لوگوں  کے دلوں کو علمِ دین کے نور سے منور کرنے اور انہیں دینِ اسلام کے بارے میں معلومات فراہم کرنے کے لئے عاشقانِ رسول کی عالمگیر تحریک دعوتِ اسلامی کے تحت مدنی مذاکروں کا انعقاد کیا جاتا ہے جس میں مختلف شعبوں سے تعلق رکھنے اسلامی بھائی اپنے دینی و دنیاوی معاملات کے حوالے سے سوالات کرتے ہیں اور امیرِ اہلِ سنت اُن سوالات کے جوابات ارشاد فرماتے ہیں۔

اسی سلسلے میں 28 اکتوبر 2023ء بمطابق 13 ربیع الآخر 1445ھ بروز ہفتہ کی شب عالمی مدنی مرکز فیضانِ مدینہ کراچی میں عاشقانِ رسول کے لئے مدنی مذاکرے کا انعقاد کیا گیا جس میں ملک و بیرونِ ملک سے کثیر اسلامی بھائی براہِ راست اور بذریعہ مدنی چینل شریک ہوئے۔

معمول کے مطابق مدنی مذاکرے کا آغاز تلاوت و نعت سے کرنے کے بعد عاشقانِ رسول کی جانب سے مختلف سوالات کا سلسلہ ہوا جن کے امیرِ اہلِ سنت حضرت علامہ مولانا محمد الیاس عطار قادری رضوی ضیائی دامت بَرَکَاتُہمُ العالیہنے علم و حکمت سے بھرے جوابات ارشاد فرمائے۔اُن سوال و جواب میں سے بعض درج ذیل ہیں:

سوال: ناشکری سے کیسے بچا جائے ؟

جواب: اللہ پاک کی نعمتوں کو یادکیا جائےاورشکربجالایا جائے،شکرکے فضائل پڑھیں،یادرہے !جوشکرکرتاہے اسے اورزیادہ ملتاہے ،شکرکرنے میں ثواب بھی ہے۔اللہ پاک کی بے شمارنعمتیں ہیں ۔سانس لینا اورسانس باہرنکالنا دونوں نعمتیں ہیں ،پانی بھی نعمت ہے ،الغرض بے شمارنعمتیں ہیں اوراللہ پاک نے بِن مانگے عطافرمائی ہیں۔ سچی بات تو یہ ہے کہ ایمان کی دولت بھی بغیرمانگے عطافرمائی ،ہم مسلمانوں کے گھرپیداہوگئے ،الحمدللہ !ہم مسلمان ہیں ورنہ صحابہ کرام علیہم الرضوان نے اس کے لئے کتنی تکلیفیں برداشت کیں !اللہ پاک کی اتنی نعمتیں ہیں کہ ان کا شمارنہیں، اس کا جتنا شکراداکریں کم کم اورکم ہے ۔اللہ پاک ہمیں شکرگزاربندہ بنائے ۔ ناشکری ہلاکت میں مبتلاکرتی اور بربادکرتی ہے ۔ناشکری سے ایمان بھی ضائع ہوسکتاہے ۔جیسےبلم بن باعوراء کا ایمان بربادہوگیا،اس کی ایک وجہ ناشکری بھی تھی۔ مکتبۃ المدینہ کا رسالہ ”شکرکے فضائل“ کا مطالعہ کریں ۔

سوال:کیا کوئی بندہ احسان کرے تو اس کا بھی شکریہ اداکرنا چاہیئے ؟

جواب:جی ہاں ! نبیِّ کریم صلَّی اللہ علیہ واٰلہٖ وسلَّم نے فرمایا: لَايَشْكُرُ اللہَ مَنْ لَايَشْكُرُ النَّاس یعنی جولوگوں کا شکر ادا نہیں کرتا وہ اللہ پاک کا بھی شکر ادا نہیں کرتا۔(سنن ابی داؤد ، 4 / 335 ، حدیث : 4811)دنیاوی طورپربھی لوگوں کا شکریہ ادا نہ کرنا معیوب سمجھا جاتا ہے، اگر کوئی کسی کا شکریہ ادا نہ کر ے تو بسا اوقات لوگ اچھا نہیں سمجھتے ۔

سوال : دومنہ والاشخص کون ہوتاہے ؟

جواب : وہ شخص جوکسی کے پاس جاکر ایک بات کرے اوردوسرے کے پاس جاکر دوسری بات یعنی چغلیاں کھائےاورلوگوں میں نفرتیں پیداکرے ، حدیث پاک میں ایسے شخص کی مذمّت آئی ہے اوراسے منافق کی صفت قراردیا گیا ہے ۔

سوال: کیا فجرکی نمازکے بعد سونے سے رزق میں بےبرکتی ہوتی ہے ؟

جواب:حدیث پاک میں ہے کہ رزق کی طلب کے اوقات میں مت سویا کرواوریہ وقت فجرکی نمازاداکرنے کے بعد سورج طلوع ہونے تک ہے ۔حضرت انس رضی اللہ عنہ سے اس کی وضاحت طلب کی گئی تو فرمایا : اس وقت 70 مرتبہ سُبْحانَ اللہ ،70مرتبہ اللہ اکبراور70مرتبہ اِسْتِغْفار(اَسْتَغْفِرُاللہ)پڑھ لیاجائے کیونکہ اس وقت رزق تقسیم کیاجاتاہے۔( مسند الفردوس للدیلمی ،رقم 3868) اسی طرح شام کے وقت نیک اعمال کی ترغیب ہے کہ اس وقت اعمال اٹھائے جاتے ہیں ۔

سوال: صدقہ و خیرات کی قبولیت کا کیا معیار ہے؟

جواب:صدقہ وخیرات کرنا نیک عمل ہے اور ہر نیک عمل کے لئے اخلاص قبولیت کی کنجی(چابی/Key) ہے، جتنا اِخلاص زیادہ ہوگا اتنا ہی ثواب زیادہ ملے گا۔

سوال:لوگ کہتے ہیں موسم کے بدلنے سے صحت خراب ہوتی ہے اوربعض لوگ موسم کو بُراکہتےہیں ،ایسا کہنا کیسا؟

جواب:موسم کے بدلنے سے صحت پر اثرات تو مرتب ہوتے ہیں مگراسے بُرانہیں کہنا چاہیئے کیونکہ موسم بھی اللہ پاک تبدیل فرماتاہے۔

سوال : کیاانسان کے نام کا اس کی زندگی پر کوئی اثرپڑتاہے ؟

جواب :جی ہاں!نام سخت ہو تو یہ سختی نسلوں میں بھی جاسکتی ہے ۔

سوال: کیا عصرتامغرب مطالعہ نہیں کرسکتے ؟

جواب: عصرتامغرب مطالعہ کرنے(یعنی کتابیں و رسائل پڑھنے) میں کوئی حرج نہیں ،جن علما نے منع کیا ہے اس کی وجہ طبی ہے ،اس زمانے کے اعتبارسے ہے کہ اس وقت سورج کی روشنی کم ہوجاتی تھی ،روشنی کا انتظام نہیں ہوتاتھا ۔اب تو یہ وجہ بھی نہیں کہ بجلی کے ذریعے روشنی حاصل کی جاسکتی ہے ۔

سوال: اِس ہفتے کارِسالہ ” امیر اہلسنّت کے 121 ارشادات “ پڑھنے یاسُننے والوں کوجانشین امیراہل سنت مدظلہ العالی نے کیا دُعا دی ؟

جواب: یاربَّ المصطفٰے! جو کوئی 14 صفحات کا رسالہ ”امیر اہلسنت کے 121 ارشادات“ پڑھ یا سُن لے ،اُسے اپنی اصلاح کرنے کے ساتھ ساتھ دوسروں کوبھی نیکی کی دعوت دینے اور بُرائی سے بچانے والا بنا۔اٰمِیْن بِجَاہِ خاتم النَّبِیِّین صلَّی اللہ علیہ واٰلہٖ وسلَّم ۔

21 اکتوبر 2023ء بمطابق 6 ربیع الآخر 1445ھ بروز ہفتہ کی شب عالمی مدنی مرکز فیضانِ مدینہ کراچی میں عاشقانِ رسول کی دینی تحریک دعوتِ اسلامی کے تحت مدنی مذاکرے کا انعقاد کیا گیا جس میں پاکستان کے مختلف شہروں سے آئے ہوئے کثیر عاشقانِ رسول براہِ راست اور بذریعہ مدنی چینل شریک ہوئے۔

تلاوتِ قراٰن سے مدنی مذاکرے کا آغاز کرنے کے بعد نعتِ خواں اسلامی بھائیوں نےنذرانۂ عقیدت پیش کر کے تمام شرکا کے دلوں کو منور کیا۔

تلاوت و نعت کے بعد سوال و جواب کا سلسلہ ہوا جس میں عاشقانِ رسول نے حضور غوثِ اعظم کی سیرت سمیت دیگر مختلف دینی، دنیاوی اور شرعی حوالے سے سولات کئے جس کے امیرِ اہلِ سنت دامت بَرَکَاتُہمُ العالیہنے علم و حکمت بھرے جوابات دیئے۔

مدنی مذاکرے میں ہونے والے سوال و جواب میں بعض درج ذیل ہیں:

سوال:بے حسی کا کیامعنیٰ ہے ؟

جواب:کسی بات کا احساس نہ ہونا۔بعض لوگ اہم بات کو بھی سنجیدگی سے نہیں لیتے مثلاًکوئی گنا ہ ہوگیا تو اس پر بھی انہیں شرمندگی نہیں ہوتی ۔احساس غوروخوض کرنے اورسوچنے سے پیداہوسکتاہے ۔

سوال:سادگی کس طرح اختیارکی جائے ؟

جواب: اللہ پاک کے آخری نبی،محمدِ عربی صلی اللہ علیہ والہ وسلم کی سادگی بے مثال تھی ۔سادگی کی ایک صورت یہ ہے کہ بندہ قیمتی لباس پہن سکتاہو مگروہ کم قیمت لباس پہنے تویہ کارِ ثواب ہے ۔موقع کے مطابق قیمتی لباس بھی پہنا جاسکتاہے،یہ سادگی کے خلاف نہیں البتہ مرد چمکیلا اورشوخ لباس نہ پہنے۔میرااپنا مزاج سادگی کاہے ۔

سوال :دل آزاری سے کیا مراد ہے؟ اس کا کیا حکم ہے ؟

جواب :دل آزاری کا مطلب ہے دل دکھانا ۔ناحق کسی کادل دکھانا گناہِ کبیرہ،حرام اور جہنم میں لے جانے والا کام ہے ۔

سوال: حضورغوثِ پاک شیخ عبدالقادر جیلانی رحمۃ اللہ علیہ کی والدہ کا کیا نام ہے ؟

جواب: آپ کی والدہ کا نام فاطمہ اورکنیت اُمُّ الخیر تھی ۔دونوں کو ملائیں تو یوں کہیں گے :حضرت اُمُّ الخیرفاطمہ رحمۃ اللہ علیہا۔

سوال: سورۂ اخلاص(قُلْ ہُوَ اللہُ اَحَد) پڑھنے کے کیا فوائدہیں ؟

جواب: سورۂ اخلاص سے محبت کرنے والاجنت میں جائےگا،اس سورت کو3مرتبہ پڑھیں گے تو ایک قرآنِ کریم پڑھنے کاثواب ملے گا۔ان شاۤء اللہُ الکریم

سوال:حضرت خواجہ غلام فریدرحمۃ اللہ علیہ کون تھے ؟

جواب:آپ کوٹ مٹھن شریف(پنجاب) والے صوفی بزرگ اور صاحبِ دیوان شاعر ہیں ۔میں نے ان کے مزارپر حاضری دی ہے ۔

سوال: اِس ہفتے کارِسالہ ” غوثِ پاک کا شوقِ علم دِین “ پڑھنے یاسُننے والوں کوامیراہل سنت دامت برکاتہم العالیہ نے کیا دُعا دی ؟

عاشقانِ رسول کی دینی تحریک دعوتِ اسلامی کے تحت 28 ربیع الاول 1445ھ بمطابق 14 اکتوبر 2023ء ہفتہ کی شب عالمی مدنی مرکز فیضانِ مدینہ کراچی میں مدنی مذاکرے کا انعقاد کیا گیا۔

مدنی مذاکرے کا آغاز معمول کے مطابق تلاوتِ قراٰن اور نعتِ رسولِ مقبول صلی اللہ علیہ و سلم سے ہوا جبکہ شیخ طریقت امیر اہلسنت علامہ محمد الیاس عطار قادری دامت بَرَکَاتُہمُ العالیہ نے عاشقانِ رسول کی جانب سے ہونے والے سوالات کے جوابات دیئے۔

مدنی مذاکرے کے چند مدنی پھول ملاحظہ کیجئے:

سوال: مایوسی کا کیامطلب ہے ؟

جواب: مایوسی کئی قسم کی ہوتی ہے ،بعض اوقات بندہ کوئی کام باربارکرتاہے مگراس کام کو نہیں کرپاتاجس سے وہ مایوس ہوجاتاہے کہ یہ کام مجھ سے نہیں ہوگا ۔یہ مایوسی خطرناک نہیں ۔جو مایوسی خطرناک ہے وہ اللہ پاک کی رحمت سے مایوس ہونا ہے ۔اللہ پاک کی رحمت سے کبھی بھی مایوس نہیں ہوناچاہئے۔ اللہ پاک سے توبہ کرتے رہناچاہئے،اس کی رحمت اُس کے غضب پر حاوی ہے ۔

سوال:حدیثِ قدسی کسے کہتے ہیں؟

جواب:حدیث ِقدسی سے مرادیہ ہے کہ وہ کلمات جو زبان ِمصطفیٰ (صلی اللہ علیہ والہ وسلم )سے اداہوں مگروہ فرمان اللہ پاک کا ہو۔

سوال : بات بات پر قسم کھانا کیساہے ؟

جواب : قسم کی کثرت نہیں کرنی چاہئے ،امام شافعی رحمۃ اللہ علیہ نے کبھی سچی قسم بھی نہیں کھائی ۔سچی قسم بھی بِلاضرورت نہ کھائی جائے ۔زیادہ قسمیں کھانے سے عزت میں بھی کمی واقع ہوتی ہے ۔بہت ڈرڈر کربڑی احتیاط کے ساتھ گفتگوکی جائے ۔زیادہ گفتگوکرنے والاہوسکتاہے زبان سے کئی گناہ کر ڈالتاہو۔آجکل حالات اتنے بگڑگئے ہیں کہ گویا لوگ مٹھیاں بند کرکے جہنم کی طرف بھاگے چلے جارہے ہیں ۔

سوال: کیا بزرگی کا تعلق عمراورمالداری کا تعلق مال سے ہے ؟

جواب: نہیں ،بزرگی علم وعقل سے ہوتی ہے عمرسے نہیں ،مالداری دل سے ہوتی ہے مال سے نہیں ہوتی ۔

سوال: سمجھانے کا اندازکیساہونا چاہئے ؟

جواب: مُصْلِح (سمجھانے والے )تو بہت ملیں گے مگردرست سمجھانے والے کم ہیں ،ہربیماری کاعلاج آپریشن نہیں ہوتا،عموماًسمجھانے والے کا اندازجارحانہ ہوتاہے۔ مصلحانہ وحکیمانہ اورنرم نہیں ہوتا۔مدنی قافلے میں سفر، نیک اعمال کے رسالے پر عمل اورامام غزالی رحمۃ اللہ علیہ کی کتابیں پڑھتےرہنے سے سمجھانے کا درست اندازآسکتاہے ۔

سوال: بڑی گیارہویں شریف کے مہینے( ربیع الاخر )میں نفل روزے رکھنے والوں کے لیےآپ کیا فرماتے ہیں؟

جواب: بڑی گیارہویں شریف کے مہینے میں نفل روزے رکھنے والوں کے لیے ایک پیکج (Package)بنایا گیاہے جس میں 11 روزے رکھنے والاممتازکیفیت ،6 والابہتر کیفیت اور4 والا مناسب کیفیت کے درجے میں شمار ہوگا ۔

سوال : کراچی شہر کے بارے میں آپ کیا فرماتے ہیں ؟

جواب : کراچی پاکستان کےلیے عُروسُ الْبِلاَد(شہروں کی دُلہن)ہے ۔مدارس المدینہ( کراچی) سے سورۂ خلاص ،درودشریف وغیرہ کی کارکردگی فوراًآنا شروع ہوجاتی ہے ،جامعۃ المدینہ( کراچی) سےبھی کارکردگی آتی ہے ۔

سوال: چاندگہن کے وقت کیا کسی چیز کے کاٹنے سے کوئی نقصان ہوتاہے ؟

جواب: نہیں ، ایسی کوئی بات نہیں ۔

سوال: کیا ہر ماہ مدنی قافلے میں سفرکے لیے تاریخ فکس کر لینی چاہئے؟

جواب: جی ہاں ! ہرکسی کو چاہئے کہ کوئی جمعہ(جمعہ،ہفتہ،اتوار) مدنی قافلے میں سفرکے لیے فکس کرلے ،اس طرح نہ کیا تو پھر سفرکرنا بُھول بھی سکتاہے ۔

سوال: اِس ہفتے کارِسالہ ” واہ کیا بات غوثِ اعظم کی “ پڑھنے یاسُننے والوں کوامیراہل سنت دامت برکاتہم العالیہ نے کیا دُعا دی ؟

جواب: یاربَّ المصطفٰے! جو کوئی 28 صفحات کا رسالہ ”واہ کیا بات غوثِ اعظم کی “ پڑھ یا سُن لے، اُسے بد عقیدگی اور بڑے خاتمے سے بچااور اُس کی ماں باپ سمیت بے حساب مغفرت فرما۔اٰمِیْن بِجَاہِ خاتم النَّبِیِّین صلَّی اللہ علیہ واٰلہٖ وسلَّم ۔

دینِ اسلام کی تعلیمات پر عمل کرتے ہوئے زندگی گزارنے اور ضروریاتِ دین  سے لوگوں کو آگاہ کرنے والی عاشقانِ رسول کی دینی تحریک دعوتِ اسلامی کے تحت 21 ربیع الاول 1445ھ بمطابق 07 اکتوبر 2023ء بروز ہفتہ کی شب عالمی مدنی مرکز فیضانِ مدینہ کراچی میں مدنی مذاکرے کا انعقاد کیا گیا۔

مدنی مذاکرے کا آغاز معمول کے مطابق تلاوتِ قراٰن اور نعتِ رسولِ مقبول صلی اللہ علیہ و سلم سے کیا گیاجبکہ عاشقانِ رسول کی جانب سے مختلف سوالات کا بھی سلسلہ ہوا۔

اس دوران عاشقِ رسول و بانیِ دعوتِ اسلامی حضرت علامہ مولانا محمد الیاس عطار قادری رضوی ضیائی دامت بَرَکَاتُہمُ العالیہنے عاشقانِ رسول کے سوالات کے جوابات دیئے اور انہیں خوشگوار مدنی پھولوں سے نوازا جن میں سے بعض درج ذیل ہیں:

سوال: ملنساری اورخوش اخلاقی کی کیا اہمیّت ہے ؟

جواب: واقعی ملنساری اورخوش اخلاقی بہت بڑی چیز ہے ،اس سے لوگ جلدمانوس ہوجاتے ہیں ،ان کی دل جوئی ہوتی ہے،لوگ قریب آتے ہیں ،ملنسار بننا چاہیئے ،سلام کو عام کرنا چاہیئے اورمسکرا کر ملاقات کرنی چاہیئے ۔

سوال:محبت کی چابی(Key) کیا ہے ؟

جواب:ملاقات کے وقت سلام کرنا محبت کی چابی ہے ۔کسی ناراض سے مسکراکر سلام کریں گےتو ناراضی دورہوجائے گی یا بہتراثرات ضرورمرتب ہوں گے۔سلام میں سلامتی کی دعاہے، یہ کتنی پیاری اورجامع دعا ہے۔سلام کو عام کرنا چاہیئے۔ اگرگھرمیں بھی سلام سلام ہوتا رہے گا تو گھرامن کا گہورا بن جائے گا،سلامتی گھرمیں ڈیرے ڈال لے گی ،بےبرکتی دورہوجائے گی،جھگڑے دورہوجائیں گے ۔سلام بہت قدیم ہے ،حضرت آدَم علیہ السلام سے چلاآرہا ہے ۔

سوال :حضورسراپا نورصلی اللہ علیہ والہ وسلم کے والدمحترم اور دادا جان کا نام کیا تھا؟

جواب :داداجان کانام حضرت عبدالمطلب رضی اللہ عنہ اوروالدِگرامی کا نام حضرت عبد اللہ رضی اللہ عنہ تھا ۔

سوال: کیا قرآن کریم دیکھ کر پڑھنا بہترہےیا زبانی ؟

جواب:قرآنِ کریم دیکھ کر پڑھنا افضل ہے، اس میں دیکھنابھی عبادت،چُھونا بھی عبادت ہے۔

سوال:نبیِ پاک صلی اللہ علیہ والہ وسلم کی سیرت پڑھنے کے بارے میں آپ کیا فرماتے ہیں ؟

جواب:نبی پاک صلی اللہ علیہ والہ وسلم کی سیرت کی جتنی معلومات بڑھتی ہیں تو عشقِ نبی میں اضافہ ہوتاہے اورعشقِ نبی میں اضافہ ہی ہونا چاہیئے ۔مکتبۃ المدینہ نے سیرتِ مصطفی(صلی اللہ علیہ والہ وسلم) پر کتابیں شائع کی ہیں،ایک کتاب”آخری نبی کی پیاری سیرت“شائع ہوئی ہے، یہ کتاب ضرور پڑھیں ۔

سوال:کیا دینی کتاب خرید کرپڑھنی چاہیئے؟

جواب:دِینی کتابیں خریدکر پڑھیں ،اس سے زیادہ برکتیں ملیں گی۔ تحفے میں ملے تو اس جیسی کتاب خرید کر کسی کو تحفہ دے دیں۔

سوال :مفتی وقارالدین قادری رحمۃ اللہ علیہ سے آپ نے کتناعلم حاصل کیا ؟

جواب:مجھے مفتی وقارالدین قادری رحمۃ اللہ علیہ کی صحبت حاصل رہی ،ان کی خدمت میں آنا جانارہتاتھا،مَیں نے اِن سے وہ مسائل سیکھے جو عام طور پرکتابوں کے مطالعے سے حاصل نہیں ہوتے ،میں ان سے بہت مسائل پوچھتاتھا ،مجھے مسائل سیکھنے کی حرص تھی ،مفتی صاحب خود فرماتے ہیں کہ میں ان کے پاس تقریباً 22سال جاتارہا ہوں ۔

سوال: ٹینشن(Tension) دورہونے کا کوئی وظیفہ بتادیں ؟

جواب:اوّل وآخر دُرودشریف پڑھ کر’’یَابَاعِثُ یَانُوْرُ‘‘روزانہ 11 بار سوتے وقت دل پرسیدھا ہاتھ رکھ کر پڑھیں ،9فائدے حاصل ہوں گے جن میں سے ایک فائدہ ٹینشن دورہونا بھی ہے۔

سوال:اِس ہفتے کارِسالہ ”امیر اہلسنّت سے سائنس کے بارے میں 10 سوال جواب“ پڑھنے یاسُننے والوں کوجانشینِ امیراہل سنت نے کیا دُعا دی ؟

قراٰن و حدیث کی تعلیمات سے لوگوں کے دلوں کو روشن کرنے اور انہیں دینی باتیں بتانے کے لئے عاشقانِ رسول کی دینی تحریک دعوتِ اسلامی کے تحت 14 ربیع الاول 1445ھ بمطابق 30 ستمبر 2023ء بروز ہفتہ کی شب مدنی مذاکرے کا انعقاد کیا گیا۔

مبلغِ دعوتِ اسلامی نے تلاوتِ قراٰن سے مدنی مذاکرے کا آغاز کیا اور نعت خواں اسلامی بھائی نے حضور پُر نور حضرت محمد صلی اللہ علیہ و سلم کی بارگاہ میں نذرانۂ عقیدت پیش کیا۔

تلاوت و نعت کے بعد مدنی مذاکرے کے سوالات کا سلسلہ ہوا جس میں بانیِ دعوتِ اسلامی حضرت علامہ مولانا محمد الیاس عطار قادری رضوی ضیائی دامت بَرَکَاتُہمُ العالیہنے عاشقانِ رسول کی تربیت کرتے ہوئے انہیں مدنی پھولوں سے نوازا جن میں سے چند درج ذیل ہیں:

سوال:ربیع الاول میں کی جانے والی لائٹنگ کب تک چلانی چاہیئے ؟

جواب: جب لوگوں کی چہل پہل ختم ہوجائےاورکوئی اسے دیکھنے والانہ ہوتو لائٹنگ بند کر دینی چاہیئے ۔12 ربیع الاول کے بعد جھنڈے بھی اتارکر،تہہ کر کے کسی شاپر وغیرہ میں لپیٹ کر رکھ لیں تاکہ بعد میں بھی استعمال کئے جاسکیں۔

سوال:نبی کریم صلی اللہ علیہ والہ وسلم کی مکۂ پاک سے مدینۂ منورہ ہجرت فرمانے کی کیا وجہ تھی ؟

جواب: صحابۂ کرام علیہم الرضوان نے مکہ پاک سے حبشہ 2مرتبہ ہجرت فرمائی تھی ۔کفارِ مکہ مسلمانوں پر ظلم وستم کے پہاڑتوڑنے لگے تھے جبکہ مدینہ شریف والے ایمان لے آئے تھے ،یہاں مکہ شریف جیساماحول نہیں تھا ،اس لیے یہاں کے مسلمانوں نے مدینہ شریف آنے کی دعوت دی ،نبیِ کریم صلی اللہ علیہ والہ وسلم نے صحابہ ٔکرام کو وہاں ہجرت کرنے کی اجازت دے دی اورپھر خود بھی مدینہ ٔمنورہ ہجرت فرمائی ۔

سوال : چوری وغیرہ کے معاملات بڑھنے کی وجہ سے باہر نکلتے ہوئے ڈرلگتاہوتو کوئی وظیفہ ارشادفرمادیں ۔

جواب : گھرسے نکلنے کی دعا بِسْمِ اللَّهِ تَوَكَّلْتُ عَلَى اللَّهِ، لَا حَوْلَ وَلَا قُوَّةَ اِلَّا بِاللَّهِ،اول وآخر درودشریف کے ساتھ پڑھ لیا کریں۔ اسی طرح اپنی تمام چیزوں پریَاجَلِیْلُ10مرتبہ پڑھ کر دم کرلیاکریں۔حفاظت کے ظاہری اسباب بھی اختیارکرنے چاہئیں ،مثلاً قیمتی چیزیں اورزیادہ رقم لےکرباہر نہ نکلیں ،ایسے علاقے /گلیاں جو ویران ہوں وہاں اکیلے نہ جائیں ،رات میں جب چہل پہل بند ہوجائے اس وقت گھر سے باہر نہ نکلیں ۔

سوال: نیک اعمال رسالے پر عمل کرکے اپنے اعمال کا جائزہ لینے کا کیا فائدہ ہے ؟

جواب: نیک اعمال کا رسالہ حاصل کریں ،اس کا مطالعہ کریں ،روزا نہ اس کے مطابق اپنے اعمال کا جائزہ لیں ،اس کی برکت سے نیک بنیں گے ،نیک اعمال میں اضافہ ہوگا،گناہوں سے بچنے کی صورتیں بنیں گی ۔ہر ایک کو چاہیئے کہ اپنے اعمال کا روزانہ جائزہ لے۔

سوال: کیا را ت کو ناخن کاٹ سکتے ہیں ؟

جواب:جی ہاں !

سوال:دعوتِ اسلامی میں ذمہ داری کے لیے کیا”عطاری“(یعنی امیرِ اہلِ سنت حضرت علامہ مولانامحمد الیاس قادِری کا مُرید/طالب ) ہونا ضروری ہے ؟

جواب:نہیں ! اہل ہونا ضروری ہے ،اہل ہے تو نقشبندی ،چشتی ،سہروردی ،قادری ،عطاری جو بھی ہواُسے ذمہ داری دی جاتی ہے۔

سوال : عالمِ دِین کی تعظیم کے کیا فوائد ہیں ؟

جواب : اسلام میں عالمِ دِین کا بڑادرجہ ہے ۔عالمِ دین کو تو تعظیم کی نیت سے دیکھنا بھی عبادت ہے ۔

سوال: حسدکا کیا معنی ٰ ہے ؟

جواب: کسی کی نعمت کے بارے میں یہ چاہنا کہ اُس سے یہ نعمت چھن جائے ۔یہ حسدہے ،ایساشخص گو یا اللہ پاک کی تقسیم پر راضی نہیں۔بندے چاہیئے کہ اللہ پاک نے جن حالات میں رکھا ہے بندہ اس پر راضی رہے ۔شہرت کی چاہت بھی حسد پیدا کرتی ہے ،اس سےبچنے کی کوشش کی جائے۔

سوال: اِس ہفتے کارِسالہ ”ارشاداتِ حضرت سری سقطی “ پڑھنے یاسُننے والوں کوامیرِاہلِ سنت دامت بَرَکَاتُہمُ العالیہ نے کیا دُعا دی ؟

یوم ولادتِ مصطفٰے صلَّی اللہ علیہ واٰلہٖ وسلَّمکی خوشی میں دعوت اسلامی کے زیر اہتمام عالمی مدنی مرکز فیضان مدینہ کراچی میں مدنی مذاکرے کا سلسلہ جاری ہے۔ 23 ستمبر 2023ء بمطابق 7 ربیع الاول 1444ھ کو بھی ہفتہ وار مدنی مذاکرہ ہوا جس میں شہر کراچی اور پاکستان کے دیگر شہروں سے عاشقانِ رسول نےفیضانِ مدینہ کراچی آکر جبکہ ملک و بیرون ملک کے کثیر اسلامی بھائی بذریعہ مدنی چینل شریک ہوئے۔

اس مدنی مذاکرے میں عاشقانِ رسول کی جانب سے مختلف موضوعات پر سوالات کئے گئے جس کے امیرِ اہلِ سنت حضرت علامہ مولانا محمد الیاس عطار قادری رضوی دامت بَرَکَاتُہمُ العالیہ نے علم و حکمت سے بھرپور جوابات ارشاد فرمائے۔

مدنی مذاکرے کے چند مدنی پھول ملاحظہ کیجئے:

سوال:حضرتِ سیِّدُنا شیخ عبدُالحق محدث دِہلوی رحمۃُ اللہِ علیہ کے پیر و مُرشِد کا نام کیا تھا؟

جواب:حضرت سیِّدُنا عبدالوہاب متقی رحمۃُ اللہِ علیہ ۔

سوال:جُلوسِ میلاد میں کھانے پینے کی چیزیں لُوٹنا( جمع) کرنا کیسا؟

جواب: جُلوسِ میلاد میں کھانے پینے کی چیزیں لُٹانے سے چیزیں ضائع ہوتی ہیں۔ہاں،تقسیم کریں اور تقسیم کرنے والے اِس بات کو یقینی بنائیں کہ چیزیں پھینکنے کے بجائے لوگوں کے ہاتھوں میں دیں۔

سوال:جُلوسِ میلاد میں کس طرح شرکت کی جائے؟

جواب: جُلوسِ میلاد سال میں ایک مَرتبہ آتا ہے،اِس لیے باوُضو،مدنی پرچم ہاتھ میں پکڑ کر، نگاہیں جھکائے ، یہ تصور کرتے ہوئے کہ حضرت بی بی آمنہ رضی اللہُ عنہا کے گھر میرے پیارے آقا صلی اللہ علیہ واٰلہٖ وسلم کی آمد ہوئی ہے اور میں اِستقبال کے لیے جا رہا ہوں، اِس سے دِل میں رِقت پیدا ہوگی اور لطف و سُرور آئےگا۔

سوال: بچوں کو جُلوسِ میلاد میں شرکت کروانے کا کیا فائدہ ہوتا ہے؟

جواب:جُلوسِ میلاد میں شرکت کا فائدہ دیکھنا ہو تو مجھے دیکھ لیں۔والد صاحب کو چاہیے کہ بچوں کو جُلوسِ میلاد میں شرکت کروائیں، میں بچپن سے ہی محافلِ نعت میں شرکت کیا کرتا تھا۔

سوال:اپنا جھنڈا دوسرے جھنڈوں میں مکس نہ ہو، اِس کے لیے کیا احتیاط کی جائے؟

جواب: اپنے ذاتی جھنڈے پر کوئی نشانی بنا لیں(مثلاً چاند تارا /کوئی پھول بنالیں وغیرہ) تاکہ اورجھنڈوں میں مکس(Mix) ہو بھی جائے تو اپنے جھنڈےکی پہچان ہو سکے۔

سوال: مسلمان کیسا ہوتا ہے؟

جواب: مسلمان شریعت کا پابند ہوتا ہے۔

سوال:میدانِ عرفات میں حاجیوں کے جو لمحات گزرتے ہیں وہ کیسے ہوتے ہیں؟

جواب: بہت قیمتی لمحات ہوتے ہیں۔

سوال:تخصص فی الحدیث کیا ہوتا ہے؟

جواب: جو درسِ نظامی (عالم کورس) کرنے کے بعد حدیثِ پاک کا علم حاصل کرتے ہیں، اِس کورس کے مکمل کرنے والے کو ”مُتَخَصِّصْ“ کہتے ہیں یعنی وہ حدیث کا ماہر(Specialist)ہے۔

سوال:فطری اور قدرتی بات میں کیا فرق ہے؟

جواب: فطری اور قدرتی بات دونوں کے ایک ہی معنیٰ ہیں۔

سوال:خود پسندی کسے کہتے ہیں؟

جواب:کسی میں کوئی خوبی ہو تو وہ اسے اپنا کمال سمجھے اور اُس کے زَوال سے بے خبر ہوجائے اسے عربی میں ”عُجب“ کہتے ہیں، یہ بڑی بُری چیز ہے۔یہ لوگوں میں پائی جاتی ہے، اِسی وجہ سے بعض لوگ ”میں میں“ کرتے رہتے ہیں۔ اِس کا حل یہ ہے کہ بندہ یہ ذہن بنائے کہ یہ خوبی اللہ پاک کی عطا سے ہے وہ جب چاہے گا اسے واپس لے لے گا۔

سوال: اِس ہفتے کا رِسالہ” دُرُودِ پاک کے فضائل“ پڑھنے سننے والے کو امیر اہلسنت دامت بَرَکاتُہمُ العالیہ نے کیا دُعا دی؟

جواب: یا رَبِّ کریم ! جو کوئی 17 صفحات کا رِسالہ ’’دُرُودِ پاک کے فضائل‘‘ پڑھ یا سُن لے، اُسے کثرت سے دُرُود و سلام پڑھنے کی توفیق دے اور اس کی ماں باپ سمیت بے حساب مغفرت فرما۔اٰمین بجاہِ النَّبی الامین صلی اللہ علیہ واٰلہٖ وسلم ۔

23 صفر المظفر 1445ھ بمطابق 9ستمبر2023ء  بروز ہفتہ عاشقانِ رسول کی دینی تحریک دعوتِ اسلامی کے تحت عالمی مدنی مرکز فیضانِ مدینہ کراچی میں مدنی مذاکرہ منعقد ہوا جس میں شہرِ کراچی کے مختلف علاقوں سے عاشقانِ رسول نےفیضانِ مدینہ کراچی آکر جبکہ دیگر شہروں اور ملکوں سے کثیر اسلامی بھائی بذریعہ مدنی چینل شریک ہوئے۔

اس مدنی مذاکرے میں عاشقانِ رسول کی جانب سے مختلف موضوعات پر سوالات کئے گئے جس کے امیرِ اہلِ سنت حضرت علامہ مولانا محمد الیاس عطار قادری رضوی دامت بَرَکَاتُہمُ العالیہ نے علم و حکمت سے بھرپور جوابات ارشاد فرمائے۔

مدنی مذاکرے کے چند مدنی پھول ملاحظہ کیجئے:

سوال: اعلیٰ حضرت امام احمدرضا خان رحمۃ اللہ علیہ کے عرس کے موقع پرگھرمیں کس اندازسے محفل کا اہتمام کیا جائے ؟

جواب: دوست احباب کو بلائیں،گھرمیں قرآن خوانی کریں ،سورۂ یٰسین شریف پڑھ لیں ،نعت خوانی کریں ،کچھ پکایاہوتوفاتحہ پڑھ کر مہمانوں کوکھانا کھلادیا جائے ۔

سوال:صفرالمظفرمیں صدقہ وخیرات اس لیے کرنا کہ صفرمیں بلائیں اُترتی ہیں ،ایساکرنا کیسا؟

جواب:صدقہ وخیرات کرنا تو اچھی بات ہے مگرصفرالمظفرکو منحوس سمجھنا غلط ہے ۔اللہ پاک کے آخری نبی،محمدِ عربی صلی اللہ علیہ والہ وسلم فرماتے ہیں :لَا عَدْوَى وَلَا صَفَرَ  یعنی نہ مرض کا اڑکر لگنا ہے، نہ صفر کوئی چیز ہے۔ (بخاری،ج4،ص26،حدیث:5717) زمانۂ جاہلیت سے لوگوں میں یہ وہم عام تھا  کہ صفر کے مہینے میں بلائیں اُترتی ہیں،صفر بلاؤں والا مہینا ہے تونبی ِکریم صلی اللہ علیہ والہ وسلم نے لَا صَفَرَ (صفرکوئی چیزنہیں)فرماکر ان وہمی باتوں کا رد فرما دیا۔ ( عمدۃ القاری،ج14،ص693 ) مراٰۃ المناجیح میں ہے کہ بعض لوگ صفر کے آخری چہار شنبہ(یعنی بدھ) کو خوشیاں مناتے ہیں کہ منحوس شہر(یعنی صفرکا مہینا) چل دیا ،یہ باطل ہے۔(مراٰۃ المناجیح ،ج6،ص257)

سوال: آپ فتاویٰ رضویہ کامطالعہ کس طرح کرتے تھے اورہمیں کس طرح اس کو پڑھنا چاہئے؟

جواب: دعوتِ اسلامی سے بہت پہلے مجھے فتاویٰ رضویہ سے تعارف ، دلچسپی اورتعلق رہا ہے ۔اس وقت فتاویٰ رضویہ تخریج شدہ ،عربی وفارسی عبارتوں کا ترجمہ نہیں تھا ،اس کی 11جِلدیں تھیں ،سمجھنے میں دُشواری ہوتی تھی اب اس کی تخریج ہوچکی ہے ،عربی وفارسی عبارتوں کے ترجمے ہوچکےہیں ۔ اپنی دلچسپی کے مطابق اس کا مطالعہ کریں جیسے جلد نمبر20سے 26 میں ضروریاتِ زندگی سے متعلق مختلف سوال جواب ہیں، پہلےیہ پڑھ لیں ۔البتہ علماءِ اہلسنّت سے رابطے میں رہیں ،جو بات سمجھ نہ آئے ان سے سمجھ لیں۔

سوال: امام محمد بن محمد غزالی رحمۃ اللہ علیہ کے رسالے اَیُّھَاالْوَلَدْ(ترجمہ بنام:بیٹے کو نصیحت)کے بارے میں آپ کیا فرماتے ہیں؟

جواب: ’’بیٹے کونصیحت‘‘ کے نام سے یہ بہت پیارارسالہ مکتبۃ المدینہ سے شائع ہواہے،یہ رسالہ پڑھنے سے بہت ساری معلومات حاصل ہوں گی۔

سوال: امام احمدرضا خان رحمۃ اللہ علیہ کے بارے میں آپ کیا فرماتے ہیں؟

جواب:امام احمد رضاخان رحمۃ اللہ علیہ ہیں تو ہم ہیں،میری تَو شہرت تعلیماتِ رضا( جوکہ قرآن وحدیث کی تعلیمات ہیں )کو عام کرنے کی وجہ سے ہے۔

سوال:آپ ماہِ ر بیع الاو ل میں تمام عاشقانِ رسول (بالخصوص دعوتِ اسلامی والوں )کو کتنا درود شریف پڑھنے کا ہدف ارشاد فرماتے ہیں؟

جواب :ربیع الاول کے پورے مہینے میں 12ارب دُرود شریف پڑھنے کا ہدف ہے، کوشش کریں کہ روزانہ کم ازکم1200مرتبہ دُرود شریف پڑھ لیں۔

سوال: ماہِ ربیع الاول شریف میں نفل روزے رکھنے اور درودوسلام پڑھنے والوں کوامیراہل سنت دامت برکاتہم العالیہ نے کیا دعا دی؟

جواب: یاربِّ کریم !جو کوئی ماہِ ربیع الاول شریف میں 12 ،7یا 3 روزے رکھے یا روزانہ 1200 مرتبہ درودشریف پڑھے یا دونوں کام کرے، ان کو دونوں جہاں کی بھلائیوں سے مالامال فرما اورجس آقا صلَّی اللہ علیہ واٰلہٖ وسلَّم پردُرود و سلام پڑھتے ہیں،اُن کا خواب میں جلوہ دِکھا۔ مرتے وقت بھی ان کی زیارت نصیب فرمایا ۔اٰمِیْن بِجَاہِ خاتم النَّبیّین صلَّی اللہ علیہ واٰلہٖ وسلّم

سوال: اِس ہفتے کارِسالہ”فیضانِ دعوتِ اسلامی“ پڑھنے یاسُننے والوں کوجانشینِ امیراہل سنت نے کیا دُعا دی؟

جواب: یااللہ کریم!جو کوئی تقریباً 40 صفحات پر مشتمل ماہنامہ فیضانِ مدینہ کا خصوصی شمارہ ”فیضانِ دعوتِ اسلامی“ کے کم ازکم 14 صفحات پڑھ یا سُن لے اسے ایمان و عافیت کے ساتھ میٹھے مدینے میں موت نصیب فرما، جنت البقیع مقدر فرما اور جنت الفردوس میں جگہ عطا فرما۔اٰمِیْن بِجَاہِ خاتم النَّبیّین صلَّی اللہ علیہ واٰلہٖ وسلَّم

26 اگست 2023ء بروز ہفتہ بمطابق 09 صفر المظفر 1445ھ کو لوگوں کے مختلف دینی و دنیاوی مسائل میں امداد کرنے والی عاشقانِ رسول کی دینی تحریک دعوتِ اسلامی کے تحت ہفتہ وار مدنی مذاکرے کا انعقاد کیا گیا جس میں اسلامی بھائیوں کی کثیر تعداد نے براہِ راست اور بذریعہ مدنی چینل شرکت کی۔

مدنی مذاکرے کے دوران اسلامی بھائیوں کی جانب سے دینی، اخلاقی، شرعی اور تنظیمی کاموں کے حوالےسے مختلف سوالات کا سلسلہ ہوا جن کے بانیِ دعوتِ اسلامی حضرت علامہ مولانا محمد الیاس عطار قادری رضوی دامت بَرَکَاتُہمُ العالیہ نے علمِ و حکمت سے بھرپور جوابات ارشاد فرمائے۔ان سوال و جواب میں سے بعض درج ذیل ہیں:

سوال: ایک مسلمان کابولنے کا اَندازکیسا ہونا چاہیئے؟

جواب: ایک رِوایت میں ہے: مومن کی زبان کے آگے دِل ہوتا ہے ، اگر وہ بولنے لگتی ہے تو دِل سے رُجوع کرتی ہے،دِل اِجازت دیتا ہو تو بولتی ہے ورنہ خاموش ہو جاتی ہے، جبکہ منافق کی زبان کے پیچھے دِل ہوتا ہے، جب زبان بولنا چاہتی ہے تو دِل سے رُجوع نہیں کرتی اور بول دیتی ہے، اِسی لئے کہا جاتا ہے: ”پہلے تولو بعد میں بولو“ عام طور پر بندہ بول کر پچھتاتا ہے خاموش رہ کر نہیں۔

سوال: کیا آپ (امیر اہلِ سنت دامت برکاتہم العالیہ)نے کبھی بہت ٹھنڈے پانی سے وُضو کیا ہے؟

جواب: ہم بغداد شریف سے مقدس مقامات کی زیارت کے لیے ” موصل“ گئے تھے، وہاں حضرت یونس علیہ الصّلوٰۃُوالسّلام کا مزارِمبارک بھی ہے۔ وہاں ہم نے ظہر کی نماز کے لئے بہت ٹھنڈے پانی سے وُضو کیا تھا۔

سوال: کیا مسجد میں گرمیوں میں ضَرورتاً AC اور سردیوں میں ہیٹر لگانا چاہیئے؟

جواب : جی ہاں میرا ذہن تو یہی ہے تاکہ لوگوں کا مسجد میں دِل لگے، سردیوں میں مَساجد میں وُضو کے لئے گرم پانی کا بھی اِہتمام کرنا چاہیئے، یہ سب کام کرنے سے پہلے دارُالافتاء اہل سنَّت سے شرعی رہنمائی ضرور لی جائے۔

سوال: کیا مَساجد بھی جنَّت میں جائیں گی؟

جواب: جی ہاں، میں نے ملفوظاتِ اعلیٰ حضرت میں اِسی طرح پڑھاہے کہ مساجد بھی جنّت میں جائیں گی۔

سوال : کیا مَساجد میں جوتوں کی حفاظت اور صفائی ستھرائی کا اِہتمام،نیز بڑی عمر کے نمازیوں کے لئے کرسیاں ہونی چاہئیں ؟

جواب: مَساجد میں جوتوں کی حفاظت،اِستنجا ءاور وُضو کرنے کی سہولیات کااے ون اِنتظام ہونا چاہیئے۔صفائی ستھرائی کا خوب اِہتمام ہو اور بڑی عمر/بیمار نمازیوں کے لئے کرسیوں کا بھی اِہتمام ہونا چاہیئے۔

سوال: بعض لوگ صرف انجینئر اور ڈاکٹر بننے اور اِس شناخت کے لئے بہت زیادہ کوشش اور محنت کرتے ہیں، مگربطورِ مسلمان شناخت کے لئے کوشش نہیں کرتے،اِس بارے میں آپ کیا فرماتے ہیں؟

جواب:بطورِ مسلمان شناخت کے لئے کوشش کرنی چاہیئے،اِیمان کی حفاظت کی بھی فکر کرنی چاہیئے،اِیمان کامیابی کے لئے شرط ہے، اللہ پاک ہم سب کے اِیمان کی حفاظت فرمائے۔ اِس کے لئے نیک اَعمال کے مُطابق زندگی گزارئیے اور مدنی قافلوں میں سفر کیجیے۔

سوال:بُرے خواب سے بچنے کا کوئی وَظیفہ بتادیجئے۔

جواب:سونے سے پہلے 21 مَرتبہ یَامُتَکَبِّرُ پڑھ لینا چاہیئے، اِن شاءَ اللہُ الکریم بُرے خوابوں سے بچت ہو گی۔

سوال : دعوتِ اسلامی کے 42 سال مکمل ہونے پر 2 ستمبر کو ”یومِ دعوتِ اسلامی“ کس طرح منایا جائے ؟

جواب:میں مدنی قافلے والا ہوں، اِس موقع پر3،2،1ستمبر2023ء ( جمعہ، ہفتہ اور اتوار) تمام دعوتِ اسلامی کے مَرحومین کے اِیصالِ ثواب کی نیت سے مدنی قافلوں میں سفر کریں اور اسلامی بہنیں اپنے محارم کو مدنی قافلوں میں سفر کروائیں اور 2 ستمبر کو اپنے گھروں پر دعوتِ اسلامی کا پرچم بھی لگائیں۔

سوال : اِیمان کی حفاظت کے لئے ”کفریہ کلمات کے بارے میں سوال جواب“ کتاب پڑھنے کے بارے میں آپ کیا فرماتے ہیں؟

جواب : اِیمان کی حفاظت کے تعلق سے ”کفریہ کلمات کے بارے میں سوال جواب“ کتاب لا جواب ہے، اِس کا مُطالعہ ہر ایک کو کرنا چاہیئے ۔

سوال : دَروازے پر کیا لکھ کر لگانا چاہیئے ؟

جواب: بِسْمِ اللہِ الرَّحْمٰنِ الرَّحِیْم لکھ کر لگانا چاہیئے۔ اِسی طرح گھر میں آیۃ الکرسی بھی لکھ کر لگانی چاہیئے، اِن شاءَ اللہ اِس کی بَرکتیں ملیں گی۔

سوال : ”جادو کے بارے میں معلومات“ رسالہ پڑھنے والوں کو امیرِ اہلِ سنَّت دامت بَرَکاتُہمُ العالیہ نے کیا دعا دی ہے؟

19 اگست  2023ء بروز ہفتہ عالمی مدنی مرکز فیضانِ مدینہ کراچی میں مدنی مذاکرے کا انعقاد کیا گیا۔

معمول کے مطابق تلاوتِ قراٰن و نعتِ رسولِ مقبول صلی اللہ علیہ و سلم کے بعد ملک و بیرونِ ملک کے عاشقانِ رسول کی جانب سے امیرِ اہلِ سنت حضرت علامہ مولانا ابوبلال محمد الیاس عطار قادری ضیائی دامت بَرَکَاتُہمُ العالیہ سے مختلف سولات ہوئے جن کے آپ دامت بَرَکَاتُہمُ العالیہ نے علم و حکمت بھرے جوابات ارشاد فرمائے۔ان میں سے بعض درج ذیل ہیں:

سوال: طبیعت میں ٹھہراؤ کس طرح لایاجائے؟

جواب: غصیلے شخص میں جذباتی پن زیادہ ہوتاہے یا زیادہ عمرہونے سے بھی بندہ غصیلا ہوجاتاہے ۔اس کا حل یہ ہے کہ غصے کو باتکلف کنٹرول کرے،دینی کتابوں کا مطالعہ کرکے غصے کے نقصانات جاننے کی کوشش کی جائے۔غصے پر قابو پانےکے فضائل پر نظررکھی جائے ۔ جذباتی اندازکی وجہ سےپہلے جو نقصانات ہوئے ہوں تو انہیں یاد کرکے اپنے اندازکو کنٹرول کیا جاسکتاہے ۔بعض اوقات جلدبازی کی وجہ سے بھی غصہ آجاتاہے تو کوشش کرکے اسے بھی کنٹرول کیا جائے۔

سوال: نیکی کی دعوت کیسے دی جائے؟

جواب:حکمتِ عملی کے ساتھ ،سامنے والے کی نفسیات کے مطابق نیکی کی دعوت دی جائے؟

سوال: کچھ لوگ صفرکے مہینے کو منحوس سمجھتے ہیں ،اس کی کیا وجہ کیا ہے؟

جواب: اسلام سے پہلے بھی لوگ اسے منحوس سمجھتے تھے،اسلام نے اسے منحوس کہنے، سمجھنے سےمنع کیاہے ۔مکتبۃ المدینہ کی کتاب بدشُگونی پڑھئے ۔ماہِ صفر ماہِ خیرہے ،اس میں کئی اولیائے کرام کے عُرس مبارک ہوتے ہیں ۔اِمامِ اہلسنت،سیدی اعلیٰ حضرت اما م احمد رضا خان رحمۃ اللہ علیہ کا عرس بھی اسی ماہِ صفرمیں ہوتاہے ۔اس لیے دعوت ِ اسلامی والے اسے ماہِ رضا بھی کہتے ہیں۔

سوال: کیااسلامی مہینوں میں بھی کوئی مہینا 31دن کا ہوتاہے؟

جواب:نہیں،اسلامی مہینا 29 یا 30دن کا ہوتاہے۔

سوال: کون سی دعائیں افضل ہیں؟

جواب: ماثورہ دعائیں یعنی وہ دعائیں جوقرآن وحدیث میں آئی ہیں، وہ دعائیں پڑھنا افضل ہے۔

سوال:کیا رات کو برتن دھو کر سونا چاہئے؟

جواب: حدیث پاک ہے: برتنوں کا دُھلا رکھنا اور صحن کا صاف رکھنا غنا کا باعث ہے۔ (طیبی، کنزالعمال ص:277) رات کو برتن دھونے کی تاکیدپڑھی نہیں۔

سوال : آپ کو اعلیٰ حضرت امام احمد رضا خان رحمۃ اللہ علیہ کا تعارف کب ہوا؟

جواب : میں چھوٹی عمر میں نعتوں میں” رضا“ تخلص سنتاتھا تو یوں تعارف ہوا۔ ایک شخص نے آپ کا نام لے کر رحمۃ اللہ علیہ کہاتو میں نے اس سے پوچھاکہ کیا یہ کوئی بزرگ تھے ؟تو انہوں نے مجھےاعلیٰ حضرت کا تعارف کروایا۔

سوال: اِس ہفتے کارِسالہ ” امیرِ اہلِ سنت سے تلاوتِ قرآ ن کے بارے میں سوال جواب “ پڑھنے یاسُننے والوں کوجانشین امیراہل سنت نے کیا دُعا دی؟

جواب: یا اللہ پاک !جوکوئی 14صفحات کا رسالہ ’’ امیرِ اہلِ سنت سے تلاوتِ قرآ ن کے بارے میں سوال جواب ‘‘پڑھ یا سُن لے اسے قرآنِ کریم کی تلاوت کرنے اور اس پر عمل کرنے کی توفیق عطا فرما اور اس کی بے حساب مغفِرت فرما۔اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم۔

25 محرم الحرام 1445ھ بمطابق 12 اگست 2023ء بروز ہفتہ عاشقانِ رسول کی دینی تحریک دعوتِ اسلامی کے تحت عالمی مدنی مرکز فیضانِ مدینہ کراچی میں مدنی مذاکرہ منعقد ہوا جس میں شہرِ کراچی کے مختلف علاقوں سے عاشقانِ رسول نےفیضانِ مدینہ کراچی آکر جبکہ دیگر شہروں اور ملکوں سے کثیر اسلامی بھائی بذریعہ مدنی چینل شریک ہوئے۔

اس مدنی مذاکرے میں عاشقانِ رسول کی جانب سے مختلف موضوعات پر سوالات کئے گئے جس کے امیرِ اہلِ سنت حضرت علامہ مولانا محمد الیاس عطار قادری رضوی دامت بَرَکَاتُہمُ العالیہ نے علم و حکمت سے بھرپور جوابات ارشاد فرمائے جن میں سے بعض درج ذیل ہیں:

سوال: یوم آزادی منانے کا طریقہ کیساہونا چاہئے؟

جواب: شریعت کے مطابق ہوناچاہئے ،کوئی بھی ایساانداز اختیارنہ کیا جائے جس سے کسی کو تکلیف ہو۔

سوال:والدین بچوں کو جشن آزادی شریعت کے مطابق منانے کی ترغیب کس طرح دلائیں؟

جواب:جو ماں باپ خود شریعت کے مطابق جشن آزادی نہیں مناتے وہ کس طرح سمجھائیں گے، انہیں پہلےخود ایسے کاموں سے باز آنا ہوگا اورجو دین کا درد رکھنے والے والدین ہیں انہیں چاہئے کہ 14اگست آنے سے پہلے بچوں کو سمجھائیں کیونکہ 14،اگست کو سمجھانا اتنا مفید نہیں ہوگا۔14اگست آنے سے پہلے مسجدکے خطیبوں کو چاہئے کہ خطبہ جمعہ میں شریعت کے مطابق جشن آزادی منانے کا ذہن بنائیں، اگرہرمسجدمیں ایساہوتو پھر بہترنتائج آئیں گے۔

سوال : انسانوں سے پہلے زمین پر کون سی مخلوق تھی؟

جواب : انسانوں سے پہلے جنات زمین پر آبادتھے۔

سوال: کسی روایت یا حدیث کو سن کر یہ کہہ کر انکارکر دیناکہ پہلے توکبھی نہیں سنی ،ایساکرنا کیسا؟

جواب: ایسانہیں کہنا چاہئے،یہ بڑی جرأت ہے ،بلکہ علماء سے رجوع کیا جائے؟

سوال: جشن آزادی کے موقع پر مساجدمیں محافلِ نعت منعقدکرنا کیسا؟

جواب: جی ہاں ! اس موقع پر مساجدمیں تلاوتِ قرآن ،دُرودخوانی اورمحافلِ نعت کا انعقادکیاجائے ۔محلے محلے ،گلی گلی اورہرہرمسجدمیں نیکی کی دعوت کا سلسلہ ہو،نماز اور دیگرموضوعات پر بیانات کئے جائیں۔نمازظہرکے بعد دورکعت شکرانے کے نوافل اداکریں ۔اس مرتبہ 14اگست پیرشریف کوہے ،پیرکو تو روزہ رکھنا سنت ہے ،پیرکوروزہ رکھیں اوراس میں جشن آزادی کے شکرکی نیت بھی کرلیں ۔

سوال:آجکل مہنگائی کی وجہ سے جاب اورکاروبارکی مصروفیت ہے پھر گھربارکے کام الگ ہوتے ہیں ایسے حالات میں دین کا کام کیسے کریں؟

جواب:دین کا کام کرنے کے لیے بے روزگاراورفارغ ہونا ضروری نہیں ہے ،ہربندے کی گھربارکی کوئی نہ کوئی مصروفیت ہوتی ہی ہے۔ اصل میں جذبہ چاہئے ،جذبہ ہوگا تو دین کے کام کے لیے وقت نکال ہی لیں گے۔بندہ شادیوں اورولیموں میں چلاہی جاتاہے ۔جس کودین کا کام کرنا ہے اس کے لیے راستے ہزار،جان ہتھیلی پر لے کروہ دین کا کام کررہے ہوتے ہیں ۔کیسے کیسے خطرناک علاقوں میں جاکر اسلامی بھائی نیکی کی دعوت دیتے ہیں ۔جن کو دین کا کام نہیں کرنا وہ پھولوں کی سیج پر بیٹھ کر بھی نہیں کرتے اورجنہیں کرنا ہوتا ہے وہ کانٹوں کی باڑ سے الجھتے ہوئے نکل جاتے ہیں اوردین کا کام کرتے ہیں۔ انبیائے کرام نے کیسی کیسی قربانیاں دیں۔ وہ جان ہتھیلی پر لے کرراہ خدا میں سفرکرتے تھے ۔کیا نوکری،کیا تجارت ،کیامصروفیت ،ہرصورت میں ہمیں دین کا کام کرنا چاہئے ۔وقت نکالنا چاہئےوقت نکل جائے گا۔ ڈبل بارہ گھنٹے کوئی بھی کام نہیں کرتا۔فکس اوقات میں ہی کام ہوتاہے ۔بس ہمیں دین کام کرناچاہئے۔دنیاوی کام کے دوران بھی نیکی کی دعوت دی جاسکتی ہے ۔

سوال : وکیل کس طرح دوسروں کوسمجھاسکتاہے؟

جواب : پریکٹس کے دوران اگرکوئی ان سے ناجائز کام کروانا چاہے تو یہ اسے سمجھائیں کہ یہ کام مَیں نہیں کروں گا اورکسی دوسرے سے بھی نہ کرواؤ۔دنیا کے تھوڑے سے فائدے کے لیے اپنی عاقبت داؤ پر نہ لگاؤ۔یہ نیکی کی دعوت ہے ۔ وکلاء دینی مطالعہ بھی کریں تاکہ شرعی معلومات میں اضافہ ہوجس سے نیکی کی دعوت دینے میں آسانی ہوگی ۔

سوال: اِس ہفتے کارِسالہ ”گناہوں کے 5دنیاوی نقصانات“ پڑھنے یاسُننے والوں کوامیراہل سنت دامت برکاتہم العالیہ نے کیا دُعا دی ؟

جواب: یاربَّ المصطفیٰ!جوکوئی 17صفحات کا رسالہ ’’گناہوں کے5دنیاوی نقصانات ‘‘پڑھ یا سُن لے اُسے ہمیشہ اچھے کام کرنے اوربُرے کاموں سے بچنے کی توفیق عطافرمااورقیامت کے روز سب سے آخری نبی صلَّی اللہ علیہ واٰلہٖ وسلَّم کی شفاعت نصیب فرما ۔اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔

5 اگست 2023ء  بمطابق 18 محرم الحرام 1445ھ بروز ہفتہ عاشقانِ رسول کی دینی تحریک دعوتِ اسلامی کے تحت عالمی مدنی مرکز فیضانِ مدینہ کراچی میں مدنی مذاکرے کا انعقاد کیا گیا جس میں براہِ راست اور بذریعہ مدنی چینل اسلامی بھائیوں کی کثیر تعداد نے شرکت کی۔

مدنی مذاکرے کا آغاز تلاوتِ کلامِ پاک اور نعتِ رسولِ مقبول صلَّی اللہ علیہ واٰلہٖ وسلَّم سے کیا گیا جس کے بعد عاشقانِ رسول کی جانب سے مختلف شعبہ ہائے زندگی سے متعلق سوالات کا سلسلہ ہوا جن کے امیرِ اہلِ سنت حضرت علامہ مولانا محمد الیاس عطار قادری دامت بَرَکَاتُہمُ العالیہ نے علم و حکمت بھرے جوابات دیئے۔

مدنی مذاکرے کے چند سوالات مع جوابات ملاحظہ کیجئے:

سوال: موسمیاتی مسائل ایک حقیقت ہے، امیراہل سنت آپ ارشادفرمائیں کہ اس کا کیا حل ہے ؟

جواب: پہلاتو یہ ہے کہ ہم دعاکریں کہ اےاللہ پاک!ہمیں دنیاوآخرت میں عافیت عطافرما،دوسرایہ کہ شجرکاری کریں جس طرح FGRF کررہی ہے اگرلاکھوں کروڑوں پودے لگائے جائیں اورپودے لگا کر اس کی دیکھ بھال کرکے درخت بنایا جائے تو موسمیاتی مسائل کا حل ہوسکتاہے۔ اسی طرح پانی اورکھانے پینے کی اشیا کو ضائع ہونے سے بچائیں،مگران دونوں کو بے دردی سے ضا ئع کیا جاتاہے ۔ شاید اسی وجہ سے ملک وبیرون ملک مہنگائی کاریشو بڑھ گیاہے۔

سوال:علم حاصل کرنے کے کیا فوائد ہیں؟

جواب:علم کے بہت فوائد ہیں،علم دین حاصل کرنے سے کئی مسائل حل ہوجاتے ہیں۔

سوال : کیا جنوں اورفرشتوں کو ایصال ثواب کیا جاسکتاہے؟

جواب : جی ہاں ! مسلمان جنوں اورفرشتوں کو ایصال ثواب کیا جاسکتاہے اسی طرح انبیاء اوررسولوں کوبھی ایصال ثواب ہوسکتاہے ۔سید المعصومین ،تمام نبیوں کے سردارحضرت محمد مصطفی صلی اللہ علیہ والہ وسلم کوبھی ایصال ثواب کیا جاسکتاہے۔

سوال: بنگلادیش میں ڈینگی کا مرض بڑھ گیا ،اس کا روحانی علاج بتادیجئے ۔

جواب: روزانہ گیارہ(11)مرتبہ ’’یاسلام ‘‘پڑھ کر پانی پر دم کرکےمریض کو پلائیں اوراٹھتے بیٹھتے ”یَاسَلَامُ “کا وردکرتے رہیں، دوسراروحانی علاج یَا شافیَ الأمراض سو(100)مرتبہ پڑھ کر مریض کو دم کریں۔

سوال: بولنے اورلکھنے میں کیا احتیاط کی جائے؟

جواب: وہی بولاجائے اورلکھا جائے جس سے آخرت میں شرمندہ نہ ہونا پڑے۔قیامت میں ہر حرف کا حساب ہے اس لیے بولنے میں بھی احتیاط کی جائے ۔

سوال:کوئی کام بھی کیا جائے تو اس میں احتیاط لازمی ہے؟

جواب:جی ہاں !جوکام بھی کیا جائے شریعت کے مطابق ہو اورسلیقے سے کیا جائے ۔شادی ہویا نیاز،سبھی میں حکم شریعت پیش نظررکھیں ۔

سوال : بعض لوگ وطن عزیز کی کمزوریاں بیان کردیتے ہیں ،ایساکرنا کیسا؟

جواب : ہمارا ملک عزیز اسلام کا قلعہ ہے،یہاں مساجدمیں نمازیں ہورہیں ہیں، نیکی کی دعوت دینے کی آزادی ہے۔مسلمانوں کا ملک اورآزادوطن ہے ۔ جب ہم باہر جاتے ہیں تو اپنا ملک سستالگتاہے ۔باہربہت مہنگائی ہے اوربھی بیرون ملک میں کئی مسائل ہیں جو لائیو بیان نہیں ہوسکتے ۔اپنے ملک وگھرکو بُراکہنا ویسے بھی عقل مندی نہیں ہے ۔گھریا ماں باپ یا اولاد میں کوئی کمزوری ہوبھی تو بندہ اسے دبائے گا، کسی کے سامنے بیان نہیں کرےگا۔وطن کو مادروطن کہتے ہیں ۔یعنی وطن ماں جیساہوتاہے ۔ہماراوطن اچھا ہے ہمیں اس کی تعمیرکرنی چاہئے ۔اللہ پاک ہمارے وطن اوردنیا بھرمیں امن رکھے، امن ہوگا تو نیکی کی دعوت کی دھوم مچی رہے گی۔

سوال: مفتی دعوتِ اسلامی مولانا حافظ محمد فاروق عطاری مدنی مرحوم کاوصال 18محرم الحرام کو ہوا،آج ان کی شبِ عرس ہے ،آپ کیا فرماتے ہیں؟

جواب: مفتی دعوت اسلامی عالمِ باعمل تھے۔ ان کے کردارسے عمل نظرآتاتھا،ہم نے انہیں قریب سے دیکھا ہے۔بہت جلد جوانی میں ہم سے جداہوگئے،ان کاجمعہ کے دن بعد ِجمعہ مطالعہ کرتے ہوئے اکیلے میں وصال ہوگیا تھا۔

سوال : کہاجاتاہے کہ مرغااذان دیتاہے جبکہ اذان مسجدمیں نمازکے لیے دی جاتی ہے ۔کیا مرغے کے لیے اذان کا لفظ کہہ سکتے ہیں؟

جواب : کوئی حرج نہیں ۔اذان کا لغوی معنی ہے اعلانِ عام ۔حدیثِ پاک میں ہے کہ مرغے کو برامت کہوکہ یہ نمازکے لیے جگاتاہے۔ بعض صحابہ کرام اپنے ساتھ مرغا رکھتے تھے کہ نمازکے لیے جگائےگا۔

سوال: اِس ہفتے کارِسالہ ” جمعہ کے فضائل  “ پڑھنے یاسُننے والوں کوامیراہلسنت نے کیا دُعا دی؟

جواب: یاربَّ المصطفٰے! جو کوئی 25 صفحات کا رسالہ ”جمعہ کے فضائل “ پڑھ یا سن لے اُسے جمعہ کے مبارک دن کے صدقے اپنی رحمتوں سے مالا مال فرمااور اُس کی بے حساب مغفرت فرما ۔اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔

11 محرم الحرام 1445ھ 29 جولائی 2023ء بروز ہفتہ عالمی مدنی مرکز فیضانِ مدینہ کراچی میں علمِ دین سے بھرپور مدنی مذاکرے کا انعقاد کیا گیا جس میں کثیر عاشقانِ رسول کی براہِ راست اور بذریعہ مدنی چینل شرکت رہی۔

معمول کے مطابق مدنی مذاکرے کا آغاز تلاوتِ قراٰن اور نعت شریف سے کرنے کے بعد سوال و جواب کا سلسلہ ہوا جس میں شیخ طریقت، امیرِ اہلِ سنت حضرت علامہ مولانا محمد الیاس عطار قادری رضوی ضیائی دامت بَرَکَاتُہمُ العالیہ نے عاشقانِ رسول کی جانب سے ہونے والے سوالات کے علم و حکمت بھرے جوابات ارشاد فرمائے۔

سوال: اہل بیت سے محبت کا کیافائدہ ہے؟

جواب:فرمان امام حسین رضی اللہ عنہ: جس نے اللہ پاک کی رضا کے لیے ہم سے محبت کی ، پھرشہادت اوردرمیان کی انگلی کو آپس میں ملاکر فرمایا ہم اوروہ قیامت کے دن یوں ہوں گے ۔(معجم کبیر،3/125،روایت 2848)

سوال:امیراہل سنت نے محبتِ امام حسین رضی اللہ عنہ کا اظہارکن الفاظ سے فرمایا؟

جواب:خداکی قسم مجھے امام حسین سے محبت ہے ،جب مَیں چھوٹاتھا ،بول بھی نہیں سکتاتھا ،اس وقت سے ہی مجھے ان سے محبت ہے،امام اہل سنت اعلیٰ حضرت امام احمدرضا رحمۃ اللہ علیہ نے صبرکرنے کا حکم دیا ہے ورنہ واقعہ ٔکربلااورآپ کی شہادت کا تصورآتاہے تو جی چاہتاکہ پھوٹ پھوٹ کر روؤں۔صبرکرنا ہے ،اپنے آپ کوکنڑول کرنا ہے اوراگرکوئی آوٹ آف کنڑول ہوجائے اورخودبخودآنسوبہہ جائیں تو بھی سعادت کی بات ہے ،ہمیں امام حسن اورامام حسین رضی اللہ عنہما سے پیارہے اور ان سے نسبت رکھنے والی چیزوں سے بھی پیارہے، مجھے سیدوں سے پیارہے کیونکہ یہ ان کی اولادہیں ۔

سوال :حضرت امام حسین رضی اللہ عنہ کی عبادت کا اندازکیا تھا؟

جواب: حضرت امام حسین رضی اللہ عنہ دن رات میں ایک ہزارنوافل ادافرمایا کرتے تھے ۔ماہِ رمضان میں مکمل قرآن پاک ختم فرمایا کرتے تھے ۔آپ کو حج کرنے کا بہت شوق تھا ،آپ نے 25حج پیدل کئے۔

سوال: بعض اوقات غربت کی وجہ سے دل پریشان ہوجاتاہے ،یہ پریشانی کیسے دورہو؟

جواب:جب تک اللہ پاک نے زندہ رکھنا مقدرفرمایاہے تو رزق اللہ پاک کے ذمہ کرم پر ہے۔کفایت شعاری اختیارکی جائے ۔ہمیں ناشتے میں پراٹھا،انڈاآملیٹ اورایک آم بھی درکارہے جبکہ ہمارے پیارے آقا صلی اللہ علیہ والہ وسلم جوکی روٹی پرقناعت فرماتے تھے۔ کسی کا محل دیکھ کر اپنی جھونپڑی نہیں گرائی جاتی ۔اپنے پاس جھونپڑاہے تو اللہ پاک کا شکراداکریں ،ایسے لوگ بھی پائے جاتے ہیں جن کے پاس یہ بھی نہیں بلکہ فٹ پاتھ پر سوتے ہیں ۔اوپرنہیں نیچے دیکھیں تو تسلی ہوجائے گی ،صبروہمت سے کام لیں۔اللہ پاک پر بھروسہ اوراعتمادکریں اوراپنے کام اللہ پاک کو سونپ دیں ۔ اللہ پاک نے جو ایمان دیاہے وہ تو انمول ہے، لوگ مجھے ایمان کے بدلے کروڑوں اربوں روپے دیں اورکہیں کہ ایمان دے دو تو میں ہرگزنہ دونگا۔ہمارا نصیب تو بہت بلند ہے کہ دامن مصطفی (صلی اللہ علیہ والہ وسلم )ہمارے ہاتھوں میں ہے لوگ کہتے ہیں ماؤنٹ ایورسٹ (Mount Everest)سب سے بلندچوٹی ہے،مَیں کہتاہوں کہ ایمان ودامن مصطفی (صلی اللہ علیہ والہ وسلم )ہمارے پاس ہونے کی وجہ سے ہمارانصیب اس سے بھی بلندہے ۔بہرحال ہمیں رزق حلال کی تلاش میں ہاتھ پاؤں مارنے چاہئیں اوریہ بات پیش نظررکھنی چاہئے کہ اللہ پاک خالی پیٹ اٹھاتاہے مگرخالی پیٹ سلاتانہیں ۔

سوال: مال جمع کرنے کا جذبہ کیسا؟

جواب: صرف تین جاندارآئندہ کے لیے اپنی خواراک جمع کرتے ہیں ،اس میں انسان فسٹ ہے کہ کماتاہے اورخوب کماتاہے ،اپنے محلے میں دُکان ہے تو دوسرے محلے بلکہ شہراور ملک میں بنانے کی کوشش کرتاہے ،آج کل لوگوں نے زندگی کا مقصدمال کمانا بنا لیاہے،یہ مولیٰ کی محبت کے لیے کب کوشش کریں گے۔ کس کے لیے کماتاہے ؟خاندان والوں کے لیے ؟یادرکھئے خاندان والے تین دن قبرپر فاتحہ پڑھنے کے لیے جاتے ہیں، پھر جمعرات جمعہ جاتے ہیں ،پھرچہلم میں جاتے ہیں توپھر شب برات ،عاشورا یا عیدین پرہی جاتے ہیں ۔پھر برسی پرجاتے ہیں اورپھر برسی بھی آہستہ آہستہ بھول جاتے ہیں ۔ماں باپ کی قبرپر پھربھی لوگ جاتے ہیں لیکن دادا اورناناکی قبرپر کون جاتاہے ۔رہے نام اللہ کا !اگرآپ زیادہ مال چھوڑیں گے تو اولادلڑائی جھگڑے اورخون خرابے اورکورٹ کچہری میں چلے جائے گی ۔اے غریبو! ہمت رکھو،دوسروں کا مال دیکھ کر مت للچاؤ۔

سوال:ہرصحابی کے بارے میں کیا عقیدہ رکھا جائے ؟

جواب:ہرصحابی عادل اورجنتی ہے ،عادل وہ ہوتاہے جو کبیرہ گناہ نہیں کرتااورصغیرہ گناہ پراصرارنہیں کرتایعنی ہوبھی جائے تواس سے فوری توبہ کرلیتاہے ۔

سوال : صاحب استظاعت کسے کہتے ہیں؟

جواب : استطاعت کہتے ہیں طاقت کویعنی کسی کام کی طاقت رکھنے والے کو صاحبِ استطاعت کہتے ہیں ۔زکوۃ اورحج فرض ہونے کے لیے صاحبِ استطاعت وغیرہ اس کی تفصیل بنے گی۔یعنی جس میں زکوۃ کی شرائط پائی جائیں تو زکوۃ کی ادائیگی کے اعتبارسے وہ صاحبِ استطاعت ہے ۔ حج فرض ہونے کی شرائط جس میں پائی جائیں گی تو وہ حج کے اعتبارسے صاحب استطاعت ہے ۔

سوال: دُکانوں ،کلینک،آفس ،شورومزکے لیے مکتبۃ المدینہ نے ایک تختی بنائی ہے جس میں نمازکے لیے دُکان بند کی اطلاع اورپڑھنے والے کو نمازکی ترغیب ہے اس کو لینے اورلگانے والے کے لیے امیراہل سنت نے کیا دعادی ہے ؟

جواب: مکتبۃ المدینہ کی طرف سے شائع شدہ اس تختی پر لکھا ہے کہ ہم نماز کے لیے جاچکے ہیں ،آپ بھی آجائیے یعنی دُکان بند ہے تو تشویش نہ کریں ،نمازپڑھنے کے لیے کچھ دیرکے لیے دکان بند کی گئی ہے ،آپ بھی نمازپڑھنے کے لیے مسجد میں آجائیے۔یہ تختیاں آپ مکتبۃ المدینہ سے خریدیں اورایسے دکانداروں کو ڈھونڈ کر دیں جو یہ تختیاں لگائیں ۔دعائے عطار:یااللہ پاک ! جو یہ تختی کم ازکم ایک بھی خریدلے یامزیدآگے تقسیم بھی کرے ،وہ اس وقت تک دنیا سے رخصت نہ ہوجب تک تیرے حبیب صلی اللہ علیہ واٰلہٖ وسلّم اورحضرت امام حسین رضی اللہ عنہ کا خواب میں دیدارنہ کرلے ۔امین بجاہ النبی الامین صلی اللہ علیہ والہ وسلم ۔

سوال: اِس ہفتے کارِسالہ ”امیراہل سنت کے 130،ارشادات“ پڑھنے یاسُننے والوں کوجانشین امیراہل سنت نے کیا دُعا دی ؟

جواب: یااللہ پاک !جوکوئی 14صفحات کارِسالہ ”امیراہل سنت کے 130،ارشادات“ پڑھ یا سن لے اسے عاملَ سنّت اورشریعتِ مطہرہ کا پابندبنا اوراُسے بے حساب بخش دے ۔اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم۔