلندی کا اعتبار کیا گیا ہے تا کہ افطار درست وقت پر ہو۔

3-بڑے شہروں کے اوقات تیارکرنے میں شہر کے پھیلاؤ اور بلند عمارات کا خیال بھی رکھا گیا ہے جو کہ ضروری ہے۔

4-مساجد کی گھڑیوں میں اوقات متعلقہ گھڑی کے خاص شہر یا گاؤں اور دیہات کے مطابق تیار کر کے انسٹال کئے جاتے ہیں ۔

مجلس انسٹالیشن اپنی یہ سہولت اہلسنت کی تمام مساجد میں لگی گھڑیوں کے لئے مہیا کر رہی ہے ۔آپ بھی اپنے محلے کی مساجد میں اوقات کی انسٹالیشن کروا کر ان گھڑیوں اور نماز روزہ کو ضائع ہونے سے بچا کر صدقہ جاریہ حاصل کر سکتے ہیں۔

انسٹالیشن اور اپنی گھڑی میں پہلے سے انسٹال اوقات کی چیکنگ یا کسی بھی قسم کی معلومات کے کئے دیئے گئے واٹس ایپ نمبر پر رابطہ فرمائیں ۔ 03086773867

اس کے علاوہ نئی گھڑی خریدنے یا خرید کر ہدیہ کرنے کے لئے بھی مجلس سے مشورہ کر سکتے ہیں ۔ کیونکہ بعض اوقات مساجد کے لئے لوکل گھڑیاں خرید لی جاتی ہیں جس میں اوقات بھی نہیں انسٹال ہو پاتے اور گھڑی کی رپیرنگ اور اپڈیٹنگ کی بھی پرابلم آتی ہے ۔ ان تمام مسائل سے بچنے کےلئے آپ پہلے ہی مشورہ کر لیں تاکہ بعد میں ہونے والی پریشانی سے بچا جا سکے۔

مولانا باسط مصطفی ٰعطاری مدنی

رکن شعبہ اوقات الصلوٰۃ

سال میں 2 مرتبہ (28،27مئی اور 15،16 جولائی )سورج عین کعبہ معظمہ کے اوپر آتا ہے۔اس وقت کسی شے (Object) کے بننے والے سایے(Sun Shadow) کی مدد سے (مساجداور گھروں وغیرہ کے لیے)بآسانی درست سمت قبلہ معلوم کیا جاسکتا ہے۔

طریقہ : 28/27 مئی کو سعودی عرب کے وقت کے مطابق دن 12:18 اور پاکستان کے وقت کے مطابق دن 02:18 پر کسی بھی لکڑی یا سریے (Iron Rod) وغیرہ کو عموداً (Vertical)اس احتیاط سے کھڑا کریں کہ وہ کسی جانب جھکا نہ ہو۔کسی ڈوری کے سرے پر کوئی وزنی چیز باندھ کر بھی لٹکا سکتے ہیں۔

اب درج شدہ وقت پر بننے والے سائے پر کوئی نشان لگادیں۔ اب سائے کے نشان پر کھڑے ہو کر اس لکڑی ،سریے یا ڈوری کی جانب رُخ کرنے سے عین کعبہ کو رُخ ہو جائے گا۔(اگر یہ عمل 4,2منٹ قبل یا بعد بھی کیا تو کوئی حرج نہیں۔)

مسئلہ: اگر عین قبلہ سے سیدھی جانب (Right Side) یا الٹی جانب (Left Side) 45درجے کے اندر اندر نماز پڑھی تو درست ہوگئی۔ (بہارِ شریعت، ۳؍۴۸۷، حصہ ۳ ماخوذاً ، مکتبۃ المدینہ کراچی)

(چند مشہور ممالک اور ان میں درست سمتِ قبلہ معلوم کرنے کے اوقات کا جدول )

رمضان شریف ہو یا کوئی بھی اسلامی تہوار یہ کبھی سردیوں اور کبھی گرمیوں میں آئے گا کیونکہ موسم کا تعلق سورج سے اور اسلامی تہواروں کا تعلق چاند سے ہے۔

شمسی سال اور عیسوی سال میں فرق: شمسی (یعنی عیسوی / انگریزی) سال قمری (یعنی ہجری / اسلامی) سال سے 10 دن 21 گھنٹے بڑا ہوتا ہے۔ یوں اسلامی تہوار ہر سال 10 یا 11 دن جلد آتا ہے۔

اگر اس بار 23 مارچ 2023 ءکو رمضان شریف کا آغاز ہوا تو آئندہ سال 10 یا 11 دن قبل یعنی 12 یا 13 مارچ کو رمضان شروع ہوگا۔ تقریباً 33 سالوں پر اس کا دور مکمل ہو گا یعنی رمضان شریف 33 سال بعد 2056 ءمیں دوبارہ 13 مارچ کے لگ بھگ آئے گا۔(رپورٹ: شعبہ اوقات الصلاۃ (دعوت اسلامی)،کانٹینٹ:رمضان رضا عطاری)

الحمد اللہ ! دعوت اسلامی کے شعبے اوقات الصلوۃ کے آفیشل پیج پر پاکستان اور دیگر ممالک کے لئے ماہِ رمضان کے اوقات سحر وافطار کے نقشہ جات اپلوڈ کردیئے گئے ہیں ۔

اپنے اپنے علاقے کا نقشہ سحر و افطار حاصل کرنے کے لئے نیچے دیئے ہوئے لنکس پر کلک کریں ۔

Facebook link

https://www.facebook.com/PrayerTimingsDepartment?mibextid=ZbWKwL

Google Drive link

https://drive.google.com/drive/folders/13kRyaWcO8O1kJPOsCG8wqFfBSAZXIEZJ?usp=sharing

دعوت اسلامی کےشعبہ اوقات الصلوۃ کے زیر اہتمام 03 تا 09 مارچ 2023ء سے  6دن پر مشتمل ”توقیت و فلکیات کورس“شروع ہوچکا ہے۔

یہ کورس پاکستان میں 7 مقامات عالمی مدنی مرکز فیضان مدینہ کراچی ،فیضان مدینہ خان پور، فیضان مدینہ رحیم یار خان ، جامعۃ المدینہ فیضان مدینہ حیدرآباد ، جامعۃ المدینہ فیضان مدینہ بھکر ، فیضان مدینہ ملتان اور جامعۃ المدینہ ڈیفنس لاہور میں کروایا جا رہا ہے جس کا دورانیہ صبح 8:30 بجے سے دوپہر 12:30 بجے تک ہے۔

علمِ توقیت کورس میں شرکت کرنے والے اسٹوڈنٹس کو درجِ ذیل چیزیں سکھائی جائیں گی۔

٭نماز و سحر و افطار کے اوقات نکالنے کے طریقے ٭ممالک کی گھڑیاں آپس میں مختلف کیوں ہوتی ہیں؟ ٭دنیا کے کسی بھی مقام کے لئے سمتِ قبلہ کیسے معلوم کیا جائے؟ ٭6ماہ کا دن، 6ماہ کی رات کہاں اور کیوں ہوتی ہے؟ ٭نقشہ نظام الاوقات کیسے تیار ہوتے ہیں؟ ٭رات دن کیسے بنتے اور چھوٹے بڑے کیوں ہوتے ہیں؟ ٭سردیاں اور گرمیاں کیسے آتی ہیں؟ ٭کمپاس کیسے کام کرتا ہےاور استعمال کاطریقہ؟ ٭رمضان المبارک کبھی سردیوں اور گرمیوں میں کیوں آتا ہے؟۔ اس کے علاوہ اور بہت کچھ ۔۔۔۔

نوٹ: اِن شآءَ اللہ عَزَّوَجَلَّ! کورس کے آخر میں ٹیسٹ پاس کرنے والوں کو سند بھی دی جائی گی، نیز ممتاز کیفیت (A Grade) والوں کو توقیت کے اگلے درجات میں بالکل فری پڑھنے کا (آن لائن یا بالمشافہ) موقع بھی دیا جائیگا۔اس کے علاوہ کورس کرنے والوں کو قیام و طعام کی سہولت بھی فراہم کی جائے گی۔

کورس میں داخلہ لینے کے لئے اور مزید معلومات کے لئے ان نمبرز پر رابطہ فرمائیں:

03431164026

03177799717

دعوتِ اسلامی کے مدنی مرکز فیضانِ مدینہ کراچی میں شعبہ اوقات الصلوۃ کے تحت ہونے والے پہلے تخصص فی التوقیت کے کامیاب ہونے کے بعد دوسرے تخصص فی التوقیت کی تیاریاں جاری ہیں۔

اسی سلسلے میں پچھلے دنوں نگرانِ شعبہ اور ماہرِ علمِ توقیت مولانا وسیم احمد عطاری مدنی نے پنجاب پاکستان کے مختلف دورۂ حدیث شریف کا دورہ کیا جہاں انہوں نے طلبۂ کرام کے درمیان علمِ ہیئت و علمِ توقیت کی اہمیت پر سنتوں بھرے بیانات کئے۔

معلومات کے مطابق جن دورۂ حدیث شریف میں نگرانِ شعبہ نے طلبۂ کرام کے درمیان سنتوں بھرے بیانات کئے ان کی تفصیل درج ذیل ہے:

23 جنوری 2023ء کو صبح 9:00 بجے فیصل آباد اور بعد نمازِ ظہر اوکاڑہ کے دورۂ حدیث شریف میں۔

24 جنوری 2023ء کو صبح 8:30 بجے جوہر ٹاؤن لاہور اور دن 12 بجے کاہنہ نو کے دورۂ حدیث شریف میں۔

25 جنوری 2023ء کو سیالکوٹ کے دورۂ حدیث شریف میں۔

26 جنوری 2023ء کو صبح 8:30 بجے گجرانوالہ اور دن 12 بجے گجرات کے دورۂ حدیث شریف میں۔

27 جنوری 2023ء کوملتان کے دورۂ حدیث شریف میں۔

28 جنوری 2023ء کو حیدرآباد کے دورۂ حدیث شریف میں۔

بعدازاں طلبۂ کرام اور اساتذۂ کرام نے علمِ ہیئت و علمِ توقیت میں بہت دلچسپی کا اظہار کرتے ہوئے اچھی اچھی نیتیں کیں۔

واضح رہے داخلے کے خواہشمند طلبۂ کرام کی تعداد ایک سو سے زائد ہو چکی ہے جن کا شوال المکرم کی ابتداء میں انٹری ٹیسٹ ہوگا۔(کانٹینٹ:غیاث الدین عطاری)

22 دسمبر کو شمالی دنیا بشمول پاکستان میں سال کا سب سے چھوٹا دن اور لمبی رات  ہوتی ہے جبکہ اسی تاریخ کو جنوبی دنیا کے لئے سال کا سب سے بڑا دن اور چھوٹی رات ہوتی ہے ۔

تفصیلات کے مطابق دعوتِ اسلامی کے شعبہ اوقاتُ الصلوٰۃ کے ماہرین نے اس سلسلے میں ایک رپورٹ جاری کی ہے جس میں 22 دسمبر کوچھوٹا دن اور لمبی رات ہونے کیوجہ بیان کی ہے ۔

رپورٹ یہ ہے کہ ” سورج چھ ماہ شمالی دنیا اور چھ ماہ جنوبی دنیا میں گزارتا ہے۔جب سورج خَطِّ اِستواء (Equator)سے شمال میں آتا ہے تو شمالی دنیا (بشمول پاکستان )کے دن بڑے ہوتے ہیں ۔اب جو مقام خَطِّ اِستواء سے جتنا دور ہوگا اس کا دن بھی اتنا ہی بڑا ہوگا ۔اور ان چھ ماہ میں دوسری طرف جنوبی دنیا میں جو مقام خَطِّ اِستواء سے جتنی دوری پر ہوگا اس کی رات اتنی بڑی ہوگی اور دن اتنا چھوٹا ہوگا۔

اب چھ ماہ کے بعد جب سورج جنوبی دنیا میں جائے گا تو معاملہ الٹا ہوجائے گا یعنی جنوبی دنیا میں جو مقام خَطِّ اِستواء سے جتنا دور ہوگا اس کا دن اتنا بڑا اور رات چھوٹی ہوگی ۔ اور ان چھ ماہ میں دوسری طرف شمالی دنیا میں جو مقام جتنی دوری پر تھا اس کا دن اتنا چھوٹا اور رات بڑی ہوگی۔“ 

10 دسمبر2022ء بروز ہفتہ شعبہ اوقات الصلوٰۃ کے نگران ماہرِ علمِ توقیت محمد وسیم عطاری اور رکنِ مجلس عبدالقادر عطاری مدنی نے کراچی میں قائم مدارسِ اہلِ سنت کا دورہ کیا۔

اس موقع پر شعبہ رابطہ بالعلما پاکستان سطح کے نگران اور کراچی کے ذمہ داران بھی ہمراہ تھے۔یہ وفد سب سے پہلے جامعہ نعیمیہ میں مفتی منیب ُالرحمن صاحب دامت برکاتہم العالیہ کی بارگاہ میں حاضر ہوا اور ملاقات کا شرف حاصل کرکے انہیں کتاب نصابِ توقیت تحفے میں پیش کی۔

پھر دار ُالعلوم امجدیہ حاضری دی اور وہاں مفتی ندیم اقبال سعیدی صاحب اور دیگر احباب سے ملاقات کا شرف حاصل کرکے انہیں مکتبۃُ المدینہ کی مطبوعہ کتاب نصاب توقیت تحفے میں پیش کی اور وہاں اکابر علما ئے کرام کے مزارات شریف پر فاتحہ خوانی و عائے مغفرت کی ۔

یہاں سے رخصتی کے بعد فیضانِ مدینہ کے امام صاحب مولانا جنید عطاری مدنی نے بھی وفد کو جوائن کیا اور گلشنِ اقبال میں قائم جامعہ انوارُالقرآن میں حضرت علامہ محمد رضوان احمد نقشبندی صاحب دامت برکاتہم العالیہ سے ملاقات کے بعد انہیں تحفہ میں کتاب پیش کی ۔

وفد کی اگلی منزل ملیر میں موجود دار العلوم مجددیہ نعیمیہ تھا۔ جہاں مفتی نذیر مجددی نعیمی صاحب دامت برکاتہم العالیہ سے ملاقات و تحفے کا سلسلہ ہوا اور پھر شیخ الحدیث مفتی محمد جان مجددی نعیمی صاحب دامت برکاتہم العالیہ کی زیارت اور ملاقات کا شرف حاصل ہوا۔ قبلہ مفتی صاحب نے تمام اراکین کو سندھی اجرک عطا فرمائی اور کراچی کی صف اول کی لائبریریوں میں سے اپنی قدیم لائبریری کا وزٹ بھی کروایا۔ حضرت کی شفقتیں اور دعائیں لینے کے بعد وفد نے جامعہ مجددیہ سے متصل مزارات شریف پر بھی حاضری دی۔(کانٹینٹ: رمضان رضا عطاری)

گزشتہ ماہ  26 ستمبر تا 25 اکتوبر 2022 ء تک دعوتِ اسلامی کے شعبہ اوقاتُ الصلوٰۃ کے تحت آن لائن 19 روزہ اولین علم توقیت کورس برائے خواتین ہواجس میں درجنوں عالمات و معلمات نے شرکت کی۔

اس کورس میں پانچوں نمازوں ،سحر و افطار کے اوقات و سمتِ قبلہ سائنٹیفک کیلکولیٹر کی مدد سے بذریعہ کلیہ جات نکالنے کا طریقہ سکھایا گیا نیز علم توقیت سے متعلق دیگر مفید معلومات مثلا نقشہ نظام الاوقات کیسے بنایا جاتا ہے،پریئر ٹائم ایپلی کیشن کا درست استعمال کا طریقہ کار سمجھایا گیا۔

آخر میں آن لائن امتحان لیا گیا جس میں کامیاب ہونے والی 17 طالبات کو اسناد پیش کیں گئیں۔اس کے لئے 25 اکتوبر 2022ء کو تقسیمِ اسناد کا خصوصی آن لائن سیشن منعقد کیا گیا۔اس سیشن میں صاحبزادیِ عطار سلمہا الغفار،عالمی مجلسِ مشاورت کی ذمہ دارہ اور فیضان آن لائن کی عالمی ذمہ دارہ باجیوں نے شرکت کرتے ہوئے تربیتی مدنی پھول دیئے اور حوصلہ افزائی فرماتے ہوئے صاحبزادیِ عطار سلمہا الغفار نے 80 فیصد یا اس سے زائد نمبر حاصل کرنے والی طالبات کے ناموں کا اعلان کیا۔

نوٹ: پہلے لیول میں ممتاز مع الشرف ہونے والی طالبات کا سیکنڈ لیول عنقریب شروع کیا جائے گا۔

الحمد للہ! مجلس ہر ماہ یہ کورسزکروانے کا ارادہ رکھتی ہے۔لہذا دسمبر 2022ء میں ہونے والے کورسز کے لئے نئے داخلے کی پوسٹ 15 نومبر 2022ء کو جاری کی جائے گی۔ لہذا داخلہ لینے کی خواہش مند اسلامی بہنیں پوسٹ میں دیئے گئے نمبر پر رابطہ کریں۔

دعوت اسلامی کے شعبہ توقیت ’’ اَوقاتُ الصَّلٰوۃ ‘‘ نے علم توقیت کے اصول و قوانین کے مطابق بے شمار شہروں کے اَوقاتُ الصَّلٰوۃ کے نقشہ جات تیار کئے ہیں ۔

اس سلسلے میں عاشقان رسول کے لئے شعبہ توقیت اَوقاتُ الصَّلٰوۃ کی جانب سے کچھ عرصہ قبل شعبہ آئی ٹی کے تعاون سے ایک ایسا سافٹ وئیر بنام ’’ اَوقاتُ الصَّلٰوۃ ‘‘ بھی متعارف کروایا گیا تھا جو کمپیوٹر اور موبائل وغیرہ پر درست نمازوں کے وقت کی نشاندہی میں حد درجہ مفید ہے۔ مزید ایک قدم بڑھاتے ہوئے اب اس شعبہ نے انتھائی محنت کے ساتھ جدید اصول و قوانین پر مشتمل ایک کتاب بنام ’’ نصاب توقیت‘‘ تیار کی ہے۔

کتاب نصاب توقیت کی چند امتیازی خوبیاں درج ذیل ہے۔

1) انداز تفہیم نہایت عمدہ ، آسان تحقیقی ہے تاکہ اس فن کا ابتدائی طالب علم ہو یا کچھ جاننے والا سب استفادہ کر سکیں۔

2) اصطلاحات کی تعریفات دی گئی ہیں نیز اصطلاحات کو انگریزی میں بھی لکھا گیا ہے۔

3) اصطلاحات اور فارمولے سمجھانے کےلئے رنگین تصاویر کو کتاب کی زینت بنایا گیا ہے۔

4) متفرقات کے باب میں اس فن کے متعلق دیگر دلچسپ معلومات بھی کتاب کا حصہ ہیں۔

5) اعلیٰ حضرت امام اہل سنت امام احمد رضا خان بریلوی رحمۃ الله علیہ کی تحقیقات کی روشنی میں قواعد کو بیان کیا گیا ہے۔

6) استخراج اوقات اور سمت قبلہ نکالنے کےلئے کیلکولیٹر ، کمپاس اور دیگر جدید آلات کے استعمال کے طریقے دیئے گئے ہیں۔

7) سورج کو دیکھ کر گھڑی کا وقت درست کرنے کا نادر قاعدہ اس کتاب کا خاص تحفہ ہے۔

8) میل شمس اور بلدی زوال کے ضروری جدول اور دنیا کے مشہور شہروں کے طول و عرض بھی کتاب کے آخر میں شامل ہیں۔

کتاب نصاب توقیت کے مصنف:

ماہرِ علمِ توقیت محمد وسیم عطاری

ابو رضا مولانا عثمان شریف عطاری مدنی